1. Etẹwẹ Jehovah dọ dọ e na jọ to ojlẹ mítọn mẹ?

JEHOVAH dọ dọdai gando ojlẹ mítọn go dọ: “Sunnu ao sọn ogbè akọta lẹ tọn lẹpo mẹ na tẹdo, mọwẹ, yé na tẹdo tewu Ju de tọn go gligli dọmọ: ‘Mí jlo na yì hẹ mì, na mí ko sè dọ Jiwheyẹwhe tin po mì po.’” (Zek. 8:23) To wefọ ehe mẹ, “Ju” lọ nọtena mẹhe Jiwheyẹwhe yiamisisadode gbọn gbigbọ wiwe dali lẹ. Yé sọ nọ yin yiylọdọ “Islaeli Jiwheyẹwhe tọn.” (Gal. 6:16) “Sunnu ao” lọ lẹ nọtena mẹhe tindo todido nado nọgbẹ̀ kakadoi to aigba ji lẹ. Yé yọnẹn dọ Jehovah ko dona pipli mẹyiamisisadode lẹ tọn enẹ, bo nọ mọdọ lẹblanulọkẹyi de wẹ e yin nado sẹ̀n ewọ to pọmẹ hẹ yé.

2. Nawẹ “sunnu ao” lọ lẹ nọ “yì hẹ” mẹyiamisisadode lẹ gbọn?

² Dile etlẹ yindọ e ma yọnbasi nado yọ́n yinkọ mẹyiamisisadode he to aigba ji to egbehe lẹ dopodopo tọn, * mẹhe tindo todido nado nọgbẹ̀ to aigba ji lẹ sọgan “yì hẹ” mẹyiamisisadode lẹ. Gbọnna? Biblu dọ dọ “sunnu ao” lọ lẹ na “tẹdo tewu Ju de tọn go gligli dọmọ: ‘Mí jlo na yì hẹ mì, na mí ko sè dọ Jiwheyẹwhe tin po mì po.’” Wefọ Biblu tọn lọ donù Ju dopo go. Ṣigba hogbe lọ “mì” he yin yiyizan whla awe to alọdlẹndo gbẹtọ susu. Ehe dohia dọ Ju enẹ ma yin mẹdopo poun, ṣigba e nọtena pipli mẹyiamisisadode lẹ tọn pete. Mẹhe ma yin yiyiamisisadode lẹ to Jehovah sẹ̀n to pọmẹ hẹ mẹyiamisisadode lẹ.  Amọ́, yé ma nọ mọ mẹyiamisisadode lẹ taidi nukọntọ yetọn lẹ, na yé yọnẹn dọ Jesu wẹ yin Nukọntọ yetọn wutu.—Mat. 23:10.

3. Kanbiọ tẹlẹ wẹ na mọ gblọndo to hosọ ehe mẹ?

³ Na Klistiani yiamisisadode delẹ gbẹ́ pò to omẹ Jiwheyẹwhe tọn lẹ ṣẹnṣẹn to egbehe wutu, mẹdelẹ sọgan nọ kàn kanbiọ he bọdego ehelẹ sè dọ: (1) Nukun tẹwẹ Klistiani yiamisisadode lẹ dona nọ yí do pọ́n yede? (2) Nawẹ mí dona nọ yinuwa hẹ mẹhe nọ dù akla bo nọ nù ovẹn lọ to Oflin whenu lẹ gbọn? (3) Be mí dona nọ hanú eyin sọha omẹ enẹlẹ tọn fọ́n bo to jijideji wẹ ya? Hosọ ehe na na gblọndo kanbiọ enẹlẹ tọn.

4. Avase he tin to 1 Kọlintinu lẹ 11:27-29 mẹ tẹ ji wẹ mẹyiamisisadode lẹ dona yí sọwhiwhe do lẹnnupọndo, podọ etẹwutu?

⁴ Mẹyiamisisadode lẹ dona yí sọwhiwhe do lẹnnupọndo avase he tin to 1 Kọlintinu lẹ 11:27-29 mẹ ji. (Hia.) Nawẹ mẹyiamisisadode de sọgan tindo mahẹ to yẹhiadonu lọ lẹ mẹ “to aliho agọ̀ mẹ” gbọn? Ewọ na wàmọ eyin e nọ dù akla lọ bosọ nọ nù ovẹn lọ, ṣigba bo ma nọ nọgbẹ̀ sọgbe hẹ nujinọtedo dodo Jehovah tọn lẹ. (Heb. 6:4-6; 10:26-29) Mẹyiamisisadode lẹ yọnẹn dọ yé dona hẹn nugbonọ-yinyin yetọn go eyin yé jlo na mọ “ale oylọ olọn  mẹ tọn he Jiwheyẹwhe nọ namẹ gbọn Klisti Jesu gblamẹ lọ” yí.—Flp. 3:13-16.

5. Nukun tẹwẹ Klistiani yiamisisadode lẹ dona nọ yí do pọ́n yede?

⁵ Gbigbọ wiwe Jehovah tọn nọ gọalọna devizọnwatọ etọn lẹ nado yin whiwhẹnọ, e ma yin goyitọ. (Efe. 4:1-3; Kol. 3:10, 12) Enẹwutu, mẹyiamisisadode lẹ ma nọ mọdọ emi pọnte hú mẹdevo lẹ. Yé yọnẹn dọ Jehovah ma nọ na gbigbọ wiwe mẹyiamisisadode lẹ hugan devizọnwatọ etọn he pò lẹ dandan gba. Yé ma nọ mọdọ emi tindo nukunnumọjẹnumẹ he siso gando nugbo Biblu tọn lẹ go hugan mẹdevo depope. Podọ yé ma nọ dọna mẹdepope gbede dọ ewọ ko yin yiyiamisisadode bo dona jẹ mahẹ tindo to yẹhiadonu lẹ mẹ ji to Oflin whenu. Kakatimọ, gbọn whiwhẹ dali, yé nọ kẹalọyi dọ Jehovah kẹdẹ wẹ nọ basi oylọna gbẹtọ lẹ nado yì olọn mẹ.

6. Sọgbe hẹ 1 Kọlintinu lẹ 4:7, 8, nawẹ Klistiani yiamisisadode lẹ dona nọ yinuwa gbọn?

⁶ Dile etlẹ yindọ mẹyiamisisadode lẹ yọnẹn dọ gbégbò daho de wẹ e yin nado yin oylọ-basina yì olọn mẹ, yé ma nọ donukun dọ mẹdevo lẹ ni yinuwa hẹ emi to aliho vonọtaun mẹ. (Flp. 2:2, 3) Yé sọ yọnẹn dọ to whenue Jehovah yiamisisadode yé, e ma hẹn ẹn zun yinyọnẹn na mẹdevo depope. Enẹwutu, e ma nọ paṣa mẹyiamisisadode de dọ mẹdelẹ ma nọ yise to afọdopolọji dọ ewọ yin mẹyiamisisadode. E nọ flindọ Biblu dọna mí ma nado yawu yí mẹhe dọ dọ Jiwheyẹwhe ko de azọngban vonọtaun de na emi sè. (Osọ. 2:2) Na Klistiani yiamisisadode de ma na jlo nado dọ̀n ayidonugo wá ede ji wutu, e ma na dọna mẹhe e dukosọ hẹ whla tintan lẹ dọ emi yin yiyiamisisadode. Podọ, e họnwun dọ e ma na nọ doawagun to mẹdevo lẹ dè gando mẹyiamisisadode he e yin go.—Hia 1 Kọlintinu lẹ 4:7, 8.

7. Etẹwẹ mẹyiamisisadode lẹ dona dapana, podọ etẹwutu?

⁷ Klistiani yiamisisadode lẹ ma nọ mọdọ mẹyiamisisadode devo lẹ kẹdẹ wẹ emi dona nọ yí whenu zan dopọ hẹ gba, taidi dọ yé tin to ogbẹ́ klandovo de mẹ nkọ. Yé ma nọ dín mẹyiamisisadode devo lẹ mọ, po linlẹn lọ po nado nọ dọhodo todido yetọn ji, kavi nado nọ mọ yede dovo nado plọn Biblu. (Gal. 1:15-17) Eyin mẹyiamisisadode lẹ yinuwa to aliho mọnkọ mẹ, enẹ sọgan hẹn kinklan wá agun lọ mẹ. Yé na yinuwa jẹagọdo gbigbọ wiwe he nọ gọalọna omẹ Jiwheyẹwhe tọn lẹ nado tindo jijọho po pọninọ po.—Lom. 16:17, 18.

8. Naegbọn mí dona payi lehe mí nọ yinuwa hẹ mẹhe nọ tindo mahẹ to yẹhiadonu lẹ mẹ to Oflin whenu lẹ do go? (Sọ pọ́n nudọnamẹ odò tọn.)

⁸ Nawẹ mí dona nọ yinuwa hẹ mẹmẹsunnu po mẹmẹyọnnu yiamisisadode lẹ po gbọn?  E ma na sọgbe nado nọ gbògbéna mẹde zẹjlẹgo, eyin ewọ tlẹ yin mẹmẹsunnu yiamisisadode Klisti tọn de. (Mat. 23:8-12) Whenue Biblu to hodọ gando mẹho lẹ go, e dotuhomẹna mí nado “hodo apajlẹ yise yetọn tọn,” ṣigba e ma dọna mí nado nọ pọ́n gbẹtọvi depope hlan taidi nukọntọ mítọn. (Heb. 13:7) Nugbo wẹ dọ Biblu dọ dọ mẹdelẹ “jẹna gbégbò whla awe.” Ṣigba, na yé nọ “penukundonugo to aliho dagbe mẹ” bosọ nọ “wazọ́n sinsinyẹn to hodidọ po mẹpinplọn po mẹ” wutu wẹ, e ma yin na yé yin mẹyiamisisadode wutu gba. (1 Tim. 5:17) Eyin mí nọ na mẹyiamisisadode lẹ pipà po ayidonugo po zẹjlẹgo, e sọgan zọ́n bọ yé ma na nọ voawu. * Kavi dehe tlẹ sọ ylan humọ, mí sọgan sisẹ́ yé nado yigo. (Lom. 12:3) Depope to mí mẹ ma na jlo nado wà nudepope he sọgan sisẹ́ dopo to mẹmẹsunnu yiamisisadode Klisti tọn lẹ mẹ nado ṣinuwa to aliho sinsinyẹn mọnkọ mẹ!—Luku 17:2.

9. Nawẹ mí sọgan dohia gbọn dọ mí nọ na sisi Klistiani yiamisisadode lẹ?

⁹ Nawẹ mí sọgan dohia gbọn dọ mí nọ na sisi mẹhe Jehovah yiamisisadode lẹ? Mí ma na kanse yé lehe yé wá lẹzun mẹyiamisisadode gbọn. Whẹho mẹdetiti tọn wẹ, ehe mí ma tindo jlọjẹ nado yọnẹn. (1 Tẹs. 4:11; 2 Tẹs. 3:11) Podọ, mí ma dona nọ lẹndọ asu, asi, mẹjitọ kavi hagbẹ whẹndo tọn yetọn devo lẹ lọsu yin mẹyiamisisadode. Mẹde ma nọ dugu todido olọn mẹ tọn sọn whẹndo etọn dè. Jiwheyẹwhe dè wẹ e nọ mọ ẹn yí sọn. (1 Tẹs. 2:12) Mí sọ dona dapana kanbiọ he sọgan gbleawuna mẹdevo lẹ kinkanse. Di apajlẹ, mí ma dona kanse asi mẹyiamisisadode de tọn nuhe e nọ lẹn gando gbẹninọ kakadoi to aigba ji matin asu etọn go. To popolẹpo mẹ, mí sọgan kudeji mlẹnmlẹn dọ to aihọn yọyọ lọ mẹ, Jehovah na “hẹn pekọ wá na ojlo nutogbẹ̀ lẹpo tọn.”—Salm. 145:16.

10. Nawẹ mí nọ basi-hihọ́na míde gbọn eyin mí dapana ‘sisi nukunta tọn nina gbẹtọ lẹ’?

¹⁰ Eyin mí ma nọ yinuwa hẹ mẹyiamisisadode lẹ taidi dọ yé yiaga hú mẹdevo lẹ, mí sọ to hihọ́-basina míde ga. Gbọnna? Biblu dọ dọ mẹyiamisisadode delẹ sọgan nọma hẹn nugbonọ-yinyin yetọn go. (Mat. 25:10-12; 2 Pita 2:20, 21) Ṣigba, eyin mí nọ dapana ‘sisi nukunta tọn nina gbẹtọ lẹ,’ mí ma na nọ hodo gbẹtọ gbede, etlẹ yin mẹyiamisisadode, kavi mẹhe mẹsusu yọnẹn ganji lẹ, kavi mẹhe ko sẹ̀n Jehovah na owhe susu lẹ. (Juda 16, Odò.) To whenẹnu, eyin yé masọ wá yin nugbonọ ba kavi jo agun lọ do, yise mítọn to Jehovah mẹ ma na whàngo podọ mí na zindonukọn nado to sinsẹ̀n ẹn.

11. Etẹwẹ ko jọ do sọha mẹhe nọ tindo mahẹ to yẹhiadonu lẹ mẹ to Oflin whenu lẹ tọn go?

¹¹ Na owhe susu, sọha mẹhe nọ tindo mahẹ to yẹhiadonu lẹ mẹ to Oflin whenu lẹ tọn nọ to doyi. Ṣigba to owhe agọe tọn lẹ mẹ, sọha enẹ fọ́n bo to jijideji to whemẹwhemẹ. Be mí dona nọ hanú gando enẹ go wẹ ya? Paali. Mì gbọ mí ni lẹnnupọndo whẹwhinwhẹ́n titengbe he mí dona hẹn do ayiha mẹ delẹ ji?

12. Naegbọn mí ma dona nọ hanú gando sọha mẹhe nọ doalọ to yẹhiadonu lẹ mẹ to Oflin whenu lẹ tọn go?

¹² “Jehovah yọ́n mẹhe yin etọn lẹ.” (2 Tim. 2:19) To vogbingbọn mẹ na Jehovah, mẹmẹsunnu he nọ hia mẹhe tindo mahẹ to yẹhiadonu lẹ mẹ to Oflin whenu lẹ ma nọ yọ́n mẹhe yin mẹyiamisisadode nugbonugbo lẹ. Enẹwutu, sọha he yé nọ mọ lọ nọ bẹ mẹhe lẹndọ emi yin mẹyiamisisadode bo ma ka yinmọ lẹ hẹn. Di apajlẹ, mẹdelẹ he nọ doalọ to yẹhiadonu  lẹ mẹ dai wá doalọte to godo mẹ. Mẹdevo lẹ sọgan tindo nuhahun to apọ̀nmẹ kavi to numọtolanmẹ-liho, ehe zọ́n bọ yé nọ lẹndọ emi na dugán hẹ Klisti to olọn mẹ. E họnwun dọ mí ma sọgan dọ sọha mẹyiamisisadode he pò to aigba ji lẹ tọn na taun tọn.

13. Be Biblu dọ sọha mẹyiamisisadode he na pò to aigba ji to whenue nukunbibia daho lọ na bẹjẹeji te lẹ tọn ya?

¹³ Mẹyiamisisadode lẹ na tin to awà voovo aigba tọn lẹ ji to whenue Jesu na wá nado bẹ yé yì olọn mẹ. (Mat. 24:31) Na taun tọn, Biblu dọ dọ to azán godo tọn lẹ mẹ, mẹyiamisisadode vude na pò to aigba ji. (Osọ. 12:17) Ṣigba, e ma dọ sọha mẹyiamisisadode he na pò to aigba ji to whenue nukunbibia daho lọ na bẹjẹeji te lẹ tọn.

14. Dile Lomunu lẹ 9:11, 16 dohia do, etẹ mẹ wẹ mí dona mọnukunnujẹ gando aliho he mẹ mẹyiamisisadode lẹ nọ yin dide te go?

¹⁴ Jehovah wẹ nọ de ojlẹ he mẹ e na de mẹyiamisisadode lẹ te. (Lom. 8:28-30) Jehovah jẹ mẹyiamisisadode lẹ de ji to fọnsọnku Jesu tọn godo. E taidi dọ Klistiani nugbo lẹpo wẹ yin mẹyiamisisadode to owhe kanweko tintan whenu. To owhe kanweko he bọdego lẹ gblamẹ, suhugan mẹhe nọ ylọ yede dọ Klistiani lẹ tọn ma yin hodotọ nugbo Klisti tọn lẹ. Etomọṣo, to ojlẹ enẹlẹ gblamẹ, Jehovah yiamisisadode omẹ vude he yin Klistiani nugbo lẹ. Yé taidi likun he Jesu dọ dọ yé na wú to ogbé ylankan lẹ ṣẹnṣẹn lẹ. (Mat. 13:24-30) To azán godo tọn lẹ mẹ, Jehovah zindonukọn nado to mẹhe na yin apadewhe gbẹtọ 144 000 lẹ tọn de. * Enẹwutu, eyin Jiwheyẹwhe basi dide nado ṣinyan mẹdelẹ ojlẹ kleun de jẹnukọnna opodo lọ, e họnwun dọ mí ma dona tindo ayihaawe do nuyọnẹn etọn  go. (Hia Lomunu lẹ 9:11, 16.) * Mí dona payi ma nado yinuwa taidi azọ́nwatọ he go Jesu donù to apajlẹ he e na de mẹ lẹ. Yé mọhodọdo aliho he mẹ klunọ yetọn yinuwa hẹ azọ́nwatọ he wá wazọ́n to ogàn godo tọn mẹ lẹ te go.—Mat. 20:8-15.

15. Be mẹyiamisisadode lẹpo wẹ yin apadewhe “afanumẹ nugbonọ podọ nuyọnẹntọ” he go Matiu 24:45-47 donù lọ tọn ya? Basi zẹẹmẹ.

¹⁵ E ma yin mẹhe tindo todido nado nọgbẹ̀ to olọn mẹ lẹpo wẹ yin apadewhe “afanumẹ nugbonọ podọ nuyọnẹntọ lọ” tọn. (Hia Matiu 24:45-47.) Dile e yindo to owhe kanweko tintan whenu, Jehovah po Jesu po to mẹmẹsunnu vude delẹ yizan to egbehe, nado na núdùdù mẹsusu bosọ plọnnu yé. Klistiani yiamisisadode vude poun wẹ yin yiyizan to owhe kanweko tintan whenu nado kàn Owe-wiwe Glẹki tọn lẹ. To egbehe, Klistiani yiamisisadode vude wẹ tindo azọngban lọ nado na “núdùdù” omẹ Jiwheyẹwhe tọn lẹ “to ojlẹ sisọ mẹ.”

16. Etẹwẹ hosọ ehe plọn mí?

¹⁶ Etẹwẹ hosọ ehe plọn mí? Jehovah ko basi dide nado na suhugan omẹ etọn lẹ tọn ogbẹ̀ madopodo to aigba ji, podọ nado na omẹ vude he na dugán hẹ Jesu lẹ ogbẹ̀ to olọn mẹ. Jehovah nọ suahọ devizọnwatọ etọn lẹpo, he bẹ “Ju” lọ po “sunnu ao” lẹ po hẹn, podọ e nọ biọ to yé si nado setonuna osẹ́n dopolọ lẹ bosọ hẹn nugbonọ-yinyin yetọn go. Yemẹpo dona to whiwhẹnọ yin zọnmii. Yemẹpo dona nọ sẹ̀n ẹn to pọmẹ bosọ tin to kọndopọ mẹ. Podọ yemẹpo dona wazọ́n nado hẹn jijọho go to agun lọ mẹ. Dile mí to dindọnsẹpọ opodo lọ, mì gbọ mímẹpo ni zindonukọn nado to Jehovah sẹ̀n bosọ to hihodo Klisti taidi “lẹngbọpa dopo.”—Joh. 10:16.