1. ¿Mbaʼépa oprofetisa vaʼekue Jehová ñane tiémpope g̃uarã?

JEHOVÁ oprofetisa vaʼekue ñane tiémpore: “Umíva umi díape 10 kuimbaʼe oñeʼẽva opaichagua idióma oĩva umi nasiónpe, oñakarama hatãta peteĩ judío aóre, ha heʼíta: ‘Ore rohose penendive, pórke rohendu Ñandejára oĩha penendive’” (Zac. 8:23). Pe “judío” orrepresenta umi Ñandejára ounhi vaʼekuépe espíritu sánto rupive. Chupekuéra oñehenói avei “Israel Ñandejára mbaʼéva” (Gál. 6:16). Umi “10 kuimbaʼe” orrepresenta umi orekóvape esperánsa oikove hag̃ua pára siémpre ko yvy ape ári. Haʼekuéra oikuaa Jehová oiporavo hague koʼã unhídope, ha chupekuéra g̃uarã peteĩ priviléhio ikatu haguére oadora Jehovápe hendivekuéra.

2. ¿Mbaʼéichapa umi “10 kuimbaʼe” ‘oho’ umi unhídondi?

² La Biblia heʼi umi “10 kuimbaʼe” oñakarama hatãtaha “peteĩ judío aóre”, ha heʼíta: “Ore rohose penendive, pórke rohendu Ñandejára oĩha penendive”. Ko versíkulope oñeñeʼẽ peteĩ judíorente, péro heʼívo “rohose penendive”, ohechauka oĩha heta persóna ha ndahaʼéi peteĩ añónte. Upéva heʼise pe “judío” norrepresentaiha peteĩ persónapente, síno entéro umi unhídope. Ñane tiémpope ndaikatúi jaikuaa mbaʼéichapa héra káda uno umi unhído oikóva ko yvy ape ári. * Upéicharõ jepe, umi orekóva esperánsa oikove hag̃ua peteĩ paraísope ikatu ‘oho’ hendivekuéra. ¿Mbaʼéichapa? Oservívo Jehovápe hendivekuéra. Péro umi oikótava ko yvy ape ári nopensái umi unhído haʼeha iliderkuéra, oikuaágui Jesús añoite haʼeha Ilíder (Mat. 23:10).

3. ¿Mbaʼe mbaʼépa ñambohováita ko artíkulope?

 ³ Ñane tiémpope ningo oĩ gueteri unhído Ñandejára puévlope, upévare ikatu algúno oñeporandu: ¿Mbaʼépa opensa vaʼerã umi unhído ijehe? ¿Mbaʼéichapa jatrata vaʼerã umi ermáno hoʼúvape pe pan ha pe víno Konmemorasionhápe? ¿Jajepyʼapy vaʼerãpa heta hetavéramo hikuái? Ko artíkulope ñambohováita koʼã pregúnta.

4. a) ¿Mbaʼe avísopa oñemeʼẽ umi unhídope 1 Corintios 11:27-29-pe? b) ¿Mbaʼérepa opensa porã vaʼerã hikuái pe avísore?

⁴ Umi unhído opensa porã vaʼerã pe avíso oĩvare 1 Corintios 11:27-29-pe (elee). ¿Mbaʼéichapa peteĩ unhído ikatu ohechauka ‘ndorrespetaiha’ pe pan ha pe víno? Upéva ikatu oiko hoʼúramo umíva péro nokumplíriramo oikóvo Jehová mandamientokuéra (Heb. 6:4-6; 10:26-29). Umi unhído ohechakuaa osegi vaʼerãha ifiél Jehovápe ikatu hag̃uáicha ohupyty “pe prémio Ñandejára omeʼẽva, upéva hína pe jeikove yvágape, ha Ñandejára omeʼẽta upéva umi oiporavo vaʼekuépe Cristo Jesús rupive” (Filip. 3:13-16).

5. ¿Mbaʼépa opensa vaʼerã umi unhído ijehe?

⁵ Jehová espíritu sánto ñanepytyvõ ani hag̃ua ñañemombaʼeguasu, síno ñaneumílde  hag̃ua (Efes. 4:1-3; Col. 3:10, 12). Upévare umi unhído nopensái iñimportanteveha ótrogui. Haʼekuéra oikuaa porã Jehová ndahaʼéi katuete omeʼẽva chupekuéra hetave espíritu sánto umi ótro kristiánogui. Avei nopensái ontende porãveha la Biblia umi ótro ermanokuéragui. Ha núnka ndeʼimoʼãi avavépe: “Nde ningo unhído avei, upévare reʼu vaʼerã avei pe pan ha pe víno Konmemorasiónpe”. Upéva rangue, haʼekuéra iñumílde ha orrekonose Jehová añoite ikatuha oinvita peteĩ persónape oho hag̃ua yvágape.

6. Asegún 1 Corintios 4:7, 8, ¿mbaʼéichapa oñekomporta vaʼerã umi unhído?

⁶ Umi unhído ningo oikuaa orekoha peteĩ priviléhio tuichaitereíva ohóta haguére yvágape. Upéicharõ jepe, haʼekuéra nohaʼarõi umi ermáno otrata porãve chupekuéra umi ótrogui (Filip. 2:2, 3). Avei oikuaa Jehová ounhírõ guare chupekuéra, haʼe ndoikuaaukái kuri upéva entéro persónape. Upévare, peteĩ kristiáno unhído noñesorprendéi oĩramo ñepyrũrã ndogueroviáiva Jehová oiporavo hague chupe. Amo ipahápe, la Biblia heʼi voi ani hag̃ua jaroviánte oĩramo heʼíva Ñandejára omeʼẽ hague chupe peteĩ rresponsavilida espesiál (Apoc. 2:2). Umi unhído ningo ndoipotái ojehecharamo chupekuéra, upévare haʼekuéra nomombeʼúi haʼeha unhído oikuaa jave ótra persónape. Avei ni mbaʼevéicharõ ndoikomoʼãi oñembotuicha ojeporavo haguére chupe oho hag̃ua yvágape (elee 1 Corintios 4:7, 8).

7. ¿Mbaʼépa ndojapói umi unhído, ha mbaʼérepa?

⁷ Umi kristiáno unhído nopensái ohasa vaʼerãha tiémpo umi ótro unhídondi añónte, ku oĩramoguáicha hikuái peteĩ grúpo apártepe. Haʼekuéra ndoikói oheka umi ótro unhídope oñemongeta hag̃ua hikuái mbaʼéichapa ojeporavo raʼe chupekuéra, térã oforma hag̃ua hikuái peteĩ grúpo ostudia hag̃ua la Biblia (Gál. 1:15-17). Umi unhído ojapóramo koʼã mbaʼe, ndaiporimoʼãi unida kongregasiónpe. Upéva rangue oñemoĩta hikuái pe espíritu sántore, oipytyvõva hína oĩ hag̃ua pyʼaguapy ha unida Ñandejára puévlope (Rom. 16:17, 18).

8. ¿Mbaʼérepa ñañatende vaʼerã mbaʼéichapa jatrata umi unhídope? (Ehecha avei pe nóta).

⁸ ¿Mbaʼéichapa jatrata vaʼerã umi unhídope? Naiporãi ningo jaiko ñambotuicha peteĩ persónape, haʼéramo jepe Cristo ermáno (Mat. 23:8-12). Oñeʼẽvo umi ansiánore, la Biblia ñanemokyreʼỹ: “Pejerovia haʼekuéraicha”. Péro upéva ndeʼiséi ñapensa vaʼerãha peteĩ yvypóra  haʼeha ñande líder (Heb. 13:7). Añetehápe ningo la Biblia heʼi algúnope “ojerrespetave” vaʼerãha. Péro ndahaʼéi hína unhído haguére, síno ‘oporogia porã’ rupi ha ‘ombaʼapo jejopýgui oñeʼẽ hag̃ua Ñandejára Ñeʼẽre ha oporomboʼe hag̃ua’ (1 Tim. 5:17). Ñambotuicha térã jaguerohoryetereíramo umi unhídope, ikatu hína otĩ térã ñamoñeñandu vai chupekuéra, * térã ivaiveha, ñande káusare ikatu voi oñepyrũ oñemombaʼeguasu hikuái (Rom. 12:3). Péro ñande ni mbaʼevéicharõ ndajaipotái haʼekuéra ou ofalla mbaʼe Jehová renondépe ñande káusare (Luc. 17:2).

9. ¿Mbaʼéichapa ikatu jahechauka jarrespetaha umi unhídope?

⁹ ¿Mbaʼéichapa ikatu jahechauka jarrespetaha umi Jehová ounhi vaʼekuépe? Por ehémplo, ndajaikomoʼãi ñaporandu mbaʼéichapa opilla raʼe hikuái haʼeha unhído ha umícha. Umíva ningo nokorrespondéi ñandéve ha upévare natekotevẽi jaikuaa (1 Tes. 4:11; 2 Tes. 3:11). Avei ndovaléi ñapensa iména térã hembireko, ituakuéra térã ótro ihentekuéra haʼeha avei unhído. Pe priviléhio ojeiko hag̃ua yvágape ndahaʼéi peteĩ mbaʼe ojeeredáva, upéva ou Ñandejáragui (1 Tes. 2:12). Ñañatende vaʼerã avei ani hag̃ua jajapo umi pregúnta oporomoñeñandu vaíva. Por ehémplo, ni mbaʼevéicharõ nañaporandumoʼãi peteĩ unhído rembirekópe, mbaʼéichapa oñeñandu oikuaávo oikotaha pára siémpre ko yvy ape ári iména reheʼỹ. Amo ipahápe, ñande jaikuaa porã ág̃a pe múndo pyahúpe Jehová omeʼẽtaha “entérope opa mbaʼe oipotáva” (Sal. 145:16).

10. ¿Mbaʼérepa haʼe peteĩ proteksión ñandéve g̃uarã ndajaikóiramo ‘ñamombaʼeterei’ peteĩ ermánope?

¹⁰ Jatratáramo umi unhídope jatrataháicha oimeraẽ ótro ermánope, upéva haʼe avei peteĩ proteksión ñandéve g̃uarã. ¿Mbaʼérepa? Pórke la Biblia heʼi algúno unhído ikatuha hína oheja Ñandejárape (Mat. 25:10-12; 2 Ped. 2:20, 21). Péro ndajaikóiramo ‘ñamombaʼeterei’ peteĩ ermánope, ndoikomoʼãi ñandehegui peteĩ yvypóra segidór, upe ermáno haʼéramo jepe unhído, ikonosidoitereíramo térã oservíramo jepe Jehovápe heta áñore (Jud. 16, nóta). Ha péicha, koʼã ermáno oúramo jepe naiñeʼẽrenduvéi Jehovápe ha oheja pe kongregasión, ñande lomímonte jasegíta jajerovia Jehováre ha ndajahejamoʼãi chupe.

11. ¿Mbaʼe kámbiopa oiko raʼe umi áño ohasa vaʼekuépe?

¹¹ Heta tiémpore umi kristiáno hoʼúva pe pan ha pe víno Konmemorasionhápe saʼive vaʼekue ohóvo. Péro umi áño ohasa vaʼekuépe amás día heta hetave. ¿Jajepyʼapy vaʼerãpa upe haguére? Nahániri. Jahechamína mbaʼérepa natekotevẽi jajepyʼapy.

12. ¿Mbaʼérepa ndajajepyʼapýi vaʼerã heta hetavéramo umi kristiáno hoʼúva pe pan ha víno Konmemorasionhápe?

¹² “Jehová oikuaa umi imbaʼévape” (2 Tim. 2:19). Jehová ningo oikuaa mávapa añetehápe unhído hína, péro umi ermáno okontáva Konmemorasionhápe mboy persónapa hoʼu pe pan ha pe víno ndoikuaái upéva. Upévare umi oñekontáva apytépe oĩ umi oimoʼãva unhidoha, péro añetehápe ndahaʼéi. Por ehémplo, oĩ umi anteve hoʼu vaʼekue péro koʼág̃a ndoʼuvéima. Ótro katu iprovléma iñakãme térã oreko provléma emosionál, ha oimoʼã ogovernataha avei Crístondi yvágape. Upévare ndajaikuaaporãi mboy unhídopa oĩ gueteri ko yvy ape ári.

13. ¿Heʼípa la Biblia mboy unhídopa oĩta ko yvy ape ári oñepyrũ vove pe jehasa asy guasu?

 ¹³ Jesús ou vove oraha hag̃ua umi unhídope yvágape, haʼekuéra oĩta diferénte lugárpe ko yvy ape ári (Mat. 24:31). La Biblia heʼi umi ára pahápe oĩtaha mbovymi unhído ko yvy ape ári (Apoc. 12:17). Péro ndeʼíri mboýpa oĩta gueteri ág̃a oñepyrũ vove pe jehasa asy guasu.

14. ¿Mbaʼépa ñanemboʼe Romanos 9:11, 16 ojeporavo lájagui umi unhídope?

¹⁴ Jehová odesidi arakaʼépa oiporavóta umi unhídope (Rom. 8:28-30). Jehová oñepyrũ vaʼekue oiporavo umi unhídope Jesús orresusita rire. Amalisia síglo primérope entéro umi kristiáno tee haʼe vaʼekue unhído. Péro umi áño ohasávape upe rire, la majoría umi heʼíva ijehe kristianoha, añetehápe ndahaʼéi vaʼekue kristiáno tee. Upéicharõ jepe, upe tiémpope Jehová oiporavo umi mbovymi kristiáno verdadérope ha oiko chuguikuéra unhído. Koʼãva ojogua pe trígope, Jesús heʼi vaʼekue okakuaataha umi ñana apytépe (Mat. 13:24-30). Koʼã ára pahápe, Jehová osegi oiporavo umi kristiáno oĩtavape umi 144.000 unhído apytépe. * Upéicharõ, oiméramo Jehová oiporavo algúnope og̃uahẽ mboyvemi pe fin, ¿máva piko ñande ñakuestiona hag̃ua upe haʼe ojapóva? (elee Romanos 9:11, 16). * Ñañatende vaʼerã ani jajogua umi kuimbaʼe oñemensionáva peteĩva umi ehémplo Jesús omoĩ vaʼekuépe. Haʼekuéra ningo ojeplagea ipatrón odesidívare ojapo umi oñepyrũ vaʼekuére ombaʼapo  kaʼaru, pe última oraitépente (Mat. 20:8-15).

15. ¿Entéro umi unhído piko haʼe hína pe “esklávo de konfiánsa ha iñarandúva”, oñemensionáva Mateo 24:45-47-pe? Emyesakã.

¹⁵ Naentéroi umi ohótava yvágape haʼe pe “esklávo de konfiánsa ha iñarandúva” (elee Mateo 24:45-47). Síglo primérope oiko haguéicha, koʼág̃a avei Jehová ha Jesús ojevale unos kuánto kristiánorente oalimenta térã omboʼe hag̃ua hetápe. Upérõ Jehová ojevale vaʼekue unos kuánto unhídorente oskrivi hag̃ua umi Escrituras Griegas. Ñane tiémpope avei mbovymi unhídonte oreko pe rresponsavilida omeʼẽ hag̃ua Ñandejára puévlope pe “aliménto hiʼoraitépe”.

16. ¿Mbaʼépa reaprende ko artíkulogui?

¹⁶ ¿Mbaʼépa ñanemboʼe ko artíkulo? Jehová ningo odesidíma la majoría isiervokuéra oikotaha pára siémpre ko yvy ape ári, ha unos kuánto ohotaha yvágape ogoverna hag̃ua Jesús ndive. Jehová omyengovia entéro isiervokuérape, tahaʼe pe ‘judíope’ térã umi ‘10 kuimbaʼépe’. Haʼe ojerure enterovépe iñeʼẽrendu ha ifiél hag̃ua chupe. Enterove iñumílde vaʼerã ha oservi vaʼerã chupe en unida, ha enterove oñehaʼãmbaite vaʼerã oĩ hag̃ua pyʼaguapy kongregasiónpe. Amás día hiʼag̃uive ohóvo pe fin, upévare jasegíkena jaservi Jehovápe ha jasegi Crístope ‘peteĩ ovecha atýicha’ (Juan 10:16).