NGANI JAKULIJIGANYA 4
“Msimuwo Ukusatendela Umboni”
“Msimuwo ukusatendela umboni pamo ni msimu wetu kuti tuli ŵanache ŵa Mlungu.”—ALO. 8:16, NW.
NYIMBO 25 Mtuka Wapajika
YACHITULIJIGANYE *
Yehofa mwakusimonjesya ŵapeleche msimu weswela kwa Aklistu 120 pa Pentekosite (Alole ndime 1-2)
1-2. Ana ni chakutendekwa chakusimonjesya chapi chachatendekwe pa Pentekosite mu 33 C.E.?
ŴANDU ŵakwana 120 ŵasongene m’chipinda chamwinani ku Yelusalemu. Yeleyi yatendekwe Lyamlungu kundaŵi, m’chaka cha 33 C.E., palisiku lya Pentekosite. (Mase. 1:13-15; 2:1) Kuli kusigele masiku gamnono yeleyi mkaniyitendekwe, Yesu ŵasalile jemanjajo kuti akatyoka ku Yelusalemu ligongo ŵasosekwaga kuti apochele mtuka wapadela. (Mase. 1:4, 5) Ana kaneko patendekwe chichi?
2 “Mwachisisimuchisya kwapikaniche lisegwe kutyochela kwinani mpela mkokomo wa mbungo jamachili.” Lisegwelyo lyatandite kupikanika mnyumba mosope. Kaneko, gawoneche “malulumi mpela malamba ga moto” pa mitwe ja ŵakulijiganya ŵa Yesu, soni wosopewo “ŵapochele msimu weswela.” (Mase. 2:2-4) Pachakusimonjesyachi, Yehofa ŵapeleche msimu weswela kwa ŵanduŵa. (Mase. 1:8) Jemanjaji ŵaliji ŵandanda kusagulidwa ni msimu weswela * soni kupedwa chembecheyo chakuti akalamulile ni Yesu kwinani.
ANA CHIKUSATENDEKWA CHICHI NAGA MUNDU ASAGULIDWE?
3. Ligongo chichi ŵandu ŵaŵasimanikwe pa Pentekosite nganakayichila kuti asagulidwe ni msimu weswela?
3 Yikaŵe kuti wawojo ŵaliji jumo mwa ŵakulijiganya ŵa Yesu ŵaŵasongene m’chipinda chamwinani palisikulyo, ngamkanaliŵalila yayatendekweyo. Tukusala yeleyi ligongo lyakuti akachiweni chindu chakuwoneka mpela lulumi lwa moto chili chijimi pamtwe pawo, kaneko wawojo nikutanda kuŵecheta chiŵecheto chine. (Mase. 2:5-12) Pelepa ngamkanakayichila yakuti asagulidwe ni msimu weswela. Ana tujile kuti ŵasagulwe ni msimu wosope akusasagulidwa m’litala lyeleli? Iyayi. Ana tukumanyilila chamtuli yeleyi?
4. Ana ŵasagulwe wosope ŵa m’yaka 100 yandanda ŵasagulidwe pandaŵi jakulandana? Alondesye.
4 Kwende sambano tukambilane ndaŵi jampaka mundu amanyilile kuti asagulidwe. Gulu ja Aklistu ŵakwana 120 ŵala nganaŵa jemanjajope ŵaŵasagulidwe ni msimu weswela pa Pentekosite mu 33 C.E. Panyuma pa lisikuli, ŵandu 3,000 ŵapochelesoni msimu weswelawu. Jemanjaji ŵasagulidwe paŵagambile kubatiswa. (Mase. 2:37, 38, 41) Nambo yaka yakuyichisya, ngaŵa kuti Aklistu ŵasagulwe wosope, ŵasagulidwe panyuma pakubatiswa. Asamaliya ŵasagulidwe ni msimu pali papitile kandaŵi panyuma pakubatiswa. (Mase. 8:14-17) Kusagulidwa kwa Koneliyo ni ŵam’nyumba mwakwe kwaliji kwakusimonjesya. Jemanjaji ŵasagulidwe mkanabatiswe.—Mase. 10:44-48.
5. Mwakamulana ni 2 Akolinto 1:21, 22, ana chikusatendekwa chichi mundu pasagulidwe ni msimu weswela?
5 Kwende tulolesoni yayikusatendekwa mundu pasagulidwe ni msimu weswela. Ŵandu ŵane pagambile kusagulidwa kwene, akusakayichila yakuti Yehofa ŵasagwile. Jemanjaji mpaka aliwusyeje kuti, ‘Ligongo chichi Mlungu asagwile une?’ Nambope ŵane ŵangaganisyaga chamti myoyo. Mulimose mwampaka yiŵele, ndumetume Paulo jwasasile yayikusatendechela ŵandu ŵasagulidwe. Jwalakwe jwatite, “Ni ligongo lyakwe Mlungu ŵaŵisile chimanyisyo * chakusimichisya kuti jemanja nditu mli ŵakwe kusyene, pakumpa msimu weswela wele ŵatite tachipeleka. Msimu weswela wakututendesya kuti tusimichisye kuti tuchipochela yele Mlungu ŵasunjile ŵandu ŵakwe.” (Aef. 1:13, 14) Myoyo Yehofa akusakamulichisya masengo msimu weswela pakusaka kwasimichisya Aklistuŵa kuti ali ŵasagulwe. Mwakutenda yeleyi, msimu weswela ukusaŵa mpela ‘chakwasimichisya [chilanga]’ kuti kusogolo chachitama kwinani mpaka kalakala ngaŵaga pachilambo chapasi.—Aŵalanje 2 Akolinto 1:21, 22.
6. Ana Mklistu jwamsagulwe akusosekwa kutenda chichi kuti akapochele mboto jakwe kwinani?
6 Naga Mklistu asagulidwe, ana nikuti chachipochela mboto jakwe jakwawula kwinani mwangasawusya? Iyayi. Yili yisyene kuti jwalakwe jwangakayichilaga kuti chachijawula kwinani. Nambope akusasosekwa kukumbuchila maloŵe aga, “Achalongo achimjangu ŵakulupilila, mtende chitema kupunda kala kusimichisya kuti Mlungu ŵamŵilasile soni ŵamsagwile. Naga mkutenda myoyo ngasimgwa mu ulemwa.” (2 Pet. 1:10) Myoyo atamose kuti Mklistu jwine asagulidwe kuti ajawule kwinani, nambope chachipochela mboto jakwe naga akuŵape jwakulupichika.—Afil. 3:12-14; Aheb. 3:1; Chiw. 2:10.
ANA MUNDU MPAKA AMANYILILE CHAMTULI KUTI ALI JWAMSAGULWE?
7. Ana Mklistu jwasagulidwe kwawula kwinani akusamanyilila chamtuli kuti ali jwamsagulwe?
7 Ana mundu mpaka amanyilile chamtuli kuti asagulidwe kwawula kwinani? Kwanga kwakwe kukusimanikwa m’maloŵe ga Paulo gakwawula kwa ŵandu ŵa ku Loma “ŵaŵilanjidwe kuti aŵe ŵaswela.” Paulo jwasalile ŵasagulweŵa kuti, “Pakuŵa jemanja nganapochela msimu wa ukapolo wakutandikasya woga, nambo ŵapochele msimu wakwatendekasya kuŵa ŵanache ŵa Mlungu, welesoni ukusatutendekasya kugumila kuti ‘Abba, Atati!’ Msimuwo ukusatendela umboni pamo ni msimu wetu kuti tuli ŵanache ŵa Mlungu.” (Alo. 1:7; 8:15, 16, NW) Myoyo kupitila mwa msimu wakwe weswela, Mlungu akusiŵasimichisya ŵasagulwe kuti aŵilanjidwe kwinani.—1 Ates. 2:12.
8. Ana lilemba lya 1 Yohane 2:20, 27 likulosya chamtuli kuti Aklistu ŵasagulwe ngakusasosechela kuti mundu jwine ŵasimichisye kuti asagulidwe?
8 Yehofa jwangatendekasya jemanjaji kuti akayichileje yakuti akwete chembecheyo chakwawula kwinani. (Aŵalanje 1 Yohane 2:20, 27.) Nambope Aklistu ŵasagulwe akusasosekwa kwiganyidwa ni Yehofa kupitila kumpingo mpela mwakusatendela jwalijose. Nambo jemanjaji ngakusasosechelaga mundu jwine kuti ŵasimichisye yakuti ali ŵasagulwe. Yehofa aŵele ali mkukamulichisya masengo machili ga msimu wakwe weswela pakwasimichisya jemanjaji kuti ali ŵasagulwe.
JEMANJAJI “AKUSAPAGWAGASONI”
9. Mwakamulana ni Aefeso 1:18, ana ni kuchenga kwapi kwakusakuwona mundu pandaŵi jasagulidwe ni msimu weswela?
9 Ŵakutumichila ŵa Mlungu ŵajinji masiku agano yikusiyasawusya kupikanichisya chachikusatendekwa mundu jwine pasagulidwe ni Mlungu. Yeleyi nganiyiŵa yachilendo ligongo lyakuti jemanjaji nganasagulidwejepo. Mlungu ŵapanganyisye ŵandu kuti atameje pachilambo chapasi mpaka kalakala, ngaŵaga kwinani. (Gen. 1:28; Sal. 37:29) Nambope Yehofa asagwile ŵandu ŵane kuti akatame kwinani. Paŵasagwile jemanjaji, akusiŵachenga kaganisye kawo soni chembecheyo chaŵakwete kuti sambano atande kwembecheya ya kuja kutama ni umi kwinani.—Aŵalanje Aefeso 1:18.
10. Ana ‘kupagwasoni’ kukusagopolela chichi? (Alolesoni maloŵe ga mwiŵanda.)
10 Aklistu pasagulidwe ni msimu weswela “akusapagwagasoni” kapena kuti “akusapagwa kutyochela kwinani.” * Yesu jwalosisye kuti yikusaŵaga yakusawusya kuti mundu jwangasagulwa ayipikanichisye chenene mwayikusaŵela kuti mundu ‘apagwesoni’ kapena kuti “apagwe mwamsimu.”—Yoh. 3:3-8, NW.
11. Ana ni kuchenga kwapi kwakukusatendekwa pakaganisye ka mundu pandaŵi jasagulidwe ni msimu weswela? Alondesye.
11 Ana Aklistu pasagulidwe, ni kuchenga kwamtuli kwakukusatendekwa pakaganisye kawo? Aklistuŵa mkanasagulidwe, Yehofa akusiŵapa chembecheyo chakutama ni umi pachilambo chapasi mpaka kalakala. Jemanjaji mkanasagulidwe ŵaliji ŵakusachilila kulola ndaŵi jele Yehofa chachityosya yakusakala yosope ni kuchitenda chilambo chapasi kuŵa paladaiso. Komboleka kuti jemanjaji ŵaganichisyaga ali mkwapochela ŵamwiŵasa mwawo kapena achimjawo ŵaŵawile. Nambo paŵagambile kusagulidwa ŵachenjile kaganisye keleka. Ligongo chichi ŵachenjile? Jemanjaji ngaŵa kuti ŵatandite kuyiwona kuti kutama pachilambo chapasi kuli kwangali mate. Jemanjaji nganachenga kaganisyeka ligongo lyakuti ŵasimanaga ni yakusawusya. Ngaŵa kuti ŵatandite kukuwona kutama pachilambo chapasi mpaka kalakala kuŵa kwakupesya. Mmalo mwakwe Yehofa ŵakamulichisye masengo msimu wakwe weswela kuchenga kaganisye kawo soni chembecheyo chaŵakwete.
12. Mwakamulana ni 1 Petulo 1:3, 4, ana Aklistu ŵasagulwe akusapikana wuli mumtima pakuganichisya ya chembecheyo chakwete?
12 Mundu jwine pasagulidwe mpaka aliwoneje kuŵa jwangaŵajilwa kupochela upilewu. Nambo nganaŵa akayichile atapanandi kuti asagulidwe ni Yehofa. Jwalakwe akusaŵa jwakusangalala mnope soni jwakuyamichila chembecheyo chakwete chakujakutama kwinani.—Aŵalanje 1 Petulo 1:3, 4.
13. Ana Aklistu ŵasagulwe akusawuwona uli umi wawo wa pachilambo chapasi?
13 Ana yeleyi yikugopolela kuti jemanjaji akusasaka kuti agambe kuwa pakusaka kuti akapochele mboto jawo? Ndumetume Paulo jwajanjile chiwusyochi. Jwalakwe jwawanichisye chilu cha mundu ni tenti, paŵatite, ‘Uwe ŵatuli mu tenti ajino tukusasitopelwa soni tukusawuwula. Ngaŵa kuti tukusaka kujiwula tenti iyayi, nambo kusyesyene tukusaka kuwala tenti jakwinani, kuti chele chili chachiwe chiŵe soni chaumi.’ (2 Akoli. 5:4) Aklistuŵa akusawunonyelape umi wapachilambopa, soni ŵangasakaga kuti umale mwachitema. Myoyo, jemanjaji akusaŵa ŵakusangalala soni ŵakusachilila kuti amtumichileje Yehofa lisiku lililyose pampepe ni ŵamwiŵasa mwawo soni achimjawo. Nambope, mwangasamala kandu ni yiliyose yakutenda, jemanjaji akusaganichisyagape ya chembecheyo chakwete chamsogolo.—1 Akoli. 15:53; 2 Pet. 1:4; 1 Yoh. 3:2, 3; Chiw. 20:6.
ANA WAWOJO ASAGULIDWE NI YEHOFA?
14. Ana ni chindu chapi chachikusalosya kuti mundu nganasagulidwa ni msimu weswela?
14 Komboleka kuti mwinemwakwe akukayichila yakuti asagulidwe ni msimu weswela. Naga yili myoyo aganichisye yiwusyo yakusosekwayi, Ana akusasachilila mnope kutenda yakusasaka Yehofa? Ana akusalipikana kuti akusalipeleka mnope pamasengo gakulalichila? Ana akusanonyela kulijiganya Maloŵe ga Mlungu kuti amanyilile yindu “yakusokoka mnope ya Mlungu”? (1 Akoli. 2:10) Ana akusalipikana kuti Yehofa ŵakamuchisye mnope pamasengo gawo gakulalichila? Ana akusalipikanaga kuti akwete udindo wekulungwa mnope wakamuchisya ŵane mwausimu? Ana akwete maumboni gakulosya kuti Yehofa aŵele mkwakamuchisya mwapadela paumi wawo? Naga akwanga kuti elo yiwusyo yosopeyi, ana nikuti wawojo ali ŵasagulwe? Iyayi, ngaŵa myoyo. Ligongo lyakuti ŵandu wosope ŵakusamtumichila Mlungu chinga ŵasagulwe kapena iyayi mpaka alipikanesoni myoyo. Kupitila mwa msimu weswela Yehofa mpaka apeleche machiliga kwa jwalijose jwakusamtumichila jwalakwe, mwangajigalila kuti akwete chembecheyo chamtuli. Kusala yisyene, naga akukayichila yakuti asagulidwe ni msimu, pelepo nikuti kukayichila peko kukulosya kuti nganasagulidwa. Ŵandu ŵaŵilanjidwe ni Yehofa ŵangakayichilaga yakuti asagulidwe. Jemanjaji akusamanyililaga nditu kuti asagulidwe.
Yehofa ŵakamulichisye masengo msimu wakwe weswela pakupeleka machili kwa Abulahamu, Sala, Daudi, nambosoni Yohane m’Batisi gakuti atendeleje yindu yakusimonjesya, nambope nganakamulichisya masengo msimuwo pakwapa chembecheyo chakwawula kwinani (Alole ndime 15-16) *
15. Ana tukumanyilila chamtuli kuti ngawa wosope ŵapochele msimu wa Mlungu ni kuti chachijawula kwinani?
15 M’Baibulo mwana yisyasyo ya ŵandu ŵakulupichika ŵaŵapochele msimu weswela nambo ŵakuti nganakola chembecheyo cha kuja kutama kwinani. Mwachisyasyo, Daudi jwalongoleledwaga ni msimu weswela. (1 Sam. 16:13) Msimu weswela wamkamuchisye kupikanichisya yindu yakusokoka yakwamba Yehofa nambosoni wamlongolele kuti alembe mbali sine sya Baibulo. (Mak. 12:36) Atamose yaliji myoyo, ndumetume Petulo jwasasile kuti Daudi “nganakwela kwawula kwinani.” (Mase. 2:34) Nombenajo Yohane m’Batisi ‘jwalongoleledwaga ni msimu weswela.’ (Luk. 1:13-16) Yesu jwasasile kuti pangali mundu jwamkulungwa kumpunda Yohane, nambo kaneko jwasasilesoni kuti Yohane nganaŵa jumo mwa ŵandu ŵakuja kulamulila mu Uchimwene ŵakwinani. (Mat. 11:10, 11) Yehofa ŵapele ŵandu ŵatwasasileŵa machili ga msimu weswela gakutendela yindu yakusimonjesya, nambope nganiŵasagula ni msimuwo kuti ajawule kwinani. Ana yeleyi yikugopolela kuti jemanjaji ŵakwete chikulupi chamnono pakulandanya ni chaŵakwete ŵaŵasagulidwe kuti ajawule kwinani? Iyayi. Yeleyi yigamba gopolela kuti Yehofa chachajimusya jemanjaji kuti chaŵesoni ni umi m’Paladaiso pachilambo chapasi.—Yoh. 5:28, 29; Mase. 24:15.
16. Ana ŵakutumichila ŵa Mlungu ŵajinji masiku agano akwembechela kupochela mboto japi?
16 Ŵandu ŵajinji ŵakutumichila Mlungu masiku agano nganakola chembecheyo cha kuja kutama kwinani. Mwakulandana ni Abulahamu, Sala, Daudi, Yohane m’Batisi soni achalume ni achakongwe ŵane ŵajinji ŵa mundaŵi ja Baibulo, akwembecheya kutama pachilambo chapasi pele Uchimwene wa Mlungu uchalamulilaga.—Aheb. 11:10.
17. Ana mu ngani jakuyichiyisya chitukambilane yiwusyo yapi?
17 Ligongo lyakuti ŵasagulwe tuli nawo yimpepe masiku agano, yeleyi mpaka yitutendekasyejepe kola yiwusyo. (Chiw. 12:17) Mwachisyasyo, ana ŵasagulwe akusosekwa kuliwona chamtuli? Naga mundu jwine mumpingo mwetu atandite kulya mkate soni kumwa finyo pa Chikumbuchilo, ana tukusosekwa tutendeje najo yindu mwamtuli? Nambi wuli naga chiŵalanjilo cha ŵandu ŵakusala kuti ali ŵasagulwe chikutupa? Ana akusosekwa kudandawula ni yeleyi? Tuchijanga yiwusyo yeleyi mungani jakuyichisya.
^ ndime 5 Kutandila pa Pentekosite mu 33 C.E. mpaka apano, Yehofa aŵele ali mkupeleka chembecheyo kwa Aklistu ŵane chakujakulamulila yimpepe ni Mwanache jwakwe kwinani. Nambope, ana Aklistuŵa akusamanyilila chamtuli kuti asagulidwe? Ana chikusatendekwa chichi naga mundu asagulidwe? Ngani ajino jityochele mu ngani jine jajikusimanikwa mu Sanja ja Mlonda ja Januwale 2016, soni chijijanje yiwusyoyi.
^ ndime 2 NGOPOLELO JA MALOŴEGA: Kusagulidwa ni msimu weswela: Yehofa akusakamulichisya masengo msimu weswela pakusagula mundu kuti akalamulile yimpepe ni Yesu kwinani. Kupitila mu msimu weswelawu, Mlungu akusampa mundujo chilanga cha yindu ya msogolo kapena kuti ‘kumsimichisya.’ (Aef. 1:13, 14) Aklistuŵa mpaka asale kuti msimu weswela “ukusatendela umboni” kapena kwasimichisya kuti mboto jawo jili kwinani.—Alo. 8:16.
^ ndime 5 NGOPOLELO JA MALOŴEGA: Chimanyisyo. Mundu jwamsagulwe akusapocela chimanyisyochi kapena kuti chidindo kakumalisya pasigele panandi kuwa ali jwakulupichika, soni ŵane chachipochela chidindochi yisawusyo yekulungwa yili yisigele panandi kutanda.—Aef. 4:30; Chiw. 7:2-4; alole Sanja ja Mlonda ja Epulo 2016, pa mtwe wakuti “Yiwusyo Yakutyochela kwa Ŵakuŵalanga.”
^ ndime 10 Kuti amanyilile yejinji yakwamba ngopolelo ja ‘kupagwasoni,’ alole Sanja ja Mlonda ja Chicheŵa ja Epulo 1, 2009, peji 3-12.
NYIMBO 27 Ŵanache ŵa Mlungu Chachimanyikwa
^ ndime 57 KULONDESYA CHIWULILI: Kanga tutaŵidwe ligongo lya chikulupi chetu kapena tukusalalichila mwaufulu soni kwiganya usyesyene, nambo mpaka tujembecheyeje kutama pachilambo chapasi pele Uchimwene wa Mlungu uchitulamulilaga.
