1. Iehova ese iseda nega ai do ia vara gauna be edena bamona ia gwauraia?

IEHOVA ese iseda nega ai do ia vara gauna be inai bamona ia perovetalaia: “Tau ibounai 10, gado idauidau ibounai besedia dekena amo, ese Iuda tauna ta dekenai do idia mai, iena dabua do idia dogoatao, do idia noia, do idia gwau, ‘Mani emu kara, oi danu do ita lao, badina be ai be ai kamonai vadaeni, Dirava be oi dekenai ia noho.’” (Sek. 8:23) Inai hereva “Iuda tauna” be, Dirava ese ena lauma helaga amo ia horoa taudia ia herevalaia. Danu Baibel ese idia ia gwauraia, “Dirava ena Israela.” (Gal. 6:16) Bona “tau ibounai 10” be tanobada dekenai mauri hanaihanai helarona do idia abia taudia ia laulaulaia. Idia diba Iehova ese unai horoa oreana taudia ia abia hidi, unai dainai idia bona horoa taudia ese Iehova idia tomadiho henia hebou be hahenamo badana.

2. Edena dala ai “tau ibounai 10” be horoa taudia ida ‘idia lao’?

² Herevana hari inai negai, tanobada ai idia noho horoa taudia ta ta edia ladana ita diba lasi, * to tanobada helarona do idia abia taudia be horoa taudia ida ‘idia lao’ diba. Edena dala ai? Baibel ia gwau “tau ibounai 10” ese “Iuda tauna ta dekenai do idia mai, iena dabua do idia dogoatao, do idia noia, do idia gwau, ‘Mani emu kara, oi danu do ita lao, badina be ai be ai kamonai vadaeni, Dirava be [“umui,” NWT] dekenai ia noho.’” Unai Baibel siri ese Iuda tauna tamona ia herevalaia. To, inai hereva “oi” bona “umui” ese taunimanima momo ia herevalaia. Unai ena anina be Iuda tauna be tau tamona lasi, to ia be horoa taudia ibounai ia laulaulaia. Dirava ese ia horoa lasi taudia be horoa taudia ida Iehova idia hesiai henia hebou. To, idia ese horoa taudia be hakaua taudia bamona idia laloa lasi, badina idia laloparara  Iesu be edia Hakaua Tauna.​—⁠Mat. 23:10.

3. Inai atikol ese edena henanadai do ia haerelaidia?

³ Hari inai negai Dirava ena taunimanima huanai horoa Keristani taudia haida idia do noho dainai, haida do idia laloa: (1) Horoa taudia ese sibodia be edena bamona idia laloa be namo? (2) Memorial ai paraoa bona wain idia abia taudia be edena bamona ita karaia henia be namo? (3) Paraoa bona wain idia abia taudia edia namba ia bada daekau dainai ita lalohekwarahi be namo, a? Inai atikol ese unai henanadai do ia haerelaidia.

4. Horoa taudia ese 1 Korinto 11:27-29 amo edena sisiba herevana idia laloa be namo, bona dahaka dainai?

⁴ Horoa taudia ese 1 Korinto 11:27-29 ena sisiba herevana idia laloa be namo. (Duahia.) Edena dala ai horoa tauna eiava hahinena be Memorial ai “kara maorona ia karaia lasi”? Bema ia ese paraoa ia ania bona wain ia inua, to Iehova ena taravatu maorodia ia badinaia lasi. (Heb. 6:4-6; 10:26-29) Horoa taudia idia laloparara namona be edia abidadama idia hagoadaia noho, bema idia ura edia “davana be guba lao  boiboina, Dirava ese Keriso Iesu amo ia henia gauna” idia abia.​—Fili. 3:13-16.

5. Horoa Keristani taudia ese dahaka idia laloa be namo?

⁵ Iehova ena lauma helaga ese ena hesiai taudia ia durua idia manau totona, to idia hekokoroku lasi. (Efe. 4:1-3; Kol. 3:10, 12) Unai dainai horoa taudia be idia laloa lasi, idia ese ma haida idia hereaia. Idia diba, Iehova ese ena lauma helaga be horoa taudia dekenai bona tanobada helarona idia abia taudia dekenai ia henia. Idia laloa lasi idia ese Baibel ena hereva momokani idia lalopararalaia dalana ese ma haida edia laloparara dalana ia hereaia. Bona idia ese ma ta do idia hadibaia lasi ia danu be Dirava ese ia horoa bona Memorial dekenai paraoa bona wain ia abia be namo. To, mai manau ida idia abia dae Iehova sibona ese ta ia abia hidi diba guba dekenai ia lao totona.

6. Korinto Ginigunana 4:7, 8 ena hereva bamona, horoa Keristani taudia be edena bamona idia kara be namo?

⁶ Horoa taudia idia diba guba dekenai do idia lao karana be hahenamo badana, to idia laloa lasi ma haida ese spesel dalanai idia kara henidia. (Fili. 2:2, 3) Danu, idia diba Iehova ese idia ia horoa neganai, ta be unai ia diba lasi. Unai dainai horoa tauna ia hoa lasi, bema haida idia abia dae lasi ia be Dirava ese ia horoa. Ia laloparara Baibel ese ita ia hadibaia namona be ta ena hereva ita abia dae haraga lasi, bema ia gwau Dirava ese ia dekenai maduna badana ta ia henia. (Apok. 2:2) Horoa Keristani tauna eiava hahinena ia ura lasi momo idia diba ia be Dirava ese ia horoa, unai dainai nega ginigunana ia hedavari henia taudia do ia hadibaia lasi. Bona ma haida dekenai unai ia heagilaia lasi.​—⁠1 Korinto 4:7, 8 duahia.

7. Horoa taudia be dahaka idia karaia lasi, bona dahaka dainai?

⁷ Horoa Keristani taudia idia laloa lasi, orea ta bamona, horoa taudia sibona do idia bamoa. Idia ese tahua gaukara idia karaia lasi horoa taudia ma haida idia dibaia totona, unai amo edia horoa karana idia herevalaia eiava grup maragidia ai Baibel idia stadilaia hebou. (Gal. 1:15-17) Bema horoa taudia be unai bamona idia karaia, kongrigeisen ai lalotamona do ia noho lasi. Idia be lauma helaga ena gaukara dalana do idia koua, badina lauma helaga ese Dirava ena taunimanima ia durua maino bona lalotamona ai idia noho totona.​—Roma 16:17, 18.

8. Dahaka dainai Memorial ai, paraoa bona wain idia abia taudia ita kara henidia neganai, ita naria namonamo? (Futnout itaia danu.)

⁸ Dirava ese ia horoa tadikaka bona taihu be edena bamona ita kara henidia be  namo? Namo lasi, ta be Keriso ena horoa tadikakana dainai ia ita matauraia bada. (Mat. 23:8-12) Baibel ese elda taudia ia herevalaia neganai, ita ia hagoadaia ‘edia abidadama ita tohotohoa’ totona, to ita ia hamaoroa lasi ta be iseda hakaua tauna ai ita halaoa. (Heb. 13:7) Momokani, Baibel ia gwau idia haida “ita matauraia bada be namo.” Unai bamona ita karaia badina idia be “dala maorona ai naria gaukarana idia karaia” bona “mai edia goada ida Dirava ena hereva idia herevalaia bona idia hadibaia,” to idia be horoa taudia dainai lasi. (1 Tim. 5:17) Bema nega momo horoa taudia edia ladana ita abia isi, idia do ita hahemaraia. * Eiava unai kara dainai do idia hekokoroku diba. (Roma 12:3) Ita ura lasi iseda kara ta dainai Keriso ena horoa tadikaka ta be kerere badana ta ia karaia!​—Luka 17:2.

9. Edena dala ai ita hahedinaraia horoa Keristani taudia ita matauraia?

⁹ Edena dala ai ita hahedinaraia Iehova ese ia horoa taudia ita matauraia? Namo lasi idia ita nanadaia edena dala ai Dirava ese idia ia horoa. Unai be idia sibona idia diba gauna, unai dainai ita be maoro lasi unai ita dibaia totona. (1 Tes. 4:11; 2 Tes. 3:11) Bona namo lasi ita laloa, horoa taudia edia adavana, tama sina, eiava edia ruma bese danu be horoa taudia. Ta be ena ruma bese amo guba helarona ia abia lasi. To, Dirava amo ia abia. (1 Tes. 2:12) Danu, ma haida edia hemami do ia hadikaia henanadai ita henia lasi. Hegeregere, namo lasi horoa tadikaka ta ena adavana dekenai inai bamona henanadai ita gwauraia, ‘Tanobada ai mauri hanaihanai ena helaro do oi abia, to emu tau be oi ida do ia noho lasi ena hemami be edena bamona?’ To, ita diba momokani tanobada matamatana ai, Iehova ese ‘mauri gaudia ibounai edia ura gaudia do ia henia.’​—⁠Sal. 145:16, NWT.

10. Edena dala ai sibona ita gimaia diba, bema haida hanamoa bada karana ita dadaraia?

¹⁰ Bema horoa taudia be ma haida ida ita hahegeregerea lasi, ita sibona do ita gimaia danu. Edena dala ai? Baibel ese ita ia hadibaia horoa taudia haida be edia abidadama idia rakatania diba. (Mat. 25:10-12; 2 Pet. 2:20, 21) Namo lasi ita laloa, horoa taudia o momo ese idia dibaia taudia, eiava lagani daudau lalonai Iehova idia hesiai henia taudia ita matauraia bada. (Iuda 16) Badina bema Dirava idia badinaia lasi eiava Kongrigeisen idia rakatania, unai ese ita do ia hahekwakwanaia lasi bona Iehova hesiai henia karana do ita rakatania lasi.

11. Memorial ai paraoa bona wain idia abia taudia edia namba dekenai dahaka ia vara noho?

¹¹ Lagani momo lalonai, Memorial ai paraoa bona wain idia abia taudia edia namba ia maragi ia lao noho. To vanegai lagani amo, unai namba be lagani ta ta lalonai ia bada daekau. Unai dainai ita lalohekwarahi be namo, a? Lasi. Mani ena badina haida ita herevalaia.

12. Dahaka dainai Memorial dekenai paraoa bona wain idia abia taudia edia namba dainai ita lalohekwarahi lasi?

¹² “Iehova be ena taunimanima ia diba.” (2 Tim. 2:19) Memorial dekenai paraoa bona wain idia abia taudia edia namba idia duahia tadikaka be idia diba lasi daidia be horoa taudia momokanidia, to Iehova sibona ia diba. Anina be unai namba lalonai horoa taudia bona sibodia idia laloa  Dirava ese idia ia horoa taudia edia namba ia noho danu. Hegeregere, guna Memorial paraoa bona wain idia abia taudia be gabeai unai idia karaia lou lasi. Ma haida be reana idia lalometau momo dainai idia laloa Keriso ida guba dekenai do idia lohia. Ia hahedinaraia goevagoeva, tanobada dekenai horoa taudia hida idia noho be ita diba lasi.

13. Hisihisi badana ia matamaia neganai, Baibel ese tanobada ai horoa taudia hida do idia noho ena namba ia gwauraia, a?

¹³ Tanobada ena kahana momo lalonai horoa taudia idia noho bona Iesu be do ia mai idia ia haboua guba dekenai idia lao totona. (Mat. 24:31) Baibel ia gwau dina gabediai, tanobada ai horoa taudia haida sibona do idia noho. (Apok. 12:17) To, hisihisi badana ia matamaia neganai, hida do idia noho be Baibel ese ia gwauraia lasi.

14. Roma 9:11, 16 ena hereva bamona, horoa taudia abia hidi karana dekenai dahaka ita lalopararalaia be namo?

¹⁴ Iehova ese horoa taudia do ia abia hidi negana ia diba. (Roma 8:28-30) Iehova ese horoa taudia be Iesu ia toreisi lou murinai ia abia hidi matamaia. Toana be Iesu ena negai, Keristani taudia momokanidia ibounai be Dirava ese ia horoa. Lagani handred momo murinai, sibona idia gwauraia Keristani taudia momo be mai kudouna ibounai ida Keriso idia badinaia lasi. To, unai lagani lalodiai, Iehova ese Keristani momokanidia haida sibona ia horoa. Idia be Iesu ese ia gwauraia uiti bamona, ava dikadia huanai idia tubu. (Mat. 13:24-30) Dina gabediai, Iehova ese taunimanima ia abia hidi noho, 144,000 * taudia  ai idia lao totona. Unai dainai bema Iehova ese dokona ia kahirakahira noho lalonai ma haida ia abia hidi, iena aonega karana do ita daradaralaia lasi. (Roma 9:11, 16 duahia.) * Namona be ita naria namonamo, namo lasi Iesu ese ena parabole ta ai ia herevalaia gaukara taudia bamona ita kara. Idia be edia biaguna ese gabeai idia mai taudia ia kara henidia dalana dainai idia maumau.​—Mat. 20:8-15.

15. Horoa taudia ibounai be Mataio 24:45-47 ese ia herevalaia “igui hesiai tauna mai ena kamonai bona mai ena kara maoromaoro” oreana ai idia lao, a? Herevalaia.

¹⁵ Guba helarona idia abia taudia haida sibona be “igui hesiai tauna mai ena kamonai bona mai ena kara maoromaoro” oreana ai idia lao. (Mataio 24:45-47 duahia.) Keristani taudia ginigunadia edia negai bamona, hari Iehova bona Iesu be tadikaka haida idia gaukaralaia noho, momo idia ubua bona hadibaia totona. Keristani taudia ginigunadia edia negai, horoa Keristani taudia haida sibona ese Keristani Grik Toretoredia idia torea. Hari inai negai, horoa Keristani taudia haida sibona ese Dirava ena taunimanima dekenai ‘nega korikori ai edia aniani idia henia.’

16. Inai atikol amo dahaka ita dibaia?

¹⁶ Inai atikol amo dahaka ita dibaia? Iehova ese abia hidi ia karaia iena taunimanima hutuma be tanobada ai mauri hanaihanai do idia abia, bona haida sibona be Iesu ida guba dekenai do idia lohia. Iehova ese ena hesiai taudia ibounai​—“Iuda tauna” bona “tau ibounai 10”​—dekenai ahuna namona ia henia, bona ia ura idia ese iena taravatu idia badinaia bona edia abidadama ai idia gini goada. Ita ibounai ita manau be namo. Mai lalotamona ida Ia ita hesiai henia. Bona kongrigeisen ai maino ai ita noho totona ita gaukara hebou. Dokona ia kahirakahira noho lalonai, namona be “mamoe serina tamona” bamona Iehova ita hesiai henia noho bona Keriso ita badinaia.​—Ioa. 10:16.