DILONGI 4
‘Yaveka Phevi Yimvananga Kimbangi’
‘Yaveka pheve yimvananga kimbangi va kimueka ayi phev’itu ti tuidi bana ba Nzambi.’—LOMA 8:16
NKUNGA 25 Dikanda Dinlongo
MAMBU TUANLONGUKA *
Mu Pentekoti, Yave wuvana phevi’andi yinlongo kuidi nduka 120 di baklisto mu phila yi kukuitukila (Tala bitini bi matangu 1-2)
1-2. Diambu mbi di kukuitukila dimonika mu kilumbu ki Pentekoti mu mvu 33 T.K.?
MU KILUMINGU va meni mu mvu 33 T.K., kiawu kilumbu bakemba nkungi wu Pentekoti ku Yelusalemi. Nduka 120 di minlonguki baba bakutakana ku kivinga ku nzo yimueka. (Mavanga 1:13-15; 2:1) Mua bilumbu kumbusa, Yesu wuba kamba babika basika ku Yelusalemi, kibila bankuiza tambula nkhayilu mueka wu luvalu. (Mavanga 1:4, 5) Mambu mbi mayiza monika?
2 ‘Bazimbukila biyoko bingolo biba ku diyilu banga vuka kingolo.’ Biawu biwala nzo yoso. Bosi ‘minlaki mi mbazu’ mimonika mu mintu mi minlonguki, ayi baboso bawala ‘phevi yinlongo’. (Mavanga 2:2-4) Ayoyi, yawu phila Yave kavanina phevi yinlongo kuidi dingumba di batu diba mu nzo beni. (Mavanga 1:8) Bawu batu batheti basolo mu phevi yinlongo * ayi batambula kivuvu ki kuyala na Yesu ku diyilu.
MBI BIMMONIKANGA BO BANSOLA MUTU MU PHEVI YINLONGO?
3. Kibila mbi baklisto baba mu Pentekoti babela lufiatu ti basolo mu phevi yinlongo?
3 Boti ngie wuba wumueka mu minlonguki miba mu kilumbu beni, khanu wulendi zimbakana ko mambu mamonika. Ayi khanu wusa ba ko divuda ti wusolo mu phevi yinlongo. Kibila nlaki wu mbazu wumonika mu ntu’aku ayi ngie wutona kukoluka zimbembu zinkaka! (Mavanga 2:5-12) Bukiedika ti batu boso badi kivuvu ki kuzinga ku diyilu, baku basolanga mu phila yi kukuitukila voti mu khumbu yimueka? Ndamba. Buidi tuzabidi mawu?
4. Bukiedika ti baklisto boso mu thangu yikhulu basolo mu phevi yinlongo mu khumbu yimueka? Sudikisa
4 Theti tuemmona, thangu mbi bansodilanga mutu. Mu Pentekoti mvu 33 T.K, bakana ko to nduka 120 di baklisto basolo mu phevi yinlongo. Vayi muna kilumbu beni, nduka 3.000 di batu bankaka mvawu batambula phevi yinlongo. Bawu basolo bo bamana kubotama. (Mavanga 2:37, 38, 41) Vayi mu mimvu milanda, bakana ko baklisto boso basolo bo bamana kubotama. Basi Samalia basolo bo vavioka mua thangu tona babotama. (Mavanga 8:14-17) Phila phevi yinlongo yisodila Kolineyi ayi basi nzo’andi yidi yi kukuitukila, bila bawu basolo ava kubotama.—Mavanga 10:44-48.
5. Dedi bummonisina 2 Kolinto 1:21, 22, mambu mbi mammonikanga bo Yave kansola mutu?
5 Buabu tuemmona mambu mbi mammonikanga bo Yave kansola mutu mu nzila phevi yinlongo. Va thononu, batu basolo muingi kukuenda ku diyilu balenda mona phasi kukikinina mawu. Bawu balenda kuyikuvusa: Kibila mbi Nzambi kabe tsodila? Vayi bankaka bayindulanga ko mawu. Bosokua bumbela, mvuala Polo wusudikisa mambu mammonikanga kuidi baklisto boso basolo: ‘Bo muwilukila, Nzambi wumutula kidimbu * mu nzil’andi, mu phevi yinlongo kakanikisa. Kidi kidimbu mu kutumonisa ti tuela tambula kiuka kitu.’ (Efeso 1:13, 14; tala matangu madi va wanda mu nwt-TPO.) Mawu mansundula ti Yave wunsadilanga phevi’andi yinlongo muingi kusadisa baklisto abobo bavisa ti badi basolo. Mu phila ayoyi, phevi yinlongo yiba vananga ‘kidimbu’ ti bala zinga ku diyilu kubika kuandi va ntoto.—Tanga 2 Kolinto 1:21, 22.
6. Mbi mutu wusolo kafueti vanga muingi katambula nsendu’andi?
6 Boti khomba widi wusolo, mawu mansundula ti boso kuandi bumbela kafueti kuenda ku diyilu? Ndamba. Nandi widi lufiatu ti wala kuenda ku diyilu. Vayi nandi kafueti tebukanga moyo diambu adidi: “Zikhomba ziama, bika lumonisa bufula mu kindisa lutelo lueno ayi [tsobudulu’ino]. Bila [beno kutatamana kuvanga mambu amama], buna lulendi bua ko.” (2 Petelo 1:10) Diawu, kheti mutu widi wusolo muingi kuzinga ku diyilu, nandi wala tambula to nsendu’andi na kutatamana wukuikama.—Filipi 3:12-14; Ebeleo 3:1; Nzaikusu 2:10.
BUIDI MUTU KALENDA ZABILA TI WIDI WUSOLO?
7. Buidi baklisto basolo banzabilanga ti badi kivuvu ki kukuenda ku diyilu?
7 Vayi buidi mutu kazabidi ti widi wusolo muingi kukuenda ku diyilu? Mvutu widi mu mambu Polo kakamba kuidi baklisto basolo baba ku Loma, bobo Nzambi ‘katela muingi kuba banlongo’. Nandi wutuba: “Bila [lusa] tambula pheve yi kivika ko mu diambu lubanga diaka ku tsi boma, vayi beno lutambula pheve yoyi yi lukitula bana ba Nzambi. Mu pheve beni tueti yamikinina: Aba, bu dinsundula! Tata. [Yaveka pheve yimvananga kimbangi va kimueka ayi phev’itu ti tuidi bana ba Nzambi.]” (Loma 1:7; 8:15, 16) Mu phila ayoyi, Nzambi wunzabikisanga mutu ti nandi widi wusolo muingi kukuenda ku diyilu.—1 Tesalonika 2:12.
8. Dedi bummonisina 1 Yoane 2:20, 27, mbi Yave kansadilanga muingi kuvana mutu lufiatu ti widi wusolo?
8 Yave kabikanga ko divuda mu mayindu ayi mu mintima mi batu kantuminsanga muingi kuzinga ku diyilu. (Tanga 1 Yoane 2:20, 27) Yave wunlongisanga baklisto basolo mu nzila kimvuka dedi bo kanlongisilanga bisadi biandi binkaka. Vayi basintomba ko batu bankaka kuba zabikisa ti bawu badi basolo. Kibila Yave wunsadilanga phevi’andi yinlongo muingi kuba vana lufiatu alolo!
BAWU BAMBUTUKANGA ‘MBUTUKULU YIMONA’
9. Dedi bummonisina Efeso 1:18, mambu mbi mammonikanga bo Yave kansola mutu?
9 Bowombo mu bisadi bi Nzambi bubu ḿba phasi balenda mona kuvisa mambu mammonikanga boti mutu weka wusolo. Kibila mbi? Kibila bawu basi ko basolo. Nzambi wuvanga batu muingi bazinga va ntoto bika ku diyilu. (Ngenesi 1:28; Minkunga 37:29) Vayi Yave wubaka makani ma kusola bankaka muingi bazinga ku diyilu. Diawu bo Yave kansola mutu, nandi mu thinu wumbalulanga kivuvu kiandi ayi phil’andi yi kuyindudila, muingi nandi katomba kuzinga ku diyilu.—Tanga Efeso 1:18.
10. Mbi binsudula kubutuka “mbutuka yimona”? (Tala matangu madi va wanda.)
10 Bo mutu kansolo mu phevi yinlongo, nandi wumbutukanga “mbutuka yimona”. * Yesu wutuba ti phasi beni kusudikisa mutu wukhambulu wusolo mambu mammonikanga bo mutu kambutuka “mbutuka yimona.”—Yoane 3:3-8; tala matangu madi va wanda mu nwt-TPO.
11. Sudikisa mambu mammonikanga bo mutu kansolo mu phevi yi yinlongo.
11 Mayindu mbi mutu kankuiza banga bo Yave kakunsola? Ava Yave kansola, nandi wuba kivuvu ki kuzinga mvu ka mvu ku paladizu va ntoto. Nandi waba vingila mu mayangi thangu Yave kala manisa ziphasi ayi kubalula ntoto paladizu. Ḿba nandi waba vingila mu mayangi kubue mona musi dikanda voti nkundi wufua. Vayi bo kayiza ba wusolo, nandi wutona kuyindudila mu phila yinkaka. Bakana ko ti nandi kasi bue tomba ko kuzinga va ntoto voti mu kibila ki kiunda ki ziphasi ove mu kuyindula ti kivuvu ki kuzinga va ntoto kisiedi ko kimboti. Vayi kibila Yave wusadila phevi’andi yinlongo muingi kubalula phil’andi yi kuyindudila ayi kumvanga kuzola kivuvu kimona.
12. Dedi bummonisila 1 Petelo 1:3, 4, buidi baklisto basolo bammuenanga kivuvu kiawu?
12 Mutu wusolo ḿba kalenda yindula ti kasi ko wufuana muingi kutambula kiyeku akioki kinkinza. Vayi nandi kasi ko divuda ti Yave wunsola. Vayi nandi wunkuangalalanga ayi wumvutulanga beni matondo mu kivuvu kadi ki kuzinga ku diyilu.—Tanga 1 Petelo 1:3, 4.
13. Buidi baklisto basolo bammuenanga luzingu luawu va ntoto?
13 Mawu mansundula ti baklisto basolo batidi kufua? Polo wuvana mvutu wu kiuvu akioki. Nandi wudedikisa nyitu yi baklisto basolo dedi nzo ngoto bo katuba: ‘Bukiedika, befu tuidi mu nzo ayiyi yi ngoto, tulembu yana mu ntima kibila tuisintomba ko kubotuka mu nzo vayi tuntomba kuvuata nzo yinkaka muingi luzingu lumina nyitu yimfuanga.’ (2 Kolinto 5:4) Baklisto basolo bakhidi vuanga nkinza luzingu luawu va ntoto. Bawu banzolanga kusadila kadika kilumbu muingi kuvanga luzolo lu Yave va kimueka na bakundi ayi dikanda diawu. Kioso kuandi kiuma badi mu kuvanga va ntoto, baklisto basolo bazimbakananga ko kivuvu badi mu bilumbu binkuiza kuntuala.—1 Kolinto 15:53; 2 Petelo 1:4; 1 Yoane 3:2, 3; Nzaikusu 20:6.
BUKIEDIKA TI NGIE WIDI WUSOLO KUIDI YAVE?
14. Kibila mbi biuvu bidi mu lutangu alulu bisimmonisa ko ti mutu widi wusolo?
14 Ḿba ngie wukikuvulanga boti widi wusolo mu phevi yinlongo. Boti mawu mayindu madi yaku, buna yindula mu biuvu abibi binkinza: Ngie widi phuila mu kuvanga luzolo lu Yave? Ngie widi kifuza mu kisalu ki kusamuna? Ngie widi nlonguki wu Kibibila wunzolanga kulonguka “mambu masuama ma Nzambi”? (1 Kolinto 2:10) Ngie wunkikinina ti Yave wu kusadisanga kubaka ndandu mu kisalu ki kusamuna? Ngie wummonanga ti kulongisa batu matedi Yave kidi kiyeku kinkinza? Ngie wummona bivisa bimmonisa ti Yave wu kusadisanga mu ziphila ziviakana? Boti betuba “ngete” mu biuvu bioso, bukiedika ti mawu mansundula ti ngie widi wusolo? Ndamba. Kibila mbi? Kibila bisadi bioso bi Yave balenda monikina mawu, kheti badi basolo voti ndamba. Ayi mu nzila phevi yinlongo, Yave kalenda sadisa kadika kisadi kiandi kuvanga mambu amomo, kheti widi kivuvu ki kukuenda ku diyilu voti ndamba. Mvandi, boti ngie wuyikuvusanga ti widi wusolo voti ndamba, kiawu kidi kivisa kimmonisa ti ngie wisi ko wusolo. Batu badi basolo basi ko divuda mu kivuvu kiawu, vayi bawu badi lufiatu ti badi basolo!
Yave wusadila phevi’andi yinlongo muingi kuvana Abalahami, Salai, Davidi, ayi Yoane mbotiki mangolo ma kuvanga mambu ma kukuitukila, vayi kasa sadila ko phevi beni muingi kaba tumisa bazinga ku diyilu (Tala bitini bi matangu 15-16) *
15. Buidi tuzabidi ti baboso batambula phevi yinlongo yi Nzambi basi ko basolo muingi kuzinga ku diyilu?
15 Mu Kibibila, muidi bifuani bi batu bawombo batambula phevi yinlongo. Kheti bobo, bawu basa ba ko kivuvu ki kuzinga ku diyilu. Davidi wudiatusu mu phevi yinlongo. (1 Samueli 16:13) Yawu yinsadisa kuvisa mambu masuama matedi Yave ayi mvandi yintuadisa muingi kasonika bitini binkaka bi Kibibila. (Malako 12:36) Kheti bobo, mvuala Petelo wutuba matedi Davidi, nandi “ kasa [maka] ku diyilu ko”. (Mavanga 2:34) Yoane mbotiki wuba “[wuwala] mu pheve yinlongo.” (Luka 1:13-16) Yesu wutuba ti vasa ba ko mutu wulutidi na Yoane mbotiki, vayi mvandi wutuba ti nandi kalasa yala ko mu Kintinu ki Nzambi. (Matai 11:10, 11) Yave wusadila phevi’andi yinlongo muingi kuvana babakala abobo mangolo ma kuvanga mambu ma kukuitukila, vayi kasa sadila ko phevi beni muingi kaba tumisa bazinga ku diyilu. Vayi bukiedika ti mawu mansundula ti bo bankuenda ku diyilu balutidi bakuikama kena batu bala zingila va ntoto? Ndamba. Mawu mansundula to ti Yave wala bavulubusa muingi kuzinga ku paladizu va ntoto.—Yoane 5:28, 29; Mavanga 24:15.
16. Lusakumunu mbi bisadi bi Nzambi bubu badi mu kuvingila?
16 Bawombo mu bisadi bi Nzambi bubu, basi ko kivuvu ki kuzinga ku diyilu. Dedi Abalahami, Salai, Davidi, Yoane Mbotiki ayi batu bankaka bakuikama bazingila mu thangu yikhulu, bawombo mu bisadi bi Yave bubu badi mu kuvingila mu mayangi kuzingila va ntoto ku tsi luyalu lu Kintinu ki Nzambi.—Ebeleo 11:10.
17. Biuvu mbi tuala baka mimvutu mu dilongi dinkuiza?
17 Bo baklisto bankaka basolo bakhidi mu khati dikabu di Nzambi, disi ko diambu dimbi kuba nkadu divuda matedi bawu. (Nzaikusu 12:17) Dedi, buidi baklisto basolo bafueti kuyitadilanga? Boti khomba mu kimvuka kiaku betona kudia dipha ayi kunua vinu, buidi wufueti kuntadila? Vayi boti thalu yi baklisto basolo yidi mu kubuelama? Bukiedika ti wufueti tatubuka? Dilongi dinkuiza diala vana mimvutu mi biuvu abiobi.
^ Lut. 5 Tona mu Pentekoti wu mvu 33 T.K., Yave wumvananga kuidi baklisto bankaka kivuvu ki kuyala na Muan’andi ku diyilu. Vayi buidi bawu bazabidi ti badi batu basolo muingi kuyala ku diyilu? Bo Yave kansola mutu muingi kukuenda ku diyilu, mambu mbi mammonikanga? Dilongi adidi dibongulu mu dilongi dimueka didi mu Kibanga ki Nsungi yi Ngonda Yitheti mvu 2016. Diawu dinkuiza vana mimvutu bi biuvu abiobio binkinza.
^ Lut. 2 TSUDUKUSU YI BIKUMA: Kusolo mu phevi yinlongo: Yave wunsadilanga phevi’andi yinlongo muingi kusola batu banyala na Yesu ku diyilu. Mu nzila phevi’andi yinlongo Yave wuba vananga kivuvu voti nsendu mu bilumbu binkuiza kuntuala. (Efeso 1:13, 14) Baklisto abobo balenda tuba ti phevi yinlongo yimvananga “kimbangi” voti yiba vananga lufiatu ti badi kivuvu ki kukuenda ku diyilu.—Loma 8:16.
^ Lut. 5 TSUDUKUSU YI BIKUMA: TSUDUKUSU YI BIKUMA: Kidimbu. Kidimbu beni kinkadidilanga to mu mutu mu mua thangu ava nandi kafua wukuikama voti mu mua thangu ava ziphasi zingolo zitona.—Efeso 4:30; Nzaikusu 7:2-4; tala “Biuvu Bi Mintangi” mu Kibanga ki Nsungi ki Ngonda Yinna mvu 2016.
^ Lut. 10 Muingi kubuela zaba mbi binsundula mbutuka yimona, tala Kibanga ki Nsungi ki kilumbu 1 Ngonda Yinna mvu 2009 tsielu 3-12.
NKUNGA 27 Ndungunu yi Bana ba Nzambi
^ Lut. 57 DIAMBU DIDI MU FIKULA: Zikhomba zinkaka badi mu buloko mu kibila ki kiminu kiawu, vayi bankaka badi luaku muingi kusamuna kiedika. Moso kuandi mambu tuidi mu kuvioka, tuidi mu kuvingila mu mayangi thangu Kintinu ki Nzambi kiela yala ntoto.
