GĨCUNJĨ KĨA WĨRUTI GĨA 5
Nĩ Tũgũthiĩ Hamwe na Inyuĩ
“Tũrenda gũthiĩ hamwe na inyuĩ, tondũ nĩ tũiguĩte atĩ Ngai arĩ hamwe na inyuĩ.”—ZEK. 8:23.
RWĨMBO NA. 26 Nĩ Niĩ Mwateithagia
GĨCUNJĨ-INĨ GĨKĨ *
Andũ a ng’ondu ingĩ (“andũ ikũmi”) nĩ monaga arĩ gĩtĩo gũtungatĩra Jehova hamwe na arĩa aitĩrĩrie maguta (“Mũyahudi”) (Rora kĩbungo kĩa 1-2)
1. Nĩ ũndũ ũrĩkũ Jehova aarathĩte ũngĩkahaanĩka matukũ-inĩ maya maitũ?
JEHOVA akĩratha ũhoro wĩgiĩ mahinda maya maitũ ooigire ũũ: “Andũ ikũmi kuuma harĩ thiomi ciothe cia ndũrĩrĩ nĩ makaanyita, ti itherũ, nĩ makaanyita marũmĩtie kanjũ ya Mũyahudi moige atĩrĩ: ‘Tũrenda gũthiĩ hamwe na inyuĩ, tondũ nĩ tũiguĩte atĩ Ngai arĩ hamwe na inyuĩ.’” (Zek. 8:23) “Mũyahudi” ũcio, arũgamĩrĩire andũ arĩa Ngai aitĩrĩirie maguta kũgerera roho mũtheru. Acio maitĩrĩirio maguta ningĩ nĩ metagwo “Isiraeli a Ngai.” (Gal. 6:16) “Andũ ikũmi,” marũgamĩrĩire andũ arĩa marĩ na kĩĩrĩgĩrĩro gĩa gũgaatũũra tene na tene thĩinĩ wa thĩ. Nĩ moĩ atĩ Jehova nĩ arathimĩte arĩa aitĩrĩrie maguta na nĩ monaga arĩ gĩtĩo kĩnene gũthathaiya hamwe nao.
2. “Andũ ikũmi” ‘mathiaga hamwe’ na arĩa aitĩrĩrie maguta na njĩra ĩrĩkũ?
2 O na gũtuĩka andũ arĩa marĩ na kĩĩrĩgĩrĩro gĩa gũgaatũũra gũkũ thĩ matingĩhota kũmenya andũ othe arĩa maitĩrĩirio maguta mahinda-inĩ maya, * no mahote ‘gũthiĩ hamwe’ nao. Na njĩra ĩrĩkũ? Bibilia yugaga atĩ “andũ ikũmi” nĩ “makaanyita marũmĩtie kanjũ ya Mũyahudi moige atĩrĩ: ‘Tũrenda gũthiĩ hamwe na inyuĩ, tondũ nĩ tũiguĩte atĩ Ngai arĩ hamwe na inyuĩ.’” Mũhari ũcio ũgwetete Mũyahudi ũmwe. No kiugo “inyuĩ” kĩronania atĩ nĩ makĩria ma mũndũ ũmwe. Ũndũ ũcio ũronania atĩ Mũyahudi ũcio ti mũndũ ũmwe no arũgamĩrĩire aitĩrĩrie maguta marĩ othe. Andũ arĩa matarĩ aitĩrĩrie maguta, matungatagĩra Jehova hamwe na arĩa aitĩrĩrie maguta. O na kũrĩ ũguo, mationaga arĩa aitĩrĩrie maguta ta arĩ o atongoria ao, tondũ nĩ moĩ atĩ Jesu nĩwe Mũtongoria wao.—Mat. 23:10.
3. Gĩcunjĩ gĩkĩ gĩgũcokia ciũria irĩkũ?
3 Tondũ gatagatĩ-inĩ ka andũ a Ngai kũrĩ na amwe aitĩrĩrie maguta-rĩ, andũ amwe no meyũrie ũũ: (1) Arĩa aitĩrĩrie maguta magĩrĩirũo kwĩyona atĩa? (2) Twagĩrĩirũo gũkorũo na mawoni marĩkũ megiĩ andũ arĩa marĩaga mũgate na makanyua ndibei hĩndĩ ya Kĩririkano? (3) Hihi nĩ twagĩrĩirũo gũtangĩka tũngĩona mũigana wa arĩa marĩaga mũgate na makanyua ndibei ũkĩongerereka? Gĩcunjĩ gĩkĩ nĩ gĩcoketie ciũria icio.
ARĨA MAITĨRĨIRIO MAGUTA MAGĨRĨIRŨO KWĨYONA ATĨA?
4. Nĩ mũkaana ũrĩkũ arĩa aitĩrĩrie maguta magĩrĩirũo gwĩciria na njĩra ndikĩru ũrĩ thĩinĩ wa 1 Akorintho 11:27-29, na nĩkĩ?
4 Arĩa maitĩrĩirio maguta nĩ magĩrĩirũo gwĩciria na njĩra ndikĩru ũhoro wĩgiĩ mũkaana ũrĩa ũkoragwo thĩinĩ wa 1 Akorintho 11:27-29. (Thoma.) Hihi mũndũ ũitĩrĩirio maguta angĩrĩa mũgate na anyue ndibei “ũrĩa gũtagĩrĩire” na njĩra ĩrĩkũ hĩndĩ ya Kĩririkano? No eke ũguo, angĩkorũo ndaratũũra kũringana na ithimi cia Jehova cia ũthingu. (Ahib. 6:4-6; 10:26-29) Arĩa aitĩrĩrie maguta nĩ moĩ atĩ no mũhaka maikare marĩ ehokeku angĩkorũo nĩ mekwenda gũkaaheo “kĩheo kĩa rĩĩtana rĩa Ngai rĩa gũthiĩ igũrũ kũgerera Kristo Jesu.”—Afil. 3:13-16.
5. Arĩa aitĩrĩrie maguta magĩrĩirũo kwĩyona atĩa?
5 Roho mũtheru wa Jehova ũteithagia ndungata ciake kũgĩa na wĩnyihia no ti mwĩtĩo. (Ef. 4:1-3; Kol. 3:10, 12) Nĩ ũndũ ũcio, arĩa maitĩrĩirio maguta matiĩyonaga marĩ a bata gũkĩra arĩa angĩ. Nĩ moĩ atĩ Jehova ndamaheaga roho mũtheru ũkĩrĩte ũrĩa aheaga ndungata iria ingĩ ciake. Mationaga ta makoragwo na ũhoti wa gũtaũkĩrũo nĩ Bibilia gũkĩra andũ arĩa angĩ othe. Ningĩ matingĩra mũndũ ũngĩ atĩ nĩ aitĩrĩirio maguta na mamwĩre ambĩrĩrie kũrĩa mũgate na kũnyua ndibei hĩndĩ ya Kĩririkano. Nĩ ũndũ wa wĩnyihia, nĩ mamenyaga atĩ Jehova nĩwe ũheaga andũ mweke wa gũgaathiĩ igũrũ.
6. Kũringana na 1 Akorintho 4:7, 8, nĩ maũndũ marĩkũ Akristiano aitĩrĩrie maguta matekaga?
6 O na gũtuĩka arĩa aitĩrĩrie maguta, nĩ monaga maheetwo mweke wa mwanya wa gũgaathiĩ igũrũ, matiĩrĩgagĩrĩra gwĩkĩrũo maũndũ na njĩra ya mwanya nĩ andũ arĩa angĩ. (Afil. 2:2, 3) Ningĩ nĩ moĩ atĩ, hĩndĩ ĩrĩa Jehova aamaitĩrĩirie maguta, ndaamenyithirie andũ arĩa angĩ. Nĩ ũndũ ũcio, mũndũ ũitĩrĩirio maguta ndangĩmaka angĩona atĩ kũrĩ andũ mataretĩkia atĩ nĩ mũitĩrĩrie maguta. Nĩ moĩ atĩ Bibilia nĩ ĩtwĩraga tũtigetĩkagie na ihenya mũndũ ũroiga atĩ nĩ ehokeirũo wĩra wa mwanya nĩ Ngai. (Kũg. 2:2) Nĩguo ndakegoocithie, Mũkristiano ũitĩrĩirio maguta ndathiaga akĩraga andũ atĩ nĩ mũitĩrĩrie maguta. Ningĩ, ndagĩrĩirũo gwĩtũũgĩria igũrũ rĩa andũ arĩa angĩ nĩ ũndũ wa ũndũ ũcio.—Thoma 1 Akorintho 4:7, 8.
7. Arĩa aitĩrĩrie maguta methemaga gwĩka maũndũ marĩkũ, na nĩkĩ?
7 Akristiano aitĩrĩrie maguta mationaga ta magĩrĩirũo kũhũthĩra mahinda o na Akristiano arĩa angĩ aitĩrĩrie maguta atĩ nĩ ũndũ wa kwĩyona ta marĩ a kĩrathi kĩna kĩa mwanya. Maticaragia aitĩrĩrie maguta arĩa angĩ atĩ nĩguo marĩrĩrie ũhoro wĩgiĩ gũitĩrĩrio maguta, kana nĩguo mathondeke ikundi ciao cia kwĩruta Bibilia. (Gal. 1:15-17) Arĩa aitĩrĩrie maguta mangĩka ũguo, kĩũngano no kĩage ũrũmwe. Mangĩkorũo magĩka mũgarũ na roho mũtheru, ũrĩa ũteithagia andũ a Ngai gũkorũo na thayũ na ũrũmwe.—Rom. 16:17, 18.
ARĨA AITĨRĨRIE MAGUTA MAGĨRĨIRŨO GWĨKĨRŨO MAŨNDŨ NA NJĨRA ĨRĨKŨ?
Tũtiagĩrĩirũo gũtũũgĩria arĩa aitĩrĩrie maguta kana angĩ arĩa matongoragia maũndũ ta ũrĩa andũ arĩa marĩ igweta thĩinĩ wa thĩ matũũgagĩrio (Rora kĩbungo gĩa 8) *
8. Twagĩrĩirũo kwĩmenyerera nĩkĩ ũhoro-inĩ wĩgiĩ ũrĩa twĩkagĩra arĩa aitĩrĩrie maguta maũndũ? (Ningĩ rora kohoro ka magũrũ-inĩ.)
8 Twagĩrĩirũo gwĩkĩra aarĩ na ariũ a Ithe witũ arĩa aitĩrĩrie maguta maũndũ na njĩra ĩrĩkũ? Ti ũndũ mwagĩrĩru kũhe mũndũ gĩtĩo gĩkĩrĩte njano o na angĩkorũo nĩ mũrũ wa Ithe na Kristo. (Mat. 23:8-12) Bibilia ĩkĩaria ũhoro wĩgiĩ athuri a kĩũngano ĩtwĩkĩraga ngoro ‘kwĩgerekania na wĩtĩkio wao,’ no ndĩtwĩraga tũtue mũndũ o wothe mũtongoria witũ. (Ahib. 13:7) Ũhoro wa ma nĩ atĩ, Bibilia nĩ ĩtwĩraga atĩ amwe ao nĩ “magĩrĩire kũheo gĩtĩo maita merĩ.” No magĩrĩire kũheo gĩtĩo na njĩra ĩyo tondũ nĩ “marũgamagĩrĩra maũndũ na njĩra njega,” na nĩ “merutanagĩria ũhoro-inĩ wĩgiĩ kwaria na kũrutana” no ti tondũ nĩ aitĩrĩrie maguta. (1 Tim. 5:17) Kwoguo tũngĩtũũgĩria arĩa aitĩrĩrie maguta kana tũmahe gĩtĩo kĩrĩa gĩtamagĩrĩire, no tũtũme maigue mataiganĩire. * Na gũthũkia mũno, no tũtũme makũrie mwĩtĩo. (Rom. 12:3) Gũtirĩ o na ũmwe witũ ũngĩenda gwĩka ũndũ o wothe ũngĩtũma Akristiano arĩa aitĩrĩrie maguta meke ihĩtia ta rĩu iritũ!—Luk. 17:2.
9. Tũngĩonania na njĩra ĩrĩkũ atĩ nĩ tũtĩĩte Akristiano aitĩrĩrie maguta?
9 Tũngĩonania na njĩra ĩrĩkũ atĩ nĩ tũtĩĩte arĩa Jehova aitĩrĩirie maguta? Ti wega kũmoria ũrĩa maaitĩrĩirio maguta. Macio nĩ maũndũ mao na tũtirĩ na kĩhooto gĩa kũmamenya. (1 Thes. 4:11; 2 Thes. 3:11) Ningĩ tũtiagĩrĩirũo gwĩciria atĩ athuri ao kana atumia ao, aciari ao, kana o na andũ angĩ a famĩlĩ ciao nĩ aitĩrĩrie maguta. Rĩĩtana rĩa gũthiĩ igũrũ ti ũndũ mũndũ agayaga kuuma kũrĩ andũ a famĩlĩ. Mũndũ aheagwo rĩĩtana rĩu nĩ Ngai. (1 Thes. 2:12) Ningĩ nĩ twagĩrĩirũo gwĩthema kũria ciũria ingĩtuurithia andũ arĩa angĩ. Kwa ngerekano, ti wega kũria mũtumia wa mũrũ wa Ithe witũ ũitĩrĩirio maguta ũrĩa aiguaga igũrũ rĩgiĩ gũgaatũũra gũkũ thĩ tene na tene matarĩ na mũthuri wake. Tũrĩ na ma atĩ, thĩinĩ wa thĩ njerũ, Jehova nĩ ‘akaahingia merirĩria ma kĩndũ gĩothe kĩrĩ muoyo.’—Thab. 145:16.
10. Twĩgitagĩra na njĩra ĩrĩkũ rĩrĩa twethema gũtũũgĩria andũ?
10 O na ithuĩ nĩ twĩgitagĩra rĩrĩa twethema kuona arĩa aitĩrĩrie maguta marĩ a bata gũkĩra arĩa angĩ. Na njĩra ĩrĩkũ? Bibilia yonanagia atĩ andũ amwe aitĩrĩrie maguta no mage gũtũũra marĩ ehokeku. (Mat. 25:10-12; 2 Pet. 2:20, 21) No tũngĩaga kũmatũũgĩria, nĩ tũrĩĩthemaga kũrũmagĩrĩra andũ nginya arĩa aitĩrĩrie maguta, arĩa moĩkaine wega, kana andũ arĩa matungatĩire Jehova kwa ihinda iraihu. Ningĩ, o na mangĩaga gũtũũra marĩ ehokeku kana moime kĩũngano-inĩ, tũtingĩkua ngoro kana tũtige gũtungatĩra Jehova.
HIHI NĨ TWAGĨRĨIRŨO GŨTANGĨKA NĨ ŨNDŨ WA MŨIGANA WAO?
11. Gũkoretwo gũgĩthiĩ atĩa ũhoro-inĩ wĩgiĩ mũigana wa arĩa marĩaga mũgate na makanyua ndibei hĩndĩ ya Kĩririkano?
11 Kwa ihinda rĩa mĩaka mĩingĩ, mũigana wa arĩa maarĩaga mũgate na makanyua ndibei hĩndĩ ya Kĩririkano wathiaga o ũkĩnyihaga. No mĩaka-inĩ ya ica ikuhĩ, mũigana ũcio ũkoretwo ũkĩongerereka o mwaka. Hihi nĩ twagĩrĩirũo gũtangĩka nĩ ũndũ wa ũndũ ũcio? Aca. Rekei tuone nĩkĩ tũtiagĩrĩirũo gũtangĩka.
12. Nĩkĩ tũtiagĩrĩirũo gũtangĩka nĩ ũndũ wa mũigana wa andũ arĩa marĩaga mũgate na makanyua ndibei hĩndĩ ya Kĩririkano?
12 “Jehova nĩ oĩ arĩa marĩ ake.” (2 Tim. 2:19) Ngũrani na Jehova, ariũ a Ithe witũ arĩa mataraga mũigana wa arĩa marĩaga mũgate na makanyua ndibei hĩndĩ ya Kĩririkano matingĩmenya biũ nũũ mũitĩrĩrie maguta. Nĩ ũndũ ũcio, andũ amwe arĩa marĩaga mũgate na makanyua ndibei mekaga ũguo nĩ ũndũ wa gwĩciria atĩ nĩ aitĩrĩrie maguta. Kwa ngerekano, kũrĩ andũ amwe maarĩaga mũgate na makanyua ndibei magĩcoka magĩtiga. Angĩ nao makoragwo na mathĩna ma kĩĩmeciria makambĩrĩria gwĩciria atĩ nĩ magaathana hamwe na Kristo kũrĩa igũrũ. Ũrĩa kũrĩ nĩ atĩ, tũtiũĩ wega nĩ aitĩrĩrie maguta aigana matigarĩte gũkũ thĩ.
13. Hihi Bibilia nĩ yonanagia nĩ aitĩrĩrie maguta aigana magaakorũo matigarĩte gũkũ thĩ thĩna ũrĩa mũnene ũkĩambĩrĩria?
13 Nĩ gũgaakorũo na Akristiano aitĩrĩrie maguta kũndũ kũingĩ thĩinĩ wa thĩ rĩrĩa Jesu agooka kũmagĩra mathiĩ igũrũ. (Mat. 24:31) Bibilia nĩ yonanagia atĩ matukũ-inĩ ma kũrigĩrĩria nĩ gũgaakorũo gũtigarĩte Akristiano aitĩrĩrie maguta anini gũkũ thĩ. (Kũg. 12:17) No ndiugaga nĩ aigana magaakorũo matigarĩte gũkũ thĩ thĩna ũrĩa mũnene ũkĩambĩrĩria.
Twagĩrĩirũo gwĩka atĩa mũndũ angĩrĩa mũgate na anyue ndibei hĩndĩ ya Kĩririkano? (Rora kĩbungo gĩa 14)
14. O ta ũrĩa Aroma 9:11, 16 yonanĩtie-rĩ, nĩ atĩa tũbatiĩ kũririkana igũrũ rĩgiĩ gũthuurũo kwa aitĩrĩrie maguta?
14 Jehova nĩwe ũmenyaga hĩndĩ ĩrĩa egũthuura mũndũ atuĩke mũitĩrĩrie maguta. (Rom. 8:28-30) Jehova aambĩrĩirie gũthuura arĩa aitĩrĩrie maguta thutha wa Jesu kũriũka. No kũhoteke atĩ hĩndĩ ya karine ya mbere, Akristiano othe a ma maarĩ aitĩrĩrie maguta. Thutha ũcio, andũ aingĩ arĩa meeĩtaga Akristiano, maarĩ Akristiano a maheeni. O na kũrĩ ũguo, hĩndĩ ĩyo yothe, Jehova no aathiaga na mbere gũitĩrĩria maguta Akristiano a ma. Maatariĩ ta ngano ĩrĩa Jesu ooigire atĩ ĩngĩgaakũra gatagatĩ-inĩ ga itindiĩ. (Mat. 13:24-30) Matukũ-inĩ maya ma kũrigĩrĩria, Jehova no athiaga na mbere gũthuura aitĩrĩrie maguta nĩguo mahinge 144,000. * Nĩ ũndũ ũcio, Ngai angĩtua itua rĩa gũitĩrĩria mũndũ maguta kahinda kanini mbere ya mũico ũkinyĩte, tũtiagĩrĩirũo gwĩkĩrĩra nganja itua rĩu rĩake. (Thoma Aroma 9:11, 16.) * Nĩ twagĩrĩirũo kwĩmenyerera gwĩka ta aruti wĩra arĩa Jesu aaririe ũhoro wao thĩinĩ wa ngerekano ĩmwe yake. Maambĩrĩirie kũnugunĩra mwene mũgũnda nĩ ũndũ wa ũrĩa eekĩire aruti wĩra arĩa maarutire wĩra ithaa rĩa mũico.—Mat. 20:8-15.
15. Hihi arĩa othe aitĩrĩrie maguta makoragwo marĩ gĩcunjĩ kĩa “ngombo ĩrĩa njĩhokeku na njũgĩ” ĩrĩa ĩgwetetwo thĩinĩ wa Mathayo 24:45-47? Taarĩria.
15 Ti arĩa othe marĩ na kĩĩrĩgĩrĩro gĩa gũgaathiĩ igũrũ makoragwo marĩ gĩcunjĩ kĩa “ngombo ĩrĩa njĩhokeku na njũgĩ.” (Thoma Mathayo 24:45-47.) O ta hĩndĩ ya karine ya mbere, Jehova na Jesu matukũ-inĩ maya maheaga andũ aingĩ irio kana makamaruta makĩhũthĩra o ariũ a Ithe witũ anini. Hĩndĩ ya karine ya mbere, no Akristiano anini aitĩrĩrie maguta maahũthĩrirũo kwandĩka Maandĩko ma Gĩkristiano ma Kĩngiriki. O na mahinda-inĩ maya, no Akristiano anini aitĩrĩrie maguta makoragwo na ũigĩrĩrĩki wa kũhe andũ a Ngai “irio ihinda rĩrĩa rĩagĩrĩire.”
16. Weruta atĩa gĩcunjĩ-inĩ gĩkĩ?
16 Tweruta maũndũ marĩkũ gĩcunjĩ-inĩ gĩkĩ? Jehova nĩ atuĩte itua rĩa gũkaahe ndungata ciake iria nyingĩ kĩheo kĩa muoyo wa tene na tene gũkũ thĩ na kũhe ndungata ciake nini kĩheo gĩa gũgaathana kũrĩa igũrũ hamwe na Jesu. Jehova nĩ akaahe andũ arĩa othe mamũtungatagĩra kĩheo, arĩa marũgamĩrĩirũo nĩ “Mũyahudi” na nginya arĩa marũgamĩrĩirũo nĩ “andũ ikũmi” na erĩgagĩrĩra othe maathĩkĩre mawatho mamwe na maikare marĩ ehokeku. Ningĩ, endaga makorũo marĩ enyihia. Othe magĩrĩirũo kũmũtungatĩra marĩ hamwe na marĩ na ũrũmwe. Ningĩ ithuothe nĩ twagĩrĩirũo kwĩrutanĩria gũtũũria thayũ thĩinĩ wa kĩũngano. O ũrĩa mũico ũrakuhĩrĩria, rekei ithuothe tũthiĩ na mbere gũtungatĩra Jehova na kũrũmĩrĩra Kristo tũrĩ “rũũru rũmwe.”—Joh. 10:16.
^ kĩb. 5 Mwaka ũyũ, Kĩririkano gĩa Gĩkuũ gĩa Kristo gĩgeekwo Njumaine, Ĩpuro 7. Twagĩrĩirũo gũkorũo na mawoni marĩkũ megiĩ andũ arĩa makaarĩa mũgate na manyue ndibei mũthenya ũcio? Hihi nĩ twagĩrĩirũo gũtangĩka tũngĩona atĩ mũigana wa andũ arĩa mararĩa mũgate na makanyua ndibei ũrathiĩ wongererekete? Gĩcunjĩ gĩkĩ nĩ gĩcoketie ciũria icio, na kiumanĩte na kĩngĩ kĩarĩ thĩinĩ wa ngathĩti ya Mũrangĩri ya Janũarĩ 2016.
^ kĩb. 2 Kũringana na Thaburi 87:5, 6, no kũhoteke atĩ mahinda mokĩte Ngai nĩ akaaguũria marĩĩtwa ma arĩa othe magaathana na Jesu kũrĩa igũrũ.—Rom. 8:19.
^ kĩb. 8 Rora gathandũkũ karĩ na kĩongo, “Wendo ‘Ndũrĩ Rũtũrĩko’” thĩinĩ wa Mũrangĩri wa Janũarĩ 2016.
^ kĩb. 14 O na gũtuĩka Atũmwo 2:33 yonanagia atĩ roho mũtheru ũitanagĩrĩrio kũgerera harĩ Jesu, Jehova nĩwe ũheaga andũ mweke ũcio.
^ kĩb. 14 Nĩguo wone ũhoro makĩria, rora “Maswali Kutoka kwa Wasomaji” thĩinĩ wa Mnara wa Mlinzi, wa Mĩĩ 1, 2007.
RWĨMBO NA. 34 Gũtũũria Wĩkindĩru
^ kĩb. 56 GŨTAARĨRIA MBICA: Na githĩ ti ũndũ ũtarĩ wa gĩtĩo o na hanini aarĩ na ariũ a Ithe witũ mangĩũmbĩrĩra mũrũ wa Ithe witũ ũtũmĩtwo nĩ wabici marĩ na mũtumia wake makĩgeria kũhũũrũo mbica nao hĩndĩ ya kĩgomano!
