1. ?Jehova i talem wanem long saed blong taem blong yumi?

JEHOVA i tokbaot taem blong yumi, i se: “Ten man we oli kamaot long olgeta lanwis blong ol nesen bambae oli holem, yes, bambae oli holemgud kaliko blong wan man Jiu, mo bambae oli talem se, ‘Mifala i wantem go wetem yufala, from we mifala i harem nius se God i stap wetem yufala.’” (Sek. 8:23, NW) “Man Jiu” we vas ya i tokbaot i minim olgeta we God i makemaot wetem tabu spirit. Narafala nem blong olgeta “Isrel blong God.” (Gal. 6:16) ‘Ten man ya’ i minim olgeta we oli gat hop blong laef olwe long wol. Oli save se Jehova i jusumaot ol tabu Kristin ya, mo oli harem se i wan bigfala ona blong joen wetem olgeta blong wosipim hem.

2. ?Olsem wanem “ten man” i “go wetem” ol tabu Kristin?

² Yumi no save nem blong evri tabu Kristin long wol tede. * Nating se i olsem, olgeta we oli gat hop blong laef long wol long fiuja oli save “go wetem” ol tabu Kristin ya. ?Olsem wanem oli mekem olsem? Baebol i talem se “ten man” “bambae oli holemgud kaliko blong wan man Jiu, mo bambae oli talem se, ‘Mifala i wantem go wetem yufala, from we mifala i harem nius se God i stap wetem yufala.’” Vas ya i tokbaot wan  man Jiu. Be “yufala” i minim plante man. Taswe man Jiu ya i pija blong ful grup blong ol tabu Kristin, we ol narafala Kristin oli joen wetem olgeta blong wosipim Jehova. Be ol narafala ya oli no ting se ol tabu Kristin oli lida blong olgeta. Oli save se oli gat wan Lida nomo, hemia Jisas.—Mat. 23:10.

3. ?Wanem ol kwestin we bambae yumi tokbaot long stadi ya?

³ I gat sam tabu Kristin we oli stap yet wetem ol man blong God long wol, taswe maet yu askem se: (1) ?Ol tabu Kristin oli mas gat wanem tingting mo fasin? (2) ?Yumi mas mekem olsem wanem long olgeta we oli kakae bred mo dring waen long Memoriol? (3) ?Yumi mas wari sipos namba blong olgeta i go antap? Long stadi ya, bambae yumi tokbaot ol kwestin ya.

4. ?Wanem woning long 1 Korin 11:27-29, mo from wanem ol tabu Kristin oli mas tinghevi long hem?

⁴ Ol tabu Kristin oli mas tinghevi long woning we i stap long 1 Korin 11:27-29. (Ridim.) ?Olsem wanem wan tabu Kristin i save kakae bred mo dring waen long fasin we “i no stret”? Hem i mekem olsem taem hem i no stap obei long ol loa blong Jehova. (Hib. 6: 4-6; 10:26-29) Ol tabu Kristin oli save se oli mas gohed blong obei long God blong ‘kasem praes, we God i singaot olgeta blong oli go antap, tru long Kraes Jisas.’—Fil. 3:13-16.

5. ?Wanem tingting we ol tabu Kristin oli mas gat?

⁵ Tabu spirit i givhan long ol man blong Jehova blong oli no flas, be oli gat tingting daon. (Efes. 4:1-3; Kol. 3:10, 12) Taswe, ol tabu Kristin oli no ting se oli gud moa long ol narafala mo maet Jehova i no givim moa tabu spirit long olgeta i bitim ol narafala man blong hem. Oli no ting se oli kasem save moa long Baebol i bitim ol narafala. Mo neva bambae oli talem long narafala blong kakae bred mo dring waen long Memoriol from we God i makemaot hem tu. Oli gat tingting daon, taswe oli save se Jehova nomo i singaot ol man oli go long heven.

6. Folem 1 Korin 4:7, 8, ?ol tabu Kristin oli mas gat wanem fasin?

⁶ Ol tabu Kristin oli harem se i wan bigfala blesing we God i singaot olgeta blong oli go long heven. Be oli no ting se ol narafala oli mas leftemap olgeta. (Fil. 2:2, 3) Mo tu, oli save se taem Jehova i makemaot olgeta, hem i no talemaot samting ya long ol narafala man. Taswe oli no sapraes sipos samfala oli tektaem blong bilivim se God i makemaot olgeta. Oli save gud tok blong Baebol se yumi no mas kwik blong bilivim wan man we i talem se God i givim spesel wok long hem. (Rev. 2:2) Ol tabu Kristin oli no wantem se ol narafala oli leftemap olgeta. Taswe oli no talemaot long wan man we oli jes mitim hem se oli tabu Kristin. Mo oli neva tokflas from.—Ridim 1 Korin 4:7, 8.

7. ?Ol tabu Kristin oli no mekem wanem? ?From wanem?

⁷ Ol tabu Kristin oli no spenem taem nomo wetem ol narafala tabu Kristin, olsem se oli blong wan klab. Oli no traem faenem ol narafala tabu Kristin blong tokbaot hop blong olgeta, o blong mekem ol grup wetem olgeta blong stadi Baebol. (Gal. 1:15-17) Sipos oli mekem olsem, kongregesen i no save joen gud, mo oli stap wok agensem tabu spirit we i givhan long ol man blong God blong oli gat pis mo oli joen gud.—Rom 16:17, 18.

8. ?From wanem yumi mas lukaot gud long fasin we yumi mekem long ol tabu Kristin? (Yu luk futnot tu.)

⁸ ?Yumi mas mekem olsem wanem long ol tabu brata mo sista? I no stret blong presem wan man tumas, nating se hem i wan tabu brata blong Kraes. (Mat. 23:8-12) Long saed  blong ol elda, Baebol i talem se yumi mas “folem bilif” blong olgeta, be hemia i no min se yumi folem wan man olsem lida blong yumi. (Hib. 13:7) I tru, Baebol i talem se i stret blong givim “bigfala ona” long samfala. Hemia from we oli “lidim gud kongregesen” mo oli “wok strong blong talemaot tok blong God mo blong tijim ol man,” be i no from we oli tabu Kristin. (1 Tim. 5:17) Sipos yumi presem tumas ol tabu Kristin, yumi save mekem olgeta oli sem. * Mowas, yumi save mekem olgeta oli kam flas. (Rom 12:3) !Yumi no wantem mekem wan samting we i save pulum wan tabu brata blong Kraes blong i foldaon!—Luk 17:2.

9. ?Olsem wanem yumi soemaot respek long ol tabu Kristin?

⁹ ?Olsem wanem blong soemaot respek long olgeta we Jehova i makemaot? Bambae yumi no askem long olgeta wanem i hapen taem Jehova i makemaot olgeta. Hemia bisnes blong olgeta nomo, mo yumi no gat raet blong save. (1 Tes. 4:11; 2 Tes. 3:11) Mo from we oli tabu Kristin, yumi no mas ting se hasban o waef blong olgeta, papa o mama blong olgeta, o sam narafala famle blong olgeta tu oli tabu Kristin. Wan man i no kasem hop blong hem blong go long heven, long ol famle blong hem, be hem i kasem long God. (1 Tes. 2:12) Mo tu, yumi no mas askem ol kwestin we oli save mekem olgeta oli harem nogud. Olsem nao, sipos waef blong wan tabu brata i no gat hop blong go long heven, yumi no mas askem long hem se bambae hem i harem olsem wanem taem hasban blong hem i no moa stap wetem hem long niufala wol. Yumi save se long niufala wol, Jehova bambae i mekem “evriwan oli harem gud.”—Sam 145:16.

10. ?Olsem wanem yumi protektem yumi taem yumi no “leftemap narafala”?

¹⁰ Sipos yumi no leftemap ol tabu Kristin, yumi protektem yumi tu. ?From wanem yumi talem olsem? Baebol i talem se maet sam tabu Kristin oli no holemstrong long God. (Mat. 25:10-12; 2 Pita 2:20, 21) Taswe, sipos yumi blokem fasin ya blong “leftemap” olgeta, bambae yumi no folem ol man, nating se oli tabu Kristin o ol narafala we oli mekem wok blong Jehova longtaem. (Jud 16, futnot) Mo sipos oli lego Jehova mo kongregesen, bambae yumi no lusum bilif mo lego wok blong Jehova.

11. Long ol yia we i pas, ?olsem wanem long namba blong ol man we oli kakae bred mo dring waen long Memoriol?

¹¹ Plante yia, namba blong olgeta we oli kakae bred mo dring waen long Memoriol, i godaon. Be long ol yia we oli jes pas, namba i go antap. ?Yu mas wari long samting ya? Nogat. Traem tingbaot sam risen from wanem yu no mas wari.

12. ?From wanem yu no mas wari long namba blong ol man we oli kakae bred mo dring waen long Memoriol?

¹² “Jehova i save ol man blong hem.” (2 Tim. 2:19) Yes, Jehova i save hu long olgeta we oli kakae bred mo dring waen long Memoriol oli rili tabu Kristin. Be ol brata we oli kaontem olgeta oli no save. Taswe insaed long namba ya i gat samfala we oli ting se oli tabu Kristin, be oli no tabu Kristin, olsem olgeta we fastaem oli kakae bred mo dring waen, be afta oli no moa mekem. Sam narafala oli gat wan problem long tingting, we i mekem olgeta oli ting se bambae oli go rul wetem Kraes  long heven. Taswe i klia se yumi no save stret namba blong ol tabu Kristin we oli stap yet long wol.

13. ?Baebol i talem se hamas tabu Kristin bambae oli stap long wol taem bigfala trabol i stat?

¹³ Bambae i gat sam tabu Kristin long plante ples long wol, taem Jisas i kam blong tekem olgeta i go long heven. (Mat. 24:31) Baebol i talem se long ol las dei, bambae i gat smol namba blong ol tabu Kristin oli stap yet long wol. (Rev. 12:17) Be i no talem hamas tabu Kristin stret, bambae oli stap long wol long taem ya we bigfala trabol i stat.

14. ?Rom 9:11a, 16 i soemaot wanem long saed blong fasin blong God blong jusumaot ol tabu Kristin?

¹⁴ Jehova i jusum wetaem hem i makemaot ol tabu Kristin. (Rom 8:28-30) Jehova i stat blong jusumaot ol tabu Kristin afta we Jisas i laef bakegen. I luk olsem se evri Kristin long taem ya i tabu Kristin. Long ol yia biaen, bighaf blong olgeta we oli talem se oli Kristin oli no rili folem Kraes, oli giaman nomo. Be long ol yia ya, Jehova i makemaot samfala we oli tru Kristin. Olgeta oli olsem gudfala sid we Jisas i talem se bambae i gru wetem ol rabis gras. (Mat. 13:24-30) Long ol las dei, Jehova i gohed blong jusumaot olgeta we oli mekemap 144,000. * Taswe sipos God we i waes olgeta, i wantem jusumaot samfala klosap long en, yumi no mas askem kwestin long saed ya. (Ridim Rom 9:11a, 16.) * Yumi mas lukaot gud se yumi no olsem ol wokman we Jisas i tokbaot long parabol blong hem. Olgeta oli komplen long fasin we  masta i mekem long ol wokman we oli jes stat blong wok long en blong dei.—Mat. 20:8-15.

15. ?Olgeta tabu Kristin oli mekemap “gudfala slef we i waes” long Matiu 24:45-47? Eksplenem.

¹⁵ Long olgeta we oli gat hop blong go long heven, samfala nomo oli mekemap “gudfala slef we i waes.” (Ridim Matiu 24:45-47.) Olsem long taem blong Jisas mo ol aposol, tede tu Jehova mo Jisas i yusum wan smol grup nomo, blong tijim mo givim kakae long plante man. Sam tabu Kristin nomo oli raetem Grik haf blong Baebol bifo. Tede, sam tabu Kristin nomo oli gat wok blong ‘givim kakae long ol man blong God long stret taem.’

16. ?Yu lanem wanem long stadi ya?

¹⁶ ?Yu lanem wanem long stadi ya? Jehova i mekem desisen blong givim laef olwe long wol long bighaf blong ol man blong hem, mo laef long heven long wan smol grup we bambae oli rul wetem Jisas. Jehova i givim pei long olgeta man blong hem, “man Jiu” wetem ol “ten man” tu. Mo hem i talem se oli mas obei long ol loa blong hem mo holemstrong long hem. Evriwan oli mas gat tingting daon. Evriwan oli mas joen gud blong wosipim hem. Mo evriwan oli mas wok had blong holem pis long kongregesen. Taem yumi kam klosap moa long en, yumi mas gohed blong wosipim Jehova mo folem Kraes, olsem “wan grup nomo.”—Jon 10:16.