1. Pakayni i lintad ita, paˈayaway ci Yihofa pasowal to maanan hani?

PAKAYNI i lintad ita, paˈayaway ci Yihofa pasowal: ‘I lalomaˈ no cowa ka lecad ko sowal a kitakit, wa ira ko moetepay tamdaw mikelecay mikoramet to rikoˈ no cecay Yutaya tamdaw, saan ko sowal: “Wa kalacafayen niyam kamo a malingad, samanen matengilay niyam mikapotan no Kawas kamo.”’ (Cikariya 8:23) O misowalan no sinael a ‘Yutaya Tamdaw’ o minilnilan no Kawas tano fangcalay saocor a Krisciyang ko mitoroˈan, o ‘Israil no Kawas’ hananay a pangangan cangra. (Kalatiya 6:16) Oya ‘moetepay tamdaw’ itiniay fafekang no sera tahadaˈoc maˈorip a tamdaw, mahapinangay nangra palemedan ni Yihofa koya manilnilay a tamdaw, ngaˈay malacafay cangraanan a midoko to Kawas o kalikoan a demak.

2. Sowal no sinael, oya ‘moetepay tamdaw’ wa ‘malacafay malingad’ toya manilnilay a tamdaw. O manan ko tatodong hani?

² Anini, itiniay i fafekang no sera ko tokel a tamdaw, soˈlin cowa ka fanaˈ to polong a minilnilan no fangcalay saocor no Kawas a tamdaw, * kawra kamayanho mikotod cangraanan ‘malacafay malingad.’ O maanan ko tatodong nonini hani? Sanay ko Fangcalay Cudad, ‘moetepay tamdaw, mikelecay mikoramet to rikoˈ no cecay Yutaya tamdaw, saan ko sowal: “Wa kalacafayen niyam kamo a malingad, samanen matengilay niyam mikapotan no Kawas kamo.” ’ Masowalay no sinael ko ‘cecay Yutaya tamdaw,’ dotoc somowalay to ‘kamo,’ paihkalay  konini o ‘Yutaya Tamdaw’ mitaypiyaway to cecay ˈopo, oya manilnilay a tamdaw ko mitoroˈan. Itiniay fafekang no sera ko tokel a tamdaw malacafayay to manilnilay a tamdaw midoko ci Yihofaan, kawra cowa ko ˈaˈideman saan ko pinengneng nangra toniya tamdaw, samanen mafanaˈay cangra dengan ci Yis ko ˈaˈideman.—Matay 23:10.

3. Oniya lalakaw wa pacaˈof to maanan a salicay hani?

³ Anini, o roma mipiliˈan no fangcalay saocor no Kawas a tamdaw maˈoripayho toniya hekal, mansa mihaen ko harateng no roma tamdaw: (1) O manilnilay a tamdaw sasamaan ko pinengneng to niyah? (2) Sasamaan kita minengneng to komaenay to epang ato epah a tamdaw i Piharatengan to Kapatay ni Yis a Saˈopo? (3) O komaenay to epang ato epah a tamdaw ano padadotoc a matongal, oha cacalemcem kita han? Oniya lalakaw wa pacaˈof toniya salicay.

4. O manilnilay a tamdaw sasongilaˈen a miharateng ko maanan a limoˈot no 1 Korinto 11:27-29 hani? Misamaanay?

⁴ O minilnilan no fangcalay sa ocor no Kawas a tamdaw, sasongilaˈen a miharateng ko limoˈot no 1 Korinto 11:27-29. (ˈOsien.) Ano cowa pidofdof cangra to palinian ni Yihofa  a maˈorip, ‘cowato ka tatodong’ komaen to epang ato epah i Piharatengan a Saˈopo. (Hipray 6:4-6; 10:26-29) Mafanaˈay cangra, ano sapilifokaw to halifon no kakarayan, oha mamadimadi tahatolas ngaˈ ngaˈay.—Filipi 3:13-16.

5. O manilnilay a tamdaw sasamaan ko pinengneng to niyah hani?

⁵ O fangcalay saocor padamaay to tamdaw misapoener to falocoˈ, cowa ko mamisatakaraw. (Ifiso 4:1-3; Kolosay 3:10, 12) Mihaenay, o manilnilay no fangcalay saocor no Kawas a tamdaw, cowa ko caciharateng to mikikakaay ko niyah to tao. Mafanaˈay cangra cowa ka ikaka ko adihay a macadaay no niyah a fangcalay saocor, cowa ko caciharateng to mikikakaay to tao ko kacipinang no niyah to Fangcalay Cudad. Roma i, o manilnilay a tamdaw cowa ko papasowal cangra to tao: “Haratengen ako i, o mipiliˈan no fangcalay saocor no Kawas kiso, oha kakomaen kiso to epang ato epah i Piharatengan a Saˈopo.” Wa misapoener cangra a mihai, dengan ci Yihofa ko cifadangalay a misaˈosi to cima ko tatayra i kakarayan.

6. Mikitini i 1 Korinto 4:7, 8, iraay ko tokel tayra i kakarayan a Krisciyang cowa ka ngaˈay midemak to maanan hani?

⁶ Miharateng ko iraay ko tokel tayra i kakarayan a Krisciyang piliˈen no Kawas tada kalikoanto, kawra cowa ka pitala cangra to kakiriwiˈen ko picada cangraanan. (Filipi 2:2, 3) Mafanaˈay cangra, na nilnilen no fangcalay saocor no Kawas cangra i, cowa ka fanaˈen ko tao, mansa ano cowa pakasoˈlin ko tao i, cowa ko fafahka cangra, samanen patalipaˈelalay ko Fangcalay Cudad, ano ira ko pasowalay to patoroday ko Kawas cingraanan to mikiriwiˈay a ˈinorong i, aka tangsol a pakasoˈlin. (Paˈarawan 2:2) Iraay ko tokel tayra i kakarayan a Krisciyang cowa ko sasowalsa to minilnilan no Kawas ko niyah, misolot to harateng no tao, cowa ko papahiyo i tamdaw toniya demak.—ˈOsien ko 1 Korinto 4:7, 8.

7. O manilnilay a Krisciyang cowa ko mamidemak to maanan hani? Misamaanay?

⁷ O minilnilan no fangcalay saocor no Kawas a Krisciyang, cowa ko mala cafay aca to manilnilay a tamdaw a macacawmaˈ, hato dengan cangra ko makakapotay a tamdaw. Cowa ko sapikilimaw to roma manilnilay a tamdaw, masasowal to harateng nangra a piliˈen no Kawas, anca satekedansa a masaˈopo milengo to Fangcalay Cudad. (Kalatiya 1:15-17) O fangcalay saocor oha papadama to finawlan no Kawas makakelec a malacafay, ano mahaen ko demak nangra i, cowa ko midoedoay to fangcalay saocor, o papaliwasak to kasakopang.—Loma 16:17, 18.

8. Ano pakidem ko pipakaka ita to iraay ko hatokel tayra i kakarayan a tamdaw, wa mifekad ko maanan a pasangaray hani? (Nengnengen ko ilaenoay safanaˈ.)

⁸ Sasamaan kita minengneng to minilnilan no fangcalay saocor no Kawas a tamdaw hani? Cowa ka ngaˈay kita pakaka to cecacecay tamdaw, mahawpay ko tatayra i kakarayan ko hatokel a tamdaw. (Matay 23:8-12) Haratengen, masowal no Fangcalay Cudad ko malohemay malitengay i, misaaliay kitaanan ‘mitodong to pakasoˈlinay falocoˈ nangra,’ kawra cowa pisaali kitaanan palo ˈaˈideman a minengneng cangraanan. (Hipray 13:7) Somowalayho ko Fangcalay Cudad, o roma malohemay malitengay ‘ikakaen ko pikangodo,’ samanen cangra ‘misongilaˈay a mikayat to kasakopang,’ hanaca ‘marorayay mikimad a pasifana,ˈ ao cowa ko pakayniay i tatayra i kakarayan ko hatokel nangra. (1 Timoti 5:17) Ano pakidem ko pisamacay ato pipakahemek to tatayra i kakarayan ko hatokel a Krisciyang, o mamangodo cangra alatek, * anca malo misatakarawayto cangra. (Loma 12:3) Cowa ko mamaolah kita mahaen ko raraw nangra!—Luka 17:2.

9. Sasamaan kita mikangodo to manilnilay a tamdaw hani?

⁹ Sasamaan kita mikangodo to minilnilan no fangcalay saocor no Kawas a tamdaw hani? Cowa ko lalicayen ita cangra: “Samanan no Kawas tano fangcalay saocor a minilnil kiso hani?” O notekedan a demak ningra koni, awaay ko fadangalan ita a milicay. (1 Tisalonika 4:11; 2 Tisalonika 3:11) Cowa ka ngaˈay kita miharateng to, o ramod, o wama wina anca salawina ningra sahto o tatayra i kakarayan, samanen oniya hatokel coko miceroray a hatokel, ao sapafeli no Kawas a hatokel. (1 Tisalonika 2:12) Roma i, cowa ka ngaˈay kita milicay to pakasomaday cingranan a salicay. Tinakoen, ano o faˈinay ko tatayra i kakarayan i, hamaan licayen ko fafahi ningra to: “Ano caka ngaˈay kiso ato faˈinay malacafay tayra i Lakoing, wa masomad kiso han?” Wa ngaˈay pakasoˈlin kita, itini i faelohay hekal, wa pasaloen ni Yihofa ko ‘kalim no polong a tamdaw.’—ˈOlic 145:16.

10. Eca ka pakakaen ita ko tamdaw, hano o sadipot to niyah hani?

¹⁰ Eca ka pakakaen ita ko iraay ko tokel tayra i kakarayan a tamdaw, wa ngaˈay midipot to kalalaˈed no niyah aci Yihofaan. Misamaanay hani? Sanay ko Fangcalay Cudad, soˈlin nilnilen no fangcalay saocor no Kawas ko cecay tamdaw, cowa ko tatahatolas a madimadi alatek. (Matay 25:10-12; 2 Pitiro 2:20, 21) Mihaenay, soˈlin ira ko hatokel no Krisciyang tayra i kakarayan, anca o kafanaˈan no tamdaw, anca halafinayto midoko to Kawas, cowa ko ngangaˈay ‘pakidem ko pakahemek’ cingraanan, caka ngaˈay pakakaen cingra, mihaen cato ko tamdaw ko hakelongen ita. (Yuta 16) Ano cato ka madimadi anca miliyas to likakawa koniya tamdaw, cowa ko mamalahdaw ko pakasoˈlinay falocoˈ ita anca misawad a midoko ci Yihofaan.

11. Itini Piharatengan a Saˈopo o komaenay to epang ato epah a tamdaw samaanay ko kafalic hani?

¹¹ Na ira ko cecay liyad, Itini Piharatengan a Saˈopo maˈesalmaˈesalay ko komaenay to epang ato epah a tamdaw, kawra, o hatiniay a tamdaw ˈalomaˈalomanay to nohatini. Oha cacalemcem kita toniya demak han? Cowa. Nengnengen ita ko pina lalangian.

12. Hano cowa ko papakidem kita misamacay to hakowaay ko komaenay to epang ato epah a tamdaw hani?

¹² Mafanaˈay ci Yihofa to tamdaw Ningra.  (2 Timoti 2:19) Mafanaˈay ci Yihofa o cimacima ko tatayra i kakarayan, kawra itini Piharatengan a Saˈopo o miˈosiay to komaenay to epang ato epah a salikaka cowa kafanaˈ cangra. O roma tamdaw na komaenay cangra to epang ato epah, kawra ikorto cowato ka komaen cangra. O roma tamdaw i, o masasifoday ko harateng ato falocoˈ alatek, o tatayra kako i kakarayan malacafay ci Kristoan a mikowan sanay. Mihaenay i, o kaˈaloman no komaenay to epang ato epah a tamdaw mahawpay ko hatiniay a tamdaw. Mihaenay cowa ka fanaˈ kita hakowaay ko maˈosaway to manilnilay no fangcalay saocor no Kawas a tamdaw to maˈoripayho i hekal.

13. Misatapang ko taˈangayay padiing wa hakowa ko maˈosaway a manilnilay a tamdaw, mansanay ko sowal no Fangcalay Cudad hani?

¹³ Ano ira ci Yis i taˈangayay padiing a romiˈad i, itini hekal wa iraho ko minilnilan no fangcalay saocor no Kawas a tamdaw. (Matay 24:31) O sowal no Fangcalay Cudad, itini salikoray a romiˈad, itini hekal wa iraho ko manilnilay a tamdaw. (Paˈarawan 12:17) Cowa ka somowal ko Fangcalay Cudad, satapang ko taˈangayay padiing i, wa hakowa ko maˈosaway no mahaenay a tamdaw.

14. Mikitini Loma 9:11, 16 mananamay ita ko maanan hani?

¹⁴ Iraay ko fadangalan ni Yihofa misaˈosi to hacowa tano fangcalay saocor minilnil to tamdaw. (Loma 8:28-30) Patikol maˈorip ci Yis i, misatapangayto ci Yihofa mihaen to demak, itini saka 1 hahekalan a Krisciyang sahtoay o minilnilan no Kawas tano fangcalay saocor. Ikorto halafinay tatokian, ˈalomanay misa o Krisciyangay kako sanay a tamdaw cowa pihakelong ci Yisan, kawra toniya liyad minilnilayho  ci Yihofa to soˈlinay a Krisciyang, oniya Krisciyang mahecaday o misowalan ni Yis, malacafay to fadoc a romahad a panay. (Matay 13:24-30) Itini salikoray a lintad, wa padadotoc ci Yihofa a minilnil to tamdaw, masa lalomaˈ no 144,000 a tamdaw. * Mansa ano misaˈosiay ci Yihofa i ˈayaw no salikoray romiˈad a minilnil to cecay tamdaw i, cowa ko cacisasa kita to misaˈosian Ningra. (ˈOsien ko Loma 9:11, 16.) * Sasinanoten ita, aka mahecad i tinakoan ni Yis a mawmahay tamdaw, ngaliwngiw to tawki misangaˈay toya cecay aca ko toki matayal a tamdaw.—Matay 20:8-15.

15. Iraay ko tokel tayra i kakarayan a tamdaw, sahtoay o ‘madimadiay citanengay a koli’ han? Tadtaden.

¹⁵ Iraay ko tokel tayra i kakarayan a tamdaw cowa ka sahtosa o ‘madimadiay citanengay a koli.’ (ˈOsien ko Matay 24:45-47.) Saka 1 hahekalan, ci Yihofa aci Yis mimingay ko misaka dademakan a tamdaw pasifanaˈ to ˈalomanay tamdaw, papinaay aca ko micadaay to sakayat no Kawas a mitiliday to Kirisiya Fangcalay Cudad. Malecaday ko pakayraan anini, o minilnilan no fangcalay saocor no Kawas a salikaka cowa ka papina ko ciˈinorongay itini ‘matatodongay a toki,’ palilam to sapahaled to pakasoˈlinay falocoˈ a kakaenen i polong a finawlan no Kawas.

16. Mikitini toniya lalakaw mananamay ita ko maanan hani?

¹⁶ Mikitini toniya lalakaw mananamay ita ko maanan hani? Saˈosi ni Yihofa aitini fafekang no sera ko ˈalomanay finawlan tahadaˈoc a maˈorip, cowa ka ˈaloman ko mipiliˈan tayra i kakarayan malacafay ci Yisan a mikowan. Ano o ‘Yutaya tamdaw’ anca ‘moetepay tamdaw,’ milifokay maemin to sapalifon ni Yihofa. Oniya tosa ˈopo tamdaw wa midofdof to malecaday a palinian, oha tatahatolas a madimadi. Wa mitafo cangra to misapoeneray falocoˈ, micowat to rihadayay, makelec a malacecay. Mangataayto ko salikoray romiˈad, nanay ‘malo cecayay ˈopo’ kita mihakelong ci Kristoan, malaˈafang a mihodop to Kawas.—Yohani 10:16.