1. Na cava sa tukuna rawa tu o Jiova ni na yaco ena noda gauna?

SA TUKUNA rawa tu o Jiova na ka ena yaco ena noda gauna. E kaya: “Eratou na mai taura e tini na tamata eratou duivosavosa mai na veivanua kece, io, eratou na taura matua na nona isulu balavu e dua na Jiu, eratou kaya: ‘Keitou via lako vata kei kemudou, ni keitou rogoca ni tiko vata kei kemudou na Kalou.’” (Saka. 8:23) O cei na “Jiu”? O ira na lumuti ena yalo tabu. Era kilai tale ga mera “Isireli ni Kalou.” (Kala. 6:16) O cei na “tini na tamata?” O ira e nodra inuinui na bula tawamudu e vuravura. Era kila ni o Jiova e digitaka na ilawalawa lumuti qori, era raica tale ga me ka dokai nodra qaravi Jiova vata.

2. Eratou “lako vata” vakacava kei ira na lumuti na “tini na tamata”?

² Eda na sega ni kila na yacadra kece na lumuti era se bula tiko nikua. * Ia e rawa nira “lako vata” kei ira na lumuti o ira e nodra inuinui na bula tawamudu e vuravura. Ena sala cava? E kaya na iVolatabu ni o iratou na “tini na tamata,” eratou na “taura matua na nona isulu balavu e dua na Jiu, eratou kaya: ‘Keitou via lako vata kei kemudou, ni keitou rogoca ni tiko vata kei kemudou  na Kalou.’” E tukuni ena tikinivolatabu qo e dua ga na Jiu. Ia na vosa “kemudou” e dusia e le vica. Kena ibalebale, na Jiu qo e sega ni dua ga na tamata, ia e dusi ira kece na lumuti. O ira na sega ni lumuti era duavata kei ira na lumuti mera qaravi Jiova. Era na sega ni raici ira na lumuti me nodra iliuliu nira kila vinaka ni nodra iLiuliu ga o Jisu.—Maciu 23:10.

3. Na taro cava ena saumi ena ulutaga qo?

³ E levu na lumuti era se bula tiko nikua e vuravura, de dua eda na taroga: (1) Me vakacava nodra rai na lumuti me baleti ira? (2) Meda raici ira vakacava na vakayagataka na madrai kei na waini ena iVakananumi? (3) Meda leqataka na tubu ni kedra iwiliwili? Ena saumi qori ena ulutaga qo.

4. Na ivakasala cava ena 1 Korinica 11:27-29 mera vakasamataka vakabibi na lumuti? Na vuna?

⁴ E vinakati mera vakasamataka vakabibi na lumuti na ivakasala ena 1 Korinica 11:27-29. (Wilika.) Ena rawa vakacava vua e dua na lumuti me  vakayagataka “ena veibeci” na madrai kei na waini? Ena cakava qori ni kania na madrai qai gunuva na waini, ia e talaidredre tiko ena lawa i Jiova. (Iper. 6:4-6; 10:26-29) Era kila na lumuti ni dodonu mera yalodina tiko ga mera rawata “na icovi ni veikacivi ni Kalou i lomalagi ena vuku i Karisito Jisu.”—Fpai. 3:13-16.

5. Me vakacava nodra rai na lumuti me baleti ira?

⁵ Na yalo tabu i Jiova e uqeti ira na nona dauveiqaravi mera yalomalumalumu, sega ni dokadoka. (Efeso 4:1-3; Kolo. 3:10, 12) Era na sega gona ni nanuma na lumuti nira vinaka cake. Era kila ni o Jiova e sega ni solia vakalevu vei ira na nona yalo tabu, vakalailai vei ira na vo ni nona dauveiqaravi. Era sega tale ga ni nanuma ni levu na ka dina vakaivolatabu era kila ni vakatauvatani kei ira na kena vo. Era na sega ni tukuna vua e dua ni lumuti tale ga, me vakayagataka kina na madrai kei na waini ena iVakananumi. Ia era yalomalumalumu nira kila ni o Jiova ga ena digitaki ira na lai bula i lomalagi.

6. Me vaka e tukuni ena 1 Korinica 4:7, 8, me vakacava na nodra itovo na lumuti?

⁶ Era kila na lumuti ni ka dokai mera lai bula i lomalagi, ia era sega ni vinakata mera qoroi. (Fpai. 2:2, 3) Era kila tale ga ni gauna e lumuti ira kina o Jiova, a sega ni veitukuniyaka. Ena sega gona ni kurabui e dua na lumuti ke dredre mera vakabauta eso tale ni digitaki. E kila vinaka ni tukuna na iVolatabu me kua ni vakabauti totolo e dua e kaya ni lesi koya na Kalou ena itavi dokai. (Vkta. 2:2) Ke dua erau se qai sota vakadua, ena sega ni tukuna vua ni lumuti me kua kina ni vakacerecerei. Ena sega tale ga ni dokadoka me veitukuniyaka ni lumuti.—Wilika 1 Korinica 4:7, 8.

7. Na cava era na sega ni cakava na lumuti? Na vuna?

⁷ Era sega ni nanuma na lotu vaKarisito lumuti mera vakailala ga vakataki ira, vaka mera lewena tiko e dua na isoqosoqo. Era na sega ni vaqarai ira na vo ni lumuti mera veitalanoataka na sala era lumuti kina, se mera lewena e dua na ilawalawa mera vulica vata na iVolatabu. (Kala. 1:15-17) Ke ra cakava qori, ena veisei na ivavakoso. Era na sega ni cakacaka vata kei na yalo tabu e vakavuna tiko nodra duavata kei na vakacegu na dauveiqaravi ni Kalou.—Roma 16:17, 18.

8. Na cava meda qarauna kina na noda rai me baleti ira na lumuti? (Raica na ivakamacala e ra.)

⁸ Eda na raici ira vakacava na lumuti? E cala ke da qoroya vakasivia e dua ke lumuti mada ga. (Maciu 23:8-12) Ni vakamacalataki ira na qase ni ivavakoso na iVolatabu, e tukuna meda “vakatotomuria na nodra vakabauta.” Ia e sega ni tukuna meda vakacerecerea e dua na tamata me noda iliuliu. (Iper. 13:7) E kaya na iVolatabu mera “rokovi vakalevu” eso. Eda sega ni cakava qori nira lumuti, ia nira “qarava vinaka na nodra itavi,” era “gumatua [tale ga] ena nodra tukuna kei na nodra vakavulica na vosa ni Kalou.” (1 Tim. 5:17) Ke da qoroi ira vakasivia na lumuti se vakalevulevui ira, ena rawa nira madua. * Se ca sara, era na dokadoka kina. (Roma 12:3) Eda sega gona ni via cakava e dua na ka mera tarabe kina na lumuti!—Luke 17:2.

9. Eda na vakaraitaka vakacava nida dokai ira na lumuti?

⁹ Eda na vakaraitaka vakacava nida dokai ira na lumuti? Eda na sega ni taroga na sala era lumuti kina. Qori e nodra ga kei Jiova, e sega ni dodonu meda kila. (1 Ces. 4:11; 2 Ces. 3:11) Meda kua tale ga ni nanuma ni lumuti na watidra, nodra itubutubu, se na lewe ni nodra vuvale. E sega ni ka ni kawa na lai bula i lomalagi. E veidigitaki na Kalou. (1 Ces. 2:12) Meda qarauna tale ga na taro e rawa ni vakamosi yalo. Kena ivakaraitaki, ke lumuti e dua na tacida tagane, eda na sega ni tarogi watina: “Na cava nomu rai me baleta na bula tawamudu e vuravura ni sa yali o watimu?” Eda vakadeitaka ni o Jiova ena “vakaceguya na veika era gadreva na kabula kece” ena vuravura vou.—Same 145:16.

10. Eda na taqomaki vakacava nida sega ni vakalevulevui ira eso tale?

¹⁰ Eda na taqomaki tale ga nida sega ni vakalevulevui ira na lumuti. Ena sala cava? E kaya na iVolatabu ni rawa nira tawayalodina eso na lumuti. (Maciu 25:10-12; 2 Pita 2:20, 21) Ia ke da sega ni vakalevulevui ira eso tale, eda na sega ni muritamata, vakabibi o ira na lumuti, o ira na qarava na itavi bibi ena ivavakoso, se o ira na qaravi Jiova tu mai vakadede. (Juta 16) Ke ra tawayalodina se biuta na ivavakoso, ena dei tiko ga na noda vakabauta, eda na qaravi Jiova tiko ga.

11. Na cava e laurai ena kedra iwiliwili na vakayagataka na madrai kei na waini?

¹¹ E vica vata na yabaki na kena lutu tiko ga na kedra iwiliwili na vakayagataka na madrai kei na waini ena iVakananumi. Ia ena vica ga na yabaki qo, e tubu tale na kedra iwiliwili. Vakacava meda lomaleqa? Sega. Meda dikeva mada eso na vuna.

12. Na cava meda kua ni leqataka kina na kedra iwiliwili na vakayagataka na madrai kei na waini?

¹² “O Jiova e kilai ira na nona tamata.” (2 Tim. 2:19) Era sega ni kila na tacida tagane era wiliki ira na vakayagataka na madrai kei na waini se o cei dina e lumuti, o Jiova ga e kila. Na iwiliwili qori era okati kina eso era kaya tiko  nira lumuti, ia era sega ni digitaki. Kena ivakaraitaki, eso era dau vakayagataka tu mai na madrai kei na waini, ia qo era sa cegu. Eso tale era nanuma nira na lai veiliutaki kei Karisito i lomalagi ena vuku ni mate ni vakasama se lomabibi. Kena ibalebale, eda sega ni kila na kedra iwiliwili kece na lumuti era se bula tiko e vuravura.

13. E cavuti ena iVolatabu na iwiliwili ni lumuti e vuravura ni tekivu na veivakararawataki levu?

¹³ Era na tiko e veiyasa i vuravura na lumuti ni kumuni ira o Jisu i lomalagi. (Maciu 24:31) E tukuna na iVolatabu ni na bula tiko e vuravura e dua na iwiliwili lailai sara ni lumuti ena iotioti ni veisiga. (Vkta. 12:17) Ia e sega ni tukuni na kedra iwiliwili ni tekivu na veivakararawataki levu.

14. Me vaka e cavuti ena Roma 9:11, 16, na cava meda kila tiko me baleta na nodra digitaki na lumuti?

¹⁴ E lewa o Jiova na gauna me digitaki ira kina na lumuti. (Roma 8:28-30) E tekivu digitaki ira na lumuti o Jiova ni vakaturi oti o Jisu. Kena irairai nira lumuti kece na lotu vaKarisito ena imatai ni senitiuri. Ena veiyabaki e tarava, levu era kaya nira lotu vaKarisito era sega dina ni muri Karisito. Ia o Jiova e lumuti ira eso na lotu vaKarisito dina ena gauna qori. E kaya o Jisu me baleti ira nira vaka na witi e tubu ena maliwa ni co ca. (Maciu 13:24-30) Ena iotioti ni veisiga, o Jiova se digitaki ira tiko ga na lewe ni 144,000. * Kena ibalebale, ke digitaka  o Jiova eso ni bera na icavacava, e dodonu meda nuitaka ga na nona vuku. (Wilika Roma 9:11, 16.) * Meda kua ga ni vakataki ira na tamata cakacaka ena vosa vakatautauvata i Jisu. Era vosakudrukudrutaka na ka e cakava na iliuliu ni cakacaka vei ira na qai tekivu cakacaka ena iotioti ni aua.—Maciu 20:8-15.

15. Me vaka e cavuti ena Maciu 24:45-47, era lewe ni “dauveiqaravi yalodina e vuku” na lumuti kece? Vakamacalataka.

¹⁵ Era sega ni lewe ni “dauveiqaravi yalodina e vuku” na lumuti kece. (Wilika Maciu 24:45-47.) Me vaka ena imatai ni senitiuri, erau vakayagataka tale ga nikua o Jiova kei Jisu e vica ga na tacida tagane me ratou vakani ira e levu, se vakavulici ira. E vica ga na lotu vaKarisito lumuti eratou digitaki me ratou vola na iVolatabu vaKirisi vaKarisito. Nikua tale ga, eratou lesi e vica ga na lotu vaKarisito lumuti me ratou vakarautaka na “kakana ena kena gauna donu.”

16. Na cava o vulica ena ulutaga qo?

¹⁶ Na cava eda vulica ena ulutaga qo? E vakarautaka o Jiova na bula tawamudu e vuravura vei ira e le levu, ia e vica ga era na lai veiliutaki kei Jisu i lomalagi. E vakalougatataki ira kece na nona dauveiqaravi o Jiova, wili kina o koya na “Jiu,” kei na “tini na tamata.” E vinakata o Jiova mera muria e dua ga na ivakatagedegede, mera yalodina tale ga. E bibi mera yalomalumalumu kece, mera qaravi koya ena duavata, mera kua ni veisei. E bibi tale ga mera uqeta kece na veiyaloni ena ivavakoso. Nida volekata yani na icavacava, meda qaravi Jiova tiko ga qai muri Karisito nida “dua ga na qelenisipi.”—Joni 10:16.