1. Ka Jéova té anonsé anrapò èvè épòk an nou ?

MI SA Jéova anonsé anrapò èvè épòk an nou : « 10 nonm ki sòti adan tout lang kè sé nasyon-la ka palé ké pongné lenj a on Juif, wi, yo ké pongné-y byen fò é yo ké di : “Nou vé ay èvè zòt, pas nou tann-di kè Bondyé èvè zòt” » (Zak. 8:23). Adan vèwsé-lasa, « Juif »-la ka rèprézanté séla ki rèsèvwa lèspri sen a Bondyé pou vin wen. Yo ka kriyé-yo osi « Izrayèl a Bondyé » (Gal. 6:16). Sé « 10 nonm »-la ka rèprézanté moun ki ni lèspérans dè viv asi latè pou touttan. Yo sav kè sé Jéova ki chwazi sé wen-la é pou yo sé on gran lonnè yo ni dè sèvi Bondyé ansanm èvè yo.

2. An ki sans sé « 10 nonm » la ‘k’ay èvè’ sé wen-la ?

² Menmsi pa ni mwayen konnèt non a chak wen ki asi latè jòdijou *, moun ki ni lèspwa dè viv asi latè pé « ay èvè » sé wen la. Ankijan ? Labib ka di kè « 10 nonm » té’é ‘pongné lenj a on Juif, é yo té’é di : “Nou vé ay èvè zòt, pas nou tann-di kè Bondyé èvè zòt”’. Adan vèwsé-lasa  yo ka palé dè onsèl Juif. Men lè nou ka jwenn lèmo « zòt » sé pou palé dè plizyè moun. Donk, savédi kè Juif-lasa a pa onsèl moun, men i ka rèprézanté tout sé wen-la. Séla ki pa wen la ka sèvi Jéova ansanm èvè sé wen-la. Men, apapousa yo ka pansé kè sé wen-la sé chèf a yo pas yo sav byen kè yo ni onsèl Chèf : sé Jézikris (Mat. 23:10).

3. A ki kèsyon nou ké réponn adan awtik-lasa ?

³ Men piskè ka rété krétyen wen adan pèp a Bondyé jòdijou, sèwten moun pé rivé a pozé-yo sé kèsyon-lasa : 1) Ès fò on wen konpranndèdi i ni plis valè ki lézòt ? 2) Kijan fò-nou aji èvè séla ki ka bwè diven-la é ki ka manjé pen-la pannan Mémoryal-la ? 3) Ès fò-nou enkyété-nou davwa kantité moun ki ka pran pen-la é diven-la ka ògmanté ? Adan awtik-lasa nou ké réponn a sé kèsyon-lasa.

4. Ki avèwtisman nou ka touvé an 1 Korentyen 11:27-29 é poukwa fò sé wen-la pran on tan pou réfléchi asi-y ?

⁴ Fò sé wen-la pran on tan pou réfléchi asi on avèwtisman nou ka touvé an Bib-la é fò-yo pran-y oséryé. I ka touvé-y  an 1 Korentyen 11:27-29 (li-y). A kimoman on wen té’é pé pran pen-la é diven-la alòskè nòwmalman fò pa i té’é pran-yo ? Sé lè i ka manjé pen-la é lè i ka bwè diven-la alòskè i pa’a rèspèkté prensip a Jéova. (Ébr. 6:4-6 ; 10:26-29). Sé wen-la ja byen konprann kè fò-yo rété fidèl si yo vlé trapé ‘rékonpans-la, kivédi lavi an syèl-la kè Bondyé ka bay grasa Kris Jézi’ (Filip. 3:13-16).

5. Ès fò on wen akwè-y ?

⁵ Lèspri sen a Jéova ka édé sèwvitè a-y aji èvè imilité, men i pa’a fè-yo aji èvè òwgèy (Éféz. 4:1-3 ; Kol. 3:10, 12). Kifè sé wen-la pa’a santi-yo méyè ki lézòt. Yo sav kè Jéova pa oblijé ba-yo plis lèspri sen ki rèstan sèwvitè a-y. Yo pa’a mèt an tèt a yo kè yo ka konprann Labib pibyen ki lézòt nonplis. É yo pé’é jen pran si yo pou di on moun kè i wen é kè fò i koumansé pran pen-la é diven-la. Olyé dè sa, yo ka rèkonnèt èvè onlo imilité kè sé Jéova tousèl ki ka envité on moun pou ay viv an syèl-la.

6. Sèlon sa ki maké an 1 Korentyen 4:7, 8, ki konpòwtèman on krétyen ki wen dwètèt ni ?

⁶ Sé wen-la sav kè sé on gran lonnè Jéova ka fè on moun lè i ka chwazi-y pou i ay viv an syèl-la, men apapousa yo ka atann kè yo aji èvè yo on mannyè èspésyal (Filip. 2:2, 3). Yo sav osi kè lè Jéova chwazi-yo, i pa mèt pondòt moun okouran a sa. Sé pousa sa pa ka étoné-yo si sèwten frè é sè pa’a kwè kè yo wen lè yo toufré koumansé pran pen-la é diven-la. Yo sav kè Labib ka di kè fò pa nou two présé kwè on moun lè i ka di kè Bondyé ba-y on rèsponsabilité èspésyal (Rév. 2:2). On krétyen ki wen pa’a chèché a fè moun pòté-y anlè. Kifè, lè i sòti jwenn on moun, i pa’a fè-y sav kè i wen. É nou ka tou konprann kè i pé’é blagé sa ba dòt moun nonplis (li 1 Korentyen 4:7, 8).

7. Ki biten sé wen-la pa dwètèt fè, é poukwa ?

⁷ Sé krétyen wen la pa’a pansé kè sé yenki èvè dòt krétyen wen kon yo pou yo rété, konsi yotout adan on klèb. Yo pa’a chèché a antré an kontak èvè dòt wen pou pé sa palé dè privilèj-la yo ni la oben pou yo rété antrè yo pou yo pé sa étidyé Labib ansanm (Gal. 1:15-17). Lasanblé-la pa té ké soudé si sé wen la té ka aji konsa. Sé konsi yo té’é ka goumé èvè lèspri sen a Jéova piskè lèspri-lasa ka édé pèp a Bondyé viv soudé é adan lapé (Wom. 16:17, 18).

8. Poukwa fò-nou fè atansyon a jan nou ka aji èvè sé moun-la ki ka pran pen-la é diven-la pannan Mémoryal-la ? (gadé nòt-la).

⁸ Kijan pou nou aji èvè frè é sè an nou ki wen ? Sé té ké on mové biten si nou té ka pòté on moun anlè, menmsi i sé on frè a Jézikris ki wen (Mat. 23:8-12). Lè Labib ka palé dè sé ansyen-la, i ka ankourajé-nou a ‘imité fwa a yo’, men i pa’a di-nou kè nou pé fè on nonm vin chèf an nou (Ébr. 13:7). Sé vré kè Labib ka di kè sé ansyen-la « mérité 2 fwa plis lonnè ». Men sé paskè yo « ka dirijé lasanblé-la byen » é pas yo « ka travay rèd pou anségné é pou palé dè pawòl a Bondyé », men a pa paskè yo wen (1 Tim. 5:17). Si nou ka pòté sé wen-la anlè oben si nou ka pran-yo pou dé gwotchak yo pé’é santi-yo alèz *. É sa ki pi grav sé kè, nou ka riské dè fè-yo vin vanta (Wom. 12:3). Ponyonn adan nou pé’é vlé fè on biten ki té’é pé pousé on frè a kris fè on érè grav konsa ! (Lik 17:2).

9. Kijan nou pé montré kè nou ka rèspèkté sé krétyen wen la ?

⁹ Kijan nou pé montré kè nou ka rèspèkté sé moun-la Jéova chwazi la pou vin wen ? Pa ègzanp, nou pé’é mandé-yo kijan sa pasé lè yo vin wen. Sa sé on pwoblèm pèwsonèl, é nou pa ni a mélé-nou adan sa ki pa’a gadé-nou (1 Tés. 4:11 ; 2 Tés. 3:11). É nou pa ni a sipozé kè mari a yo, madanm a yo, manman yo, papa yo oben dòt moun an fanmi a yo wen osi. An réyalité, on moun pa’a vin wen pas fanmi a-y wen oben pas moun-la i mayé èvè-y la wen. Éritaj-lasa, sé Bondyé ki ka ba-w li (1 Tés. 2:12). Anplisdisa, nou ké évité pozé kèsyon ki pé rivé a fè moun-la soufè. Pa ègzanp, nou pé’é mandé madanm a on frè ki wen ka i ka rèsanti difètkè i ké viv asi latè étèwnèlman, san mari a-y. Nou pé sèten kè adan mond nouvo la, Jéova ké « rasazyé anvi a tousa ki ka viv » (Sòm 145:16).

10. Poukwa nou ka pwotéjé-nou lè nou ka rèfizé « flaté moun » ?

¹⁰ Lè nou pa’a ba sé krétyen wen la plis valè ki sélézòt krétyen-la, nou ka pwotéjé-nou noumenm osi. Kijansa ? Labib ka montré-nou kè sa pé rivé kè on wen pa rété fidèl (Mat. 25:10-12 ; 2 Pyè 2:20, 21). Men si nou ka fè éfò pou nou pa « flaté moun », nou pé’é suiv pon nonm, ki i wen, ki toutmoun konnèt-li é menmsi i ka sèvi Jéova dépi plizyè lanné (Jid 16, nòt). Konsa, si moun-lasa pa rété fidèl a Jéova oben kè i kité lavérité, nou, nou ké rété fidèl a Jéova é nou pé’é jen arété sèvi-y.

11. Ka nou ka konstaté lè nou ka gadé kantité moun ki ka pran pen-la é diven-la pannan Mémoryal-la ?

¹¹ Pannan bon tibwen lanné, kantité moun ki té ka pran pen-la é diven-la té ka diminyé. Men dépi plizyè lanné, chif-lasa pa ka arété ògmanté. Ès fò nou pran tèt an nou parapòt a sa ? Non. An-nou vwè poukwa.

12. Menmsi kantité moun ki pran pen-la é diven-la ka ògmanté, poukwa fò pa sa enkyété-nou ?

¹² « Jéova konnèt moun a-y ki ta-y » (2 Tim. 2:19). Jéova sav byen kimoun ki wen é kimoun ki pa wen. Men sé frè-la ki ka konté séla ki ka pran pen-la  é diven-la pé pa ni enfòwmasyon-lasa vréman. Kifè, lè yo ka di-nou ki kantité moun ki pran pen-la é diven-la, adan chif-lasa nou ka touvé séla ki ka konpranndèdi yo wen alòskè a pa sa. Ni sèwten moun ki té ka pran pen-la é diven-la avan é kèlkè tan apré yo arété. É ni dòt ki malad an tèt é akòz dè sa, yo ka konprann kè yo ké ay gouvèné èvè Jézi an syèl-la. Men an réyalité, nou pa konnèt ègzaktèman konmen wen ki ka rété asi latè.

13. Ès Labib ka di ki kantité wen ki ké ka rété asi latè lè gwo tribilasyon-la ké koumansé ?

¹³ Ké ni krétyen wen onlo koté si latè lè Jézi ké vin chèché-yo pou menné-yo an syèl-la (Mat. 24:31). Labib té di kè pannan dènyé jou a sistèm-lasa, sé yenki déotwa wen ki té’é ni asi latè (Rév. 12:17). Men i pa’a di akonmen yo ké yé ègzaktèman lè gwo tribilasyon-la ké koumansé.

14. Lè nou ka li Women 9:11, 16, ka nou pé rivé a konprann anrapò èvè sé wen-la ?

¹⁴ Sé Jéova ki ka désidé a ki moman i ka chwazi sé wen-la (Wom. 8:28-30). Jéova koumansé chwazi sé wen-la apré Jézi résisité. O 1^é syèk, i ka sanm sa tout sé krétyen-la té wen. Men aprésa, pannan plizyè syèk, lamajorité a moun ki té ka di kè yo krétyen pa té ka fè tousa Jézikris té ka mandé. Pannan tout sé lanné-lasa, sé yonn-dé moun sèlman ki té vréman krétyen é sé yo Jéova chwazi pou ay viv an syèl-la. Yo té ka touvé-yo kon blé-la ki té dwètèt pousé ansanm èvè vyé zèb-la (Mat. 13:24-30). Pannan dènyé jou a sistèm-lasa, Jéova kontinyé  chwazi séla ki té’é fè pawti a sé 144 000 la *. Donk, si Bondyé ka désidé dè chwazi sèwten wen on ti moman avan lafen rivé, sèten nou pé’é vé douté dè sajès * a-y (li Women 9:11, 16). Fò-nou fè atansyon pou nou pa fè kon sé ouvriyé-la ki adan on ègzanp Jézi ni lokazyon pran. Yo voyé labou paskè yo pa aprésyé jan mèt a yo aji èvè sé ouvriyé-la ki koumansé travay an fen a jouné-la (Mat. 20:8-15).

15. An Matyé 24:45-47, Jézi ka palé dè on « èsklav fidèl é prévwayan ». Ès tout sé krétyen wen la ka fè pawti a èsklav-lasa ? Bay on ti èsplikasyon.

¹⁵ A pa toutmoun ki kay viv an syèl-la ki ka fè pawti a « èsklav fidèl é prévwayan la » (li Matyé 24:45-47). Kon yo té ka fè o 1^é syèk, Jéova é Jézi ka kontinyé sèvi èvè déotwa frè ki wen pou yo pé sa nouri é anségné onlo moun. O 1^é syèk, sé yenki déotwa krétyen wen Bondyé itilizé pou pé sa ékri Lézékriti Grèk. Menmjan-la, jòdijou, sé yenki déotwa krétyen wen ki ni larèsponsabilité dè ba pèp a Bondyé ‘manjé o bon moman’.

16. Ka nou aprann adan awtik-lasa ?

¹⁶ Ka nou aprann adan awtik-lasa ? Jéova désidé dè ba prèstout sèwvitè a-y lavi étèwnèl asi latè é sélézòt la ké ay gouvèné èvè Jézi an syèl-la. Jéova ka rékonpansé tout sèwvitè a-y : « Juif-la » é sé « 10 nonm-la » osi. É i vlé kè yotout rété fidèl é kè yo suiv lwa a-y. Fò yotout kontinyé aji èvè imilité. Fò yo byen soudé é fò yo adoré-y ansanm. É fò yotout travay rèd pou toujou ni lapé adan lasanblé lokal la. Lafen ka vin, alò an-nou kontinyé sèvi Jéova é an-nou kontinyé suiv Kris ansanm-ansanm kon « onsèl twoupo » (Jan 10:16).