1. Ano an sinabi ni Jehova na mangyayari sa satong panahon?

MAPADAPIT sa satong panahon, ihinula ni Jehova: “Sampulong lalaki hali sa gabos na lengguwahe kan mga nasyon an makapot, iyo, makapot sinda nin higot sa halabang bado nin sarong Judio asin masabi: ‘Gusto ming mag-iba sa saindo, huli ta nabaretaan ming nasa kaibanan nindo an Diyos.’” (Zac. 8:23, NW) An “Judio” digdi nagrerepresentar sa mga linahidan nin Diyos kan banal na espiritu. Inaapod man sindang “Israel nin Diyos.” (Gal. 6:16) An “sampulong lalaki” nagrerepresentar sa mga may paglaom na mabuhay nin daing sagkod digdi sa daga. Aram ninda na binendisyunan ni Jehova an grupong iyan nin mga linahidan, asin para sa sainda sarong onra na magsamba sa saiya kaiba kan mga ini.

2. Paano an “sampulong lalaki” ‘minaiba’ sa mga linahidan?

² Dawa ngani bakong posible na maaraman niyato an pangaran kan lambang miyembro kan mga linahidan na yaon sa daga ngunyan, * an mga naglalaom na mabuhay digdi sa daga puwedeng “mag-iba” sa mga linahidan. Paano? Sinasabi kan Bibliya na an “sampulong lalaki [makapot] nin higot sa halabang bado nin sarong Judio asin masabi: ‘Gusto ming mag-iba sa saindo, huli ta nabaretaan ming nasa kaibanan nindo an Diyos.’” Sa tekstong iyan, may sinasambit na sarong Judio. Pero an “saindo” asin “nindo” nanunungod sa duwa o labi pang tawo. Nangangahulugan ini na an sinambit na Judio bako sanang sarong tawo kundi nagrerepresentar  sa bilog na grupo nin mga linahidan. An mga bakong linahidan naglilingkod ki Jehova kaiba kan mga linahidan. Minsan siring, dai ninda ibinibilang na lider ninda an mga linahidan, huling aram ninda na si Jesus an saindang Lider.—Mat. 23:10.

3. Anong mga hapot an sisimbagon sa artikulong ini?

³ May mga linahidan na kaibanan pa kan ibang mga lingkod nin Diyos ngunyan, kaya tibaad maihapot nin nagkapira: (1) Paano dapat mansayon kan mga linahidan an saindang sadiri? (2) Paano niyato dapat trataron an mga nagkakakan asin nag-iinom kan mga emblema sa Memoryal? (3) Dapat daw niyatong ipaghadit kun naglalangkaw an bilang ninda? Sisimbagon kan artikulong ini an mga hapot na iyan.

4. Anong patanid na nasa 1 Corinto 11:27-29 an dapat na seryosong pag-isipan kan mga linahidan, asin taano?

⁴ Dapat na seryosong pag-isipan kan mga linahidan an patanid na nasa 1 Corinto 11:27-29. (Basahon.) Kun manungod sa mga emblema sa Memoryal, paano puwedeng mangyari na an sarong linahidan nagkakakan asin nag-iinom kaiyan na bakong maninigo? Mangyayari iyan kun nagkakan asin nag-inom siya kan mga emblema pero dai siya namumuhay kauyon kan matanos na mga pamantayan ni Jehova. (Heb. 6:4-6; 10:26-29) Nasasabutan kan mga linahidan na dapat sindang magdanay na maimbod kun gusto nindang makamtan “an premyong pag-apod nin  Diyos para sa langitnon na buhay paagi ki Cristo Jesus.”—Fil. 3:13-16.

5. Ano an dapat na magin pagmansay kan linahidan na mga Kristiyano sa saindang sadiri?

⁵ Tinatabangan kan banal na espiritu ni Jehova an saiyang mga lingkod na magin mapakumbaba, bakong mapalangkaw. (Efe. 4:1-3; Col. 3:10, 12) Kaya dai iniisip kan mga linahidan na mas urog sinda kisa sa iba. Aram ninda na dai man pirming mas dakul na banal na espiritu an itinatao ni Jehova sa mga linahidan kisa sa ibang mga lingkod niya. Dai ninda pig-iisip na mas hararom an pakasabot ninda sa mga katotoohan sa Bibliya kisa sa siisay pa man. Asin dai nanggad ninda sasabihan an iba na siya saro man na linahidan asin dapat na magkakan saka mag-inom na man siya kan mga emblema sa Memoryal. Imbes, mapakumbaba nindang minimidbid na si Jehova sana an nag-iimbitar sa mga tawo na magpasiring sa langit.

6. Sigun sa 1 Corinto 4:7, 8, ano an dapat na magin paggawi kan linahidan na mga Kristiyano?

⁶ Dawa namamatian kan mga linahidan na sarong onra na maimbitaran na magpasiring sa langit, dai sinda naglalaom na magigin espesyal an pagtrato sa sainda kan iba. (Fil. 2:2, 3) Aram man ninda na kan linahidan sinda ni Jehova, dai niya iyan ipinaaram sa gabos. Kaya an sarong linahidan dai na nagngangalas kun dai tulos siya tubudan kan nagkapira na siya linahidan. Nasasabutan niya na sinasabi sa sato kan Bibliya na dai tulos maniwala sa saro na nagsasabi na tinawan siya ni Jehova nin sarong espesyal na responsabilidad. (Kap. 2:2) Habo nin sarong linahidan na magin sentro nin atensiyon, kaya pag may nakakabisto siya, dai niya sinasabi na siya linahidan. Asin siguradong dai niya iyan ipaghahambog sa iba.—Basahon an 1 Corinto 4:7, 8.

7. Ano an lilikayan na gibuhon kan mga linahidan, asin taano?

⁷ Dai iniisip kan linahidan na mga Kristiyano na sa mga kapwa linahidan sana sinda dapat makiiba-iba, na garo baga mga miyembro sinda nin sarong eksklusibong grupo. Dai sinda naghahanap nin iba pang mga linahidan tanganing pag-ulayan an dapit sa pagigin linahidan ninda o tanganing magbilog nin grupo para pag-adalan an Bibliya na sinda-sinda sana. (Gal. 1:15-17) Dai magkakasararo an kongregasyon kun gigibuhon iyan kan mga linahidan. Pagkontra iyan sa banal na espiritu, na nagtatabang sa mga lingkod nin Diyos na magin matuninong asin nagkakasararo.—Roma 16:17, 18.

8. Taano ta kaipuhan niyatong magin maingat kun dapit sa pagtratar niyato sa mga nagkakakan asin nag-iinom kan mga emblema sa Memoryal? (Hilingon an nota sa ibaba.)

⁸ Paano niyato dapat trataron an linahidan na mga tugang? Sala kun sobra niyatong hahangaan  an sarong tawo, dawa pa kun siya sarong linahidan na tugang ni Cristo. (Mat. 23:8-12) Mapadapit sa mga elder, dinadagka kita kan Bibliya na ‘arugon ta an saindang pagtubod,’ alagad mayo iyan nin sinasabi na puwede tang gibuhon na lider an siisay man na tawo. (Heb. 13:7) Totoo na sinasabi kan Bibliya na may nagkapira na “maninigo sa dobleng onra.” Pero bako iyan dahil linahidan sinda, kundi huli iyan sa “mahusay [nindang] panginginot” asin sa ‘ipinapahiling nindang kaigutan sa saindang pagpahayag asin pagtutukdo.’ (1 Tim. 5:17) Puwedeng mapasupog sinda kun sobra-sobra niyato sindang uumawon asin tatawan nin atensiyon. * O an mas grabe pa, tibaad magin mapalangkaw sinda. (Roma 12:3) Dai nanggad gugustuhon kan siisay man sa sato na makagibo nin ano man na puwedeng magin dahilan na makagibo nin arog kaiyan kaseryosong sala an saro sa linahidan na mga tugang ni Cristo!—Luc. 17:2

9. Paano niyato maipapahiling na iginagalang ta an linahidan na mga Kristiyano?

⁹ Paano niyato maipapahiling na iginagalang ta an mga linahidan ni Jehova? Dai ta sinda hahaputon kun paano sinda nagin linahidan. Personal na bagay ini na mayo kitang deretsong maaraman. (1 Tes. 4:11; 2 Tes. 3:11) Asin dai ta dapat isipon na mga linahidan man an saindang agom, mga magurang, o iba pang miyembro kan saindang pamilya. Dai namamana nin sarong tawo an saiyang langitnon na paglaom sa saiyang kapamilya. Inaako niya iyan hali sa Diyos. (1 Tes. 2:12) Dapat man niyatong likayan na magparahapot nin mga bagay na puwedeng makakulog nin buot. Halimbawa, dai ta hahaputon an agom na babayi nin sarong linahidan na brother kun ano an namamatian niya dapit sa paglaom na mabuhay nin daing sagkod digdi sa daga na dai kaibanan an agom niya. Tutal, makakasigurado nanggad kita na sa bagong kinaban, ‘papaniguan ni Jehova an mawot kan lambang bagay na may buhay.’—Sal. 145:16, NW.

10. Paano ta napoprotektaran an satong sadiri kun linilikayan niyato an sobrang ‘pag-umaw sa mga tawo’?

¹⁰ Napoprotektaran ta man an satong sadiri kun dai niyato ipinapamati sa mga linahidan na mas importante sinda kisa sa iba. Paano? Sinasabi sa sato kan Bibliya na may mga linahidan na puwedeng dai magdanay na maimbod. (Mat. 25:10-12; 2 Ped. 2:20, 21) Pero kun lilikayan niyato an sobrang ‘pag-umaw sa mga tawo,’ dai nanggad kita magigin parasunod nin ibang mga tawo, dawa kan mga linahidan o kan prominenteng mga tugang o kan haloy nang mga naglilingkod ki Jehova. (Jud. 16, nota sa ibaba) Dangan, kun sinda dai magin maimbod o magbaya sa kongregasyon, dai magluluya an pagtubod ta ki Jehova o dai kita mapundo sa paglilingkod sa saiya.

11. Ano an nangyayari sa bilang kan mga nagkakakan asin nag-iinom kan mga emblema sa Memoryal?

¹¹ Sa laog nin dakul na taon, an bilang kaidto kan mga nagkakakan asin nag-iinom kan mga emblema sa Memoryal padagos na nagbababa. Alagad sa dai pa sana nahahaloy na mga taon, an bilang na iyan padagos na naglalangkaw taon-taon. Kaipuhan daw niyatong ipaghadit iyan? Dai. Pag-ulayan ta an pirang mahalagang bagay na dapat niyatong isaisip.

12. Taano ta dai niyato dapat ipaghadit an dapit sa bilang kan mga nagkakakan asin nag-iinom kan mga emblema sa Memoryal?

¹² “Midbid ni Jehova kun sairisay an saiya.” (2 Tim. 2:19) Bakong arog ni Jehova, dai aram kan mga brother na nagbibilang kan mga nagkakakan asin nag-iinom kan mga emblema sa Memoryal kun sairisay an tunay na linahidan. Kaya kaiba sa bilang an mga naghuhuna na linahidan sinda pero an totoo dai man. Halimbawa, may mga indibidwal na nagkakakan asin nag-iinom kaidto kan mga emblema pero  pag-abot nin panahon nagpundo na. An iba man tibaad may problema sa isip o emosyon kaya naniniwala sinda na mamamahala sinda kaiba ni Cristo sa langit. Kaya dai ta talaga aram an eksaktong bilang kan mga natatadang linahidan digdi sa daga.

13. May sinasabi daw an Bibliya kun pirang linahidan an yaon pa sa daga pag magpuon na an grabeng kasakitan?

¹³ May mga linahidan sa dakul na parte kan daga pag mag-abot na si Jesus para darahon sinda sa langit. (Mat. 24:31) Sinasabi kan Bibliya na sa panahon kan huring mga aldaw, igwa nin sadit na bilang nin mga linahidan na yaon pa sa daga. (Kap. 12:17) Pero mayo iyan nin sinasabi kun pira sa sainda an yaon pa sa daga pag magpuon na an grabeng kasakitan.

14. Arog kan ipinapahiling sa Roma 9:11,16, ano an kaipuhan niyatong masabutan mapadapit sa pagpili nin mga linahidan?

¹⁴ Si Jehova an nagdedesisyon kun nuarin siya mapili nin mga linahidan. (Roma 8:28-30) Nagpuon na magpili si Jehova nin mga linahidan pagkatapos na buhayon liwat si Jesus. Minalataw na kan inot na siglo, mga linahidan an gabos na tunay na Kristiyano. Sa mga siglo pagkatapos kaiyan, kadaklan sa mga nagsasabing Kristiyano sinda dai man talaga nagsusunod ki Cristo. Minsan siring, kan mga panahon na iyan, linahidan ni Jehova an pipirang tunay na mga Kristiyano. Arog sinda kan trigong sinabi ni Jesus na matalubo kaiba kan mga duot. (Mat. 13:24-30) Sa panahon kan huring mga aldaw, padagos na nagpipili si Jehova nin mga magigin kabilang sa 144,000. * Kaya kun magdesisyon an Diyos na pilion an nagkapira sa mga ini halipot na panahon bago an katapusan, dai ta nanggad kukuwestiyunon an saiyang kadunungan. (Basahon an  Roma 9:11, 16.) * Dapat kitang mag-ingat na dai magin arog kan mga trabahador na ilinadawan ni Jesus sa saro sa mga ilustrasyon niya. Nagreklamo sinda sa kun paano trinatar kan saindang kagurangnan an mga nagpuon na magtrabaho sa huring oras.—Mat. 20:8-15.

15. An gabos daw na linahidan kabilang sa “maimbod asin mapagmansay na uripon,” na sinambit sa Mateo 24:45-47? Ipaliwanag.

¹⁵ Bakong gabos na may paglaom na mabuhay sa langit kabilang sa “maimbod asin mapagmansay na uripon.” (Basahon an Mateo 24:45-47.) Arog kan inot na siglo, naggagamit man ngunyan si Jehova asin si Jesus nin pipirang brother tanganing magpakakan, o magtukdo, sa dakul. Pipira sanang linahidan na mga Kristiyano kan inot na siglo an ginamit tanganing isurat an Kristiyanong Griegong Kasuratan. Ngunyan, pipira sanang linahidan na mga Kristiyano an may paninimbagan na magtao nin “kakanon sa tamang panahon” sa mga lingkod nin Diyos.

16. Ano an nanudan mo sa artikulong ini?

¹⁶ Ano an nanudan niyato sa artikulong ini? Nagdesisyon si Jehova na tawan nin buhay na daing katapusan digdi sa daga an mayoriya kan mga lingkod niya asin nin buhay sa langit an pipira tanganing mamamahala kaiba ni Jesus. Binabalusan ni Jehova an gabos niyang lingkod—an “Judio” pati man an “sampulong lalaki”—asin hinahagad niya sa sainda na magsunod sa parehong mga pagbuot asin na magdanay na maimbod. An gabos kaipuhan na magdanay na mapakumbaba. An gabos kaipuhan na iribang maglingkod sa saiya asin magkasararo. Asin an gabos dapat na magtinarabangan tanganing magdanay na matuninong an kongregasyon. Mantang mas nagrarani kita sa katapusan, lugod na gabos kita padagos na maglingkod ki Jehova asin magsunod ki Cristo bilang “sarong aripumpon.”—Juan 10:16.