ЭСКЕРОН ПОННА СТАТЬЯ 4
Святой дух ивортэ, соос Инмарлэн нылпиосыз луо шуыса
«Асьмеос Инмарлэн нылпиосыз шуыса, Ачиз та Дух асьмелэн духенымы ӵош иворто» (РИМ. 8:16).
25-ТӤ КЫРӞАН Быръем калык
ТА СТАТЬЯЫН a
Витьтонэтӥ Нуналэ Иегова ог 120 христианъёслы паймымон амалэн святой духсэ сётӥз (Учке 1-тӥ но 2-тӥ абзацъёсты.)
1, 2. Кыӵе паймымон учыръёс луизы асьме вакытысь 33-тӥ арын ортчем Витьтонэтӥ Нуналэ?
АСЬМЕ вакытысь 33-тӥ арын ортчись Витьтонэтӥ Нунал. Иерусалимын арнянунал, ӵукна. Одӥг коркан Иисус Христослэн ог 120 дышетскисьёсыз люкаськизы (Ап. уж. 1:13—15; 2:1). Кӧня ке нунал солэсь азьло Иисус косӥз соосты Иерусалиме кыльыны, соос нимысьтыз кузьым басьтыны мед быгатозы шуыса (Ап. уж. 1:4, 5). Мар луиз азьланяз?
2 Библиын гожтэмын: «Малпамтэ шорысь инмысь кужмо сильтӧллы укшась куара кылӥськиз. Пукон корка пушказы пырыса, со куара кужмо шуккиськиз». Собере дышетскисьёслэн йыр вылазы «тыллы укшась люкылӥськись кылъёс» кылдӥзы, но «ваньзы Святой Духен тыр луизы» (Ап. уж. 2:2—4). Сыӵе паймымон амалэн Иегова дышетскисьёсызлы святой духсэ сётӥз (Ап. уж. 1:8). Соос луизы нырысетӥосыз, кинэ Инмар святой духен зырӟиз b но кинлы Иисусэн ӵош инмын кивалтыны оскон сётӥз.
МАР ЛУЭ, КУКЕ ИЕГОВА ХРИСТИАН МУРТЭ ЗЫРӞЕ?
3. Малы асьме вакытысь 33-тӥ арын ортчем Витьтонэтӥ Нуналэ Христослэн дышетскисьёсыз быдэсак оскизы, Инмар соосты святой духеныз зырӟиз шуыса?
3 Тӥ луысалды ке Христослэн дышетскисьёсыз пӧлын, кудъёсыз Витьтонэтӥ Нуналэ одӥг коркан люкаськизы, тӥ ноку но ӧд вунэтысалды, мар отын луиз. Пуктэ син азяды, кызьы йыр вылады ӝуась кыллы укшась маке ваське, но тӥ пӧртэм кылъёсын вераськыны кутскиськоды! (Ап. уж. 2:5—12). Тӥ быдэсак оскысалды, Инмар тӥледыз святой духеныз зырӟиз шуыса. Нош вань зырӟем христианъёс-а сыӵе паймымон амалэн но улонзылэн одӥг вакытаз зырӟемын луо? Ваньмыз уг. Кытысь ми сое тодӥськомы?
4. Вань христианъёс-а, кудъёсыз нырысетӥ даурын улӥзы, зырӟемын вал улонзылэн одӥг вакытаз? Валэктэ.
4 Эскеромы, ку адями зырӟемын луыны быгатэ вал. Асьме вакытысь 33-тӥ арын ортчем Витьтонэтӥ Нуналэ ог 120 дышетскисьёс гинэ святой духен зырӟемын ӧй вал. Со нуналэ ик берлогес Иегова эшшо ог 3 000 адямиосты святой духен зырӟиз на. Со луиз пылатӥськонзы дыръя (Ап. уж. 2:37, 38, 41). Нош мукет аръёсы вань христианъёс пылатӥськонзы дыръя зырӟемын ӧй вал. Самарияысь адямиос святой дух басьтӥзы, пылатӥськемзы бере кӧня ке дыр ортчыса (Ап. уж. 8:14—17). Нош Корнилий но солэн семьяез туж аспӧртэмлыко амалэн зырӟемын луизы. Соос пылатӥськемзылэсь азьло святой духен зырӟемын вал (Ап. уж. 10:44—48).
5. Мар луэ адямиен, куке Иегова сое святой духеныз зырӟе, 2 Коринфъёслы 1:21, 22 лыдэ басьтыса?
5 Нош табере вераськомы со сярысь, мар луэ адямиен, куке Иегова сое святой духеныз зырӟе. Куд-огъёсызлы нырысь секыт оскыны, Иегова соосты бырйиз шуыса. Соос малпаны быгато: «Малы Инмар монэ бырйиз?» Нош мукет зырӟем христианъёслэн мукет шӧдонъёссы кылдо. Кызьы гинэ медаз луы, апостол Павел валэктӥз, мар луэ ваньмыныз, кинъёс зырӟемын луо: «Собере Христослы оскыны кутскиды но, Со бордын улэмды понна сӥзем Святой Духез Инмар тӥледлы сётӥз. Озьы, тӥ Солэн адямиосыз луиськоды шуыса, Со возьматӥз [«печатеныз пусйиз» c, ВД]» (Еф. 1:13, 14). Озьыен, Иегова святой духсэ уже кутэ, та христианъёслы валамон валэктон понна, со соосты бырйиз шуыса. Святой духлы луыса соос юн оско, азьланяз пырак дауръёс ӵоже инмын улозы шуыса, нош музъем вылын уз. (Лыдӟе 2 Коринфъёслы 1:21, 22.)
6. Мар карыны кулэ зырӟем христиан муртлы, инмын улыны кузьымзэ басьтон понна?
6 Христиан мурт святой духен зырӟемын вал ке, возьматэ-а со, та адями одно ик инмын улоз шуыса? Уг, уг возьматы. Сыӵе христиан мурт юн оске ке но, Иегова сое инмын улон понна бырйиз шуыса, солы тодаз возёно та кылъёсты: «Агай-вынъёсы, тӥ ӧтемын, быръемын бере, тӥ золгес но золгес сое юнматыны тырше: озьы лэсьтӥды ке, ноку но уд канжаське» (2 Пётр 1:10). Соин ик, христиан мурт инме тубыны быръемын ке но, со та кузьымез басьтоз, Инмарлы оскымон кыльыса гинэ (Флп. 3:12—14; Евр. 3:2; Усьт. 2:11).
КЫЗЬЫ ХРИСТИАН МУРТ ВАЛА, СО ЗЫРӞЕМЫН ШУЫСА?
7. Кызьы христиан мурт вала, солэн инмын улыны осконэз вань шуыса?
7 Нош кызьы христиан мурт вала, солэн инмын улыны осконэз вань шуыса? Валэктон шедьтыны луэ апостол Павеллэн кылъёсысьтыз, кудъёссэ со вераз зырӟем христианъёслы. Со соослы гожтӥз: «Тӥляд басьтэм Духты со зӥбетын улонлэн духез ӧвӧл, кудӥз тӥледыз эшшо но кышкатыса мед возьысал. Озьы ӧвӧл, уго тӥледлы сётӥськем Дух тӥледыз Инмарлэн нылпиосыз кариз! Со Духен ик асьмеос вазиськиськомы: „Авва, Атае!“ Асьмеос Инмарлэн нылпиосыз шуыса, Ачиз та Дух асьмелэн духенымы ӵош иворто» (Рим. 1:7; 8:15, 16). Озьыен, Иегова святой духсэ уже кутэ, зырӟем муртлы валамон валэктон понна, солэн инмын улыны осконэз вань шуыса (1 Фес. 2:12).
8. Кызьы 1 Иоаннлэн 2:20, 27 кылъёс возьмато, зырӟем христианъёслы кулэ ӧвӧл, соосты кин ке но мукетыз мед оскытоз, соос зырӟемын шуыса?
8 Иегова зырӟем христианъёслы сокем валамон валэктэ, соос инме тубозы шуыса, соослэн талы оскытэк улыны нокыӵе мугъёссы но уг кылё ини. (Лыдӟе 1 Иоаннлэсь 2:20, 27.) Зэм но, кызьы зырӟем христианъёслы, озьы ик мукетъёсызлы но дышетсконо Иеговалэсь, кудӥз аслэсьтыз калыксэ христиан кенеш пыр дышетэ. Но та христианъёслы кулэ ӧвӧл, кин ке но мукетыз соосты мед оскытоз, соос зырӟем христиан муртъёс луо шуыса. Иегова уже кутэ святой духсэ — быдэс дунне вылысь тужгес но бадӟым кужымез,— та христианъёслы валамон валэктон понна, соослэн инмын улыны осконзы вань шуыса!
СООС ВЫЛЬЫСЬ ВОРДӤСЬКИЗЫ
9. Ефесъёслы 1:18 лыдэ басьтоно ке, кыӵе воштӥськонъёс луо адямиен, кудзэ Иегова святой духеныз зырӟе?
9 Инмарлэн ужась-тыршисьёсыз пӧлысь тросэзлы секыт валаны, кызьы христиан мурт святой духен зырӟемын луэ. Со валамон, малы ке шуоно соос асьсэос зырӟемын ӧй вал. Иегова адямиосты кылдытӥз, музъем вылын пырак улон понна, нош инмын улон понна ӧз (Ул.-выл. 1:28; Пс. 36:29). Озьы ке но со ужпум кутӥз, куд-ог адямиос инмын улозы шуыса. Соин ик, адямиез святой духен зырӟыса, Инмар быдэсак воштэ адямилэсь малпаськон амалзэ но сётэ солы выль оскон — инмын улыны оскон. (Лыдӟе Ефесъёслы 1:18.)
10. Мае возьматэ выльысь вордӥськон? (Озьы ик учке сноскаез.)
10 Куке христиан мурт зырӟемын луэ, со выльысь вордӥське d. Иисус вераз, зырӟымтэ муртлы пыр-поч валэктыны уг луы шуыса, мае возьматэ выльысь вордӥськон, яке духлэсь вордӥськон (Иоанн 3:3—8).
11. Кызьы христианъёслэн малпаськон амалзы воштӥське, зырӟем мурт луэмзы бере?
11 Кызьы христианъёслэн малпаськон амалзы воштӥське, зырӟем мурт луэмзы бере? Зырӟем мурт луэмзылэсь азьло та христианъёслы дуно потэ вал музъем вылын пырак улыны оскон. Соос туж возьмазы со дырез, куке Иегова вань уродзэ быдтоз но музъем вылын рай улонэз тупатоз. Соос син азязы пуктӥзы вал, дыр, кызьы соос кулэм матысь адямиоссэс пумиталозы. Нош зырӟем мурт луэмзы бере, ваньмыз воштӥськиз. Малы? Соос ӧз кутске малпаны, музъем вылын улыны оскон умой ӧвӧл ни шуыса. Сыӵе воштӥськон кыӵе ке сюлмаськонзы яке шуг-секытсы сэрен ӧз кылды. Соос ӧз малпалэ, музъем вылын пырак улон мӧзмыт луоз шуыса. Та христианъёслэн сыӵе воштӥськонъёссы кылдӥзы, малы ке шуоно Иегова святой духез пыр соослэсь малпаськон амалзэс но азьпал улонлы осконзэс воштӥз.
12. Кызьы зырӟем христианъёс осконзы шоры учко, 1 Пётрлэсь 1:3, 4 лыдэ басьтыса?
12 Зырӟем христианъёс пӧлысь куд-огъёсыз малпало, дыр, сыӵе дуно кузьым басьтыны соос ярамонэсь ӧвӧл шуыса. Но соос оскемысь уг дугдо, Иегова соосты бырйиз шуыса. Басьтоно кузьымзы сярысь малпаськыса, соослэн сюлэмзы шумпотонэн но тау каронэн пачылме. (Лыдӟе 1 Пётрлэсь 1:3, 4.)
13. Кызьы зырӟем христианъёс музъем вылын улон шоры учко?
13 Возьматэ-а со, зырӟем муртъёслэн кулэмзы потэ шуыса? Та юанлы валэктон апостол Павел сётӥз. Соослэсь мугоръёссэс балаганэн но дӥськутэн ӵошатыса, со гожтӥз: «Уго музъем вылысь балаганамы улыку, зӥбетлы чидатэк, лулӟылӥськомы-ӝуштӥськомы, малы ке шуоно таизэ дӥськутмес кылеммы уг поты, выльзэ дӥсяммы потэ — вань кулонозэ-быронозэ улон мед ньылоз» (2 Кор. 5:4). Соослы музъем вылын улыны мӧзмыт ӧз луы но соослэн ӝоггес кулэмзы уг поты. Со интые, соос ярато улонзэс но дунъяло котькуд нуналэз, кудзэ соос, Иеговалы ужаса-тыршыса, эшъёсынызы но семьяенызы ортчытӥзы. Со дыре ик соос котьку тодазы возё азьпал улонлы паймымон осконзэс (1 Кор. 15:53; 2 Пётр 1:4; 1 Иоанн 3:2, 3; Усьт. 20:6).
ЗЫРӞИЗ-А ТӤЛЕДЫЗ ИЕГОВА СВЯТОЙ ДУХЕНЫЗ?
14. Мар возьматэ, адямилэн инмын улыны осконэз ӧвӧл шуыса?
14 Оло нош тӥ асьтэды юаськоды: «Зырӟиз-а монэ Иегова святой духеныз?» Тӥ малпаськоды ке, зырӟиз, дыр, шуыса, малпаське та юанъёс вылын: вань-а тӥляд юн мылкыдды Иеговалэсь эриксэ быдэсъяны? Пыриськиськоды-а тӥ ужан-тыршонэ туж ӟырдыт мылкыдын? Тыршыса-а тӥ Инмарлэсь Кылзэ эскериськоды но кельше-а тӥледлы «Инмарлэсь ватӥськем мурдалаоссэ» эскерыны? (1 Кор. 2:10). Шӧдӥськоды-а тӥ, ужан-тыршондэс Иегова жалятэк бакель каре шуыса? Валаськоды-а тӥ, мукет адямиослы Иегова сярысь тодыны юрттоно шуыса? Оскиськоды-а тӥ, Иегова тӥледлы трос пол юрттылӥз шуыса? Та юанъёслы тӥ «бен» шуиды ке, возьматэ-а со, тӥляд инмын улыны осконды вань шуыса? Уг, уг возьматы. Малы? Малы ке шуоно сыӵе ик шӧдонъёссы луыны быгато Инмарлэн вань ужась-тыршисьёсызлэн, нош зырӟем христианъёслэн гинэ уг. Иегова, святой духсэ уже кутыса, та ужъёсты быдэстыны вань ужась-тыршисьёсызлы юрттыны быгатэ, кыӵе гинэ осконзы соослэн медаз луы. Тӥ туж ик уд ке валаське, зырӟемын-а тӥ святой духен, ӧвӧл-а, со возьматэ ини, тӥ зырӟемын ӧвӧл шуыса. Соос, кинъёсты Иегова зырӟиз, быдэсак оско, соос зырӟемын шуыса. Та христианъёс сое одно ик тодо!
Иегова святой духсэ сётылӥз Авраамлы, Сарралы, Давидлы но Иоанн Пылатӥсьлы, соос паймымон ужъёсты лэсьтыны мед быгатозы шуыса, нош инмын улыны быръён понна ӧз (Учке 15-тӥ но 16-тӥ абзацъёсты.) e
15. Кытысь ми тодӥськомы, ваньмыз, кинъёслы святой дух сётэмын вал, инмын улон понна быръемын ӧвӧл шуыса?
15 Библиын вераське Инмарлэн трос ужась-тыршисьёсыз сярысь, кудъёсызлы со святой духсэ сётӥз, соослэн инмын улыны осконзы ӧй вал ке но. Кылсярысь, святой дух Давид эксэен валтӥз (1 Экс. 16:13). Со юрттӥз Давидлы Иегова сярысь мур зэмлыкъёсты валаны но мылкыдзэ ӝутӥз Библилэсь куд-ог люкетъёссэ гожтыны (Марк 12:36). Озьы ке но Витьтонэтӥ Нуналэ Пётр валэктӥз, Давид инме ӧз ӝутскы шуыса (Ап. уж. 2:34). Иоанн Пылатӥсь но святой духен тыр луэмын вал (Лука 1:13—16). Иисус шуиз, «кышномуртлэсь вордӥськемъёс пӧлысь Иоанн Пылатӥсьлэсь быдӟымез ӧз на вордӥськы» шуыса. Озьы ке но Иисус ватсаз, Иоанн ин Эксэйлыке уз сюры шуыса (Матф. 11:10, 11). Иегова та ужась-тыршисьёсызлы святой духсэ сётылӥз, соос паймымон ужъёсты лэсьтыны мед быгатозы шуыса, нош инмын улыны быръён понна ӧз. Возьматэ-а со, инмын улыны оскисьёсын ӵошатыса, та христианъёс сокем оскымонэсь ӧй вал шуыса? Уг, уг возьматы. Со возьматэ гинэ, Иегова соосты рай музъем вылын улыны улӟытоз шуыса (Иоанн 5:28, 29; Ап. уж. 24:15).
16. Кытын улыны оско Инмарлэн тросэз ужась-тыршисьёсыз?
16 Туннэ Инмарлэн тросэз ужась-тыршисьёсызлэн инмын улыны осконзы ӧвӧл. Авраам, Сарра, Давид, Иоанн Пылатӥсь но Инмарлы оскымон мукет пиосмуртъёс но кышномуртъёс сямен, кудъёсыз вашкала дыръёсы улӥзы, соос чидатэк возьмало со дырез, куке Эксэйлыклэн кивалтэмез улсын улозы (Евр. 11:10).
17. Кыӵе юанъёс вуоно статьяын эскериськозы?
17 Куд-ог зырӟем христианъёс музъем вылын уло на бере, кӧня ке юанъёс кылдо (Усьт. 12:17). Кызьы зырӟем христианъёслы асьсэ шоры учкыны кулэ? Кызьы учконо соос шоры, кинъёс кенешады Тодэ ваён ӝытанэ нянез сиыны но винаез юыны кутско? Но сюлмаськоно-а, Ӝытанын сыӵе адямиос тросгес луо шуыса? Та юанъёс вуоно статьяын эскерисько.
a Асьме вакытысь 33-тӥ арын ортчем Витьтонэтӥ Нуналысен кутскыса, Иегова куд-ог христианъёслы кузьма паймымон оскон — оскон солэн Пиеныз ӵош инмын кивалтыны. Нош кызьы со христианъёс тодо, Иегова соосты бырйиз шуыса? Мар луэ, куке соослэн сыӵе осконзы кылдэ? Валэктонъёс ми шедьтомы та статьяысь, кудӥз пыкиськемын 2016-тӥ арын толшор понна поттэм «Возьмаськон башня» вылэ (ӟуч).
b ВАЛЭКТОН. Святой духен зырӟем христанъёс — со адямиос, кудъёссэ Иегова бырйиз, соос Иисусэн ӵош инмын мед кивалтозы шуыса. Святой духезлы луыса Инмар соосты оскытэ, азьланяз соос пырак дауръёс ӵоже инмын улозы шуыса, нош музъем вылын уз (Еф. 1:13, 14). Та христианъёс вераны быгато, святой дух соослы ивортэ, яке соосты оскытэ, соос инмын улозы шуыса (Рим. 8:16).
c ВАЛЭКТОН. Та печать пыраклы пуктэмын ӧвӧл. Зырӟем христианъёс печатен пыраклы пусъемын луозы кулон азязы яке бадӟым куректон кутскон азьын (Еф. 4:30; Усьт. 7:2—4; учке 2019-тӥ арын оштолэзь понна поттэм «Улон но ужан-тыршон» ужан тетрадьлы малпанъёсысь «Мар карыны оскытэ Инмар котькуд зырӟем христиан муртэ но кызьы со соосты печатен пусъе?» юанлы валэктонэз, 3-тӥ бам).
d Со сярысь, мае возьматэ выльысь вордӥськон, тросгес тодыны луоз 2009-тӥ арын 1-тӥ оштолэзь понна поттэм «Возьмаськон башняысь» «Новое рождение: Ведет ли оно к спасению?», «Насколько оно важно?», «Вопрос личного выбора?», «Какова его цель?», «Как оно происходит?», «С какой переменой оно связано?» но «Правители небесного Царства и его подданные» статьяосысь.
27-ТӤ КЫРӞАН Бог явит миру своих сыновей
e СУРЕДЫН: Пукиськомы-а ми осконмы понна пытсэтын яке кышкатэк тодытӥськомы но адямиосты зэмлыклы дышетӥськомы, милям осконмы вань музъем вылын Инмарлэн Эксэйлыкезлэн кивалтэмез улсын улыны.
