1, 2. მუ განსაკუთრებულ მოვლენაქ მოხვად ახ. წ. 33 წანაშ ჟარნეჩდომავითა დღაშ დღახუს?

იერუსალიმს ჟეშხა ოჭმარე რე. ახ. წ. 33 წანაშ ჟარნეჩდომავითა დღაშ დღახუ რე. სოდგარენ 120 მოწაფე ართ-ართ ჸუდეშ ჟიშეიან ოთახის რე შაყარელ (საქ. 1:13—15; 2:1). მუსხირენ დღათ ადრე იესოქ მითითება მეჩჷ თინეფს, ქუდოსქიდესკო იერუსალიმს, მუშენდა განსაკუთრებულ ძღვინს მიღენდეს (საქ. 1:4, 5). მუქ ოკო მოხვადკო?

² „უცბას ცაშე ხონარქ გისიმ, ითამ ძალიერ ქარბორია უმბარდჷ“. ხონარ მთელ ჸუდეს ირჩქილედ. თეშ უკულ, მოწაფეეფიშ დუდეფიშ ჟი დაჩხირიშ ნინეფცალქ გორჩქინდჷ დო „არძაქ წმინდა შურით გეიფშჷ“ (საქ. 2:2—4). თე განსაკუთრებულ შარათ იეჰოვა მუშ წმინდა შურს არზენს თე ჯგუფის (საქ. 1:8). თინეფ რდეს პირველეფ, მით წმინდა შურით რდეს ცხებულ * დო მიაჩეს იესოწკუმა ართო ზეცას მართველობაშ იმენდიქ.

3. მუშენ ვა უღდეს ეჭვი ჟარნეჩდომავითა დღაშ დღახუს შაყარელეფს, ნამდა წმინდა შურით ცხებულ რდეს?

³ თქვა ხოლო თი მოწაფეეფ შქას ქოჸოფედითკო, მით  ჟიშეიან ოთახის რდუ შაყარელ, თეს დღას ვეგიჭყოლიდუანდით. წერმიდგინით, ნამდა მუდგარენ დაჩხირიშ ნინაცალ გიმურს დო იჭყანთ შხვადოშხვა ნინაშა რაგადის! (საქ. 2:5—12). მუთუნნერ ეჭვი ვა გაღვენუდეს ქორდით დო ვარ წმინდა შურით ცხებულ. მარა არძაქ, მით წმინდა შურით რე ცხებულ განსაკუთრებულ შარათ მიღესო თე დამოწმება დო არძა ართ დროს გინირთუნო ცხებულო? ვარ. სოვრეშე მიჩქნა თენა?

4. არძაქ ართ დროს გინირთუო პირველ საუკუნეს ცხებულო? გენწყით.

⁴ ჩქი გუვარჩიენთ მუჟამ გინირთუ პიროვნება ცხებულო. ახ. წ. 33 წანაშ ჟარნეჩდომავითა დღაშ დღახუს ხვალე 120 მოწაფე ვეგნორთე ცხებულო. თიმ დღას უმოს გვიანო, სოდგარენ 3 000 პიროვნებაქ ხოლო მიღჷ წმინდა შური. თინეფქ ცხებულეფო გინირთეს მუჟამსით ინათეს (საქ. 2:37, 38, 41). მარა უკულიან წანეფს არძა ქრისტიან ნათუაშ დროს ვეგნორთე ცხებულო. მაგალთო, სამარიელეფქ ნათუაშე მუსხირენ დროშ უკულ გინირთეს ცხებულეფო (საქ. 8:14—17). თეს გეძინელ, კორნელიუსიქ დო თიშ ჸუდეშარეფქ ნათუაშახ გინირთეს ცხებულეფო, მუთ გამონაკლის შემთხვევა რდუ (საქ. 10:44—48).

5. მუჭოთ 2 კორინთელეფიშ 1:21 დო 22-ს ჭარჷ, მუჭო გინირთუ პიროვნება ცხებულო?

⁵ მორთ გუვარჩუათ მუჭო გინირთუ პიროვნება წმინდა შურით ცხებულო. ნამთინეს, მით ცხებულო გინირთუ, შილებე დუდშე გუჭირდას თიშა ინონჭაფაქ, მუშენ გიშაგორ იეჰოვაქ თინეფ. შილებე თინეფ ფიქრენდან: „ღორონთიქ მა მუშენ გიშაბგორ?“ შხვეფს შილებე ვა უღდან თეცალ რეაქცია. მუჭოდგა ვა რდასინ, მოციქულ პავლე ენწყუნს, მუჭო გინირთუ პიროვნება ცხებულო: „მუჟამსით ქირწმუნით, თიშ საშვალებათ ბეჭედიქ * ქიგგადვეს დაპირებულ წმინდა შურით, მუთ ჩქინ მემკვირდეობაშ საფუძველ რე“ (ეფეს. 1:13, 14). იეჰოვა მუშ წმინდა შურს გიმირინუანს ცხებულეფშა თიშ ოძირაფალო, ნამდა მუქ გიშეგორ თინეფ. თეშნერო, წმინდა შურ რე „საფუძველ“, ნამუთ არწმუნენს თინეფს, ნამდა მომავალს მარადიულო იცხოვრენა ზეცას დო  ვართ ხოლო დედამიწას (წეკითხით 2 კორინთელები 1:21, 22).

6. მუ ოკო აკეთას ცხებულ ქრისტიანქ, ნამდა ზეციურ ჯილდო მიღას?

⁶ ქრისტიან ცხებულ ქორენ-და, ნიშნენსო თენა თის, ნამდა აუცილებერო მიღენს ზეციურ ჯილდოს? ვარ. თინა დარწმუნებულ რე, ნამდა გიშაგორილ რე ზეცას ოცხოვრებელო. მარა თის ირიათო ოკო შუდას თე გაფრთხილება: „ჯიმალეფ, თქვა მოწოდებულ დო გიშაგორილ რეთ, ათეშენ ირფელ გაკეთით თიშო, ნამდა ვადინუათ თე პატი; თაშ ქიმიქციებუთ-და, დღას ვა დანთხუთ“ (2 პეტ. 1:10). თაშ ნამდა, შილებე ქრისტიან გიშაგორილ რე ზეცას ცხოვრებაშო, მარა ბოლოშა ართგურ ქუდოსქიდუნ-და, ხვალე თე შემთხვევას მიღენს ჯილდოს (ფილ. 3:12—14; ებრ. 3:1; გამოცხ. 2:10).

7. მუჭო გებულენა ცხებულეფ, ნამდა ზეციურ მოწოდება უღნა?

⁷ მუჭო გებულენს პიროვნება, ნამდა ზეციურ მოწოდება უღჷ? თეშ პასუხ არგამათ იძირე პავლეშ სიტყვეფშე, ნამუთ რომს რდესინ თი „წმინდეფო მოწოდებულეფს“ მეჭარ. პავლექ თინეფს უწუ: «თქვა ვა მეიღებნა, მონობაშ შურ, ნამდა კინ გოშქურდან, თქვა მიღით სქუათ ეჭოფუაშ შურ, ნამდგათ ბრაგადანთ: „აბბა, მუმა!“ თე შურ მოწმენს ჩქინ შურწკუმა ართო, ნამდა ღორონთიშ სქუალეფ ვორეთ» (რომ. 1:7; 8:15, 16). წმინდა შურიშ საშვალებათ, ღორონთ არგამათ ოძირანს ცხებულეფს, ნამდა ზეციურ მოწოდება უღნა (1 თეს. 2:12).

8. მუჭო იძირე 1 იოანეშ 2:20 დო 27 -შე, ნამდა ცხებულ ქრისტიანეფს ზეციურ მოწოდება უღნან თიშ დამტკიცება მითინშე ვასაჭირნა?

⁸ იეჰოვაშ წმინდა შურიშ ჭყოლოფათ, თინეფს მუთუნნერ ეჭვი ვა უღნა, ნამდა ზეციურ ცხოვრებაშო რენა მოწოდებულეფ (წეკითხით 1 იოანე 2:20, 27). მუშო ოკო რაგად, ცხებულ ქრისტიანეფს, შხვეფცალო ოსაჭირნა იეჰოვაშე გურაფა კრებაშ საშვალებათ. მარა თინეფს ვასაჭირნა მითინშე თიშ დამტკიცება, ნამდა ზეციურ მოწოდება უღნა. იეჰოვა სამყაროს არძაშ უმოს აღმატებულ ძალათ, მუშ წმინდა შურით, არგამათ ოძირანს თინეფს, ნამდა ცხებულეფ რენა!

9. მუჟამსით პიროვნება ცხებულო გინირთუ, მუ ითირუ თიშ ცხოვრებას, მუჭოთ თენა ეფესოელეფიშ 1:18-ს რე მოჩამილ?

⁹ ღორონთიშ მსახურეფიშ უმენტაშის შილებე გუჭირდას თიშა ინონჭაფაქ, მუჭო გინირთუ პიროვნება ცხებულო. თენა გასაკვირ ვა რე, მუშენდა მუნეფ ვა რენა ცხებულეფ. ღორონთიქ თეშ შექმნჷ ადამიანეფ, ნამდა მარადიულო იცხოვრესკო დედამიწას დო ვართ ხოლო ზეცას (დაბ. 1:28; ფსალმ. 37:29). მარა იეჰოვაქ ნამთინე ზეცას ოცხოვრებელო გიშაგორ. ათეშენ მუჟამსით ღორონთ გიშაგორუნს თინეფს ცხებულეფო, თირანს თინეფიშ იმენდის დო აზროვნებას, ნამდა ზეცას ცხოვრებას ელდან (წეკითხით ეფესოელები 1:18).

10. მუს ნიშნენს „ხელახალო დაბადება“? (ქოძირით სქოლიო).

¹⁰ მუჟამსით ქრისტიანეფ წმინდა შურით რენა ცხებულეფ, თინეფ „ხელახალო იბადებნა“. * იესოქ ხოლო თქუ, ნამდა შეიოლებერ ვა რე ზუსტას გეუნწყე პიროვნებას, ნამუთ ვა რე ცხებულ, მუჭო ხვადუ „ხელახალო დაბადება“ (იოან. 3:3—8).

11. გენწყით, მუჭო ითირუ ქრისტიანიშ აზროვნება, მუჟამსით ცხებულო გინირთუ.

¹¹ მუჭო ითირუ ქრისტიანიშ აზროვნება, მუჟამსით ცხებულო გინირთუ? სოიშახ იეჰოვა თე ქრისტიანს ცხებულო გიშაგორუნდჷ,  თინა აფასენდჷ დედამიწას მარადიულო ცხოვრებაშ იმენდის. თინა შურდოგურით ელუდ თი დროს, მუჟამსით იეჰოვა ბოლოს მუღენს უბადობას დო დედამიწას სამოთხეთ გინაშქვანს. შილებე წერმიდგინენდჷ, მუჭო შეხვადუდ მუშ ოჯახიშ წევრის ვარდა მეგობარს, ნამუთ ღურელ აფჷ. მარა თიშ უკულ, მუთ ცხებულო გინირთჷ, შხვანერო ქიდიჭყჷ ფიქრი. მუშენ? თის ვა უფიქრებ, ნამდა დედამიწას მარადიულო ცხოვრება იშენდოიშენ ჯგირ ვა რდუ. ვართ თიშენ უთირუ აზროვნება, ნამდა მუდგარენ მიზეზიშ გურშენ დეპრესიას რდუ. ვართ თინა უფიქრებ, ნამდა დედამიწას მარადიულ ცხოვრებაშა გურ გეუოლუდ. თეშ გინაწონს, იეჰოვაქ მუშ წმინდა შურიშ საშვალებათ დოთირუ თიშ აზროვნება დო მომავალიშ იმენდ.

12. მუჭოთ 1 პეტრეშ 1:3 დო 4-ის ჭარჷ, მუს ფიქრენს ცხებულ ქრისტიან ზეციურ იმენდიშ გურშენ?

¹² ნამთინე, მით ცხებულ რე, შილებე ფიქრენდას, ნამდა ვემსახურენს თე განსაკუთრებულ პატის. მარა თის ართ წუთით ხოლო ვა უღჷ ეჭვი, ნამდა ცხებულ რე. თიშ გურ ხიოლით დო მარდულობათ ეიაფშაფუ, მუჟამსით ფიქრენს ზეცაშ ცხოვრებაშ იმენდშე (წეკითხით 1 პეტრე 1:3, 4).

13. მუს ფიქრენა ცხებულეფ დედამიწას ცხოვრებაშ გურშენ?

¹³ ნიშნენსო თენა თის, ნამდა ცხებულეფს ღურა ოკონა? მოციქულ პავლე პასუხენს თე კითხვას. თიქ ხორციელ სხეულ შეადარ კარავს დო თქუ: „თე კარავს აკოჭირებულ ვორეთ დო ბწუხენთ, თიშენ ვარ, ნამდა თიშ ჩათხინაფა მოკონა; ჩქი მოკონა ახალ ქიმკიბქუნათ, მუშენდა სიცოცხლექ დოთირუას ღურუნ ფერ სხეულ“ (2 კორ. 5:4). თე ქრისტიანეფს გურ ვაფნა ელაფირ დედამიწას ცხოვრებაშა დო ვაკონა მალას ღურან. თინეფს ოხიოლნა ცხოვრება დო ოკონა თითოულ დღა თიშო გეგმირინუან, ნამდა ემსახურან იეჰოვას ოჯახიშ წევრეფ დო მეგობრეფწკუმა ართო. მუდგას ვართუდანინ, თინეფს ირიათო შუნა მომავალიშ დიდებულ იმენდ (1 კორ. 15:53; 2 პეტ. 1:4; 1 იოან. 3:2, 3; გამოცხ. 20:6).

14. მუშ საფუძველშა ოკო ვეფიქრას პიროვნებაქ, ნამდა ცხებულ რე?

¹⁴ შილებე ფიქრენთ ქორეთ დო ვარ ცხებულ. თაშ ქორენ-და, დეფიქრით თე მნიშვნელოვან კითხვეფშე: მანგარო გოკონანო შეასრულათ იეჰოვაშ ნება? ფიქრენთო, ნამდა განსაკუთრებულ მონდომას გიმირჩქინანთ ქადაგებაშ საქმეს? გურგედვალირო ირკვიენთო ღორონთიშ სიტყვას დო თქვანო სასიამოვნო ქორენო „ღორონთიშ სიტომბეეფიშ“ გურშენ უმოსიშ გაგება? (1 კორ. 2:10). ფიქრენთო, ნამდა იეჰოვა ჯგირ შედეგეფს გარზენა ქადაგებაშ საქმეს? გინაფლენთო შხვეფიშ სულიერო მოხვარაშ დიდ პასუხიშმგებლობას? ორწყეთო იეჰოვაშ განსაკუთრებულ მოხვარას თქვან ცხოვრებას? თე კითხვეფს დადებითო ქუპასუხით-და, ამტკიცენსო თენა თის, ნამდა ზეციურ მოწოდება გიღნა? მუშო ოკო რაგად, ვარ! მუშენდა ღორონთიშ არძა მსახურს, ვა უღჷ მნიშვნელობა ცხებულ რენ დო ვარ, შილებე თეცალ გრძნობეფ უღდას. იეჰოვა წმინდა შურიშ საშვალებათ ართნერო არზენს ძალას მუშ მსახურეფს, ვა უღჷ მნიშვნელობა დედამიწას ცხოვრებაშ იმენდ უღნა დო ვარ ზეცას. ქუგოეჭვუნა, ცხებულ ქორეთ დო ვარ-და, თენა თის ნიშნენს, ნამდა ვა რეთ ცხებულ. თინეფს, მით იეჰოვაქ გიშაგორ ზეციურ ცხოვრებაშო, თეშ მუთუნნერ ეჭვი ვა უღნა!

15. სოვრეშე მიჩქნა, ნამდა არძა, მიდგაქ ღორონთიშ წმინდა შურ მიღჷ, ზეცას ცხოვრებაშო ვა რდუ გიშაგორილ?

¹⁵ ბიბლიას ენოჭარ ბრელ ართგურ პიროვნებაშ მაგალით, მიდგას ღორონთიქ წმინდა შურ მეჩჷ. მარა თინეფ ცხებულეფ ვა რდეს.  დავით ღორონთიშ წმინდა შურით მოქმედენდჷ (1 სამ. 16:13). წმინდა შურქ მეხვარ თის უმოს ქიგეგკო იეჰოვაშ გურშენ დო თეს გეძინელ, თიქ წმინდა შურიშ მოხვარათ ჭარჷ ბიბლიაშ მუსხირენ მონაკვეთ (მარ. 12:36). პეტრე მოციქულქ ხოლო თქუ: „დავითის ვეშურთუმ ზეცაშა“ (საქ. 2:34). იოანე ნათლიშმცემელს ხოლო უღუდ წმინდა შურ (ლუკ. 1:13—16). იესოქ თქუ: „მითინ ვა ჸოფე იოანე ნათლიშმცემელშე დიდ“, მარა იესოქ თინა ხოლო თქუ, ნამდა იოანე ვეჸუაფუდ ზეციერ სამეფოს (მათ. 11:10, 11). იეჰოვაქ მუშ წმინდა შურიშ საშვალებათ თე ქომოლკათას ძალა ქიმეჩ სარკო საქმეეფიშ ოკეთებელო; მარა ღორონთის წმინდა შურ თიშო ვეგმურინუაფ, ნამდა თინეფ ზეცას ცხოვრებაშო გეგშაგორკო. ნიშნენსო თენა თის, ნამდა თე პიროვნებეფ თინეფშე ნაკლებო ართგურეფ რდეს, მით ზეცას იმართველენა? მუშო ოკო რაგად, ვარ. იეჰოვა თე პიროვნებეფს გათელენს, მუშენდა დედამიწას სამოთხეს იცხოვრან (იოან. 5:28, 29; საქ. 24:15).

16. მუ ჯილდოს ელჷ ღორონთიშ მსახურეფიშ უმენტაშ?

¹⁶ ამდღა ღორონთიშ მსახურეფიშ უმენტაშის დედამიწას ცხოვრებაშ იმენდ უღჷ დო ვართ ხოლო ზეცას. აბრაამი, სარა, დავით, იოანე ნათლიშმცემელ დო ჯვეშ დროს მახორუ შხვა ართგურ მსახურეფცალო, თინეფ შურდოგურით ელნა თი დროს, მუჟამსით ღორონთიშ სამეფოშ მართველობაშ თუდო იჸუაფნა (ებრ. 11:10).

17. ნამ კითხვეფს გუვარჩიენთ უკულიან სტატიას?

¹⁷ ცხებულეფიშ გარკვეულ ნაწილ ღორონთიშ ხალხ შქას რე, ათეშენ მუსხირენ კითხვა წიმიჭკირუ (გამოცხ. 12:17). მაგალთო, მუნერ დამოკიდებულება ოკო უღდან ცხებულეფს მუნეფიშ დუდიშ მიმართ? თქვან კრებელქ გოშინაშ ონჯუას სიმბოლოეფიშ მეღება ქიდიჭყ-და, მუჭო ოკო მექცუათ თის? ვარდა მუ რეაქცია ოკო გიღდან, მუჟამსით იძინანს თინეფიშ რიცხვ, მით იჩიებ, ნამდა ცხებულ რე? ოკო წუხენდათო თეშ გურშენ? თე კითხვეფს უკულიან სტატიას ქუპასუხენთ.