1. Cosa ya habla si Jehova que sucede na diaton tiempo ahora?

SI Jehova ya habla acerca na diaton tiempo ahora: “Diez hombre que estaba na otro-otro maga lengguaje del maga nacion el agarra con el ropa del un Judio y hay habla: ‘Quierre kame sigui con ustedes, cay ya puede kame oi que el Dios junto con ustedes.’” (Zac. 8:23) El “Judio” ta representa con aquellos con quien ya iscuji el Dios por medio de sagrao espiritu. Ta llama tambien kanila “el Israel del Dios.” (Gal. 6:16) El “diez hombre” ta representa con aquellos quien tiene el esperanza vivi aqui na tierra hasta para cuando. Sabe sila que ta bendici si Jehova con el maga iscujido y ta considera sila como un privilegio que adora con ele junto con el maga iscujido.

2. Na cosa manera el “diez hombre” puede “sigui” con el maga iscujido?

² Maskin pa gendeh posible que sabe con el nombre del cada iscujido aqui na tierra ahora, * aquellos tiene esperanza vivi aqui na tierra puede “sigui” con el maga iscujido. Paquemodo? El Biblia ta habla que el “diez hombre” hay “agarra con el ropa del un Judio y hay habla: ‘Quierre kame sigui con ustedes, cay ya puede kame oi que el Dios junto con ustedes.’” Ya menciona na este versiculo que tiene un Judio. Pero, el palabra “ustedes” ta dale mira que mas de un persona este. Quierre decir, este Judio gendeh lang un persona sino ta representa con el entero grupo del maga iscujido. El maga gendeh iscujido ta sirvi con Jehova junto con este grupo. Pero, gendeh  sila ta mira con el maga iscujido como maga lider ciendo sabe sila que el diila Lider amo si Jesus.​—Mat. 23:10.

3. Cosa maga pregunta el contesta na este articulo?

³ Ciendo tiene pa maga iscujido Cristiano el junto con el maga siervo del Dios ahora, el cuanto posible pregunta: (1) Cosa debe el mirada del maga iscujido na diila mismo cuerpo? (2) Paquemodo debe trata con aquellos quien ta come y ta toma con el maga emblema na Comemoracion? (3) Debe ba kita man lingasa si ta queda manada el quien ta come y ta toma con el maga emblema? Este articulo hay contesta con ese maga pregunta.

4. Cosa aviso el puede incuntra na 1 Corinto 11:27-29 que debe pensa enbuenamente el maga iscujido y porque?

⁴ El maga iscujido debe pensa enbuenamente con el aviso que puede incuntra na 1 Corinto 11:27-29. (Le.) Na cosa manera el un iscujido gendeh conviene toma y come con el maga emblema na Comemoracion? Hay sucede se si gendeh le ta sigui con el maga principio de Jehova. (Heb. 6:4-6; 10:26-29) Sabe el maga iscujido que debe sila esta fiel si quierre sila “saca el premio” que amo el “vida na cielo unido con Cristo Jesus.”​—Fil. 3:13-16.

5. Cosa debe el mirada del maga iscujido na diila mismo cuerpo?

 ⁵ El sagrao espiritu de Jehova ta ayuda con el de suyu maga siervo para queda humilde y gendeh orgulloso. (Ef. 4:1-3; Col. 3:10, 12) Poreso, el maga iscujido gendeh ta pensa que mas bueno sila si compara con otro. Sabe sila que gendeh quierre decir que maga iscujido sila, mas manada sagrao espiritu kanila ta dale si Jehova compara con el de suyu otro maga siervo. Gendeh sila ta pensa que mas ta entende sila con el Biblia compara con otro. Y nunca sila habla con el un persona que iscujido tambien le y debe come y toma con el maga emblema durante el Comemoracion. Sino, sabe sila que si Jehova lang el ta invita con el maga gente para anda na cielo.

6. Asegun na 1 Corinto 4:7, 8, paquemodo debe actua el maga iscujido Cristiano?

⁶ Maskin pa ta sinti el maga iscujido que un privilegio cay ya invita kanila para anda na cielo, gendeh sila ta expecta que trata kanila el otro na especial manera. (Fil. 2:2, 3) Sabe tambien sila que cuando ya iscuji kanila si Jehova, nuay le este manda sabe con otro. Poreso, el un iscujido gendeh ta estraña si el otro gendeh dayun ta creé que un iscujido le. Sabe le que el Biblia ta habla que no dayun creé si tiene quien ta habla que ya dale con ele un especial responsibilidad el Dios. (Rev. 2:2) El un iscujido Cristiano no quierre saca el atencion del otro. Poreso, gendeh le ta habla que iscujido le con aquellos nuevo lang le ya conoce. Y gendeh gayot le man hambug con este con otro.​—Le con el 1 Corinto 4:7, 8.

7. Cosa ta evita hace el maga iscujido y porque?

⁷ El maga iscujido Cristiano gendeh ta pensa que con el maga iscujido lang sila debe man junto, como miembro sila del un especial grupo. Gendeh sila ta busca con el otro maga iscujido para puede sila discuti acerca na diila pagka-iscujido y para man junto estudia con el Biblia. (Gal. 1:15-17) Gendeh queda unido el congregacion si hace sila se. Gane, man contra sila con el sagrao espiritu que amo ta ayuda con el maga siervo del Dios para tiene paz y unidad.​—Roma 16:17, 18.

8. Porque tu necesita queda con cuidao na manera si paquemodo tu ta trata con el maga iscujido? (Mira tambien con el footnote.)

⁸ Paquemodo kita debe trata con el maga iscujido hermano y hermana? Gendeh bueno que sobra el diaton bilib na un persona, maskin pa un iscujido hermano le del Cristo. (Mat. 23:8-12) Cuando el Biblia ya menciona acerca na maga anciano, este ta anima que  “imita [kita] el diila fe.” Pero gendeh se ta habla kanaton que trata con el maskin quien gente como diaton lider. (Heb. 13:7) Deverasan, el Biblia ta habla que el otro conviene ricibi “doble honor.” Pero, por causa este cay “ta hace [sila] el diila trabajo embuenamente” y gendeh cay iscujido sila. (1 Tim. 5:17) Si dale kita sobra alabanza y atencion con el maga iscujido, baka tiene sila huya. * O mas grabe pa, puede kita causa kanila para queda orgulloso. (Roma 12:3) Nuay ni uno kanaton el quierre hace maskin cosa que posible causa con el un iscujido hermano del Cristo para hace un serioso kamali!​—Luc. 17:2.

9. Paquemodo kita puede dale mira que ta respeta kita con el maga iscujido?

⁹ Paquemodo kita puede dale mira que ta respeta kita con el maga iscujido? Gendeh kita pregunta si paquemodo sila ya queda iscujido. Un personal cosa este que nuay kita derecho para sabe. (1 Tes. 4:11; 2 Tes. 3:11) Y gendeh kita debe pensa que iscujido tambien el diila marido o mujer, diila mayores o otro miembro del diila familia. Gendeh ta queda iscujido el un persona por causa na de suyu familia. Ya ricibi le este estaba con Dios. (1 Tes. 2:12) Debe tambien kita evita pregunta que puede hace sinti duele con otro. Por ejemplo, gendeh kita pregunta con el mujer del un iscujido hermano si cosa le ta sinti acerca na vida hasta para cuando aqui na tierra que nuay de suyu marido. Puede gayot kita asigura que na nuevo mundo, si Jehova hay “satisfecha el deseo del todo vivo.”​—Sal. 145:16.

10. Paquemodo kita protege con el diaton mismo cuerpo si evita kita “alaba con el maga gente”?

¹⁰ Si gendeh kita trata con el maga iscujido como mas importante contra con otro, ta protege kita con el diaton mismo cuerpo. Paquemodo? El Biblia ta habla que el cuanto del maga iscujido posible gendeh esta fiel. (Mat. 25:10-12; 2 Ped. 2:20, 21) Si evita kita “alaba con el maga gente,” gendeh kita sigui con otro, maskin con aquellos maga iscujido o bien conocido o aquellos quien ya sirvi con Jehova por largo tiempo. (Jud. 16) Poreso, si nuay sila esta fiel o ya deja con el congregacion, gendeh perde el diaton fe con Jehova o descanza sirvi con ele.

11. Cosa ta sucede con el numero de aquellos quien ta come y ta toma con el maga emblema na Comemoracion?

¹¹ Por cuanto año, ta abaja el numero del quien ta come y ta toma con el maga emblema na Comemoracion. Pero na reciente maga año, ta omenta este cada año. Debe ba kita man lingasa acerca con ese? Gendeh. Aprende kita si porque gendeh kita debe man lingasa.

12. Porque gendeh kita debe man lingasa acerca na numero de aquellos quien ta come y ta toma con el maga emblema na Comemoracion?

¹² “[Si Jehova] conoce con el disuyo maga gente.” (2 Tim. 2:19) Gendeh igual con Jehova, el maga hermano quien ta cunta si cuanto el ya come y ya toma con el maga emblema na Comemoracion no sabe si quien el deverasan iscujido. Poreso, incluido na numero aquellos quien ta pensa que iscujido sila pero gendeh. Por ejemplo, el cuanto quien ta come y ta toma con el maga emblema ya descanza na uliji. El otro posible tiene problema na pensamiento y ta creé que hay rula sila junto con el Cristo na cielo. Poreso, claro que no sabe kita  el exacto numero del maga iscujido que taqui pa na tierra.

13. Ya habla ba el Biblia si cuanto iscujido el taqui pa na tierra si principia el grande tribulacion?

¹³ Hay tiene maga iscujido na manada parte del tierra cuando vene y saca kanila si Jesus para na cielo. (Mat. 24:31) El Biblia ta habla que na ultimo maga dia, tiene pa cuanto maga iscujido aqui na tierra. (Rev. 12:17) Pero, nuay este habla si cuanto iscujido el taqui na tierra si principia el grande tribulacion.

14. Como cosa ya dale mira na Roma 9:11, 16, cosa kita debe entende acerca na iscujida de maga iscujido?

¹⁴ Si Jehova el ta decidi si cuando le iscuji con el maga iscujido. (Roma 8:28-30) Ya principia iscuji si Jehova con el maga iscujido despues resucita con Jesus. Posible del primer siglo, iscujido el todo verdadero Cristiano. Na maga año despues de ese, mayoria de aquellos quien ta clama que Cristiano sila, gendeh gayot ta sigui con el Cristo. Maskin pa ansina, durante ese maga año, si Jehova ya iscuji por medio de sagrao espiritu con el cuanto verdadero Cristiano. Igual sila con el trigo que ya habla si Jesus que hay crici junto con el maga sahbut. (Mat. 13:24-30) Durante del ultimo maga dia, si Jehova ta continua iscuji maga gente quien queda parte del 144,000. * Poreso, si decidi el Dios que iscuji cuanto de ese cuando bien cerca ya el fin, asigurao que gendeh kita cuestiona con el de suyu sabeduria. (Le con el Roma 9:11, 16.) * Debe con cuidao kita que gendeh queda igual con el  maga trabajador que ya discuti si Jesus na uno del de suyu maga ilustracion. Ya reclama sila acerca si paquemodo ya trata diila amo con aquellos ya trabaja na ultimo hora.​—Mat. 20:8-15.

15. Todo ba del maga iscujido parte del “fiel y sabio esclavo” que ya menciona na Mateo 24:45-47? Explica.

¹⁵ Gendeh todo de aquellos quien tiene esperanza vivi na cielo el parte del “fiel y sabio esclavo.” (Le con el Mateo 24:45-47, NWT.) Igual del primer siglo, si Jehova y si Jesus ahora ta usa cuanto maga hermano para dale come o enseña con otro. Cuanto iscujido Cristiano lang el ya usa del primer siglo para escribi con el Cristiano Griego Escritura. Ahora, cuanto maga iscujido Cristiano lang el tiene responsibilidad para dale “comida na justo tiempo” con el maga siervo del Dios.

16. Cosa tu ya aprende na este articulo?

¹⁶ Cosa kita ya aprende na este articulo? Si Jehova ya decidi que dale vida eterna con el mayoria del maga gente aqui na tierra y vida na cielo con el cuanto quien hay rula junto con Jesus. Si Jehova ta premia con el todo de suyu siervo​—el “Judio” y el “diez hombre”—​y debe kita obedece igual ley y esta fiel. Todo kita debe esta humilde. Todo debe sirvi con ele y queda unido. Y todo kita debe hace manera para tiene paz na congregacion. Mientras ta queda cerca el fin, ojala continua kita todo sirvi con Jehova y sigui con el Cristo como un grupo.​—Juan 10:16.