1. Nitih ku Jehovah, nama deka nyadi ba jeman kitai?

KU JEHOVAH madah pasal jeman kitai: “Sepuluh iku orang ari bansa bukai deka mansang ngagai siku orang Judah lalu bejaku, ‘Kami ingin deka enggau kita, laban kami udah ninga Petara bisi enggau kita.’” (Sek. 8:23) “Orang Judah” ngambarka sida ke udah diiri Petara ngena roh kudus. Sida mega dikumbai ‘orang Israel ke nembiak Petara.’ (Gal. 6:16) “Sepuluh iku orang” ngambarka sida ke bisi peluang idup belama iya ba dunya. Sida nemu, Jehovah udah milih raban orang ke diiri ngena roh kudus nya ke serega. Lalu sida ngasaika nya basa ti besai ulih begulai enggau raban nya nyembah Jehovah.

2. Baka ni “sepuluh iku orang” ulih begulai “enggau” sida ke dipilih ke serega?

² Taja pan ukai semua nama tiap iku sida ke dipilih ke serega ditemu kemayaharitu, * sida ke bisi peluang idup ba dunya ulih begulai “enggau” raban nya. Baka ni? Bup Kudus madahka “sepuluh iku orang” deka “mansang ngagai siku orang Judah lalu bejaku, ‘Kami ingin deka enggau kita, laban kami udah ninga Petara bisi enggau kita.’” Begian keterubah ba ayat tu nyebut pasal seiku orang Judah. Tang begian kedua ba ayat tu ngena leka jaku “kita,” ke nunjukka lebih ari seiku. Reti nya “orang Judah” nya ukai semina seiku aja, tang ngambarka seraban orang ke dipilih ke serega. Sida ke enda dipilih ke serega deka nyembah Jehovah begulai enggau raban nya. Taja pia, sida enda ngumbai raban nya kepala sida laban sida nemu Jesus nya Kepala sida.—Mat. 23:10.

3. Nama tanya ke deka disaut ba artikel tu?

 ³ Ketegal sekeda ari sida ke dipilih ke serega agi bisi ba dunya kemayaharitu, nya alai sekeda nembiak Petara engka berunding: (1) Nama runding ke patut dikembuan sida ke dipilih ke serega pasal diri empu? (2) Baka ni chara kitai patut begulai enggau sida ke makai roti sereta ngirup wain maya Ngingatka Pemati Jesus? (3) Patut kitai irau enti penyampau sida ke makai roti enggau ngirup wain nya majak nambah? Tanya tu deka disaut ba artikel tu.

4. Nama jaku tangkan ba 1 Korint 11:27-29 ke patut diperundingka sida ke dipilih ke serega, lalu nama kebuah?

⁴ Sida ke dipilih ke serega patut beratika jaku tangkan ba 1 Korint 11:27-29. (Bacha.) Enti sema sida enda idup sejalai enggau standard Jehovah ti lurus, tu reti nya sida makai roti enggau ngirup wain ‘ngena jalai ti enda bebasa’ maya Ngingatka Pemati Jesus. (Heb. 6:4-6; 10:26-29) Sida enda tau enda mengkang tetap ati enti deka bulih ‘prais, iya  nya kangau Petara, ulih Jesus Kristus, ke mai ke serega.’—Plp. 3:13-16.

5. Nama runding ke patut dikembuan sida ke dipilih ke serega pasal diri empu?

⁵ Roh kudus Jehovah nulung nembiak Iya baruh ati, ukai sumbung. (Eps. 4:1-3; Kol. 3:10, 12) Nya alai sida ke dipilih ke serega enda ngumbai diri manah agi ari orang bukai. Sida nemu Jehovah enda meri sida mayuh agi roh kudus ari nembiak Iya ke bukai. Sida enda ngumbai diri nemu pemendar Bup Kudus mayuh agi ari orang bukai. Sida mega enda madah ngagai seiku menyadi: “Nuan mega udah dipilih ke serega lalu tau berengkah makai roti enggau ngirup wain maya Ngingatka Pemati Jesus.” Tang sida enggau baruh ati ngaku semina Jehovah aja ke patut ngangau orang ngagai serega.

6. Nitihka 1 Korint 4:7, 8, nama ulah ke patut dikembuan orang ke dipilih ke serega?

⁶ Taja pan sida ke dipilih ngasaika nya basa ti besai ulih dikangau ke serega, tang sida enda ngarapka orang ngereja utai badas agi ngagai sida enti dibanding ngagai bala menyadi ke bukai. (Plp. 2:2, 3) Sida mega nemu lebuh Jehovah milih sida, Iya enda madah ngagai semua orang pasal tu. Nya alai orang ke dipilih enda tekenyit lebuh sekeda orang enda pechayaka iya udah dipilih. Iya nemu Bup Kudus enda ngasuh kitai jampat pechayaka orang ke madahka Petara udah meri iya tanggung pengawa ti spesial. (Pem. 2:2) Orang ke dipilih enggai orang bukai kelalu beratika iya. Nya alai iya enda madahka diri udah dipilih Jehovah ngagai orang ke baru enggau iya betemu. Lalu iya mega tentu enda bejaku begah pasal iya ke udah dipilih.—Bacha 1 Korint 4:7, 8.

7. Nama utai ke patut diseliahka sida ke dipilih, lalu nama kebuah?

⁷ Sida ke dipilih enda ngasaika diri semina patut begulai enggau sida ke dipilih aja, baka siti gerempung. Sida mega enda nguji ngiga orang ke dipilih ti bukai ngambika sida ulih berandau pasal diri ke udah dipilih sereta begempuru belajarka Bup Kudus. (Gal. 1:15-17) Enti sida baka nya, eklisia tentu enda ulih beserakup. Sida ngelaban roh kudus ke nulung nembiak Petara bulih pemaik enggau penyerakup.—Rom. 16:17, 18.

8. Nama kebuah kitai patut bejimat enggau chara kitai begulai enggau sida ke dipilih ke serega? (Peda mega nota kaki.)

⁸ Baka ni chara kitai begulai enggau sida ke dipilih ke serega? Amat, endang salah  enti kitai ngeninggika orang taja pan iya menyadi ke dipilih. (Mat. 23:8-12) Lebuh Bup Kudus nyebut pasal tuai gempuru, Bup Kudus meransang kitai ‘nunda pengarap sida.’ Tang Bup Kudus enda ngasuh kitai betuaika mensia. (Heb. 13:7) Endang amat, Bup Kudus madahka sekeda orang “patut diberi dua kali lipat [‘basa,’ NWT].” Tang tu ketegal sida “ngereja pengawa sida enggau menyana” sereta “bebendar nusui Berita Manah enggau ngajar,” ukai ketegal sida dipilih ke serega. (1 Tim. 5:17) Enti kitai kelalu muji sereta beratika sida ke dipilih ke serega, kitai engka ngasuh sida berasai malu. * Tauka kitai engka nyau ngasuh sida temegahka diri. (Rom. 12:3) Kitai tentu enggai ngereja sebarang utai ke tau ngasuh seiku ari sida ke dipilih nya ngereja penyalah ti besai!—Luk. 17:2.

9. Baka ni kitai nunjukka diri bebasaka sida ke dipilih ke serega?

⁹ Baka ni kitai nunjukka diri bebasaka sida ke dipilih Jehovah ke serega? Kitai enda nanya baka ni sida tau nemu diri udah nyadi orang ke dipilih. Tu utai ke bekaul enggau sida empu. Kitai enda patut nemu. (1 Tes. 4:11; 2 Tes. 3:11) Lalu kitai enda patut ngumbai laki tauka bini sida, apai indai sida, tauka sida sebilik ke bukai mega dipilih ke serega. Sida enda bulih peluang nya ari diri sebilik. Sida nerima peluang nya ari Petara. (1 Tes. 2:12) Kitai mega patut nyeliah ari nanya utai ke tau ngenusahka ati. Ambika chunto, kitai enda patut nanya baka ni asai ati bini enti laki iya nya orang ke dipilih ke serega lalu iya enda ulih idup belama enggau laki iya ba dunya. Laban kitai pechaya ba dunya baru, Jehovah tentu deka “semua utai ti idup nadai suntuk utai.”—Mas. 145:16.

10. Baka ni kitai nyaga diri enti kitai nyeliah ari kelalu temegahka orang?

¹⁰ Enti kitai enda ngenuluka orang ke dipilih lebih agi ari orang bukai, kitai mega nyaga diri empu. Baka ni? Bup Kudus madahka, sekeda ari sida engka enda mengkang tetap ati. (Mat. 25:10-12; 2 Pet. 2:20, 21) Tang enti kitai nyeliah ari kelalu temegahka orang, kitai enda nitihka orang, enda ngira sida nya orang ke dipilih ke serega, orang ke tebilang, tauka udah lama nyembah Jehovah. (Jud. 16) Enti sida nyau enda tetap ati lalu ninggalka pemendar, kitai enda lenyau pengarap ba Jehovah tauka ngetu nyembah Iya.

11. Nama nyadi ngagai penyampau sida ke makai roti enggau ngirup wain?

¹¹ Betaun-taun penyampau sida ke makai roti enggau ngirup wain maya Ngingatka Pemati Jesus majak kurang. Tang beberapa taun tu, penyampau sida majak nambah. Patut kitai irau pasal tu? Enda. Aram kitai beratika kebuah iya.

12. Nama kebuah kitai enda patut irau pasal penyampau sida ke makai roti enggau ngirup wain maya Ngingatka Pemati Jesus?

¹² ‘Jehovah nemu sapa ke enggi Iya.’ (2 Tim. 2:19) Bala menyadi lelaki ke ngira penyampau orang ke makai roti enggau ngirup wain maya Ngingatka Pemati Jesus enda nemu sapa ke amat dipilih ke serega. Nya alai penyampau nya nyengkaum sida ke ngumbai diri udah dipilih, tang kebendar nya enda. Ambika chunto, sekeda orang bisi enggau makai roti sereta ngirup wain, tang udah nya enda agi. Sekeda nya engka bisi penanggul ba runding tauka emosi ke ngasuh sida pechaya sida deka merintah enggau Jesus di serega. Nya alai, kitai enda nemu penyampau ke amat. Semina Jehovah aja ke nemu  penyampau orang ti dipilih ke serega ke agi idup ba dunya.

13. Kati Bup Kudus bisi madahka penyampau sida ke dipilih ke agi diau ba dunya lebuh Penusah ti Besai berengkah?

¹³ Sida ke dipilih bisi di serata dunya lebuh Jesus datai mai sida ke serega. (Mat. 24:31) Bup Kudus madahka ba hari ti penudi, bisi mimit sida ke dipilih agi diau ba dunya. (Pem. 12:17) Tang Bup Kudus nadai madahka penyampau sida ke agi diau ba dunya lebuh Penusah ti Besai berengkah.

14. Baka ke dipadah ba Rome 9:11, 16, nama patut ditemu kitai pasal pengawa milih orang ke serega?

¹⁴ Jehovah mutuska kemaya Iya deka milih sida ke patut ke serega. (Rom. 8:28-30) Jehovah berengkah milih sida pengudah Jesus diangkatka idup baru. Enti pia, semua orang Kristian ba abad keterubah nya orang ke dipilih ke serega. Beratus taun udah nya, mayuh orang ke ngaku diri Kristian ukai amat nitihka Kristus. Taja pia, dalam timpuh nya, Jehovah bisi milih sekeda orang ke amat nitihka Kristus. Jesus madahka, sida baka gandum ke tumbuh ba madang rumput. (Mat. 13:24-30) Ba hari ti penudi, Jehovah agi terus milih orang kena ngenyukupka penyampau 144,000 * iku orang ke serega. Nya alai, enti Jehovah mutuska deka milih sekeda ari sida  sebedau pengujung dunya datai, kitai tentu arapka penemu-dalam Jehovah. (Bacha Rome 9:11, 16.) * Kitai patut bejimat ngambika enda baka orang gaji ke mut-mut pasal chara tuan sida ngaji orang ke datai dudi bekereja.—Mat. 20:8-15.

15. Baka ke dipadah ba Matthew 24:45-47, kati semua sida ke dipilih diau di serega deka nyadi “ulun ke tetap ati sereta bepenemu-dalam”? Terangka.

¹⁵ Ukai semua orang ke bisi peluang diau di serega deka nyadi “ulun ke tetap ati sereta bepenemu-dalam.” (Bacha Matthew 24:45-47.) Baka ba abad keterubah, kemayaharitu Jehovah enggau Jesus ngena beberapa iku orang ngajar bala nembiak Jehovah. Ba abad keterubah, semina beberapa iku aja orang Kristian ke dikena Jehovah nulis Bup Kudus Kristian jaku Gerika. Pia mega enggau kemayaharitu, Jehovah semina ngena beberapa iku orang Kristian ke dipilih ke serega megai tanggung pengawa meri nembiak Iya “pemakai ba maya ti patut.”

16. Nama udah dipelajarka nuan ari artikel tu?

¹⁶ Nama udah dipelajarka kitai ari artikel tu? Jehovah udah mutuska deka meri pengidup belama iya ba dunya ngagai mayuh nembiak Iya. Tang pengidup di serega semina diberi ngagai mimit aja orang, iya nya sida ke merintah enggau Jesus. Jehovah merekatka semua nembiak Iya, “seiku orang Judah” enggau “sepuluh iku orang,” lalu Iya dekaka sida ngasika adat ti sama sereta mengkang tetap ati. Semua sida enda tau enda mengkang baruh ati, begulai nyembah Iya sereta beserakup. Lalu semua sida mega enda tau enda ngetanka pemaik enggau pangan diri. Seraya pengujung dunya majak semak, aram meh semua kitai terus nyembah Jehovah sereta nitihka Jesus nyadi “siti raban.”—Jhn. 10:16.