1. Anhte a aten hta byin wa na lam hte seng nna Yehowa hpa tsun da ai kun?

ANHTE a aten hte seng nna, Yehowa ndai hku tau hkrau tsun da ai: “Ga amyu baw kaga ga tsun ai marai shi gaw, Yuda masha wa a nba lawai matu jum let, Karai Kasang nanhte hte rau rai nga ai, anhte na yu sa ga ai majaw, anhte nanhte hte rau sa na ga ai, nga nna tsun na ma ra ai.” (Zeh 8:23) Ndai kaw “Yuda” ngu tsun da ai gaw, chyoi pra ai wenyi hte Karai Kasang namman jaw ya ai ni hpe tsun ai re. Shanhte hpe “Karai Kasang a Israela amyu” ngu nna mung tsun ai. (Gal 6:16) “Marai shi” gaw, ginding aga hta htani htana asak hkrung na matu myit mada ai ni hpe tsun ai re. Shanhte gaw namman chya hkam ai uhpung hpe Yehowa shaman chyeju jaw ai lam chye nna, shanhte hte arau nawku daw jau lu ai hpe arawng la ai.

2. “Marai shi” gaw namman chya hkam ai ni hte gara hku “rau sa” na kun?

² Dai ni aten na ginding aga kaw nga ai namman chya hkam ai Hkristan langai hpra a amying * hpe chye na matu n mai byin tim, ginding aga myit mada lam nga ai ni gaw, shanhte hte “rau sa” mai ai. Gara hku nna kun? “Marai shi gaw, Yuda masha wa a nba lawai matu jum let, Karai Kasang nanhte hte rau rai nga ai, anhte na yu sa ga ai majaw, anhte nanhte hte rau sa na ga ai, nga nna tsun na ma ra ai” ngu Chyum Laika hta tsun da ai. Chyum daw a shawng na ga yan hta Yuda masha wa nga nna tsun da ai. Raitim, hpang na ga yan hta gaw “nanhte” ngu nna tsun da ai majaw, marai langai hta n-ga lawm na hpe chye lu ai. Yuda masha wa ngu nna tsun da ai lachyum gaw, marai langai hpe sha tsun ai n re. Namman chya hkam ai uhpung ting hpe tsun mayu ai re. Namman n jaw hkrum ai masha ni gaw, namman chya hkam ai ni hte arau Yehowa hpe nawku daw jau nga  ai. Raitim, namman chya hkam ai ni hpe ningbaw hku nna n mu mada ai. Shanhte a Ningbaw gaw Yesu sha re ai hpe chye na ai.​—Mat 23:10, JCLB.

3. Gara ga san ni a mahtai hpe chye lu na kun?

³ Dai ni aten hta Karai a masha ni a lapran matut nna namman jaw hkrum ai Hkristan ni naw nga ai majaw, nkau mi gaw ndai hku myit chye ai: (1) Namman chya hkam ai ni gaw shanhte hkum shanhte gara hku mu mada ging ai kun? (2) Myit Dum Poi masat dingsat sha ai ni hpe gara hku kanawn mazum ging ai kun? (3) Masat dingsat hpe sha ai ni law wa yang myit tsang ging ai kun? Dai ga san ni a mahtai hpe chye lu na re.

4. 1 Korinhtu 11:27-29 hta lawm ai gara sadi jaw ga hpe namman chya hkam ai ni ahkyak shatai myit ging ai kun? Hpa majaw kun?

⁴ Namman chya hkam ai ni gaw 1 Korinhtu 11:27-29 (hti u) hta lawm ai sadi jaw ga hpe ahkyak shatai nna myit ging ai. Namman chya hkam ai marai langai gaw, Myit Dum Poi hta gara lam hku nna “n ging n dan” ai baw byin chye ai kun? Yehowa a dinghpring ai tsang madang ni hpe n hkan sa ai sha, masat dingsat hpe sha na nga yang, dai hku byin chye ai. (Heb 6:4-6; 10:26-29) Namman chya hkam ai ni gaw, “Hkristu Yesu hta e Karai Kasang a grau htum ai shaga la ai lam ngu ai kumhpa”  lu mayu yang, matut nna sadi dung ra na hpe shanhte chye ai.​—Hpl 3:13-16.

5. Namman chya hkam ai ni gaw shanhte hkum shanhte gara hku mu mada ging ai kun?

⁵ Yehowa a chyoi pra ai wenyi gaw, shi a mayam ni hpe n gumrawng ai sha, shagrit shanem na matu karum ya ai. (Ehp 4:1-3; Kol 3:10, 12) Dai majaw, namman chya hkam ai ni gaw, kaga ni hta grau ai ngu n hkamsha ai. Yehowa gaw shanhte hpe kaga mayam ni hta grau nna chyoi pra ai wenyi n jaw ai hpe chye ai. Kaga ni hta grau nna Chyum Laika tengman lam hpe chye ai ngu n hkamsha ai. Kaga ni hpe mung namman chya hkam ai wa re ngu tinang hkrai sawn la nna, Myit Dum Poi masat dingsat sha na matu galoi mung n tsun ai. Sumsing lamu de saw shaga ai wa gaw, Yehowa sha re ai hpe shagrit shanem let hkap la ai.

6. 1 Korinhtu 4:7, 8 hku nga yang namman chya hkam ai Hkristan ni gaw gara lailen hpe madun ra ai kun?

⁶ Namman chya hkam ai ni gaw sumsing lamu de saw shaga hkrum ai hpe arawng la tim, kaga ni shanhte hpe laklai ai hku kanawn mazum na hpe gaw n ra ai. (Hpl 2:2, 3) Shanhte hpe Yehowa namman jaw ya ai shaloi, masha yawng chye hkra n galaw wa ai hpe mung shanhte chye ai. Dai majaw, shanhte namman chya hkam ai ni re ai hpe kaga ni kalang ta n kam ai shaloi, n mau ai. Karai Kasang kaw nna laksan lit lu da ai ngu tsun ai marai langai hpe alawan n kam na matu, Chyum Laika hta tsun da ai hpe shanhte chye ai. (Shr 2:2) Kaga ni myiman jaw na hpe n myit mada ai majaw, tinang hkum tinang namman chya hkam ai wa re ngu tsun nna, shachyen na n re. Dai lam hte seng nna mung shakawng na n re.​—1 Korinhtu 4:7, 8 hpe hti u.

7. Namman chya hkam ai ni gaw hpa ni hpe koi ra ai kun? Hpa majaw kun?

⁷ Namman chya hkam ai ni gaw laksan uhpung langai a hpung shang masha ni zawn, shada da sha kanawn ging ai ngu n hkamsha ai. Kaga namman chya hkam ai ni hpe tam nna, shanhte a myit mada lam hpe shada da tsun jahta na matu, laksan hpawng nna Chyum Laika hkaja na matu mung n galaw ma ai. (Gal 1:15-17) Namman chya hkam ai ni gaw dai lam ni hpe galaw na nga yang, nawku hpung gaw kahkyin gumdin na n re. Dai hku galaw yang, Karai a masha ni hpe simsa nna, kahkyin gumdin shangun ai chyoi pra ai wenyi hpe ninghkap ai hte bung na re.​—Rom 16:17, 18.

8. Myit Dum Poi masat dingsat sha ai ni hpe kanawn mazum ai lam hte seng nna hpa majaw nang sadi ra ai kun? (Lawu matsing hpe mung yu u.)

⁸ Namman chya hkam ai hpunau nauna ni hpe nang gara hku kanawn mazum ging ai  kun? Marai langai hpe ladu lai hkra shagrau ai gaw shut ai. Hkristu a kanau namman chya hkam ai wa raitim pyi, shi hpe dai hku n shagrau ging ai. (Mat 23:8-12) Chyum Laika hta myitsu salang ni a “makam masham hpe len ningli la” na matu tsun da tim, shinggyim masha hpe ningbaw shatai na matu tsun ai n re. (Heb 13:7, JCLB) Nkau mi gaw, hkungga ai lam “htam lahkawng hkam la ging ai” ni re nga nna Chyum Laika hta tsun da ai gaw teng ai. Raitim, dai hku hkungga ai gaw, “amu hpe atsawm galaw” nna, “sharin achyin ai lam hpe shakut shaja gun hpai ai” majaw re. Namman chya hkam ai majaw n re. (1 Tm 5:17, JCLB) Namman chya hkam ai ni hpe ladu lai shagrau nna myit maju jung ai gaw, shanhte hpe nga yak shangun ai. * Shing nrai, grau sawng ai gaw shanhte gumrawng wa hkra shadut ya ai hte bung ai. (Rom 12:3) Hkristu a hpunau ni hpe dai zawn shut ai lam galaw hkrup hkra anhte galaw mayu na n re.​—Luk 17:2.

9. Namman chya hkam ai Hkristan ni hpe hkungga ai lam gara hku madun mai ai kun?

⁹ Yehowa namman jaw ya ai ni hpe hkungga ai lam gara hku madun mai ai kun? Namman chya hkam ai wa gara hku byin wa ai lam shanhte hpe n san ging ai. Dai gaw shanhte hte sha seng nna, anhte hte n seng ai. (1 Tm 5:13; 2 Ht 3:11) Shanhte a ningrum ningtau ni, kanu kawa ni, nta masha ni mung namman chya hkam ai ni rai na re ngu n sawn la ging ai. Sumsing lamu myit mada lam gaw, amyu rusai kaw nna sali wunli lu la ai lam n re. Karai Kasang kaw nna lu la ai re. (1 Ht 2:11) Shanhte hpe hkra machyi shangun ai ga san ni hpe mung koi ging ai. Ga shadawn, namman chya hkam ai hpunau a madu jan hpe, madu wa n nga ai sha, ginding aga hta htani htana asak hkrung na myit mada lam hte seng nna, gara hku hkamsha ai kun? ngu nna n san ging ai. Mungkan nnan hta Yehowa gaw, “hkrung mahkrung ni” hpe myit dik hkra galaw ya na hpe tsep kawp kam mai ai.​—Shk 145:16.

10. Masha a atsam ningja ni hpe ladu lai ra sharawng ai hpe koi yang anhte hkum anhte gara hku makawp maga lu ai kun?

¹⁰ Namman chya hkam ai ni hpe, kaga ni hta grau ahkyak ai hku n kanawn ai gaw anhte hkum anhte makawp maga ai mung re. Gara hku nna kun? Namman chya hkam ai nkau mi gaw, matut nna sadi n dung ai ngu Chyum Laika hta tsun da ai. (Mat 25:10-12; 2 Pe 2:20, 21) Anhte gaw, masha a atsam ningja ni hpe ladu lai ra sharawng ai hpe koi yang, namman chya hkam ai ni, mying gumhkawng ai ni, Yehowa hpe aten na na nawku wa ai ni raitim pyi, shanhte hpang de anhte hkan nang na n re. (Yud 16) Lama na, shanhte sadi n dung yang (sh) nawku hpung kaw nna pru mat wa yang, anhte gaw Yehowa hpe kamsham ai myit mat mat ai (sh) shi hpe n nawku mat ai baw byin na n re.

11. Myit Dum Poi masat dingsat sha ai ni hte seng nna hpa byin nga ai kun?

¹¹ Lai wa sai shaning law law hta, Myit Dum Poi masat dingsat sha ai ni yawm wa ai. Raitim, kade n na shi ai shaning ni hta gaw, shaning shagu bai law wa ai. Dai hte seng nna myit tsang ging ai kun? N tsang ging ai. Hpa majaw re ai hpe hkaja yu ga.

12. Myit Dum Poi masat dingsat sha ai ni a hti hkum hte seng nna anhte hpa majaw myit n tsang ging ai kun?

¹² “Madu [Yehowa] gaw shi hte seng ai ni hpe chye ginhka ai.” (2 Tm 2:19) Namman chya hkam ai ni gaw kadai ni re ai hpe Myit Dum Poi masat dingsat sha ai ni hpe hti ai  hpunau ni gaw, Yehowa zawn tup hkrak n chye ai. Dai hti hkum hta, tinang hkum tinang namman chya hkam ai wa re ngu shadu tim, gaja wa n re ai ni mung lawm ai. Ga shadawn, masat dingsat sha ai nkau gaw, hpang de n sha mat sai. Nkau gaw myit hkam kaja lam n nga ai majaw, sumsing lamu hta Hkristu hte arau uphkang lu na ngu kam taw ai rai na re. Ginding aga hta namman chya hkam ai ni kade daram naw nga ai hpe, anhte tup hkrak n chye ai.

13. Ru tsang kaba hpang ai shaloi mungkan ga hta namman chya hkam ai ni kade daram ngam na ngu Chyum Laika hta tsun da ai kun?

¹³ Namman chya hkam ai ni hpe sumsing lamu de shaga la na matu Yesu du sa wa ai shaloi, shanhte gaw mungkan ga a shara shagu hta nga nga na re. (Mat 24:31) Hpang jahtum na nhtoi ni hta, mungkan ga kaw namman chya hkam ai ni loi mi sha ngam na ngu Chyum Laika hta tsun da ai. (Shr 12:17) Raitim, ru tsang kaba hpang ai shaloi kade daram ngam na ngu nna gaw n tsun da ai.

14. Roma 9:11, 16 hta tsun da ai hte maren namman chya hkam ai ni hpe lata ai hte seng nna anhte hpa hpe chye da ra ai kun?

¹⁴ Namman chya hkam ai ni hpe gara aten hta lata na hpe Yehowa sha dawdan ai. (Rom 8:28-30) Yesu hkrung rawt ai hpang she, namman chya hkam ai ni hpe Yehowa lata hpang wa ai. Tsa ban langai na jet ai Hkristan yawng gaw, namman chya hkam ai ni rai na re. Dai hpang na tsa ban shaning ni hta, namman chya hkam ai Hkristan ni re ngu tsun ai masha law malawng gaw, Hkristu hpang teng sha hkan ai ni n re. Dai tsa ban shaning ni laman, jet ai Hkristan kachyi mi hpe sha, Yehowa namman jaw ya ai. Shanhte gaw mam hte bung nna, tsing ni hte arau tu kaba wa na ngu Yesu tsun da ai. (Mat 13:24-30) Hpang  jahtum na nhtoi ni laman, Yehowa gaw 144,000 hta lawm ai masha ni hpe matut nna lata nga ai. * Jahtum du na mahka hta, masha nkau hpe Karai Kasang lata na matu dawdan ai nga yang, shi a nyan hpaji hpe ntsen ai myit n nga ging ai. (Roma 9:11, 16 hpe hti u.) * Yesu a ga shadawn langai hta lawm ai, amu galaw ai ni zawn, anhte n byin na matu sadi ra ai. Shanhte gaw hpang jahtum ahkying hta bungli shang ai ni a ntsa bungli madu galaw wa ai hte seng nna, mara shagun ma ai.​—Mat 20:8-15.

15. Mahte 24:45-47 kaw nna “sadi ai hte myit su ai mayam” hta namman chyam hkam ai ni yawng lawm ai kun? Sanglang dan u.

¹⁵ Sumsing lamu myit mada lam nga ai ni yawng gaw “sadi ai hte myit su ai mayam” hta lawm ai n re. (Mahte 24:45-47 hpe hti u.) Tsa ban langai na zawn sha, dai ni aten hta mung, malu masha jaw sha na matu, sharin achyin ya na matu, kaga lam ni galaw na matu, hpunau nkau mi hpe Yehowa hte Yesu akyu jashawn nga ai. Tsa ban langai na namman chya hkam ai Hkristan nkau mi sha, Ga Shaka Ningnan ka na matu, akyu jashawn hkrum ai. Dai ni aten hta mung, Karai a masha ni hpe ‘aten du jang lusha karan jaw’ na matu, namman chya hkam ai Hkristan nkau mi hpe sha lit jaw da ai.

16. Ndai sumhpa kaw nna hpa sharin la lu ai kun?

¹⁶ Ndai sumhpa gaw anhte hpe hpa sharin ya ai kun? Yehowa gaw shi a masha kaw nna, law malawng hpe ginding aga hta htani htana asak hkrung na matu hte nkau mi hpe Yesu hte arau sumsing lamu hta uphkang na matu dawdan da ai. Yehowa gaw shi a mayam ni re ai “Yuda masha” hte “marai shi” hpe kumhpa jaw ai. Shanhte hpe tara ni maren sha jaw nna matut sadi dung na matu mung hpyi shawn da ai. Yawng gaw shagrit shanem ra nna, kahkyin gumdin let shi hpe arau nawku daw jau ra ai. Nawku hpung matut simsa hkra galaw ra ai. Jahtum ni wa sai hte maren, Hkristu woi awn ai npu hta “sagu hpung langai” hku nna Yehowa hpe matut nawku daw jau mat wa ga.​—Yhn 10:16.