1. Mɛni Yehowa tsɔɔ kaa e maa ba ngɛ wa be nɛ ɔ mi?

YEHOWA tsɔɔ kaa ngɛ wa be nɛ ɔ mi ɔ, “ni nyɔngma ma ba nu Yuda no kake nɛ a maa pɛtɛ e tade he, nɛ a ma de lɛ ke, ‘Waa kɛ mo maa ya, ejakaa wa nu kaa Mawu kɛ nyɛ ngɛ.’” (Zak. 8:23) “Yuda no” ɔ daa si kɛ ha nihi nɛ Mawu kɛ e mumi klɔuklɔu ɔ pɔ mɛ nu ɔ. A tsɛɛ mɛ hu ke “Mawu Israel.” (Gal. 6:16) “Ni nyɔngma” amɛ daa si kɛ ha nihi nɛ a ngɛ hɛ nɔ kami kaa a maa hi si ngɛ zugba a nɔ kɛ ya neneene ɔ. A le kaa Yehowa jɔɔ nihi nɛ a pɔ mɛ nu ɔ, nɛ a na kaa e ji he blɔ nɛ a ná kaa a piɛɛ a he kɛ ngɛ lɛ sɔmɔe.

2. Mɛni blɔ nɔ nɛ “ni nyɔngma” amɛ kɛ nihi nɛ a pɔ mɛ nu ɔ “maa ya”?

² E ngɛ mi kaa jijɔ kpa amɛ be nyɛe maa le nihi nɛ a pɔ mɛ nu nɛ a ngɛ zugba a nɔ mwɔnɛ ɔ * tsuo a biɛ mohu lɛɛ, se a ma nyɛ nɛ a kɛ nihi nɛ a pɔ mɛ nu ɔ “maa ya.” Ngɛ mɛni blɔ nɔ? Baiblo ɔ tsɔɔ kaa “ni nyɔngma” ma ba ‘nu Yuda no kake nɛ a maa pɛtɛ e tade he, nɛ a ma de lɛ ke, “Waa kɛ mo maa ya, ejakaa wa nu kaa Mawu kɛ nyɛ ngɛ.”’ Ngmami ɔ wo Yuda no kake pɛ ta. Se “mo” kɛ “nyɛ” nɛ a kɛ tsu ní ɔ dɛ si ha nɔ kake. Enɛ ɔ tsɔɔ kaa Yuda no nɛ a kɛ tsu ní ɔ dɛ si ha nɔ kake, mohu ɔ, e daa si ha nihi nɛ a pɔ mɛ nu ɔ tsuo. Jijɔ kpa amɛ kɛ nihi nɛ a pɔ mɛ nu ɔ tsuo ngɛ Yehowa sɔmɔe. Se a nɛ nihi nɛ a pɔ mɛ nu ɔ kaa a hɛ mi nyɛɛli, ejakaa a le kaa Yesu ji a hɛ mi nyɛɛlɔ.​—Mat. 23:10.

3. Mɛni sane bimihi lɛ wa ma ha heto ngɛ ní kasemi nɛ ɔ mi?

³ Nihi nɛ a pɔ mɛ nu ɔ a ti ni komɛ ngɛ Mawu we bi a kpɛti mwɔnɛ ɔ. Enɛ ɔ he ɔ, eko ɔ, nɔ ko ma bi ke: (1) Kɛ e sa kaa nihi nɛ a pɔ mɛ nu ɔ nɛ a na a he ha kɛɛ? (2) Ke i kɛ nɔ ko ngɛ asafo mi nɛ e bɔni abolo ɔ yemi, loo wai ɔ numi ngɛ Kaimi ɔ sisi ɔ, kɛ e sa kaa ma pee ye ní ngɛ  jamɛatsɛ ɔ he ha kɛɛ? (3) Ke i na kaa nihi nɛ a yeɔ abolo ɔ nɛ a nuɔ wai ɔ ngɛ Kaimi ɔ sisi ɔ a yibɔ ngɛ hɛ mi yae ɔ, anɛ e sa kaa lɔ ɔ nɛ hao mi lo? Wa maa na sane bimi nɛ ɔmɛ a heto ngɛ ní kasemi nɛ ɔ mi.

4. Mɛni kɔkɔ bɔmi lɛ ngɛ 1 Korinto Bi 11:27-29 ɔ nɛ e sa kaa nihi nɛ a pɔ mɛ nu ɔ nɛ a kɛ hɛdɔ nɛ susu he, nɛ mɛni he je?

⁴ E sa nɛ nihi nɛ a pɔ mɛ nu ɔ nɛ a susu kɔkɔ bɔmi nɛ ngɛ 1 Korinto Bi 11:27-29 ɔ he saminya. (Kane.) Mɛni ma ha nɛ nɔ ko nɛ a pɔ lɛ nu ɔ maa ye abolo ɔ nɛ e nu wai ɔ “bɔ nɛ sɛ” ngɛ Kaimi ɔ sisi? Ke nɔ ɔ yi Yehowa mlaa amɛ a nɔ, nɛ e ye abolo ɔ nɛ e nu wai ɔ, lɔ ɔ tsɔɔ kaa e ye abolo ɔ nɛ e nu wai ɔ “bɔ nɛ sɛ.” (Heb. 6:4-6; 10:26-29) Nihi nɛ a pɔ mɛ nu ɔ le kaa ja a ye anɔkuale kɛ ya si nyagbe loko a nine maa su “Mawu hiɔwe tsɛmi ɔ kɛ gu Kristo Yesu nɔ ɔ he kunimi yemi jlasi ɔ” nɔ.​—Filip. 3:13-16.

5. Kɛ e sa kaa Kristofohi nɛ a pɔ mɛ nu ɔ nɛ a na a he ha kɛɛ?

⁵ Yehowa mumi klɔuklɔu ɔ ha we nɛ Kristofohi nɛ a pɔ mɛ nu ɔ nɛ a wo a he nɔ, mohu ɔ, e yeɔ bua mɛ nɛ a baa a he  si. (Efe. 4:1-3; Kol. 3:10, 12) Enɛ ɔ he ɔ, nihi nɛ a pɔ mɛ nu ɔ susuu we kaa a hi pe ni kpahi. A le kaa Yehowa ha we nihi nɛ a pɔ mɛ nu ɔ mumi klɔuklɔu ɔ fuu pe bɔ nɛ e haa e sɔmɔli kpahi. Nɛ a susuu we kaa a ma nyɛ maa nu Baiblo mi anɔkualehi a sisi wawɛɛ pe ni kpahi. Jehanɛ hu ɔ, a be nɔ ko dee kɔkɔɔkɔ kaa nɔ ɔ hu a pɔ lɛ nu, lɔ ɔ he ɔ, e bɔni abolo ɔ yemi nɛ e bɔni wai ɔ hu numi ngɛ Kaimi ɔ sisi. Mohu ɔ, a baa a he si, nɛ a le kaa Yehowa pɛ lɛ e tsɛɛ nihi kɛ yaa hiɔwe.

6. Ngɛ 1 Korinto Bi 4:7, 8 ɔ nya a, kɛ e sa nɛ Kristofohi nɛ a pɔ mɛ nu ɔ nɛ a pee a ní ha kɛɛ?

⁶ E ngɛ mi kaa nihi nɛ a pɔ mɛ nu ɔ nuɔ he kaa e ji he blɔ nɛ a ná kaa a maa ya hiɔwe mohu lɛɛ, se a hyɛ we blɔ kaa nihi kɛ mɛ nɛ hi si ngɛ blɔ klɛdɛɛ ko nɔ. (Filip. 2:2, 3) A le hu kaa benɛ Yehowa pɔ mɛ nu ɔ, e ha we nɛ nɔ fɛɛ nɔ nɛ le. Enɛ ɔ he ɔ, ke a pɔ nɔ ko nu nɛ ni komɛ he we yi amlɔ nɔuu kaa a pɔ jamɛatsɛ ɔ nu ɔ, e pee we nɔ nɛ a pɔ lɛ nu ɔ nyakpɛ. E le kaa Baiblo ɔ de wɔ kaa ke nɔ ko tsɔɔ kaa Mawu ha lɛ blɔ nya ní tsumi klɛdɛɛ ko ɔ, waa kɛ oya yemi nɛ ko he jamɛatsɛ ɔ waa ye. (Kpoj. 2:2) Akɛnɛ nɔ ko nɛ a pɔ lɛ nu ɔ be suɔe nɛ e gbla nihi a juɛmi kɛ ba e nɔ he je ɔ, ke e kɛ nihi kpe nɛ e ngɛ e he si jee kɛ tsɔɔ mɛ ɔ, e he hia we nɛ e de mɛ kaa a pɔ lɛ nu. Ngɛ anɔkuale mi ɔ, e kɛ he blɔ nɛ ɔ be fĩae.​—Kane 1 Korinto Bi 4:7, 8.

7. Mɛni nɛ Kristofohi nɛ a pɔ mɛ nu ɔ pee we, nɛ mɛni he je?

⁷ Kristofohi nɛ a pɔ mɛ nu ɔ nui he kaa e sa nɛ a kɛ ni kpahi nɛ a pɔ mɛ nu ɔ pɛ nɛ bɔ, kaa nɔ́ nɛ a ngɛ kuu ko mi. A hla we ni kpahi nɛ a pɔ mɛ nu ɔ a se blɔ konɛ a sɛɛ nu nɛ a pɔ mɛ ɔ he ní, aloo a kpe ngɛ kuuhi a mi konɛ a kase Baiblo ɔ. (Gal. 1:15-17) Kaa nihi nɛ a pɔ mɛ nu ɔ peeɔ a ní jã a, jinɛ kake peemi ko hí asafo ɔ mi. Jinɛ lɔ ɔ ko tsɔɔ kaa a te si kɛ wo mumi klɔuklɔu ɔ nɛ ha nɛ tue mi jɔmi kɛ kake peemi ngɛ Mawu we bi a kpɛti ɔ.​—Rom. 16:17, 18.

8. Mɛni he je nɛ e he hia nɛ o hyɛ saminya ngɛ bɔ nɛ o kɛ nihi nɛ a yeɔ abolo ɔ nɛ a nuɔ wai ɔ ngɛ Kaimi sisi ɔ hiɔ si ha a he ɔ? (Hyɛ sisi ningma a hulɔ.)

⁸ Kɛ e sa kaa o kɛ nyɛmimɛ nyumuhi kɛ yihi nɛ a pɔ mɛ nu ɔ nɛ hi si ha kɛɛ? E sɛ nɛ waa bu nɔ ko kaa e he hia pe nɔ tsuaa  nɔ, ke jamɛatsɛ ɔ ji Kristo nyɛmimɛ ɔmɛ nɛ a pɔ mɛ nu ɔ a ti nɔ ko po. (Mat. 23:8-12) Baiblo ɔ woɔ wɔ he wami konɛ waa kase asafo mi nikɔtɔma amɛ “a hemi kɛ yemi ɔ,” se e de we wɔ kaa wa ma nyɛ maa hla adesa ko kaa wa hɛ mi nyɛɛlɔ. (Heb. 13:7) E ji anɔkuale kaa Baiblo ɔ tsɔɔ kaa ni komɛ ngɛ nɛ a sa “bumi nɛ e bɔ he si enyɔ.” Se nɔ́ he je nɛ e de jã ji kaa a “hyɛɔ asafo ɔ nɔ ngɛ blɔ kpakpa nɔ,” nɛ a “tsuɔ ní wawɛɛ ngɛ munyu tumi kɛ ní tsɔɔmi mi,” se pi nu nɛ a pɔ mɛ ɔ he je. (1 Tim. 5:17) Ke wa jeɔ nihi nɛ a pɔ mɛ nu ɔ a yi tsɔ, nɛ wa naa mɛ kaa a he hia pe ni kpahi ɔ, e ma nyɛ ma gba a nya wawɛɛ. * Nɔ́ nɛ pa hí pe kulaa ji kaa lɔ ɔ ma ha nɛ a wo a he nɔ. (Rom. 12:3) Wa ti nɔ ko be suɔe nɛ e pee nɔ́ ko nɛ maa tɔ̃tɔ̃ Kristo nyɛmimɛ nɛ a pɔ mɛ nu ɔ a ti nɔ ko nane!​—Luka 17:2.

9. Mɛni o maa pee kɛ tsɔɔ kaa o buɔ Kristofohi nɛ a pɔ mɛ nu ɔ?

⁹ Mɛni wa ma nyɛ maa pee kɛ tsɔɔ kaa wa buɔ nihi nɛ Yehowa pɔ mɛ nu ɔ? Wa be mɛ bie kaa a de wɔ blɔ nɔ nɛ a gu kɛ ba pee nihi nɛ a pɔ mɛ nu. Sane nɛ ɔ kɔ we wa he, enɛ ɔ he ɔ, wa be he blɔ kaa wa leɔ. (1 Tɛs. 4:11; 2 Tɛs. 3:11) Nɛ e sɛ nɛ wa susu kaa nihi nɛ a pɔ mɛ nuɔ a hunomɛ loo a yihi, loo a fɔli, loo a weku li kpahi hu piɛɛ nihi nɛ a pɔ mɛ nu ɔ a he. Pi weku nɛ nɔ ko je mi ɔ nɛ tsɔɔ kaa e maa ya hiɔwe loo e be yae. Mawu lɛ hlaa jamɛ a ni ɔmɛ. (1 Tɛs. 2:12) E sɛ kaa wa bi sanehi nɛ maa hao nihi. Kaa nɔ hyɛmi nɔ́ ɔ, ke nyɛmiyo ko huno piɛɛ nihi nɛ a pɔ mɛ nu ɔ a he ɔ, e sɛ nɛ wa bi nyɛmiyo ɔ kaa, ‘Ke e susu zugba a nɔ nɛ lɛ pɛ e maa hi kɛ ya neneene hwɔɔ se ɔ he ɔ, kɛ e peeɔ lɛ ha kɛɛ?’ Wa ma nyɛ ma ná nɔ mi mami wawɛɛ kaa ngɛ je ehe ɔ mi ɔ, Yehowa ma ha ‘nɔ́ tsuaa nɔ́ nɛ ngɛ hɛ ngmengmle ɔ e hiami ní.’​—La 145:16.

10. Ke wa yuɔ wa he ngɛ nihi nɛ a “gbeɔ ni kpahi a yi mi” ɔ a he ɔ, kɛ lɔ ɔ poɔ wa he piɛ ha kɛɛ?

¹⁰ Ke wa bui nihi nɛ a pɔ mɛ nu ɔ kaa a he hia wawɛɛ pe ni kpahi ɔ, lɔ ɔ poɔ wa he piɛ hulɔ. Ngɛ mɛni blɔ nɔ? Baiblo ɔ tsɔɔ kaa e ma nyɛ maa ba kaa nihi nɛ a pɔ mɛ nu ɔ a ti ni komɛ be anɔkuale yee kɛ ya si nyagbe. (Mat. 25:10-12; 2 Pet. 2:20, 21) Se ke wa yuɔ wa he ngɛ nihi nɛ a “gbeɔ ni kpahi a yi mi” ɔ a he ɔ, wa be ni kpahi a se nyɛɛe. Wa be nihi nɛ a pɔ mɛ nu, loo nihi nɛ a le mɛ wawɛɛ, loo nihi nɛ a ngɛ Yehowa sɔmɔe be kɛkɛɛ ji nɛ ɔ po a se nyɛɛe. (Jud 16) Ke wa peeɔ jã nɛ e ba kaa jamɛatsɛmɛ ɔmɛ yi Yehowa anɔkuale hu, aloo a je asafo ɔ mi ɔ, hemi kɛ yemi nɛ wa ngɛ ngɛ Yehowa mi ɔ mi be gbɔjɔe, nɛ wa maa ya nɔ ma sɔmɔ Yehowa.

11. Mɛni tsakemi lɛ baa nihi nɛ a yeɔ abolo ɔ nɛ a nuɔ wai ɔ ngɛ Kaimi ɔ sisi ɔ a yibɔ ɔ mi?

¹¹ Jinɛ jehahi babauu nɛ be ɔ, nihi nɛ a yeɔ abolo ɔ nɛ a nuɔ wai ɔ ngɛ Kaimi ɔ sisi ɔ a yibɔ ɔ nɔ gbɔɔ. Se lingmi nɛ ɔ lɛɛ daa jeha a, a yibɔ ɔ yaa hɛ mi. Anɛ e sa kaa enɛ ɔ nɛ hao wɔ lo? Dɛbi. Nyɛ ha nɛ waa hyɛ oti komɛ a he je nɛ e sɛ nɛ waa hao ɔ.

12. Mɛni he je nɛ e sɛ kaa nihi nɛ a yeɔ abolo ɔ nɛ a nuɔ wai ɔ ngɛ Kaimi ɔ sisi ɔ a yibɔ nɛ ngɛ hɛ mi yae ɔ nɛ gba wa nya a?

¹² “Yehowa le nihi nɛ a ji e nihi.” (2 Tim. 2:19) Yehowa le nihi nɛ e pɔ mɛ nu ɔ, se nihi nɛ a kaneɔ ni nɛmɛ nɛ a yeɔ abolo ɔ  nɛ a nuɔ wai ɔ ngɛ Kaimi ɔ sisi ɔ lɛɛ a li nihi tutuutu nɛ a pɔ mɛ nu ɔ. Enɛ ɔ he ɔ, a kaneɔ nihi nɛ mɛɛ a susu kaa a pɔ mɛ nu, kpahu a pɔɛ mɛ nu ɔ kɛ piɛɛɔ he. Kaa nɔ hyɛmi nɔ́ ɔ, ni komɛ nɛ be ko nɛ be ɔ a yeɔ abolo ɔ nɛ a nuɔ wai ɔ kpa jã peemi. Eko ɔ, ni komɛ ngɛ juɛmi mi nyagba, lɔ ɔ he ɔ, a susu kaa a kɛ Kristo maa ye matsɛ ngɛ hiɔwe. E ngɛ heii kaa wa li nihi nɛ a pɔ mɛ nu ɔ a yibɔ tutuutu nɛ piɛ ngɛ zugba a nɔ.

13. Anɛ Baiblo ɔ tsɔɔ nihi nɛ a pɔ mɛ nu ɔ a yibɔ nɛ a maa hi zugba a nɔ loko amanehlu ngua a maa je sisi lo?

¹³ Nihi nɛ a pɔ mɛ nu ɔ a ti ni komɛ maa hi zugba a nɔ hehi fuu loko Yesu ma ba ngɔ mɛ kɛ ho hiɔwe ya. (Mat. 24:31) Baiblo ɔ tsɔɔ kaa ngɛ nyagbe ligbi ɔmɛ a mi ɔ, nihi nɛ a pɔ mɛ nu ɔ bɔɔ pɛ nɛ maa piɛ ngɛ zugba a nɔ. (Kpoj. 12:17) Se Baiblo ɔ tsɔɔ we a yibɔ nɛ maa piɛ benɛ haomi ngua a maa je sisi.

14. Kaa bɔ nɛ Roma Bi 9:11, 16 tsɔɔ ɔ, mɛni e sa nɛ waa le ngɛ nihi nɛ a pɔ mɛ nu ɔ a hlami ɔ he?

¹⁴ Yehowa lɛ le be nɛ e kɛ hlaa nihi nɛ a pɔ mɛ nu ɔ. (Rom. 8:28-30) Yehowa bɔni nihi nɛ a pɔ mɛ nu ɔ hlami benɛ e tle Yesu si ɔ se. E ngɛ kaa nɔ́ nɛ a pɔ anɔkuale Kristofohi tsuo nɛ a hi si ngɛ kaseli ɔmɛ a be ɔ mi ɔ nu. Jeha lafahi a se ɔ, nihi fuu nɛ a tsɛɔ a he ke Kristofohi ɔ nyɛɛ we Kristo se ngɛ anɔkuale mi. Ngɛ jamɛ a be ɔ mi po ɔ, Yehowa pɔ anɔkuale Kristofohi kakaaka komɛ nu. A ngɛ kaa ngma nɛ Yesu tsɔɔ kaa a maa wa ngɛ huhi a kpɛti ɔ. (Mat. 13:24-30) Ngɛ nyagbe ligbi ɔmɛ a mi ɔ, Yehowa ngɛ nɔ yae nɛ e ngɛ nihi nu pɔe konɛ e ná nimli  144,000 ɔ. * Enɛ ɔ he ɔ, ke Mawu ma e juɛmi nya si kaa ke e piɛ bɔɔ nɛ nyagbe ɔ maa ba a, e maa hla ni komɛ ɔ, e sɛ nɛ wa susu kɔkɔɔkɔ kaa e pee we juɛmi nɛ da. (Kane Roma Bi 9:11, 16.) * E sa nɛ waa hyɛ nɛ hi nɛ wa ko pee wa ní kaa ní tsuli nɛ Yesu tu a he munyu ngɛ e nɔ́ he tomi nɔ́ ko mi ɔ. A tu munyu kɛ si a nyɔmtsɛ ɔ ngɛ bɔ nɛ e wo sekpɛtsɛmɛ ɔmɛ hiɔ ha a he.​—Mat. 20:8-15.

15. Anɛ nihi tsuo nɛ a pɔ mɛ nu ɔ ji “tsɔlɔ anɔkualetsɛ kɛ ní lelɔ ɔ” nɛ a tu e he munyu ngɛ Mateo 24:45-47 ɔ lo? Moo tsɔɔ nya.

¹⁵ Tsa pi nihi nɛ a ngɛ hɛ nɔ kami kaa a maa ya hiɔwe ɔ tsuo ji “tsɔlɔ anɔkualetsɛ kɛ ní lelɔ ɔ.” (Kane Mateo 24:45-47.) Kaa bɔ nɛ ngɛ kaseli ɔmɛ a be ɔ mi ɔ, Yehowa kɛ Yesu gu nihi bɔɔ ko pɛ a nɔ kɛ tsɔɔ nihi fuu ní, aloo kɛ lɛ mɛ ɔ, jã kɛ̃ nɛ a ngɛ pee mwɔnɛ ɔ hulɔ. Ngɛ kaseli ɔmɛ a be ɔ mi ɔ, Kristofohi nɛ a pɔ mɛ nu ɔ a ti nihi bɔɔ pɛ nɛ a ha nɛ a ngma Kristofohi a Hela Ngmami ɔ. Mwɔnɛ ɔ hu ɔ, Kristofohi nɛ a pɔ mɛ nu ɔ a kpɛti nihi bɔɔ pɛ nɛ a kɛ blɔ nya ní tsumi wo a dɛ kaa a ha Mawu we bi “niye ní ngɛ be nɛ sa mi.”

16. Mɛni o kase ngɛ ní kasemi nɛ ɔ mi?

¹⁶ Mɛni wa kase ngɛ munyu nɛ ɔ mi? Yehowa ma e juɛmi nya si kaa e maa dloo e we bi fuu neneene wami ngɛ zugba a nɔ, nɛ e maa dloo ni komɛ hu neneene wami ngɛ hiɔwe konɛ a kɛ Yesu nɛ ye matsɛ. Yehowa jɔɔ e sɔmɔli tsuo, “Yuda no” ɔ kɛ “ni nyɔngma” amɛ. E ngɛ blɔ hyɛe kaa mɛ tsuo a maa ye mlaa kake nɔ, nɛ a maa ye lɛ anɔkuale kɛ ya si nyagbe. E sa nɛ mɛ tsuo a ya nɔ nɛ a ba a he si. E sa nɛ mɛ tsuo a pee kake kɛ ja lɛ. Nɛ e sa nɛ mɛ tsuo a bɔ mɔde nɛ a ha nɛ tue mi jɔmi nɛ hi asafo ɔ mi daa. Be mi nɛ wa ngɛ nyagbe ɔ he sue haa nɛ ɔ, nyɛ ha nɛ wɔ tsuo waa ya nɔ nɛ wa sɔmɔ Yehowa nɛ waa nyɛɛ Kristo se daa kaa “to kuu kake.”​—Yoh. 10:16.