1. Ka lariñagubei Heowá lasusereduba lan lidan wadaani?

AYANUHATI meha Heowá luagu aban katei le lunbei lasuseredun lidan wadaani. Ariñagati: “Lídanme dan ligía, hárügüdübei diisi terencha ha lílana burí fulasu aban huríu tuéigiñe ladaüragun, hariñagame lun: ‘Busentiwa woudin huma, ladüga aganbatiwa luagu anihein lan Bungiu huma!’” (Sak. 8:23). “Huríu” ligía, mini lan kristiánugu ha lanúadirubaña Bungiu lau sífiri sandu, subudiwatiña giñe kei “Ísüraeli le lani Bungiu” (Gal. 6:16). Ani “diisi terencha”, mini hamá sun ha hemenigibaña hawinwandun lun súnwandan ubouagu. Subudi hamuti Heowá lan anúadirubaliña kristiánugu anuadirúaaña ani ariha hamuti aban lan lueirin chansi háhuduragun lun Bungiu úara hama.

2. Ka mini lubéi houdin diisi terenchana hama kristiánugu anuadirúaaña?

² Lau sun ibidiñewa lan ka lan hiri sun kristiánugu anuadirúaaña ha añahaguabaña uguñe weyu ubouagu, * ha hemenigibaña hawinwandun ubouagu gayaraati ‘houdin’ hama. Ida? Ariñagatu Bíbülia hárügüdüba lan “diisi terencha” tuagu ladaüragun “aban huríu” ábame hariñagun: “Busentiwa woudin huma, ladüga aganbatiwa luagu anihein lan Bungiu huma”. Ayanuhati bérusu le luagu aban huríu, gama lumoun dimurei “huma”, layanuhaña hawagu hóugiñe aban gürigia. Ligíati, mama ábanrügü gürigia “huríu” ligía, mini lan sun kristiánugu anuadirúaaña keisi sétanu. Ha mámabaña anuadirúaaña heseriwiduña lun Heowá úara hama kristiánugu anuadirúaaña. Ligíati marihin hamutiña keisi ábutigu, lugundun subudi hamuti Krísturügüñein lan Hábuti (Mat. 23:10).

3. Kaba burí álügüdahani ounabúa lidan arütíkulu le?

³ Añahagua fiu kristiánugu anuadirúaaña haganagua lubúeingu Bungiu uguñe weyu. Ligíati, háfuga álügüdagua hamá fiu lubúeingu Bungiu houngua: ida luba hasandiragun kristiánugu anuadirúaaña houngua lau anuadirúaaña lan?, ida luba wóuserun  aban íbiri le agumeseruti eiga tídangiñe fein gurá ligía tídangiñe diwéin lidan Aritaguagülei?, lunti san wadiheridun ladüga aganwoundeina hamá sagü irumu ha ariñagubaña anuadirúaaña lan? Lóunabuba álügüdahani burí le lidan arütíkulu le.

4. Ka eweridihani furanguti adarirúbei lidan 1 Korintuna 11:27-29 lunbei gabaroun hamani kristiánugu anuadirúaaña ani ka uagu?

⁴ Lidan 1 Korintuna 11:27-29 dariwati aban eweridihani furanguti houn anuadirúaaña (aliiha huméi). Ida liña gayara lan leigin aban anuadirúaali tídangiñe fein o latun tídangiñe diwéin lidan Aritaguagülei “madünamouga”? Susereti dan le maganbadi lan lun lilurudun Heowá (Ebü. 6:4-6; 10:26-29). Subudi hamuti kristiánugu anuadirúaaña mosu lan úaragua hamá lun gayaraabei lan heresibiruni “le lunbei líchuguni Bungiu sielu lun le agañeiruti, lídangiñe Kristu Hesusu” (Fili. 3:13-16).

5. Ida luba hasandiragun kristiánugu anuadirúaaña houngua lau anuadirúaaña lan?

⁵ Adügati lani Bungiu sífiri sandu lúntima ǘnabugu lan gürigia, mama lúntima lanaagun lungua (Efe. 4:1-3; Kol. 3:10, 12). Ligía masaminarun  habéi kristiánugu anuadirúaaña buídutima hamá hawéi amu. Masaminaruntiña gíbetima lan sífiri sandu líchugun Heowá houn sügǘ hawéi amu lubúeingu. Masaminaruntiña giñe gunfurandatima hamani inarüni le tídanbei Bíbülia hawéi ha híbiri gürigia. Ani maweiyasunbaña giñe ariñaga houn gürigia: “Buguya sun aban giñe anuadirúaali buguya, lunti hamuga beigin tídangiñe fein gurá buguya tídangiñe diwéin lidan Aritaguagülei”. Lubaragiñe lira, ǘnabugutiña ani subudi hamuti Heowárügüñein lan gayara lagunbirahan aban gürigia lun lidin sielun.

6. Según 1 Korintuna 4:7, 8, ida luba hóuserun kristiánugu anuadirúaaña?

⁶ Íbini subudi hamuti lan kristiánugu anuadirúaaña aban lan lubuidun chansi hagunbirahóun lun houdin sielun, magurabahantiña houserún lau aban igaburi espechaliti (Fili. 2:2, 3). Subudi hamuti giñe dan le lan meha lanúadirunbaliña Heowá, madügünti lun hasubudiruni sun gürigia. Ligía maweiridun tubéi hanigi kristiánugu anuadirúaaña dan le hénrengu lan lun aban gürigia lafiñerun luagu anuadirúaali lan. Subudi lumuti ariñaga tan Bíbülia woun moun lumuti lan wafiñerun lau lóufudagun dan le lariñagun aban gürigia rúhali lan Heowá aban buligasion espechaliti lun (Aruf. 2:2). Ani kei le mabusenrun hamá haweiridagüdünu hanigi amu, dan le hasubudirun amu gürigia mariñaguntiña houn anuadirúaaña lan. Mapantahantiña giñe luagu anuadirúaaña lan (aliiha huméi 1 Korintuna 4:7, 8).

7. Ka burí katei madügün habéi kristiánugu anuadirúaaña, ani ka uagu?

⁷ Masaminaruntiña kristiánugu anuadirúaaña lunti lan hásügürün dan hámarügü kristiánugu anuadirúaaña háledigu, kamá hamuga lídanñanu aban sétanu espechaliti. Máluahan hamutiña kristiánugu anuadirúaaña háledigu lun hayanuhan luagu ligaburi hagunbirahóun lun houdin sielun o lun haturiahanu Bíbülia hámagua (Gal. 1:15-17). Lun hamuga hadügüni katei le, mama hamuga hídehaña lun ñein lan úarani lidan damuriguaü. Hadügüña hamuga aban katei le múaranti luma sífiri sandu, erei le layusurubei Bungiu lun ñein lan darangilaü luma úarani hadan lumutuniña (Rom. 16:17, 18).

8. Ka uagu mosu lubéi wóunigiruni ligaburi wóuseruniña kristiánugu anuadirúaaña? (Ariha huméi abürüdǘni).

⁸ Ida luba wóuseruniña kristiánugu anuadirúaaña dandu wügüriña kei würiña? Würibati lun wóuserun somu gürigia, íbini kristiánugu anuadirúaaña, ha líbirigu Kristu, lau aban igaburi espechaliti (Mat. 23:8-12). Dan le layanuhóun hawagu wéiyaaña lidan afiñeni ariñagatu Bíbülia: “Áyeiha huméi hafiñen”.  Gama lumoun, mariñaguntu mosu lan wasigirun aban gürigia (Ebü. 13:7). Inarüni ariñaga tan Bíbülia añahein lan fiú ha ‘lunti inebewa hamá saragu’. Mama ladüga kristiánugu anuadirúaaña lan, ladüga weiri lan hawadigimaridun apurichiha luma arufudaha (1 Tim. 5:17 Lerérun Búngiu to lánina Iséri Darádu). Ánhawa óuseraña kristiánugu anuadirúaaña lau aban igaburi espechaliti, gayaraabei wuriba lan hasandiragun houngua. * Ani létima wuribabei, gayaraabei wadügün lun íñugu lan hanaagun houngua (Rom. 12:3). Ma mabusenruntiwa wadügün lun hafigouhan kristiánugu anuadirúaaña ha? (Luk. 17:2).

9. Ida liña warufuduni inebe hamá kristiánugu anuadirúaaña woun?

⁹ Ida liña warufudun inebesei houn íbirigu ha lanúadirubaña Bungiu? Furumiñe, málügüdün wabaña ida liña lan hanuadirún, ladüga hani lira luma Heowá ani mama wani bísinisi (1 Tesa. 4:11; 2 Tesa. 3:11). Masaminaruntiwa giñe anuadirúaaru lan lani íbiri anuadirúaali weiriou o tani íbiri anuadirúaaru weiriei o anuadirúaaña lan hagübürigu o ha híbiri haduheñu. Mibihínwati lubuidun chansi lun houdin gürigia sielun kei alagan, lúmagiñe Bungiu liabin (1 Tesa. 2:12). Madügüntiwa giñe álügüdahani le adügüti lun hasandiragun houngua wuriba. Kei hénpulu, málügüdün wabóun lani aban kristiánu anuadirúaali weiriou ida liña lan tasandiragun tungua luagu úabei lan tani weiriei tuma ya ubouagu lidan paraísu. Le linarün katei, afiñetiwa líchugubei lan Heowá sun le habusenrubei ha wínwanbaña houn lidan iseri ubóu (Sal. 145:16).

10. Ka uagu moun lumuti lubéi warihiniña gürigia lau saragu uéiriguni?

¹⁰ Luéigiñe le aban oubaü, dan le móuserun wamaniña kristiánugu anuadirúaaña kei gürigia ha súdinitimatiña hawéi amu, góunigiguatiwa woungua. Ida? Ariñagatu Bíbülia gayara lan heferidiruni kristiánugu anuadirúaaña úaragua hamá (Mat. 25:10-12; 2 Fe. 2:20, 21). Ligíati, anhein magaburi wabalin wóuseruniña gürigia lau saragu uéiriguni, maweiyasunbadiwa asigihaña, íbini anuadirúaaña lan, subudiwa hamá o barǘ haaña lan saragu irumu eseriwida lun Heowá (Hud. 16). Ítara, ánhaña adiseda luéi Heowá o luéi damuriguaü meferidirun wabéi wafiñen ani mígirun wabéi giñe weseriwidun lun Heowá.

11. Ka susereelibei lidan luáguti hanumerun ha éigibaña tídangiñe fein ani gurá hagía tídangiñe diwéin lidan Aritaguagülei?

¹¹ Átiri irumu lubaragiñe le, meredeti meha lararirun hanumerun ha éigibaña tídangiñe fein gurá hagía tídangiñe diwéin lidan Aritaguagülei, ánheinti lidan burí lagumuhóun irumu le gánwounguarügütimati. Lunti san wadiheridun luagu katei le? Uá. Ariha wamá saragu resun le lunbei líderaguniwa gunfurandei ka lan uagu.

12. Ka uagu moun lumuti lubéi wadiheridun lau aganwoundeina hamá kristiánugu ha éigitiña tídangiñe fein gurá hagía tídangiñe diwéin lidan Aritaguagülei?

¹² “Subudi lumutiña Wabureme Bungiu lánigu” (2 Tim. 2:19). Subudi lumuti Heowá ka lan anúadira láalibei lumoun le manúadirun lubéi. Ánhañati íbirigu ha abahüdübalin átiriñanu lan éigitiña tídangiñe fein gurá hagía tídangiñe diwéin lidan Aritaguagülei ibidiñeti houn. Abahüdǘwatiña ha asaminarubaña anuadirúaaña lan íbini manuadirúniwa hamá. Kei hénpulu, añahein fiu ha meha éigibaña tídangiñe fein gurá hagía tídangiñe diwéin, guentó madügün hamaali. Añahein amu gayaraati sandi lan hachügü ani aba hasaminarun harúeihaba lan luma Kristu. Ladüga burí katei  le, ibidiñe lubéi woun lau ichouruni átirirügaaña lan kristiánugu anuadirúaaña ubouagu.

13. Ka tariñagubei Bíbülia luagu átiribaña lan kristiánugu anuadirúaaña erederutiña ubouagu danme le lagumeserun óunwenbu asufuriruni?

¹³ Danme le liabin Hesusu lun lanügüniña kristiánugu anuadirúaaña sielun, añaheinbaña lidan saragu fulasu ubouagu. (Mat. 24:31). Inarüni arufudaha tan Bíbülia ñéinbaña lan fiu kristiánugu anuadirúaaña ubouagu lidan lagumuhóun dan (Aruf. 12:17). Gama lumoun, mariñagun tumuti átiribaña lan ubouagu danme le lagumeserun óunwenbu asufuriruni.

14. Ka larufudahabei 2 Timotéu 1:9 luáguti hanuadirún kristiánugu anuadirúaaña?

¹⁴ Heowá anúadirubalin lidaani lanúadiruniña kristiánugu (Rom. 8:28-30). Gumeseti Heowá anúadiraña kristiánugu anuadirúaaña lárigiñe láguyugun Hesusu. Lidan furumiñeti sígulu, genegeti sun lan meha kristiánugu, anuadirúaaña. Lárigiñe, sügüti saragu dan le ídanbei ñein hamá saragu kristiánugu mama inarünitiña. Íbini ítara, anúadirati Heowá fiu kristiánugu ha inarünitiña. Ítara haña meha kristiánugu anuadirúaaña hagía kei türigu le uágubei layanuhan Hesusu le lunbei meha laweiridun laganagua híduru wuribati (Mat. 13:24-30). Lidan lagumuhóun burí dan, anihagua Heowá anúadiraaña ha lúnbaña hadan hamá 144,000. * Ligíati, anhein anúadira Bungiu fiu kristiánugu lubaragiñe lagumuchun ubóu, kátañadiwa lun wálügüdahan ka lan uéigiñe ladügei? (Aliiha huméi 2 Timotéu 1:9). * Mabuseruntiwa wóuserun kei nadagimeintiña ha uágubaña layanuha Hesusu lidan  aban abahüdaguni, ha magundanbaña ladüga aban lan labu lafayeiruniña labureme ichari ha atatirubaña agumuhóuni kei ha gumesegenbaña (Mat. 20:8-15).

15. Ida liña wasubudiruni mama lan sun kristiánugu anuadirúaaña lun lílanabaña lan “musu úaraguati ani gunfuranda ligía” le uágubei layanuhóua lidan Matéu 24:45-47?

¹⁵ Mama sun ha hemenigibaña lun hawinwandun sielu lun lílanabaña lan “musu úaraguati ani gunfuranda ligía” (aliiha huméi Matéu 24:45-47). Ítara kei meha lidan furumiñeti sígulu, uguñe weyu yúsuti Heowá luma Hesusu fiu hádangiñe lubúeingu lun líchugun ariñahani o arufudahani houn saragu. Lidan furumiñeti sígulu, murusunrügüñanu kristiánugu anuadirúaaña layusura Heowá lun labürügüdünun Abürüdǘni Güriegu Kristiánu. Uguñe weyu, fiúrügüñanu kristiánugu anuadirúaaña lau buligasion lun híchugun ariñahani lúmagiñeti Bungiu le ítarabei kei “éigini”.

16. Ka furendei humaalibei lidan arütíkulu le?

¹⁶ Águyuguagüda waméi le wafurendeirubei lidan arütíkulu le. Líchugubei Heowá ibagari magumuchaditi ya ubouagu houn saragu míñunu lubúeingu, ánheinti ibagari sielu líchugubei houn fiu lun houdin arúeiha sielu luma Hesusu. Ruti Bungiu hafayeiruaha sun lubúeingu dandu lun “huríu” kei houn “10 terencha” ani amuriahati hama súngubei lun gaganbadi hamá lun ligiaméme lúrudu ani lun úaragua hamá. Súngubei hagía lunti ǘnabugu hamá luma lun heseriwidun lidan aban. Ani súngubei mosu háfaagun lun ñein lan darangilaü lidan damuriguaü. Eibu dan yarafatimarügadiwa lun lagumuchagüle ubóu, ligíati sigí wama eseriwida lun Heowá ani falá waméi Kristu kamá hamuga lídanñadiwa “aban fárüga” (Huan 10:16).