EKICWEKA C’OKWEGA 5
Nitugenda n’iwe
‘Ka tugende n’iwe, ahabw’okuba tuhurire ku Ruhanga ari hamwe n’imwe.’—ZEK 8:23.
ECESHONGORO CA 26 Niinye Mwabikoreire
EMPINYE *
Ab’entama ezindi (“abantu ikumi”) nibashemererwa kuhereza Yehova n’abashukirweho omwika (“Omuyudaaya”) (Reba paragurafu ya 1-2)
1. Ni enki eki Yehova yagambire ecabire kirije kubaho omuri obu bwire?
YEHOVA akaba yagambire aha bwire obu turimu nagira ati: ‘Abantu ikumi abari kuruga omu mahanga aga buri rurimi, baryakwata omukugiro gw’ekanzu y’Omuyudaaya, bamugire bati: “Ka tugende n’iwe; ahabw’okuba tuhurire ku Ruhanga ari hamwe n’imwe.”’ (Zek 8:23) “Omuyudaaya” namanyisa abu Yehova yashukireho omwika oguri kwera. Nambwenu nibetwa ‘Abaisraeli ba Ruhanga.’ (Gal 6:16) “Abantu ikumi” nibamanyisa abine amasiko g’okwija kutura omu nsi ebiro byona. Nibamanya ku Yehova yahire omugisha abashukirweho omwika kandi nibagutwara nk’omugisha okwekwatanisa na bo omu kumuramya.
2. Ni bata oku “abantu ikumi” ‘bari kugenda’ n’abashukirweho omwika oguri kwera?
2 N’obu tutari kubasa kumanya amazina g’abashukirweho omwika bona abacari omu nsi, * abine amasiko g’okutura omu nsi ‘nibagenda’ hamwe na bo. Bata shi? Bibuli negamba ku “abantu ikumi” babire barije ‘kukwata omukugiro gw’ekanzu y’Omuyudaaya, bakamugira bati: “Ka tugende n’iwe; ahabw’okuba tuhurire ku Ruhanga ari hamwe n’imwe.”’ Bibuli negamba aha Muyudaaya omwe. Konka ebigambo “iwe” hamwe na “imwe” nibimanyisa abantu bingi. Eco nikimanyisa ku Omuyudaaya atari omuntu omwe kusha ahobwe ku nageranisa omutwe gw’abashukirweho omwika. Abakristo abatarashukirweho omwika nibakora hamwe n’abashukirweho omwika. Konka, tibari kureba abashukirweho omwika nk’abebembezi babo, ahabw’okuba nibamanya ku Yesu ari we mwebembezi wabo.—Mat 23:10.
3. Ni biha bibuzo ebi twaza kushwijuma omuri eki kicweka?
3 Ahabw’okugira ngu hariho abashukirweho omwika abacari omu nsi, hine abari kubasa kwebuza ngu: (1) Abashukirweho omwika bashemerire kwereba bata? (2) Ni bata oku tushemerire kureba abari kurya aha bigeraniso? (3) Mbehi tushemerire kwemereza omutima twareba omubaro gw’abashukirweho omwika guri kugumizamu kweyongera? Eki kicweka caza kugarukamu ebyo bibuzo.
ABASHUKIRWEHO OMWIKA BASHEMERIRE KWEREBA BATA?
4. Ni kuha kurabura okuri omu 1 Bakorinso 11:27-29 oku abashukirweho omwika bashemerire kutekatekaho munonga, kandi ahabw’enki?
4 Abashukirweho omwika bashemerire kutekateka munonga aha kurabura okuri omu 1 Bakorinso 11:27-29. (Hashome.) Ni bata oku omuntu owashukirweho omwika ari kubasa kurya aha bigeraniso ‘nk’oku kitashemerire’? Eco nikibasa kubaho ku ari kurya aha bigeraniso konka atari kugendera aha misinge ya Bibuli. (Heb 6:4-6; 10:26-29) Abashukirweho omwika nibamanya ku bashemerire kugumizamu kuba abesigwa baba bari kwenda kutunga ‘ekihembo ec’okweta kwa Ruhanga omuri Kristo Yesu okw’okuza omu iguru.’—Fil 3:13-16.
5. Abashukirweho omwika bashemerire kwereba bata?
5 Omwika gwa Yehova oguri kwera nigutuma abahereza beye baba abacurezi; tiguri kutuma bayetungura. (Efe 4:1-3; Kol 3:10, 12) Ni yo nshonga abashukirweho omwika batari kutekateka ku nibakira abandi. Nibamanya ku Yehova atari kubaha omwika oguri kwera mwingi kukira abandi bahereza beye. Tibari kutekateka ku bashoborokirwe Bibuli kusinga abandi. Tibashemerire kugambira ondijo muntu ku na we yashukirweho omwika kandi ku ashemerire kutandika kurya aha bigeraniso. Ahobwe, nibecureza bijuka ku Yehova ari we ori kutorana abantu abaritura omu iguru.
6. Tukuratize ebiri omu 1 Bakorinso 4:7, 8, ni bata oku Abakristo abashukirweho omwika bashemerire kwetwara?
6 N’obu abashukirweho omwika bari kureba kuza omu iguru nk’omugisha, tibari kwenda ngu abandi babarebe nk’ab’omutano. (Fil 2:2, 3) Kandi nibamanya ngu obu Yehova yabatorine tarabigambire abandi bantu. Obwe rero owashukirweho omwika tikiri kumutangaza abandi bayanga kwikiriza ku yagushukirweho. Nibamanya ku Bibuli eri kutugambira ngu tutarahuka kwikiriza omuntu wena ori kugamba ngu Ruhanga amuhire omurimo g’omutano. (Kush 2:2) Omukristo owashukirweho omwika tashemerire kwetungura ari kugambira omuntu owu babugana ku yashukirweho omwika. Kandi tashemerire kukiratira abandi.—Shoma omu 1 Bakorinso 4:7, 8.
7. Ni enki eki abashukirweho omwika bari kwerinda kukora, kandi ahabw’enki?
7 Abashukirweho omwika tibari kutekateka ku bashemerire kumara obwire n’abandi abashukirweho omwika kusha, ngu berebe nk’ab’omutano. Tibari kuronda abandi abashukirweho omwika kugira ngu baganire aha masiko gabo, ninga shi ngu bakore omutwe gwabo g’okwega Bibuli. (Gal 1:15-17) Abashukirweho omwika bakozire ebyo bintu, bikatuma ekibina cacwekamu ebicweka. Bakaba barwanisa omwika oguri kwera ogu Ruhanga ari kukoresa ngu abahereza beye bagire obusinge n’obumwe.—Rom 16:17, 18.
NI BATA OKU TUSHEMERIRE KUREBA ABASHUKIRWEHO OMWIKA?
Titushemerire kureba abashukirweho omwika ninga shi abandi abine obujunanizibwa nk’ab’omutano (Reba paragurafu ya 8) *
8. Ahabw’enki tushemerire kwetonda aha ku turi kureba abari kurya aha bigeraniso? (Reba n’obugambo bw’aha nsi.)
8 Ni bata oku tushemerire kureba benetata na banyanyazi abashukirweho omwika? Nikiba kitahikire kuha ekitinisa kirengire omuntu wena, n’obu yakuba mwenishe wa Kristo. (Mat 23:8-12) Bibuli ku eri kugamba aha bareberezi, netuhiga ‘kutoreza okwikiriza kwabo,’ konka teri kutugambira ngu tugire omuntu wena omwebembezi witu. (Heb 13:7) Ni amazima, Bibuli netugambira ku hine abu tushemerire ‘kuha ekitinisa kingi okukira abandi.’ Eco nitukikora ahabw’okuba ‘nibatutegeka ge’ kandi ‘bakora omurimo g’okuburira n’okwegesa’; tituri kukikora ahabw’okugira ngu bakashukwaho omwika. (1 Tim 5:17) Ku turi kuhimbisa ekirenga abashukirweho omwika nikituma batayehurira ge. * Kandi tukaba twabahemukira, twatuma bayetungura. (Rom 12:3) Tituri kwenda kukora ekintu cona ekiri kubasa kutuma mwenishe wa Kristo yakora enshobe nk’eyo.—Luk 17:2.
9. Ni bata oku turi kubasa kwereka ku nituha ekitinisa Abakristo abashukirweho omwika?
9 Ni bata oku turi kubasa kwereka ku nituha ekitinisa abu Yehova yashukireho omwika? Titushemerire kubabuza oku bashukirweho omwika. Eryo ni ibanga ryabo eri tutashemerire n’okumanya. (1 Tes 4:11; 2 Tes 3:11) Kandi titushemerire kutekateka ngu abashija babo ninga abakazi babo, abazire babo ninga shi n’abandi banyabuzare babo, ngu na bo bashukirweho omwika. Ab’omu ka yitu ti bo bari kuturaga ogo mugisha. Ruhanga ni we ari kugugaba. (1 Tes 2:12) Nambwenu tushemerire kwerinda kubuza ebibuzo ebiri kubasa kugwisa kubi abandi. Ecokureberaho: Titushemerire kubuza omukazi oyine omushija owashukirweho omwika oku ari kwehurira yatekateka ku arije kutura wenka omu nsi ebiro byona atari n’omushija weye. Tushemerire kwesiga tutari kubanganisa ngu omu nsi ensya, Yehova naza ‘kuhazya ekintu cona ekihurire ebi kiri kwetenga.’—Zab 145:16.
10. Ni bata oku kwerinda ‘kuha abantu ekitinisa’ kiri kuturinda?
10 Twayerinda kuha abashukirweho omwika ekitinisa ekiri kukira ec’abandi, n’itwe nituba twayerinda. Bata? Bibuli netugambira ku abashukirweho omwika abamwe batari kuguma bari abesigwa. (Mat 25:10-12; 2 Pet 2:20, 21) Konka ku turi kwerinda ‘kuha abantu ekitinisa,’ titurikurata omuntu wena, n’obu yakuba oshukirweho omwika ninga shi omuntu omazire obwire buringwa ari kuhereza Yehova. (Yud 16) Ku bari kuruga omu kibina ninga shi bakaremwa kuguma bari abesigwa, titurireka kwesiga Yehova ninga shi ngu tureke kumuhereza.
TITUSHEMERIRE KWEMEREZA OMUTIMA
11. Ni enki ecagenzire nikibaho aha mubaro gw’abari kurya aha bigeraniso?
11 Omu myaka eyahwire, omubaro gw’abari kurya aha bigeraniso gukaguma nigushuma. Konka omu myaka ya juba, omubaro gw’abari kurya aha bigeraniso guri kugumizamu nigweyongera. Mbwenu shi eco kishemerire kutwemereza omutima? Ingaha. Twaza kushwijuma ebintu ebi tushemerire kuguma nitwijuka.
12. Ahabw’enki tutashemerire kwemereza omutima twareba omubaro gw’abantu abari kurya aha bigeraniso guri kweyongera?
12 ‘[Yehova] namanya abe.’ (2 Tim 2:19) Benetata abari kubara abari kurya aha bigeraniso aha Kijusyo, nibaba batari kumanya abashukirweho omwika by’amazima; Yehova ni we wenka ori kubamanya. Obwe rero ogo mubaro niguba gurimu n’abari kutekateka ngu bashukirweho omwika konka batagushukirweho. Ecokureberaho: Bamwe ababire bari kurya, bakarekera aho. Abandi nibabasa kuba bine ekizibu c’omu mutwe ninga ekindi kibuzo ekiri kutuma batekateka ngu nibija kutegeka na Kristo omu iguru. Mazima, tituri kumanya omubaro gw’abashukirweho omwika abacari omu nsi.
13. Mbehi Bibuli negamba omubaro gw’abashukirweho omwika ogurije kuba guriho okubonabona kwingi kwaza kutandika?
13 Abashukirweho omwika baryaruga omu tucweka twona tw’ensi obu Yesu arije kubatwara omu iguru. (Mat 24:31) Bibuli negamba ku omu bwire bw’aha muheru habire harije kuba hariho abashukirweho omwika bace bacari omu nsi. (Kush 12:17) Konka teri kugamba omubaro gwenyine ogw’abarije kuba bariho okubonabona kwingi kuri kuza kutandika.
Ni bata oku tushemerire kwetwara hagira owarya aha bigeraniso? (Reba paragurafu ya 14)
14. Nk’oku byagambwa omu Baroma 9:11, 16, ni enki eki tushemerire kumanya aha kutoranwa kw’abashukirweho omwika?
14 Yehova ni we ori kutorana obwire obu arashuke omwika gweye aha muntu. (Rom 8:28-30) Yehova akatandika kutorana abashukirweho omwika, Yesu ku yamazire kuzoka. Nikirebeka ku Abakristo bona b’omu kinyigana c’okubanza babire bashukirweho omwika. Omu binyigana ebyakuratireho, Abakristo bingi ababire nibeyeta abakurasi ba Kristo bakaba batari ab’amazima. Konka nabwe omuri eyo myaka, Yehova akatoranamu Abakristo bace ababire bari abesigwa. Bakaba bari nk’engano ezi Yesu yabire yagambire ku zabire zirije kukurira omu ncenzi. (Mat 13:24-30) Omuri obu bwire bw’aha muheru, Yehova agumizemu kutorana abarije kuza omu mubaro gw’abantu 144,000. * Obwe rero, Ruhanga ku arasharemu kutorana bamwe omuri obu bwire bw’aha muheru, titurije kubanganisa aha bwenge bweye. (Shoma omu Baroma 9:11, 16.) * Tushemerire kwetonda tutabe nk’abakozi abu Yesu yagambireho omu cokureberaho eki yagambire. Baketombetera mukama wabo ahabw’okuhemba abakozi abizire bwanyima.—Mat 20:8-15.
15. Mbwenu shi abashukirweho omwika bona bari omu ‘mwambari ow’okwesigwa kandi ow’omunyabwenge,’ ori kugambwa omuri Matayo 24:45-47? Shoborora.
15 Abantu abine amasiko g’okwija kutura omu iguru bona ti ‘mwambari ow’okwesigwa kandi ow’omunyabwenge.’ (Shoma omuri Matayo 24:45-47.) Yehova na Yesu erizoba nibakoresa abashija bace omu kurisa abahereza beye, nk’oku cabire kiri omu kinyigana c’okubanza. Abakristo abashukirweho omwika bake b’omu kinyigana c’okubanza ni bo bakoresibwe omu kuhandika Ebyahandikirwe by’Orugurika. N’erizoba, abantu bace ni bo bine obujunanizibwa bw’okugaburira abahereza ba Ruhanga omu bunaku obuhikire.
16. Ni enki eki wayegera omuri eki kicweka?
16 Ni enki eki twayegera omuri eki kicweka? Yehova nayenda kuha amagara agatahwaho abantu bingi omu nsi kandi abandi bace abahe amagara agatahwaho g’okwija kutegeka na Yesu omu iguru. Yehova naha abahereza beye bona ebiconco n’okugamba “Omuyudaaya” n’“abantu ikumi,” kandi bona nabashaba korobera ebiragiro byeye n’okuguma bari abesigwa. Bona bashemerire kuguma bari abacurezi. Bona bashemerire kumuhereza bari hamwe omu bumwe. Kandi bona bashemerire kukora cona ekiri kubasika kugira ngu omu kibina hagume harimu obusinge. Obu turi hihi n’omuheru gw’eyi nsi, reka twena tugume turi kuhereza Yehova kandi tukuratire Yesu turi “obusyo bumwe.”—Yohaana 10:16.
^ par. 5 Omuri ogu mwaka, Ekijusyo c’okufa kwa Yesu kiryaba Orwakabiri, 7 Okwakana. Ni bata oku tushemerire kureba abarije kurya aha bigeraniso ahari ogo mwebazyo? Mbwenu tushemerire kwemereza omutima ahabw’okweyongera kwabo? Twaza kutunga ebyokugarukamu by’ebyo bibuzo omuri eki kicweka, ekirimu ebyashohwire omu Munara g’Omurinzi g’omu Kwokubanza 2016.
^ par. 2 Tukuratize Zaaburi ya 87:5, 6, omu biro by’omu misho, Ruhanga nayija kugamba amazina g’abo bona abarije kutegeka na Yesu omu iguru.—Rom 8:19.
^ par. 8 Reba akashanduku akari kugira ngu ‘Okukunda “tikukora ebirikwitsa enshoni,”’ omu Munara g’Omurinzi g’omu Kwokubanza 2016.
^ par. 14 N’obu omu Byakozirwe 2:33 hari kwereka ku abantu bari kushukwaho omwika birabire ahari Yesu, konka Yehova ni we ori kutorana abo bantu.
^ par. 14 Waba noyenda kumanya ebiri kukiraho, reba “Ebibuzo by’abashomi” omu Munara g’Omurinzi, 1 Okwakatano 2007.
ECESHONGORO CA 34 Okugyendera omu Bwesigwa
^ par. 56 EKISHUSHANI: Tekateka entumwa ya ofisi yitu nkuru n’omukazi weye bari aha kiterane, abantu babetorwire bari kubatera ebishushani. Ku nikiba kiri kushwazana!
