1. San Yehofa be taki o pasa aini a ten ya?

YEHOFA be taki aini a ten fu u, „tin man fu ala sowtu nasi di e taki ala sowtu tongo, o kisi a impi fu wan Dyu holi, da den o taki: ’U wani go anga u, bika u yee taki Gadu de anga u’” (Sak. 8:23). A „Dyu” aini a tekisi ya, a den sama di Gadu salufu anga en santa yeye. Son leisi den e kai den „a Islayeli fu Gadu” tu (Gal. 6:16). Den „tin man”, a den sama di o libi fu teego a goontapu. Den sabi taki Yehofa e holibaka gi den salufu Kelesten. Ai bigi gi den taki den sa dini Yehofa makandaa anga den salufu Kelesten.

2. Fa den „tin man” e „go” anga den salufu Kelesten?

² Winsi fa wi á poi sabi ala den nen fu den salufu Kelesten di de a goontapu, tokuso den Kelesten di abi a howpu fu tan a goontapu sa „go” anga den. * Fa den sa du a sani ya? Beibel taki den „tin man” be o „kisi a impi fu wan Dyu holi, da den o taki: ’U wani go anga u, bika u yee taki Gadu de anga u’”. A tekisi taki fu wan Dyu, ma den wowtu „wani go anga u” e soi go a moo enke wan sama. A sani ya wani taki a Dyu ya a ná wan sama namo, ma na ala den salufu Kelesten. Den Kelesten di á salufu anga santa yeye, e dini Yehofa makandaa anga  den salufu Kelesten. Ma tokuso den nai si den salufu Kelesten enke den fesiman, bika den sabi taki a Yesesi a u Fesiman.​—Mat. 23:10.

3. Sowtu akisi wi o luku aini a artikel ya?

³ Fu di salufu Kelesten de a goontapu ete, meke u wani sabi den sani ya: (1) Fa den salufu Kelesten mu si denseefi? (2) Fa u mu libi anga den sama di e nyan a beele efuso diingi a win na a Membeefesa? (3) U mu booko wi ede efu moo sama e nyan a beele efuso diingi a win? A artikel ya o piki den akisi ya.

4. Enke fa 1 Korentesama 11:27-29 e soi, da san den salufu Kelesten mu holi a pakisei? Saide den mu holi a sani ya a pakisei?

⁴ Den salufu Kelesten mu holi a sani di sikiifi a 1 Korentesama 11:27-29 a pakisei. (Leisi en.) Fa wan salufu Kelesten be o soi taki a ná abi lesipeki gi a Membeefesa? Efu a nai libi enke fa Yehofa wani moo, ma toku ai nyan a beele efuso diingi a win, da a be o soi taki a nai lesipeki a Membeefesa (Heb. 6:4-6; 10:26-29). A sani ya e soi taki den  salufu Kelesten mu tan meke moiti fu dini Gadu anga den hii ati, efu den wani ’fende a libi a hemel. A Gadu meke Yesesi kai den fu gi den a libi ya’.​—Filip. 3:13-16.

5. Fa salufu Kelesten mu si denseefi?

⁵ A santa yeye e yeepi den sama di e dini Yehofa fu abi sakafasi. A nai meke den fii denseefi (Efe. 4:1-3; Kol. 3:10, 12). Neen meke den salufu Kelesten nai si enke den bun moo taawan. Den sabi taki Yehofa nai gi den santa yeye moo den taa baala anga sisa. Den nai si enke den e fusutan a Beibel bun moo taawan tu. Den nai sende taawan fu nyan a beele efuso diingi a win na a Membeefesa. Den sabi taki a Yehofa wawan abi a leti fu kai sama go a hemel.

6. Enke fa 1 Korentesama 4:7, 8 e soi, da fa salufu Kelesten mu tyai denseefi?

⁶ Winsi fa den salufu Kelesten e si en enke wan gaandi fu go a hemel, tokuso den nai si enke den taa baala anga sisa fu den mu tyai den a tapu (Filip. 2:2, 3). Den sabi tu taki di Yehofa kai den fu go a hemel, a á meke ala sama sabi. Neen meke den nai foondoo te son sama nai biibi wantenwanten taki Yehofa salufu den fu go a hemel. Den sabi tu taki Beibel e soi taki te wan sama taki Gadu gi en wan gaandi, wi á mu biibi a sani de gawgaw (Openb. 2:2). Wan salufu Kelesten á wani taawan poti pakisei neen tumisi, neen meke a nai taigi sama di a miti a fosi leisi taki en a wan salufu Kelesten. Noiti a o gafa taki a o go a hemel tu.​—Leisi 1 Korentesama 4:7, 8.

7. San wan salufu Kelesten ná o du? Saide a ná o du a sani ya?

⁷ Den salufu Kelesten nai si enke anga taa salufu Kelesten wawan den mu paa. Den nai waka e suku taa salufu Kelesten fu den sa taki fu a salufu di den salufu efuso fu sutudeli Beibel makandaa (Gal. 1:15-17). Den baala anga sisa á be o libi na a wan efu a so sani be o waka aini a kemeente. Efu a so den salufu Kelesten be o du sani, den á be o du san a santa yeye fu Gadu wani, bika a yeye ya e yeepi a foluku fu Gadu fu libi na a wan.​—Rom. 16:17, 18.

8. Saide u mu luku bun fa wi e libi anga den salufu Kelesten? (Luku a maiki a ondoo.)

⁸ Fa u mu libi anga den baala anga sisa di salufu anga santa yeye? A á bun fu e  tyai wan sama a tapu, winsi a wan fu den salufu baala fu Kelestesi (Mat. 23:8-12). Beibel e gi u taanga-sikin fu waka na a „biibi” fu den owluman baka, ma a nai gi u deki-ati fu si libisama enke u fesiman (Heb. 13:7). A tuu taki Beibel e taki u mu „moo lesipeki” son baala. Ma a nai soi taki a te wan sama salufu u mu moo lesipeki. Beibel taki u mu lesipeki den wan „di e teke fesi a wan bun fasi” anga den wan „di e wooko taanga” fu leli sama a wowtu (1 Tim. 5:17). Efu wi e poti pakisei a den salufu Kelesten tumisi efuso e gafa den pasa peesi, a sani ya o meke den fii wan fasi. * San moo ogii seefi, a taki son wan fu den be sa kon abi bigifasi (Rom. 12:3). Wi á wani du nawan sani di o meke den baala fu Kelestesi meke so wan gaan fowtu!​—Luk. 17:2.

9. Fa u sa soi taki wi e lesipeki den salufu Kelesten?

⁹ Fa u sa soi taki wi e lesipeki den salufu Kelesten? Wi e soi taki wi e lesipeki den, te u nai akisi den fa den toon salufu Kelesten. A pisi toli de a fu den anga Yehofa. U ná abi fu sabi (1 Tes. 4:11; 2 Tes. 3:11). A ná fu di wan sama a wan salufu Kelesten da en toowpaa, en mma anga dda efuso taa famii fi en a salufu Kelesten tu, bika a gaandi ya a ná wan famii gudu. A Yehofa seefi e teke sama a wani fu go a hemel (1 Tes. 2:12). U mu luku bun fu u nai akisi taawan sani di o hati den. Wi á mu akisi a uman fu wan baala di salufu fa ai fii taki en wawan o libi a goontapu fu teego sondee en man. U sa biibi anga u hii ati taki aini a nyun goontapu Yehofa o „gi ala sani di de a libi san den wani”.​—Ps. 145:16.

10. Saide u mu luku bun fu wi á tyai son baala anga sisa a tapu?

¹⁰ A abi wini te u nai tyai salufu Kelesten a tapu. Saide? Beibel e soi taki a kan taki son salufu Kelesten ná holidoo te na a kaba (Mat. 25:10-12; 2 Peit. 2:20, 21). Efu u nai tyai taawan a tapu, a sani ya o yeepi u fu wi á si libisama enke u fesiman, winsi a salufu Kelesten, sama di taawan e lesipeki, efuso sama di e dini Yehofa omen yali kaba (Yud. 16). Efu den sama ya meke wan fowtu efuso gwe fika Yehofa, u biibi ná o swaki. U ná o gwe fika Yehofa tu.

11. San wi e si e pasa te u luku omen sama e nyan na a Membeefesa ala yali?

¹¹ Wan hii pisiten den sama di be e nyan na a Membeefesa be e moo mendii ala yali. Ma den yali di pasa ya den sama di e nyan e kon moo ipi. U mu booko wi ede anga a pisi toli ya? Nono. Meke u luku saide u ná abi fu booko wi ede.

12. Saide wi á mu booko wi ede te u si taki moo sama e nyan na a Membeefesa?

¹² „Yehofa sabi sama a den sama fi en” (2 Tim. 2:19). Den baala di e teli omen sama e nyan na a Membeefesa ala yali á sabi efu ala den sama di e nyan a salufu Kelesten tuutuu. A Yehofa wawan sabi. Son wan fu den sama ya a sama di denki taki den salufu, winsi fa Gadu á salufu den. Son sama di be e nyan na a  Membeefesa nai nyan moo. Son wan fu den sama di e nyan, ede nai kaba wooko bun, neen meke den e denki taki den o tii anga Yesesi a hemel. Fu taki en kiin, wi á sabi omen salufu Kelesten de a goontapu ete.

13. Beibel e taki omen salufu Kelesten o de a goontapu ete di a gaan banowtu o bigin?

¹³ Salufu Kelesten o de na ala se fu goontapu, te Yesesi o kon fu tyai den go a hemel (Mat. 24:31). Beibel taki a wan pikin kulu salufu Kelesten o de a goontapu aini den lasiti dei (Openb. 12:17). Ma a nai taki omen salufu Kelesten o de a goontapu te a gaan banowtu o bigin.

14. Enke fa Romesama 9:11, 16 e soi, da san u mu holi a pakisei fu den salufu Kelesten?

¹⁴ A Yehofa seefi e luku on ten a o salufu wan sama (Rom. 8:28-30). Baka di Yesesi weki baka, neen Yehofa bigin salufu sama anga santa yeye. A gei enke na ala den Kelesten aini a ten fu den apostel be salufu anga santa yeye. Baka di den apostel dede, a omen sama be e taki den a Kelesten, ma den á be e waka a Yesesi baka. Tokuso, Yehofa salufu wantu sama di be de tuutuu Kelesten. Den Kelesten ya be de enke a alisi di busi be goo tapu aini a ageisitoli fu Yesesi (Mat. 13:24-30). Aini den lasiti dei, Yehofa e salufu sama ete fu de aini a kulu fu den 144.000 salufu Kelesten. * Neen meke wi á mu dyombo efu Gadu salufu son sama satu fosi a kaba doo,  bika a sabi san ai du. (Leisi Romesama 9:11, 16.) * U mu luku bun fu wi á de enke den wookoman aini wan fu den ageisitoli fu Yesesi. Den be e kuutu di a masaa pai den aseefi moni di a pai den sama di kon wooko moo lati.​—Mat. 20:8-15.

15. Na ala den sama di o go a hemel na „a koni saafu di u sa fitoow” di sikiifi a Mateyesi 24:45-47?

¹⁵ A ná ala den sama di o go a hemel na „a koni saafu di u sa fitoow” (Leisi Mateyesi 24:45-47.) Leti enke a ten fu den apostel, a so Yehofa anga Yesesi e koboloiki wantu sama aini a ten ya fu leli tyaipi sama. A wantu salufu Kelesten namo aini a ten fu den apostel be sikiifi den Giiki buku fu Beibel. Aini a ten ya, a wantu salufu Kelesten namo abi a faantiwowtu fu gi a foluku fu Gadu „nyanyan na a ten di den abi en fanowdu”.

16. San i leli aini a artikel ya?

¹⁶ San u leli aini a artikel ya? Yehofa o meke wan gaan kulu sama libi fu teego a goontapu, ma wantu sama o go tii anga Yesesi a hemel. Yehofa o pai ala den sama di e dini en, winsi den de enke a „Dyu” efuso den „tin man”. A wani ala den wooko anga denseefi weiti. A wani den holidoo. Ala den mu abi sakafasi. Boiti dati, den mu dini en makandaa enke wan foluku. U mu du ala san u man fu a kemeente libi na a wan. A kaba á de faawe moo, neen meke u mu tan dini Yehofa, da u waka a Yesesi baka enke „wan ipi”.​—Yoh. 10:16.