1. Unsay gitagna ni Jehova bahin sa atong panahon?

SI Jehova nagtagna bahin sa atong panahon: “[Napulo] ka tawo gikan sa tanang pinulongan sa mga nasod ang mogunit pag-ayo sa sinina sa usa ka Hudiyo, ug moingon: ‘Gusto ming mouban ninyo, kay nakadungog mi nga ang Diyos nagauban kaninyo.’” (Zac. 8:23) Ang “Hudiyo” nagrepresentar niadtong gidihogan sa Diyos pinaagi sa balaang espiritu. Gitawag sab sila ug “Israel sa Diyos.” (Gal. 6:16) Ang “10 ka tawo” nagrepresentar niadtong dunay paglaom nga mabuhi sa walay kataposan dinhi sa yuta. Nahibalo sila nga gipili ni Jehova ang maong grupo sa mga dinihogan ug gibati nila nga pribilehiyo ang pagsimba kang Jehova uban kanila.

2. Sa unsang paagi ang “10 ka tawo” “mouban” sa mga dinihogan?

² Bisag imposibleng mahibaloan ang ngalan sa kada usa sa mga dinihogan karon sa yuta, * kadtong naglaom nga mabuhi sa yuta mahimong “mouban” kanila. Sa unsang paagi? Ang Bibliya nag-ingon nga ang “10 ka tawo” “mogunit pag-ayo sa sinina sa usa ka Hudiyo, ug moingon: ‘Gusto ming mouban ninyo, kay nakadungog mi nga ang Diyos nagauban kaninyo.’” Ang teksto naghisgot ug usa ka Hudiyo. Pero ang mga pulong nga “ninyo” ug “kaninyo” nagpasabot nga dili siya usa lang ka tawo. Busa, kini nga Hudiyo nagrepresentar sa tibuok grupo sa mga dinihogan. Kadtong dili dinihogan nag-alagad kang Jehova kauban sa mga dinihogan. Pero wala nila isipa ang mga dinihogan ingong lider, kay nahibalo sila nga si Jesus ang ilang Lider.​—Mat. 23:10.

3. Unsang mga pangutana ang tubagon niining artikuloha?

³ Kay naa pa may mga dinihogan nga kauban sa katawhan sa  Diyos karon, ang uban tingali mangutana: (1) Unsay angayng panglantaw sa mga dinihogan sa ilang kaugalingon? (2) Unsaon nato pagtratar kadtong makig-ambit sa mga emblema sa Memoryal? (3) Angay ba tang mabalaka kon magkadaghan ang makig-ambit? Tubagon kana niining artikuloha.

4. Unsang pasidaan diha sa 1 Corinto 11:27-29 ang angay nga seryosong hunahunaon sa mga dinihogan, ug ngano?

⁴ Ang mga dinihogan angay nga seryosong maghunahuna sa pasidaan sa 1 Corinto 11:27-29. (Basaha.) Sa unsang paagi ang usa ka dinihogan makaambit nga “dili takos” panahon sa Memoryal? Mahitabo kana kon siya mokaon ug moinom sa mga emblema pero wala siya magkinabuhi subay sa matarong nga mga sukdanan ni Jehova. (Heb. 6:4-6; 10:26-29) Ang mga dinihogan nahibalo nga angay silang magpabiling matinumanon aron ilang madawat ang “ganti nga kinabuhi sa langit nga ihatag sa Diyos niadtong iyang gitawag pinaagi ni Kristo Jesus.”​—Filip. 3:13-16.

5. Unsay angayng panglantaw sa mga dinihogan sa ilang kaugalingon?

⁵ Ang balaang espiritu ni Jehova nagtabang  sa iyang katawhan nga mahimong mapainubsanon, dili garboso. (Efe. 4:1-3; Col. 3:10, 12) Busa ang mga dinihogan dili maghunahuna nga mas maayo sila kay sa uban. Nahibalo sila nga dili tungod kay dinihogan sila, gihatagan na sila ni Jehova ug mas daghang balaang espiritu kay sa ubang alagad. Dili sila maghunahuna nga mas lawom silag pagsabot sa mga kamatuoran sa Bibliya kay sa uban. Ug dili gyod nila ingnon ang uban nga dinihogan sab sila ug kinahanglan silang makig-ambit sa Memoryal. Hinunoa, mapainubsanon nilang giila nga si Jehova lang ang magdapit sa mga tawo sa pag-adto sa langit.

6. Sumala sa 1 Corinto 4:7, 8, sa unsang paagi angayng mogawi ang mga dinihogan?

⁶ Bisag gibati sa mga dinihogan nga usa ka pribilehiyo nga gidapit silang moadto sa langit, dili sila magdahom nga trataron sila sa uban sa espesyal nga paagi. (Filip. 2:2, 3) Nahibalo sab sila nga dihang gidihogan sila ni Jehova, wala niya pahibaloa ang uban bahin niini. Busa ang usa ka dinihogan dili matingala kon ang uban dili dayon motuo nga siya gidihogan. Nahibalo siya nga ang Bibliya nag-awhag nga dili ta angayng motuo dayon kon dunay moingon nga gihatagan siya sa Diyos ug espesyal nga responsibilidad. (Pin. 2:2) Kay dili niya gustog espesyal nga atensiyon, dili sultihan sa usa ka dinihogan kadtong iyang makaila sa unang higayon nga dinihogan siya. Ug dili pod siya manghambog bahin niana.​—Basaha ang 1 Corinto 4:7, 8.

7. Unsay dili buhaton sa mga dinihogan, ug ngano?

⁷ Ang mga dinihogan dili maghunahuna nga sa mga dinihogan lang sila angayng makig-uban, nga mora bag membro sila sa usa ka espesyal nga grupo. Dili nila pangitaon ang ubang dinihogan aron magkaestoryahay bahin sa ilang pagkahimong dinihogan o aron magpormag pribadong grupo sa pagtuon sa Bibliya. (Gal. 1:15-17) Ang kongregasyon dili magkahiusa kon himoon ni sa mga dinihogan. Supak kana sa paglihok sa balaang espiritu, nga nagtabang sa katawhan sa Diyos nga magmalinawon ug magkahiusa.​—Roma 16:17, 18.

8. Nganong angay kang magbantay sa imong paagi sa pagtratar niadtong makig-ambit sa mga emblema sa Memoryal? (Tan-awa sab ang footnote.)

⁸ Unsaon nato pagtratar ang dinihogan natong mga igsoon? Sayop gyod kon sobra kaayo ang atong pagdayeg sa usa ka tawo, bisan pag siya dinihogang igsoon sa Kristo. (Mat. 23:8-12) Dihang maghisgot ang Bibliya bahin  sa mga ansiyano, kini nagdasig kanato nga ‘sundogon ang ilang pagtuo,’ pero wala ni mag-ingon nga himoon natong lider ang si bisan kinsang tawo. (Heb. 13:7) Tinuod, ang Bibliya nag-ingon nga ang pipila “takos sa dobleng pasidungog.” Pero tungod ni kay sila “nagdumala sa maayong paagi” ug “naghago sa pagpanulti ug pagpanudlo,” dili tungod kay sila dinihogan. (1 Tim. 5:17) Kon hatagan nato ang mga dinihogan ug sobrang pagdayeg ug atensiyon, basin maulaw sila. * O mas grabe pa, basig kitay hinungdan nga mahimo silang mapahitas-on. (Roma 12:3) Dili gyod nato gustong mobuhat ug bisan unsa nga tungod niana makahimo na hinuog seryosong sala ang usa ka dinihogang igsoon sa Kristo.​—Luc. 17:2.

9. Unsaon nato pagpakita nga gitahod nato ang mga dinihogan?

⁹ Unsaon nato pagpakita nga gitahod nato ang mga gidihogan ni Jehova? Dili nato sila pangutan-on kon giunsa sila pagdihog. Personal kini nga butang, ug wala tay katungod nga mahibalo bahin niana. (1 Tes. 4:11; 2 Tes. 3:11) Ug dili ta magdahom nga mga dinihogan sab ang ilang bana o asawa, ginikanan, o ubang membro sa pamilya. Ang paglaom nga mabuhi sa langit wala nila mapanunod gikan sa pamilya. Ila ning nadawat gikan sa Diyos. (1 Tes. 2:12) Likayan sab nato ang makapasakit nga mga pangutana. Pananglitan, dili nato pangutan-on ang asawa sa usa ka dinihogan kon unsay iyang pagbati nga mabuhi siya sa walay kataposan sa yuta nga dili kauban ang iyang bana. Segurado ta nga sa bag-ong kalibotan, ‘tagbawon ni Jehova ang tinguha sa tanang buhing linalang.’​—Sal. 145:16.

10. Sa unsang paagi maprotektahan ta kon likayan nato ang ‘pagdayeg ug mga personalidad’?

¹⁰ Kon dili nato trataron ang mga dinihogan nga mas importante sila kay sa uban, maprotektahan sab nato ang atong kaugalingon. Ngano? Ang Bibliya nag-ingon nga ang pipila ka dinihogan tingali dili magmatinumanon. (Mat. 25:10-12; 2 Ped. 2:20, 21) Pero kon likayan nato ang ‘pagdayeg ug mga personalidad,’ dili gyod ta magsunodsunod sa uban, bisan sa mga dinihogan o sa iladong mga igsoon o sa dugay nang mga alagad ni Jehova. (Jud. 16, footnote) Busa kon dili sila magmatinumanon o mobiya sila sa kongregasyon, dili ta mawad-ag pagtuo kang Jehova o mohunong sa pag-alagad kaniya.

11. Unsay nagakahitabo sa gidaghanon sa mga nakig-ambit panahon sa Memoryal?

¹¹ Sa daghang katuigan, nagkadiyutay ang nakig-ambit panahon sa Memoryal. Pero sa di pa dugay, nagkadaghan sila kada tuig. Angay ba tang mabalaka niini? Dili. Atong hisgotan kon ngano.

12. Nganong dili ta angayng mabalaka bahin sa gidaghanon sa mga nakig-ambit panahon sa Memoryal?

¹² “Si Jehova nakaila sa mga iyaha.” (2 Tim. 2:19) Dili sama kang Jehova, ang mga brader nga nag-ihap sa mga nakig-ambit panahon sa Memoryal wala mahibalo kon kinsay tinuod nga dinihogan. Busa apil sa ihap kadtong naghunahuna nga dinihogan sila pero dili diay. Pananglitan, ang pipila nga nakig-ambit kaniadto mihunong sa ulahi. Ang uban lagmit may sakit sa pangisip o emosyon mao nga nagtuo sila nga magmando sila uban sa Kristo didto sa langit. Klaro nga wala ta mahibalo kon pila gyoy dinihogan nga nahibilin sa yuta.

13. Giingon ba sa Bibliya kon pila ka dinihogan ang mahibilin sa yuta inigsugod sa dakong kasakitan?

 ¹³ Dunay mga dinihogan sa daghang dapit sa yuta dihang moabot si Jesus sa pagdala kanila sa langit. (Mat. 24:31) Ang Bibliya nag-ingon nga sa kataposang mga adlaw, diyutay na lang ang mga dinihogan nga mahibilin sa yuta. (Pin. 12:17) Pero wala ni mag-ingon kon pilay mahibilin inigsugod sa dakong kasakitan.

14. Sumala sa Roma 9:11, 16, unsay kinahanglan natong masabtan bahin sa pagpilig mga dinihogan?

¹⁴ Si Jehova ang magdesisyon kon kanus-a siya magpilig mga dinihogan. (Roma 8:28-30) Gisugdan ni Jehova ang pagpilig mga dinihogan human mabanhaw si Jesus. Dayag nga sa unang siglo, ang tanang tinuod nga mga Kristohanon mga dinihogan. Sa misunod nga gatosan ka tuig, kadaghanan niadtong nangangkon nga mga Kristohanon wala gyod magsunod sa Kristo. Bisan pa niana, niadtong panahona, gidihogan ni Jehova ang pipila nga tinuod nga Kristohanon. Parehas sila sa mga trigo nga giingon ni Jesus nga motubo taliwala sa mga bunglayon. (Mat. 13:24-30) Sa kataposang mga adlaw, si Jehova padayong nagpilig mga tawo nga mahimong bahin sa 144,000. * Busa kon ang Diyos modesisyon nga mopilig pipila sa hapit na gyod ang kataposan, dili nato angayng kuwestiyonon ang iyang kaalam. (Basaha ang Roma 9:11, 16.) * Magbantay ta nga dili ta mahisama sa mga mamumuo diha sa usa sa mga ilustrasyon ni  Jesus. Nagreklamo sila sa gihimo sa tag-iya sa ubasan ngadto sa mga mamumuo nga ulahi nang misugod pagtrabaho.​—Mat. 20:8-15.

15. Ang tanan bang dinihogan bahin sa “matinumanon ug maalamong ulipon,” nga gihisgotan sa Mateo 24:45-47? Ipatin-aw.

¹⁵ Dili tanang dunay paglaom nga moadto sa langit ang bahin sa “matinumanon ug maalamong ulipon.” (Basaha ang Mateo 24:45-47.) Sama sa unang siglo, si Jehova ug Jesus naggamit karon ug pipila ka brader sa pagpakaon, o pagtudlo, sa daghan. Pipila lang ka dinihogang Kristohanon sa unang siglo ang gigamit sa pagsulat sa Kristohanon Gregong Kasulatan. Karon, pipila lang ka dinihogan ang may responsibilidad sa paghatag sa katawhan sa Diyos ug “pagkaon sa hustong panahon.”

16. Unsay imong nakat-onan niining artikuloha?

¹⁶ Unsay gitudlo kanato niining artikuloha? Si Jehova nakadesisyon nga hatagag walay kataposang kinabuhi sa yuta ang kadaghanan sa iyang katawhan ug hatagag kinabuhi sa langit ang pipila nga magmando uban ni Jesus. Si Jehova naghatag ug ganti sa tanan niyang mga alagad​—sa “Hudiyo” ug sa “10 ka tawo”—​ug gisugo niya sila nga mosunod sa samang mga balaod ug magpabiling matinumanon. Ang tanan kinahanglang magmapainubsanon. Ang tanan kinahanglang magkahiusa sa pag-alagad kaniya. Ug ang tanan kinahanglang maningkamot nga mahuptan ang kalinaw sa kongregasyon. Samtang magkaduol ta sa kataposan, hinaot nga kitang tanan padayong mag-alagad kang Jehova ug mosunod sa Kristo ingong “usa ka panon.”​—Juan 10:16.