1. ¿Kasa nüküjatüjütkalia achiki Jeʼwaa?

NÜKÜJATÜJÜLIA Jeʼwaa tü alatajatkat maaʼutpünaa, anuu nünüiki: «Soʼu kaʼikat tia, eejeena polooshii wayuu saʼakajee shiʼirukukat tü wayuukalüirua süpüshuaʼa, sainküinjee mmakat süpüshuaʼa, achecheraajeena sünain nüsheʼin wanee wayuu judío, achecheraajeena naya otta meena naya: ‹Oʼuneeshii waya jümaa süka waapüin süchiki eein chi Maleiwakai jümaa›» (Zac. 8:23). Chi «judíokai», naya na anoujashii nüneekakana Maleiwa nükajee chi naaʼinkai. «Chi Israel nüneekakai Maleiwa», eeshii namünüle amüin (Gal. 6:16, TNM). Na «polooshiikana wayuu», naya na wayuu kepiainjanakana yaa saaʼu tü Mmakat. Natüjaa aaʼu niain Maleiwa aneeküin na chainjanakana iipünaa jee kojutusü namüin naʼyanaajiraain namaa nümüin Maleiwa.

2. «Oʼuneeshii waya jümaa», ¿jamüshii namaka na kepiainjanakana saaʼu tü Mmakat namüin na chainjanakana iipünaa?

² Na kepiainjanakana saaʼu tü Mmakat, nnojotsü natüjaain saaʼu süpüshuaʼa nanülia na chainjanakana iipünaa. * Mayaainjeʼe müin tia, «oʼuneeshii waya jümaa», müshii naya namüin. ¿Jamüshii namaka namüin? Saashin tü Wiwüliakat eejeena «polooshii wayuu» «achecheraajeenaka sünain nüsheʼin wanee wayuu judío» otta meena naya: «Oʼuneeshii waya jümaa süka waapüin süchiki eein chi Maleiwakai jümaa». Waneeshia neʼe chi Judío aküjünakai achiki sünain tia wetsiikulokot. «Oʼuneeshii waya jümaa», ¿jamakaʼa namaka na «polooshiikana wayuu»?, müshi wainmakai naaʼin natuma. Chi «judío» münakai, nnojoishi waneeshin wayuu, naya napüshuaʼaleʼeya na chainjanakana iipünaa. Na yaainjanakana kepiain saaʼu tü Mmakat, aʼyataajiraashii  namaa nümüin Jeʼwaa. «Naya wekiipüʼükana», nnojoishii müin naya namüin süka natüjaain saaʼu niain neʼe Jesuu chi Nekiipüʼükai (Mat. 23:10, TNM).

3. ¿Jarat tü pütchi wasouteetkalü eʼipajee sünain ekirajaayakat tüü?

³ Eeyüliʼiya yaa saaʼu tü Mmakat napüshi na chainjanakana iipünaa, makalaka eein süpüla jülüjain waaʼin pütchikat tüü: ¿Kasa tü nnojoluinjatkat naaʼinrüin na chainjanakana iipünaa? ¿Jamüinjatü shiiʼiyatia nojutü wamüin na ekakana tü pankat jee na asakana tü wiinokot? ¿Shapaainjatche waaʼin sutuma nawainmalaain juyawai? Wasouteerü eʼipajee tia pütchikat sünain ekirajaayakat tüü.

4. (1) Suluʼu 1 Corinto 11:27-29, ¿kasa aküjünaka namüin na chainjanakana iipünaa? (2) ¿Jamüsü süküjünaka tia namüin?

⁴ Suluʼu 1 Corinto 11:27-29 aküjünüsü tü nnojoluinjatkat naaʼinrüin wanee anoujashi chainjachikai iipünaa (paashajeʼera). Nnojotsü niküinjatüin jee nüsüinjatüin tü wiinokot nnojorüle niisattüin nukuwaʼipa nuʼupala Jeʼwaa. Naaʼinrüle tia, nnojotsü kojutuin nümüin naapajiraain nikii Jesuu (Heb. 6:4-6; 10:26-29). ¿Kasa naaʼinrüinjatka süpüla saapünüin nümüin tü kasa anasü nünaajakat chi Maleiwakai nüpüla? Saaʼu nuʼtteʼennüichipain  nutuma Jesuu, oonooinjachi nia waneepia sümaa nünüiki Maleiwa süpüla chainjachin nia iipünaa (Filip. 3:13-16).

5. ¿Kasa tü nnojotkat jülüjain naaʼin na chainjanakana iipünaa?

⁵ Nnojotsü yaletüin naaʼin wanee wayuu nutuma chi naaʼinkai Jeʼwaa (Éf. 4:1-3; Col. 3:10, 12). Na chainjanakana iipünaa nnojotsü jülüjain naaʼin sülanaʼaleein nakuwaʼipa noulia na waneinnua. Nnojotsü antüin suluʼu nekii katsüinreein chi naaʼinkai Maleiwa naaʼu. «Waya atüjaleeka süpüleerua tü Wiwüliakat», nnojoishii müin nayaʼaya. «Anashi piküle tü pankat jee püsüle tü wiinokot, aneekuushi pia saaʼin wamüin», nnojoishii müin naya namüin na wawalayuukana. Nnojotsü naaʼinrüin tia süka nnojoluin yaletüin naaʼin otta natüjaain saaʼu niain neʼe Jeʼwaa aneeküin na chainjanakana iipünaa.

6. Saashin 1 Corinto 4:7, 8, ¿kasa nnojoluinjatka naaʼinrüin na chainjanakana iipünaa?

⁶ Mayaainjeʼe kojutuin namüin chainjanain naya iipünaa, nnojotsü jülüjain naaʼin nayainjanain kojutuleein maʼin noulia na waneinnua (Filip. 2:2, 3). Nnojotsü nüküjain Jeʼwaa namüin na wawalayuukana nüneeküin wanee anoujashi. Nnojotsü ponuin naaʼin manoujuule sünain naneekuushin nutuma Maleiwa. Saashin tü Wiwüliakat nnojoluinjatü wanoujamaatüin nünüiki wanee wayuu eekai «aneekünüshi taya nutuma Maleiwa», nümüin wamüin (Alat. Map. 2:2). Na aneekuushikana nutuma Maleiwa nnojotsü naküjakuʼu namüin sümüin wayuu chainjanain naya iipünaa. Nnojotsü naaʼinrüin tia suulia kapülain maʼin naya saaʼin wayuu. Nnojotsü yaletüin naaʼin saaʼu naneekünüin nutuma Maleiwa (paashajeʼera 1 Corinto 4:7, 8).

7. (1) ¿Kasa nnojotka naaʼinrüin na chainjanakana iipünaa? (2) ¿Jamüsü nnojotka naaʼinrüin tia?

⁷ Na chainjanakana iipünaa, nnojoishii nayain neʼe naʼaleewajaain amaa na wanee aneekuushikana. Nnojoishii nayain neʼe yootiraain amaa na aneekuushikana wanaa namaa otta nayain neʼe nekirajaain amaa sünain tü Wiwüliakat (Gal. 1:15-17). Naaʼinrüle tia, nnojoleena paaʼinwajiraain na wawalayuukana suluʼujee tia otta nnojoleerü wanaawain naaʼin nümaa chi naaʼinkai Maleiwa, chi anajiraakai otta paaʼinwajiraakai atuma na aʼyataashiikana nümüin Maleiwa (Roma 16:17, 18).

8. ¿Jamüsü nnojotka anain sülanaʼaleere nojutü watuma na aneekuushikana? (Paashajeʼera tü nootakat).

⁸ ¿Jamüinjatü shiiʼiyatia nojutü wamüin na chainjanakana iipünaa? Nnojotsü anain sülanaʼaleere nujutü wamüin wanee anoujashi jaʼitaichi niain wanee anoujashi chainjachikai iipünaa (Mat. 23:8-12). Süküjain tü Wiwüliakat washatüinjatüin sukuwaʼipa nanoula na laülaashiikana.  Nnojotpejeʼe süküjain wamüin kekiipüʼüinjanain waya wayuu (Heb. 13:7, TNM). Süküjain tü Wiwüliakat kojutuinjanain wamüin na laülaashiikana saaʼu naaʼinmajüin na anoujashiikana, natütüleʼerüin naaʼin otta nekirajüin naya, nnojotsü shiain saaʼujee chainjanain naya iipünaa (1 Tim. 5:17, TNM). Sülanaʼaleere nojutü watuma na aneekuushikana, eesü süpüla mojushiin namüin * jee eeshii süpüla naʼwaataain suluʼu nakuwaʼipa (Roma 12:3). Nnojo waaʼinrüin wanee kasa kaainjaleenaka atuma na aneekuushikana (Luc. 17:2).

9. ¿Kasa waaʼinrüinjatka süpüla weeʼiyatüin nojutü wamüin na chainjanakana iipünaa?

⁹ ¿Kasa waaʼinrüinjatka süpüla weeʼiyatüin nojutü wamüin na chainjanakana iipünaa? Nnojoishii wasakiijüinjanain naya sünain jamakuwaʼipaliin süpüla naneekünüinjanain. Nnojoishi jaralinjachin asoutuin sünainpünaa tia, nakuwaʼipajiraa nümaa Jeʼwaa (1 Tes. 4:11; 2 Tes. 3:11). «Aneekuushii nayaʼaya», nnojoishii müinjanain waya nümüin nashi, nei, otta naʼwayuuse. Nnojotsü müin tia maʼaka saaʼin wanee apaalaa nümüin wanee wayuu nutuma nüshi (1 Tes. 2:12). Nnojotsü mojuinjatüin saaʼin watuma nuʼwayuuse wanee wawala chainjachikai iipünaa. «Jamüsü paaʼin sutuma nnojoleechin pümaa chi puʼwayuusekai yaa saaʼu tü mmakat», nnojoishii müinjanain waya sümüin. Watüja aaʼu naapeerüin Jeʼwaa wamüin süpüshuaʼa tü keeʼireekat waaʼin suluʼu tü mma jeketüinjatkat (Sal. 145:16).

10. ¿Jamüsü nnojoluinjatka sülanaʼaleein nujutü wamüin wanee wayuu?

¹⁰ Müleka nnojorüle sülanaʼaleein wamüin nojutü na chainjanakana iipünaa, nnojoleerü amojujaain wakuwaʼipa. Eeshii süpüla nakatalaain nuulia Maleiwa noʼutku naya anoujashiikana (Mat. 25:10-12; 2 Ped. 2:20, 21). Makalaka nnojoluinjatüin sülanaʼaleein wamüin nujutü wanee wayuu, jaʼitaina nayain na chainjanakana iipünaa, na eʼraajünakana jee na kakaliainnakana aʼyataain nümüin Jeʼwaa (Jud. 16). Jamüshiijaʼa nakatalaale naya anoujashiikana nuulia Jeʼwaa, nnojoleerü eemiajaain wanoula otta nnojoleena waya akaaʼinjaain nuulia Jeʼwaa sutuma tia.

11. ¿Kasa weʼraka maaʼutpünaa yaa sünain tü Outkajawaakat eere Sotuin Waaʼin Outuin Jesuu?

¹¹ Sümaiwa paala, apaliʼirajüshii na ekakana tü pankat jee na asakana tü wiinokot sünain tü Outkajawaakat eere Sotuin Waaʼin Outuin Jesuu. Eekajasaʼa maaʼutpünaa yaa, weʼrüin nakooʼomüinraain maʼin. ¿Shapaainjatche waaʼin sutuma tia? Nnojo, nnojotsü shapaainjatüin waaʼin. Wekirajaa sünain pienchisü kasa nnojoluinjatka shapaain aaʼujee waaʼin.

12. ¿Jamüsü nnojoluinjatka shapaain waaʼin sutuma nawainmalaain na ekakana tü pankat jee na asakana tü wiinokot?

¹² «Na nüpüshikana Maleiwa, eʼnnaajünüshii napüshua nütüma» (2 Tim. 2:19). Nütüjaa aaʼu Jeʼwaa jaralin nüneeküin süpüla oʼunaa chaa iipünaa. Akaajasaʼa na wawalayuu ayaawajakana na ekakana tü pankat jee na asakana tü wiinokot sünain tü Outkajawaakat eere Sotuin Waaʼin Outuin Jesuu, nnojotsü natüjaain saaʼu jaralin nüneeküin Jeʼwaa. Matüjaaju aaʼu tia süka eein na ekakana tü pankat jee na asakana tü wiinokot sutuma naneekuushin saaʼin namüin. Eepuʼushii na ekakana tü pankat jee na asakana tü wiinokot, shiasaʼa mapa, ooʼulaashii naya suulia aaʼinraa tia. Eetaashii na aluwataainjanakana nümaa Cristo saaʼin namüin. Jülüjasü naaʼin tia süka nnojoluin pansaain tü nekiirujutkat. Sünainjee tia, nnojotsü watüjaain saaʼu jeʼrashiin na aneekuushi yaayüliikana mmapaʼa.

13. ¿Süküjainche tü Wiwüliakat jeʼrashiinjanain na aneekuushi eejeenakana saaʼu tü Mmakat suʼttapa tü müliaa miyoʼusükat?

 ¹³ Nüntapa Jesuu süpüla nümaainjanain iipünaamüin na aneekuushikana, eejeena naya sainküinpünaa tü Mmakat (Mat. 24:31). Saashin tü Wiwüliakat sülüʼütpa süpüla sajaʼttüin kasa süpüshuaʼa, nnojoleena wainmain maʼin yaa saaʼu tü Mmakat na chainjanakana iipünaa (Alat. Map. 12:17). Nnojotpejeʼe süküjain jeʼrashiinjanain na eejeenakana suʼttapa tü müliaa miyoʼusükat.

14. ¿Kasa süküjaka wamüin Roma 9:11, 16 süchiki jaralin aneeküin wanee anoujashi süpüla chainjachin nia iipünaa?

¹⁴ Nia neʼe Jeʼwaa atüjaaka saaʼu joujainjachin nüneeküin wanee anoujashi (Roma 8:28-30). Oʼttüshi Jeʼwaa sünain aneekaa na anoujashii chainjanakana iipünaa süchikijee nüsoʼireʼerüin naaʼin Jesuu. Na anoujashii eejanakana nükalioʼu Jesuu, aneekuushi naya napüshuaʼa süpüla chainjanain iipünaa. Kakalia mapa süchikijee tia, watta naalii na anoujayaakana neʼe. Nüneekapejeʼe Jeʼwaa nükajee chi naaʼinkai na anoujashii shiimainshii eejanakana soʼunnaa tia. Müshii naya aka saaʼin tü trigo miyoʼusükat saʼaka «tü mojuui keimsesükat» (Mat. 13:24-30). Maaʼutpünaa yaa, ayatüshi Jeʼwaa sünain aneekaa noʼutku na 144.000 anoujashii chainjanakana chaa iipünaa. * Nüneeküle Jeʼwaa wanee anoujashi süpülapünaachon sajaʼttüin kasa süpüshuaʼa, nnojotsü mojushiinjatüin wamüin tia (paashajeʼera Roma 9:11, 16). * Nnojotsü washatüinjatüin tü naaʼinrakat na wayuu ayoujakana nalaamain saaʼu anamiain nia namüin na  oʼttakana sünain aʼyatawaa «motsapa kaʼi» (Mat. 20:8-15).

15. Sünainjee tü sümakat Mateo 24:45-47, ¿jamüsü watüjaaka saaʼu nnojoluin nayain napüshuaʼa na chainjanakana iipünaa «chi achepchiee oonookai otta kekiikai maʼin»?

¹⁵ «Chi achepchiee oonookai otta kekiikai maʼin», nnojoishii nayain napüshuaʼa na chainjanakana iipünaa (paashajeʼera Mateo 24:45-47, TNM). * Palitchon na niʼitaakana Jeʼwaa nümaa Jesuu süpüla naapüinjatüin tü kasa choʼujaakat sümüin nanoula na anoujashiikana. Mapuʼusü sukuwaʼipa natuma sümaiwa. Jamüsüjaʼa sümaiwa, nnojoishii jeʼrashiin na anoujashii aneekuushi ashajakana tü Pütchi Ashajünakat süka Griego. Akaataajaʼa maaʼulu yaa, nnojoishii jeʼrashiin na aneekuushi niʼitaakana Jeʼwaa süpüla naapüin tü kasa choʼujaakat sümüin nanoula na suluʼukana nupueulose.

16. ¿Kasa pütüjaka sünainjee ekirajaayakat tüü?

¹⁶ Soto waaʼin tü wekirajaaitpakalü anain sünain ekirajaayakat tüü. Wainma na wayuu katüinjanakana oʼu waneepia nutuma Jeʼwaa yaa saaʼu tü Mmakat jee palit na chainjanakana aluwataain iipünaa nümaa Jesuu. Naapüin naʼanasia Maleiwa namüin napüshuaʼa na aʼyataashiikana nümüin. Nümüin chi «judío» sümakai amüin tü Wiwüliakat jee namüin «na polooshiikana wayuu». Nüküjain namüin noonooinjanain sümaa tü nuluwataakalü anain naya otta waneepiainjanain naya nümaa. Nnojoluinjatü yaletüin naaʼin jee paaʼinwajiraainjana naya sünain aʼyatawaa nümüin. Anajiraainjana naya namaa na wawalayuukana. Alüʼütsü maʼin süpüla sajaʼttüin kasa süpüshuaʼa makalaka ayatüinjanain waya aʼyataain nümüin Jeʼwaa jee woʼunuin nüchiirua Kürisüto sümaa kottiraain waya (Juan 10:16).