1. Jehova okwa popya shike shi na sha naasho tashi ningwa pefimbo letu?

JEHOVA okwa popya shi na sha nefimbo letu a ti: “Ovalumenhu omulongo vomomalaka aeshe oiwana otava ka kwata koshikutu shomulumenhu Omujuda nokukanyatela ko, ndele tava ti: ‘Ofye twa hala okweenda pamwe nanye, osheshi ofye twa uda, nokutya Kalunga e li pamwe nanye.’” (Sak. 8:23) “Omujuda” ota ulike kovavaekwa aveshe ovo va vaekwa kuKalunga nomhepo iyapuki. Ohava ifanwa yo “Israel yaKalunga.” (Gal. 6:16) “Ovalumenhu omulongo” otava ulike kwaavo ve na eteelelo loku ka kala nomwenyo fiyo alushe kombada yedu. Ove shii kutya Jehova okwa nangeka noupuna ongudu yovavaekwa nove wete shi li oufembanghenda okulongela Jehova pamwe navo.

2. “Ovalumenhu omulongo” ohava “ende pamwe” ngahelipi novavaekwa?

² Nonande itatu dulu okushiiva omadina aeshe oohandimwe ovo va vaekwa kunena, * ovo ve na eteelelo loku ka kala kombada yedu ova hala “okweenda pamwe” novavaekwa. Ngahelipi mbela? Ombiibeli oya ti kutya ‘ovalumenhu omulongo otava ka kwata koshikutu shomulumenhu Omujuda nokukanyatela ko, ndele tava ti: “Ofye twa hala okweenda pamwe nanye, osheshi ofye twa uda, nokutya Kalunga e li pamwe nanye.”’ Ovelishe oyo oya tumbula Omujuda umwe auke. Ashike oshitya, “nanye” otashi ulike kovanhu ve dulife puumwe. Osho osha hala kutya Omujuda ita ulike ashike komunhu  umwe, ndele ota ulike kongudu aishe yovavaekwa. Ovo inava vaekwa, ohava longele Jehova pamwe novavaekwa. Onghee hano, ihava tale ko ovavaekwa ve li ovawiliki, ndele Omuwiliki oJesus. — Mat. 23:10.

3. Omapulo elipi taa ka nyamukulwa moshitukulwa eshi?

³ Molwaashi ovavaekwa vamwe ove li natango mokati koshiwana shaKalunga kunena, otashi dulika vamwe tu lipule kutya: (1) Ovavaekwa ove na okulitala ko ngahelipi? (2) Otu na okuungaunga ngahelipi naavo hava li omungome nokunwa omaviinyu pEdimbuluko? (3) Mbela otwa pumbwa okukala twa limbililwa ngeenge omuvalu waavo hava li nokunwa otau hapupala? Oshitukulwa eshi osha nyamukula omapulo oo.

4. Elondwelo lilipi tali hangwa 1 Ovakorinto 11:27-29 ovavaekwa ve na okudiladila kulo, nomolwashike?

⁴ Ovavaekwa ova pumbwa okudiladila moule kombinga yelondwelo olo tali hangwa 1 Ovakorinto 11:27-29. (Lesha.) Ongahelipi tashi dulika omuvaekwa oo ta kufa ombinga pEdimbuluko a kale “ina wana”? Ote shi ningi mokukala ta li omungome nokunwa omaviinyu, ashike ina dulika komifikamhango daJehova douyuki. (Heb. 6:4-6; 10:26-29)  Ovavaekwa ove na okukaleka momadiladilo kutya ova pumbwa okukala ovadiinini opo va “ka mone ondjabi oyo Kalunga ta ka yandja kwaavo a ifanena meulu okupitila muKristus Jesus.” — Fil. 3:13-16.

5. Ovakriste ovavaekwa ove na okulitala ko ngahelipi?

⁵ Omhepo iyapuki yaJehova ohai kwafele ovapiya vaye va kale ovalininipiki, ponhele yokukala nounhwa. (Ef. 4:1-3; Kol. 3:10, 12) Onghee ovavaekwa ihave litale ko ve li xwepo ve dule vamwe. Ove shii kutya Jehova iha pe ovavaekwa omhepo iyapuki ihapu shi dulife ei ha pe ovapiya vakwao. Ihava diladila kutya ove shii Ombiibeli ve dule ovanhu vakwao. Ihava lombwele nande oumwe kutya ova vaekwa nonokutya nava hovele okukala hava kufa ombinga pEdimbuluko. Ponhele yaasho, ove shii kutya Jehova oye ha shivi ovanhu meulu.

6. Metwokumwe 1 Ovakorinto 4:7, 8, Ovakriste ovavaekwa ove na okulihumbata ngahelipi?

⁶ Nonande ovavaekwa ove shii kutya oshi li oufembanghenda woku ka kala meulu, inava teelela ovanhu vakwao va kale tava ungaunga navo monghedi ye likalekelwa. (Fil. 2:2, 3) Ove shii yo kutya eshi Jehova e va vaeka, ina lombwela nande oumwe kombinga yaasho. Natango ovo va vaekwa ihava kala va kumwa ngeenge ovanhu vamwe inave shi itavela. Ove shii kutya Ombiibeli oya ti inatu endelela okwiitavela omunhu oo ta ti kutya okwa pewa oshinakuwanifwa she likalekelwa kuKalunga. (Eh. 2:2) Opo vaha kale tava pewa elitulemo, Ovakriste ovavaekwa ihava lombwele ovanhu kutya vo ovavaekwa. Natango ihave litangele ovanhu vakwao kombinga yaasho. — Lesha 1 Ovakorinto 4:7, 8.

7. Ovo va vaekwa ohava henuka okuninga shike, nomolwashike?

⁷ Ovakriste ovavaekwa ihava kala ashike novavaekwa vakwao, va fa ngeno ve li mongudu yonhumba. Ihava kongo ovavaekwa vakwao opo va kundafane kombinga yeteelelo olo ve na ile va tote po ongudu yokukonakona Ombiibeli. (Gal. 1:15-17) Eongalo itali ka kala moukumwe ngeenge ovavaekwa ova kala tava ningi oinima oyo. Otava ka kondjifa omhepo iyapuki oyo hai kwafele ovapiya vaKalunga va kale nombili nova hangana. — Rom. 16:17, 18.

8. Omolwashike twa pumbwa okulungamena onghedi omo hatu ungaunga naavo hava kufa ombinga pEdimbuluko? (Tala eshangelo lopedu.)

⁸ Otu na okuungaunga ngahelipi novamwatate novamwameme ovo va vaekwa? Otashi ka kala sha puka ngeenge owa kala wa fimaneka  ovanhu sha pitilila, nokuli nonande omuvaekwa waKristus. (Mat. 23:8-12) Eshi Ombiibeli ya popya kombinga yovakulunhuongalo oye tu ladipika tu ‘hopaenene eitavelo lavo,’ ashike inai tu lombwela tu tale ko omunhu wonhumba e li omuwiliki wetu. (Heb. 13:7) Oshoshili kutya Ombiibeli oya ti ovanhu vamwe ova pumbwa “okufimanekwa filufilu.” Ova pumbwa okufimanekwa molwaashi ‘ohava kwatele komesho’ nohava “longo noudiinini mokupopya nomokuhonga,” ndele hamolwaashi ve li ovavaekwa. (1 Tim. 5:17) Ngeenge otwa kala hatu pe ovavaekwa efimano nelitulemo la pitilila, otashi ke va ningifa va kale va fya ohoni. * Shi nyikifa oluhodi, otashi dulika nokuli tu va ningife va kale ve na ounhwa. (Rom. 12:3) Inatu hala nande okuningifa umwe womovamwatate ovavaekwa vaKristus a ninge epuko la tya ngaho la kwata moiti. — Luk. 17:2.

9. Ongahelipi hatu dulu okuulika kutya otwa fimaneka Ovakriste ovavaekwa?

⁹ Ongahelipi hatu dulu okuulika kutya ohatu fimaneke ovo va vaekwa kuJehova? Ihatu va pula kutya ova vaekwa ngahelipi. Osho oshi li oshinima shopaumwene, nokatu na oufemba woku shi shiiva. (1 Tes. 4:11; 2 Tes. 3:11) Katu na okudiladila kutya ookaume kavo kopahombo, ovadali, ile ovapambele vavo navo ova vaekwa. Eteelelo loku ka kala meulu ihali fyuululwa. Ohali di kuKalunga. (1 Tes. 2:12) Otu na yo okuhenuka okupula omapulo oo haa nyemateke vamwe. Pashihopaenenwa, itatu ka pula omukulukadi womumwatate omuvaekwa kutya oha kala e udite ngahelipi eshi ta ka kala kombada yedu fiyo alushe ehe li nomushamane waye. Ohatu dulu okukala noushili kutya mounyuni mupe, Jehova ota ka ‘palula oinamwenyo aishe kohokwe yaye.’ — Eps. 145:16.

10. Ohatu ke liamena ngahelipi ngeenge otwa henuka ‘okutumbaleka vamwe’?

¹⁰ Ohatu ke liamena fye vene ngeenge otwa kala ihatu ungaunga novavaekwa monghedi ye likalekelwa. Ngahelipi mbela? Ombiibeli oye tu lombwela kutya ovavaekwa vamwe otashi dulika vaha kale ovadiinini. (Mat. 25:10-12; 2 Pet. 2:20, 21) Ashike ngeenge otwa henuka ‘okutumbaleka vamwe,’ itatu ke va hopaenena, kutya nee ovavaekwa ile ovo ve shiivike nawa, ile ovo va kala tava longele Jehova efimbo lile. (Jud. 16, eshangelo lopedu.) Nokuli nonande ova ka kala vehe fi ovadiinini ile va fiya po eongalo, itatu ka kanifa eitavelo letu muJehova ile tu efe po oku mu longela.

11. Oshike sha ningwa po shi na sha naavo hava kufa ombinga pEdimbuluko?

¹¹ Oule womido dihapu, omuvalu waavo hava kufa ombinga pEdimbuluko owa enda tau shuna pedu. Ashike eedula edi, omuvalu oo otau ende tau hapupala omudo keshe. Mbela otu na okukala hatu lipula nomuvalu oo? Ahowe. Natu ka taleni koinima ya fimana oyo tu na okukaleka momadiladilo.

12. Omolwashike inatu pumbwa okulipula nomuvalu waavo hava kufa ombinga pEdimbuluko?

¹² “Jehova ovo vaye oku va shii.” (2 Tim. 2:19) Ovamwatate ovo hava valula ovo va kufa ombinga pEdimbuluko kave shii naanaa kutya olyelye omuvaekwa shili. Omuvalu oo ohau kala wa kwatela mo ovo hava diladila kutya ovavaekwa, ndele hasho. Pashihopaenenwa, vamwe ovo va li hava kufa ombinga ihave shi ningi vali. Vamwe otashi dulika ve na oudu wopamadiladilo ile wopamaliudo oo hau va ningifa va diladile kutya otava ka pangela  pamwe naKristus meulu. Onghee hano, katu shii naanaa kutya oku na ovavaekwa vangapi kombada yedu.

13. Mbela Ombiibeli oya popya kutya kombada yedu otaku ka kala ovavaekwa vangapi eshi oudjuu munene tau ka hovela?

¹³ Moitukulwa ihapu kombada yedu otaku ka kala ovavaekwa eshi Jesus te ke va ila ko e va twale meulu. (Mat. 24:31) Ombiibeli oya ti kutya momafiku axuuninwa, otaku ka kala ovavaekwa vashona kombada yedu. (Eh. 12:17) Ashike inai popya kutya otaku ka kala ovavaekwa vangapi eshi oudjuu munene tau ka hovela.

14. Ngaashi sha popiwa mOvaroma 9:11, 16, oshike tu na okuuda ko shi na sha nokuhoolola ovo va vaekwa?

¹⁴ Jehova oye ha tokola kutya onaini ta ka vaeka umwe. (Rom. 8:28-30) Jehova okwa li a hovela okuhoolola ovo ta ka vaeka konima eshi Jesus a nyumuka. Osha fa shi li ngaha kutya Ovakriste vashili aveshe vomefelemudo lotete ova li va vaekwa. Omido da ka shikula ko, vahapu ovo va li have liti kutya Ovakriste kava li va shikula Kristus. Ashike nande ongaho, momukokomoko womido odo, Jehova okwa li a vaeka vamwe ovo va li Ovakriste vashili. Ova li va fa oilya oyo Jesus a popya kutya otai ka kula pamwe neu. (Mat. 13:24-30) Momafiku axuuninwa, Jehova ota twikile okuhoolola ovanhu ovo tava ka kala oshitukulwa sho 144 000. * Onghee Jehova ngeenge okwa tokola okuhoolola vamwe ofimbo exulilo inali uya, inatu pumbwa okukala twa limbililwa ounongo waye. (Lesha Ovaroma 9:11, 16.) * Natu kale twa lungama  tuha katuke ngaashi ovanailonga ovo Jesus a popya mefaneko laye limwe. Ova li tava tangunine omwene wavo omolwonghedi omo a ungaunga naavo va longa ovili yaxuuninwa. — Mat. 20:8-15.

15. Mbela ovavaekwa aveshe ove li oshitukulwa ‘shomupiya omudiinini nomunaendunge,’ ngaashi sha popiwa muMateus 24:45-47? Shi yelifa.

¹⁵ Haaveshe ovo ve na eteelelo loku ka kala meulu ve li oshitukulwa ‘shomupiya omudiinini nomunaendunge.’ (Lesha Mateus 24:45-47.) Ngaashi ashike mefelemudo lotete, Jehova naJesus kunena otava longifa okangudu kanini kovamwatate ka palule, ile ka honge vahapu. Mefelemudo lotete, okangudu kanini kOvakriste ovavaekwa oko ashike ka li ka longifwa ka shange Omishangwa dopaKriste dOshigreka. Kunena, okangudu kanini kOvakriste ovavaekwa oko ashike ke na oshinakuwanifwa shokuyandja “eendja pefimbo la wapala.”

16. Oshike we lihonga moshitukulwa eshi?

¹⁶ Oshitukulwa eshi oshe tu honga shike? Jehova okwa tokola okuyandja omwenyo waalushe kovapiya vaye vahapu ovo tava ka kala kombada yedu nosho yo omwenyo meulu kwaavo ve li okangudu kanini tava ka pangela pamwe naJesus. Jehova okwa nangeka noupuna ovapiya vaye aveshe, “Omujuda” nosho yo “ovalumenhu omulongo,” nokwa teelela va dulike keemhango da faafana nokukala ovadiinini. Aveshe nava kale ovalininipiki. Aveshe nave mu longele pamwe nokukala va hangana. Aveshe nava kendabale okukaleka po ombili meongalo. Eshi hatu ehene popepi nexulilo, natu twikile okulongela Jehova nokushikula Jesus tu li “oshiunda shimwe.” — Joh. 10:16.