UYONO 4
Ẹwẹn na Ọvo ri Se Oseri kẹ Avwanre
“[“Ẹwẹn,” NW] na ọvo ri se oseri kẹ [“ẹwẹn,” NW] rẹ avwanre nẹ avwanre emọ rẹ Ọghẹnẹ.”—ROM 8:16.
UNE 25 Ihwo ra Jẹreyọ Na
ỌDJẸKOKO *
Jihova ku ẹwẹn ọfuanfon rọyen ku ẹko rẹ Inenikristi 120 vwẹ idjerhe roghẹresan vwẹ Pẹntikọst (Ni ẹkoreta 1-2)
1-2. Emu roghẹresan vọ yen phiare vwẹ Pẹntikọst 33 C.E.?
ỌNANA urhiọke ri Sunday vwẹ Jerusalẹm. Ẹdẹ ri Pẹntikọst 33 C.E. Idibo ri Jesu 120 kokori vwẹ ubruwevwin rọhẹ obenu egenege ọvo. (Iruo 1:13-15; 2:1) Ẹdẹ evo tavwen idibo na ki rhi koko, Jesu vuẹ ayen nẹ ayen dajẹ Jerusalẹm kidie okẹ roghẹresan ọvo che te ayen obọ. (Iruo 1:4, 5) Die kọyen rhe phia?
2 “Kpregede na edo ọvo de do nẹ obo odjuvwu rhe kerẹ ogirobo.” Edo na da rhe vọn uwevwin na eje. “[“Ẹwẹn,”] ọfuanfon na da ro ayen oma” kerẹsiẹ ra da mrẹ “imwerhanre” ro rhi she mu uyovwi rẹ ayen ọvuọvo. (Iruo 2:2-4) Idjerhe roghẹresan nana yen Jihova vwo ku ẹwẹn ọfuanfon rọyen ku ẹko rẹ ihwo nana. (Iruo 1:8) Ayen da rhe dia ihwo rẹsosuọ ra vwẹ ẹwẹn ọfuanfon * na jẹreyọ ri vwo iphiẹrophiyọ ri vwo nene Jesu sun vwẹ odjuvwu.
DIE YEN PHIA KẸ OHWO SIẸRẸ A DA JẸREYỌ?
3. Diesorọ ihwo re herọ vwẹ Pẹntikọst vwo vwo imuẹro dẹn nẹ a vwẹ ẹwẹn ọfuanfon jẹ ayen reyọ?
3 Wọ da dia ọvo usun rẹ idibo ri kokori vwẹ ẹdẹ yena, obo re phiare na cha sa chọrọ owẹ ẹro-o. Di roro, orọnvwọn ọvo kerẹ imwerhanre she mu uyovwi wẹn, ku wọ jẹ ephẹrẹ sansan! (Iruo 2:5-12) Aphro herọ-ọ, wo che vwo imuẹro dẹn nẹ a vwẹ ẹwẹn ọfuanfon na jẹ wẹ reyọ. Idjerhe vuọvo vẹ ọke vuọvo yen a vwọ jẹ ihwo ri che nene Jesu sun na? Ẹjo. Mavọ yen e ru riẹn?
4. Ọke vuọvo yen a vwọ vwẹ ẹwẹn ọfuanfon jẹ Inenikristi rẹ ẹgbukpe ujorin ẹsosuọ? Djekpahon.
4 E jẹ a ta ota kpahen ọke na. Ọ dia Inenikristi 120 na ọvo yen a vwẹ ẹwẹn ọfuanfon jẹreyọ vwẹ Pẹntikọst 33 C.E. na-a. Vwẹ ẹdẹ vuọvo yena, a je vwẹ ẹwẹn ọfuanfon na jẹ ihwo ri te omarẹ 3,000 reyọ. Ọnana phiare ọke rẹ ayen vwo bromaphiyame. (Iruo 2:37, 38, 41) Vwẹ ikpe re vwọ kpahọn, ọ dia Inenikristi eje yen a vwẹ ẹwẹn ọfuanfon jẹreyọ ugege re vwo bru ayen phiyame-e. Re vwo bru ihwo ri Sameria phiyame nu, ọmọke je wanvrẹ tavwen a ke jẹ ayen reyọ. (Iruo 8:14-17) A jẹ Kọniliọs vẹ evwruwevwin rọyen reyọ tavwen a ke tobọ bru ayen phiyame. Ọnana obo ra fobọ mrẹ-ẹ.—Iruo 10:44-48.
5. Vwo nene eta rehẹ 2 Kọrẹnt 1:21, 22, die yen phia kẹ ohwo siẹrẹ Ọghẹnẹ da vwẹ ẹwẹn ọfuanfon jẹ reyọ?
5 Gbe je roro kpahen obo re phia siẹrẹ a da vwẹ ẹwẹn ọfuanfọn vwọ jẹ ohwo reyọ. Evo usun rẹ Inenikristi ra jẹreyọ na sa mrẹ bẹnbẹn ayen vwọ rhọnvwe nẹ Jihova jẹ ayen reyọ. Ayen se roro, ‘Diesorọ Ọghẹnẹ vwọ jẹ vwẹ?’ Efa che roro ọtiọye-en. Otoro oborẹ ayen rori-i, ọyinkọn Pọl nabọ dje obo re phia kẹ ayen ohwo ọvuọvo. Ọ da ta: “Ovwan, ri nyo ota rẹ uyota na, iyẹnrẹ esiri rẹ esivwo rẹ ovwan na, ri de se gbuyota, ka ka oka * rẹ ive rẹ [“ẹwẹn ọfuanfon,” NW] na phihọ ayen, kọye hẹ iviẹnwa rẹ ukuẹriọ rẹ avwanre.” (Ẹfe. 1:13, 14.) Kọyen Jihova reyọ ẹwẹn ọfuanfon rọyen vwo dje kẹ ihwo nana phephẹn nẹ a jẹ ayen reyọ rẹ ayen vwo kpo odjuvwu. Idjerhe nana, ẹwẹn ọfuanfon na kọ pha kerẹ “iviẹnwa,” yẹrẹ imuẹro nẹ ayen cha dia odjuvwu bẹdẹ vwẹ ọke rọ cha obaro na, ọ dia otọrakpọ na-a.—Se 2 Kọrẹnt 1:21, 22.
6. Die yen Onenikristi ra jẹreyọ che ru tavwen o ki se vwo uphẹn ro vwo kpo odjuvwu?
6 Siẹrẹ a da jẹ ohwo reyọ, ko ghwe mudiaphiyọ nẹ uphẹn nana rha cha sa va ohwo na abọ-ọ? Ẹjo. Dede nẹ o vwo imuẹro nẹ e durhie ọyen kpo odjuvwu, jẹ ofori nẹ ọ karophiyọ uchebro rẹ ọyinkọn Pita nana: “Fiki rẹ ọtiọye na, imoni, gbe jẹ oruru rẹ use vẹ ẹjẹreyọ na gan vwẹ oma rẹ ovwan, kidie ovwan de ru ọnana ovwan gbi she bẹdẹ-ẹ.” (2 Pita 1:10) Ọ da tobọ dianẹ a jẹrẹ reyọ nure, ọ rha fuevun ga Jihova te oba-a, uphẹn nana cha va abọ.—Fil. 3:12-14; Hib. 3:1; Ẹvwọ. 2:10.
MAVỌ YEN OHWO VWỌ RIẸN SẸ A JẸ ỌYEN REYỌ?
7. Mavọ yen aye yẹrẹ ọshare vwọ riẹn nẹ ọyen vwo use rẹ odjuvwu?
7 Mavọ yen aye yẹrẹ ọshare vwọ riẹn nẹ ọyen vwo use rẹ odjuvwu na? A mrẹ ẹkpahọnphiyọ na vwẹ eta ri Pọl si rhe iniọvo ra jẹreyọ rehẹ Rom, “re seri ne rhe dia irherẹn.” Ọ da vuẹ ayen: “Ọ gbe dia erhi rẹ ọviẹn rọ djẹ oshọ mu ohwo na a vwọ kẹ ovwa-an, ẹkẹvuọvo kẹ erhi rẹ ọmọ a vwọ kẹ ovwan. Kọye ovwan vwo kperẹ nẹ, Baba! Ọsẹ! [“Ẹwẹn,” NW] na ọvo ri se oseri kẹ [“ẹwẹn,” NW] rẹ avwanre nẹ avwanre emọ rẹ Ọghẹnẹ.” (Rom 1:7; 8:15, 16) Ẹwẹn ọfuanfon na yen Ọghẹnẹ vwo dje phephẹn kẹ ohwo na nẹ a jẹrẹ reyọ ro vwo nene Jesu sun vwẹ odjuvwu.—1 Tẹsa. 2:12.
8. Mavọ yen 1 Jọn 2:20, 27 vwo djephia nẹ ọ dia ohwo ọfa yen cha vuẹ ihwo ra jẹreyọ nẹ a jẹ ayen reyọ-ọ?
8 Jihova kẹ ihwo rọ jẹreyọ imuẹro kokoroko nẹ ayen ghini vwo use rẹ odjuvwu na. (Se 1 Jọn 2:20, 27.) Ofori nẹ e ra jẹreyọ na rhiabọreyọ uyono ri Jihova kerẹ iniọvo efa vwevunrẹ ukoko na. Jẹ, ọ dia ohwo ọfa yen cha vuẹ ayen nẹ a jẹ ayen reyọ-ọ. Jihova kẹ ayen imuẹro nana womarẹ ẹwẹn ọfuanfon rọyen, rọ dia ẹgba rọ ma rho na!
A ‘RHOMA VWIẸ’ AYEN
9. Kirobo re djisẹ rọyen vwẹ Ẹfesọs 1:18, ewene vọ yen ihwo ra jẹreyọ na rhiẹromrẹ?
9 Idibo rẹ Ọghẹnẹ buebun nonẹna sa mrẹ bẹnbẹn rẹ ayen vwo vwo ẹruọ rẹ obo re phia siẹrẹ Ọghẹnẹ da jẹ ohwo reyọ. Ọ sa dia ọtiọyen kidie ayen dia ihwo ra jẹreyọ-ọ. Ọghẹnẹ ma ihworakpọ rẹ ayen vwọ dia otọrakpọ na, ọ dia odjuvwu-u. (Jẹn. 1:28; Une 37:29) Ẹkẹvuọvo, Jihova jẹ ihwo evo reyọ re vwọ dia odjuvwu. Ọtiọyena, ọke rọ da jẹ ayen reyọ nu, iphiẹrophiyọ vẹ iroro rayen ki wene, kẹ ayen rhẹro rẹ akpeyeren vwẹ odjuvwu.—Se Ẹfesọs 1:18.
10. Die yen o mudiaphiyọ ra vwọ rhoma “vwiẹ” ohwo? (Ni eta rehẹ obotọ na.)
10 Siẹrẹ Ọghẹnẹ da vwẹ ẹwẹn ọfuanfon jẹ Onenikristi reyọ, kọyen a rhoma “vwiẹ.” * Jesu tobọ tanẹ ohwo ra jẹreyọ che se djisẹ rẹ oborẹ oma ruro ọke ra vwọ rhoma “vwiẹ” kẹ ohwo ọfa ra vwẹ ẹwẹn ọfuanfon jẹreyọ-ọ.—Jọn 3:3-8.
11. Djisẹ rẹ ewene rọ vwomaphia vwẹ iroro rẹ Onenikristi ugege ra vwọ vwẹ ẹwẹn ọfuanfon jẹ reyọ.
11 Ewene vọ yen vwomaphia vwẹ iroro rẹ Inenikristi ugege ra vwọ vwẹ ẹwẹn ọfuanfon jẹ ayen reyọ? Ihwo ra jẹreyọ na vwo iphiẹrophiyọ rẹ ayen vwọ dia otọrakpọ na bẹdẹ tavwen Jihova ki durhie ayen kpo odjuvwu. Ayen rhẹro rẹ ọke ri Jihova che vwo si umiovwo eje no, ji ru akpọ na phiyọ iparadaisi. Ọkiọvo, ayen rhẹro rẹ ọke rẹ ayen che vwo dede ihwo rẹ orua yẹrẹ igbeyan rayen ra rhọvwọn nẹ ushi rhe. Ẹkẹvuọvo, ra vwọ jẹ ayen reyọ nu, iroro rayen ko rhi wene. Diesorọ ọ vwọ dia ọtiọyen? Ọ dianẹ kẹ akpeyeren vwẹ iparadaisi jẹ ayen e je-e. Ọ je dianẹ ayen wene iroro fikirẹ ọdjarhe rẹ akpeyere-en, yẹrẹ kẹ ayen rorori nẹ akpeyeren rẹ iparadaisi vwẹ otọrakpọ na che nu ayen ọhọ-ọ. Ukperẹ ọtiọyen, Jihova vwẹ ẹwẹn ọfuanfon rọyen vwo wene iroro vẹ iphiẹrophiyọ rẹ ayen niri ghanghanre jovwo na.
12. Vwo nene eta rehẹ 1 Pita 1:3, 4, ẹro vọ yen Inenikristi ra vwẹ ẹwẹn ọfuanfuon jẹreyọ vwo ni iphiẹrophiyọ rayen na?
12 Onenikristi ra vwẹ ẹwẹn ọfuanfon jẹreyọ se ni oma rọyen nẹ ọyen muwan rẹ uphẹn ọghanghanre nana-a. Ẹkẹvuọvo, ọ nama vwo iroro ivivẹ nẹ Jihova jẹ ọyen reyọ-ọ. Udu rọyen mwavwan vẹ aghọghọ kọke kọke ro de roro kpahen iphiẹrophiyọ ro che vwo kpo odjuvwu.—Se 1 Pita 1:3, 4.
13. Ẹro vọ yen e ra jẹreyọ na vwo nẹ akpeyeren vwẹ otọrakpọ na?
13 Ọnana ko mudiaphiyọ nẹ e ra jẹreyọ na guọnọ ghwu? Ọyinkọn Pọl kpahenphiyọ onọ nana. Ọ vwẹ ugboma rayen vwo dje “utughẹ” rọ vwọ ta: “Kidie rẹ avwanre je vwọ hẹ utughẹ nana, yẹ avwanre fiọn unu ro ẹnwan; ọ dianẹ kẹ avwanre ban phihọ-ọ, ẹkẹvuọvo ke rhuo avwanre phihọ, ọtiọye na arhọ ko mu obo re dia ọ rẹ ugboma ro ghwẹ rọ.” (2 Kọr. 5:4) Ọ dianẹ kẹ akpọ nu ayen ọhọ kẹ ayen guọnọ ghwu-u. Ukperẹ ọtiọyen, ayen nabọ riavwerhen rẹ akpeyeren, ayen je guọnọ nene ihwo rẹ orua vẹ igbeyan rayen ga Jihova kẹdẹ kẹdẹ. Otoro oborẹ ayen ruẹ-ẹ, ayen vwẹ ọkieje vwọ karophiyọ iphiẹrophiyọ roghẹresan nana rọ hẹrhẹ ayen vwẹ obaro na.—1 Kọr. 15:53; 2 Pita 1:4; 1 Jọn 3:2, 3; Ẹvwọ. 20:6.
JIHOVA JẸ WẸ REYỌ?
14. Die yen sa nẹrhẹ ohwo roro nẹ Jihova vwẹ ẹwẹn ọfuanfon jẹ ọyen reyọ?
14 Ọkiọvo wo roro sẹ Jihova vwẹ ẹwẹn ọfuanfon rọyen jẹ wẹ reyọ. Ọ da dia ọtiọyen, gbe roro kpahen enọ eghanghanre nana: Wo vwo oruru ọgangan wo vwo ru ọhọre ri Jihova? Wo rorori nẹ wo vwo oruru ọgangan kpahen iruo aghwoghwo na? Wọ frẹkotọ yono Baibol na ji nabọ yono kpahen “emu okokodo rẹ Ọghẹnẹ”? (1 Kọr. 2:10) Ubiudu wẹn vuẹ wẹ nẹ Jihova ku ebruphiyọ kuẹ iruo aghwoghwo wẹn? Wo vwo owenvwe ọgangan wọ vwọ chọn ihwo efa uko vwo yono kpahen Jihova? Wọ mrẹ ukẹcha ri Jihova vwẹ ẹdia sansan rẹ akpeyeren wẹn? Ẹkpahọnphiyọ wẹn vwọ kẹ enọ nana da dia e, ko mudiaphiyọ nẹ wẹwẹ ọvo usun rẹ ihwo ra jẹreyọ na? Ẹjo, kakaka. Diesorọ? Kidie ẹkpahọnphiyọ rẹ idibo rẹ Ọghẹnẹ eje vwọ kẹ enọ nana sa dia e, owenẹ ayen ihwo ra jẹreyọ yẹrẹ a jẹ ayen reyọ-ọ. Womarẹ ẹwẹn ọfuanfon na, Jihova sa vwẹ ẹgba vwọ kẹ idibo rọyen eje, otoro iphiẹrophiyọ ro rhe aye-en. Vwọrẹ uyota, wo de vwo ẹwẹn ivivẹ sẹ wo che kpo odjuvwu, kọyen e durhie uwe kakaka-a. Ihwo ri Jihova jẹ reyọ vwo ẹwẹn ivivẹ sẹ a jẹ ayen reyọ yẹrẹ a jẹ ayen reyọ-ọ! Ayen riẹnre dẹn!
Jihova vwẹ ẹwẹn ọfuanfon rọyen vwọ chọn Ebraham, Sera, Devid kugbe Jọn ro Bru Ihwo Phiyame uko vwo ru erọnvwọn sansan, jẹ ọ dia ọyen ayen che vwo kpo odjuvwu-u (Ni ẹkoreta 15-16) *
15. Mavọ yen avwanre ru riẹn nẹ ọ dia ihwo eje rẹ Ọghẹnẹ ku ẹwẹn ọfuanfon rọyen ku yen che kpo odjuvwu-u?
15 Vwevunrẹ Baibol na, a mrẹ idibo ri Jihova buebun ro ku ẹwẹn ọfuanfon rọyen ku jẹ ayen vwo iphiẹrophiyọ rẹ odjuvwu-u. Ẹwẹn ọfuanfon yen suẹn Devid. (1 Sam. 16:13) Ẹwẹn ọfuanfon chọn rọ uko vwo vwo ẹruọ rẹ erọnvwọn ikokodo kpahen Jihova, o ji muo vwo si ẹbe evo vwẹ Baibol na. (Mak 12:36) Dedena, ọyinkọn Pita je tanẹ Devid “kpo idjuvwu-u.” (Iruo 2:34) Jọn ro Bru Ihwo Phiyame je “vọn vẹ [“ẹwẹn,” NW ] ọfuanfon” na. (Luk 1:13-16) Jesu tare nẹ ohwo rọ rho nọ Jọn herọ-ọ, ẹkẹvuọvo ọ da je tanẹ Jọn dia ọvo usun rẹ ihwo ri che sun vwẹ Uvie rẹ odjuvwu na-a. (Mat. 11:10, 11) Jihova vwẹ ẹwẹn ọfuanfon vwọ chọn eshare nana uko vwo ru erọnvwọn sansan, jẹ ọ dia ọyen ayen che vwo kpo odjuvwu-u. Ọnana ko mudiaphiyọ nẹ ayen fuevun te-e, yẹrẹ ayen muwan rẹ ayen vwo sun vwẹ odjuvwu-u? Ẹjo. O mudiaphiyọ nẹ Jihova cha rhọvwọn ayen rhe otọrakpọ na vwẹ Iparadaisi.—Jọn 5:28, 29; Iruo 24:15.
16. Iphierophiyọ vọ yen idibo rẹ Ọghẹnẹ buebun nonẹna vwori?
16 Idibo rẹ Ọghẹnẹ buebun nonẹna vwo iphiẹrophiyọ rẹ odjuvwu-u. Kerẹ Ebraham, Sera, Devid, Jọn ro Bru Ihwo Phiyame, kugbe eya vẹ eshare efa rẹ ọke awanre, idibo rẹ Ọghẹnẹ nonẹna rhẹro rẹ ọke rẹ Uvie rẹ Ọghẹnẹ che vwo sun ayen vwẹ otọrakpọ na.—Hib. 11:10.
17. Enọ vọ yen a cha kpahenphiyọ vwẹ uyono rọ vwọ kpahen ọnana?
17 Enọ evo sa vwomaphia kidie evo usun rẹ Inenikristi ra jẹreyọ na jehẹ ohri rẹ ihwo rẹ Ọghẹnẹ nonẹna. (Ẹvwọ. 12:17) Kerẹ udje, ẹro vọ yen ofori nẹ ihwo ra jẹreyọ na vwo ni oma rayen? Ohwo ọvo vwẹ ukoko wẹn da tuẹn ẹriọ rẹ emu ovwọnvwọn na phiyọ, ubiẹro vọ wo che vwo no? Ọ da rha dianẹ uchunu rẹ ihwo re tanẹ a jẹ ayen reyọ buẹnphiyọ vwo? Ofori nẹ ọnana kpokpo uwe ẹwẹn? A cha mrẹ ẹkpahọnphiyọ rẹ enọ nana vwẹ uyono rọ vwọ kpahen ọnana.
^ e?ko. 5 Vwo nẹ Pẹntikọst 33 yen Jihova vwọ kẹ Inenikristi iphiẹrophiyọ roghẹresan rẹ ayen vẹ Ọmọ rọyen vwo sun vwẹ odjuvwu. Kẹ, mavọ yen Inenikristi nana wan riẹn nẹ a sane ayen vwọ kẹ uphẹn roghẹresan nana? Die yen phia kẹ ohwo siẹrẹ use nana de te obọ? Uyono na cha kpahenphiyọ enọ nana. E mu uyono nana kpahen Uwevwin Orhẹrẹ ri January 2016.
^ e?ko. 2 OBORẸ OTA NANA MUDIAPHIYỌ: Ohwo ra vwẹ ẹwẹn ọfuanfon jẹreyọ: Jihova vwẹ ẹwẹn ọfuanfon rọyen vwọ sane ohwo ro che nene Jesu sun vwẹ odjuvwu. Ọ womarẹ ẹwẹn ọfuanfon rọyen kẹ ohwo na “iviẹnwa” yẹrẹ ive rẹ akpeyeren vwẹ obaro na. (Ẹfe. 1:13, 14) Inenikristi nana ke sa tanẹ ẹwẹn ọfuanfon na yen “se oseri” yẹrẹ kẹ ayen imuẹro nẹ ayen che kpo odjuvwu.—Rom 8:16.
^ e?ko. 5 OBORẸ OTA NANA MUDIAPHIYỌ: Oka. Oka nana cha dia ọ ri bẹdẹ-ẹ jokpanẹ ohwo na fuevun duvwun ẹdẹ ughwu yẹrẹ tavwen ukpokpogho rode na ke tonphiyọ.—Ẹfe. 4:30; Ẹvwọ. 7:2-4; ni “Questions From Readers” rọhẹ Uwevwin Orhẹrẹ rẹ April 2016 (ọ rẹ oyibo).
^ e?ko. 10 Wọ da guọnọ evuẹ efa kpahen obo ro mudiaphiyọ ra vwọ rhoma “vwiẹ” ohwo, ni Uwevwin Orhẹrẹ rẹ April 1, 2009, aruẹbe 3-12.
UNE 27 E Dje Emọ rẹ Ọghẹnẹ Vwọphia
^ e?ko. 57 IDJEDJE RẸ UHOHO: Owenẹ e mu avwanre phiyọ uwodi fikirẹ esegbuyota rẹ avwanre yẹrẹ avwanre vwo ugbomọphẹ re vwo ghwoghwo ji yono uyota na, avwanre nẹ kiọkiọkiọ kpo ọke ra cha vwọ dia otọrakpọ na vwẹ otọ usuon rẹ Uvie rẹ Ọghẹnẹ.
