1. Ki Zeova ti dir pou arive dan nou letan?

ZEOVA ti dir ki dan nou letan, “dis zonm sorti dan tou langaz bann nasyon pou tyonbo, wi zot pou vreman tyonbo for rob en Zwif e dir: ‘Nou anvi al avek zot, akoz nou’n antann ki Bondye i avek zot.’” (Zek. 8:23, NWT) Sa “Zwif” i reprezant bann ki Bondye in swazir par son lespri sen. Zot osi ganny apele “Izrael Bondye.” (Gal. 6:16) Sa “dis zonm” i reprezant bann ki annan lespwar pour viv pour touzour lo later. Zot konnen ki Zeova in beni bann Kretyen swazir e zot santi ki i en loner pour ador Zeova ansanm avek zot.

2. Ki mannyer sa “dis zonm” i “al avek” bann Kretyen swazir?

² Menm si i pa posib pour konn non tou bann Kretyen swazir lo later ozordi, * bann ki annan lespwar pour viv lo later i kapab “al avek zot.” Ki mannyer zot kapab fer sa? Labib i dir ki sa “dis zonm” ti pou “vreman tyonbo for rob en Zwif e dir: ‘Nou anvi al avek zot, akoz nou’n antann ki Bondye i avek zot.’” Sa verse Labib i mansyonn zis en Zwif. Me ler i dir “zot” sa pe refer avek plizyer dimoun. Sa i vedir ki sa Zwif pa zis en dimoun me i pe reprezant tou Kretyen swazir. Bann ki pa’n ganny swazir par lespri sen, i servi Zeova ansanm avek bann Kretyen swazir. Par kont, zot pa vwar bann Kretyen swazir  konman zot sef parski zot konnen ki Zezi ki zot Sef.​—Mat. 23:10.

3. Ki kestyon nou pou reponn dan sa lartik?

³ Vi ki i ankor annan bann Kretyen swazir parmi pep Bondye ozordi, serten i kapab mazinen: (1) Ki pwennvi bann Kretyen swazir i devret annan lo zot menm? (2) Ki mannyer nou devret tret en dimoun ki manz sa dipen e bwar sa diven pandan Memoryal? (3) Eski nou devret enkyet si lakantite bann ki manz sa dipen e bwar sa diven pandan Memoryal i kontinyen ogmante? Sa lartik pou reponn sa bann kestyon.

4. Ki lavertisman dan 1 Korentyen 11:27-29 ki bann Kretyen swazir i devret mazin seryezman lo la e akoz?

⁴ Bann Kretyen swazir i devret mazin seryezman lo sa lavertisman ki dan 1 Korentyen 11:27-29. (Lir.) Ki mannyer en Kretyen swazir i kapab “fer pese” zour Memoryal? En Kretyen swazir i kapab “fer pese” si i manz sa dipen e bwar sa diven menm si i pa pe viv dapre bann standar Zeova ki drwat. (Ebr. 6:4-6; 10:26-29) Bann Kretyen swazir i realize ki zot bezwen reste fidel si zot anvi  “ganny sa pri, setadir lavi dan lesyel ki Bondye i donnen gras a Kris Zezi.”​—Fili. 3:13-16.

5. Ki pwennvi bann Kretyen swazir i devret annan lo zot menm?

⁵ Lespri sen Zeova i ed son bann serviter pour annan limilite, me pa lorgey. (Efe. 4:1-3; Kol. 3:10, 12) Alor bann Kretyen swazir pa krwar ki zot pli siperyer ki lezot. Zot konnen ki Zeova pa neseserman donn bann Kretyen swazir plis lespri sen ki i donn son bann lezot serviter. Zot pa santi ki zot konpran Labib pli byen ki lezot dimoun. Deplis, zot pa pou zanmen dir en dimoun ki li osi i’n ganny swazir e ki i devret konmans manz sa dipen e bwar sa diven pandan Memoryal. O kontrer, zot annan limilite e zot konnen ki zis Zeova ki kapab swazir en dimoun pour al dan lesyel.

6. Dapre 1 Korentyen 4:7, 8, ki mannyer bann Kretyen swazir i devret konport zot?

⁶ Menm si bann Kretyen swazir i santi ki i en loner pour ganny swazir pour al dan lesyel, zot pa ekspekte ki lezot i tret zot dan en fason spesyal. (Fili. 2:2, 3) Zot osi konnen ki ler Zeova ti swazir zot, i pa ti fer lezot dimoun konnen. Alor, en Kretyen swazir pa sirprann si serten pa krwar deswit ki i’n ganny swazir. I realize ki Labib i dir ki si en dimoun i dir ki Bondye in donn li en responsabilite spesyal, nou pa devret krwar li deswit. (Rev. 2:2) Vi ki en Kretyen swazir pa anvi lezot i donn li en latansyon spesyal, i pa ti pou dir ki i en Kretyen swazir avek en dimoun ki i zwenn pour premye fwa. Deplis, i pa pou fer vantar konsernan sa lespwar ki i annan.​—Lir 1 Korentyen 4:7, 8.

7. Ki bann Kretyen swazir pou evite fer e akoz?

⁷ Bann Kretyen swazir pa santi ki zot devret pas letan zis avek lezot Kretyen swazir, konmsi zot form parti en klib. Zot pa esey rod lezot Kretyen swazir pour zot koz konsernan zot lespwar oubyen zwenn dan en group pour etidye Labib. (Gal. 1:15-17) Kongregasyon pa ti pou ini si bann Kretyen swazir ti fer sa. Deplis, zot ti pou pe travay kont lespri sen ki ed pep Bondye pour annan lape ek linite.​—Rom. 16:17, 18.

8. Akoz ou bezwen fer atansyon lo lafason ki ou tret bann ki manz sa dipen e bwar sa diven pandan Memoryal? (Vwar not.)

⁸ Ki mannyer nou devret tret bann Kretyen swazir? I ti pou mal pour admir  en dimoun tro bokou, menm si i en frer swazir Kris. (Mat. 23:8-12) Ler Labib i koz konsernan bann ansyen, i ankouraz nou pour “imit zot lafwa,” me i pa dir ki nou kapab fer okenn imen nou sef. (Ebr. 13:7) I vre ki Labib i dir ki serten i “diny pour ganny plis loner.” Me sa i akoz zot “diriz kongregasyon dan en bon fason” e zot “travay dir pour ansenny e koz lo parol Bondye,” me pa akoz zot Kretyen swazir. (1 Tim. 5:17) Nou pou anbaras bann Kretyen swazir si nou tro ponp zot e donn zot tro bokou latansyon. * Pli pir ankor, nou kapab fer zot vin orgeye. (Rom. 12:3) Personn antre nou pa ti pou anvi fer okenn keksoz ki ti pou kapab fer en frer Kris fer sa gro fot.​—Lik 17:2.

9. Ki mannyer nou kapab montre ki nou respekte bann Kretyen swazir?

⁹ Ki mannyer nou kapab montre ki nou respekte bann ki Zeova in swazir? Nou pa ti pou demann zot ki mannyer zot in ganny swazir. Sa i en keksoz ki pa konsern nou. (1 Tesa. 4:11; 2 Tesa. 3:11) Nou pa devret mazinen ki zot konzwen, paran oubyen lezot manm fanmir osi in ganny swazir. En dimoun pa erit sa lespwar pour al dan lesyel avek son fanmir. Bondye ki donn sa lespwar. (1 Tesa. 2:12) Nou devret osi evite demann bann kestyon ki kapab bles lezot. Par egzanp, nou pa ti pou demann madanm en frer swazir ki mannyer i santi pour viv lo later pour touzour san son msye. Apre tou, nou kapab asire ki dan nouvo lemonn Zeova pou “satisfer dezir tou kreatir.”​—Ps. 145:16.

10. Ki mannyer nou protez nou lekor si nou evite “flat lezot”?

¹⁰ Si nou pa tret bann Kretyen swazir konmsi zot pli enportan, nou osi protez nou lekor. Dan ki sans? Labib i dir ki i kapab ki serten Kretyen swazir pa reste fidel. (Mat. 25:10-12; 2 Pyer 2:20, 21) Me si nou evite “flat lezot,” nou pa pou zanmen swiv lezot, menm bann ki’n ganny swazir, bann ki bokou dimoun i konnen oubyen ki’n servi Zeova pandan en bon pe letan. (Zid 16) Koumsa, si zot vin enfidel oubyen kit kongregasyon, nou pa pou perdi nou lafwa dan Zeova oubyen aret servi li.

11. Ki’n arive avek lakantite dimoun ki manz sa dipen e bwar sa diven pandan Memoryal?

¹¹ Pour plizyer lannen, lakantite dimoun ki ti manz sa dipen e bwar sa diven pandan Memoryal ti kontinyen diminyen. Me tou resaman, sa sif in ogmante tou le-z-an. Eski sa i devret fer nou enkyet? Non. Annou vwar akoz.

12. Akoz nou pa devret enkyet ler nou vwar lakantite dimoun ki manz sa dipen e bwar sa diven pandan Memoryal?

¹² “Zeova i konn sa bann ki pour li.” (2 Tim. 2:19) Kontrerman avek Zeova, bann frer ki konte konbyen dimoun ki manz sa dipen e bwar sa diven pandan Memoryal pa konnen lekel ki’n vreman ganny swazir. Alor sa sif i enkli bann ki krwar zot in ganny swazir, me ki an realite zot pa’n ganny swazir. Par egzanp, serten ki ti abitye manz sa dipen e bwar sa diven ti arete pli tar. Lezot i kapab annan bann problenm mantal oubyen emosyonnel ki fer zot krwar ki zot pou dirize  ansanm avek Kris dan lesyel. I kler alor, ki nou pa konn egzakteman ki kantite Kretyen swazir ki ankor lo later.

13. Eski Labib i dir ki kantite Kretyen swazir ki pou ankor lo later ler gran ladetres i konmanse?

¹³ I pou annan bann Kretyen swazir dan bokou landrwa lo later ler Zezi i vini pour anmenn zot dan lesyel. (Mat. 24:31) Labib i dir ki pandan bann dernyen zour i pou annan en ptigin Kretyen swazir ki pou ankor lo later. (Rev. 12:17) Me i pa dir ki kantite ki pou ankor lo later ler gran ladetres i konmanse.

14. Dapre Romen 9:11, 16, ki nou bezwen konpran konsernan lafason ki bann Kretyen swazir i ganny swazir?

¹⁴ Zeova ki deside kan ki i pou swazir bann Kretyen swazir. (Rom. 8:28-30) Zeova ti konmans swazir zot apre ki Zezi ti resisite. I paret ki dan premye syek tou bann vre Kretyen ti ganny swazir. Me pour plizyer santenn lannen apre sa, laplipar bann ki ti dir zot Kretyen pa ti vreman swiv Kris. Kantmenm sa, pandan sa bann lannen, Zeova ti swazir sa ptigin ki ti bann vre Kretyen. Zot ti parey bann dible ki Zezi ti dir ti pou pous parmi bann move zerb. (Mat. 13:24-30) Pandan bann dernyen zour, Zeova in kontinyen swazir dimoun ki pou form parti sa 144,000. * Alor, si Bondye i deside pour swazir serten zis avan lafen, nou pa devret doute ki i’n fer en desizyon ki saz. (Lir Romen 9:11, 16.) * Nou bezwen fer  atansyon ki nou pa reazir parey bann travayer dan en legzanp ki Zezi ti servi. Sa bann travayer ti konplent konsernan lafason ki zot met ti tret bann ki ti vin travay dernyen.​—Mat. 20:8-15.

15. Eski tou Kretyen swazir i form parti sa “lesklav fidel e pridan” ki’n ganny mansyonnen dan Matye 24:45-47? Eksplike.

¹⁵ Pa tou bann ki annan lespwar pour viv dan lesyel ki form parti sa “lesklav fidel e pridan.” (Lir Matye 24:45-47.) Zis parey dan premye syek, ozordi Zeova ek Zezi pe servi en ptigin frer pour nouri oubyen ansenny en kantite. Zis detrwa Kretyen swazir dan premye syek ki ti ganny servi pour ekri Lekritir Grek Kretyen. Ozordi, zis detrwa Kretyen swazir ki annan sa responsabilite pour donn pep Bondye “manze dan sa moman apropriye.”

16. Ki ou’n aprann dan sa lartik?

¹⁶ Ki nou’n aprann dan sa lartik? Zeova in deside pour donn laplipar son bann serviter lavi eternel lo later e donn sa bann ki pou dirize ansanm avek Zezi, lavi dan lesyel. Zeova i rekonpans tou son bann serviter, ki swa zot form parti sa “Zwif” oubyen sa “dis zonm.” I ekspekte ki zot obei menm lalwa e reste fidel. Zot tou zot bezwen annan limilite. Zot devret servi li ansanm dan linite e travay pour gard lape dan kongregasyon. Anmezir ki nou apros avek lafen, annou kontinyen servi Zeova e swiv Kris konman “en sel troupo.”​—Zan 10:16.