1. Panjahaion aha do na masa sonari on?

IPATUGAH Jahowa do panjahaion na laho masa bani panorangta sonari on, “Tangkapon ni sapuluh halak humbani bangsa na marbagei-bagei sahap ai ma sada halak Jahudi bani sisi ni hiouni anjaha ihatahon, ‘Rap ma hita laho, ai domma ibogei hanami, Naibata do hasoman nasiam.’” (Sak. 8:23) Bani ayat on, “halak Jahudi” ai maksudni halak na iminaki. Anjaha igoran do homa sidea “Israel ni Naibata”. (Gal. 6:16) Dob ai, na “sapuluh halak” ai maksudni halak na marpangarapan manggoluh sadokah ni dokahni i tanoh on. Ibotoh sidea Jahowa do na mamilih ganup halak na iminaki. Janah malas do uhur ni sidea mangidangi rap pakon halak na iminaki.

2. Aha do maksudni na “sapuluh halak” ai “laho” rap pakon halak na iminaki?

² Hassi pe lang ibotoh hita goran ni ganup halak na iminaki ai, tapi sidea na marpangarapan manggoluh i tanoh on * boi “laho” pakon sidea na iminaki. Sonaha carani? Bibel mangkatahon, “tangkapon ni sapuluh halak humbani bangsa na marbagei-bagei sahap ai ma sada halak Jahudi bani sisi ni hiouni anjaha ihatahon, ‘Rap ma hita laho, ai domma ibogei hanami, Naibata do hasoman nasiam.’” Bani ayat on, sanggah ihatahon sada halak Jahudi sedo maksudni sahalak tumang, halani dong  do homa ihatahon rap pakon “nasiam”. On patuduhkon dong lobih humbani sada halak. Jadi, sada halak Jahudi ai maksudni ganup halak na iminaki. Anjaha rap mangidangi ma halak na marpangarapan i tanoh on rap pakon sidea na iminaki. Hassi pe sonai ibotoh sidea sedo halak na iminaki ai na gabe pamimpin ni sidea, halani Jesus do na gabe pamimpin atap pambobai ni kuria.​—Mat. 23:10.

3. Sungkun-sungkun aha do na iulas hita bani artikel on?

³ Halani dong ope halak na iminaki na manggoluh i tanoh on, ra do gabe sungkun-sungkun hita: (1) Halani sidea iminaki, sonaha do pangahap ni sidea pasal ai? (2) Sonaha pangahapta mangidah halak na mangan ruti ampa minum anggur bani acara Pardingatan? (3) Halani lambin martambah bilanganni na mangan ruti ampa minum anggur, ai porlu do haru uhurta? Ulas hita ma balosni ai bani artikel on.

4. Bani 1 Korint 11:27-29, sipasingat aha do na maningon idingat halak na iminaki, janah mase?

⁴ Ponting tumang do idingat halak na iminaki podah bani 1 Korint 11:27-29.  (Basa.) Aha do na mambahen sidea ‘lang talup’ mangankon ruti ampa anggur bani acara Pardingatan? Ai ma anggo lang idihutkon sidea aturan ni Jahowa bani goluhni. (Heb. 6:4-6; 10:26-29) Ibotoh sidea do maningon totap do sidea setia ase boi manjalo “upah hamonangan ni pandiloon na hun babou, na humbani Naibata ibagas Kristus Jesus”.​—Pil. 3:13-16.

5. Halani sidea iminaki, sonaha do pangahap ni sidea pasal ai?

⁵ Sasintongni iurupi tonduy ni Jahowa do halak ase toruh maruhur sedo gabe margijang ni uhur. (Ep. 4:1-3; Kol. 3:10, 12) Halani ai, lang boi pangahap ni halak na iminaki gijangan do sidea marimbangkon halak na legan. Ibotoh sidea do homa lang ibere Jahowa bahatan tonduy na pansing bani sidea marimbangkon bani na legan. Lang boi homa pangahap ni sidea bahatan pangarusionni pasal Bibel. Janah lang boi homa ipatugah-tugah bani na legan anggo ia domma iminaki anjaha mangan ruti ampa minum anggur ma holi ia sanggah acara Pardingatan. Maningon martoruh ni uhur ma sidea mangakui pitah Jahowa do na mangontang halak hu surga.

6. Domu bani 1 Korint 4:7, 8, aha do na maningon ibahen halak na iminaki?

⁶ Hassi pe ibotoh halak na iminaki na laho hu surga do sidea, tapi lang mangarap sidea ipasangap. (Pil. 2:2, 3) Ibotoh sidea do homa, sanggah iminaki Jahowa sidea, lang ipatugah-patugah Ia ai bani na legan. Jadi, anggo dong sanina botou na lang porsaya sidea iminaki, lang borit uhurni. Ibotoh sidea do na ihatahon Bibel ulang podas-podas porsaya bani halak na mangaku mandapot tanggung jawab na banggal humbani Jahowa. (Pangk. 2:2) Dobkonsi ai, halak na iminaki lang ra patugah-tugahkon anggo ia iminaki. Janah lang ra sidea pajuntul-juntulhon diri bani halak na legan.​—Basa 1 Korint 4:7, 8.

7. Aha do na maningon idingat halak na iminaki, janah mase?

⁷ Halak na iminaki pe lang marpingkir anggo sidea maningon marsaor pitah pakon halak na iminaki dassa, atap mambahen kalompok ni sandiri. Lang ra homa sidea mangindahi halak na iminaki na legan laho mambahen kalompok parlajaran Bibel. (Gal. 1:15-17) Anggo ibahen sidea sonai gabe lang be marsada kuria. Anjaha domma ilawan sidea panogu-noguan ni tonduy na pansing. Halani tonduy ai mambahen halak marsada  sedo mambahen parposahan.​—Rom 16:17, 18.

8. Mase maningon jaga hita ase ulang mamuji-muji halak na iminaki? (Tonggor ma surat partoruh.)

⁸ Sonaha ma pangahapta bani halak na iminaki? Bibel mangkatahon lang boi ipuji-puji hita sasada halak hassi pe ia halak na iminaki. (Mat. 23:8-12) Bani Bibel iojur do hita ‘maniru haporsayaon’ ni sintua. Tapi lang dong ihatahon anggo hita boi mambahen jolma gabe pamimpin. (Heb. 13:7) Tongon bani Bibel ihatahon dong do halak na maningon ipasangap dua hali lompit. Tapi sonai ibahen hita halani “bujur [sidea] mandalankon hasintuaonni” pakon “mandalankon parambilanon ampa pangajarion”, sedo halani halak na iminaki sidea. (1 Tim. 5:17) Leganni ai, anggo ipuji-puji hita sidea ra do on mambahen gabe maila sidea. * Na parahni boi mambahen sidea margijang ni uhur. (Rom 12:3) Tontu lang ra hita mambahen sidea gabe mardousa.​—Luk. 17:2.

9. Sonaha hita patuduhkon anggo hita mangkargai halak na iminaki?

⁹ Sonaha hita patuduhkon anggo hita mangkargai halak na iminaki? Ulang ma isungkun hita sidea sonaha do mungkahni sidea iminaki. Sasintongni lang dong hakta mambotoh ai. (1 Tes. 4:11; 2 Tes. 3:11) Ulang homa pangahapta anggo istri, suami, namatoras, atap kaluargani halak na iminaki do homa. Dingat ma sedo humbani kaluargani sidea mandapot pangarapan ai, tapi humbani Naibata do. (1 Tes. 2:12) Dob ai ulang ma ibahen hita sungkun-sungkun na mambahen borit uhur ni sidea. Umpamani, ulang ma isungkun hita bani istri ni sanina na iminaki, sonaha ma holi ia anggo suamini domma laho hu surga. Pos ma uhurta ‘ipabosur Jahowa do sura-sura ni sagala na manggoluh’ i dunia na baru.​—Ps. 145:16.

10. Aha do gunani anggo lang ra hita mamuji-muji sasada halak?

¹⁰ Anggo lang ipuji-puji hita sasada halak, na manlinggomi dirinta do ai. Mase sonai? Bibel mangkatahon dong do halak na iminaki ujungni lang be setia. (Mat. 25:10-12; 2 Ptr. 2:20, 21) Anggo lang ra hita mamuji-muji sasada halak, tontu lang ra hita mangihutkon sidea hassi pe sidea halak na iminaki atap na dob dokah mangidangi Jahowa. (Jud. 16) Jadi porini pe sidea holi lang be mangidangi Jahowa, lang ra hita mangihutkon sidea. Totap do toguh haporsayaonta bani Jahowa.

11. Baru-baru on parubahan aha do na tarjadi?

¹¹ Bani piga-piga tahun na salpu, lambin otik do halak na mangan ruti ampa minum anggur bani acara Pardingatan. Tapi baru-baru on, domma lambin tambah bilangan ni sidea. Jadi, ai porlu do haru uhurta halani ai? Lang. Ulas hita ma alasanni.

12. Mase lang porlu haru uhurta anggo tambah bilangan ni halak na mangan ruti ampa minum anggur bani acara Pardingatan?

¹² “Itanda [Jahowa] in do halak, na Ia simadasi”. (2 Tim. 2:19) Sanina na mangetong piga halak na mangan ruti ampa minum anggur, sasintongni lang  mambotoh ise do na iminaki Naibata. Pitah Jahowa do na mambotoh ai. Jadi humbani na ietong nongkan ai, lape tontu ganupan halak na iminaki. Umpamani, dong halak na mangan ruti ampa minum anggur tapi i pudian ni ari lang be sonai. Dong homa na targanggu otik pingkiranni, gabe iahap ia ma ia do holi mamarentah rap pakon Jesus i surga. Jadi tangkas ma lang ibotoh hita piga nari bilangan ni halak na tongon-tongon iminaki Jahowa.

13. Ai dong do ipatugah Bibel piga halak nari do holi bilangan ni halak na iminaki paima roh hamarsikon banggal?

¹³ Holi dong ope halak na iminaki i tanoh on sanggah roh Jesus laho mamboban sidea hu surga. (Mat. 24:31) Tongon ihatahon do bani panorang parpudi dong ope halak na iminaki na tading i tanoh on. (Pangk. 12:17) Tapi lang dong ipatugah piga bahat nari sidea na tading paima roh hamarsikon banggal.

14. Domu bani Rom 9:11, 16, aha do na iparlajari hita pasal sadihari do sasada halak iminaki?

¹⁴ Jahowa do na manontuhon sadihari do mamilih halak laho hu surga. (Rom 8:28-30) Mungkahni Jahowa mamilih halak laho hu surga lang piga dokah dobkonsi Jesus ipapuho. Anjaha ra do ganup halak Kristen bani abad na parlobei halak na iminaki do homa. Tapi marratus tahun dobkonsi ai, bahatan do halak na mangaku Kristen lang be mangihutkon Kristus. Hassi pe sonai, dong do piga-piga halak na ipilih Jahowa laho hu surga. Isarupahon Jesus do sidea songon omei na tubuh rapkon simaromei-omei. (Mat. 13:24-30) Sadokah panorang parpudi, tong do adong na ipilih Jahowa gabe bagian  humbani na 144.000 halak ai. * Jadi porini dong ope halak na ipilih Jahowa laho hu surga lang piga dokah paima roh hamarsikon banggal, tontu lang sangsi hita bani haputusan ni Jahowa ai. (Basa Rom 9:11, 16.) * Maningon jaga ma hita ase ulang songon parhorja na isaritahon Jesus bani limbagani. Marungut-ungut do sidea halani bujur tuanni bani parhorja na marhorja pitah sajam dassa.​—Mat. 20:8-15.

15. Humbani Mateus 24:45-47, hunja ibotoh hita anggo halak na iminaki ai lang ganupan ipilih gabe “juakjuak na bujur anjaha na maruhur”?

¹⁵ Lang ganupan halak na iminaki na ipilih gabe “juakjuak na bujur anjaha na maruhur”. (Basa Mateus 24:45-47.) Bani abad na parlobei pitah piga-piga halak dassa na igunahon Jahowa pakon Jesus laho mambere mangan atap pe mangajari susianni. Anjaha pitah piga-piga halak do homa na ipilih laho manuratkon Kitab-Kitab Yunani Kristen. Sonai homa ma sonari on, pitah piga-piga halak na iminaki dassa na ibere tanggung jawab laho “mambere mangan” juakjuak ni Naibata bani panorang na topat.

16. Aha do na iparlajari nasiam humbani artikel on?

¹⁶ Aha do na boi iparlajari hita humbani artikel on? Domma itotapkon Jahowa bahatan do holi juakjuak-Ni laho manggoluh i tanoh on. Janah otik dassa na ipilih Ia laho mamarentah rap pakon Anak-Ni i surga. Ipasu-pasu Jahowa do ganup juakjuak-Ni age “sada halak Jahudi” sonai homa na “sapuluh halak” ai. Sarupa do aturan na ibere Naibata bani sidea. Sihol do Jahowa ase idalankon sidea ganup aturan ai janah totap setia. Maningon totap do sidea martoruh ni uhur anjaha marsada manombah Jahowa. Ganup do sidea maningon manjaga hasadaon i kuria. Halani lambin dohor ujungni dunia on, jadi rap ma hita mangidangi Jahowa ampa mangihutkon Kristus songon “sada hulanan”.​—Joh. 10:16.