1. Kai si ikataken Jahwe si terjadi bas jamanta?

IKATAKEN Jahwe kerna jamanta: “Sepuluh kalak i bas kerina bangsa ras bahasa nari, mekeskes ijemakna baju sekalak Jahudi janah nina, ‘Ikut ate kami ras kena, sebap nggo ibegi kami Dibata ras kena kap.’” (Sak. 8:23, NW) “Sekalak Jahudi” nggambarken kalak si ipilih Jahwe alu kesah si badia guna lawes ku surga. Kalak enda pe igelari “Israel si jadi jang Dibata.” (Gal. 6:16) “Sepuluh kalak” nggambarken kerina kalak si arapenna nggeluh rasa lalap i doni. Iteh kalak e maka ipasu-pasu Jahwe kalak si nggo ipilihNa, janah meriah kel ukur kalak e banci ngelayani Dibata radu ras kalak si nggo ipilih ndai.

2. Uga carana “sepuluh kalak” ndai ‘ikut ras’ kalak si nggo ipilih Jahwe alu kesah si badia?

² La banci siteh ise saja gelar kalak Kristen si nggo ipilih Dibata si lit denga gundari i doni. * Amin gia bage, kalak si arapenna nggeluh i doni banci tetap ‘ikut ras’ kalak e. Uga carana? Nina Pustaka maka “sepuluh kalak” ndai “mekeskes ijemakna baju sekalak Jahudi janah nina, ‘Ikut ate kami ras kena, sebap nggo ibegi kami Dibata ras kena kap.’” Bas ayat e, sada ngenca kalak Jahudi. Tapi kalak Jahudi e igelari “kena.” Enda ertina kalak Jahudi e labo ngenca nggambarken sada kalak saja, tapi maksudna eme kerina kalak Kristen si ipilih ku surga si lit denga i doni. Kalak si la ipilih banci ngelayani Jahwe ras kalak si ipilih. Amin gia bage, labo iakap kalak e kalak si ipilih ndai jadi peminpinna, sebap itehna maka sada ngenca Peminpinna eme Jesus.​—Mat. 23:10.

3. Penungkunen kai saja si man bahasenta bas artikel enda?

³ Gundari kalak si ipilih ku surga lit denga ras kita. Emaka banci saja lit si tersungkun-sungkun: (1) Uga arusna perasan  kalak si ipilih e kerna dirina? (2) Uga arusna perbahanenta man kalak si man roti ras minem anggur bas acara Peringeten? (3) Perlu nge kita kuatir adi reh teremna kalak si man roti ras minem anggur bas acara e? Bas artikel enda sibahas kari jawapenna.

4. Bas 1 Korinti 11:27-29, persinget kai si arus tuhu-tuhu iukuri kalak Kristen si ipilih? Janah ngkai?

⁴ Kalak Kristen si ipilih arus tuhu-tuhu iukurina persinget si lit i bas 1 Korinti 11:27-29. (Baca.) Menurut ayat e, kalak si ipilih banci ianggap ‘la cocok’ man roti ras minem anggur bas acara Peringeten adi la ipatuhina Undang-Undang Dibata. (Heb. 6:4-6; 10:26-29) Iteh kalak si nggo ipilih e maka arus ia terus setia adi datna atena “hadiah i bas Dibata nari, eme idilo guna nggeluh i surga erkelangken Kristus Jesus.”​—Pil. 3:13-16.

5. Uga arusna perasan kalak Kristen si ipilih kerna dirina?

⁵ Isampati kesah si badia umat Jahwe gelah meteruk rukur, labo meganjang rukur. (Ep. 4:1-3; Kol. 3:10, 12) Emaka, labo  iakap kalak si ipilih e ganjangen ia asangken umat Jahwe si debanna. Itehna maka labo buen ibereken Jahwe kesah si badia man bana asangken man umatNa si deban. Labo ka iakapna buen pemetehna kerna Pustaka asangken kalak si deban. Selain e, la pernah ikatakenna man kalak si deban maka kalak e pe nggo ipilih Dibata janah labo isuruhna kalak e man roti ras minem anggur bas acara Peringeten. Tapi, kalak si nggo ipilih e meteruk ukur janah itehna maka Jahwe ngenca si lit hakNa ngundang kalak ku surga.

6. Menurut 1 Korinti 4:7, 8, uga arusna perbahanen kalak Kristen si nggo ipilih?

⁶ Sada kehamaten si mbelin kel iakap kalak Kristen si ipilih e banci iundang ku surga. Tapi, la atena lebih perbahanen kalak man bana. (Pil. 2:2, 3) Iteh kalak e ka maka sanga ipilih Jahwe kalak e, labo ipebetehkenNa man kalak si deban. Emaka la atena mamang adi lit kalak si la mis tek maka ia nggo ipilih Dibata. Itehna ka maka nggo ikataken Pustaka gelah ula mis tek man kalak si ngataken maka nggo datna tanggung jawap khusus arah Dibata. (Ket. 2:2) Perban la atena lebih perbahanen kalak man bana, sanga jumpa ia ras kalak si mbaru denga itandaina, la ipebetehkenna maka ia nggo ipilih Dibata. Janah pasti la ikata-katakenna kerna si e man kalak si deban.​—Baca 1 Korinti 4:7, 8.

7. Kai saja si la banci ilakoken kalak Kristen si nggo ipilih? Janah ngkai?

⁷ Kalak Kristen si nggo ipilih labo iakapna maka ras kalak si nggo ipilih saja ngenca ia arus erteman, tempa-tempa kalak e sada kelompok si khusus. Labo idaramina kalak si debanna si nggo ipilih guna ncakapken arapenna, janah la ibanna sada kelompok gelah banci ras-ras mpelajari Pustaka. (Gal. 1:15-17) Adi bage iban kalak e, runggun Kristen la banci ersada. Perbahanenna e nggo ngelawan kesah si badia, si nampati umat Dibata gelah erdame ras ersada.​—Rom. 16:17, 18.

8. Uga arusna perbahanenta nandangi kalak si man roti ras minem anggur bas acara Peringeten? Janah ngkai? (Nen ka cataten i teruh.)

⁸ Uga arusna perbahanenta nandangi turang seninanta si ipilih Dibata? La banci lebihsa kel sipuji kalak, amin gia ia turang senina Kristus. (Mat. 23:8-12) Sanga ibahas Pustaka kerna pertua, isuruhna kita gelah ‘siusih kiniteken kalak e.’ Tapi, labo  ikatakenna gelah siban manusia jadi peminpinta. (Heb. 13:7) Memang, ikataken Pustaka maka lit piga-piga kalak si perlu ‘iergai,’ erkiteken kalak e nggo “minpin alu mehuli” janah “kerja keras i bas mpeseh ras ngajarken kata Dibata,” labo perban kalak e nggo ipilih Dibata ku surga. (1 Tim. 5:17) Adi nggo lebih perbahanenta man bana janah lebihsa kel sipuji ia, banci kari mela iakapna. * Si parahna ka, banci siban kalak e jadi sombong. (Rom. 12:3) Pasti la ateta erban salah sada turang senina Kristus ngelakoken kesalahen si bage kel beratna!​—Luk. 17:2.

9. Kai buktina maka siergai kalak Kristen si nggo ipilih Jahwe ku surga?

⁹ Kai buktina maka siergai kalak si nggo ipilih Jahwe ku surga? Ula sisungkuni ia uga maka banci itehna maka ia ipilih Dibata. Enda urusen pribadi, emaka labo lit hakta metehsa. (1 Tes. 4:11; 2 Tes. 3:11) Janah ula siakap maka perbulangenna, ndeharana, orang tuana, ntah anggota keluargana si deban pe ikut ka ipilih Dibata. Sekalak jelma ndatken arapen nggeluh i surga labo erkiteken warisen arah keluargana, tapi Dibata si merekenca. (1 Tes. 2:12) Selain si e, ula siban penungkunen si banci erban kitik ukur kalak. Misalna, adi lit sekalak ndehara si perbulangenna ipilih Dibata, ula sisungkuni ia uga perasanna sanga nggeluh rasa lalap pagi i doni tapi la ras perbulangenna. Tek kita maka i bas doni si mbaru pagi, pasti ‘iperiahken Jahwe pusuh kerina si nggeluh.’​—Msm. 145:16.

10. Adi la lebihsa perbahanenta man kalak si deban, enda banci ngelindungi dirinta. Engkai?

¹⁰ Adi la lebihsa perbahanenta man kalak Kristen si nggo ipilih Dibata, enda banci ngelindungi dirinta. Engkai? Sebap nina Pustaka, piga-piga kalak si ipilih ndai banci saja dungna la setia. (Mat. 25:10-12; 2 Pet. 2:20, 21) Adi la lebihsa sipujiken kalak, la mungkin kita jadi “pengikutna,” aminna pe ia kalak si ipilih Dibata, nterem si nandaisa, ntah pe nggo ndekah ngelayani Jahwe. (Jud. 16) Emaka, adi dungna ia la setia ntah pe itadingkenna runggun, tetap kita erkiniteken man Jahwe janah terus silayani Ia.

11. Kai si terjadi bas pudi wari enda kerna jumlah kalak si man roti ras minem anggur bas acara Peringeten?

¹¹ Ertahun-tahun dekahna, jumlah kalak si man roti ras minem anggur bas acara Peringeten reh kurangna. Tapi bas pudi wari enda, jumlahna tambah tiap tahun. Perlu nge kita kuatir kerna si e? Lang. Mari sibahas kai saja alasenna.

12. Engkai maka la perlu kita kuatir kerna jumlah kalak si man roti ras minem anggur bas acara Peringeten?

¹² “Itandai Jahwe kalak si jadi jangNa.” (2 Tim. 2:19) Kalak si ngkira piga jumlah si man roti ras minem anggur bas acara Peringeten, la itehna ise si tuhu-tuhu ipilih Jahwe. Jahwe ngenca si metehsa. Emaka, si termasuk bas jumlah e eme kalak si erpengakap maka ia ipilih Dibata tapi situhuna lang. Misalna, lit si mbarenda man roti ras minem anggur tapi gundari lanai. Si debanna banci saja lit masalah mentalna si erbanca ia erpengakap maka merentah ia pagi ras Kristus i surga. Jelas me, la banci siteh asa kai buena jumlah kalak si ipilih Dibata si lit denga i doni.

13. Lit nge ikataken Pustaka kerna piga jumlah kalak Kristen si nggo ipilih si lit denga i doni sanga kiniseran si mbelin imulai?

 ¹³ Kalak si nggo ipilih Dibata lit denga i doni sanga reh Jesus ngelegi kalak e ku surga. (Mat. 24:31) Ikataken Pustaka maka i bas wari-wari pendungi, lit denga kalak si ipilih Dibata si tading i doni. (Ket. 12:17) Tapi la ikatakenna piga nge jumlah kalak Kristen si nggo ipilih si lit denga i doni sanga kiniseran si mbelin imulai.

14. Arah Roma 9:11, 16, kai si banci sipelajari kerna pemilihen kalak Kristen si ipilih ku surga?

¹⁴ Jahwe si nentuken ndigan ateNa milih kalak si merentah pagi ras Jesus. (Rom. 8:28-30) Kalak e mulai ipilih Jahwe kenca Jesus ipekeke. Bas abad pertama, banci saja kerina kalak Kristen ipilih kesah si badia guna lawes ku surga. Ratusen tahun kenca si e, teremen kalak si ngaku Kristen labo tuhu-tuhu ngikutken Kristus. Amin gia bage, bas masa-masa si e, lit piga-piga kalak si ipilih Jahwe guna lawes ku surga perban tuhu-tuhu ngikutken Kristus. Kalak e bali bagi page si ikataken Jesus si turah i tengah-tengah sesa. (Mat. 13:24-30) Bas wari-wari pendungi, terus ipilih Jahwe ise saja pagi si jadi bagin arah 144.000. * Emaka, adi ipilih Jahwe piga-piga kalak la ndekah ope reh kiniseran si mbelin, la perlu kita sangsi kerna si e. (Baca Roma 9:11, 16.) * Arus kita hati-hati gelah ula bagi kalak si erdahin bas perumpaman si iceritaken Jesus.  Jungut-jungut kalak e kerna perbahanen tuanna man kalak si pudin erdahin.​—Mat. 20:8-15.

15. Kerina nge kalak Kristen si ipilih ku surga jadi bagin i bas “budak si setia janah pentar” bagi si ikataken Matius 24:45-47? Jelasken.

¹⁵ Labo kerina kalak Kristen si ipilih ku surga jadi bagin i bas “budak si setia janah pentar.” (Baca Matius 24:45-47.) Bali bagi bas abad pertama, gundari pe igunaken Jahwe ras Jesus piga-piga dilaki guna mere man ntah pe ngajar nterem kalak. Bas abad pertama, piga-piga kalak ngenca arah kalak si ipilih ku surga si isuruh Jahwe nulis Kitap-Kitap Junani Kristen. Gundari pe, piga-piga kalak ngenca arah kalak si ipilih ku surga si ndatken tanggung jawap guna mereken ‘pangan bas waktu si tepat’ man umat Dibata.

16. Kai si nggo ipelajarindu bas artikel enda?

¹⁶ Kai si nggo sipelajari bas artikel enda? Enggo itetapken Jahwe mereken kegeluhen si rasa lalap i doni man teremen umatNa. Tapi iberekenNa kegeluhen i surga man piga-piga kalak si merentah pagi ras Jesus. Ipasu-pasu Jahwe kerina umatNa, eme “sekalak Jahudi” ras “sepuluh kalak” bas nubuat Sakaria. Ate Jahwe tetap kalak e setia janah isuruhNa kalak e patuh man undang-undangNa. Kerina kalak e arus tetap meteruk ukur. Kerina kalak e arus ras-ras nembah Jahwe janah ersada. Selain si e, arus iusahaken kalak e erban runggun tetap dame. Kiniseran si mbelin nggo reh deherna. Emaka, mbera kerina kita terus ngelayani Jahwe janah siikutken Kristus selaku “sada rarasen.”​—Joh. 10:16.