DISOLO YA KULONGUKA 5
Beto Ta Kwenda ti Beno
“Beto ke zola kukwenda ti beno, sambu beto me wa nde Nzambi kele ti beno.”—ZEK. 8:23.
NKUNGA 26 Beno Salaka Yo Sambu na Mono
MAMBU YINA DISOLO YAI KE TUBILA *
Mameme ya nkaka (“bantu kumi”) ke sepelaka kusadila Yehowa ti Bakristu yina bo me tulaka mafuta (“Muyuda mosi”) (Tala baparagrafe 1-2)
1. Inki Yehowa tubaka sambu na bilumbu na beto?
YEHOWA tubaka mambu yai sambu na bilumbu na beto: “Bantu kumi ya bandinga yonso ya makanda ta simba, ee, bo ta simba ngolo mvwela ya Muyuda mosi, mpi bo ta tuba nde: ‘Beto ke zola kukwenda ti beno, sambu beto me wa nde Nzambi kele ti beno.’” (Zek. 8:23) “Muyuda” yina bo me tubila na verse yai ke monisa Bakristu yina Nzambi me tulaka mafuta na mpeve santu. Biblia ke bingaka bo mpi “Izraele ya Nzambi.” (Bag. 6:16) “Bantu kumi” ke monisa bantu yina kele ti kivuvu ya kuzinga mvula na mvula na ntoto. Bo ke zabaka nde Yehowa me ponaka kimvuka ya fioti ya Bakristu yina bo me tulaka mafuta, yo yina bo ke bakisaka nde kusadila Nzambi ti bantu yai kele lukumu ya nene.
2. Inki mutindu “bantu kumi” ‘ke kwenda’ ti Bakristu yina bo me tulaka mafuta?
2 Ata beto ta kuka ve kuzaba zina ya konso mpangi yina bo me tulaka mafuta ya kele na ntoto bubu yai, * bantu yina kele ti kivuvu ya kuzinga na ntoto lenda ‘kwenda ti’ Bakristu yina bo me tulaka mafuta. Inki mutindu? Biblia ke tuba nde “bantu kumi” ta “simba ngolo mvwela ya Muyuda mosi, mpi bo ta tuba nde: ‘Beto ke zola kukwenda ti beno, sambu beto me wa nde Nzambi kele ti beno.’” Verse yai ke tubila Muyuda mosi. Kansi mambu yina yo ke tuba ke monisa nde Muyuda yango kele ve muntu mosi kansi kimvuka ya bantu, yina ke monisa kimvuka ya mvimba ya Bakristu yina bo me tulaka mafuta. Bansadi ya nkaka ya Yehowa ke sadilaka yandi kumosi ti Bakristu yina bo me tulaka mafuta. Ata mpidina, bo ke monaka ve nde Bakristu yina bo me tulaka mafuta kele bantwadisi na bo sambu bo ke zabaka nde Yezu mpamba muntu kele Ntwadisi.—Mat. 23:10.
3. Inki bangiufula beto ta tadila na disolo yai?
3 Sambu Bakristu ya nkaka yina bo me tulaka mafuta kele diaka awa na ntoto, bantu ya nkaka lenda kudiyula nde: (1) Inki mutindu Bakristu yina bo me tulaka mafuta fwete kuditadila? (2) Inki mutindu beto fwete tadila bantu yina ke diaka dimpa mpi ke nwaka vinu na Lusungiminu? (3) Keti beto fwete kudiyangisa kana ntalu ya bantu yina ke dia dimpa mpi ke nwa vinu ke kuma kaka mingi? Disolo yai ta pesa bamvutu na bangiufula yai.
INKI MUTINDU BAKRISTU YINA BO ME TULAKA MAFUTA FWETE KUDITADILA?
4. Inki lukebisu kele na 1 Bakorinto 11:27-29 yina Bakristu yina bo me tulaka mafuta fwete yindula mbote-mbote mpi sambu na nki?
4 Bakristu yina bo me tulaka mafuta fwete yindula mbote-mbote lukebisu yina kele na 1 Bakorinto 11:27-29. (Tanga.) Inki mutindu Mukristu yina bo me tulaka mafuta lenda dia dimpa mpi kunwa vinu na Lusungiminu na “mutindu yina me fwana ve”? Yandi ta sala mutindu yina kana yandi ke dia dimpa mpi ke nwa vinu kansi yandi ke zitisa ve bansiku ya Yehowa. (Baeb. 6:4-6; 10:26-29) Bakristu yina bo me tulaka mafuta ke zabaka nde bo fwete bikala ya kwikama tii na nsuka kana bo ke zola kubaka ‘lufutu ya kukwenda na zulu mutindu Nzambi me bingaka bo na nzila ya Kristu Yezu.’—Bafil. 3:13-16.
5. Inki mutindu Bakristu yina bo me tulaka mafuta ke kuditadilaka?
5 Mpeve santu ya Yehowa ke sadisaka bansadi na yandi na kuvanda bantu ya kudikulumusa. (Baef. 4:1-3; Bakol. 3:10, 12) Yo yina, Bakristu yina bo me tulaka mafuta ke yindulaka ve nde bo me luta Bakristu ya nkaka. Bo ke zabaka nde Yehowa ke pesaka bo ve mpeve santu mingi kuluta bansadi na yandi ya nkaka. Bo ke yindulaka mpi ve nde bo ke bakisaka bakieleka ya Biblia mbote kuluta Bakristu ya nkaka. Diaka, bo ke songaka ve ata fioti Mukristu ya nkaka nde Nzambi me tula yandi mpi mafuta mpi yandi fwete yantika kudia dimpa mpi kunwa vinu na Lusungiminu. Kansi bo ke ndimaka na kudikulumusa yonso nde Yehowa mpamba ke bingaka bantu na kukwenda na zulu.
6. Mutindu 1 Bakorinto 4:7, 8 ke monisa yo, nki mutindu Bakristu yina bo me tulaka mafuta fwete vanda?
6 Ata Bakristu yina bo me tulaka mafuta ke bakisaka nde kukwenda na zulu kele dibaku ya nene, bo ke yindulaka ve nde Bakristu ya nkaka fwete tadila bo bonso bantu ya mfunu mingi. (Bafil. 2:2, 3) Bo ke zabaka diaka nde ntangu Yehowa ke tulaka bo mafuta, yandi ke salaka ve nde bantu yonso kuzaba yo. Yo yina, Mukristu yina bo me tula mafuta fwete yituka ve kana muntu mosi ke ndima ve nde Nzambi me tulaka yandi mafuta. Mukristu yina bo me tulaka mafuta ke zabaka nde Biblia ke songaka beto na kundima ve nswalu muntu yina ke tuba nde Nzambi me pesa yandi mukumba mosi ya mfunu. (Kus. 2:2) Yandi ke sosaka ve kubenda dikebi ya bantu na kimuntu na yandi, yo yina yandi ke songaka ve bantu yina yandi me kutana ti bo na mbala ya ntete nde Nzambi me tulaka yandi mafuta. Yandi ke kudikumisaka mpi ve na meso ya bantu.—Tanga 1 Bakorinto 4:7, 8.
7. Inki mambu Bakristu yina bo me tulaka mafuta ke salaka ve mpi sambu na nki?
7 Bakristu yina bo me tulaka mafuta ke yindulaka ve nde bo fwete lutisa ntangu kaka ti Bakristu ya nkaka yina bo me tulaka mafuta mpi kusala kimvuka mosi kaka bo na bo. Bo ke sosaka mpi ve Bakristu ya nkaka yina bo me tulaka mafuta sambu na kusolula mambu ya me tala mutindu Nzambi ke tulaka bo mafuta to kuvukana sambu na kusala kimvuka mosi ya kulonguka Biblia. (Bag. 1:15-17) Dibundu ya Nzambi ta kabwana kana Bakristu yina bo me tulaka mafuta ke sala mambu yai. Bo ta sala mambu yina ke wakana ve ti mpeve santu yina ke sadisaka bansadi ya Nzambi na kuzinga na ngemba mpi na bumosi.—Bar. 16:17, 18.
INKI MUTINDU BETO FWETE TADILA BAKRISTU YINA BO ME TULAKA MAFUTA?
Beto fwete tadila ve Bakristu yina bo me tulaka mafuta bonso bantu ya lukumu (Tala paragrafe 8) *
8. Sambu na nki nge fwete keba na mutindu na nge ya kutadila bampangi yina ke diaka dimpa mpi ke nwaka vinu na Lusungiminu? (Tala mpi noti na nsi ya lutiti.)
8 Inki mutindu beto fwete tadila Bakristu yina bo me tulaka mafuta? Yo kele mbi na kukumisa muntu na kiteso ya kuluta ndilu ata yandi kele Mukristu yina bo me tulaka mafuta, mpangi ya Kristu. (Mat. 23:8-12) Na yina me tala bankuluntu, Biblia ke siamisa beto na ‘kulanda mbandu ya lukwikilu na bo’ kansi yo ke songaka beto ve na kukumisa ata muntu mosi ntwadisi na beto. (Baeb. 13:7) Ya kieleka, Biblia ke tuba nde bantu ya nkaka “me fwana na kubaka lukumu mingi kibeni.” Sambu bo “ke twadisaka na mutindu ya mbote” mpi “ke salaka ngolo na kutuba mpi na kulonga” kansi ve sambu bo kele Bakristu yina bo me tulaka mafuta. (1 Tim. 5:17) Kana beto ke pesa Bakristu yina bo me tulaka mafuta lukumu mingi, bo ta kudiwa mbote ve. * Diambu ya mbi kuluta kele nde beto ta pusa bo na kukuma lulendo. (Bar. 12:3) Ata muntu mosi ve na kati na beto ta sepela kusala diambu yina ta pusa Mukristu yina bo me tulaka mafuta na kusala kifu yai ya nene.—Luka 17:2.
9. Inki mutindu beto lenda zitisa Bakristu yina bo me tulaka mafuta?
9 Inki mutindu beto lenda zitisa Bakristu yina Yehowa me tulaka mafuta? Beto fwete yula bo ve mutindu Yehowa tulaka bo mafuta. Yo me tala beto ve sambu beto kele ve ti nswa ya kuzaba yo. (1 Bate. 4:11; 2 Bate. 3:11) Diaka, beto fwete mona ve nde bankwelani na bo, bibuti to bantu ya nkaka ya dibuta na bo kele mpi Bakristu yina bo me tulaka mafuta. Muntu ke bakaka ve kivuvu ya kukwenda na zulu na bantu ya dibuta na yandi, kansi Nzambi muntu ke pesaka yo. (1 Bate. 2:12) Beto fwete yula bo mpi ve bangiufula yina lenda pesa bo mpasi. Mu mbandu, beto fwete yula ve nkwelani ya Mukristu yina bo me tulaka mafuta mutindu yandi ke kudiwaka sambu na kivuvu ya kuzinga mvula na mvula na ntoto kukonda nkwelani na yandi. Beto ke zaba mbote nde na nsi-ntoto ya mpa Yehowa ta “lungisa nzala ya konso kima ya kele na luzingu.”—Nk. 145:16.
10. Inki mutindu beto ta kuditanina kana beto ‘ke leba ve bantu ya nkaka’?
10 Kana beto ke tadila ve Bakristu yina bo me tulaka mafuta bonso bantu ya mfunu mingi, beto ta kuditanina. Inki mutindu? Biblia ke monisa nde yo lenda salama nde Bakristu ya nkaka yina bo me tulaka mafuta kubikala ve ya kwikama tii na nsuka. (Mat. 25:10-12; 2 Pie. 2:20, 21) Kana beto ‘ke leba ve bankaka’ disongidila kupesa bo lukumu mingi, beto ta landa bo ve ata fioti, yo vanda Bakristu yina bo me tulaka mafuta to bampangi yina me zabanaka mingi to bayina ke sadilaka Yehowa bamvula mingi. (Yude 16) Sambu kana bo sala diambu ya mbi to bo yambula kusadila Yehowa, beto ta landa bo ve kansi beto ta tanina kaka kwikama na beto mpi ta yambula ve kusadila Yehowa sambu na bo.
KETI BETO FWETE KUDIYANGISA SAMBU NA NTALU YA BANTU YINA KE DIA DIMPA MPI KE NWA VINU?
11. Ntalu ya Bakristu yina ke diaka dimpa mpi ke nwaka vinu na Lusungiminu ke sala nki?
11 Na bamvula ya me luta, ntalu ya Bakristu yina ke diaka dimpa mpi ke nwaka vinu na Lusungiminu vandaka fioti. Kansi na bamvula yai, ntalu na bo ke landa kukuma mingi konso mvula. Keti yo fwete yangisa beto? Ve. Beto tadila sambu na nki yo fwete yangisa beto ve.
12. Sambu na nki beto fwete kudiyangisa ve sambu na ntalu ya Bakristu yina ke diaka dimpa mpi ke nwaka vinu na Lusungiminu?
12 “Yehowa me zaba bantu na yandi.” (2 Tim. 2:19) Bampangi yina ke tangaka ntalu ya bantu yina ke diaka dimpa mpi ke nwaka vinu na Lusungiminu ke zabaka ve bayina kele kibeni Bakristu yina bo me tulaka mafuta. Kansi Yehowa ke zabaka. Yo yina, bo ke tangaka mpi bampangi yina ke yindulaka nde bo kele Bakristu yina bo me tulaka mafuta, ata Nzambi me tulaka bo ve mafuta. Mu mbandu, bampangi ya nkaka yina vandaka kudia dimpa mpi kunwa vinu me yambulaka. Bankaka ke belaka ntu to ke niokwamaka na mabanza yo yina bo lenda yindula nde bo ta yala ti Kristu na zulu. Yo kele pwelele nde beto ke zaba ve kibeni ntalu ya Bakristu yina bo me tulaka mafuta yina me bikala awa na ntoto.
13. Keti Biblia ke pesa ntalu ya Bakristu yina bo me tulaka mafuta yina ta vanda awa na ntoto ntangu mpasi ya nene ta yantika?
13 Bakristu yina bo me tulaka mafuta ta vanda na bisika mingi na ntoto ntangu Yezu ta kwisa kubaka bo sambu na kunata bo na zulu. (Mat. 24:31) Biblia ke tuba nde na bilumbu ya nsuka, Bakristu fioti mpamba yina bo me tulaka mafuta ta vanda awa ntoto. (Kus. 12:17) Kansi yo ke tuba ve kana bo ta vanda ikwa ntangu mpasi ya nene ta yantika.
Inki beto fwete sala kana Mukristu mosi ke dia dimpa mpi ke nwa vinu na lusungiminu? (Tala paragrafe 14)
14. Mutindu Baroma 9:11, 16 ke monisa yo, nki beto fwete bakisa na mutindu Yehowa ke ponaka Bakristu yina yandi ke tulaka mafuta?
14 Yehowa ke ponaka ntangu ya kupona Bakristu yina yandi ta tula mafuta. (Bar. 8:28-30) Yehowa yantikaka kupona bo na nima ya lufutumuku ya Yezu. Yo ke monana nde na mvu-nkama ya ntete Yehowa tulaka Bakristu yonso ya kieleka mafuta. Na bamvula yina landaka, bantu mingi yina vandaka kudibinga Bakristu landaka ve Kristu. Ata mpidina, na bamvula yina, Yehowa tulaka Bakristu fioti ya kieleka mafuta. Bo vandaka bonso ble yina Yezu tubaka nde yo ta yela na kati ya matiti ya mbi. (Mat. 13:24-30) Na bilumbu yai ya nsuka, Yehowa ke landa kupona bantu yina ta vanda na kati ya bantu 144 000. * Kana Nzambi me baka lukanu ya kupona bankaka na kati na bo ntangu fioti na ntwala nde nsuka kukwisa, beto lenda mona ve lukanu yina mbi. (Tanga Baroma 9:11, 16.) * Beto fwete keba na kutuba ve mambu bonso bantu ya kisalu yina Yezu tubilaka na kingana mosi yina yandi pesaka. Bo bokutaka sambu na lufutu yina mfumu pesaka bantu yina yantikaka kisalu na ngunga ya nsuka.—Mat. 20:8-15.
15. Keti Bakristu yonso yina bo me tulaka mafuta kele “mpika ya kwikama mpi ya mayele” yina Matayo 24:45-47 ke tubila? Tendula.
15 Bakristu yonso ve yina kele ti kivuvu ya kuzinga na zulu kele “mpika ya kwikama mpi ya mayele.” (Tanga Matayo 24:45-47.) Bonso na mvu-nkaka ya ntete, bubu yai, Yehowa mpi Yezu ke sadilaka bampangi fioti sambu na kudisa, disongidila kulonga bantu mingi. Na mvu-nkama ya ntete, Nzambi sadilaka Bakristu fioti mpamba yina bo me tulaka mafuta sambu na kusonika Masonuku ya Kigreki ya Bukristu. Bubu yai mpi, Bakristu fioti mpamba yina bo me tulaka mafuta kele ti mukumba ya kupesa bansadi ya Nzambi “madia na bo na ntangu ya me fwana.”
16. Inki beto me longuka na disolo yai?
16 Disolo yai me longa beto nde Yehowa me bakaka lukanu ya kupesa bantu mingi luzingu ya mvula na mvula awa na ntoto mpi yandi ta pesa bantu fioti luzingu na zulu. Yehowa ke sakumunaka bansadi na yandi yonso; yo vanda “Muyuda” to “bantu kumi” mpi yandi ke lombaka bo yonso na kulemfukila bansiku ya mutindu mosi mpi na kubikala ya kwikama tii na nsuka. Bo yonso fwete vanda bantu ya kudikulumusa. Bo yonso fwete sadila Yehowa kumosi mpi na bumosi. Bo yonso fwete sala yonso sambu na kulanda kutanina ngemba ya dibundu. Sambu nsuka me kuma kibeni pene-pene, beto yonso fwete landa kusadila Yehowa mpi kulanda Kristu na “kimvuka mosi.”—Yoa. 10:16.
^ par. 5 Na mvula yai, beto ta sala Lusingiminu ya lufwa ya Kristu na Kizole, Aprili 7. Inki mutindu beto fwete tadila bantu yina ta dia dimpa mpi ta nwa vinu na nkokila yina? Keti beto fwete kudiyangisa kana ntalu na bo ke landa kaka kukuma mingi? Disolo yai ya me katuka na Nzozulu ya Nkengi ya Yanuari 2016 ta pesa bamvutu na bangiufula yai.
^ par. 2 Mambu yina Nkunga 87:5, 6 ke tubila ke monisa nde na bilumbu ke kwisa, Nzambi lenda zabisa beto bazina ya bantu yonso yina ta yala ti Yezu na zulu.—Bar. 8:19.
^ par. 8 Tala lupangu Zola “Ke Salaka Ve Mambu ya Nsoni” na Nzozulu ya Nkengi ya Yanuari 2016.
^ par. 14 Ata Bisalu 2:33 ke monisa nde mpeve santu tiamukaka na nzila ya Yezu, Yehowa muntu ke bingaka konso muntu.
^ par. 14 Sambu na kuzaba mambu mingi, tala “Bangiufula ya Batangi” na Nzozulu ya Nkengi ya Kifalansa ya Mayi 1, 2007.
NKUNGA 34 Tambula na Kwikama
^ par. 56 NTENDULA YA BIFWANISU: Yo ta vanda kibeni kukonda luzitu kana bampangi kuziunga mumonisi mosi ya Nto-Kimvuka ti nkento na yandi sambu na kukanga bafoto ti bo na lukutakanu ya nene!
