STODI AATIKL 5
Wi Gwehn Wid Unu
“Wee waahn goh wid unu peepl, bikaa wi don hyaa dat Gaad deh wid unu peepl.”—ZECH. 8:23.
SANG 26 Yu Du It fi Mee
WEH WI WAHN DISKOS? *
Di ada sheep (“ten man”) feel aana fi wership Jehoava lang wid di anointid (“wahn Joo”) (Paragraaf 1-2)
1. Weh Jehoava mi seh mi wahn hapm eena fi wee taim?
JEHOAVA mi seh dat eena fi wee taim: “Ten man owta aala di langwij a di nayshan dehn wahn hoal aan tait, yes, dehn wahn hoal aan tait tu di roab a wahn Joo, di seh: ‘Wee waahn goh wid unu peepl, bikaa wi don hyaa dat Gaad deh wid unu peepl.ʼ” (Zech. 8:23) Di “Joo” weh dis skripcha di taak bowt reprizent dehn wan weh Jehoava anoint bai hoali spirit. Di Baibl aalso kaal dehn “di Izrel a Gaad.” (Gal. 6:16, NW) Di “ten man” reprizent dehn wan weh ga di hoap fi liv fareva pahn ert. Dehn noa dat Jehoava mi chooz dis groop a anointid Kristyanz ahn dehn aalso feel dat da wahn aana fi wership lang wid dehn.
2. How di “ten man” “goh wid” di anointid?
2 Eevn doa ih noh pasabl fi noa di naym a eech anointid brada er sista weh deh pahn ert tudeh, * dehn wan weh hoap fi liv pahn ert ku “goh wid” di anointid. How? Di Baibl seh dat di “ten man” wuda “hoal aan tait tu di roab a wahn Joo, di seh: ‘Wee waahn goh wid unu peepl, bikaa wi don hyaa dat Gaad deh wid unu peepl.ʼ” Di Baibl vers menshan wan Joo. Bot “unu peepl” di rifaa tu moa dan wan persn. Soh dis meenz dat dis Joo da noh wan persn bot di hoal groop a anointid Kristyanz. Di peepl weh noh anointid serv Jehoava lang wid di anointid. Bot, dehn noh si di anointid az dehn leedaz kaaz dehn noa dat Jeezas da dehn Leeda.—Mach. 23:10.
3. Weh kweschanz wi wahn ansa eena dis aatikl?
3 Sins dehn stil ga anointid Kristyanz monks Gaad peepl pahn ert tudeh, som peepl mait di wanda: (1) How anointid Kristyanz shuda vyoo dehnself? (2) If sombadi eena wi kangrigayshan eet di bred ahn jrink di wain da di Memoaryal, how wi shuda chreet dehn? (3) Yu tink wi shuda wori if di amonk a peepl weh eet di bred ahn jrink di wain da di Memoaryal kip di goh op? Dis aatikl wahn ansa dehndeh kweschan.
HOW ANOINTID KRISTYANZ SHUDA VYOO DEHNSELF?
4. Weh waanin da 1 Korintyanz 11:27-29 anointid Kristyanz shuda reeli tink bowt, ahn wai?
4 Anointid bradaz ahn sistaz shuda reeli tink bowt di waanin da 1 Korintyanz 11:27-29. (Reed.) How sombadi weh anointid kud bee gilti er “kyaalis” da di Memoaryal? Dehn wuda bee gilti if dehn neva mi-di liv op tu Jehoava raichos standadz ahn stil eet di bred ahn jrink di wain. (Heeb. 6:4-6; 10:26-29) Anointid Kristyanz noa dat dehn need fi stay faytful ahn kantinyu push fi reech di finishin lain soh dat dehn ku win di praiz. “Da praiz da di laif weh wahn neva en, weh Gaad kaal [dehn] fi geh chroo Krais Jeezas.”—Fil. 3:13-16.
5. How anointid Kristyanz shuda feel bowt dehnself?
5 Jehoava hoali spirit help ih servants fi bee hombl, noh prowd. (Ifee. 4:1-3; Kol. 3:10, 12) Soh anointid Kristyanz noh feel dat dehn beta dan ada peepl. Dehn noa dat Jehoava noh gi anointid wanz moa hoali spirit dan weh ih gi tu ih ada servants. Dehn noh tink dat dehn andastan di Baibl beta dan adaz. Ahn dehn wuda neva tel sombadi els: “Yoo anointid tu, yu shuda staat tu eet di bred ahn jrink di wain da di Memoaryal.” Insted, dehn hombl ahn dehn rekonaiz dat da onli Jehoava invait peepl fi goh da hevn.
6. Akaadn tu 1 Korintyanz 4:7, 8, how anointid Kristyanz shuda bihayv?
6 Eevn doa anointid Kristyanz feel dat da wahn aana fi geh invaitid fi goh da hevn, dehn noh ekspek adaz fi chreet dehn laik dehn impoatant. (Fil. 2:2, 3) Dehn aalso noa dat wen Jehoava mi anoint dehn, hihn neva mek evribadi els noa bowt it. Soh wahn persn weh anointid noh sopraiz if adaz noh bileev dat hihn anointid. Hihn noa dat di Baibl seh dat yu noh fi bee kwik fi bileev if sombadi seh dat Gaad gi dehn wahn speshal rispansabiliti. (Rev. 2:2) Wahn anointid Kristyan wudn waahn peepl gi ahn speshal atenshan. Soh wen ih meet adaz, ih noh tel dehn dat hihn anointid. Ahn fi shoar, ih noh wahn ak bregin bowt it eeda.—Reed 1 Korintyanz 4:7, 8.
7. Weh anointid Kristyanz noh du, ahn wai?
7 Anointid Kristyanz noh feel laik dehn shuda onli spen taim wid ada anointid Kristyanz. Dehn noh chrai fain ada anointid wanz soh dat dehn ku taak bowt how dehn mi geh anointid ahn meet eena groop fi stodi di Baibl. (Gal. 1:15-17) Di kangrigayshan wudn bee yoonaitid if anointid wanz wuda du dehndeh tingz. Dehn wuda di goh gens di hoali spirit, weh akchwali mek Gaad peepl ga pees ahn yooniti monks eech ada.—Roam. 16:17, 18.
HOW WI SHUDA CHREET ANOINTID KRISTYANZ?
Wi noh fi chreet anointid Kristyanz er enibadi weh di tek di leed laik if dehn da selebriti (Paragraaf 8) *
8. Wai yu need fi bee kyaaful bowt di way how yu chreet dehn wan weh eet di bred ahn jrink di wain da di Memoaryal? (Koment pahn di futnoat.)
8 How wi shuda chreet bradaz ahn sistaz weh anointid? Ih wuda bee rang fi admaiya wahn persn tu moch, eevn if da persn da wan a Krais anointid bradaz. (Mach. 23:8-12) Wen di Baibl taak bowt di eldaz, ih inkorij wi fi “chrai ga fayt laik dehn,” bot ih noh tel wi fi mek wahn hyooman wi leeda. (Heeb. 13:7) Da chroo, di Baibl doo seh dat som dizerv “dobl pay.” Bot dis da bikaaz dehn “di du wahn gud werk di leed” ahn dehn “di werk haad di preech ahn di teech,” noh bikaaz dehn anointid. (1 Tim. 5:17) If wi staat tu gi anointid Kristyanz tu moch prayz an atenshan, wi ku mek dehn feel shaym. * Er eevn wers, wi ku mek dehn staat tu geh prowd. (Roam. 12:3) Fi shoar, non a wi wudn waahn du notn fi kaaz wan a Krais breda fi mek wahn mistayk laik dat!—Look 17:2.
9. How wi ku shoa dat wi rispek anointid Kristyanz?
9 How wi ku shoa dat wi rispek dehn wan weh Jehoava anoint? Wi wudn aks dehn how dehn mi geh anointid. Dis da sohnting persnal bitween dehn ahn Jehoava, da non a fi wee bizniz. (1 Tes. 4:11; 2 Tes. 3:11) Ahn wi noh fi tink dat dehn hozban er waif, dehn payrents, er adaz eena dehn famili anointid tu. Wahn persn noh inherit ih hevnli hoap fan ih famili. Insted, da Jehoava giv ahn da hoap. (1 Tes. 2:12) Wi aalso wudn waahn aks kweschanz weh wuda hert adaz. Fi egzampl, wi noh waahn aks di waif a wahn anointid brada how shee feel fi ga di hoap fi liv fareva pahn ert bot widowt ih hozban. Aftaraal, wee ku bee shoar dat eena di nyoo werl, Jehoava wahn “oapm [ih] han ahn gi wi evriting weh wi waahn.”—Ps. 145:16.
10. How wi protek wiself if wi noh chreet sohn peepl laik dehn moa impoatant dan adaz?
10 Wi aalso di protek wiself if wi noh chreet anointid wanz laik if dehn moa impoatant dan adaz. How soh? Di Baibl tel wi dat som peepl weh anointid mait noh stay faytful. (Mach. 25:10-12; 2 Peet. 2:20, 21) Soh wi noh waahn prayz peepl, bot insted, wi waahn kapi dehn fayt. If wi du dat, ih wahn help wi fi noh fala adaz, eevn if da bradaz weh anointid er weh evribadi noa er dehn wan weh di serv Jehoava fi wahn lang taim. (Jood 16) Den, if dehn noh stay faytful er dehn lef di kangrigayshan, wi noh wahn looz wi fayt eena Jehoava er stap serv hihn.
YU TINK WI SHUDA WORI IF DI AMONK A PEEPL WEH EET DI BRED AHN JRINK DI WAIN DA DI MEMOARYAL KIP DI GOH OP?
11. Weh di hapm wid di amonk a peepl weh eet di bred ahn jrink di wain da di Memoaryal?
11 Fi sohn yaaz now, di amonk a peepl weh eet di bred ahn jrink di wain da di Memoaryal mi kip di goh dong. Bot laytli, di amonk a peepl di goh op evri yaa. Yu tink wi need fi wori bowt dis? No, non ataal. Mek wi luk pahn sohn reezn wai wi noh fi wori.
12. Wai wi noh fi wori bowt di amonk a peepl weh eet di bred ahn jrink di wain da di Memoaryal?
12 Jehoava “noa dehn wan weh bilangz tu hihn.” (2 Tim. 2:19) Bot di bradaz weh konk hoo aal eet di bred ahn jrink di wain da di Memoaryal noh noa if dehn reeli anointid er nat. Soh di amonk a peepl inklood dehn wan weh tink dehn anointid bot weh noh reeli anointid. Fi egzampl, sohn peepl weh yoostu eet di bred ahn jrink di wain da di Memoaryal stap du it. Adaz mait ga mental er imoashanal prablemz weh mek dehn bileev dat dehn wahn rool wid Krais da hevn. Dis shoa wi dat wi noh noa egzakli humoch peepl weh anointid stil deh pahn ert.
13. Weh di Baibl seh bowt di amonk a anointid wanz weh wahn stil deh pahn ert wen di grayt chribyulayshan staat?
13 Anointid Kristyanz wahn stil deh pahn ert wen Jeezas kohn fi kehr dehn da hevn. (Mach. 24:31) Di Baibl doo seh dat joorin di laas dayz, dehn wahn stil ga wahn smaal amonk a anointid wanz pahn ert. (Rev. 12:17) Bot ih noh seh humoch a dehn wahn stil deh pahn ert wen di grayt chribyulayshan staat.
How wi fi goh aan if sombadi eet di bred ahn jrink di wain da di Memoaryal? (Paragraaf 14)
14. Weh 2 Timoti 1:9 teech wi bowt wen Jehoava chooz di anointid?
14 Jehoava disaid wen fi chooz hoo hihn wahn anoint. (Roam. 8:28-30) Jehoava mi staat tu anoint peepl afta hihn mi rezorek Jeezas. Ih luk laik eena di taim a di apasl dehn, aal Kristyanz mi anointid. Joorin di yaaz afta dat, moas a dehn wan weh mi klaym fi fala Krais neva mi-di du it. Bot stil, joorin dehn taimz, Jehoava mi-di anoint wahn fyoo weh da-mi chroo Kristyanz. Dehn da-mi laik di weet weh Jeezas mi seh wuda mi groa monks di weed. (Mach. 13:24-30) Joorin dehnya laas dayz, Jehoava stil di chooz peepl weh wahn bee paat a di 144,000. * Soh if Gaad disaid fi chooz som jos bifoa di en a dis sistem, wi mosn dowt fi hihn waiz disizhan. (Reed 2 Timoti 1:9.) * Wi fi bee kyaaful fi noh goh aan laik di werkaz weh Jeezas mi diskraib eena wan a ih iloschrayshan. Dehn mi komplayn bowt di way dehn maasta mi chreet dehn wan weh mi staat tu werk laas.—Mach. 20:8-15.
15. Aala di anointid da paat a “di faytful ahn waiz slayv,” weh Machyu 24:45-47 menshan? Pleez eksplayn yu ansa.
15 Noh evribadi weh ga di hoap fi liv da hevn da paat a “di faytful ahn waiz slayv.” (Reed Machyu 24:45-47, NW.) * Jos laik eena di taim a di apasl dehn, tudeh, Jehoava ahn Jeezas di yooz bradaz fi feed, er teech, lata peepl. Eena di taim a di apasl dehn, onli wahn fyoo anointid Kristyanz mi geh yooz fi rait di Kristyan Greek Skripchaz. Tudeh, onli wahn fyoo anointid Kristyanz ga di rispansabiliti fi gi Gaad peepl “food da di rait taim.”
16. Weh wi mi laan eena dis aatikl?
16 Eena dis aatikl, wi mi laan dat Jehoava mi disaid fi gi evalastin laif pahn ert tu moas a ih peepl an laif da hevn tu di fyoo weh wahn rool wid Jeezas. Jehoava bles aala ih servants—di “Joo” ahn di “ten man”—ahn hihn ekspek dat dehn obay di saym laa dehn ahn stay faytful. Evribadi fi stay hombl. Evribadi fi serv hihn tugeda ahn bee yoonaitid. Ahn aala wi need fi werk haad fi promoat pees monks wi bradaz ahn sistaz. Az wi di geh kloasa ahn kloasa tu di en a dis wikid sistem, mek aala wi kip di serv Jehoava ahn fala Krais az “wan flak.”—Jan 10:16.
^ párr. 5 Dis yaa, di Memoaryal wahn bee pahn Choozdeh, Aypril 7, 2020. If sombadi eena wi kangrigayshan eet di bred ahn jrink di wain da di Memoaryal, how wi shuda chreet dehn? Yu tink wi shuda wori if di amonk a peepl weh eet di bred ahn jrink di wain da di Memoaryal kip di goh op? Dis aatikl wahn ansa dehndeh kweschanz. Ih bays pahn di aatikl weh mi kom owt eena di Janiweri 2016 Watchtower.
^ párr. 2 Akaadn tu Psalm 87:5, 6, eena di fyoocha, Gaad mait menshan di naym a aal hoo di rool wid Jeezas da hevn.—Roam. 8:19.
^ párr. 8 Si di baks “Love ‘Does Not Behave Indecentlyʼ” eena The Watchtower a Janiweri 2016, payj 27.
^ párr. 14 Eevn doa Aks 2:33 shoa dat di hoali spirit mi poar owt chroo Jeezas, da akchwali Jehoava invait eech persn.
^ párr. 14 Fi moa infamayshan, si “Questions From Readers” eena The Watchtower, a May 1, 2007.
^ párr. 15 Machyu 24:45-47: “Hoo reeli da di faytful ahn waiz slayv weh ih maasta chooz fi gi di rispansabiliti fi tek kayr a di servants a fi hihn hows, ahn fi gi dehn dehn food da di rait taim? 46 Da slayv wahn bee hapi if ih maasta kohn bak ahn fain ahn di du ih werk! 47 Bileev mi, ih maasta wahn put ahn in chaaj a evriting els weh ih oan.
SANG 34 Giv Yu Hoal Haat tu Gaad
^ párr. 57 DI PICHA: Imajin if wahn brada an ih waif weh di vizit fahn di hedkwaataz an peepl krowd op rong dehn da wahn kanvenshan fi tek picha. Dat wuda shoa no kaina rispek!
