1-2. PHenxxaqosxxe gallassi 33 M.Ln, hanida maalaalissiyaabay aybee?

WODEE Woggaa galla maallado Yerusalaameena. Layttay 33 M.L, qassi hegee PHenxxaqosxxe gallassa. Erissiyo ashkkarati 120 gidiyaageeti citan issi pooqiyan shiiqidosona. (Oos. 1:13-15; 2:1) Yesuusi guutta gallassaappe kase, eti dumma imotaa ekkana koshshiyo gishshawu, Yerusalaamen takkanaadan eta azaziis. (Oos. 1:4, 5) Kaallidi hanidabay aybee?

² “Gagantti yeggiya gotiyaadan guummiya gunttai akeekennan saluwaappe [yiis].” Cenggurssay eti deˈiyo keettaa kumiis. He wode, “tama laco milatiya inxxarssati” erissiyo ashkkaratu huuphiyaappe bollaara qonccin, eta ubban ‘geeshsha ayyaanay kumiis.’ (Oos. 2:2-4) Ha maalaaliya ogiyan, he erissiyo ashkkaratu bolli Yihooway ba geeshsha ayyaanaa gussiis. (Oos. 1:8) Eti geeshsha ayyanan tiyettida * koyroogeeta gididosona; qassi Yesuusaara saluwan issippe haariyo hidootay etawu imettiis.

3. PHenxxaqosxxe gallassi shiiqidaageeti geeshsha ayyaanan tiyettidoogaa sirennay aybissee?

³ Neeni he gallassi issi pooqiyan shiiqida erissiyo ashkkaratu giddon deˈiyaabaa gidiyaakko, hegaa awudenne dogakka. Tama laco milatiya inxxarssa malabay ne huuphiyan wodhdhees;  yaatin neeni dumma dumma qaalan haasayiyoogaa doommaasa! (Oos. 2:5-12) Neeni geeshsha ayyaanan tiyettidoogee qoncce. SHin geeshsha ayyaanan tiyettiya ubbay, maalaaliya hanotaaninne issi wodiyan tiyettiyoonaa? CHii. Hegaa waati eriyoo?

4. Koyro xeetu layttan geeshsha ayyaanan tiyettida ubbay issi wodiyan tiyettidoonaa? Qonccissa.

⁴ Issi uri tiyettidaagaa awude gidana danddayiyaakko ane beˈoos. PHenxxaqosxxe gallassi 33 M.Ln, geeshsha ayyaanan tiyettidaageeti 120 gidiya Kiristtaanetu xalla gidokkona. He gallassi guuttaa takkidi, 3,000 gidiya haratikka geeshsha ayyaanan tiyettidosona. Eti xammaqettido wode tiyettidosona. (Oos. 2:37, 38, 41) SHin hegaappe kaalliya layttatun, ayyaanan tiyettida Kiristtaaneti ubbay xammaqettiyo wode ayyaanan tiyettibookkona. Samaariyaa asati xammaqetti simmin amarida wodee aadhdhin ayyaanan tiyettidosona. (Oos. 8:14-17) Qassi hegaappe keehi dumma ogiyan, Qornneliyoosinne A soo asay ubbay xammaqettanaappe kase ayyaanan tiyettidosona.—Oos. 10:44-48.

5. Naaˈˈantto Qoronttoosa 1:21, 22y yootiyoogaadan, issi uri geeshsha ayyaanan tiyettiyo wode haniyaabay aybee?

⁵ Issi uri geeshsha ayyaanan tiyettiyo wode aybi haniyaakko ane beˈoos. Tiyettida issoti issoti Yihooway eta dooridoogaa ammananawu koyro heeran metootana danddayoosona. Eti, ‘Xoossay tana dooridoy aybissee?’ giidi oychchana danddayoosona. Haratuyyo hegaadan siyettenna. Hanotay ayba gidikkokka, kiitettida PHawuloosi tiyettida ubbaa bolli aybi haniyaakko yootiis: ‘Intte siyido wode ammanideta; Xoossay intteyyo immana giido geeshsha ayyaanaa baggaara, intte abaa gidiyoogaa erissiya maatafaa * intte bolli wottiis.’ (Efi. 1:13, 14) Hegaa gishshawu, he Kiristtaaneta Yihooway dooridoogaa erissanawu I ba geeshsha ayyaanaa goˈettees. Yaatiyoogan, waase gidida geeshsha ayyaanay eti sinttappe saˈan gidennan saluwan merinawu  deˈanaagaa etawu qonccissees.—2 Qoronttoosa 1:21, 22 nabbaba.

6. Tiyettida issi Kiristtaanee saluwaa woytuwaa demmanawu ay oottana bessii?

⁶ Issi Kiristtaanee tiyettikko, I saluwaa biyoogee mule attennaba giyoogee? Gidenna. I saluwaa baanawu doorettidoogaa erees. SHin, I ha zoriyaa hassayana bessees: “Ta ishatoo, inttena Xoossai xeesidoogaanne dooridoogaa minttanau, kaseegaappe aadhdhi minnite; aissi giikko, intte hegaa oottiyaabaa gidikko, xubettekketa.” (2 PHe. 1:10) Hegaa gishshawu, tiyettida issi Kiristtaanee doorettidaba woy xeesettidaba gidikkokka, I ammanettidi deˈiyoogaa xallan he woytuwaa demmana.—Pili. 3:12-14; Ibr. 3:1; Ajj. 2:10.

7. Tiyettidaageeti saluwaa baanawu doorettidoogaa waati eriyoonaa?

⁷ SHin issi uri saluwaa baanawu doorettidoogaa waati erii? Hegaa zaaroy, Xoossay “geeshsha oottanau xeesido,” Roomen deˈiya ayyaanan tiyettida Kiristtaanetuyyo PHawuloosi yootidoban qoncciis. I hagaadan giis: “Nuuni nu qaalaa xoqqu oottidi, ‘Abbaa! Ta Aawau’ yaagidi xeesiyo nuna Xoossaa naata kessiya Geeshsha Ayyaanaa Xoossaappe ekkidoogaappe attin, naa77anttuwaa yayyanau aille kessiya ayyaanaa ekkibookko. Xoossaa Ayyaanai ba huuphen nu ayyaanaara gididi, nuuni Xoossaa naata gidiyoogaa markkattees.” (Roo. 1:7; 8:15, 16) Hegaa gishshawu, Xoossay ba geeshsha ayyaanaa baggaara tiyettidaageeti saluwaa baanawu xeesettidoogaa etawu qonccissees.—1 Tas. 2:12.

8. Koyro Yohaannisa 2:20, 27y tiyettida Kiristtaaneti eti tiyettidoogaa harati etawu yootana koshshennaagaa waati bessii?

⁸ Saluwaa baanaadan Yihooway shoobbido asati eti bantta qofaaninne wozanan hegaa ammanettanaadan I oottees. (1 Yohaannisa 2:20, 27 nabbaba.) Tiyettida Kiristtaaneti haratuugaadan gubaaˈiyaa baggaara Yihoowappe tamaarana koshshiyoogee qoncce. SHin, eti ayyaanan tiyettidoogaa hara asi etawu yootana koshshenna. Yihooway saluwaaninne saˈan aybippenne aadhdhiya ba wolqqaa, geeshsha ayyaanaa goˈettidi eti tiyettidoogaa eranaadan oottees!

9. Efisoona 1:18n qonccidoogaadan, issi uri tiyettiyo wode laamettiyaabay aybee?

⁹ Ha wodiyan Xoossawu haggaaziyaageetuppe daroti issi ura Xoossay tiyiyo wode aybi haniyaakko eranawu metootana danddayoosona. Hegee wottin deˈiyaaba; ayssi giikko etikka tiyettibookkona. Xoossay asay saluwan gidennan, saˈan merinawu deˈanaadan medhdhiis. (Doo. 1:28; Maz. 37:29) SHin amaridaageeti saluwan deˈanaadan Yihooway dooriis. Hegaa gishshawu, I eta tiyiyo wode, eta hidootaanne eti qoppiyo ogiyaa sohuwaara laammiyo gishshawu, eti saluwaa deˈuwaa demmanawu yeemottoosona.—Efisoona 1:18 nabbaba.

10. ‘Naaˈˈantto yelettiyoogaa’ giyoogee woygiyoogee? (Tohossa qofaakka xeella.)

¹⁰ Kiristtaaneti geeshsha ayyaanan tiyettiyo wode, eti ‘naaˈˈantto yelettoosona.’ * ‘Naaˈˈantto yelettiyo wode’ woy ‘geeshsha ayyaanaappe yelettiyo wode’ aybi siyettiyaakko ayyaanan tiyettibeenna urawu hegaa qonccissana danddayettennaagaa Yesuusikka yootiis.—Yoh. 3:3-8.

11. Issi uri tiyettiyo wode A qofan laamettiyaabaa qonccissa.

¹¹ Kiristtaaneti tiyettiyo wode, dumma ogiyan qoppiyoogaa waani doommiyoonaa?  He Kiristtaaneta Yihooway tiyanaappe kase, eti saˈan merinawu deˈanawu hidootan naagoosona. Yihooway iitatettaa ubbaa xayssidi saˈaa gannate oottiyo wodiyaa eti yeemuwan naagoosona. Hayqqida so asaa yaray woy laggee denddiyo wode eti mokkiyoogaabaa qoppennan waayi aggana. SHin eti tiyetti simmidi, dumma ogiyan qoppiyoogaa doommoosona. Aybissi? Saˈan merinawu deˈiyoogee loˈˈo gidenna giidi eti qoppiyoogaa doommibookkona. Eti dumma ogiyan qoppiyoogaa doommidoy unˈˈettido gishshataassa woy keehi waayettido gishshataassa gidenna. Merinawu saˈan deˈanaagee salettiyaaba gi eti qoppido gishshataassa gidenna. Eta qofaynne eti hidootan naagiyoobay laamettanaadan Yihooway ba geeshsha ayyaanaa goˈˈettiis.

12. Koyro PHeexiroosa 1:3, 4y yootiyoogaadan, tiyettida Kiristtaaneti bantta hidootaa xeelliyaagan etawu siyettiyaabay aybee?

¹² Tiyettida issi uri ha gita maatawu I bessennabadan qoppana danddayees. SHin Yihooway A dooridoogaa aynne sirenna. I saluwaa biyo hidootaa qoppiyo wode A wozanay keehi ufaytteesinne I keehi nashshees.—1 PHeexiroosa 1:3, 4 nabbaba.

13. Saˈan deˈiyoogaa xeelliyaagan tiyettidaageetussi siyettiyaabay aybee?

¹³ Hegaa giyoogee ayyaanan tiyettidaageeti hayqqanawu koyoosona giyoogee? Kiitettida PHawuloosi he oyshaa zaariis. I eta asatettaa dunkkaaniyan geeddarissidi hagaadan giis: “Nuuni ha sa7aa dunkkaaniyan de7iiddi, deexettidi ooloos; aissi giikko, haiqqiya asatettai de7uwan mitettana mala, nuuni maayanau koyiyoogaappe attin, kallottanau koyokko.” (2 Qor. 5:4) He Kiristtaaneti saˈan deˈanawu salettokkona, qassi eesuwan hayqqanawu koyokkona. SHin, bantta soo asaaranne laggetuura ufayttanawunne Yihoowawu issippe ubba galla haggaazanawu keehi koyoosona. Eti haˈˈi oottiyoobay ayba gidikkokka, Xoossay etawu sinttappe immanawu qaalaa gelido ufayssiya hidootaa ubbatoo hassayoosona.—1 Qor. 15:53; 2 PHe. 1:4; 1 Yoh. 3:2, 3; Ajj. 20:6.

14. Issi uri geeshsha ayyaanan tiyettidoogaa bessennabay aybee?

¹⁴ Neeni ‘Taani geeshsha ayyaanan tiyettidanaashsha’ gaada qoppennan waaya aggana. Qoppikko, ha keehi koshshiya oyshata wotta denttada qoppa: Aybippenne aaruwan Yihooway koyiyoobaa oottanawu yeemottay? Neeni keehi minnada haggaaziyaabadan neeyyo siyettii? Geeshsha Maxaafaa loytta xannaˈiyoogaaninne ‘Xoossaabaa geemettida yohuwaa’ tamaariyoogan ufayttay? (1 Qor. 2:10) Neeni haggaazuwan loˈˈo ayfiyaa demmanaadan Yihooway maaddidabadan qoppay? Harata ayyaanaaban maaddana koshshiyoogaa akeekada, eta wozanappe maadday? Yihooway ne deˈuwan nena keehi maaddidoogaa akeekadii? Ha oyshatuyyo neeni ‘ee’ gaada zaariyoogee neeni saluwan deˈanawu doorettidoogaa bessii? Bessenna. Aybissi? Eti tiyettin woy tiyettennan aggin Xoossaa ashkkaratu ubbawu hegaadan siyettiyo gishshataassa. Eta hidootay aybakka gidin, Yihooway ba geeshsha ayyaanaa baggaara ba ashkkaratussi ubbawu issi mala wolqqaa immees. Neeni ‘Taani geeshsha ayyaanan tiyettidanaashsha’ gaada qoppiyaaba gidikko, hegee neeni tiyettabeennaagaa bessiyaaba. Yihooway dooridoogeeti tiyettidanaayye tiyettabeykkinaa giidi qoppokkona! Eti hegaa eroosona!

15. Xoossaa ayyaanaa ekkidaageeti ubbay saluwan deˈanawu doorettibeennaagaa waati eriyoo?

 ¹⁵ Geeshsha Maxaafay, ammanettida daro asati geeshsha ayyaanaa ekkidoogaa yootees; shin saluwan deˈiyo hidootay etayyo baawa. Daawita geeshsha ayyaanay kaalettiis. (1 Sam. 16:13) Geeshsha ayyaanay, I Yihoowabaa ciimma qofaa akeekanaadaaninne Geeshsha Maxaafan deˈiya amarida qofaa xaafanaadankka maaddiis. (Mar. 12:36) Gidikkokka, Daawiti ‘saluwaa kiyibeennaagaa’ kiitettida PHeexiroosi yootiis. (Oos. 2:34, 35) Xammaqiya Yohaannisi ‘geeshsha ayyaanan kumiis.’ (Luq. 1:13-16) Yesuusi Yohaannisappe aadhdhiya ooninne deˈibeennaagaa yootiis; shin saluwaa Kawotettaa laattiyaageetu giddon I baynnaagaa odiis. (Maa. 11:10, 11) Ha asati maalaalissiyaabaa oottanaadan Yihooway ba geeshsha ayyaanaa goˈettiis, shin I saluwaa deˈuwawu eta dooranawu he ayyaanaa goˈettibeenna. Hegaa giyoogee saluwaa baanawu doorettidaageeti etappe aaruwan ammanettoosona giyoogee? Gidenna. Hegee eti Gannate gidida saˈan deˈana mala Yihooway eta hayquwaappe denttana giyoogaa.—Yoh. 5:28, 29; Oos. 24:15.

16. Ha wodiyan Xoossaa ashkkaratuppe daroti yeemuwan naagiyo woytoy aybee?

¹⁶ Ha wodiyan saˈan deˈiya Xoossaa ashkkaratuppe dariya baggawu saluwaa biyo hidooti baawa. Abrahaamaadan, Saaridan, Daawitadan, Xammaqiya Yohaannisadaaninne beni deˈida hara daro asatuugaadan, eti Xoossaa Kawotettay saˈan haariyo wode deˈanawu yeemottoosona.—Ibr. 11:10.

17. Kaalliya huuphe yohuwan nuuni beˈana oyshati awugeetee?

¹⁷ Ha wodiyan, tiyettidaageeti haˈˈikka nu giddon deˈoosona; hegaa gishshawu nuuni oychchiyo amarida oyshati deˈana danddayoosona. (Ajj. 12:17) Leemisuwawu, tiyettidaageeti banttana waati xeellana koshshii? Intte gubaaˈiyan deˈiya issi uri Godaa Kahuwaa wode oyttaa miyaabanne woyniyaa uyiyaaba gidikko, neeni waanana bessii? Qassi tiyettidaageetu qooday gujji gujjidi biyaaba gidikkoshin? Hegaabay nena qofissana koshshii? Ha oyshatu zaaruwaa nuuni kaalliya huuphe yohuwan beˈana.