1. Иегова бистиҥ ӧй керегинде кандый судур айткан?

ИЕГОВА бистиҥ ӧй керегинде мындый судур айткан: «Бастыра албатылардаҥ болгон ло башка-башка тилдерге куучындап турган он кижи иудейдиҥ эдегинеҥ тудунып, ого мынайып айдар: „Бис слерле кожо барарыс, нениҥ учун дезе Кудай слерле кожо деп укканыс“» (Зах. 8:23). «Иудей» — Кудайдыҥ агару тыныла майлалган улусты темдектейт. Олор «Кудайдыҥ Израили» деп адалат (Гал. 6:16). «Он кижи» — ӱргӱлјиге јерде јӱретен ижемјилӱ улус. Олор майлаткандарды Иегова талдап алган деп оҥдоп јат ла майлаткандарла кожо иштеерин кӱндӱ деп кӧрӧт.

2. «Он кижи» майлаткандарла кожо «барар» аргалу дегенин канайып оҥдоор?

² Бӱгӱнги кӱнде, теҥериге баргалак майлаткандардыҥ ончозыныҥ ады-јолын билер арга јок то болзо *, је јерде јӱретен ижемјилӱ улус олорло кожо «барар» аргалу. Канайып? Агару Бичикте мынайып бичилген: «Он кижи иудейдиҥ эдегинеҥ тудунып, ого мынайып айдар: „Бис слерле кожо барарыс, нениҥ учун дезе Кудай слерле кожо деп укканыс“». Бу ӱлгерде јӱк ле бир иудей керегинде айдылат, је «слерле кожо» деп айдылганы, бир майлатканды эмес, је майлаткандардыҥ ончозын кӧргӱзет. Агару тынла майлалбаган улус майлаткандарла кожо ӧмӧ-јӧмӧ иштенип турган да болзо, олорды башчылар деп айтпай јат. Нениҥ учун  дезе бистиҥ башчыбыс — Иисус Христос (Матф. 23:10).

3. Бу јӧрмӧлдӧ кандый сурактар шӱӱжилер?

³ Бӱгӱнги кӱнде кезик майлаткан христиандар теҥериге баргалак болордо, мындый сурактар чыгат: 1) Майлаткандар бойына кандый кӧрӱмдӱ болор учурлу? 2) Биске Кайраканныҥ Эҥирине туружып турган улуска, ӧскӧртӧ айтса бу Эҥирде калаштаҥ јип, кызыл аракынаҥ амзап турган улуска, канайып баштанар керек? 3) Андый христиандардыҥ тоозы кӧптӧп турганына кайкаарыс па? Эмди бу сурактардыҥ карууларын кӧрӱп ийектер.

4. 1 Коринфтегилерге 11:27—29-ла болзо, майлаткан христиандар неге јаан ајару эдер учурлу, нениҥ учун?

⁴ 1 Коринфтегилерге 11:27—29-та бичилген сӧстӧргӧ майлаткандар јаан ајару эдер учурлу (кычырыгар). Майлаткан кижиниҥ Кайраканныҥ Эҥиринде калаштаҥ јип, аракынаҥ амзап турганы канайып «јарамыкту эмес» болуп калардаҥ айабас? Кижи Кайраканныҥ Эҥири ӧткӱрилип јаткан ӧйдӧ Иегованыҥ чындык нормаларына келишпей турза, «јарамыкту эмес» болуп калат (Евр. 6:4—6; 10:26—29). Майлаткан христиандар,  «Христос Иисустыҥ Бойында Кудай кычырып турган кайралды» аларга турган болзо, Иеговага чындык артар учурлу деп оҥдоп јат (Флп. 3:13—16).

5. Майлаткандар бойына кандый кӧрӱмдӱ болор учурлу?

⁵ Иегованыҥ агару тыны христиандарга бийиркек болорго эмес, је јобош болорго болужат (Еф. 4:1—3; Кол. 3:10, 12). Оныҥ учун майлаткандар бойлорын улустаҥ артык деп сананбайдылар. Олор бойлорын, јерде јӱретен ижемјилӱ христиандарга кӧрӧ, агару тынды кӧп алар ла библиялык чындыктарды тереҥ оҥдоор деп сананбай јат. Анайда ок бойын майлаткан деп сананып турган христиандарды бӱдӱндирип, олорды Кайраканныҥ Эҥиринде турушсын деп кӱӱнзетпейдилер. Карын јобош болуп, теҥериге кемдер баратанын јӱк Иегова талдап турганын оҥдоп јадылар.

6. 1 Коринфтегилерге 4:7, 8-ле болзо, майлаткан христиандар бойлорын канайып тудунар учурлу?

⁶ Теҥериге кычырылганы — јаан кӱндӱ де болзо, майлаткан христиандар улустаҥ јаан ајару сакыбай јадылар (Флп. 2:2, 3). Иегова кемди майлап салганын улуска айтпай турган деп, майлаткандар оҥдоп јат. Оныҥ учун, улус олордыҥ теҥериге кычырылганына бӱтпей турза, олор кайкабай јадылар. Карын майлаткандар Агару Бичиктеги бӱдӱҥкей болбогор деген јӧпти ундыбай јат. Оныҥ учун Кудай олорды аҥылу ишке талдап алганына ака-эјелердиҥ капшай ла бӱдерге меҥдебей турганын оҥдоп јат (Ачыл. 2:2). Майлаткандар бойына кереги јок ајару этпеске турганынаҥ улам, ака-эјелерле танышкан ла ӧйдӧ, теҥериге кычырылганын куучындабас та, талдалганыла мактанбас та. (1 Коринфтегилерге 4:7, 8 кычырыгар.)

7. Майлаткандар нени этпейдилер, нениҥ учун?

⁷ Майлаткандар бойын улустаҥ аҥылу улус деп ле олорго јӱк ле ӧскӧ майлаткандарла куучындажар керек деп сананбай јат. Олор бойлорыныҥ теҥериге кычырылганы керегинде эмезе Агару Бичикти шиҥдейтен аҥылу бӧлӱк тӧзӧӧргӧ, теҥериде јӱретен ижемјилӱ христиандарды бедиребей јат (Гал. 1:15—17). Оноҥ башка јуунда бӧлӱништер болуп, Кудайдыҥ албатызында агару тын ажыра берилип турган амырга ла бирликке буудак болор эди (Рим. 16:17, 18).

8. Кайраканныҥ Эҥиринде туружып турган улуска канайып баштанып турганысты нениҥ учун ајаруга алып турар керек? (Сносканы база кӧрӱгер.)

⁸ Бис майлаткан ака-эјелерге канайып баштанар учурлу? Бис улусты, олор Христостыҥ  майлаткан улузы да болзо, ӧйинеҥ ӧткӱре макка чыгарбай јадыс (Матф. 23:8—12). Темдектезе, Агару Бичик бисти аксагалдардыҥ бӱдеринеҥ тем алзын деп ӱредет, је кандый бир кижини, башчы эдип, макка чыгарзын деп ӱретпей јат (Евр. 13:7). Кудайдыҥ Сӧзинде, «аҥылу кӱндӱ» алып турган улус бар деп айдылып турган да болзо, олор аҥылу кӱндӱни агару тынла майлалганынаҥ улам эмес, је «јакшы башкарып турганы» учун ла «јарлыктап ла ӱредип јӱргенинде» кӧп ийде-кӱчин берип турганы учун алат (1 Тим. 5:17). Бис майлаткандарды макка чыгарып турзаас эмезе олорго ӧйинеҥ ӧткӱре јаан ајару эдип турзаас, олор эбијоксына берердеҥ айабас *. Эмезе олор бийиркенип баштаардаҥ да айабас (Рим. 12:3). Бистеҥ улам Христостыҥ карындаштары јаан јастыра эдип салзын деп, кӱӱнзебей јадыс (Лука 17:2).

9. Майлаткан христиандарга канайып тоомјылу баштанарыс?

⁹ Айса болзо, Иегованыҥ теҥериге кычырылган улузын тооп турганысты канайып кӧргӱзерге јараар? Темдектезе, олордыҥ канайып майлалганын сурабазыс. Нениҥ учун дезе мыны бистиҥ билер јаҥыс јок (1 Тим. 5:13; 2 Фес. 3:11, ЈТ). Анайда ок олордыҥ эш-нӧкӧри эмезе тӧрӧӧндӧринеҥ кемизи-кемизи база теҥериге кычырылган болор деп сананбазыс. Теҥериге барар ижемји кижиге укталып келбей јат, андый ижемјини Кудай берет (1 Фес. 2:12). Анайда ок майлатканныҥ эш-нӧкӧринеҥ, ӱргӱлјиге эш-нӧкӧри јокко јӱрер деп сананза, кандый сезимдер келет деп сурабас керек. Андый сурактарды угарга олорго кӱч болордоҥ айабас. Бис Иегова «кажы ла тирӱ јайаанныҥ кӱӱнин» бӱдӱрип салар деген сӧстӧргӧ алаҥзу јоктоҥ бӱдӱп јадыс (Сар. 145:16).

10. Бис улусты кумирлер этпезеес, бойысты кандый тӱбектеҥ корулайдыс?

¹⁰ Майлаткан улуска чын кӧрӱмдӱ ака-эјелер бойлорын јаан тӱбектеҥ корулап јат. Кандый тӱбектеҥ? Агару Бичиктиҥ айтканыла болзо, кезик майлаткандар Кудайга чындык артпастаҥ айабас (Матф. 25:10—12; 2 Петр 2:20, 21). Је бис улусты, майлаткан да болзын, кӧрӱмјилӱ де христиан болзын эмезе Кудайга кӧп јылдардыҥ туркунына да иштеп турган јарчы болзын, кумирлер этпезис (Иуда 16). Нениҥ учун дезе бу улус Кудайга чындык артпай калза эмезе јууннаҥ јӱре берзе, бис чындыктыҥ јолынаҥ тайкылып, Кудайга чындык артпай каларыс.

11. Кайраканныҥ Эҥирине туружып турган улустыҥ тоозы канайып солынган?

¹¹ Кайраканныҥ Эҥирине туружып турган улустыҥ тоозы кӧп јылдардыҥ туркунына астап туратан. Је калганчы јылдарда олордыҥ тоозы кӧптӧп јат. Бис мыны кайкаарыс па? Јок. Нениҥ учун кайкабас керек деп кӧрӱп ийектер.

12. Кайраканныҥ Эҥирине туружып турган улустыҥ тоозы кӧптӧп турганына нениҥ учун кайкабас керек?

¹² «Кайракан [Иегова] Бойыныҥ улузын билер» (2 Тим. 2:19). Кайраканныҥ Эҥиринде калаштаҥ јип, аракынаҥ амзап турган улустыҥ тоозын тоолоп турган акалар Иеговага кӧрӧ, чыннаҥ ла теҥериге кемдер баратанын билбей јат. Оныҥ учун майлаткандардыҥ тоозына, бойын майлаткан деп јастыра сананып турган улус кирип калат. Је кийнинде андый улустыҥ кезиги Кайраканныҥ Эҥиринде калаштаҥ јибей, аракынаҥ амзабай барган. Кезик улус  эмоциональный эмезе психический оорулардаҥ улам, бойын Иисусла кожо теҥериде башкарар деп сананган. Айдарда, јердеги майлаткандардыҥ тоозын чике айдып болбозыс.

13. Улу тӱбек башталза, јерде майлаткандардыҥ тоозы канча болоры Агару Бичикте айдылган ба?

¹³ Иисус майлаткандарды теҥериге аларга келзе, олор башка-башка јерлерде болор (Матф. 24:31). Агару Бичикте бу телекейдиҥ калганчы кӱндеринде майлаткандардыҥ кезиги јерде болор деп айдылган (Ачыл. 12:17). Је улу тӱбектиҥ алдында олордыҥ кайда јадары ла тоозы канча болоры айдылбай јат.

14. Римдегилерге 9:11, 16-ла болзо, майлаткандардыҥ талдалып турганы керегинде нени оҥдоп турар керек?

¹⁴ Майлаткандарды качан талдап алатанын Иегова бойы кӧрӧт (Рим. 8:28—30). Кудай майлаткандарды Иисустыҥ тирилгениниҥ кийнинеҥ талдап баштаган. Баштапкы чакта ончо чындык христиандар майлаткандар болгон болор. Соондо бойлорын Христостыҥ ӱренчиктери деп аданып тургандардыҥ кӧбизи, чынынча болзо, оныҥ ӱренчиктери болбогон. Је бу да ӧйдӧ Иегова чындык христиандар болгон улусты агару тынла майлаган. Олор, Иисустыҥ айтканыла болзо, чӧп ӧлӧҥлӧ кожо ӧскӧн «буудай» болот (Матф. 13:24—30). «Калганчы кӱндерде» Иегова 144 000-ныҥ тоозына киретен улусты оноҥ ло ары јууп јат *. Оныҥ учун бу ӧйдиҥ учында Кудай теҥериге кычырарга кемди-кемди талдап алза, бис оныҥ ойгорына алаҥзыбазыс. (Римдегилерге  9:11, 16 кычырыгар.) * Биске Иисустыҥ темдериниҥ бирӱзинде айдылган улуска тӱҥей болбос керек. Бу улус, виноградтыҥ ээзи бир саат иштегендерге јалды теҥ тӧлӧп бергени учун комудаган (Матф. 20:8—15).

15. Майлаткандардыҥ ӱзези Матфей 24:45—47-де айдылган «бӱдӱмјилӱ ле керсӱ кул» болот по? Јартап беригер.

¹⁵ Теҥериде јӱретен ижемјилӱ улустыҥ јӱк ле кезиги — «бӱдӱмјилӱ ле керсӱ кул» болот. (Матфей 24:45—47 кычырыгар.) Бӱгӱнги кӱнде Иегова ла Иисус баштапкы ла чакта чылап, тоолу кижиниҥ колыла кӧп улусты азырап, ӧскӧртӧ айтса ӱредип јат. Баштапкы чакта Христиан Грек Бичимелдерди бичииринде агару тынла майлалган христиандардыҥ јӱк ле кезиги турушкан. Анайып ла бӱгӱнги кӱнде Кудайдыҥ албатызына «ӧйинде курсак» беретен молју майлаткандардыҥ јӱк ле кезигине берилген.

16. Бу јӧрмӧлдӧҥ нени билип алдыс?

¹⁶ Айдарда, бу јӧрмӧлдӧҥ бис нени билип алдыс? Иегова бойыныҥ ишчилериниҥ кӧп сабазына ӱргӱлјиге јерде јӱретен ижемји берет, је кезигине теҥериде јӱретен — Иисусла кожо башкаратан ижемји берет. Иегова ончо ишчилерин кайралдаар: сӱрлеп айдылган иудейди де, он кижини де. Оныҥ учун Кудай олорды бир тӱҥей јасактарла јӱрӱп, ого чындык артсын деп кӱӱнзеп јат. Биске ончобыска јобош болор керек. Бис Кудайга ончобыс кожо иштеп, бирлик болор учурлу. Анайда ок јуунда амыр-энчӱ јӱрер керек. Калганчы кӱндер удабас тӱгенип калар, оныҥ учун Христостыҥ башкартузын угуп, Иеговага бирлик ӱӱр болуп иштеп јӱректер! (Иоанн 10:16).