1. Ebɛn asɛm na Jehovah kãa dɛ obesi wɔ hɛn aber yi do?

JEHOVAH kãe too hɔ dɛ wɔ hɛn aber yi do no, “Mbarimba du a wofi amanaman kasaa nyina mu bosusuo Jewnyi baako n’atar ano, dɛ, Yɛnye hom bɔkɔ, osiandɛ yɛatse dɛ Nyankopɔn nye hom wɔ hɔ.” (Zech. 8:23) “Jewnyi” a wɔkãa noho asɛm wɔ ha no gyina hɔ ma hɔn a Nyankopɔn dze no sunsum krɔnkrɔn asera hɔn no. Hɔnara so na wɔsan frɛ hɔn “Nyankopɔn Israel” no. (Gal. 6:16) “Mbarimba du” no gyina hɔ ma hɔn a wɔwɔ enyidado dɛ wɔbɛtsena ase daa wɔ asaase do no. Wonyim dɛ Nyankopɔn apaw dɛm nyimpakuw a wɔdze sunsum asera hɔn yi. Nkyii so, wɔtse nka dɛ ɔyɛ ho kwan kɛse a woenya dɛ wɔnye hɔn a wɔasera hɔn nyina abɔ mu rosom Nyankopɔn.

2. Hɔn a wɔasera hɔn no, ebɛn kwan do na “mbarimba du” no nye ‘hɔn kɔ’?

² Hɔn a wɔasera hɔn a wɔwɔ asaase do no, ɔwɔ mu dɛ yerunntum nnhu hɔn mu kor biara ne dzin dze, * naaso hɔn a hɔn enyidado nye dɛ wɔbɛtsena asaase do botum nye ‘hɔn akɔ.’ Ebɛn kwan do? Bible no kã dɛ “mbarimba du” no “bosusuo Jewnyi baako n’atar ano, dɛ, Yɛnye hom bɔkɔ, osiandɛ yɛatse dɛ Nyankopɔn nye hom wɔ hɔ.” Bible no kãa Jewnyi kor ho asɛm. Naaso kasafua “hom” a opue wɔ kyerɛwsɛm no mu no gyina hɔ ma nyimpa dodow bi. Iyi kyerɛ dɛ Jewnyi no nnyɛ nyimpa kor pɛr, mbom ogyina hɔ ma Christianfo kuw a wɔasera hɔn no nyina. Christianfo a wɔasera hɔn nye hɔn a wɔnnseraa hɔn no nyina bɔ mu som Jehovah.  Naaso, Christianfo a wɔwɔ enyidado dɛ wɔbɛtsena asaase do no mmbu hɔn a wɔasera hɔn no dɛ hɔn akandzifo, osiandɛ wonyim dɛ Jesus nye hɔn Kandzifo.​—Matt. 23:10.

3. Ebɛn nsɛmbisa na yebenya ho mbuae wɔ adzesua yi mu?

³ Christianfo a wɔasera hɔn no, binom da ho ara ka Nyankopɔn n’asomfo a wɔwɔ hɔ ndɛ no ho, dɛm ntsi, bi a nyimpa binom bebisa dɛ: (1) Ebɛn kwan do na ɔsɛ dɛ hɔn a wɔasera hɔn no bu hɔnho? (2) Hɔn a wodzi paanoo no na wɔnom wenyin no bi wɔ Nkaadzi no ase no, ebɛn kwan do na ɔsɛ dɛ yebu hɔn? (3) Hɔn a wodzi paanoo no na wɔnom wenyin no bi no, sɛ hɔn dodow rokɔ enyim a, ɔsɛ dɛ no ho asɛm haw hɛn anaa? Yebenya dɛm nsɛmbisa no ho mbuae wɔ adzesua yi mu.

4. Ebɛn kɔkɔbɔ na ɔwɔ 1 Corinthfo 11:27-29 a ɔsɛ dɛ hɔn a wɔasera hɔn susu ho enyiber do, na ebɛnadze ntsi a?

⁴ Ɔsɛ dɛ hɔn a wɔasera hɔn no susu kɔkɔbɔ a ɔwɔ 1 Corinthfo 11:27-29 no ho enyiber do. (Kenkan.) Ebɛn kwan do na bi a obi a wɔasera no bedzi paanoo no na ɔaanom wenyin no “dɛ mbrɛ ɔnnsɛ” wɔ Nkaadzi no ase? Sɛ odzi paanoo no na ɔnom wenyin no bi na aber kor no ara ɔmmfa Nyankopɔn ne tsenenee gyinapɛn  nnyɛ edwuma a, ɔkyerɛ dɛ odzi na ɔnom dɛ mbrɛ ɔnnsɛ. (Heb. 6:4-6; 10:26-29) Christianfo a wɔasera hɔn no, wɔma ɔtsena hɔn adwen mu dɛ, sɛ wɔpɛ dɛ hɔn nsa ka “Nyankopɔn ɔsor frɛ a ɔwɔ Christ Jesus mu no n’empirenyimdze” no a, ɔsɛ dɛ wɔkɔ do dzi nokwar.​—Phil. 3:13-16.

5. Christianfo a wɔasera hɔn no, ɔsɛ dɛ wobu hɔnho dɛn?

⁵ Jehovah no sunsum krɔnkrɔn boa no nkorɔfo ma wɔbrɛ hɔn ho adze na wɔnnyɛ ahomemado. (Eph. 4:1-3; Col. 3:10, 12) Dɛm ntsi hɔn a wɔasera hɔn no nntse nka dɛ wɔkrɔn kyɛn afofor. Wonyim dɛ Jehovah mma wonnya no sunsum krɔnkrɔn kɛse nnkyɛn n’asomfo nkaa no. Dɛmara so na wɔnntse nka dɛ wɔtse Bible mu nokwar no ase yie kyɛn afofor. Orinnsi da dɛ wɔbɛkã akyerɛ obi dɛ wɔasera no ntsi ɔnhyɛ ase ndzi paanoo no na ɔnnom wenyin no bi wɔ Nkaadzi no ase. Mbom no, wɔdze ahobrɛadze gye to mu dɛ Jehovah nkotsee na ɔpaw afofor dɛ wɔnkɔ sor.

6. Dɛ mbrɛ 1 Corinthfo 4:7, 8 no kyerɛ no, ebɛn ndzeyɛɛ na Christianfo a wɔasera hɔn da no edzi?

⁶ Ɔwɔ mu, ɔyɛ ho kwan a hɔn a wɔasera hɔn no enya dɛ wɔbɔkɔ sor, naaso wɔnnhwɛ kwan dɛ afofor bobu hɔn wɔ kwan soronko do. (Phil. 2:2, 3) Wonyim so dɛ aber a Jehovah seraa hɔn no, ɔamma afofor anntse ho asɛm biara. Ntsi Christiannyi a wɔasera no no, ahyɛse no ara sɛ afofor anngye enndzi dɛ wɔasera no mpo a, ɔnnyɛ no nwanwa. Ɔgye to mu dɛ Bible no akã dɛ obi a ɔbɛkã dɛ Nyankopɔn ama no asodzi soronko no ɔnnsɛ dɛ yɛper hɛnho gye to mu. (Nyi. 2:2) Christiannyi a wɔasera no nnkɛpɛ dɛ ɔbɔtwetwe adwen aba no do ntsi ɔrennkã nnkyerɛ nkorɔfo dɛ wɔasera no. Na dɛmara so na ɔremmfa nntuw noho nnkyerɛ afofor.​—Kenkan 1 Corinthfo 4:7, 8.

7. Ebɛnadze na hɔn a wɔasera hɔn kwetsir dɛ wɔbɛyɛ, na ebɛnadze ntsi a?

⁷ Christianfo a wɔasera hɔn no nntse nka dɛ afofor a wɔasera hɔn no nkotsee na ɔsɛ dɛ wɔgye ber nye hɔn bɔ tse dɛ mbrɛ wɔyɛ kuw bi mufo. Wonnkyin nnkɔhwehwɛ afofor a hɔn so wɔasera hɔn dɛ wɔrokɔtwetwe nkɔmbɔ afa sunsum krɔnkrɔn a wɔdze asera hɔn no ho. Na dɛmara so na wɔnntsetsew ekuw dɛ wɔdze rusũa Bible no. (Gal. 1:15-17) Sɛ Christianfo a wɔasera hɔn yɛ dɛm a koryɛ nnkɛtsena asafo no mu. Ɔno bɛkyerɛ dɛ wɔrokõ etsia Nyankopɔn no sunsum krɔnkrɔn a ɔboa no nkorɔfo ma asomdwee tsena hɔn ntamu no.​—Rom. 16:17, 18.

8. Hɔn a wodzi paanoo no na wɔnom wenyin no bi wɔ Nkaadzi no ase no, ebɛnadze ntsi na ɔsɛ dɛ yɛyɛ ahwɛyie wɔ mbrɛ yesi bu hɔn no mu? (Hwɛ ase hɔ asɛm no so.)

⁸ Christianfo mbarimba na mbaa a wɔasera hɔn no, ɔsɛ dɛ yebu hɔn dɛn? Sɛ mpo obi yɛ Christ no nua a wɔasera no a, ɔyɛ mfomdo dɛ  yɛdze enyidzi mbordo bɛma no. (Matt. 23:8-12) Sɛ Bible no kã asafo mu mpanyimfo ho asɛm a, ɔhyɛ hɛn nkuran dɛ ‘yensũasua hɔn gyedzi,’ naaso ɔnnkã nnkyerɛ hɛn dɛ yebotum dze nyimpa biara ayɛ hɛn kandzifo. (Heb. 13:7) Ɔyɛ nokwar, Bible no kã dɛ nyimpa bi wɔ hɔ a “wɔsɛ enyidzi mbɔho.” Iyi yɛ nokwar osiandɛ “wodzi panyin yie” na ‘wɔyɛ edwumadzen wɔ asɛm no nye nkyerɛkyerɛ mu.’ Ɔno ntsi na Bible no kã dɛ yendzi hɔn nyi na nnyɛ dɛ wɔasera hɔn ntsi a. (1 Tim. 5:17) Christianfo a wɔasera hɔn no, sɛ yɛkamfo hɔn anaa yɛtwe adwen kɔ hɔn do pii a obotum ama wɔaafɛr. * Anaa dza ɔnnyɛ koraa no, obotum ama wɔaayɛ ahantan. (Rom. 12:3) Na hɛn mu biara n’enyi nnkɛgye ho dɛ ɔbɛyɛ biribi a obotum ama Christ no nuanom mu kor eedzi mfomdo kɛse a ɔtse dɛm!​—Luke 17:2.

9. Yebesi dɛn akyerɛ dɛ yebu Christianfo a wɔasera hɔn no?

⁹ Yebesi dɛn akyerɛ dɛ yebu hɔn a Jehovah asera hɔn no? Onnyi dɛ yebisa hɔn dza ɔmaa wohun dɛ wɔasera hɔn. Iyi yɛ ankorankor biara n’asɛm, na yennyi ho kwan dɛ yehu. (1 Thess. 4:11; 2 Thess. 3:11) Afei so, onnyi dɛ yenya adwen dɛ wɔasera hɔn kunnom anaa hɔn yernom, hɔn awofo, anaa hɔn ebusuafo afofor so. Obi nnya ɔsor frɛ ho enyidado mmfi n’ebusua mu, na mbom onya fi Nyankopɔn nkyɛn. (1 Thess. 2:12) Bio so, onnyi dɛ yebisa hɔn nsɛm a obotum epira afofor. Dɛ nhwɛdo no, onua a wɔasera no no, onnyi dɛ yebisa ne yer dɛ, sɛ no kun gya no hɔ kɔ sor a, ɔbɛtse nka dɛn ber a ɔbɛtsena asaase do daa a no kun no nnka noho? Iyi nnyɛ asɛm, osiandɛ yebotum enya awerɛhyɛmu dɛ Jehovah bɛma ‘atseasefo nyinara enya hɔn akɔndɔdze’ wɔ wiadze fofor no mu.​—Ndw. 145:16.

10. Hɔn a wɔasera hɔn no, sɛ yekwetsir dɛ yɛbɛhyɛ hɔn enyimnyam a, ebɛn kwan do na ɔbɔbɔ hɛnho ban?

¹⁰ Sɛ yemmbu hɔn a wɔasera hɔn no dɛ hɔnho hia kyɛn afofor a, ɔbɔbɔ hɛnho ban. Ebɛn kwan do? Bible no ma yɛtse ase dɛ Christianfo a wɔasera hɔn no, bi a na hɔn mu binom enndzi nokwar ennkesi ase. (Matt. 25:10-12; 2 Pet. 2:20, 21) Ntsi, sɛ yekwetsir dɛ yɛbɛhyɛ nyimpa enyimnyam a, ɔremma yɛnnyɛ nyimpa ekyirdzifo da. Mpo, enuanom a nyimpa pii nyim hɔn, hɔn a wɔdze mfe pii asom Jehovah, nye hɔn a wɔasera hɔn no, yennkedzi hɔn ekyir da. (Jude 16) Ntsi, sɛ ɔkɛba dɛ woenndzi nokwar anaa wofi asafo no mu a, yennkegyaa dɛ yɛbɔsom Jehovah anaa yɛnnkɔhwer gyedzi a yɛwɔ wɔ no mu no.

11. Hɔn a wodzi paanoo no na wɔnom wenyin no bi wɔ Nkaadzi no ase no, ndaansa yi, hɔn dodow ho asɛm tse dɛn?

¹¹ Mfe pii a woetwa mu no, nyimpadodow a wodzi paanoo no na wɔnom wenyin no bi wɔ Nkaadzi no ase no, nna tsew araa na hɔn do retsew. Naaso, ndaansa yi, hɔn a wodzi paanoo no na wɔnom wenyin no bi no, afe biara hɔn dodow no kɔ enyim. Ana ɔwɔ dɛ yɛma iyi ho asɛm haw hɛn anaa? Oho. Hom mma yɛnhwɛ siantsir a onnyi dɛ yɛma iyi haw hɛn.

12. Hɔn a wodzi paanoo no na wɔnom wenyin no bi wɔ Nkaadzi no ase no, onnyi dɛ yɛma hɔn dodow ho asɛm haw hɛn. Ebɛnadze ntsi a?

¹² ‘Jehovah nyim hɔn a wɔyɛ nedze.’ (2 Tim. 2:19) Enuanom a wɔkan nyimpa a wodzi paanoo no na wɔnom wenyin no bi wɔ Nkaadzi no ase no, wonnyim hɔn a wɔasera hɔn ankasa no. Naaso Jehovah dze, onyim. Ntsi, hɔn a wosusu dɛ wɔasera hɔn naaso wɔnnseraa hɔn no nyina ka nyimpadodow a wodzi paanoo no na wɔnom wenyin no bi no ho. Dɛ nhwɛdo no, binom a nkyɛ wodzi paanoo no na wɔnom wenyin no bi no, ekyir yi wogyaa dzi. Bi a, nna afofor so wɔ adwen mu haw, ntsi nna wosusu dɛ wɔka hɔn a wɔnye Christ bɔbɔ mu edzi hen wɔ sor no ho. Iyi ma ɔda edzi kofee dɛ Christianfo a wɔasera  hɔn a wɔaka wɔ asaase do no, yennyim hɔn dodow pɔtsee.

13. Christianfo a wɔasera hɔn no, aso Bible no kã hɔn dodow a wɔbɛka wɔ asaase do ber a ahohiahia kɛse no ahyɛ ase no?

¹³ Sɛ Jesus ba dɛ ɔrebɛfa hɔn a wɔasera hɔn no akɔ sor a, ɔbɛba no, nna wɔwɔ aman pii do. (Matt. 24:31) Bible no kã dɛ, sɛ odu ewiei mber no a, hɔn a wɔasera hɔn no mu kakraabi na wɔbɛka wɔ asaase do. (Nyi. 12:17) Naaso, Bible no annkã hɔn mu dodow a wɔbɛka ber a ahohiahia kɛse no ahyɛ ase no.

14. Dɛ mbrɛ wɔakã wɔ Romefo 9:11, 16 no, ebɛnadze na yesũa fa mbrɛ wosi paw hɔn a wɔasera hɔn no ho?

¹⁴ Jehovah na ɔkyerɛ ber a ɔbɛpaw hɔn a wɔasera hɔn no. (Rom. 8:28-30) Jesus no wusoɛr ekyir na Jehovah hyɛɛ ase paaw hɔn a wɔasera hɔn no. Tsetse Christianfo no hɔn aber do no, ɔbɛyɛ dɛ nna nokwar Christianfo nyina yɛ hɔn a wɔasera hɔn. Mfe pii ekyir no, hɔn a nna wɔkyerɛ dɛ wɔyɛ Christianfo no, hɔn mu dodowara enndzi Christ n’ekyir ankasa. Dɛm mber no mu mpo no, Jehovah seraa nyimpa kakra a nna wɔyɛ nokwar Christianfo no. Nna wɔtse dɛ ewifua a Jesus kãa dɛ obefifir wɔ nworahaban mu no. (Matt. 13:24-30) Nda a odzi ekyir mu no, Jehovah akɔ do apaw nkorɔfo a wɔbɛyɛ nyimpa 144,000 no mufo no. * Ntsi, sɛ Nyankopɔn si gyinae dɛ ɔbɛpaw dɛm nkorɔfo yi bi wɔ ber tsiabaa bi ansaana ewiei no aba a, onnyi dɛ hɛn adwen mu yɛ hɛn konsee wɔ ne nyansaa ho. (Kenkan Romefo 9:11, 16.) * Ɔwɔ dɛ yɛyɛ ahwɛyie na yɛannyɛ hɛn adze tse dɛ edwumayɛfo a Jesus kãa hɔnho asɛm wɔ ne mfatoho kor mu no. Dɛm edwumayɛfo yi hwinhwinii tsiaa hɔn wura wɔ  kwan a ɔnye edwumayɛfo a wɔbɛyɛɛ edwuma wɔ dɔnhwer a otwa tun mu no dzii no ho.​—Matt. 20:8-15.

15. Dɛ mbrɛ wɔakã wɔ Matthew 24:45-47 no, Christianfo a wɔasera hɔn no, aso hɔn nyina na wɔka “akowaa nokwafo nye nyansafo” no ho? Kyerɛkyerɛ mu.

¹⁵ Nnyɛ hɔn a wɔwɔ enyidado dɛ wɔbɔkɔ sor no nyina na wɔka “akowaa nokwafo nye nyansafo” no ho. (Kenkan Matthew 24:45-47.) Ndɛ, Jehovah na Jesus nam enuanom mbarimba kakraabi do rema nkorɔfo pii edziban anaa ɔrekyerɛkyerɛ hɔn dɛ mbrɛ nna ɔtse wɔ tsetse Christianfo no hɔn aber do no. Asomafo no hɔn aber do no, Christianfo a wɔasera hɔn no, kakraabi na wɔmaa wɔkyerɛɛw Christianfo Greek Kyerɛwnsɛm no. Ndɛ so, Christianfo a wɔasera hɔn no, kakraabi na wɔdze ahyɛ hɔn nsa dɛ wɔmma Nyankopɔn no nkorɔfo “edziban wɔ ber a ɔsɛ mu.”

16. Ebɛnadze na esũa efi adzesua asɛm yi mu?

¹⁶ Ebɛnadze na yeesũa efi adzesua asɛm yi mu? Jehovah esi gyinae dɛ ɔbɛma n’asomfo fã kɛsenara onnyiewiei nkwa wɔ asaase do, na ɔaama nyimpa kakraabi a wɔnye Jesus bɔbɔ mu edzi hen no nkwa wɔ sor. Jehovah ma n’asomfo nyina akatua, “Jewnyi” no nye “mbarimba du” no, na ɔhwɛ kwan dɛ hɔn nyina bedzi mbra kor no ara do, na wɔaakɔ do edzi nokwar. Ɔwɔ dɛ hɔn nyina brɛ hɔnho adze. Ɔwɔ dɛ hɔn nyina yɛ kor, na wɔbɔ mu som no. Afei so, ɔwɔ dɛ hɔn nyina bɔ mbɔdzen ma asomdwee tsena asafo no mu. Aber a ewiei no rebɛn pɛɛ no, hom mma hɛn nyina nkɔ do nsom Jehovah, na yɛnkɔ do ndzi Christ n’ekyir dɛ ‘nguankuw kor.’​—John 10:16.