1. Aha do na didok Jahowa na lao masa di tikkinta saonari?

TARINGOT tu tikkinta saonari, didok Jahowa do, ‘Sampulu halak sian saluhut dila ni bangso parbegu marsigantung tu suhisuhi ni ulos ni sada halak Jahudi mandok: Rap hita sauduran, ai nunga hubege hami: Debata do donganmuna.’ (Sak. 8:23) “Halak Jahudi” na didok dison manggombarhon akka halak Kristen na miniahan. Jala didok do nasida “Israel ni Debata”. (Gal. 6:16) Jala, “sampulu halak” manggombarhon akka halak na marpakkirimon lao mangolu salelengna di tano on. Diboto nasida do, molo akka halak na miniahan i nungnga dipillit Jahowa. Jala sada hak istimewa do di nasida boi manomba Jahowa rap dohot akka na miniahan i.

2. Songon dia do “sampulu halak” ‘rap sauduran’ dohot akka na miniahan?

² Nang pe dang boi taboto sude goar ni akka na miniahan na mangolu dope di tano on saonari, * alai akka halak na marpakkirimon di tano on boi do ‘rap sauduran’ dohot nasida. Songon dia carana? Didok Bibel, molo “sampulu halak” i “marsigantung nasida tu suhisuhi ni ulos ni sada halak Jahudi mandok: ‘Rap hita sauduran, ai nunga hubege hami: Debata do donganmuna.’” Didok do di ayat i taringot sada halak Jahudi. Alai hata “donganmuna” patuduhon lobi sian sahalak. On lapatanna, sada halak Jahudi manggombarhon sude akka na miniahan. Akka na marpakkirimon di tano on rap manomba Jahowa dohot akka na miniahan. Alai, dang dibahen nasida akka na miniahan i gabe pamimpin. Alana diboto nasida, holan sada do Pamimpin, i ma Jesus.​—Mat. 23:10.

3. Di parsiajaran on, sukkun-sukkun aha do na lao taulas?

 ³ Ala adong dope halak Kristen na miniahan rap dohot hita di tano on, ra gabe sukkun-sukkun do roha ni piga-piga halak: (1) Ikkon songon dia do halak Kristen na miniahan marpikkir taringot tu dirina sandiri? (2) Ikkon songon dia do hita maradoppon akka halak na mangan roti dohot minum anggur tikki Borngin Parningotan? (3) Gabe marsak do rohatta ala lam martamba godang ni halak na mangan roti dohot minum anggur i? Di parsiajaran on lao taulas ma akka sukkun-sukkun on.

4. Songon na disurat di 1 Korint 11:27-29, aha do sipasingot na ikkon diingot akka halak na miniahan, jala boasa?

⁴ Ikkon sai diingot akka halak na miniahan do sipasingot na disurat di 1 Korint 11:27-29. (Jaha.) Boi do sahalak na miniahan didok “ndang tama” molo mangan roti dohot minum anggur ibana tikki Borngin Parningotan alai dang mangoloi patik ni Jahowa. (Heb. 6:4-6; 10:26-29) Diboto akka na miniahan do, ikkon toktong do nasida setia asa boi “mandapot upa, i ma panjouon ni Debata marhite Kristus Jesus tu hangoluan na di surgo”.​—Plp. 3:13-16.

5. Ikkon songon dia do halak Kristen na miniahan mangida dirina sandiri?

 ⁵ Tondi parbadia ni Jahowa mangurupi naposona asa marserep ni roha dang marginjang ni roha. (Eps. 4:1-3; Kol. 3:10, 12) Alani i dang didok roha ni akka na miniahan, nasida do na dumenggan sian halak na asing. Diboto nasida do, sarupa do tondi parbadia na dilehon Jahowa tu nasida dohot tu na asing. Dang didok roha ni nasida, umbagas parbinotoan ni nasida sian akka dongan na asing taringot Bibel. Dang dipaboa-boa nasida tu na asing molo nasida nungnga dipillit Jahowa jala ikkon mangan roti dohot minum anggur di Borngin Parningotan. Diboto nasida do, Jahowa do na mamillit sasahalak lao mangolu tu surgo.

6. Hombar tu 1 Korint 4:7, 8, ikkon songon dia do halak Kristen na miniahan maradoppon na asing?

⁶ Sada hasangapon do di sasahalak ala dimiahi jala dipillit lao mangolu di surgo. Alai dang na gabe dipangido ibana asa sangap ibana dibahen na asing. (Plp. 2:2, 3) Diboto ibana do, dang dipaboa Jahowa tu na asing molo ibana dimiahi tondi parbadia. Alani i, dang songgot be rohana molo adong piga-piga halak na so porsea molo ibana nunga dipillit Jahowa. Alana diboto ibana do adong didok di Bibel, dang boi pittor porsea hita tikki sasahalak mangakku mandapot silehon-lehon sian Debata. (Pgk. 2:2) Dang lomo roha ni halak Kristen na miniahan asa sai diparrohahon halak. Alani i, dang dipaboa ibana tu halak na asing molo ibana sahalak na miniahan. Jala dang gabe dihaginjakkon dirina tu na asing alani i.​—Jaha 1 Korint 4:7, 8.

7. Aha do na ikkon dipasiding akka na miniahan, jala boasa?

⁷ Dang didok roha ni halak Kristen na miniahan, ikkon holan tu akka na miniahan na asing do nasida rap, jala mambahen kelompok sama nasida. Dang dilului nasida akka na miniahan na asing lao makkatai taringot pakkirimon ni nasida manang mambahen kelompok khusus asa rap marsiajar Bibel. (Gal. 1:15-17) Molo songon i na diulahon nasida, boi do gabe dang marsada huria Kristen. Jala gabe dialo nasida do tondi parbadia, na mangurupi huria asa dame jala marsada.​—Rom 16:17, 18.

8. Boasa ikkon manat hamu tikki maradoppon akka dongatta na miniahan? (Ida muse surat na di toru.)

⁸ Ikkon songon dia do hita maradoppon akka dongatta na miniahan? Sala do molo  pasangaphu tabahen sasahalak, nang pe ibana sahalak na miniahan na gabe haha-anggi ni Kristus. (Mat. 23:8-12) Tikki mangulas taringot akka sintua, dijujui Bibel do hita asa maniru “haporseaon ni nasida”. Alai dang dijujui hita mambahen jolma gabe pamimpin di hita. (Heb. 13:7) Tutu do didok Bibel, piga-piga dongatta ikkon “tapasangap do dua hali lompit”. Alai taulahon pe i ala ‘denggan do nasida manarihon’ dohot ‘paboahon jala mangajarhon hata ni Debata sian nasa gogona’, dang ala halak na miniahan nasida. (1 Tim. 5:17) Molo pasangaphu tabahen dongatta na miniahan, olo do gabe maila nasida. * Manang olo do gabe tabahen ginjang roha ni nasida. (Rom 12:3) Tontu, dang adong sian hita na olo mambahen sahalak na miniahan na gabe haha-anggi ni Kristus gabe mangulahon dosa na balga!​—Luk. 17:2.

9. Songon dia hita patuduhon na taargai do akka na miniahan?

⁹ Songon dia hita patuduhon na taargai do akka na miniahan? Tontu dang sukkunonta songon dia nasida boi gabe halak na miniahan. Holan ibana dohot Jahowa do na mamboto i. (1 Tes. 4:11; 2 Tes. 3:11) Jala unang ma didok rohatta molo dongan saripena, natua-tuana, manang keluargana na asing pe halak na miniahan. Alana pakkirimon tu surgo i dang warisan sian keluarga. Sian Debata do i didapot ibana. (1 Tes. 2:12) Unang ma tabahen sukkun-sukkun na boi mambahen haccit roha ni keluargana. Umpamana, unang ma tasukkun istrina songon dia pakkilalaanna haduan mangolu salelengna di tano on, hape dang rap dohot suamina. Di tano na imbaru, pasombuon ni Jahowa do sude “lomo ni roha ni nasa na mangolu.”​—Ps. 145:16.

10. Songon dia hita boi manjaga diritta molo dang pasangaphu tabahen sasahalak?

¹⁰ Molo dang pasangaphu tabahen halak na miniahan, boi do i manjaga diritta. Songon dia carana? Didok di Bibel, adong do piga-piga halak na miniahan na so setia tu Debata. (Mat. 25:10-12; 2 Ptr. 2:20, 21) Alani i unang ma pasangaphu tabahen sasahalak. Molo taulahon i, on patuduhon dang jolma na taihuthon nang pe ibana sahalak na miniahan, nga leleng manomba Jahowa, manang godang na mananda ibana. (Jud. 16) Molo dang setia nasida jala manadikkon huria, dang gabe mago haporseaotta manang gabe dang be manomba Jahowa.

11. Aha do na boi taboto taringot bilangan ni halak na mangan roti dohot minum anggur di Borngin Parningotan?

¹¹ Saleleng martaon-taon, lam moru do halak na mangan roti dohot minum anggur di Borngin Parningotan. Alai piga-piga taon na parpudi on, lam martamba do bilangan ni halak na mangan roti dohot minum anggur i. Gabe marsak do rohatta alani i? Daong. Taulas ma piga-piga alasanna.

12. Boasa dang pola marsak hita taringot bilangan ni halak na mangan roti dohot minum anggur di Borngin Parningotan?

¹² “Ditanda Jahowa do angka na di Ibana.” (2 Tim. 2:19) Nang pe boi dietong akka dongan sadia godang halak na mangan roti dohot minum anggur di Borngin Parningotan, alai dang diboto nasida ise do sasittongna halak na miniahan. Holan Jahowa do na mamboto i. Adong do halak na mangakku molo nasida halak  na miniahan hape sasittongna daong. Umpamana, adong do halak naung leleng mangan roti dohot minum anggur, alai di pudian ni ari dang diulahon ibana be i. Na asing, adong do na paposhu rohana tu dirina sandiri jala didok rohana dohot do ibana mamaretta rappon Jesus di surgo. Alani i, dang boi tapastihon sadia godang halak na miniahan na tading dope di tano on.

13. Dipaboa Bibel do sadia godang bilangan ni halak na miniahan na tading dope di tano on tikki ro hasusaan bolon?

¹³ Adong dope akka halak na miniahan di tano on tikki ro Jesus lao mamboan nasida tu surgo. (Mat. 24:31) Didok do di Bibel, saleleng ari parpudi adong dope akka halak na miniahan na tading di tano on. (Pgk. 12:17) Alai dang dipaboa sadia godang bilangan ni nasida tikki ro hasusaan bolon.

14. Songon na disurat di Rom 9:11, 16, aha do na porlu taboto taringot andigan Jahowa mamillit sahalak na miniahan?

¹⁴ Jahowa do na manontuhon andigan Ibana mamillit sahalak na miniahan. (Rom 8:28-30) Dung dipahehe Jesus, mulai ma dipillit Jahowa akka na miniahan. Boi ma didok, akka na miniahan do sude halak Kristen na sittong di abad na parjolo. Alai martaon-taon dukkon i, godang halak na mangakku Kristen dang tutu mangihuthon Kristus. Nang pe songon i, adong dope piga-piga halak Kristen na sittong na dimiahi Jahowa. Dipatudos Jesus do nasida songon eme di tonga-tonga ni simareme-eme. (Mat. 13:24-30) Saleleng ari parpudi, dipillit  Jahowa do muse akka halak na gabe bagian sian 144.000. * Alani i, dang sukkun-sukkun be rohatta molo dipillit Jahowa sahalak na miniahan andorang so ro hasusaan bolon. (Jaha Rom 9:11, 16.) * Ikkon manat do hita asa unang songon akka parkarejo na dipaboa di tudosan ni Jesus. Marungut-ungut do nasida ala dibahen tuanna gaji ni nasida dos songon halak na parpudi karejo.​—Mat. 20:8-15.

15. Songon na disurat di Mateus 24:45-47, sude do halak Kristen na miniahan gabe “naposo haposan jala na marbisuk”? Patorang ma.

¹⁵ Dang sude halak na marpakkirimon lao mangolu di surgo gabe “naposo haposan jala na marbisuk”. (Jaha Mateus 24:45-47.) Dos songon abad na parjolo, saonari pe dipakke Jahowa dohot Jesus do piga-piga baoa lao mangalehon mangan manang mangajari naposona. Di abad na parjolo, dang sude halak Kristen na miniahan dipakke lao manurat akka Bukku Junani Kristen. Jala saonari pe, holan piga-piga halak Kristen na miniahan do na martanggung jawab lao mangalehon naposo ni Debata “mangan di tingkina”.

16. Sian artikel on, akka aha ma na boi diparsiajari hamu?

¹⁶ Sian artikel on, akka aha ma na boi taparsiajari? Jahowa do na mamillit halak na lao mangolu salelengna di tano on dohot na mangolu di surgo. Dipasu-pasu Jahowa do sude naposona, i ma na digombarhon gabe “halak Jahudi” dohot “sampulu halak”. Dipangido Ibana do nasida asa unduk tu patikna jala toktong setia. Alani i, ikkon serep do roha ni nasida sude. Ikkon rap do nasida manomba Jahowa jala marsada. Jala, ikkon toktong do dijaga nasida hadameon di huria. Ala naung jonok nama ari ni Jahowa, rap ma hita sude gabe “sada punguan” na toktong manomba Jahowa dohot mangihuthon Kristus.​—Joh. 10:16.