1-2. Mang reb e ban’en ni buch ko rofen ni Pentekost ko duw ni 33 C.E. ni yira ngat ngay?

KE AF ko madnom ni kakadbul u Jerusalem ko duw ni 33 C.E., ma aram e rofen ni Pentekost. Ke muulung sogonap’an 120 i gachalpen Jesus ko thal ni nga lang u reb e naun u Jerusalem. (Acts 1:13-15; 2:1) In e rran u m’on riy me yog Jesus ngorad ni ngar pared u Jerusalem ni bochan e bay reb e tow’ath ni yugu ba thil ni bayi yag ngorad u rom. (Acts 1:4, 5) Ere mang e migid ni buch?

² “Yugu ni gin ma ke yib lingan ban’en u lan e lang ni bod lingan bangi nifeng nib gel ni ke thow.” Me sugnag fare lam fare naun ni polo’. Me yib e “nifiy ni bod yaan e yunmon,” ma ra bagayad fapi cha’ ni gachalpen Jesus me yib i par reb nga daken lolugen, ma yad gubin ni “yigoo sugnagrad e Kan ni Thothup [“gelngin Got nib thothup,” NW].” (Acts 2:2-4) I puog Jehovah gelngin nib thothup nga daken e re ulung i girdi’ nem u reb e kanawo’ ni yira ngat ngay. (Acts 1:8) Aram e piin som’on nni dugliyrad nga gelngin Got nib thothup * me yag e athap ngorad ni ngar uned ngak Jesus ko gagiyeg u tharmiy.

3. Mang fan ni piin ur moyed u lan fare naun ko rofen ni Pentekost e rib mich u wan’rad ni kan dugliyrad nga gelngin Got nib thothup?

³ Faan gomanga gur bagayad e pi gachalpen Jesus nem ni kar muulunggad ko thal ni nga lang ko re naun nem e rofen nem, ma dabi m’ay u wan’um e n’en ni buch. I yib e nifiy ni bod yaan e yunmon i par nga daken lolugem, ma aram mag tabab ko numon ni lungun yugu boch e nam! (Acts 2:5-12) Rra mich u wan’um ni kan dugliyem  nga gelngin Got nib thothup. Machane gur, urngin e piin kan dugliyrad nga gelngin Got nib thothup e yima dugliyrad u reb e kanawo’ ni yira ngat ngay maku yad gubin nib mudugil e ngiyal’ u lan e yafos rorad ni yima dugliyrad riy, fa? Danga’. Uw rogon ni kad nanged?

4. Gubin e piin dugliyrad nga gelngin Got nib thothup u nap’an e bin som’on e chibog e taa bangiyal’ e ni dugliyrad riy, fa? Mu tamilangnag.

⁴ Chiney e ngad weliyed murung’agen e ngiyal’ nrayog ni ngan dugliy be’ riy. Fapi Kristiano ni sogonap’an 120 urngirad e gathi kemus e piin dugliyrad nga gelngin Got nib thothup ko rofen nem ni Pentekost ko duw ni 33 C.E. Boch nga tomuren ko rofen nem maku bay sogonap’an 3,000 i gachalpen Jesus ni kun dugliyrad nga gelngin Got nib thothup. Pi girdi’ ney e nni dugliyrad u nap’an nra uned ko taufe. (Acts 2:37, 38, 41) Machane faani tin migid e duw nga tomuren, ma gathi gubin e Kristiano ni kan dugliyrad e ni dugliyrad u nap’an nra uned ko taufe. Fapi girdi’ nu Samaria e nni dugliyrad u ba ngiyal’ u tomuren nni taufenagrad. (Acts 8:14-17) Me Kornelius nge chon e tabinaw rok e yugu ba thil rogon nni dugliyrad, ya ni dugliyrad u m’on nra uned ko taufe.​—Acts 10:44-48.

5. Mang e ma buch u nap’an ni yira dugliy be’ nga gelngin Got nib thothup nrogon ni be yog e 2 Korinth 1:21, 22?

⁵ Chiney e ngkud weliyed murung’agen e n’en ma buch u nap’an yira dugliy be’ nga gelngin Got nib thothup. Bay boch e piin kan dugliyrad nsana som’on e ba mo’maw’ ni nge m’agan’rad ngay ni ke mel’egrad Jehovah. Sana ra lungurad u wan’rad, ‘Mang fan ni ke mel’egeg Got?’ Machane, boch e girdi’ e sana dab ra lemgad ni aram rogon. Demtrug rogon, me weliy apostal Paul e n’en nra buch rok urngin e piin kan dugliyrad ni gaar: “[Tomuren ni] mich Kristus u wun’med, me ta’ Got e pow * rok ngomed ni aram e kam manged girdien ni fan e pi’ fare Kan ni Thothup rok [“gelngin nib thothup,” NW] ngomed ni yog nra pi’. Re Kan ni Thothup [“gelngin nib thothup,” NW] nem e aram e pow [“mich,” NW] riy ni ke mudugil nrayog ngodad e tin ni ke yog Got nra pi’ ngak e tirok e girdi’.” (Efe. 1:13, 14) Ere ke fanay Jehovah gelngin nib thothup ni ngari micheg nga laniyan’ e pi Kristiano ney ni ke mel’egrad. Ere gelngin Got nib thothup  e aram e “mich” ni kan pi’ ngorad nra ayuwegrad ni nge riyul’ u wan’rad nra boch nga m’on ma yad ra un ko par u tharmiy ndariy n’umngin nap’an ma gathi fayleng.​—Mu beeg e 2 Korinth 1:21, 22.

6. Mang e thingari rin’ reb e Kristiano ni kan dugliy mfin aram e rayog ni nge un ko yan nga tharmiy?

⁶ Faanra kan dugliy reb e Kristiano, ma gur, aram e be yip’ fan ni kari mudugil nra yan nga tharmiy? Danga’. Ke mudugil ni ir bagayad e piin kan dugliy ni nge un ko yan nga tharmiy. Machane, thingar dabi pagtalin e pi thin ni baaray ni kan puguran ni be gaar: “Pi walageg ni girdien Kristus, mu guyed rogon ngam athamgilgad nge yib fan e pong ni ke tay Got ngomed, nge rogon ni ke mel’egmed nguum pired riy; faan gimed ra rin’ ni aray rogon ma ri dabiyog ni ngam thaygad.” (2 Pet. 1:10) Ere yugu aram rogon ni kan mel’eg reb e Kristiano ni nge un ko yan nga tharmiy, machane ra yag e re tow’ath ney ngak ni faanra par nib yul’yul’.​—Fil. 3:12-14; Heb. 3:1; Rev. 2:10.

7. Uw rogon me nang e piin kan dugliyrad ni yad ra yan nga tharmiy?

⁷ Machane, uw rogon me nang be’ ni ir bagayad e piin kan dugliy ni nge un ko yan nga tharmiy? Ba tamilang e fulweg riy ko n’en ni yog Paul ngak e piin ur moyed u Roma ni u nog ni yad e piin ke ‘piningrad Got ni ngar manged girdien.’ I gaar ngorad: “Fare Kan ni Thothup [“gelngin Got nib thothup,” NW] ni ke pi’ Got ngomed e der ma taymed ni gimed e sib ko denen nguum pired ni gimed be rus; ya re Kan ni Thothup [“gelngin Got nib thothup,” NW] nem e ma ngongliymed ngam manged pi fak Got, ma gelngin e Kan ni Thothup [“gelngin Got nib thothup,” NW] e gadad ma non riy ngak Got ni ma lungudad, ‘Chitamag! Chitamag!’ Fare Kan ni Thothup rok Got [“gelngin Got nib thothup,” NW] e ir e be micheg nga lanin’dad ni gadad pi fak Got.” (Rom. 1:7; 8:15, 16) Ere ma fanay Got gelngin nib thothup ni nge micheg nga laniyan’ e piin kan dugliyrad ni yad ra yan nga tharmiy.​—1 Thess. 2:12.

8. Uw rogon ni be tamilangnag e 1 John 2:20, 27 nde t’uf ni nge micheg be’ nga laniyan’ e pi Kristiano ni kan dugliyrad ni yad ra un ko yan nga tharmiy?

⁸ Nap’an nra dugliy Jehovah be’ ni nge un ko yan nga tharmiy ma aram e kari mich nga laniyan’ ni aram e athap rok. (Mu beeg e 1 John 2:20, 27. *) Riyul’ nib t’uf ni nge skulnag Jehovah e pi Kristiano ni kan dugliyrad u daken e ulung rok ni bod e tin ka bay e walag. Machane, de t’uf ni nge micheg be’ nga lanin’rad ni yad boch e piin kan dugliyrad. Ya ke fanay Jehovah gelngin nib thothup ni aram e re gelngin nth’abi gel u palpalth’ib ni ngari micheg nga lanin’rad ni yad boch e piin kan dugliyrad!

9. Mang e ma thil rok be’ u nap’an yira dugliy nrogon ni kan tamilangnag ko Efesus 1:18?

⁹ Yooren e pi tapigpig rok Got e ngiyal’ ney e rayog nib mo’maw’ ni ngari tamilang u wan’rad ko mang e n’en ma buch rok be’ u nap’an nra dugliy Got. Mang fan? Bochan e gathi yad boch e piin kan dugliyrad. I sunmiy Got e girdi’ ni ngar pared u fayleng ni manemus, ma gathi tharmiy. (Gen. 1:28; Ps. 37:29) Machane, ke mel’eg Jehovah boch e girdi’ ni ngar uned ko par u tharmiy. Ere aram fan nnap’an nra dugliyrad, ma aram e ra thilyeg e athap rorad nge rogon e lem rorad nib polo’, ma aram mar tababgad ni ngar athapeged e bin nu tharmiy e yafos.​—Mu beeg e Efesus 1:18.

10. Mang e be yip’ fan ni ngan ‘gargeleg be’ bayay’? (Kum guy e footnote.)

¹⁰ Nap’an yira dugliy e piin Kristiano nga gelngin Got nib thothup, ma aram e kan ‘gargelegrad bayay’  ara “kan gargelegrad u tharmiy.” * Ki tamilangnag Jesus ni faanra dawor ni dugliy be’, ma dabiyog ni nge tamilang u wan’ rarogon e lem rok be’ ni kan ‘gargeleg bayay,’ ara kan “gargeleg nga gelngin Got nib thothup.”​—John 3:3-8; ftn, NW.

11. Mu weliy rogon ni ma thil e lem rok be’ u nap’an yira dugliy.

¹¹ Uw rogon nra thil e lem rok e piin Kristiano u nap’an yira dugliyrad? U m’on ni nge dugliy Jehovah e pi Kristiano ney, mab ga’ fan u wan’rad e athap rorad ni ngar pared u fayleng. Gubin ngiyal’ nri yad ma athapeg ni nge taw ko ngiyal’ nra chuweg Jehovah urngin e kireb me paradisnag e re fayleng ney. Sana ku rayog ni ur athapeged ni nge taw ko ngiyal’ ni yad ra mada’ bayay reb i chon e tabinaw rorad ara fager rorad ni ke yim’. Machane tomuren ni yira dugliyrad, ma aram me tabab ni nge thil e lem rorad. Mang fan? Re n’ey e gathi be yip’ fan ndaki fel’ u wan’rad e bin nu fayleng e athap. Gathi kar thilyeged e lem rorad ni bochan e yugu yad be mochuch ara kaygi pag rogon e gafgow ni yad be tay. Gathi yigi pos me thil e lem rorad ngar lemnaged nra chalbarad ko par u fayleng ndariy n’umngin nap’an. Ya bin riyul’ riy e, ke fanay Jehovah gelngin nib thothup ni nge thilyeg e lem rorad nge athap rorad.

12. Nap’an nra lemnag e pi Kristiano ni kan dugliyrad e athap rorad, ma uw rogon e re n’ey u wan’rad nrogon ni bay ko 1 Peter 1:3, 4?

¹² Be’ ni kan dugliy e sana rayog ni nge lemnag ndariy rogon ni ngan pi’ e biney e tow’ath ngak nrib manigil. Machane, dariy ba ngiyal’ nra maruwar u wan’ ni ir bagayad e piin ke dugliy Jehovah. Nap’an nra lemnag e athap rok boch nga m’on ma rib gel e felfelan’ ni ma tay maku ban’en nrib ga’ fan u wan’.​—Mu beeg e 1 Peter 1:3, 4. 

13. Uw rogon u wan’ e piin kan dugliyrad e par rorad u roy u fayleng?

¹³ Ere gur, re n’ey e be yip’ fan ni piin kan dugliyrad e yad baadag ni ngar m’ad? Ke pi’ apostal Paul e fulweg ko re deer ney. I taarebrogonnag e dowef ko girdi’ ni bay rorad ko tent, me yog ni gaar: “Ngiyal’ ni gadad be par u lan e re tent ney nu fayleng e gadad be gel’gel’ ni ke tomalan’dad; gathi fene gadad ba adag ni ngad n’iged e dowef rodad nu fayleng, machane gadad ba adag ni ngan tay e bin nu tharmiy nga dakendad, ni fan e bin nra yim’ e bayi mang yafos e ful’.” (2 Kor. 5:4) Pi Kristiano ney e gathi ke chalbarad ko par u roy u fayleng ma yad baadag ni nge papey ngar chuwgad riy. Ya bin riyul’ riy e, yad ba felfelan’ ko yafos rorad ma yad baadag ni yad be pigpig e pi fager rorad nge chon e tabinaw rorad ngak Jehovah u taabang ni gubin e rran. Machane yugu demtrug rogon e tin yad be rin’, ma der m’ay u wan’rad e athap rorad boch nga m’on.​—1 Kor. 15:53; 2 Pet. 1:4; 1 John 3:2, 3; Rev. 20:6.

14. Mang boch ban’en ni faanra i rin’ be’ ma gathi aram e be micheg ni kan dugliy facha’ nga gelngin Got nib thothup?

¹⁴ Sana rayog ni ga be lemnag ko gur bagayad e piin kan dugliy nga gelngin Got nib thothup fa danga’. Faanra ga be lem ni aray rogon, ma baaray boch e deer nib ga’ fan ni ngam lemnag: Ri ga baadag ni ngam rin’ e tin nib m’agan’ Jehovah ngay, fa? Ga be lemnag ni gur be’ nri gab pasig ko machib, fa? Ga baadag ni ga ma fil e Bible rom, ma kag baadag ni ga ma fil murung’agen e “tin nda nnang ni ke m’ay i lemnag rok Got,” fa? (1 Kor. 2:10) Ga be lemnag ni be tow’athnag Jehovah e machib ni ga be tay, fa? Ri ga baadag ni ngam ayuweg yugu boch e girdi’ ni ngar filed murung’agen Jehovah, fa? Kam guy boor e kanawo’ ni ke ayuwegem Jehovah riy, fa? Faanra fulweg rom ko pi deer ney e arrogon, ma gur, aram e be yip’ fan ni gur bagayad e piin kan dugliy ni nge yan nga tharmiy? Danga’. Mang fan? Bochan ni gubin e pi tapigpig rok Got nrayog ni ngar lemgad ni aray rogon ndemtrug ko yad boch e piin kan dugliyrad fa danga’. Maku reb e, gubin e tapigpig rok Jehovah nrayog ni nge pi’ gelngin nib thothup ngorad ya nge yag ni ngar rin’ed e pi n’ey ndemtrug ko mang e athap rorad. Bin riyul’ riy e, faanra be maruwar u wan’um ko kan dugliyem nga gelngin Got  nib thothup fa dawor, ma aram e be yip’ fan ndawor ni dugliyem. Piin ke dugliyrad Jehovah e der ma maruwar u wan’rad ko yad boch e piin kan dugliyrad fa danga’, ya rib mich u wan’rad ni yad boch e pi girdi’ nem!

15. Uw rogon ni kad nanged ni gathi urngin e piin i maruwel gelngin Got nib thothup u dakenrad ni kan mel’egrad ni nga ranod nga tharmiy?

¹⁵ Boor e pumoon ni bay murung’agrad u Bible nrib mich Got u wan’rad ni pi’ Got gelngin nib thothup ngorad. Machane, da ur athapeged e yan nga tharmiy. David e ir bagayad e piin i pow’iy gelngin Got nib thothup. (1 Sam. 16:13) I ayuweg gelngin Got nib thothup ni nge nang boch ban’en u murung’agen Jehovah nib toar fan, maku aram e re gelngin ni pow’iy ni nge yoloy yu yang ko Bible. (Mark 12:36) Yugu aram rogon, me yog apostal Peter ni David e “de yan nga lan e tharmiy.” (Acts 2:34) John ni Tataufe e “ba sug” nga gelngin Got nib thothup. (Luke 1:13-16) I yog Jesus ndariy be’ ni kab ga’ ngak John, machane miki yog ndabi un John ko gagiyeg u Gil’ilungun Got u tharmiy. (Matt. 11:10, 11) I fanay Jehovah gelngin nib thothup ni nge pi’ gelngin e pi pumoon ney ni ngar rin’ed boch ban’en ni yira ngat ngay, machane de fanay e re gelngin nem ni nge mel’egrad ni ngar uned ko yan nga tharmiy. Ere gur, re n’ey e be yip’ fan ni pi girdi’ ney e gathi ri yad ba yul’yul’ ni bod rogon e piin yad ra un ko yan nga tharmiy? Danga’. Kemus ni be yip’ fan nra fasegrad Jehovah ko yam’ mar pared u Paradis u fayleng.​—John 5:28, 29; Acts 24:15.

16. Mang e be athapeg yooren e pi tapigpig rok Got e ngiyal’ ney?

¹⁶ Yooren e pi tapigpig rok Got u fayleng e ngiyal’ ney e darur athapeged e yan nga tharmiy. Yad bod Abraham, nge Sarah, nge David, nge John ni Tataufe, nge yugu boch e pumoon nge ppin nib yul’yul’ ni bay murung’agrad u Bible ni yad be athapeg ni ngar pared u fayleng u nap’an nra tabab Gil’ilungun Got ni nge gagiyegnag e fayleng.​—Heb. 11:10.

17. Mang boch e deer ni gad ra weliy e fulweg riy ko bin migid e article?

¹⁷ Machane, ka bay boch e piin kan dugliyrad ni ka yad bay u fithik’ e girdi’ rok Got u fayleng e ngiyal’ ney ndawor ranod nga tharmiy. Ere sana bay boch e deer nrayog ni ngaud lemnaged. (Rev. 12:17) Bod ni, mang e susun nge lemnag e piin kan dugliyrad u rarogorad? Faanra tabab be’ u lan e ulung rom ni nge kay e flowa me unum e wain u nap’an e Puguran, ma susun nge uw rogon e ngongol rom ngak e cha’nem? Ma uw rogon ni faanra ka be ulul ni nge yoor e piin yad be yog ni kan dugliyrad? Gur, bay rogon ni nge magafan’um ko re n’ey? Ireray e pi deer ni gad ra weliy e fulweg riy ko bin migid e article.