1. Rosai Yahwe ikofen ḇepon ḇekur fafisu koḇedine?

YAHWE ikofen ḇepon ḇekur fafisu koḇedine ḇo doḇe, ”Snon risamfur ḇeramaker er ma wos nakam nari sufepen nako snonkaku Yahudi oso syatu ḇyedi. Nari sikofen ḇo soḇe, ’Nkomarisen nkoso mko, snar nkorower kwar Allah ryous mko.’” (Za. 8:23) ”Snonkaku Yahudi oso” kyur ḇe snonkaku Yahwe ryem si kuker rur ḇesren. Sor si kako ḇe ”[Allah] Israel ḇyesi”. (Gal. 6:16) ”Snon risamfur” kyur ḇe snonkaku ḇena saneraro fa sikenem fyoro ro supswan ine. Sifawi Yahwe ḇyebarakas snonkaku ryem ansya. Simarisen kaku kukro sisyom ḇe Yahwe I fnoḇek si.

2. Moḇsa ”snon risamfur” ansi ’siso’ snonkaku ḇesmai ramrem sya rai?

² Na kopok kofawi mnis ḇa snonkaku ḇesmai ramrem ḇekenem kaker ro supswan ine snonsnon sena oser-oser. * Rarirya mboi, snonkaku ḇena saneraro fa sikenem ro supswan ’siso’ si pdef. Moḇsa sifrur na rai? Refo doḇe ”snon risamfur” ansi nari ”sufepen nako snonkaku Yahudi oso syatu ḇyedi. Nari sikofen ḇo soḇe, ’Nkomarisen nkoso mko, snar nkorower kwar Allah ryous mko.’” Mnuk anya dapḇair snonkaku Yahudi oso. Ḇape, sor snonkaku Yahudi ani kuker apap ”mko”. Ine kyurfasnai snonkaku Yahudi kyur ḇe snonkaku oser monda ḇa, mboi kyur ḇe snonkaku Kristen ḇesmai ramrem syakam. Ḇesmai ramrem ḇa sya sima nari sakfarmyan ḇe Yahwe fnoḇek ḇesmai ramrem ansya. Imbape, smam snonkaku  ḇesmai ramrem sya ḇe manfarkin sesi ḇa, kukro sifawi manfarkin sedi oser monda, isoine Yesus i.​—Mat. 23:10.

3. Fakfuken rosai monda na neḇekarem ro farkarkor ine?

³ Kirine, snonkaku ḇesmai ramrem sya sisya kaker rofandu Yahwe kawasa Ḇyesi. Inja ono sisya skara: (1) Moḇsa snonkaku Kristen ḇesmai ramrem sya fandun fa smam mankunsi rai? (2) Moḇsa fandun fa komam snonkaku ḇeyan mamami ma ḇeyinem anggur ro munara Swarapepen ya? (3) Fandun fa kokmom snar barbor sedi dek syadi wer ke? Farkarkor ine nari kyarem fakfuken skoine.

4. Rosai swarapepen ḇero 1 Korintus 11:27-29 fandun fa snonkaku ḇesmai ramrem sya skara pyum na, ma rosai ḇefnai ya?

⁴ Snonkaku Kristen ḇesmai ramrem sya fandun fa skara pyum swarapepen ḇero 1 Korintus 11:27-29. (Wasya.) Ro mnuk ine, rosai na ḇefnai fa snonkaku oso ”ḇyesasar” fa dan mamami ma dinem anggur ro munara Swarapepen ya? Ine ndarirya rofyor isouser Allah  sasoser Ḇyena ḇa. (Ibr. 6:4-6; 10:26-29) Snonkaku ḇesmai ramrem sya sifawi sisouser pdef kada na sismai ”sasuref, isoine fararyor ro boiyaswa ro Allah snar Yesus Kristus”.​—Flp. 3:13-16.

5. Moḇsa snonkaku ḇesmai ramrem sya fandun fa smam mankunsi rai?

⁵ Yahwe rur ḇesren Ḇyedi ifnoḇek manfamyan Ḇyesi fa sfasnai sne ḇerun, mboi sne ḇekaki ḇa. (Ef. 4:1-3; Kol. 3:10, 12) Inja, snonkaku ḇesmai ramrem sya skara sima sikaki syadi ro min sesya ḇa. Sifawi Yahwe ḇyuk rur ḇesren nabor syadi ḇe si ḇa kukro sima snonkaku ḇesmai ramrem siryanja. Skara ḇa kako sifawi pyum syadi Refo ya ro snonkaku ḇese. Ma snonkaku ḇesmai ramrem oso ipok ikofenḇair ḇe snonkaku ḇese awer radine: ”Waksmai ramrem kako inja wan mamami ma winem anggur mura.” Imbape, kuker sne ḇerun sikarem Yahwe I monda ḇena hak fa ḇeyor snonkaku oso fa dek ḇe nanki.

6. Imnis wos ro 1 Korintus 4:7, 8, moḇsa fandun fa komam snonkaku Kristen ḇesmai ramrem sya rai?

⁶ Snonkaku ḇesmai ramrem sya smam fararyor Allah ḇyuk ḇe si fa sek ḇe nanki nama syowi ḇeba nairi. Ḇape simewer snonkaku ḇese smam sima sikaki syadi. (Flp. 2:2, 3) Sifawi kako fafisu Yahwe ryem si, na ipok ikofenḇair ḇe snonkaku ḇese ḇa fa sakfawi. Inja, snonkaku oso ismai ramrem ido na ifawi fyor snonkaku ḇese sikyar ḇeri ḇa ima Allah ryem i kwar. Snonkaku ḇesmai ramrem sifawi Refo fyarkor ko snar fyor ono sisya sikarem sismai fakamaman oso ro Allah ido, na kokyar ḇeri ḇa. (Why. 2:2) Simewer sifrur snonkaku ḇese smanen syadadi si, inja snonkaku ḇesmai ramrem oso na ipok ikofenḇair ḇe snonkaku isrow randak snar ima ismai ramrem kwar. Ma nari dararer i ḇa.​—Wasya 1 Korintus 4:7, 8.

7. Rosai snonkaku Kristen ḇesmai ramrem oso ipok ifrur awer na, ma rosai ḇefnai ya?

⁷ Snonkaku ḇesmai ramrem ansine na skara ḇa fandun fa sḇuk oras sena kuker min ḇesmai ramrem ḇesesya monda, rya sima raryur oso ḇese. Sipok sisewar min ḇesmai ramrem ḇesesya fa sawawos ḇekur saneraro sena ḇa. Na sifrur raryur fa sfarkor Refo kayam kuker si ḇa. (Gal. 1:15-17) Sifrur rarirya ido, na sifrur sidang Kristen ḇyeoser ḇa. Iba syadi na spampum fararur ro rur ḇesren, ḇefnoḇek Yahwe kawasa Ḇyesi fa skain payamyum ma sḇeoser.​—Rm. 16:17, 18.

8. Rosai ḇefnai fandun fa kosasor ko ro nyan moḇsa komam snonkaku ḇesmai ramrem sya rai? (Mam kako fasfas kasun.)

⁸ Moḇsa fandun fa komam naek srar ḇesmai ramrem sya rai? Kopok komanen syadi snonkaku oso awer. Kristus naek ḇyesi kako, kopok komanen syadadi si awer. (Mat. 23:8-12) Rofyor Refo dawos ḇekur penatua sya, danun ḇe ko fa ’kofarari kakyar sena’. Ḇape, Refo ikofenḇair ḇa bisa kofrur snonkaku sya fa sḇe manfarkin koḇedi. (Ibr. 13:7) Kakuḇae, Refo doḇe ono sisya siyus fa ”sisma syowi rarwan risuru” ro ko. Inja, koḇesyowi si kukro sima sismai ramrem ke? Roḇa, mboi koḇesyowi si kukro ’sfarkin mnis ro jemaat’ ma sisewar kaku fa sun faya ma sḇuk farkarkor ḇe ko. (1 Tim. 5:17) Koḇuk wos sandik ḇaido komanen syadi snonkaku ḇesmai ramrem sya ido, na kofrur si fa simai. * Ḇeḇyeḇa syadi wer, na kofrur si fa sararer si. (Rm. 12:3) Komewer kaku kofrur fa Kristus naek ḇyesi oso ifrur sasar ḇeba ḇeradirya!​—Luk. 17:2.

9. Moḇsa kofasnai syowi faro snonkaku Yahwe ryem si kwar rai?

⁹ Moḇsa kofasnai syowi faro snonkaku Yahwe ryem si kwar rai? Kopok kofuken awer moḇsa sifawi Yahwe ryem si kwar. Inema roi kopok kofawi awer na, snar fandun mankun senairi. (1 Tes. 4:11; 2 Tes. 3:11) Kopok kokara awer siswasi, sinan sesi, ḇaido kina sesi saksmai ramrem kako. Saneraro kankenem ro nanki nama roi kina sesi sḇuk ḇe waris risyaḇa. Mboi Allah iso ḇeyor si. (1 Tes. 2:12) Oso wer ido, kopok kofuken awer roi na ḇefrur fa snonkaku ḇesesya sisnesna naduf. Imnis raris, kofuken awer ḇe manbesrar ḇesmai ramrem oso swari radine, ’Nari wakenem ro supswan ine boi swambri dek ḇe nanki ido, moḇsa na ḇaḇir rai?’ Kokyar ro dunya babo, Yahwe nari ’ḇyas bramin Ḇyedi ma ḇyuk sneprei faro marasrisen ḇekenem sya kam’.​—Mz. 145:16.

10. Rosai ḇefnai fa komanen syadadi snonkaku ḇese ḇa ido, koisya kokadaunwarek mankunko?

¹⁰ Komam snonkaku ḇesmai ramrem sya sifandun syadi ḇa ido, koisya kokadaunwarek mankunko. Kukro? Refo isya ikofenḇair ḇe ko, snonkaku ḇesmai ramrem ono sisya sisouser pdef ḇa. (Mat. 25:10-12; 2 Ptr. 2:20, 21) Komewer komanen syadadi si ido, nari kosowanan snonkaku ḇesesya ḇa, ḇesmai ramrem sya ke, snonkaku sifawi si kwar ke, ḇaido ḇefarmyan fyoro kwar sya. Rarirya, rofyor snonkaku ansi sisouser wer ḇa ḇaido sibur sidang ke, nari kokyar ma kofarmyan pdef ḇe Yahwe I.

11. Taun riḇeso ḇarpur ine, rosai kofawi ro barbor ro snonkaku ḇeyan mamami ma ḇeyinem anggur ro munara Swarapepen ya?

¹¹ Fafisu taun ḇe taun, ḇeyan mamami ma ḇeyinem anggur ro munara Swarapepen sibor ḇa. Ḇape taun riḇeso ḇarpur ine, barbor sedi dek syadi wer. Roi nane nafrur fa kokmom ke? Oroḇa. Rwama komam roi ḇefnai ya.

12. Rosai ḇefnai fa kopok koḇeḇirḇar awer barbor ro snonkaku ḇeyan mamami ma ḇeyinem anggur ro munara Swarapepen ya?

¹² ”[Yahwe] ifawi snonkaku ḇyesi.” (2 Tim. 2:19) Ḇar naek ḇekor barbor ro  snonkaku ḇeyan mamami ma ḇeyinem anggur ro munara Swarapepen, sifawi mnis ḇa mansei monda ḇesmai ramrem sya, Yahwe I derer. Inja, snonkaku ḇekyar mankun ḇa nari sek ḇe nanki ke roḇa, skor warpu si kako. Imnis raris, ono sisya ḇepon ya san mamami ma sinem anggur, ḇape ḇarpur mura san ma sinem wer ḇa. Ḇesesya wer snar swaruser ḇemnis ḇa sena, skara nari sakḇepoik fnoḇek Yesus ro nanki. Inja nasnai kaku, kopok kofawi mnis ḇa barbor ro snonkaku ḇesmai ramrem ḇekenem kaker ro supswan ine sya.

13. Refo ikofenḇair ḇe ko snar snonkaku ḇesmai ramrem barbor seja sefis rofyor kandera ḇeba ya ḇyerak ke?

¹³ Snonkaku ḇesmai ramrem sya nari sisya kaker ro supswan ine rofyor Yesus ryama fa dun si ḇe nanki. (Mat. 24:31) Refo fyasnaiḇair ro rasras ḇepupes, snonkaku ḇesmai ramrem ro supswan ine nari sisya kaker mboi sibor ḇa. (Why. 12:17) Ḇape, Refo ikofenḇair ḇa snonkaku ḇesmai ramrem ansine barbor seja sefis rofyor kandera ḇeba ya ḇyerak.

14. Rosai kofarkor ro Roma 9:11, 16 ḇekur kankinfir snonkaku ḇesmai ramrem sya?

¹⁴ Yahwe dap kwar fafisu risai nari kyinfir snonkaku ryem sya. (Rm. 8:28-30) Yahwe kyinfir randak snonkaku Kristen ḇesmai ramrem sya fafisu Yesus ikḇok ro marmar ya kwar. Snonkaku ḇero abad randak syakam sismai ramrem kuker rur ḇesren. Abad ḇe abad ḇarpur mura, snonkaku ḇekarem si ḇe Kristen sisouser kaku Yesus i ḇa. Rariryano, ro fafisu anna Yahwe ryem snonkaku  ḇeḇeso ḇeso kaku Kristus i. Simnis ra gandum ḇesur kam warpu ampyampumber sya. (Mat. 13:24-30) Ro fafisu rasras ḇepupes, Yahwe kyinfir kaker snonkaku nari ḇeyaksun ro 144.000 sya. * Inja, Yahwe kyara namuk kwar fa kyinfir ḇeḇeso ro si fanam ḇe kandera ḇeba ya ido, na kopok kofakfuken roi ine ḇa. (Wasya Roma 9:11, 16, NW.) * Fandun fa kosasor ko insama kakfrur awer raris ḇefararur sya, isoine snonkaku Yesus dap si ro wos sarḇer ḇyena. Sisurem faro tuan ani kukro ifrur pyum snonkaku insape ḇesun babo ro papupes ya.​—Mat. 20:8-15.

15. Imnis ḇeyap ro Matius 24:45-47, snonkaku ḇesmai ramrem syakam na sḇe ”women ḇesouser ma ḇefawinanem” ke? Fasnaiḇair na.

¹⁵ Snonkaku ḇesmai ramrem syakam ḇa sḇe ”women ḇesouser ma ḇefawinanem”. (Wasya Matius 24:45-47, NW.) Raris ro abad randak, baboine Yahwe ma Yesus sukur naek ḇeḇeso fa sḇuk anan, ḇaido sḇuk farkarkor faro snonkaku ḇebor. Ro abad randak naiwara, ḇeḇeso monda ro snonkaku Kristen ḇesmai ramrem sḇe si fa sfas Syap-Syap Yunani Kristen. Baboine kako, ḇeḇeso monda ro snonkaku Kristen ḇesmai ramrem ḇena fakamamar fa sḇuk faro Allah kawasa Ḇyesi ”nanan faro si ro fafisu ya”.

16. Rosai wafarkor ro farkarkor ine?

¹⁶ Rosai kofarkor ro farkarkor ine? Yahwe kyara namuk kwar fa ḇyuk faro ḇebor ro kawasa Ḇyesi kankenem fyoro ro supswan ine. Ḇape, ḇebor ḇa sya Yahwe ḇye si fa sikenem ro nanki fa sakḇepoik fnoḇek Yesus i. Yahwe ḇyebarakas manfamyan Ḇyesi kam, isoine ”snonkaku Yahudi oso” ma ”snon risamfur” ḇero Zakharia ḇardadi ḇyena. Yahwe imarisen insama sisoasuser pdef ma dor si fa sisouser sasoser ḇemnis kam. Fandun fa sfasnai sne ḇerun pdef. Fandun fa sḇeoser ma sekayamyam sisyom ḇe Yahwe I. Oso wer ido, sisewar kaku fa saksmai aski kuker naek srar ḇero sidang sya. Kandera ḇeba ya fyanam kaku kwar. Inja, iḇye kada kokame kofarmyan pdef ḇe Yahwe I ma koso Kristus i ḇe ’nai oser’.​—Yoh. 10:16.