1. Ano ang ginsiling ni Jehova nga mahanabo sa aton tion subong?

NAGTAGNA si Jehova parte sa aton tion subong: “Napulo ka tawo halin sa tanan nga lenguahe sang mga pungsod ang magauyat sa bayo sang isa ka Judiyo kag magasiling: ‘Luyag namon nga mag-upod sa inyo, kay nabatian namon nga kaupod ninyo ang Dios.’” (Zac. 8:23) Ang “Judiyo” sa sini nga tagna nagarepresentar sa mga ginhaplasan sang Dios sang balaan nga espiritu. Ginatawag man sila nga “Israel sang Dios.” (Gal. 6:16) Ang “napulo ka tawo” nagarepresentar sa mga may paglaum nga mabuhi sing wala sing katapusan sa duta. Kabalo sila nga ginapakamaayo ni Jehova ang mga hinaplas kag ginakabig nila nga kadungganan nga simbahon sia kaupod ini nga mga hinaplas.

2. Paano ‘magaupod’ sa mga hinaplas ang “napulo ka tawo”?

² Bisan pa indi posible mabal-an ang ngalan sang tanan nga hinaplas sa duta subong, * ang mga may paglaum nga mabuhi sing wala sing katapusan sa duta puede “mag-upod” sa mga hinaplas. Paano? Ginsiling sang Biblia nga ang “napulo ka tawo” “magauyat sa bayo sang isa ka Judiyo kag magasiling: ‘Luyag namon nga mag-upod sa inyo, kay nabatian namon nga kaupod ninyo ang Dios.’” Ginsambit sang Biblia ang isa ka Judiyo. Pero indi lang isa ang ginapatuhuyan sang tinaga nga “inyo” kag “ninyo.” Buot silingon sini nga ini nga Judiyo indi lang isa ka tawo kundi nagarepresentar ini sa mga hinaplas bilang isa ka grupo. Ang mga indi hinaplas nagaalagad kay Jehova kaupod ang mga hinaplas. Pero wala nila ginatamod nga ila lider ang mga hinaplas, kay kabalo sila nga si Jesus ang ila Lider.—Mat. 23:10.

3. Ano nga mga pamangkot ang sabton sa sini nga artikulo?

³ Bangod may mga hinaplas pa nga kaupod naton subong, mahimo mamangkot ang iban: (1) Paano dapat tamdon sang  mga hinaplas ang ila kaugalingon? (2) Paano naton dapat tamdon ang mga nagakaon sang tinapay kag nagainom sang alak sa tion sang Memoryal? (3) Dapat bala kita mabalaka kon nagadamo sila? Sabton sa sini nga artikulo ini nga mga pamangkot.

4. Ano ang paandam sa 1 Corinto 11:27-29 nga dapat binagbinagon sing maayo sang mga hinaplas, kag ngaa?

⁴ Dapat binagbinagon sing maayo sang mga hinaplas ang paandam sa 1 Corinto 11:27-29. (Basaha.) Paano mangin “indi takus” sa pagkaon sang tinapay kag pag-inom sang alak ang isa ka hinaplas sa tion sang Memoryal? Indi sia takus kon nagkaon sia sang tinapay kag nag-inom sang alak pero wala niya gintuman ang mga kasuguan ni Jehova. (Heb. 6:4-6; 10:26-29) Nahangpan sang mga hinaplas nga dapat padayon sila nga mangin matutom para mabaton nila “ang padya, ang langitnon nga pagtawag sang Dios paagi kay Cristo Jesus.”—Fil. 3:13-16.

5. Paano dapat tamdon sang hinaplas nga mga Cristiano ang ila kaugalingon?

⁵ Ginabuligan sang balaan nga espiritu ni Jehova ang iya mga alagad para mangin mapainubuson sila, indi bugalon. (Efe. 4:1-3;  Col. 3:10, 12) Gani wala ginahunahuna sang mga hinaplas nga mas maayo sila sangsa iban. Wala sila nagasiling nga mas madamo ang balaan nga espiritu nga ginahatag ni Jehova sa mga hinaplas sangsa iban niya nga alagad. Wala nila ginahunahuna nga mas nahangpan nila ang mga kamatuoran sa Biblia sangsa iban. Kag wala gid sila nagahambal sa iban nga hinaplas man sila kag dapat man sila magkaon sang tinapay kag mag-inom sang alak sa tion sang Memoryal. Mapainubuson nila nga ginabaton nga si Jehova lang ang nagapili sang mga tawo nga mabuhi sa langit.

6. Suno sa 1 Corinto 4:7, 8, paano dapat maggawi ang hinaplas nga mga Cristiano?

⁶ Para sa mga hinaplas, isa ka kadungganan nga ginpili sila nga mabuhi sa langit, pero wala nila ginapaabot nga hatagan sila sang iban sang pinasahi nga atension. (Fil. 2:2, 3) Kabalo man sila nga sang ginpili sila ni Jehova nga mga hinaplas, wala niya ini ginpahibalo sa iban. Gani wala natingala ang isa ka hinaplas kon indi dayon magpati ang iban nga ginhaplasan sia. Kabalo sia nga ang Biblia nagsiling nga indi kita dapat magpati dayon sa isa nga nagahambal nga ginhatagan sia sang Dios sang pinasahi nga responsibilidad. (Bug. 2:2) Indi gusto sang isa ka hinaplas nga Cristiano nga hatagan sia sang mga tawo sang sobra nga atension, gani wala niya ginapanugidsugid nga hinaplas sia. Kag wala gid niya ini ginapabugal sa iban.—Basaha ang 1 Corinto 4:7, 8.

7. Ano ang indi dapat paghimuon sang mga hinaplas, kag ngaa?

⁷ Wala nagabatyag ang hinaplas nga mga Cristiano nga dapat lang sila makig-upod sa pareho nila nga mga hinaplas, nga daw miembro sila sang pinasahi nga grupo. Wala nila ginapangita ang iban pa nga hinaplas para hambalan nila ang paghaplas sa ila ukon para magtuon sang Biblia bilang mga grupo. (Gal. 1:15-17) Kon himuon ini sang mga hinaplas, indi mahiusa ang kongregasyon kag wala sila nagapagiya sa balaan nga espiritu. Nagabulig ang balaan nga espiritu sa katawhan sang Dios para may paghidait sila kag paghiusa.—Roma 16:17, 18.

8. Ngaa dapat gid ikaw maghalong kon paano mo tamdon ang nagakaon sang tinapay kag nagainom sang alak sa tion sang Memoryal? (Tan-awa man ang footnote.)

⁸ Paano naton dapat tamdon ang aton mga kauturan nga hinaplas? Sala gid nga pakataason ang isa ka tawo, bisan pa isa sia ka hinaplas nga utod sang Cristo. (Mat. 23:8-12) Ginapalig-on  kita sang Biblia nga ‘ilugon ang pagtuo’ sang mga gulang, pero wala ini nagasugo sa aton nga himuon nga lider ang tawo. (Heb. 13:7) Matuod, nagasiling ang Biblia nga ang iban sa ila “takus padunggan sing doble.” Pero takus sila padunggan bangod “nagadumala [sila] sa maayo nga paagi” kag “nagapangabudlay sing lakas sa paghambal kag pagpanudlo tuhoy sa pulong,” indi bangod hinaplas sila. (1 Tim. 5:17) Mahimo nga masaw-ahan ang mga hinaplas kon hatagan naton sila sang sobra nga pagdayaw kag atension. * Ang malain pa gid, basi ginapalig-on na naton sila nga mangin bugalon. (Roma 12:3) Indi gid naton gusto nga kita ang mangin kabangdanan nga makasala ang isa ka hinaplas nga utod sang Cristo!—Luc. 17:2.

9. Paano naton mapakita nga ginarespeto naton ang hinaplas nga mga Cristiano?

⁹ Paano naton mapakita nga ginarespeto naton ang ginpili ni Jehova nga mga hinaplas? Indi kita dapat mamangkot sa ila kon paano sila nangin hinaplas. Personal ini nga butang, kag wala kita sing kinamatarong nga hibaluon ini. (1 Tes. 4:11; 2 Tes. 3:11) Indi man kita maghunahuna nga hinaplas man ang ila bana ukon asawa, mga ginikanan, ukon iban pa nga miembro sang ila pamilya. Wala ginapanubli sa pamilya ang paglaum nga mabuhi sa langit. Ginahatag ini sang Dios. (1 Tes. 2:12) Indi man kita mamangkot sang makasakit sa balatyagon sang iban. Halimbawa, indi kita dapat mamangkot sa asawa sang hinaplas nga utod kon ano ang iya ginabatyag kay indi na niya mangin kaupod ang iya bana nga mabuhi sing wala sing katapusan sa duta sa palaabuton. Makasigurado kita nga sa bag-ong kalibutan, ‘ihatag ni Jehova ang handum sang tagsa ka buhi nga butang.’—Sal. 145:16.

10. Ngaa maamligan kita kon likawan naton ang ‘pagdayaw sa iban’?

¹⁰ Maamligan man kita kon wala naton ginatamod nga mas importante ang mga hinaplas sangsa iban. Ngaa? Ang Biblia nagasiling nga mahimo indi magpabilin nga matutom ang pila ka hinaplas. (Mat. 25:10-12; 2 Ped. 2:20, 21) Pero kon likawan naton ang ‘pagdayaw sa iban,’ indi gid kita magasunod sa ila, bisan hinaplas pa sila ukon prominente ukon madugay na nga nagaalagad kay Jehova. (Jud. 16, footnote) Gani kon indi sila magpabilin nga matutom ukon magbiya sila sa kongregasyon, indi magaluya ang aton pagtuo kay Jehova kag indi kita magauntat sa pag-alagad sa iya.

11. Ano ang masiling mo sa kadamuon sang nagakaon sang tinapay kag nagainom sang alak sa tion sang Memoryal?

¹¹ Sa madamo nga tinuig, nagadiutay ang nagakaon sang tinapay kag nagainom sang alak sa tion sang Memoryal. Pero sang nagligad lang nga mga tinuig, nagadamo sila kada tuig. Dapat bala kita mabalaka sa sini? Indi. Binagbinagon naton ang pila ka rason kon ngaa.

12. Ngaa indi kita dapat mabalaka sa kadamuon sang nagakaon sang tinapay kag nagainom sang alak sa tion sang Memoryal?

¹² “Kilala ni Jehova ang mga ginapanag-iyahan niya.” (2 Tim. 2:19) Indi pareho kay Jehova, indi mabal-an sang mga utod nga nagaisip sang nagakaon sang tinapay kag nagainom sang alak sa tion sang Memoryal kon sin-o ang matuod nga hinaplas. Gani lakip sa maisip ang sayop nga naghunahuna nga hinaplas sila. Halimbawa, may pila nga nagsugod sa pagkaon sa tinapay kag pag-inom sa alak pero nag-untat sang ulihi. Ang iban mahimo may problema sa hunahuna ukon sa emosyon amo nga nagapati sila nga magagahom sila upod sang Cristo sa  langit. Gani wala kita kabalo kon pila gid ang nabilin nga mga hinaplas sa duta.

13. Ginasiling bala sang Biblia kon pila ang hinaplas nga ari pa sa duta kon magsugod ang dakung kapipit-an?

¹³ May mga hinaplas sa madamo nga bahin sang duta kon mag-abot na si Jesus para dalhon sila sa langit. (Mat. 24:31) Ginasiling sang Biblia nga diutay na lang ang mga hinaplas nga mabilin sa duta sa katapusan nga mga adlaw. (Bug. 12:17) Pero wala ini nagasiling kon pila sa ila ang ari pa sa duta kon magsugod ang dakung kapipit-an.

14. Ano ang matun-an naton sa Roma 9:11, 16 parte sa pagpili sa mga hinaplas?

¹⁴ Si Jehova ang nagadesisyon kon san-o niya pilion ang mga hinaplas. (Roma 8:28-30) Ginsugdan ni Jehova ang pagpili sa mga hinaplas pagkatapos mabanhaw si Jesus. Sang unang siglo, mahimo gid nga hinaplas ang tanan nga Cristiano. Pagkasunod nga mga tinuig, ang kalabanan nga nagapangangkon nga mga Cristiano indi matuod nga nagasunod sa Cristo. Pero may pila ka matuod nga mga Cristiano nga ginpili ni Jehova nga mga hinaplas. Pareho sila sang trigo nga nagtubo dungan sa hilamon sa ilustrasyon ni Jesus. (Mat. 13:24-30) Sa katapusan nga mga adlaw, padayon nga ginapili ni Jehova ang mangin miembro sang 144,000. * Gani kon magdesisyon ang Dios nga pilion ang pila sa ila antes mag-abot ang katapusan, indi gid naton pagduhaduhaan ang iya kaalam. (Basaha ang Roma 9:11, 16.) * Dapat kita maghalong para indi kita mangin pareho  sang mga mamumugon sa ilustrasyon ni Jesus. Nagreklamo sila sa ginhimo sang ila agalon sa mga pinakaulihi nga nag-obra.—Mat. 20:8-15.

15. Ang tanan bala nga hinaplas miembro sang “matutom kag mainandamon nga ulipon” nga ginsambit sa Mateo 24:45-47? Ipaathag.

¹⁵ Indi tanan sang may paglaum nga mabuhi sa langit ang miembro sang “matutom kag mainandamon nga ulipon.” (Basaha ang Mateo 24:45-47.) Pareho sang unang siglo, pila lang ka utod nga lalaki ang ginagamit ni Jehova kag ni Jesus sa pagpakaon, ukon sa pagtudlo, sa madamo subong. Pila lang ka hinaplas nga Cristiano sang unang siglo ang gingamit sa pagsulat sang Cristianong Griegong Kasulatan. Subong, pila lang ka hinaplas nga Cristiano ang may responsibilidad sa paghatag sa katawhan sang Dios sang “pagkaon sa nagakaigo nga tion.”

16. Ano ang natun-an mo sa sini nga artikulo?

¹⁶ Ano ang natun-an naton sa sini nga artikulo? Nagdesisyon si Jehova nga hatagan sang kabuhi nga wala sing katapusan sa duta ang kalabanan sa iya katawhan kag sang kabuhi sa langit ang pila nga magagahom kaupod ni Jesus. Nagahatag sang padya si Jehova sa tanan niya nga katawhan, nga ginarepresentar sang “Judiyo” kag sang “napulo ka tawo.” Pareho lang nga kasuguan ang ginapatuman niya sa aton kag gusto niya nga mangin matutom kita. Dapat kita tanan mangin mapainubuson. Dapat kita tanan mahiusa sa pag-alagad sa iya. Kag dapat kita tanan magbuligay para may paghidait sa kongregasyon. Samtang nagapalapit na kita sa katapusan, padayon kita tanan nga mag-alagad kay Jehova kag magsunod sa Cristo bilang “isa ka panong.”—Juan 10:16.