1. Ania ti imbaga ni Jehova a mapasamak iti panawentayo?

IMPAKPAKAUNA ni Jehova maipapan iti panawentayo: “Kumpetto ti 10 a tattao manipud iti amin a lengguahe kadagiti nasion, wen, kumpetdanto a naimbag iti bado ti maysa a Judio, nga ibagbagada: ‘Kayatmi ti kumuyog kadakayo ta nangngegmi nga adda kadakayo ti Dios.’” (Zac. 8:23) Ti “Judio” irepresentarna dagidiay pinulotan ti Dios babaen ti nasantuan nga espiritu. Naawaganda met iti “Israel ti Dios.” (Gal. 6:16) Ti “10 a tattao” irepresentarda dagidiay addaan iti namnama nga agbiag nga agnanayon ditoy daga. Ammoda a pinili ni Jehova daytoy a grupo dagiti napulotan ken ibilangda a pribilehio ti makikadua kadakuada nga agdaydayaw iti Dios.

2. Kasano a “kumuyog” ti “10 a tattao” kadagiti napulotan?

² Uray no imposible nga ammuen ti nagan ti tunggal napulotan ditoy daga ita, * posible a “kumuyog” kadakuada dagidiay addaan iti namnama nga agbiag ditoy daga. Kasano? Kuna ti Biblia a ti “10 a tattao . . . kumpetdanto a naimbag iti bado ti maysa a Judio, nga ibagbagada: ‘Kayatmi ti kumuyog kadakayo ta nangngegmi nga adda kadakayo ti Dios.’” Dakamaten dayta a bersikulo ti Biblia ti maysa a Judio. Ngem ti “kadakayo” ket tumukoy iti ad-adu a tattao. Kaipapananna a saan a maymaysa a tao daytoy a Judio no di ket irepresentarna ti intero a grupo dagiti napulotan. Dagidiay saan a napulotan ket agserserbi ken Jehova a kadua dagiti napulotan. Ngem saanda nga ibilang a lider dagiti napulotan, ta ni Jesus ti bigbigenda a Lider.—Mat. 23:10.

3. Ania dagiti saludsod a masungbatan iti daytoy nga artikulo?

³ Gapu ta kadua pay laeng ti ili ti Dios ita ti dadduma a napulotan,  mabalin nga isaludsod ti dadduma: (1) Ania ti rumbeng a panangmatmat dagiti napulotan iti bagida? (2) Kasano ti rumbeng a pannakatrato dagidiay makiraman kadagiti emblema ti Memorial? (3) Pakaseknantayo kadi no umadu ti bilang dagiti makiramraman? Sungbatan daytoy nga artikulo dagita a saludsod.

4. Ania a pakdaar iti 1 Corinto 11:27-29 ti rumbeng a panunoten a naimbag dagiti napulotan, ken apay?

⁴ Panunoten koma a naimbag dagiti napulotan ti pakdaar iti 1 Corinto 11:27-29. (Basaen.) Kasano nga agbalin a “saan a maikari” ti pannakiraman ti maysa a napulotan iti Memorial? No mangan ken uminum kadagiti emblema ngem saanna a sursuroten dagiti nalinteg a pagalagadan ni Jehova. (Heb. 6:4-6; 10:26-29) Bigbigen dagiti napulotan a masapul nga agtalinaedda a matalek no kayatda nga awaten ti “gunggona a panangayab ti Dios [kadakuada] idiay langit babaen ken Kristo Jesus.”—Fil. 3:13-16.

5. Ania ti rumbeng a panagrikna dagiti napulotan a Kristiano iti bagida?

⁵ Tultulongan ti nasantuan nga espiritu ni Jehova dagiti adipenna nga agbalin a napakumbaba, imbes a napannakkel. (Efe. 4:1-3; Col. 3:10, 12) Isu a saan a marikna dagiti  napulotan a nalalaingda ngem iti sabsabali. Ammoda a saan nga ad-adu ti nasantuan nga espiritu nga ipaay kadakuada ni Jehova gapu laeng ta napulotanda. Saanda a marikna a naun-uneg ti pannakaawatda kadagiti kinapudno iti Biblia ngem iti sabsabali. Ken saanda a pulos ibaga iti maysa a tao a napulotan met isuna ken masapul a makiraman kadagiti emblema ti Memorial. Imbes ketdi, sipapakumbaba a bigbigenda a ni Jehova laeng ti mangawis kadagiti mapan idiay langit.

6. Sigun iti 1 Corinto 4:7, 8, ania ti rumbeng a kababalin dagiti napulotan a Kristiano?

⁶ Nupay ibilang dagiti napulotan a pribilehio ti maawis a mapan idiay langit, saanda nga ekspektaren ti espesial a pannakatrato. (Fil. 2:2, 3) Ammoda met nga idi pinulotan ida ni Jehova, saanna nga impakaammo dayta iti asinoman. Isu a saan a masdaaw ti maysa a napulotan no saan a dagus a patien ti dadduma nga isu ket napulotan. Ammona nga ibaga ti Biblia a saantayo koma a nalaka a mamatpati iti maysa nga agkunkuna nga inikkan ti Dios iti espesial a responsabilidad. (Apoc. 2:2) Saan a kayat ti maysa a napulotan a Kristiano a maiturong kenkuana ti atension, isu a dina ibaga kadagiti maam-ammona nga isu ket napulotan. Ken saanna met nga ipannakkel dayta iti sabsabali.—Basaen ti 1 Corinto 4:7, 8.

7. Ania koma ti saan nga aramiden dagiti napulotan, ken apay?

⁷ Saan a marikna dagiti napulotan a Kristiano a masapul a dagiti laeng padada a napulotan ti pakikaduaanda, a kasla ket ’tay miembroda iti espesial a grupo. Saanda a biroken dagiti padada a napulotan tapno pagtutungtonganda ti pannakapulotda wenno tapno mangbukelda kadagiti pribado a panagadal iti Biblia. (Gal. 1:15-17) Saan nga agkaykaysa ti kongregasion no kasta ti aramiden dagiti napulotan. Agtigtignayda no kuan maibusor iti nasantuan nga espiritu, a tumultulong iti ili ti Dios a maaddaan iti talna ken panagkaykaysa.—Roma 16:17, 18.

8. Apay a masapul nga agan-annadka iti panangtratom kadagiti makiramraman kadagiti emblema ti Memorial? (Kitaen met ti footnote.)

⁸ Kasano ti rumbeng a panangtratotayo kadagiti napulotan a kakabsat? Di umiso ti sobra a panangpadayaw iti maysa a tao, uray no isu ket napulotan a kabsat ni Kristo. (Mat. 23:8-12) Paregtaennatayo ti Biblia a ‘tuladentayo ti pammati’ dagiti panglakayen ngem saanna nga ibaga a mabalintayo a pagbalinen  a lider ti asinoman a tao. (Heb. 13:7) Pudno a kuna ti Biblia nga adda dagiti “maikari iti doble a dayaw.” Ngem saan a gapu ta napulotanda no di ket gapu ta “nasayaat ti panangidauloda” ken “napinget[da] iti panagsao ken panangisuro.” (1 Tim. 5:17) No sobra a pammadayaw ken atension ti ipaaytayo kadagiti napulotan, mabalin a saanda a komportable. * Wenno nakarkaro pay, baka agbalinda a napannakkel. (Roma 12:3) Awan kadatayo ti mayat nga agbalin a pakaigapuan ti kasta a serioso a kamali dagiti napulotan a kakabsat ni Kristo!—Luc. 17:2.

9. Kasanotayo a maipakita a raraementayo dagiti napulotan a Kristiano?

⁹ Kasanotayo a maipakita a raraementayo dagiti pinulotan ni Jehova? Ditay koma damdamagen no kasano a nagbalinda a napulotan. Personal a banag dayta, ket awan ti kalintegantayo a mangammo. (1 Tes. 4:11; 2 Tes. 3:11) Ditay koma ipapan a napulotan met ti asawa, nagannak, wenno dadduma pay a miembro ti pamiliada. Saan a matawid ti maysa a tao ti nailangitan a namnamana kadagiti kapamiliana. Impaay dayta kenkuana ti Dios. (1 Tes. 2:12) Ditay met koma agsaludsod kadagiti banag a mangpasakit iti rikna ti dadduma. Kas pagarigan, saantayo a damagen iti asawa ti maysa a napulotan no ania ti mariknana maipapan iti namnama a panagbiag nga agnanayon ditoy daga a saanna a kadua ti asawana. Siguradotayo no ania ti aramiden ni Jehova inton baro a lubong—‘penkennanto ti tarigagay ti tunggal sibibiag a banag.’—Sal. 145:16.

10. Kasanotayo a masalakniban ti bagitayo no liklikantayo ti sobra a ‘panangpadayaw kadagiti tattao’?

¹⁰ No saantayo a tratuen dagiti napulotan a napatpateg ngem iti sabsabali, salsalaknibantayo met ti bagitayo. Kasano? Ibaga ti Biblia a mabalin a di agmatalek ti dadduma a napulotan. (Mat. 25:10-12; 2 Ped. 2:20, 21) Isu a no liklikantayo ti sobra a ‘panangpadayaw kadagiti tattao,’ saantayto nga agbalin a pasurotda, napulotanda man, nalatakda, wenno nabayagdan nga agserserbi ken Jehova. (Jud. 16, ftn.) Iti kasta, no saanda nga agmatalek wenno panawanda ti kongregasion, saantayto a mapukaw ti pammatitayo ken Jehova wenno agsardeng nga agserbi kenkuana.

11. Ania ti mapaspasamak iti bilang dagiti makiramraman kadagiti emblema ti Memorial?

¹¹ Iti adu a tawen, bumabbaba ti bilang dagiti makiramraman kadagiti emblema ti Memorial. Ngem iti napalabas, immadu ti bilangda iti kada tawen. Masapul kadi a pakaseknantayo dayta? Saan. Pagsasaritaantayo no apay.

12. Apay a ditay koma pakaseknan ti bilang dagidiay makiramraman kadagiti emblema ti Memorial?

¹² “Ammo ni Jehova dagidiay kukuana.” (2 Tim. 2:19) Saan a kas ken Jehova, dagiti kakabsat nga agbilbilang kadagiti makiramraman kadagiti emblema ti Memorial dida ammo no asino a talaga dagiti napulotan. Isu nga iramanda uray dagiti mangipapan a napulotanda ngem saan met. Kas pagarigan, adda dagidiay makiramraman idi ngem nagsardengdan a makiraman. Mabalin met nga adda problema iti mental wenno emosional ti dadduma isu a patienda a makipagturaydanto ken Kristo idiay langit. Nalawag a ditay ammo ti eksakto a bilang dagiti napulotan nga adda pay laeng ditoy daga.

13. Ibaga kadi ti Biblia ti bilang dagiti napulotan ditoy daga inton mangrugi ti dakkel a rigat?

 ¹³ Addanto dagiti napulotan iti adu a paset ti daga inton alaen ida ni Jesus idiay langit. (Mat. 24:31) Ibaga ti Biblia a bayat ti maudi nga al-aldaw, bassitto laeng ti bilang dagiti napulotan a nabati ditoy daga. (Apoc. 12:17) Ngem dina ibaga no mano kadakuada ti adda pay laeng ditoy daga inton mangrugi ti dakkel a rigat.

14. Kas ipakita ti Roma 9:11, 16, ania ti masapul a tarusantayo maipapan iti pannakapili dagiti napulotan?

¹⁴ Ni Jehova ti agdesision no kaano a pilienna dagiti napulotan. (Roma 8:28-30) Rinugian ni Jehova ti mangpili kadagiti napulotan kalpasan a napagungar ni Jesus. Agparang nga amin a pudno a Kristiano idi umuna a siglo ket napulotan. Kadagiti simmaruno a siglo, saan a simmurot ken Kristo ti kaaduan nga agkunkuna a Kristiano. Nupay kasta, pinulotan ni Jehova ti sumagmamano a pudno a Kristiano kadagita a tawtawen. Kaslada kadagiti trigo nga imbaga ni Jesus a dimmakkel a kagiddan dagiti ruot. (Mat. 13:24-30) Bayat ti maudi nga al-aldaw, itultuloy ni Jehova ti mangpili kadagiti tattao nga agbalin a paset ti 144,000. * Isu a no pilien ni Jehova ti dadduma kadagitoy sakbay la unay ti panungpalan, saantay a rumbeng a kuestionaran ti siribna. (Basaen ti Roma 9:11, 16.) * Masapul nga agannadtayo tapno saantayo nga agbalin a kas kadagiti trabahador nga inladawan ni Jesus iti maysa nga ilustrasionna. Nagreklamoda iti panangtrato ti amoda kadagidiay  nagtrabaho iti maudi nga oras.—Mat. 20:8-15.

15. Amin kadi a napulotan ket paset ti “matalek ken masirib nga adipen” a nadakamat iti Mateo 24:45-47? Ilawlawag.

¹⁵ Saan nga amin nga addaan namnama nga agbiag idiay langit ket paset ti “matalek ken masirib nga adipen.” (Basaen ti Mateo 24:45-47.) Kas idi umuna a siglo, sumagmamano a kakabsat a lallaki ti us-usaren ita ni Jehova ken ni Jesus a mangpakan, wenno mangisuro, iti adu. Sumagmamano laeng a napulotan a Kristiano idi umuna a siglo ti nausar a mangisurat iti Kristiano a Griego a Kasuratan. Ita, sumagmamano laeng a napulotan a Kristiano ti addaan iti responsabilidad a mangipaay iti ili ti Dios iti “taraonda iti umiso a tiempo.”

16. Ania ti nasursurotayo iti daytoy nga artikulo?

¹⁶ Ania ti nasursurotayo iti daytoy nga artikulo? Inkeddeng ni Jehova nga ikkan iti biag nga agnanayon ditoy daga ti kaaduan nga adipenna ken biag idiay langit ti sumagmamano a makipagturay ken Jesus. Gunggonaan ni Jehova ti amin nga agserserbi kenkuana—ti “Judio” ken ti “10 a tattao”—ket masapul a pagtulnoganda dagiti lintegna ken agtalinaedda a matalek. Masapul nga agtalinaedda a napakumbaba. Masapul nga agkakadua ken agkaykaysada nga agserbi kenkuana. Ken masapul nga ikagumaanda a pagtalinaeden ti talna iti kongregasion. Bayat nga umas-asideg ti panungpalan, itultuloytayo koma amin ti agserbi ken Jehova ken sumurot ken Kristo kas “maymaysa nga arban.”—Juan 10:16.