1. Tera are e taekinna Iehova bwa e na riki n ara tai aikai?

E TAETAE ni burabetina ara tai aikai Iehova ni kangai: “Aomata aika tengaun man aia taetae ni kabane natannaomata, a na taua rabin ana kamwarai temanna te I-Iutaia. Eng, a na taua ni kamatoaa, ao ni kangai: ‘Ti kan iriingkami, bwa ti ongo ae e mena iroumi te Atua.’” (Tek. 8:23) Te “I-Iutaia” ae kaotaki ikai e tei ibukia naake a kabiraki iroun te Atua n te taamnei ae raoiroi. A aranaki naba bwa “ana Iteraera te Atua.” (IKar. 6:16) “Aomata aika tengaun” a tei ibukia naake a kantaningaa te maiu n aki toki i aon te aba. A ataia naakai ae e kakabwaiaia Iehova te koraki aika kabiraki, ao a iangoia bwa bon te kakabwaia ngkai a uaia n taromauria te Atua ma ngaiia.

2. A kangaa “aomata aika tengaun” n ‘iriia’ taani kabiraki?

² E ngae ngke te koraki aika kantaningaa te maiu i aon te aba a aki kona n atai araia taani kabiraki ni kabane i aon te aba ni boong aikai, * ma a boni kona n ‘iriia.’ N te aro raa? E taekinna te Baibara bwa “aomata aika tengaun” a na “taua rabin ana kamwarai temanna te I-Iutaia, . . . ao ni kangai: ‘Ti kan iriingkami, bwa ti ongo ae e mena iroumi te Atua.’” E taekinaki n te kibu anne temanna te I-Iutaia. Ma “iriingkami” ao “iroumi” e kaineti nakon ae raka i aon temanna. E nanonaki iai bwa te I-Iutaia aei bon tiaki tii temanna  te aomata, ma e tei ibukin te rabwata teuana ae bwanin ae kaainaki irouia taani kabiraki. Naake a aki kabiraki a beku ibukin Iehova i rarikia te koraki aika kabiraki aikai. Ma a aki iangoiia taani kabiraki aikai bwa aia tia kairiri, bwa a ataia ae bon Iesu aia tia Kairiri.​—Mat. 23:10.

3. Baikara titiraki aika a na kaekaaki n te kaongora aei?

³ Ma kioina ngkai iai Kristian aika kabiraki i buakoia ana aomata te Atua ni boong aikai, a kona tabeman n iango ni kangai: (1) Tera aroia taani kabiraki n iangoiia i bon irouia? (2) Tera arora nakoia naake a katoong banna n te Kauring? (3) Ti na tabeaianga ngkana e a ririkirake mwaitiia taani katoong banna? A na kaekaaki titiraki aikai n te kaongora aei.

4. Tera te taeka ni kauring n 1 I-Korinto 11:27-29 ae a riai n iaiangoia raoi taani kabiraki, ao bukin tera?

⁴ A riai taani kabiraki n iaiangoa raoi te taeka ni kauring are n 1 I-Korinto 11:27-29. (Warekia.) E na kangaa ane e kabiraki ni katoong banna “n te aro ae aki riai” n tain te Kauring? E karaoa anne  ngkana e katoong banna ao e aki maiuakin ana kaetieti Iehova aika raraoi. (Ebera 6:4-6; 10:26-29) A ataia taani kabiraki ae a riai n teimatoa ni kakaonimaki ngkana a kani karekea “te kaniwanga ae te wewete nako karawa mairoun te Atua rinanoni Kristo Iesu.”​—IBir. 3:13-16.

5. Tera aroia taani kabiraki n iangoiia i bon irouia?

⁵ A buokaki ana toro Iehova n te taamnei ae raoiroi bwa a na bwaina te nanorinano ao n aki kamoamoa. (IEbe. 4:1-3; IKoro. 3:10, 12) Ngaia are a aki iangoia taani kabiraki bwa a raoiroi riki nakoia tabemwaang. A ataia ae e aki kabatiaa riki taamneina ae raoiroi Iehova n angania, ni kabotauaki ma ana toro ake tabemwaang. A aki iangoia bwa a ota riki ni koaua man te Baibara nakoia tabemwaang. Ao a na aki naba tuanga temanna bwa e a tia ni kabiraki ao e a riai ni katoong banna n tain te Kauring. Ma a nanorinano ni butimwaea ae bon tii Iehova ae kaoia aomata nako karawa.

6. Ni kaineti ma 1 I-Korinto 4:7, 8, tera te aroaro ae a riai ni bwainna Kristian aika kabiraki?

⁶ E ngae ngke a iangoia taani kabiraki bwa bon te kakabwaia kaoakia nako karawa, ma a aki kantaningaa karineaia ae okoro mairouia tabemwaang. (IBir. 2:2, 3) A ataia naba ae ngke e kabiriia Iehova, e aki katanoataa nakoia aomata nako. Ngaia are e aki mimi te aomata ae kabiraki ngkana a aki waekoa ni kakoauaa tabeman bwa e kabiraki. E ataia ae ti tuangaki n te Baibara bwa ti na aki waekoa ni kakoauaa temanna ae taku bwa iai mwiokoana ae okoro mairoun te Atua. (TeKao. 2:2) Te Kristian ae kabiraki e na aki taekinna bwa e kabiraki nakoia naake e a tibwa kaitiboo ma ngaiia, bwa e aonga n tabeakinaki riki. Ao e na bon aki kamoamoa iai nakoia tabemwaang.​—Wareka 1 I-Korinto 4:7, 8.

7. Baikara baika a na aki karaoi taani kabiraki, ao bukin tera?

⁷ A aki iangoia Kristian aika kabiraki bwa a na tii kabanea aia tai ma raoia ni kabiraki, bwa aongkoa kaain te rabwata teuana ae rine ngaiia. A aki kakaaeia taani kabiraki ake tabeman bwa a na maroroakina aroia ni kabiraki, ao a aki naba katei rabwata aika okoro ibukin reiakinan te Baibara. (IKar. 1:15-17) E na aki katiteuanaaki te ekaretia ngkana a karaoi baikai taani kabiraki. A na boni kaitaraa iai te taamnei ae raoiroi ae buokiia ana aomata te Atua ni karekea te rau ao te katiteuanaaki.​—IRom 16:17, 18.

8. E aera bwa ko riai n taratara raoi ni kaineti ma arom nakoia naake a katoong banna n te Kauring? (Nora naba te kabwarabwara mai nano.)

⁸ Tera arora ae riai nakoia taari ake a kabiraki? E kairua karinean te aomata n te aro ae riao, e ngae ngke bon tarini Kristo ae kabiraki. (Mat. 23:8-12) Ngke e taekinia unimwaane te Baibara, e kaungaira bwa ti na “katotonga aia onimaki,” ma e aki tuangira bwa ti na karika te aomata temanna bwa te tia kairira. (Ebera 13:7) Ni koauana, e taekinaki n te Baibara bwa tabeman “a tau ni kabatiaaki karineaia.” Ma e taekinaki anne ibukina bwa a “kairiri n te aro ae raoiroi” ao a “mwakuri korakora n tataekina ana taeka te Atua ao n angareirei iai,” ao tiaki ibukina bwa a kabiraki. (1Tim. 5:17) Ngkana ti a manga rangi ni kamoamoaia ao n tabeakinia taani kabiraki, a kona ni maamaa iai. * Ke ae kakaiaki riki, ti a kona ni kairiia bwa a na kamoamoa. (IRom 12:3) Akea i buakora ae e kani karaoa te bwai teuana ae e na bwaka iai tarini Kristo temanna ae kabiraki, ao ni karaoa te bure ane kakaiaki anne!​—Ruka 17:2.

9. Ti na kangaa ni kaota karineaia Kristian aika kabiraki?

⁹ Ti na kangaa ni kaota karineaia naake a kabiraki iroun Iehova? Ti na aki titirakinia bwa a kangaa ni kabiraki. Anne bon ibukia ao akea riaira n ataia. (1Tet. 4:11; 2Tet. 3:11) Ao ti aki riai n iangoia bwa a kabiraki naba buuia, aia karo, ke kaain aia utu riki tabeman. E aki karekea ana kantaninga te aomata bwa e na nako karawa, mairouia ana utu. E boni karekea mairoun te Atua. (1Tet. 2:12) Ti riai naba n rarawa n tabeki titiraki aika kona ni karawawataia tabeman. N te katoto, ti na aki titirakina buun te tari te mwaane ae kabiraki, bwa tera ana namakin ngkai e kantaningaa te maiu n aki toki i aon te aba ao e na akea buuna i rarikina. Ni koauana, ti kona ni kakoauaa raoi bwa n te waaki ae boou ao Iehova e na “kabaneia aomata ma maan aika maiu, ni katoki nanoia ni baika a tangiri.”​—TaiAre. 145:16.

10. Ti na kangaa ni kamanoira ngkana ti aki kariaia anaakin nanora n aroaroia tabemwaang?

¹⁰ Ngkana ti aki iangoiia taani kabiraki bwa a kakawaki riki nakoia tabemwaang, ti boni kamanoira naba iai. N te aro raa? E tuangira te Baibara bwa a kona n aki kakaonimaki taani kabiraki tabeman. (Mat. 25:10-12; 2Bet. 2:20, 21) Ngkana ti aki kariaia anaakin nanora n aroaroia tabemwaang, ti na bon aki kona ni kakairi irouia, e ngae naba ngke taani kabiraki ke taari aika rangi ni kinaaki ke a a maan ni beku ibukin Iehova. Ao ngkana a aikoa kakaonimaki naakai ke a kitana te ekaretia, ti na bon aki kabuaa onimakinan Iehova ke ni katoka ara beku ibukina.

11. Tera ae riki ni mwaitiia naake a katoong banna?

¹¹ I nanon ririki aika bati, e a kekerikaaki mwaitiia taani katoong banna n te Kauring. Ma n ririki aika tibwa nako, e a ririkirake mwaitiia ni katoa ririki. Ti riai n tabeaianga n anne? Ti aki. Ti na rinanoi baika kakawaki tabeua aika ti riai n ururingi.

12. E aera bwa ti aki riai n tabeaianga ni mwaitiia naake a katoong banna?

¹² “E ataiia aika bon ana aomata Iehova.” (2Tim. 2:19) A aki kona naake a  warekiia taani katoong banna n te Kauring n ataia bwa antai raoi ae kabiraki, ma e bon ataia Iehova. Ngaia are a warekaki naba mwaitiia naake a taku bwa a kabiraki ma a bon aki. N te katoto, tabeman ake a katoong banna a a manga aikoa imwina riki. Ake tabeman iai rotakin aia iango ike a a kairaki iai bwa a na iangoia ae a na tautaeka ma Kristo i karawa. Ni koauana, ti aki ataia raoi bwa ai tii iraman taani kabiraki aika tiku i aon te aba.

13. E kaotaki n te Baibara bwa iraman taani kabiraki ake a na tiku i aon te aba ngkana e a moanaki te rawawata ae korakora?

¹³ A na mena n taabo aika bati n te aonnaba aomata aika kabiraki ngkana e roko Iesu n ikotiia nako karawa. (Mat. 24:31) E kaotaki n te Baibara bwa e na karako mwaitiia taani kabiraki ake a na tiku i aon te aba, ni kabaneani boong. (TeKao. 12:17) Ma e aki taekinna bwa iraman aika a na tiku i aon te aba ngkana e a moanaki te rawawata ae korakora.

14. Ni kaineti ma I-Rom 9:​11, 16, tera ae ti riai n ataia ni kaineti ma rineakia taani kabiraki?

¹⁴ E bairea Iehova te tai ae e na rineiia iai aomata aika kabiraki. (IRom 8:28-30) E moana rineakia taani kabiraki Iehova imwini kautakin Iesu. N taraana, a bane ni kabiraki Kristian ni koaua ake n te moan tienture. N tienture ake imwina, angia aomata ake a taku bwa Kristian ngaiia, a bon aki kakairi irouni Kristo. Ma e ngae n anne, i nanon ririki akanne e boni kabiriia Iehova tabeman aika boni Kristian ni koaua. Bon ai aron te uita ngaiia are e taekinna Iesu bwa a na rikirake i buakon titania. (Mat. 13:24-30) Ni kabaneani  boong, e boni waakinako naba Iehova n rineiia naake a na kaaina te koraki are 144,000. * Ngaia are ngkana e baireia te Atua bwa e na rineiia tabeman teutana te tai imwain te toki, ti na bon aki nanokokoraki ni wanawanana. (Wareka I-Rom 9:11, 16.) * Ti riai n taratara raoi bwa ti na aki katotongia taani mwakuri ake e kabwarabwaraia Iesu n ana kaikonaki teuana. A ngurengure n aron aia toka ni kabooia naake a mwakuri n te kabanea n aoa.​—Mat. 20:8-15.

15. A bane Kristian aika kabiraki n riki bwa kaain “te toro ae kakaonimaki ma ni wanawana” are taekinaki ni Mataio 24:​45-47? Kabwarabwaraa.

¹⁵ A aki bane n riki bwa kaain “te toro ae kakaonimaki ma ni wanawana” naake a kantaningaa te nako karawa. (Wareka Mataio 24:45-47.) N aron are n te moan tienture, a kakaamwarakeia ao n reireinia aika bati ni boong aikai Iehova ao Iesu rinanoia taari mwaane aika karako mwaitiia. Tii tabeman Kristian aika kabiraki n te moan tienture ake a kabonganaaki bwa a na korea te Koroboki ae Tabu n te Taetae ni Kuriiti. Ni boong aikai, tii tabeman naba Kristian aika kabiraki ake a mwiokoaki bwa a na angangania ana aomata te Atua “kanaia n te tai ae riai.”

16. Tera reireiam man te kaongora aei?

¹⁶ Tera reireiara man te kaongora aei? E a tia ni baireia Iehova bwa e na anga te maiu are aki toki i aon te aba nakoia angia ana aomata, ao te maiu i karawa nakoia tabeman ake a na tautaeka ma Iesu. E anga Iehova te kaniwanga nakoia ana toro ni kabane, ae taekan te “I-Iutaia” n ikotaki naba ma “aomata aika tengaun,” ao e tangiriia bwa a na ongeaba n tuua aika tii te arona ao n teimatoa ni kakaonimaki. A riai ni bane n teimatoa n nanorinano. A riai ni bane ni beku ibukina ao ni katiteuanaaki. Ao a riai ni bane ni kakorakoraia ni kateimatoa te rau n te ekaretia. Ngkai ti a uakaan riki ma te toki, ti bia bane n teimatoa ni beku ibukin Iehova ao n irira Kristo ngkai “tii tenanaina” ngaira.​—Ioa. 10:16.