1-2. Which wonderful thing happen for Pentecost 33 C.E.?

FOR the year 33 C.E., for the day wey them de do the festival of Pentecost, something happen one Sunday morning for Jerusalem. About 120 disciples gather together for one room for upstair. (Acts 1:13-15; 2:1) Before that day, Jesus don tell the disciples make they stay for Jerusalem because they go receive one special gift. (Acts 1:4, 5) So, wetin happen?

² Bible tell us say: “At once, they hear noise from heaven, like heavy breeze wey de blow with force.” People hear the sound for the whole house. Then, something like “small-small fire” appear ontop the head of the disciples, and “holy spirit enter all of them.” (Acts 2:2-4) Na for this kind wonderful way Jehovah give e holy spirit to this group of disciples. (Acts 1:8) So this disciples become the first people wey God anoint with holy spirit * and wey God give the hope to rule with Jesus for heaven.

3. Why the disciples for day of Pentecost dey sure say Jehovah don use e spirit choose them to rule with Jesus?

³ If to say you dey among the disciples wey Jehovah give holy spirit for that day of Pentecost, you no go ever forget that day. Something like fire, wey the shape  be like tongue, appear ontop your head, and you begin speak different language! (Acts 2:5-12) You go really dey sure say God don use e holy spirit choose you. But, na for this kind wonderful way God de use holy spirit choose all the anointed, and na for the same particular time for their life e de choose them? No. How we know this one?

4. Na the same time God anoint people for time of the apostles? Explain.

⁴ Make we talk about the time wey God fit use e spirit choose person. No be only the disciples for that upstair for Pentecost 33 C.E. God choose with e spirit. After, for that same day, around 3,000 people still receive the holy spirit wey Jesus promise. Jehovah use e spirit choose them when they baptize. (Acts 2:37, 38, 41) But after some years, no be all anointed Christian receive holy spirit the time wey they baptize. People from Samaria receive holy spirit small time after they baptize. (Acts 8:14-17) And the time wey Cornelius and the people for e house receive holy spirit dey very different from the time wey other people receive their own. God use e spirit choose them before they baptize.​—Acts 10:44-48.

5. According to 2 Corinthians 1:21, 22, wetin de happen when God use e spirit choose person?

⁵ Make we still talk about wetin de happen when Jehovah choose person to rule with Jesus. E fit hard some people to first believe say Jehovah don choose them. They fit surprise and ask say, ‘Why God choose me?’ Other people fit no feel like that. But e no really matter how person feel. Apostle Paul explain wetin de happen to all anointed Christians when Jehovah choose them. E talk say: “After wuna don believe, God mark * wuna with the holy spirit wey e don promise, and na Christ e use do this one. The holy spirit be like promise to show say we go receive the things wey God don promise  us.” (Eph. 1:13, 14; ftn.) So Jehovah de use e spirit to make-am dey clear to this people say e don choose them. Na this one make “the holy spirit be like promise” wey God give this people say for future they go live for heaven, no be this earth.​—Read 2 Corinthians 1:21, 22.

6. Wetin person wey God choose to rule with Jesus must do if e want get the blessing to go heaven?

⁶ When Jehovah don anoint person, that one mean say the person go surely go heaven? No. The person dey sure say e dey among the people wey God don choose to go heaven. But, e must remember this thing wey Bible talk, say: “Brothers, make wuna do everything wey wuna fit do to make sure say wuna remain the people wey God don call and choose, if wuna de do this things, wuna no go ever fail.” (2 Pet. 1:10) So even if God don choose, or call person to go heaven, e go get this blessing only if e continue to serve God well.​—Phil. 3:12-14; Heb. 3:1; Rev. 2:10.

7. How anointed ones de know say Jehovah don choose them to go heaven?

⁷ If God choose person to go heaven, whether the person na man or woman, how the person go know? The answer dey clear for the thing wey Paul tell people “wey God call to be holy people” for Rome. E tell them say: “The spirit wey wuna receive no make wuna be slave and e no make wuna begin fear again. Instead, the spirit wey wuna receive make God take us as e children. This spirit de make us talk-am loud say: ‘Abba, Papa!’ The spirit de make-am clear to us say we be children of God.” (Rom. 1:7; 8:15, 16) So, God de use e spirit to make-am dey clear to anointed ones say e don choose them to go heaven.​—1 Thess. 2:12.

8. How 1 John 2:20, 27 show say no be person go tell anointed ones say they be anointed?

⁸ Jehovah de make the anointed ones dey sure for their mind and heart say e don choose them to go heaven. (Read 1 John 2:20, 27.) Just like all of us, anointed Christians need Jehovah to teach them through the congregation. But they no need anybody to tell them say God don choose them. Jehovah don use e powerful holy spirit to make-am really dey clear to them say they be anointed!

9. When God anoint person, wetin de change for the person, as Ephesians 1:18 talk?

⁹ Today, e fit no easy for plenty servants of God to understand wetin de happen to person when God anoint the person. Why? Na because they no be anointed. God make people to live for earth forever, no be for heaven. (Gen. 1:28; Ps. 37:29) But Jehovah don choose some people to live for heaven. So when God anoint them, e go just change their hope and the way them de think so that their mind go dey for the life wey they go get for heaven.​—Read Ephesians 1:18.

10. Wetin e mean to be “born again”? (Still check footnote.)

¹⁰ When God use holy spirit anoint people, they go be ‘born again,’ or “born from heaven.” * The thing wey Jesus talk still show say e no dey possible to explain to person wey God no anoint wetin e be  like to be ‘born again,’ or “born from the spirit.”​—John 3:3-8; ftn.

11. When person become anointed, how the way e de think de change?

¹¹ When person become anointed, wetin de change for the way the person de think? Before Jehovah choose the person, the person really like the hope wey e get to live forever for this earth. The person de use all e heart wait for the time wey God go end all wickedness and make the earth paradise. The family member or friend of the person fit don die and so e de think about the time wey e go welcome them. But after God don anoint the person, e go begin think for different way. Why? No be say this person begin feel say to live forever for earth no make sense again. The person no change e mind because of stress or suffer. And no be say the person just start to think say to live forever for earth no go sweet. Instead, Jehovah use e holy spirit change the way the person de think and the hope wey e really like before.

12. According to 1 Peter 1:3, 4, how anointed Christians de feel about their hope?

¹² Person wey God anoint with holy spirit fit feel say e no qualify to get this special blessing. But e no go get any doubt say e get the hope to rule with Jesus for heaven. The person really dey happy and e de like-am anytime wey e think about the hope wey e get to live for heaven.​—Read 1 Peter 1:3, 4.

13. How anointed Christians de feel about their life for this earth?

¹³ So, this one mean say anointed Christians want die? Apostle Paul answer that question. E compare their body for flesh to tent and talk say: “The truth na say, for inside this tent wey we dey, we de cry and de over worry because we no want remove this one. Instead, we want wear the other one, so that life go fit swallow wetin must die.” (2 Cor. 5:4) No be say this Christians stop to get interest for this life and like to die. Instead, they like life and they want serve Jehovah everyday with their family and friends. Even with that one, no matter the thing wey them de do, them de always think about the wonderful hope wey they get for future.​—1 Cor. 15:53; 2 Pet. 1:4; 1 John 3:2, 3; Rev. 20:6.

14. Wetin no show say person na anointed?

¹⁴ E fit be say you de doubt whether God don use e spirit choose you to go heaven. If na so, make you think about this important questions: You get strong love to do the things wey Jehovah want? You feel say you de put all your heart for the preaching work? You de enjoy to study Bible and learn about “the deep things of God”? (1 Cor. 2:10) You feel say Jehovah de bless your preaching work and better result de come out? Deep inside your heart, you de feel say you really want help other people learn about Jehovah? You see proof for your life to show say Jehovah don bless you for plenty ways? If your answer na yes to all this questions, that one mean say Jehovah don anoint you? No, no be that one show say you be anointed. Why we talk so? Because all servants of God fit feel like that, whether God choose them to go heaven or e no choose them. And Jehovah fit use e holy spirit help all e servants to do this things, no matter their hope. The  truth be say, if you de doubt whether you be anointed, this one show say you no be anointed. People wey Jehovah don anoint or choose, no de doubt whether they be anointed or they no be anointed! Them de know!

15. How we know say no be all the people wey God give holy spirit e don choose to go heaven?

¹⁵ For Bible, Jehovah give holy spirit to plenty people with strong faith. But this people no get the hope to go heaven. God use holy spirit direct David. (1 Sam. 16:13) Holy spirit help David to understand the deep things about Jehovah and to write parts of the Bible. (Mark 12:36) Even with that one, apostle Peter talk say David “no go heaven.” (Acts 2:34) Bible talk say John the Baptist “full with holy spirit.” (Luke 1:13-16) Jesus talk say no man big pass John, but e still talk say John no dey among the people wey God don choose to rule for the Kingdom. (Matt. 11:10, 11) Jehovah use e spirit give this men the power to do wonderful things, but e no use the spirit choose them to live for heaven. So this one mean say they no dey faithful reach people wey God choose to go heaven? No. E just mean say Jehovah go bring them back to life to live for Paradise for this earth.​—John 5:28, 29; Acts 24:15.

16. Today, which blessing plenty servants of God de wait for?

¹⁶ Today, plenty servants of Jehovah no get the hope to live for heaven. Like Abraham, Sarah, David, John the Baptist, and plenty men and women for Bible time, them de wait for the time wey they go live for earth when the Kingdom of God don de rule.​—Heb. 11:10.

17. Which questions we go answer for the next topic?

¹⁷ Because some anointed ones still dey among us today, we fit still get some questions for our mind. (Rev. 12:17) For example, how anointed Christians suppose to see theirself? If person for your congregation begin chop the bread and drink the wine for Memorial, how you suppose to treat the person? And what if the number of anointed Christians continue to add? You go allow that one worry you? We go answer this questions for the next topic.