1. Jehovah ọkọdọhọ ke nso iditịbe ke eyo nnyịn?

JEHOVAH eketịn̄ ntem aban̄a eyo nnyịn ete: “Owo duop eke ẹtode ke kpukpru usem mme idụt ẹyemụm, ih, mmọ ẹyemụm utọn̄ ọfọn̄ owo kiet emi edide eyen Jew, ẹte: ‘Nnyịn iyetiene mbufo ika, koro imokop ite ke Abasi odu ye mbufo.’” (Zech. 8:23) “Eyen Jew” emi ẹsiakde ke itien̄wed emi ada aban̄a mbon emi Abasi adade edisana spirit eyet aran. Mmọ n̄ko ke ẹkot “Israel Abasi.” (Gal. 6:16) “Owo duop” ẹda ẹban̄a mbon emi ẹdoride enyịn ndidu nsinsi uwem mi ke isọn̄. Mmọ ẹdiọn̄ọ ke Jehovah emek mbon emi ẹyetde aran, ẹnyụn̄ ẹnịm ke edi ata n̄kpọ ukpono ndidiana ye mmọ n̄kpono Jehovah.

2. Didie ke “owo duop” ẹtiene mbon emi ẹyetde aran?

² Kpa ye oro nnyịn mîkemeke ndidiọn̄ọ enyịn̄ kpukpru mbon emi ẹyetde aran ke isọn̄ mfịn, * mbon emi ẹdoride enyịn ndidu uwem ke nsinsi ke isọn̄ ẹsụk ẹkeme ‘nditiene’ mmọ. Didie? Bible ọdọhọ ke “owo duop” oro “ẹyemụm utọn̄ ọfọn̄ owo kiet emi edide eyen Jew, ẹte: ‘Nnyịn iyetiene mbufo ika, koro imokop ite ke Abasi odu ye mbufo.’” Ufan̄ikọ oro nditịn̄ mban̄a owo kiet emi edide eyen Jew, mfiak ndọhọ “iyetiene mbufo ika” ye “Abasi odu ye mbufo” owụt ke eyen Jew oro idịghe owo kiet. Enye ada aban̄a kpukpru mbon emi ẹyetde aran. Mbon emi owo mîyetke aran ẹdiana kiet ye mbon emi ẹyetde aran ẹkpono Jehovah. Kpa ye oro, mmọ idaha mbon emi ẹyetde aran nte mme adausụn̄, mmọ ẹdiọn̄ọ ke Jesus edi Adausụn̄ mmimọ.—Matt. 23:10.

3. Mme mbụme ewe ke idibọrọ ke ibuotikọ emi?

³ Sia mbon emi ẹyetde aran ẹsụk ẹdude ke otu ikọt Abasi mfịn, ndusụk owo ẹkeme ndibụp ẹte: (1) Mbon emi ẹyetde  aran ẹkpeda idemmọ didie? (2) Ikpanam n̄kpọ didie ye mbon emi ẹtade uyo ẹnyụn̄ ẹn̄wọn̄de wine Editi? (3) Ndi akpana afịna nnyịn edieke ibat mbon emi ẹtade uyo ẹnyụn̄ ẹn̄wọn̄de wine Editi akade-ka iso ndidọk? Iyọbọrọ mme mbụme emi ke ibuotikọ emi.

4. Ewe item ke ikụt ke 1 Corinth 11:27-29, emi mbon oro ẹyetde aran ẹkpenen̄erede ẹkere ẹban̄a? Ntak-a?

⁴ Mbon emi ẹyetde aran ẹkpenyene ndinen̄ede n̄kere item emi odude ke 1 Corinth 11:27-29. (Kot.) Didie ke eyenete emi ẹyetde aran ekeme ndita uyo nnyụn̄ n̄n̄wọn̄ wine Editi “ke usụn̄ eke mîdotke”? Enye ekeme ndinam ntre edieke enye atade uyo onyụn̄ ọn̄wọn̄de wine Editi edi idụhe uwem nte Jehovah oyomde. (Heb. 6:4-6; 10:26-29) Mbon emi ẹyetde aran ẹfiọk ke ana mmimọ ika iso isọn̄ọ ida ye Jehovah edieke mmimọ iyomde ndibọ “utịp ikot eke heaven oro Abasi okokotde [mmimọ] ebe ke Christ Jesus.”—Phil. 3:13-16.

5. Mbon emi ẹyetde aran ẹkpeda idemmọ didie?

⁵ Edisana spirit Jehovah esinanam mme asan̄autom esie ẹsụhọde idem, isinamke mmọ ẹtan̄ idem. (Eph. 4:1-3; Col. 3:10, 12)  Ntre mbon emi ẹyetde aran isikereke ke mmimọ imọfọn ikan mbon en̄wen. Mmọ ẹdiọn̄ọ ke idịghe nte odudu edisana spirit emi Jehovah ọnọde mbon oro ẹyetde aran esikpokpon akan enye emi enye ọnọde mme asan̄autom esie eken. Mmọ isikereke ke Bible an̄wan̄a mmimọ akan nte an̄wan̄ade owo en̄wen ekededi. Mmọ idinyụn̄ idọhọke owo en̄wen ke ẹtiene ẹyet enye aran, ke akpana enye ọtọn̄ọ nditiene nta uyo nnyụn̄ n̄n̄wọn̄ wine Editi. Utu ke ndinam ntre, mmọ ẹsisụhọde idem ẹnyịme ke Jehovah kpọt esimek owo aka heaven.

6. Akpa Corinth 4:7, 8 owụt ke mbon oro ẹyetde aran ẹkpenam n̄kpọ didie?

⁶ Kpa ye emi mbon oro ẹyetde aran ẹdade ke edi n̄kpọ ukpono Jehovah ndimek mmimọ itiene ika heaven, mmọ isidorike enyịn ke mbon en̄wen ẹdinam n̄kpọ ye mmimọ ke san̄asan̄a usụn̄. (Phil. 2:2, 3) Mmọ ẹfiọk n̄ko ke ini Jehovah ekeyetde mmọ aran, ke enye ikanamke kpukpru owo ẹdiọn̄ọ. Ntre idem isikpaha owo emi ẹyetde aran ndusụk owo mîsọpke inịm ke ẹyet enye aran. Enye esiti ke Bible ọdọhọ nnyịn ikûsusọp unịm owo ama ọdọhọ ke Abasi ọnọ imọ san̄asan̄a utom. (Edi. 2:2) Sia owo emi ẹyetde aran mîyomke ẹda imọ ke n̄kpọ ẹkan nte ẹkpedade, ididịghe enye ama osobo ye owo akpa ini enye ọdọhọ ke ẹma ẹyet imọ aran. Enye idinyụn̄ ikamake n̄kpọ oro inam inua.—Kot 1 Corinth 4:7, 8.

7. Nso ke mbon emi ẹyetde aran mîkpanamke? Ntak-a?

⁷ Mme Christian oro ẹyetde aran isikereke ke n̄kukụre mbon emi mmimọ ikpesidude kiet ẹkpedi mbon emi ẹyetde aran n̄ko, nte n̄kpọ eke ẹdọhọde ke mmọ ẹnyene n̄ka. Mmọ isisan̄ake iyom mbon en̄wen emi ẹyetde aran man ẹtie ntre ẹneme ediyet emi ẹyetde mmọ aran m̀mê ndisiak otu ukpep Bible. (Gal. 1:15-17) Esop ikpadianake kiet mbon emi ẹyetde aran ẹkpenam utọ mme n̄kpọ oro. Mmọ ẹkpebọbiọn̄ọ edisana spirit emi esin̄wamde ikọt Abasi ẹdu ke emem ẹnyụn̄ ẹdiana kiet.—Rome 16:17, 18.

8. Ntak emi anade ikpeme nte inamde n̄kpọ ye mbon emi ẹyetde aran? (Se n̄ko ikọ idakisọn̄.)

⁸ Ikpanam n̄kpọ didie ye nditọete emi ẹyetde aran? Ikpọfọnke ima owo ndomokiet ikaha, ekpededi enye edi eyenete Christ emi ẹyetde aran. (Matt. 23:8-12) Bible ọdọhọ ‘ikpebe mbuọtidem mbiowo,’ idọhọke inam owo ndomokiet adausụn̄  nnyịn. (Heb. 13:7) Imọfiọk ke Bible ọdọhọ ke ndusụk owo “ẹdot se ẹnen̄erede ẹkpono.” Ntak edi ke mmọ ‘ẹtịm ẹda usụn̄’ ẹnyụn̄ ‘ẹnam utom ọkpọsọn̄ ke utịn̄ikọ ye ukpepn̄kpọ,’ idịghe ke ntak emi ẹyetde mmọ aran. (1 Tim. 5:17) Imekeme ndinam bụt anam mbon emi ẹyetde aran edieke itorode mmọ ikaha inyụn̄ inamde etie nte mmọ ẹdi n̄kpọ ẹkan se ẹdide. * Ndiọkn̄kan edi ke imekeme ndinam mmọ ẹtọn̄ọ nditan̄ idem. (Rome 12:3) Idụhe owo nnyịn ndomokiet emi okpoyomde ndinam n̄kpọ ekededi emi edinamde eyenete Christ emi ẹyetde aran anam utọ akwa ndudue oro!—Luke 17:2.

9. Didie ke ikeme ndiwụt ke imokpono mme Christian emi Jehovah eyetde aran?

⁹ Didie ke ikeme ndiwụt ke imokpono mme Christian emi Jehovah eyetde aran? Nnyịn idibụpke mmọ nte mmọ ẹkesan̄ade ẹdiọn̄ọ ke ẹyet mmimọ aran. Mbubehe enyene-idem edi oro, nnyịn inyeneke unen ndifiọk. (1 Thess. 4:11; 2 Thess. 3:11) Nnyịn ikponyụn̄ ikereke ke ebe m̀mê n̄wan owo emi ẹyetde aran, ete ye eka esie, m̀mê mbon en̄wen ke ubon mmọ ẹdi mbon emi ẹyetde aran n̄ko. Ndisịne ke otu mbon emi ẹdikade heaven idịghe n̄kpọ ufọk. Abasi esimek owo. (1 Thess. 2:12) N̄kpọ en̄wen emi nnyịn mîkpanamke edi ndibụp mme mbụme emi ẹdiyatde owo esịt. Ke uwụtn̄kpọ, nnyịn ikpobụpke n̄wan owo emi ẹyetde aran m̀mê esitie enye didie ke idem enye ama ekere nte enye edidude uwem ke nsinsi ke isọn̄, ebe esie odu ke heaven. Imenen̄ede inịm ke ima isịm obufa ererimbot, ke Jehovah ayanam kpukpru mme odu-uwem n̄kpọ ẹnyene se idọn̄de mmọ.—Ps. 145:16.

10. Didie ke nnyịn nditre ‘ndima mme ọwọrọiso owo’ edikpeme nnyịn?

¹⁰ Nnyịn nditre ndinam n̄kpọ ye mbon emi ẹyetde aran nte ẹdọhọ ke mmọ ẹdi n̄kpọ ẹkan mbon en̄wen eyekpeme nnyịn n̄ko. Anam didie edi ntre? Bible ọdọhọ ke ndusụk mbon emi ẹyetde aran ẹkeme nditre ndinam akpanikọ nnọ Abasi. (Matt. 25:10-12; 2 Pet. 2:20, 21) Ekpedi nnyịn idịghe mbon emi “[ẹmade] mme ọwọrọiso owo,” nnyịn iditieneke mbon en̄wen ekpededi edi mbon emi ẹyetde aran, m̀mê mbon emi ediwak owo ẹdiọn̄ọde ke esop Abasi, m̀mê mbon emi ẹma ẹkenam n̄kpọ Jehovah ke ediwak isua. (Jude 16) Ndien edieke mmọ ẹtrede ndinam akpanikọ nnọ Jehovah mîdịghe ẹkpọn̄de esop, nnyịn iditreke ndibuọt idem ye Jehovah m̀mê nditre ndinam n̄kpọ esie.

11. Nso ke ikụt ke ibat mbon emi ẹtade uyo ẹnyụn̄ ẹn̄wọn̄de wine Editi?

¹¹ Ediwak isua ko, ekesidi isua akabade, ibat mbon emi ẹtade uyo ẹnyụn̄ ẹn̄wọn̄de wine Editi osụhọde. Edi ke ndondo emi, edidi isua akabade, ibat oro ọdọk. Ndi akpana oro afịna nnyịn? Ihih. Ẹyak ise akpan ntak ifan̄ emi nnyịn mîkpayakke afịna nnyịn.

12. Ntak emi nnyịn mîkpafịnake idem iban̄a ibat mbon emi ẹtade uyo ẹnyụn̄ ẹn̄wọn̄de wine Editi?

¹² “Jehovah ọmọfiọk mmọ eke ẹnyenede enye.” (2 Tim. 2:19) Sia nditọete emi ẹsibatde mbon emi ẹtade uyo ẹnyụn̄ ẹn̄wọn̄de wine Editi mîdịghe Jehovah, mmọ isidiọn̄ọke m̀mê anie ke ẹyet aran m̀mê anie ke owo mîyetke. Ntre ibat oro esisịne mbon emi ẹkerede ke ẹyet mmimọ aran ke ini edide owo iyetke. Ke uwụtn̄kpọ,  ndusụk mbon emi ẹkesitade uyo ẹnyụn̄ ẹn̄wọn̄de wine Editi ẹma ẹtre nte ini akakade. Ekeme ndidi mfịna ibuot anam mbon en̄wen ẹkere ke iyeketiene Christ ikara ke heaven. Se idude edi ke nnyịn inen̄ekede idiọn̄ọ m̀mê mbon oro ẹyetde aran ifan̄ ẹsụhọ ke isọn̄ idahaemi.

13. Ndi Bible asiak ibat mbon emi ẹyetde aran emi ẹdidude ini akwa ukụt editọn̄ọde?

¹³ Mbon emi ẹyetde aran ẹyedu ke ediwak itie ke isọn̄ ini Jesus edidide ndimen mmọ n̄ka heaven. (Matt. 24:31) Bible owụt ke ekpri ibat mbon emi ẹyetde aran ẹyedu ke isọn̄ ke mme akpatre usen. (Edi. 12:17) Edi Bible isiakke m̀mê ifan̄ ke otu mmọ ẹdidu ini akwa ukụt editọn̄ọde.

14. Nso ke Rome 9:11, 16 ekpep nnyịn aban̄a nte Jehovah emekde mbon emi ẹyetde aran?

¹⁴ Jehovah ebiere ini emi enye edimekde mbon emi ẹyetde aran. (Rome 8:28-30) Jehovah ọkọtọn̄ọ ndimek mbon emi ẹyetde aran ke Jesus ama ekeset. Etie nte kpukpru ata mme Christian ke eyo mme apostle ẹkedi mbon emi ẹyetde aran. Edi ke mme isua emi ẹketienede, n̄wakn̄kan ke otu mbon emi ẹkedọhọde ke idi mme Christian ikenen̄ekede itiene Christ. Kpa ye oro, Jehovah ama osụk eyet ibat ibat mbon emi ẹkedide ata mme Christian aran ke mme isua oro. Mmọ ẹketie nte wheat emi Jesus ọkọdọhọde ke ẹyekọri ke otu mbiet. (Matt. 13:24-30) Ke mme akpatre usen emi, Jehovah aka iso ndimek mbon emi ẹdisịnede ke otu owo 144,000. * Ntre Jehovah ekpebiere ndimek ndusụk mmọ esisịt ini mbemiso utịt edi,  nnyịn ikpeyịkke m̀mê enye anam ọfọn. (Kot Rome 9:11, 16.) * Ana ikpeme mbak nnyịn idinam n̄kpọ nte mbonutom emi Jesus eketịn̄de aban̄a ke uwụtn̄kpọ esie kiet. Mmọ ẹma ẹkụni ẹban̄a nte eteufọk mmọ akanamde n̄kpọ ye mbonutom emi ẹketọn̄ọde utom ke akpatre hour.—Matt. 20:8-15.

15. Ndi kpukpru mbon emi ẹyetde aran ẹsịne ke otu “ofụn emi anamde akpanikọ onyụn̄ enyenede ọniọn̄” emi Matthew 24:45-47 etịn̄de aban̄a? Nam an̄wan̄a.

¹⁵ Idịghe kpukpru mbon emi ẹdoride enyịn ndidu ke heaven ẹsịne ke otu “ofụn emi anamde akpanikọ onyụn̄ enyenede ọniọn̄.” (Kot Matthew 24:45-47.) Kpa nte ekedide ke eyo mme apostle, Jehovah ye Jesus ẹda ibat ibat nditọete ẹnọ ediwak owo udia mfịn, m̀mê ẹkpep mmọ n̄kpọ. Ibat ibat mme Christian emi ẹkeyetde aran ke eyo mme apostle ke Abasi akada ewet N̄wed Abasi Christian Usem Greek. Mfịn, ibat ibat mme Christian oro ẹyetde aran ẹnyene utom ndinọ ikọt Abasi “udia ke nnennen ini.”

16. Nso ke afo ekpep ke ibuotikọ emi?

¹⁶ Nso ke ikpep ke ibuotikọ emi? Jehovah emek ndinam n̄wakn̄kan ke otu ikọt esie ẹdu uwem ke nsinsi mi ke isọn̄, onyụn̄ anam ibat ibat mbon emi ẹdikarade ye Jesus ẹka ẹkedu ke heaven. Jehovah ọnọ kpukpru mme asan̄autom esie utịp, edide “eyen Jew” m̀mê “owo duop.” Enye onyụn̄ oyom mmọ ẹnịm ukem ibet ẹnyụn̄ ẹsọn̄ọ ẹda ye imọ. Ana kpukpru mmọ ẹsụhọde idem. Ana kpukpru mmọ ẹsịne ke otu kiet ẹtuak ibuot ẹnọ enye ẹnyụn̄ ẹdiana kiet. Onyụn̄ ana kpukpru mmọ ẹsịn idem ẹnam se idinamde emem odu ke esop. Nte inen̄erede ikpere utịt ererimbot emi, ẹyak kpukpru nnyịn ika iso inam n̄kpọ Jehovah inyụn̄ itiene Christ nte “otuerọn̄ kiet.”—John 10:16.