ICIPANDE CA KUSAMBILILAMO 5
Twalaya na Imwe
“Tuleya na imwe, pantu natumfwa ukuti Lesa ali na imwe.”—SEKA. 8:23.
ULWIMBO 26 Mwacitiile Ine
IFYO TWALASAMBILILA *
Ababa mwi bumba lya mpaanga shimbi (nelyo “abantu 10”) balatemwa ukupepa Yehova pamo na basubwa (nelyo “umuYuda”) (Moneni paragrafu 1 na 2)
1. Cinshi Yehova asobele ukuti e cikacitika muno nshiku?
YEHOVA alisobele pa nshita tuleikalamo ukuti: “Abantu ikumi (10) aba mu ndimi shonse isha nko, bakekata ku nsenkebele sha ku ca kufwala ca muYuda umo, abati: ‘Tuleya na imwe, pantu natumfwa ukuti Lesa ali na imwe.’” (Seka. 8:23) “UmuYuda” emininako Abena Kristu abo Lesa asuba no mupashi wa mushilo abo Baibolo ita no kuti “Israele wa kwa Lesa.” (Gal. 6:16) “Abantu 10” bemininako abakwata isubilo lya kwisaikala umuyayaya pano isonde. Balomfwa icilumba ukulapepa Yehova pamo na ili ibumba lya Bena Kristu basubwa, kabili balishiba ukuti Yehova e wasala ili ibumba.
2. Bushe “abantu 10” ‘baya’ shani pamo na basubwa?
2 Nangu ca kutila te kuti twishibe amashina ya basubwa bonse abacili pano isonde, * abakwata isubilo lya kwikala pano isonde kuti ‘baya na’ basubwa. Kuti baya nabo shani? Baibolo itila “abantu ikumi (10) . . . bakekata ku nsenkebele sha ku ca kufwala ca muYuda umo, abati: ‘Tuleya na imwe, pantu natumfwa ukuti Lesa ali na imwe.’” Nangu ca kuti ici cikomo calanda ukuti umuYuda umo, ishiwi lya kuti “imwe” na mashiwi ya kuti “ali na imwe,” tayalanda pa muntu umo. Kanshi umuYuda te mininako umuntu umo, lelo e mininako Abena Kristu basubwa bonse. Abena Kristu abakwata isubilo lya kwisaikala pano sonde balabombela Yehova pamo na basubwa. Na lyo line, tabamona abasubwa kwati ni ntungulushi shabo pantu balishiba ukuti Yesu e Ntungulushi yabo.—Mat. 23:10.
3. Mepusho nshi twalaasuka muli cino cipande?
3 Apo Abena Kristu basubwa bamo epo bacili pano isonde, nalimo kuti mwalayipusha amuti: (1) Bushe abasubwa bafwile ukuba shani? (2) Bushe tufwile ukulamona shani abalyako umukate no kunwako umwangashi pa Cibukisho? (3) Bushe tulingile ukusakamikwa nga twamona impendwa ya balyako pa Cibukisho ilekulilako? Twalaasuka aya mepusho muli cino cipande.
BUSHE ABASUBWA BAFWILE UKUBA SHANI?
4. Kusoka nshi ukwaba pali 1 Abena Korinti 11:27-29 uko abasubwa balingile ukutontonkanyapo sana, kabili mulandu nshi?
4 Abasubwa balingile ukulatontonkanya sana pa kusoka kwaba pali 1 Abena Korinti 11:27-29. (Belengeni.) Bushe uwasubwa kuti alelya shani umukate no kunwa umwangashi pa Cibukisho “mu musango uushilingile”? Nga ca kuti alelyako umukate no kunwako umwangashi pa Cibukisho lelo talekonka amafunde ya kwa Lesa, ninshi alecita ifi mu musango uushilingile. (Heb. 6:4-6; 10:26-29) Abasubwa balishiba ukuti balingile ukutwalilila ukuba aba cishinka pa kuti bakapokelele “icilambu ca bwite bwa ku muulu ubwafuma kuli Lesa ukupitila muli Kristu Yesu.”—Fil. 3:13-16.
5. Bushe abasubwa bafwile ukuba shani?
5 Umupashi wa kwa Yehova taulenga ababomfi bakwe baba ne cilumba, lelo ulalenga baba abaicefya. (Efes. 4:1-3; Kol. 3:10, 12) Kanshi abasubwa tabamona kwati balicila bambi. Balishiba ukuti Yehova tabapeela umupashi wa mushilo uwingi ukucila ifyo apeela ababomfi bakwe bambi. Tabamona kwati balishiba sana icine ca mu Baibolo ukucila ababomfi ba kwa Yehova bambi. Kabili tabeeba umuntu ukuti nasubwa no kuti alingile ukutendeka ukulyako umukate no kunwako umwangashi pa Cibukisho. Lelo baliicefya pantu balishiba ukuti ni Yehova fye e usala abakaya mu kuteka na Yesu ku muulu.
6. Ukulingana ne lembo lya 1 Abena Korinti 4:7, 8, finshi abasubwa bashilingile ukulacita?
6 Nangu ca kuti abasubwa balishiba ukuti lishuko nga nshi ifi babasala ukuya ku muulu, tabenekela abantu bambi ukulabamona kwati balicindama sana ukucila Abena Kristu bambi. (Fil. 2:2, 3) Balishiba no kuti ilyo Yehova abasubile talengele abantu bonse baishiba ukuti na basubwa. Kanshi uwasubwa tapapa nga ca kuti bamo tabasumine apo pene ukuti alisubwa. Alishiba ukuti Baibolo itweba ukukanasumina bwangu nga ca kuti umo atweba ukuti Lesa namupeela umulimo uwaibela. (Ukus. 2:2) Apo uwasubwa tafwaya abantu ukulamumona kwati alicindama sana, teeba abo aishibana nabo pa muku wa kubalilapo ukuti alisubwa. Kabili tafwile ukulaitakisha pa mulandu wa kuti alisubwa.—Belengeni 1 Abena Korinti 4:7, 8.
7. Finshi ifyo abasubwa bashicita, kabili mulandu nshi?
7 Abena Kristu abasubwa tabamona ukuti balingile ukulaba fye na basubwa banabo kwati nalimo balipanga akabungwe ka basubwa. Tabaya balefwaya ukwaba abasubwa banabo pa kuti balelanshanya pa fyo Lesa abasuba, nelyo pa kuti balekumana mu mabumba ku kusambilila Baibolo. (Gal. 1:15-17) Abasubwa nga balecita ifi, aba mu cilonganino te kuti bekatane. Kabili ninshi tabalebombela pamo no mupashi wa mushilo uulenga abantu ba kwa Lesa baba aba mutende kabili abaikatana.—Rom. 16:17, 18.
BUSHE TUFWILE UKULAMONA SHANI ABASUBWA?
Tatufwile ukulamona abasubwa nelyo bambi abatungulula nga filya abantu bamona abalumbuka (Moneni paragrafu 8) *
8. Finshi ifyo tushilingile ukucita ku ba bwananyina abalyako umukate no kunwako umwangashi pa Cibukisho? (Moneni na futunoti.)
8 Bushe tufwile ukulamona shani bamunyinefwe na bankashi abasubwa? Tafufwile ukulamona kwati umuntu umo alicindama sana ukucila bambi, nangu fye ni munyina wa kwa Kristu uwasubwa. (Mat. 23:8-12) Baibolo nga yalanda pali baeluda, itukoselesha ukuti ‘tulepashanya icitetekelo cabo.’ Tayalandapo ukuti tulingile ukulamona umuntu ukuti ni ntungulushi yesu. (Heb. 13:7) Ca cine, Baibolo yalilanda ukuti bamo balilinga “ukupeelwa umucinshi ubili.” Te pa mulandu wa kuti balisubwa, lelo ni co ‘balatungulula bwino’ kabili ‘balabombesha mu kulanda na mu kusambilisha amashiwi ya kwa Lesa.’ (1 Tim. 5:17) Nga tulelumbanya sana abasubwa kabili nga tulebamona kwati balicindama sana, kuti twalenga balaumfwa insoni. * Kabili icingabipa sana ca kutila kuti twalenga baba ne cilumba. (Rom. 12:3) Takuli uwingafwaya ukucita ifingalenga bamunyina ba kwa Kristu abasubwa baba ne cilumba!—Luka 17:2.
9. Kuti twalanga shani ukuti twalicindika Abena Kristu basubwa?
9 Kuti twalanga shani ukuti twalicindika abo Yehova asuba no mupashi wa mushilo? Tatulingile ukulabepusha ifyo cali pa kuti basubwe, pantu tatwakwata insambu sha kufwaya ukwishiba ilyashi ilishitukumine. (1 Tes. 4:11; 2 Tes. 3:11) Kabili tatulingile ukulatunganya ukuti abena mwabo, abafyashi babo nelyo balupwa lwabo nabo balisubwa. Ukukwata isubilo lya kuya ku muulu takwaba ngo bupyani bwa mu lupwa. Lesa e usala abakekala ku muulu. (1 Tes. 2:12) Tatulingile no kulaipusha amepusho ayengakalifya bambi. Ku ca kumwenako, tatulingile ukwipusha nkashi uwaupwa kuli munyinefwe uwasubwa ifyo omfwa ifi takekale no mwina mwakwe pano isonde umuyayaya. Twalicetekela ukuti mu calo cipya, Yehova ‘akapeela ica mweo conse ifyo cilefwaya.’—Amalu. 145:16.
10. Kuti twaicingilila shani nga ca kuti tatulemona abantu bamo ukuti ‘balicindama’ ukucila bambi?
10 Nga ca kuti tatulemona abasubwa ukuti balicindama ukucila bambi, kuti twaicingilila. Cinshi twalandila ifi? Pantu Baibolo itweba ukuti nalimo abasubwa bamo tabakatwalilile ukuba aba cishinka. (Mat. 25:10-12; 2 Pet. 2:20, 21) Nga tatulemona bamo ukuti ‘balicindama’ ukucila bambi, tatwakalebakonkelela, ukubikako fye na basubwa, Abena Kristu abaishibikwa sana, nelyo ababombela Yehova pa myaka iingi. (Yuda 16) Nangu baleka ukuba ne cishinka nelyo nga bafuma mu cilonganino, ifwe tatwakanenuke, kabili tatwakaleke ukubombela Yehova.
BUSHE TULINGILE UKUSAKAMIKWA NGA CA KUTI IMPENDWA YA BALYAKO PA CIBUKISHO ILEKULILAKO?
11. Finshi fyacitika ku mpendwa ya balyako umukate no kunwako umwangashi pa Cibukisho?
11 Pa myaka iingi, impendwa ya balyako umukate no kunwako umwangashi pa Cibukisho yalecepelako. Lelo pali nomba, iyi impendwa ilakulilako cila mwaka. Bushe tulingile ukusakamikwa? Awe. Natulande pa milandu ikalamba iyo tushilingile ukusakamikilwa.
12. Cinshi tushilingile ukusakamikilwa nga twamona impendwa ya balyako umukate no kunwako umwangashi pa Cibukisho ilekulilako?
12 ‘Yehova alishiba abakwe.’ (2 Tim. 2:19) Bamunyinefwe abapenda abalyako umukate no kunwako umwangashi pa Cibukisho, tabeshiba nga cine cine umuntu alisubwa nelyo tasubwa, lelo Yehova ena alishiba. Kanshi mu mpendwa ya balyako pa Cibukisho mulaba na bamona kwati balisubwa, lelo abashasubwa. Ku ca kumwenako, bamo abalelyako kale balileka ukulyako. Bamo nalimo icilenga balelyako no kunwako, ni co tabatontonkanya bwino ica kuti batendeka ukumona kwati bakateka na Kristu ku muulu. Kanshi tatwaishiba bwino impendwa ya basubwa abacili pano isonde.
13. Bushe Baibolo yalilanda impendwa ya basubwa abakaba pano isonde ilyo ubucushi bukalamba bukatendeka?
13 Mu ncende ishingi pano calo mukaba abasubwa ilyo Yesu akesa mu kubasenda ku muulu. (Mat. 24:31) Baibolo itila mu nshiku sha kulekelesha kukaba impendwa iinono iya basubwa abakaba pano isonde. (Ukus. 12:17) Lelo tayalanda impendwa ya bakabapo ilyo ubucushi bukalamba bukatendeka.
Finshi tushilingile ukucita nga twamona umo alyako ifimpashanya fya pa Cibukisho? (Moneni paragrafu 14)
14. Ukulingana ne lembo lya Abena Roma 9:11, 16, finshi tulesambilila pa fyo Yehova asala abakaya ku muulu?
14 Yehova e wishiba inshita ya kusala abasubwa. (Rom. 8:28-30) Yehova atendeke ukusala abasubwa ninshi Yesu alibuushiwa ukufuma ku bafwa. Cimoneka kwati Abena Kristu ba cine bonse abaaliko mu nshiku sha batumwa baali abasubwa. Ilyo papitile imyaka iingi ukutula apo Yehova atendekele ukusala abasubwa, kwali abantu abengi abaleti Bena Kristu lelo abashalekonka Kristu. Nomba kwali bamo abaali ne cishinka abo Yehova asubile. Aba abasubwa bali kwati ni ngano isho Yesu alandile ukuti shikakulila pamo ne fyani. (Mat. 13:24-30) Na muno nshiku sha kulekelesha mwine, Yehova alitwalilila ukusala abakaba mwi bumba lya ba 144,000. * Kanshi Lesa nga asala abantu na bambi ilyo kwashala fye inshita iinono ukuti impela ise, tatulingile ukulaipusha ico abasalila, pantu wa mano nga nshi. (Belengeni Abena Roma 9:11, 16.) * E co tufwile ukucenjela pa kuti tatucitile nga filya ababomfi abo Yesu alandilepo mu cilangililo cimo bacitile, abailishenye ku wabengishe incito pa fyo abapeele amalipilo yamo yene na balekeleshe ukwingila incito.—Mat. 20:8-15.
15. Bushe abasubwa bonse baba mwi bumba lya “musha wa cishinka kabili uwashilimuka” uo Baibolo yalandapo pali Mateo 24:45-47? Londololeni.
15 Te bonse abasubwa ababa mwi bumba lya “musha wa cishinka kabili uwashilimuka.” (Belengeni Mateo 24:45-47.) Nga filya fine caali mu nshiku sha batumwa, na muno nshiku mwine Yehova na Yesu babomfya fye abantu abanono ukupekanya ifya kulya fya ku mupashi nelyo ukusambilisha abantu abengi. Mu nshiku sha batumwa, Abena Kristu abasubwa abalembeleko Amalembo ya Bwina Kristu aya ciGriki baali fye abanono. Na muno nshiku mwine, Abena Kristu basubwa abanono fye, e bapekanishisha abantu ba kwa Lesa “ifya kulya . . . pa nshita yalinga.”
16. Finshi mwasambilila muli cino cipande?
16 Finshi twasambilila muli cino cipande? Yehova akapeela ababomfi bakwe abengi umweo wa muyayaya pano pene pe sonde, kabili alisala na bambi abanono fye abakateka na Yesu ku muulu. Yehova alalambula ababomfi bakwe bonse, abo “umuYuda” e mininako e lyo na abo “abantu 10” bemininako, kabili afwaya ukuti bonse balekonka amafunde yamo yene, e lyo no kutwalilila aba cishinka. Bonse bafwile ukuba abaicefya, kabili balingile ukwikatana no kulabombela Lesa capamo. Balingile no kulacita ifingalenga mu cilonganino mwatwalilila ukuba umutende. Ilyo impela ya cino calo ilepalamina, ifwe bonse natutwalilile ukulabombela Yehova no kulakonka Kristu, pantu twaba “umukuni umo.”—Yoh. 10:16.
^ para. 5 Uno mwaka Icibukisho ca mfwa ya kwa Kristu cikabako pali Cibili pa 7 April. Bushe tulingile ukulamona shani abalyako umukate no kunwako umwangashi pa Cibukisho? Bushe tulingile ukusakamikwa nga twamona ukuti impendwa ya balyako ilekulilako? Twalaasuka aya mepusho muli cino cipande icilelanda pa fyaba mu Ulupungu lwa kwa Kalinda ulwa January 2016.
^ para. 2 Ukulingana na Amalumbo 87:5, 6, nalimo ku ntanshi Lesa akatweba amashina ya bakalateka na Yesu ku muulu.—Rom. 8:19.
^ para. 8 Moneni akabokoshi akatila “Mu Kutemwa Tamwaba Ukucita Ifishayana” mu Ulupungu lwa kwa Kalinda ulwa January 2016.
^ para. 14 Nangu ca kuti Baibolo pa Imilimo 2:33 itila Yesu e upongolwela umupashi pa basubwa, Yehova e ubasala.
^ para. 14 Nga mulefwaya ukwishibilapo na fimbi, belengeni icipande icitila “Amepusho Ukufuma ku Babelenga” mu Ulupungu lwa kwa Kalinda ulwa May 1, 2007.
ULWIMBO 34 Ukuba Uwakaele
^ para. 56 UBULONDOLOSHI BWA CIKOPE: Elenganyeni ukuti umwiminishi wa maofeshi yakalamba no mwina mwakwe bali pa kulongana kwa citungu e lyo abantu babashinguluka pa kuti babakope ifikope. Ala te kuti ciwame!
