1. Yéhôva a bi legel le kii i bé lama bôña i ngéda yés?

YÉHÔVA a bi legel inyu ngéda yés le: “Mu dilo di nyen y’a léña le, jôm li bôlôm l’a kôbda mintômb mi libadô mi man Lôk Yuda, ba lôlak biloñ bi dilémb tjodisôna, ba kalak le: “Bés ni bé di kenek, inyule di bi nok le Nyambe a yé ni bé.’” (Sakaria 8:23) I “Man Lôk Yuda” ba mpôdôl hana a yé titii i minhook mi Nyambe. Ba nsébél ki bo le “Israel i Nyambe.” (Galatia 6:16) “Jôm li bôlôm” ba mpôdôl hana ba yé i bôt ba gwé botñem i niñ boga hana ’isi. Ba ntehe le Yéhôva a mpohol minhook, ni le bomede ba gwé nsima nkeñi i bégés Nyambe ntôñ ni bo.

2. Lelaa “jôm li bôlôm” li ‘nke ni’ minhook?

² To hala kiki ba nla bé yi môl ma minhook nwominsôna i len ini, * i bet ba gwé botñem i niñ hana ’isi ba nla “ke (kiha) ni” minhook. Lelaa? Bibel i nkal le “jôm li bôlôm” di bé lama kôbda (tibil gwel) mintômb mi libadô mi man Lôk Yuda, mi kalak le: “Bés ni bé di kenek, inyule di bi nok le Nyambe a yé ni bé.” Tolakii nlôñ u u mpôdôl ndik  man Lôk Yuda wada, mamélél ma nlôñ ma ngwélél i buk ini le “bé” inyu unda le ba mpôdôl ndigi bé mut wada. Ndi ntôñ minhook wonsôna. I bet ba ta bé minhook ba ngwélél Yéhôva ntôñ ni minhook. Ndi ba nyoñ bé minhook mi kiki baéga, inyule ba nyi le Yésu nyen a yé Ñéga.​—Matéô 23:10.

3. Mambe mambadga di ga timbhe munu yigil ini?

³ Kiki minhook mi ngi yii i ntôñ Djob len, bôt bahogi ba nla bôdôl badba le: (1) Lelaa minhook mi nlama tehe libak jap? (2) Lelaa di nlama tehe i bet ba nje koga, ba nyok ki wai i Bilôp bi Nwet? (3) Baa hala a nlama tééñga bés i tehe le nsoñgi wap u bet ndigi bet ni bet? I yigil ini i ga timbhe mambadga ma.

4. Inoñnaga ni kaat 1 Korintô 11:27-29 mambe mabéhna minhook mi nlama tibil soñda, inyuki?

⁴ Minhook mi nlama tibil ôt pék mu mabéhna ma mpémél i kaat 1 Korintô 11:27-29. (Añ.) Lelaa  nhook u nla je bret, u nyo ki wai i Bilôp bi Nwet ki le u “kôli bé”? A yé le a boñ hala ibale a nje bret, a nyo yak wai ki le a nôgôl bé mambén ma Djob mu niñ yé. (Lôk Héber 6:4-6; 10:26-29) Minhook mi nok le, mi nlama téñbe ni Djob ibale mi nsômbôl kôs “bom inyu nsébla u ngii, [u] Nyambe a nti ni njel Kristô Yésu.”​—Filipi 3:13-16.

5. Lelaa minhook mi nlama tehe nsima ba gwé?

⁵ Mbuu mpubi u Yéhôva u nhôla ndik bagwélél bé ba ba yé suhulnyuu. (Éfésô 4:1-3; Kôlôsé 3:10, 12) Jon minhook mi nlama bé hoñol le mi nloo bana bagwélél ba Djob bape. Ba nyi le Yéhôva a nti bé minhook mbuu mpubi iloo bana bagwélél bé bape. Ba nhoñol bé to le ba nok Bibel iloo bana bape. Kekikel, mut a’ kal bé bape le a ntip pohlana, le a mbôdôl je bret ni nyo wai i Bilôp bi Nwet. Ndi ni suhulnyuu yosôna, ba neebe le Yéhôva nyen a mpohol i bôt b’a ke i ngii.

6. Inoñnaga ni kaat 1 Korintô 4:7, 8, kii minhook mi nlama bé boñ?

⁶ Tolakii minhook mi ntehe le mi gwé nsima nkeñi i ke i ngii, mi nyéñ bé kôs lipém li tôbôtôbô. (Filipi 2:2, 3) Ba nyi ki le, ngéda Yéhôva a bi tep bo, a bi yis bé bôt bobasôna hala. Jon hala a nhélés bé nhook i tehe le ngim bôt i mpala bé hémle le a yé nhook. A nyi le Bibel i niiga bés le, di nlama bé pala hémle mut a nkal bés le Djob a nti nye nson u tôbôtôbô. (Masoola 2:2) Kiki nhook u mbem bé le bôt bape ba ti nye lipém li nlôôha, a ga kal bé bôt a mboma inyu ngélé bisu le a yé nhook. To kadba, a’ kadba bé inyu libak jé.​—Añ 1 Korintô 4:7, 8.   

7. Mambe mam minhook mi nlama bé boñ, inyuki?

⁷ Minhook mi nhoñol bé le mi nlama ndik tégbaha ngéda ni minhook mimpe, kiki bo le mi yé i ngim boma i tôbôtôbô. Mi nyéñ bé minhook mimpe inyu kwélél libak jap li nhook, tole inyu nigil Bibel ntôñ. (Galatia 1:15-17) Adna i ga ba bé likoda ibale minhook mi mboñ i nya mam i. I tiga nene le mi nkolba mbuu mpubi, u u nhôla ntôñ Djob i bana nsañ ni adna.​—Rôma 16:17, 18.   

8. Inyuki di nlama bé lôôha ti minhook lipém? (Béñge matila isi lipep.)

⁸ Lelaa di nlama tehe lôk kéé i bôda ni i bôlôm i i yé minhook? Di nlama bé ti mut lipém iloo héga, to ibale a yé nhook. (Matéô 23:8-12) Bibel i nti bés makénd i ‘nigle hémle’ i mimañ, ndi i nkal bé le di yilha ngim mut ñane wés. (Lôk Héber 13:7) I yé maliga le Bibel i nkal le lôk kéé ihogi i “kôli kôhna lipém môga ima.” Ba kôli kôs lipém li, inyule ba “ñéga likoda loñge” ni le ba “ntumbba ni nson i añal ni niiga,” ndi ha inyu bé le ba yé minhook. (1 Timôtéô 5:17) Ibale di nlôôha ti minhook lipém, hala a nla tééñga bo. * Tole di yé le di boñ le ba yila ngôk. (Rôma 12:3) Mut to wada ikété yés a nsômbôl bé boñ jam jo ki jo, li li nla ba ngok baagene inyu lôkisañ i Kristô!​—Lukas 17:2.

9. Lelaa di nla unda le di nti minhook lipém?

⁹ Lelaa di nla unda le di nti minhook lipém? Di nlama bé bat bo lelaa ba bi yila minhook. I jam li, li mbéñge ndik botama, jon di gwé bé kunde i yi jo. (1 Tésalônika 4:11; 2 Tésalônika 3:11) Di nlama bé hoñol le kiki ba yé minhook, hala a nsômbôl kal le balôm bap, baa bap, bagwal bap tole bôt bap ba lihaa bape ba yé minhook. I ta bé inyule mut woñ lihaa a yé nhook, jon yak we u nlama ba nhook. Nyambe nyen a nhoo nye. (1 Tésalônika 2:12) Di nlama bé bat mambadga ma ma nla babaa bôt bape. Kii hihéga, di nlama bé bat nwaa mankéé nu a yé nhook lelaa a ntehe botñem i niñ i boga hana ’isi ngi nlô wé. Mbale i yé le, di yé nkwoog nkaa le i mbok yondo, Yéhôva a ga “nuus ki ngôñ i hi yom i gwé niñ.”​—Tjémbi 145:16.

10. Ibale di gwé bé lem i ti bôt lipém li nlôôha, lelaa hala a nla bane bés nseñ?

¹⁰ Ibale di ntehe bé minhook kiki bôt ba nlel bape, hala a nla bane bés nseñ i pes mbuu. Lelaa? Bibel i niiga bés le ngim minhook i ga téñbe bé ikepam lisuk. (Matéô 25:10-12; 2 Pétrô 2:20, 21) Inyu hala nyen ibale di gwé bé lem i ti bôt lipém i nya i nlôôha, di ga yoñ bé bo kiki mop, to ba yé minhook, to ba nyiba ngandak, to ba ngwélél Yéhôva ibôdôl behee. Jon, to ibale ba ntéñbe bé i gwélél Yéhôva tole ba mpam ntôñ, bés di ga nimis bé hémle yés, di ga waa bé ki to gwélél Yéhôva.

11. Kii di nyimbe inyu nsoñgi minhook munu nwii mini?

¹¹ Hala a yé ngandak nwii le, nsoñgi u ba ba nje bret, ba nyok wai i Bilôp bi Nwet u bé sôs ndigi sôs ni sôs. Ndi munu nwii mini mi nsôk, nsoñgi wap u mbet ndigi, bet ni bet. Baa hala a nlama tééñga bés? To. Di wan inyuki di nkal hala.

12. Inyuki hala a nlama bé tééñga bés ibale nsoñgi u bôt ba nje bret ba nyok wai i Bilôp bi Nwet u mbet ndigi bet ni bet?

¹² “Yéhôva a nyi i bôt ba yé bé.” (2 Timôtéô 2:19) Maselna ni Yéhôva,  bilôk bikéé bi bi nsoñgol i bôt ba nje bret, ba nyok wai i Bilôp bi Nwet, bi nyi bé njee a yé toi nhook. Jon yak i bet ba nhoñol le ba yé minhook ki le ba ta bé, ba yé mu nsoñgi u. Kiki hihéga, ngim lôk kéé i i bé je bret, i nyok wai i bi téé. Bape ba nkônôl i ño tole i mahoñol, jon ba nhoñol le ba ga ane i ngii ni Kristô. Ntiik, di nyi toi bé minhook nwañen mi ngi yii hana ’isi.

13. Baa Bibel i nti bés nsoñgi u minhook mi mba hana ’isi ngéda njiiha ikeñi i mbôdôl?

¹³ Minhook mi ga ba i ngandak bahoma i nkoñ ’isi ngéda Yésu a ga lo i yoñ bo. (Matéô 24:31) Bibel i nkal le dilo di nsôk, ndék minhook yon i mba i ngi yii hana ’isi. (Masoola 12:17) Ndi i nti bé bés nsoñgi u minhook mi mi mba mi ngi yii hana ’isi ngéda njiiha ikeñi i mbôdôl.

14. Inoñnaga ni kaat Rôma 9:11, 16, kii di nlama yi inyu minhook Yéhôva a mpohol?

¹⁴ Yéhôva nyen a nyi imbe ngéda a mpohol minhook. (Rôma 8:28-30) Yéhôva a bi bôdôl pohol minhook i mbus bitugne bi Yésu. I nene le i hiai bisu, bañga bikristen yosôna i bé minhook. Ndi mu nwii mi bé noñ ha, libim li bôt li li bé kadba le li yé bikristen, li bé noñ bé Kristô. To hala, Yéhôva a bi pohol ndék mu i i bé bañga bikristen. Ba bé kiki blé ikété béba kai i Yésu a bi pôdôl. (Matéô 13:24-30) Dilo di nsôk, Yéhôva a nke ni bisu i pohol  bôt ba mba nsoñgi 144 000. * Ibale Nyambe a nkit le a mpohol bape ndék ngéda ilole lisuk li nlo, di gwé bé le di kéés nye. (Añ Rôma 9:11, 16.) * Di nlama bé kôna bôt ba bôlô Yésu a bi pôdôl mu hihéga hié. Ba bi tjelel inyu bitelbene nwet bôlô a bi yoñ inyu bôt ba bi sôk lo, ba ba bi sal ndigi ngeñ yada.​—Matéô 20:8-15.

15. Baa minhook nwominsôna nwon mi yé “nkol maliga ni u pék” Matéô 24:45-47 a mpôdôl? Toñol.

¹⁵ Ba bobasôna ba gwé botñem i niñ i ngii bé bon ba yé “nkol u maliga ni u pék.” (Añ Matéô 24:45-47.) Kiki hala a bôña i hiai bisu, Yéhôva bo Yésu ba ngwélél ndik ndék bôt inyu jés tole niiga ngandak bôt i len ini. Ni ki le, i hiai bisu, ndék minhook mi bikristen ndik yon i bi tila Bitilna ni hop Grikia. Yak i len ini, ndik ndék minhook i bikristen yon i nlama ti litén li Djob “bijek i loñge ngéda.”

16. Kii di ntehe munu yigil ini?

¹⁶ Kii di ntehe munu yigil ini? Yéhôva a nkit le a ga ti libim li bôt niñ boga hana ’isi, ni niñ boga i ngii inyu i ndék bôt i i ga énél ni Yésu. Yéhôva a mbom bagwélél bé bobasôna, hala wee “Man Lôk Yuda” ni “jôm li bôlôm,” a nsômbôl le ba nôgôl minlélém mi mambén, ba téñbe ki i gwélél nye. Bobasôna ba nlama ke ni bisu i ba suhulnyuu. Ba nlama gwélél nye ntôñ ikété adna. Bobasôna ba nlama boñ biliya i tééda nsañ ikété likoda. Kiki lisuk yé bebee, bés bobasôna di kee ni bisu i gwélél Yéhôva, ni i noñ Kristô kiki “bémba yada.”​—Yôhanes 10:16.