CAWN AWK CAPAR 5
Na Sinah Kan Kal Ko Lai
“Pathian cu na sinah a um ti kha kan theih caah na sinah kan kal ko lai.”—ZEKH. 8:23.
HLA 26 Keimah Nan Ka Bawmhmi A Si
LANGHTERNAK *
Tuu dang a simi (“mi pahra”) cu chiti thuhmi (“Judah mi”) hna he Jehovah an biaṭi (Catlangbu 1-2 zoh)
1. Kan chan he aa tlaiin Jehovah nih zeidah a rak chimchung?
JEHOVAH nih kan chan he aa tlaiin hitin a chimchung: “Khi caan ah cun holh phun kip a hmangmi miphun kip chungin mi pahra nih Judah mi pakhat kha a puan in an i tlaih lai i, ‘Pathian cu na sinah a um ti kha kan theih caah na sinah kan kal ko lai,’ tiah an ti lai.” (Zekh. 8:23) “Judah mi” nih thiang thlarau in chiti thuh a simi hna kha a aiawh hna. Annih cu “Pathian Israel miphun” ti zongin auh an si. (Gal. 6:16, NW) “Mi pahra” timi nih vawleicung ah zungzal nun ding ruahchannak a ngeimi hna kha a aiawh hna. Annih nih chiti thuhmi hna cu Jehovah nih thluachuah a pek hna ti kha an hngalh caah anmah he Jehovah biakṭi kha an sunsak.
2. “Mi pahra” cu zeitindah chiti thuhmi hna he ‘an kalṭi’?
2 Tuchan * ah chiti thuhmi pakhat cio i an min cu hngalh khawh a si lo nain vawlei ruahchannak a ngeimi hna cu chiti thuhmi hna he ‘an kalṭi’ kho. Zeitin in dah? Baibal nih hitin a ti: “Mi pahra nih Judah mi pakhat kha a puan in an i tlaih lai i, ‘Pathian cu na sinah a um ti kha kan theih caah na sinah kan kal ko lai,’ tiah an ti lai.” Mah Baibal caang ah Judah mi pakhat tiah a ti ko nain mi pakhat nak tam kha a chimduhmi a si. Cucaah Judah mi timi nih mi pakhat lawng si loin chiti thuhmi phu dihlak kha a aiawh. Chiti thuh a si lomi hna nih chiti thuhmi hna he Jehovah kha an biakṭi. Asinain Jesuh cu a kan Hruaitu a si ti kha an hngalh caah chiti thuhmi hna kha an hruaitu bantukin an hmu hna lo.—Matt. 23:10.
3. Hi capar ah zei kong dah kan i ruah hna lai?
3 Chiti thuhmi Khrihfa hna cu tuchan i Pathian miphun hna lakah an um rih caah cheukhat nih hitin an ruah men lai: (1) Chiti thuhmi hna nih anmahle anmah kha zeitindah an i hmuh awk a si? (2) Ruahnolhnak ah mitsur zu le changreu a hmangmi hna kha zeitindah kan pehtlaih hna awk a si? (3) Ruahnolhnak ah mitsur zu le changreu a hmangmi milu an karh chin tikah kan lungre a theih awk a si maw? Mah kong hna kha hi capar ah kan i ruah hna lai.
Chiti Thuhmi hna nih Anmahle Anmah Kha Zeitindah An i Hmuh awk a Si?
4. Chiti thuhmi hna nih 1 Korin 11:27-29 ah kan hmuhmi zei ralrin peknak dah thukpi in an ruah awk a si, zeicah?
4 Chiti thuhmi hna nih 1 Korin 11:27-29 i ralrin peknak bia kha thukpi in an ruah awk a si. (Rel.) Chiti thuhmi pakhat nih Jehovah nawlbia a zulh lo buin Ruahnolhnak ah mitsur zu le changreu a hman ahcun ‘aa tlak lo buin’ a hmanmi a si lai. (Heb. 6:4-6; 10:26-29) Chiti thuhmi hna nih an laksawng kha hmuh an duh ahcun zumhfek tein kan um a hau ti kha an hngalh. Mah an laksawng cu ‘Pathian nih Khrih Jesuh thawngin cunglei nunnak i a kawhmi hna hi a si.’—Fil. 3:13-16.
5. Chiti thuhmi hna nih anmahle anmah kha zeitindah an i hmuh awk a si?
5 Jehovah thiang thlarau nih a salle kha i porhlawt loin toidor tein um awkah a bawmh hna. (Efe. 4:1-3; Kol. 3:10, 12) Cucaah chiti thuhmi hna nih midang nakin kan ṭha deuh tiah an i ruat lo. Jehovah nih midang nakin thiang thlarau tam deuh in a kan pe lo ti kha an hngalh. Midang nakin Baibal biatak kha thuk deuh in kan hngalhthiam ti zongin an i ruat lo. Annih nih anmah ruahnak in mi pakhatkhat kha chiti thuh na si ve i Ruahnolhnak ah mitsur zu le changreu na hman ve awk a si tiah zeitikhmanh ah an ti lai lo. Mah canah vancung kai dingin mi a sawmtu cu Jehovah lawng a si ti kha toidor tein an cohlan.
6. Chiti thuhmi Khrihfa hna nih 1 Korin 4:7, 8 ningin zeitindah an um awk a si?
6 Chiti thuhmi hna nih vancung kai dingin sawm an simi kha an sunsak tuk ko nain midang nih a hleikhunmi lam in a kan pehtlaih lai tiah an i ruahchan lo. (Filipi 2:2, 3) Jehovah nih chiti a thuh hna tikah mikip theih dingin a thanh lo i anmah pakhat cio tu kha thiang thlarau in a hngalhter hna. Cucaah chiti thuh an simi kha mi cheukhat nih an zumh colh hna lo tikah an khuaruah a har lo. Pathian nih a hleikhunmi rian a kan pek tiah aa timi paoh zumh colh lo awkah Baibal nih ralrin a kan pekmi kha an hngalh. (Biat. 2:2) Midang nih lungthin pek lai kha an duh lo caah chiti thuh kan si tiah mi kip sinah an chim lo. Mah kong he aa tlaiin i uangthlar ngaiin midang sinah an chim lo.—1 Korin 4:7, 8 rel.
7. Chiti thuhmi hna nih zei tuah dah an hrial awk a si, zeicah?
7 Chiti thuhmi hna nih anmahle anmah kha a hleiin dirhmi phu chungah aa telmi in an i ruat lo. Chiti thuh a simi hna he lawng i komh, anmah tein phu dirh in Baibal hlathlaiṭi ti bantuk zong an tuah lo. (Gal. 1:15-17) Chiti thuhmi hna nih cutin an tuah ahcun Khrihfabu ah lung i khahlonak hna a chuak lai. Pathian miphun lakah daihnak le lungrualnak a chuahtertu thiang thlarau an ralchanh zong a si lai.—Rom 16:17, 18.
Chiti Thuhmi Hna kha Zeitindah Kan Pehtlaih Hna awk A Si?
Chiti thuhmi asiloah zei bantuk hruaitu hna hmanh kha min thangmi hna bantukin kan pehtlaih hna awk a si lo (Catlangbu 8 zoh) *
8. Ruahnolhnak ah mitsur zu le changreu a hmangmi hna kan pehtlaih hnaning he aa tlaiin zeicah kan i ralrin awk a si? (A tanglei fianternak zong zoh.)
8 Chiti thuhmi unau pawl kha zeitindah kan pehtlaih hna awk a si? Mi pakhatkhat kha a hleihluat tuk in pehtlaih awk a si lo. Anih cu Khrih unau in chiti thuhmi a si hmanhah cutin pehtlaih awk a si lo. (Matt. 23:8-12) Baibal nih Khrihfa upa pawl i “an zumhnak” kha i zohchunh dingin a kan forh ko nain zei bantuk minung hmanh hruaitu in ser awkah a kan fial lo. (Heb. 13:7) Mi cheukhat nih upatnak “a lethnih” in an hmuh awk a si tiah Baibal nih a timi cu a hmaan ko. Asinain mah cu chiti thuh an si ruangah si loin “ṭha tein a hruaitu” an si ruang le “phungchim le cawnpiak i a ṭangmi” an si ruangah a si. (1 Tim. 5:17) Chiti thuhmi hna kha a hleihluat tuk in kan thangṭhat hna i lungthin kan pek hna ahcun mah nih siarem loin a umter khawh hna. * Mah nakin a ṭhalo deuhmi cu aa porhlawmi kan hun siter khawh hna. (Rom 12:3) Chiti thuhmi Khrihfa hna nih cu bantuk palhnak an tuah sual nakhnga zei thil hmanh tuah kan duh lo.—Luka 17:2.
9. Chiti thuhmi hna cungah zeitindah upatnak kan langhter khawh?
9 Jehovah nih chiti a thuhmi hna cungah zeitindah upatnak kan langhter khawh? Chiti thuh an sining he aa tlaimi pumpak kong hna kha kan hal hna awk a si lo. Cuticun midang kongkau ah kan i thlak lo. (1 Thes. 4:11; 2 Thes. 3:11) Chiti thuh a simi hna i an innchunghawi, an nu le an pa asiloah an innchungkhar mi hna zong chiti thuh an si ve ko lai tiah kan ruah awk a si lo. Mah vancung ruahchannak cu a chungkhar mi hna sinin a hmuhmi ro a si lo. Pathian sinin a hmuhmi a si. (1 Thes. 2:12) Chiti thuhmi i a innchunghawi kha a lung a fahter khomi bia kan hal awk a si lo. Tahchunhnak ah, na innchunghawi tel loin vawleicung ah zungzal nun ding kha zeitindah na ruah tiah kan hal hna awk a si lo. Jehovah nih vawlei thar ah “an dihlak in an herhmi kha tling tein” a pek hna lai ti kha kan zumh khawh.—Salm 145:16.
10. Midang faak lonak thawngin zeitindah kanmahle kanmah kan i kilven?
10 Chiti thuhmi hna kha midang nakin a biapi deuhmi bantukin kan pehtlaih hna lo tikah kanmahle kanmah kan i kilvenmi zong a si. Zeitin in dah? Chiti thuh a simi cheukhat cu zumhawktlak loin an hung um kho tiah Baibal nih a ti. (Matt. 25:10-12; 2 Pet. 2:20, 21) Asinain midang faak a hmangmi kan si lo ahcun zeitikhmanh ah minung hnu a zulmi kan si lai lo. Chiti thuhmi an si ah, a min a thangmi an si ah, Jehovah a biaknak a saupi cangmi an si ah zumhfek tein an um lo tik asiloah Khrihfabu in an chuah tikah anmah ruangah kan zumhnak a tlau lai lo i Jehovah biak ti lo zongin kan um lai lo.—Judas 16.
Mitsur Zu le Changreu a Hmangmi Milu he aa tlaiin Kan Lungre a Theih awk a Si Maw?
11. Ruahnolhnak ah mitsur zu le changreu a hmangmi milu he aa tlaiin zeidah a cang?
11 Ruahnolhnak ah mitsur zu le changreu a hmangmi milu an zorchuknak hi kum tampi a si cang. Asinain nai kum hrawngah mitsur zu le changreu a hmangmi cu kumkhat hnu kumkhat an tam chin. Mah he aa tlaiin lungretheih a hau maw? A hau lo. A ruang cheukhat kha atu i ruah hna u sih.
12. Ruahnolhnak ah mitsur zu le changreu a hmangmi milu he aa tlaiin zeicah kan lungre a theih awk a si lo?
12 “Bawipa nih amah ta a simi cu a hngalh ko hna.” (2 Tim. 2:19) Jehovah he i lo loin Ruahnolhnak ah mitsur zu le changreu a hmangmi milu a relmi unau pawl nih ahote dah chiti thuhmi taktak an si ti kha an hngal kho hna lo. Cucaah anmahle anmah chiti thuh kan si tiah aa ruat ko nain chiti thuh a si lomi hna zong mah relmi milu ah an i tel ve. Tahchunhnak ah, mitsur zu le changreu a hmangmi cheukhat cu a hnuah an hmang ṭhan ti lo. Cheukhat tu cu an lung a hmaan lo caah anmahle anmah chiti thuhmi kan si tiah an i ruahmi a si kho men. Cucaah vawleicung ah chiti thuhmi pa zeizat dah an tang rih ti kha fiang tein kan hngal kho lo.
13. Harnak nganpi aa thawk tikah vawleicung ah chiti thuhmi pa zeizat dah an taang lai ti kha Baibal nih a chim maw?
13 Chiti thuhmi pawl vancung i lak awkah Jesuh a rat tikah annih cu vawleicung hmunkip ah an um lai. (Matt. 24:31) Baibal nih donghnak caan chungah vawleicung ah chiti thuhmi tlawmte lawng an tang cang lai tiah a ti. (Biat. 12:17) Asinain harnak nganpi aa thawk tikah an lakin pa zeizat dah an taang lai ti kha cu a chim lo.
Ruahnolhnak ah mi pakhatkhat nih mitsur zu le changreu a hman ahcun zeitindah kan lehrulh awk a si? (Catlangbu 14 zoh)
14. Rom 9:11, 16 ah a langhter bantukin chiti thuhmi hna thimnak kong he aa tlaiin zeidah kan hngalh a hau?
14 Chiti thuhmi hna kha zeitik ah dah thim ding timi biakhiahnak a tuahtu cu Jehovah a si. (Rom 8:28-30) Jehovah nih Jesuh a thawhṭhan hnuah chiti thuhmi hna kha a thim hna. Kumzabu pakhatnak i Khrihfa hna cu an dihlak in chiti thuhmi si dawh an si. Mah hnu kumzabu pakhatnak in donghnak caan aa thawk tiang, kum tampi chungah Khrihfa kan si tiah aa timi tam deuh cu Khrihfa deu an si. Jesuh nih annih kha “belh” he a tahchunh hna. Asinain mah caan chungah zumhfekmi cheukhat kha Jehovah nih chiti a thuh rih hna. Annih cu Jesuh nih a chimmi “rawl kung” kha an si. (Matt. 13:24-30) Donghnak caan chung zongah Jehovah nih 144,000 i aa telmi hna kha a thim thluahmah rih hna. * Cucaah donghnak a phanh hlante ah Jehovah nih mi cheukhat kha thim awkah bia a khiah ahcun zeicah kan phunzai awk a si lo? (Rom 9:11, 16 rel.) * Jesuh nih a chimmi tahchunhnak chung i rianṭuantu pawl bantukin lehrulh lo awkah kan i ralrin a hau. Zanlei sang in rian a hung ṭuanmi hna kha dum ngeitu nih midang bantukin a pehtlaih hna caah rianṭuantu pawl cu an phunzai.—Matt. 20:8-15.
15. Matthai 24:45-47 ah a langhter bantukin chiti thuhmi dihlak cu “zumhawk a tlakmi le a fimmi sal” ah an i tel maw? Fianter.
15 Vancung ruahchannak a ngeimi vialte cu “zumhawk a tlakmi le a fimmi sal” ah an i tel lo. (Matt. 24:45-47 rel.) Kumzabu pakhatnak lio bantukin tuchan zongah Jehovah le Jesuh nih mi tampi rawl pek awk asiloah cawnpiak awkah mi tlawmte kha an hman hna. Kumzabu pakhatnak ah Khrihfa Greek Baibal ṭial awkah chiti thuhmi tlawmte lawng hman an rak si. Tuchan zongah Pathian miphun ‘a caan hmaan tein rawl petu dingah’ chiti thuhmi Khrihfa tlawmte lawng rian pek an si.
16. Hi capar in zeidah kan hngalh?
16 Hi capar nih zeidah a kan cawnpiak? Jehovah nih langhternak “Judah mi” kha vancung nunnak pek awk le langhternak “mi pahra” kha vawleicung nunnak pek awkah bia a khiah. Asinain an phuhnih in a halmi hna cu aa khat. An phuhnih in zumhawktlak tein an um lai i an i toidor lai. Khrihfabu ah daihnak le lungrualnak a um nakhnga hmunkhatte ah rian an ṭuanṭi lai. Donghnak caan kan naih thluahmah bantukin Khrih lamhruainak tangah “tuu run runkhat” in Jehovah biak zungzal awkah bia khiak hna u sih.
^ cat. 5 Tu kum Khrih a thih Philhlonak cu April 7, Nihnih Ni ah tuah a si lai. Ruahnolhnak ah mitsur zu le changreu a hmangmi hna kha zeitindah kan hmuh hna awk a si? Ruahnolhnak ah mitsur zu le changreu a hmangmi milu an karh chin tikah kan lungre a theih awk a si maw? Hi capar ah mah biahalnak hna i a phi kha kan theih hna lai. Hi capar cu 2016, January, Vennak Innsang ah aa telmi capar pakhat cungah hram aa bunhmi a si.
^ cat. 2 Salm 87:5, 6 ningin Pathian nih hmailei ah Jesuh he vancung ah uktu a ṭuanṭi dingmi hna i an min kha a phuan men lai.—Rom 8:19.
^ cat. 8 2016, January, Vennak Innsang i “Dawtnak cu ‘Tla Bulbal in Khua a Sa Lo’” timi rinli kulh ah zoh.
^ cat. 14 Lamkaltu 2:33 nih Jesuh hmangin thiang thlarau a toih hna tiah a ti ko nain ahodah chiti thuh a si lai ti a thimtu taktak cu Jehovah a si.
^ cat. 14 A kong tamdeuh in hngalh awkah 2007, May 1, Vennak Innsang capar chung i “Careltu Hna Sinin Biahalnak” timi [Myanmar] ah zoh.
HLA 34 Zumhfek Tein Kal
^ cat. 56 HMANTHLAK FIANTERNAK: Zungpi a aiawhtu le a nupi cu civui ah mi tampi nih hmanthlak awkah an kulh hna tiah na mitthlam ah cuanter hmanh. Zeitluk in dah upatnak ngeih lo a si.
