1. Јеһова бизим дөврлә бағлы нә демишди?

ЈЕҺОВА бизим дөврүмүзлә бағлы өнҹәдән демишди: «О ҝүнләрдә бүтүн халглардан олан, мүхтәлиф дилләрдә данышан он адам бир јәһудинин әтәјиндән јапышыб дејәҹәк: “Биз дә сәнинлә ҝедирик, чүнки ешитмишик, Аллаһ сизинләдир”» (Зәк. 8:23). Бурада «јәһуди» Јеһованын мүгәддәс руһла мәсһ етдији шәхсләри тәмсил едир. Онлар һәмчинин «Аллаһын Исраили» адланыр (Гал. 6:16). «Он адам» исә јер үзүндә әбәди јашамаг үмидинә малик олан инсанлары тәмсил едир. Онлар Аллаһын бу мәсһ олунмушлардан ибарәт групу сечдијини билир вә онларла бирҝә Аллаһа ибадәт етмәји өзләринә шәрәф сајырлар.

2. «Он адам» һансы мәнада мәсһ олунмушларла бир ҝедир?

² Бу ҝүн јер үзүндә олан бүтүн мәсһ олунмушларын адыны билмәјимиз мүмкүн олмаса да *, јер үзүндә јашамаг үмиди оланлар мәсһ олунмушларла бир ҝедә биләр. Һансы мәнада? Мүгәддәс Китабда јазылыб ки, «он адам бир јәһудинин әтәјиндән јапышыб дејәҹәк: “Биз дә сәнинлә ҝедирик, чүнки ешитмишик, Аллаһ сизинләдир”». Ајәдә бир јәһудидән данышылыр. Лакин «сизинләдир» сөзү бир јох, даһа чох адама аид ишләндијиндән, ајдын олур ки, ајәдә јәһуди дејиләркән, бир нәфәр јох, мәсһ олунмушлардан ибарәт бүтүн груп нәзәрдә тутулур. Мәсһ олунмајан кәсләр мәсһ олунмушларла бирҝә Јеһоваја хидмәт едир. Бунунла белә, онлар мәсһ олунмушлара рәһбәрләри кими јанашмыр, чүнки Рәһбәрләринин Иса Мәсиһ олдуғунун фәргиндәдирләр (Мәт. 23:10).

3. Бу мәгаләдә һансы суалларын ҹавабыны тапаҹағыг?

³ Бу ҝүн Аллаһын халгы арасында һәлә дә мәсһ олунмушлар олдуғундан, бәзи суаллар јарана биләр: 1) Мәсһ олунмушлар  өзләри һагда һансы фикирдә олмалыдыр? 2) Анма мәрасиминдә символлардан гәбул едәнләрә неҹә јанашмалыјыг? 3) Символлардан гәбул едәнләрин сајынын артмасы бизи нараһат етмәлидир? Мәгаләдә бу суалларын ҹавабыны тапаҹағыг.

4. Мәсһ олунмушлар 1 Коринфлиләрә 11:27—29 ајәләриндәки һансы хәбәрдарлыг барәдә ҹидди дүшүнмәлидир вә нә үчүн?

⁴ Мәсһ олунмуш мәсиһиләр 1 Коринфлиләрә 11:27—29 ајәләриндәки хәбәрдарлыға чох ҹидди јанашмалыдыр. (Ајәләри охујун.) Неҹә ола биләр ки, мәсһ олунмуш кәс анма мәрасиминдә «налајиг тәрздә» иштирак етсин? Әҝәр һәмин шәхс Аллаһын салеһ нормаларына ујғун јашамадығы һалда, символлардан гәбул едәрсә (Ибр. 6:4—6; 10:26—29). Мәсһ олунмушлар дәрк едирләр ки, «Аллаһын Мәсиһ Иса васитәсилә вердији ҝөјләр дәвәти» мүкафатыны јалныз садиг галдыглары һалда ала биләрләр (Филип. 3:13—16).

5. Мәсһ олунмуш мәсиһиләр өзләри һагда һансы фикирдә олмалыдыр?

⁵ Јеһованын мүгәддәс руһу хидмәтчиләринә тәвазөкар олмаға вә гүрурланмамаға көмәк едир (Ефес. 4:1—3; Кол.  3:10, 12). Буна ҝөрә дә мәсһ олунмушлар өзләрини башгаларындан үстүн һесаб етмир. Онлар билирләр ки, Јеһова мәсһ олунмушлара диҝәр хидмәтчиләриндән даһа артыг мүгәддәс руһ бәхш етмир. Мәсһ олунмушлар Мүгәддәс Китаб һәгигәтләрини башгаларына нисбәтдә даһа дәриндән анладыгларыны дүшүнмүрләр. Вә онлар һеч вахт кимәсә «сән дә мәсһ олунмусан вә символлардан гәбул етмәлисән» демирләр. Әксинә, тәвазөкарлыгла гәбул едирләр ки, ҝөјләр һәјатына дәвәти јалныз Јеһова верир.

6. 1 Коринфлиләрә 4:7, 8 ајәләринә әсасән, мәсһ олунмуш мәсиһиләр неҹә давранмалыдыр?

⁶ Мәсһ олунмушлар ҝөјләр дәвәти алмағы бөјүк шәрәф билсәләр дә, өзләринә гаршы хүсуси мүнасибәт ҝөзләмирләр (Филип. 2:2, 3). Һәмчинин билирләр ки, Јеһова онлары мәсһ едән заман бу һагда һамыја хәбәр вермәјиб. Буна ҝөрә дә кимсә мәсһ олунмуш шәхсин мәсһ олундуғуна дәрһал инанмырса бу, ону тәәҹҹүбләндирмир. Ахы Мүгәддәс Китабда јазылыб ки, Аллаһдан хүсуси мәсулијјәт алдығыны иддиа едәнләрә дәрһал инанмаг лазым дејил (Вәһј 2:2). Мәсиһи өзүнә диггәт чәкмәк истәмәдији үчүн илк ҝөрдүјү адама мәсһ олундуғуну сөјләмәјәҹәк. Вә сөзсүз ки, мәсһ олундуғуна ҝөрә башгаларынын өнүндә ловғаланмајаҹаг. (1 Коринфлиләрә 4:7, 8 ајәләрини охујун.)

7. Мәсһ олунмушлар нә етмәкдән гачаҹаг вә нә үчүн?

⁷ Мәсһ олунмушлар, санки хүсуси бир групун үзвләри кими, садәҹә мәсһ олунмушларла вахт кечирмәли олдугларыны дүшүнмүрләр. Онлар диҝәр мәсһ олунмушлары тапмаға чалышараг онларла мәсһ олунмалары һагда сөһбәт етмәјә, јахуд Мүгәддәс Китабы арашдырмаг үчүн груп јаратмаға ҹан атмыр (Гал. 1:15—17). Онлар бу кими шејләр етсәләр, јығынҹагда бирлик олмаз. Бунунла онлар баҹы-гардашлар арасында сүлһ вә бирлик јаратмаға көмәк едән мүгәддәс руһа гаршы чыхмыш оларлар (Ром. 16:17, 18).

8. Анма мәрасиминдә символлардан гәбул едән кәсләрә гаршы нә үчүн таразлы мүнасибәт бәсләмәлијик? (Һәмчинин һашијәјә бахын.)

⁸ Мәсһ олунмуш баҹы-гардашлара неҹә јанашмалыјыг? Һәр һансы инсана һәддиндән артыг һејранлыг дујмаг дүзҝүн олмазды, һәтта о, Мәсиһин мәсһ олунмуш гардашы олса белә (Мәт. 23:8—12). Мүгәддәс  Китаб бизи ағсаггалларын «иманыны өрнәк» ҝөтүрмәјә тәшвиг едир, амма бу, о демәк дејил ки, биз һансыса инсаны өзүмүзә рәһбәр һесаб етмәлијик (Ибр. 13:7). Дүздүр, Мүгәддәс Китабда дејилир ки, бәзиләри «икигат һөрмәтә лајиг»дирләр. Амма мәсһ олундугларына ҝөрә јох, «јығынҹағы јахшы идарә» етдикләринә, һәмчинин Аллаһын сөзүнү ҹидд-ҹәһдлә данышдыгларына вә өјрәтдикләринә ҝөрә (1 Тим. 5:17). Мәсһ олунмушлары лүзумундан артыг тәрифләсәк вә онлара һәдсиз диггәт ҝөстәрсәк, сыхыла биләрләр *. Һәтта ән бетәри, онларын тәкәббүрләнмәсинә сәбәб ола биләрик (Ром. 12:3). Һеч биримиз мәсһ олунмушлардан киминсә бу кими ҹидди ҝүнаһ ишләмәсинә сәбәб олмаг истәмәрик (Лука 17:2).

9. Мәсһ олунмушлара һөрмәт етдијимизи неҹә ҝөстәрә биләрик?

⁹ Јеһованын мәсһ етдији кәсләрә һөрмәт етдијимизи неҹә ҝөстәрә биләрик? Онлара мәсһ олунмалары барәдә шәхси суаллар вермәмәклә. Бу, шәхси мәсәлә олдуғундан бу барәдә билмәјә һаггымыз јохдур (1 Салон. 4:11; 2 Салон. 3:11). Онларын һәјат јолдашларынын, валидејнләринин вә аилә үзвләринин дә мәсһ олундуғуну дүшүнмәмәлијик. Инсан ҝөјләр һәјатына үмиди аиләсиндән мирас алмыр. Бу үмиди она Аллаһ верир (1 Салон. 2:12). Биз һәмчинин башгаларыны инҹидәҹәк суаллар вермәкдән дә чәкинмәлијик. Мисал үчүн, мәсһ олунмуш гардашын һәјат јолдашына белә суал вермәмәлијик: «Әрин јанында олмадан јер үзүндә әбәди јашамаг үмидин һагда дүшүнәндә һансы һиссләри кечирирсән?» Биз там әмин ола биләрик ки, Јеһова јени дүнјада «һәр бир мәхлугу истәјинә» чатдыраҹаг (Зәб. 145:16).

10. Шәхсијјәтә пәрәстиш етмәкдән гачмагла өзүмүзү нәдән горумуш олуруг?

¹⁰ Мәсһ олунмушлара диҝәрләриндән даһа өнәмли шәхсләр кими јанашмасаг, өзүмүзү дә горумуш олуруг. Неҹә? Мүгәддәс Китабда дејилир ки, ола билсин, бәзи мәсһ олунмушлар садиг галмасын (Мәт. 25:10—12; 2 Бут. 2:20, 21). Әҝәр биздә шәхсијјәтә пәрәстиш мејли јохдурса, истәр мәсһ олунмуш олсун, истәр танынмыш, истәрсә дә Јеһоваја узун илләрдир хидмәт едән кәс, биз һеч вахт һеч бир инсанын ардынҹа ҝетмәјәҹәјик. Вә әҝәр онлар сәдагәтсизлик ҝөстәрәрсә, јахуд јығынҹағы тәрк едәрсә, онда нә иманымыз сарсылаҹаг, нә дә хидмәтимизи дајандыраҹағыг.

11. Анма мәрасиминдә символлардан гәбул едәнләрин сајында һансы дәјишиклик баш вериб?

¹¹ Узун илләр анма мәрасиминдә символлардан гәбул едәнләрин сајы азалмаға доғру ҝедирди. Амма сон илләрдә бу сај һәр ил артыр. Бәс бу бизи нараһат етмәлидир? Хејр. Ҝәлин јадда сахламалы олдуғумуз бәзи әсас мәгамлара нәзәр јетирәк.

12. Нә үчүн анма мәрасиминдә символлардан гәбул едәнләрин сајынын артмасына ҝөрә нараһат олмамалыјыг?

¹² «Јеһова Она мәхсус оланлары таныјыр» (2 Тим. 2:19). Јеһовадан фәргли олараг, гардашлар анма мәрасиминдә символлардан гәбул едәнләри сајан заман кимин һәгигәтән дә мәсһ олундуғуну билмирләр. Буна ҝөрә дә бу саја мәсһ олундуғуну һесаб едән, әслиндә исә  мәсһ олунмајан шәхсләр дә дахилдир. Мисал үчүн, символлардан гәбул едәнләрин бәзиләри сонрадан буну дајандырыблар. Диҝәрләри исә, ола билсин, әгли вә ја емосионал проблемләриндән ирәли ҝәләрәк Мәсиһлә бирҝә ҝөјдә һакимијјәт сүрәҹәкләринә инаныр. Ајдындыр ки, биз јер үзүндә галан мәсһ олунмушларын дәгиг сајыны билмирик.

13. Бөјүк мүсибәт башлајанда јер үзүндә нә гәдәр мәсһ олунмушун олаҹағы илә бағлы Мүгәддәс Китабда нәсә јазылыб?

¹³ Иса Мәсиһ мәсһ олунмушлары ҝөјә апармаг үчүн јер үзүнә ҝәләндә, дүнјанын бир чох јериндә мәсһ олунмуш олаҹаг (Мәт. 24:31). Мүгәддәс Китаба әсасән, ахырзаманда јер үзүндә аз сајда мәсһ олунмуш галаҹаг (Вәһј 12:17). Лакин бөјүк мүсибәт башлајанда јер үзүндә нә гәдәр мәсһ олунмушун олаҹағы һагда орада һеч нә дејилмир.

14. Ромалылара 9:11б, 16 ајәләринә әсасән, мәсһ олунмушларын сечими барәдә нәји анламалыјыг?

¹⁴ Јеһова мәсһ олунмушлары нә заман сечәҹәјинә Өзү гәрар верир (Ром. 8:28—30). Јеһова мәсһ олунмушлары Иса Мәсиһин дирилмәсиндән сонра сечмәјә башлады. Ҝөрүнүр, биринҹи әсрдә бүтүн мәсиһиләр мәсһ олунмуш иди. Нөвбәти әсрләрдә Мәсиһин давамчысы олдуғуну иддиа едәнләрин әксәријјәти онун ардынҹа ҝетмирди. Буна бахмајараг, һәмин илләр әрзиндә Јеһова һәгиги мәсиһи олан аз сајда инсаны мәсһ етмишди. Онлар Исанын да дедији кими, алаг отлары арасында бөјүјән буғда кими идиләр (Мәт. 13:24—30). Ахырзаманда Јеһова 144 000 нәфәрә дахил олаҹаг кәсләри  сечмәјә давам едир *. Одур ки, Јеһова сон ҝәлмәздән әввәл кимисә сечмәк гәрарына ҝәлирсә, биз Онун һикмәтинә шәкк ҝәтирмәмәлијик. (Ромалылара 9:11б, 16 ајәләрини охујун.) * Биз Иса Мәсиһин бир мәсәлиндә тәсвир олунан ишчиләр кими давранмамалыјыг. Онлар Ағаларынын ишин гуртармасына бир саат галмыш ишләмәјә башлајанлара гаршы мүнасибәтинә ҝөрә шикајәтләнирдиләр (Мәт. 20:8—15).

15. Мәтта 24:45—47 ајәләриндә бәһс олунан «садиг вә ағыллы нөкәр» синфинә бүтүн мәсһ олунмушлар дахилдир? Изаһ един.

¹⁵ Ҝөјдә јашамаг үмидинә малик оланларын һеч дә һамысы «садиг вә ағыллы нөкәр» синфинә аид дејил. (Мәтта 24:45—47 ајәләрини охујун.) Биринҹи әсрдә олдуғу кими, бу ҝүн дә Јеһова вә Иса Мәсиһ бир нечә гардаш васитәсилә чохларына гида верир, башга сөзлә, тәлим верир. Биринҹи әсрдә јалныз аз сајда мәсһ олунмуш Инҹилин јазылмасында иштирак етмишди. Бу ҝүн дә Аллаһын халгына «вахтлы-вахтында јемәк вермәк» иши јалныз аз сајда мәсһ олунмуш мәсиһијә һәвалә олунуб.

16. Бу мәгаләдән нә өјрәндиниз?

¹⁶ Бу мәгаләдән нә өјрәндик? Јеһова халгынын бөјүк бир һиссәсинә јер үзүндә әбәди јашамаг үмидини вериб, Иса Мәсиһлә бирҝә ҝөјдә идарә етмәк имканыны исә аз сајда инсана бәхш едиб. Јеһова хидмәтчиләринин һамысыны, һәм «јәһудини», һәм дә «он адам»ы мүкафатландырыр вә онлардан ејни ганунлара әмәл етмәји, садиг галмағы тәләб едир. Онларын һамысы тәвазөкар галмалыдыр. Һамысы Она бирлик ичиндә хидмәт етмәлидир. Вә һамысы јығынҹагдакы сүлһү горумаға чалышмалыдыр. Сона доғру јахынлашдыгҹа, ҝәлин «бир сүрүдә» бирләшиб Јеһоваја хидмәт етмәјә вә Исанын изләри илә ҝетмәјә давам едәк (Јәһ. 10:16).