5-زەرتتەۋ ماقالاسى
«ٴبىز سەنىمەن بارامىز»
«ٴبىز سەنىمەن بارامىز، ويتكەنى قۇداي سەنىڭ حالقىڭمەن بىرگە ەكەنىن ەستىدىك» (زاك. 8:23).
26-ٵن ولارعا جاساعاندارىڭ — ماعان جاساعاندارىڭ
اڭداتپا *
باسقا قويلار («ون ادام») مايلانعاندارمەن («ياھۋدي») بىرگە ەحوباعا عيبادات ەتۋ مارتەبەسىنە يە (1، 2-ابزاستى قاراڭىز)
1. ەحوبا ٴبىزدىڭ كۇندەرىمىزگە قاتىستى قانداي پايعامبارلىق ايتقان؟
ەحوبا ٴبىزدىڭ كۇندەرىمىزگە قاتىستى مىناداي پايعامبارلىق ايتقان: «سول كۇندەرى ٵرتۇرلى تىلدە سويلەيتىن بارلىق حالىقتاردان شىققان ون ادام ياھۋديدىڭ ەتەگىنە جارماسىپ، وعان: «ٴبىز سەنىمەن بارامىز، ويتكەنى قۇداي سەنىڭ حالقىڭمەن بىرگە ەكەنىن ەستىدىك»،— دەيتىن بولادى» (زاك. 8:23). بۇل جەردەگى «ياھۋدي» كيەلى رۋحپەن مايلانعانداردى بىلدىرەدى. ولار «قۇدايدىڭ ٴيسرايلى» دەپ تە اتالادى (عال. 6:16). ال «ون ادام» جەردە ماڭگى ٶمىر سۇرۋگە ۇمىتتەنەتىندەردى بىلدىرەدى. ولار ەحوبانىڭ مايلانعانداردان تۇراتىن توپتى جارىلقاپ جاتقانىن بىلەدى، ٵرى ولارمەن بىرگە ەحوباعا عيبادات ەتۋدى مارتەبە سانايدى.
2. «ون ادام» قالايشا مايلانعاندارمەن بىرگە «بارادى»؟
2 جەردەگى مايلانعانداردىڭ ٵربىرىنىڭ ەسىمدەرىن ٴبىلۋ مۇمكىن بولماسا دا *، جەردە ٶمىر سۇرۋگە ۇمىتتەنەتىندەر مايلانعاندارمەن بىرگە «بارا» الادى. قالايشا؟ كيەلى كىتاپتا «ون ادامنىڭ» «ياھۋديدىڭ ەتەگىنە جارماسىپ، وعان: «ٴبىز سەنىمەن بارامىز، ويتكەنى قۇداي سەنىڭ حالقىڭمەن بىرگە ەكەنىن ەستىدىك»،— دەيتىنى جازىلعان. تارماقتا ٴبىر ياھۋدي جايلى ايتىلىپ تۇر. ٴبىراق «سەنىمەن» جانە «سەنىڭ حالقىڭمەن» دەگەن سوزدەر ٴبىر ادامعا عانا ەمەس، ودان كوپ ادامعا نۇسقايدى. دەمەك ياھۋدي دەگەن ٴبىر عانا ادامدى ەمەس، مايلانعانداردىڭ توبىن بىلدىرەدى. كيەلى رۋحپەن مايلانباعاندار مايلانعاندارمەن بىرگە ەحوباعا قىزمەت ەتەدى. الايدا ولار مايلانعاندارعا كوسەمدەرى رەتىندە قارامايدى، قايتا كوسەمدەرى ٴماسىح ەكەنىن تۇسىنەدى (مات. 23:10).
3. بۇل ماقالادا قانداي سۇراقتاردى قاراستىرامىز؟
3 قۇداي حالقىنىڭ اراسىندا مايلانعان ماسىحشىلەر ٵلى دە بار بولعاندىقتان، كەيبىرەۋلەر بىلاي ويلاۋى مۇمكىن: 1) مايلانعاندار وزدەرى جايلى قانداي ويدا بولۋ كەرەك؟ 2) ەسكە الۋ كەشىندە رامىزدەردەن ٴدام تاتاتىندارعا قالاي قاراۋىمىز كەرەك؟ 3) ٴدام تاتاتىنداردىڭ سانى كوبەيىپ جاتسا، ۋايىمداۋىمىز كەرەك پە؟ بۇل ماقالادان وسى سۇراقتاردىڭ جاۋابىن بىلەمىز.
مايلانعاندار وزدەرى جايلى قانداي ويدا بولۋ كەرەك؟
4. قورىنتتىقتارعا 1-حات 11:27—29 تارماقتاردا قانداي ەسكەرتۋ جازىلعان جانە نەلىكتەن مايلانعاندار بۇعان دەن قويۋلارى قاجەت؟
4 مايلانعاندار قورىنتتىقتارعا 1-حات 11:27—29 (وقىڭىز) تارماقتارداعى ەسكەرتۋگە مۇقيات دەن قويۋلارى قاجەت. قالاي مايلانعان ٴماسىحشى ەسكە الۋ كەشىندە «لايىقسىز تۇردە» ٴدام تاتۋى مۇمكىن؟ ەگەر ەحوبانىڭ ٵدىل نورمالارىنا ساي ٶمىر سۇرمەي، رامىزدەردەن ٴدام تاتاتىن بولسا (ەۆر. 6:4—6؛ 10:26—29). مايلانعاندار «قۇدايدىڭ سيىنا، ياعني ٴماسىح يسا ارقىلى شاقىرعان كوكتەگى ومىرگە» يە بولعىسى كەلسە، ادال بولىپ قالۋلارى كەرەكتىگىن تۇسىنەدى (ٴفىلىپ. 3:13—16).
5. مايلانعان ماسىحشىلەر وزدەرى جايلى قانداي ويدا بولۋ كەرەك؟
5 ەحوبانىڭ كيەلى رۋحى قىزمەتشىلەرىنە وركوكىرەك ەمەس، كىشىپەيىل بولۋعا كومەكتەسەدى (ەفەس. 4:1—3؛ قول. 3:10، 12). سوندىقتان مايلانعاندار وزدەرىن وزگەلەردەن ارتىق سانامايدى. ەحوبا ولارعا مىندەتتى تۇردە باسقالارعا قاراعاندا كوبىرەك كيەلى رۋح بەرمەيتىنىن تۇسىنەدى. ولار وزگەلەرگە قاراعاندا كيەلى كىتاپ شىندىقتارىن تەرەڭىرەك تۇسىنەمىز دەپ ويلامايدى. سونداي-اق ولار باسقا بىرەۋگە «سەن دە مايلانعانسىڭ، ەسكە الۋ كەشىندە ٴدام تاتۋىڭ كەرەك» دەپ ايتپايدى. قايتا، ادامدى كوككە شاقىراتىن تەك ەحوبا ەكەنىن كىشىپەيىلدىلىكپەن مويىندايدى.
6. قورىنتتىقتارعا 1-حات 4:7، 8 گە ساي، مايلانعان ماسىحشىلەر وزدەرىن قالاي ۇستاۋلارى كەرەك؟
6 مايلانعاندار كوككە شاقىرىلعاندارىن مارتەبە ساناعانمەن، باسقالار وزدەرىنە ەرەكشە قارايدى دەپ كۇتپەيدى (ٴفىلىپ. 2:2، 3). سونداي-اق ەحوبا ولاردى مايلاعاندا، بۇنى بارلىق ادامعا بىلدىرمەيتىنىن دە بىلەدى. سوندىقتان مايلانعان ەكەنىنە بىرەۋ بىردەن سەنبەي جاتسا، ولار بۇعان تاڭعالمايدى. قايتا، كيەلى كىتاپ «قۇداي ماعان ەرەكشە جاۋاپكەرشىلىك تاپسىردى» دەيتىندەرگە بىردەن سەنە سالماۋعا شاقىراتىنىن تۇسىنەدى (ايان 2:2). وزىنە نازار اۋدارماس ٷشىن، مايلانعان ٴماسىحشى بىرەۋمەن تانىسقان كەزدە ٶزىنىڭ مايلانعان ەكەنىن ايتپايدى. سونداي-اق بۇل جايلى باسقالارعا ايتىپ ماقتانبايدى (قورىنتتىقتارعا 1-حات 4:7، 8 وقىڭىز).
7. مايلانعاندار نە ىستەۋدەن قاشىق جانە نەگە؟
7 مايلانعان ماسىحشىلەر ەرەكشە ٴبىر كلۋبتىڭ مۇشەلەرى سياقتى تەك وزگە مايلانعاندارمەن ارالاسۋىمىز كەرەك دەپ ەسەپتەمەيدى. سونداي-اق مايلانعاندارى جايلى تالقىلاۋ ٷشىن نە كيەلى كىتاپتى زەرتتەيتىن بولەك توپ قۇرۋ ٷشىن وزگە مايلانعانداردى ىزدەمەيدى (عال. 1:15—17). ولار وسىلاي ەتسە، قاۋىم بىرلىكتە بولماس ەدى. كەرىسىنشە، بۇلارى قۇداي حالقىنىڭ تىنىشتىعى مەن بىرلىگىنە سەپتىگىن تيگىزەتىن كيەلى رۋحقا قارسى شىعۋ بولار ەدى (ريم. 16:17، 18).
مايلانعاندارعا قالاي قاراۋ كەرەك؟
مايلانعان ماسىحشىلەر مەن باسشىلىقتى قولعا العاندارعا جۇلدىزدارعا قاراعانداي قاراماۋىمىز كەرەك (8-ابزاستى قاراڭىز) *
8. مايلانعاندارعا قالاي قارايتىنىمىزعا نەگە اباي بولۋىمىز كەرەك؟ (سىلتەمەنى دە قاراڭىز.)
8 ٴبىز مايلانعان باۋىرلاستارعا قالاي قاراۋىمىز كەرەك؟ ادامعا، ٴتىپتى ٴماسىحتىڭ مايلانعان باۋىرى بولسا دا، تاڭداي قاعىپ تامسانۋ دۇرىس بولماس ەدى (مات. 23:8—12). اقساقالدار جايلى ايتىلعاندا كيەلى كىتاپ «ولاردىڭ سەنىمىنە ەلىكتەۋگە» شاقىرادى. ٴبىراق بۇل كەز كەلگەن ادامدى وزىمىزگە كوسەم ەتە الامىز دەگەندى بىلدىرمەيدى (ەۆر. 13:7). كيەلى كىتاپتا كەيبىرەۋلەر «ەكى ەسە قۇرمەتكە لايىق» دەپ جازىلعانى راس، ٴبىراق ولار مايلانعاندىقتان ەمەس، «جاقسى باسشىلىق ەتەتىندىكتەن»، ٵرى «قۇداي ٴسوزىن ايتىپ، ٴتالىم بەرۋدە ايانباي ەڭبەك ەتەتىندىكتەن» لايىق (ٴتىم. 1-ح. 5:17). ەگەر ٴبىز مايلانعانداردى اسىرە ماقتاپ، تىم كوپ كوڭىل بولەتىن بولساق، ولاردى ىڭعايسىز جاعدايعا قالدىرامىز *. ودان دا جامانى ولاردىڭ كەۋدە كوتەرىپ كەتۋىنە تۇرتكى بولۋىمىز مۇمكىن (ريم. 12:3). ەشبىرىمىز دە ٴماسىحتىڭ مايلانعان باۋىرلارىنىڭ وسىنداي اۋىر قاتەلىك جاساۋىنا سەبەپكەر بولاتىن ەشتەڭە ىستەگىمىز كەلمەس ەدى! (لۇقا 17:2).
9. مايلانعان ماسىحشىلەردى قۇرمەتتەيتىنىمىزدى قالاي كورسەتەمىز؟
9 ەحوبا مايلاعان ماسىحشىلەردى قۇرمەتتەيتىنىمىزدى قالاي كورسەتە الامىز؟ ٴبىز ولاردان قالاي مايلانعاندارى جايلى سۇرامايمىز. بۇل ولاردىڭ جەكە ٶمىرى، ونى بىلۋگە ٴبىزدىڭ قۇقىمىز جوق (سال. 1-ح. 4:11؛ سال. 2-ح. 3:11). سونداي-اق ولاردىڭ جۇبايلارى، اتا-انالارى نە باسقا تۋىستارى دا مايلانعان دەپ ويلاماۋىمىز كەرەك. ادام كوكتە ٶمىر ٴسۇرۋ ٷمىتىن اتا-اناسىنان مۇرا ەتپەيدى. بۇل ٷمىتتى وعان قۇداي بەرەدى (سال. 1-ح. 2:12). سونىمەن قاتار ادامعا اۋىر تيەتىن سۇراقتار قويمايمىز. مىسالى، مايلانعان باۋىرلاستىڭ ايەلىنەن جەر بەتىندە كۇيەۋىنسىز ماڭگى ٶمىر ٴسۇرۋ جايلى نە سەزىنەتىنىن سۇرامايمىز. جاڭا دۇنيەدە ەحوبانىڭ «بارشا تىرشىلىك يەلەرىنىڭ قاجەتىن بەرەتىنىنە» تولىقتاي سەنىمدى بولساق بولادى (ٴزاب. 145:16).
10. ەگەر ادامدى ٴپىر تۇتۋدان اۋلاق بولساق، ٶزىمىزدى قالاي قورعايمىز؟
10 مايلانعان ماسىحشىلەردى وزگەلەردەن جوعارى ساناماساق، ٶزىمىزدى دە قورعايمىز. قالايشا؟ كيەلى كىتاپتا كەي مايلانعانداردىڭ ادال بولماۋى مۇمكىن ەكەنى ايتىلعان (مات. 25:10—12؛ پەت. 2-ح. 2:20، 21). ەگەر ادامدى ٴپىر تۇتپاساق، ٴبىز ەشكىمنىڭ، ٴتىپتى مايلانعانداردىڭ، كوپكە تانىمال، يا بولماسا ەحوباعا ۇزاق ۋاقىت قىزمەت ەتكەن باۋىرلاستاردىڭ سوڭىنان ەرىپ كەتپەيمىز. ولار ادالدىقتارىن ساقتاماسا يا قاۋىمنان كەتسە، ٴبىز سەنىمىمىزدى جوعالتپايمىز نەمەسە ەحوباعا قىزمەت ەتۋدى توقتاتپايمىز.
ٴدام تاتاتىنداردىڭ سانى جايلى ۋايىمداۋىمىز كەرەك پە؟
11. ەسكە الۋ كەشىندە رامىزدەردەن ٴدام تاتاتىنداردىڭ سانى قالاي وزگەرۋدە؟
11 ٴبىراز جىلدار بويى ەسكە الۋ كەشىندە ٴدام تاتاتىنداردىڭ سانى ازايىپ كەلدى. الايدا سوڭعى كەزدەرى ولاردىڭ سانى جىلدان-جىلعا كوبەيىپ جاتىر. بۇل جايلى ۋايىمداۋىمىز كەرەك پە؟ جوق. بۇعان قاتىستى ماڭىزدى كەي جايتتاردى قاراستىرايىق.
12. ەسكە الۋ كەشىندە رامىزدەردەن ٴدام تاتاتىنداردىڭ سانىن نەگە ۋايىمداماۋىمىز كەرەك؟
12 «ەحوبا ٶز مەنشىگىندەگىلەردى بىلەدى» (ٴتىم. 2-ح. 2:19). ەحوبادان ايىرماشىلىعى ەسكە الۋ كەشىندە رامىزدەردەن ٴدام تاتاتىنداردىڭ سانىن ەسەپتەيتىن باۋىرلاستار شىن مانىندە كىمنىڭ مايلانعان ەكەنىن بىلە المايدى. سوندىقتان بۇل سانعا مايلانعان بولماسا دا، وزدەرىن سولاي ەسەپتەيتىندەر دە كىرەدى. مىسالى، بۇرىن ٴدام تاتقان كەيبىرەۋلەر كەيىن بۇلاي ەتۋدى توقتاتقان. ال باسقالارى پسيحيكالىق نە ەموسيالىق جاعىنان قيىندىقتارى بولعاندىقتان كوكتە ماسىحپەن بىرگە بيلىك ەتەمىز دەپ سەنۋى مۇمكىن. شىندىعىنا كەلگەندە، جەر بەتىندە قانشا مايلانعان ٴماسىحشى قالعانىن ناقتى بىلمەيمىز.
13. كيەلى كىتاپتا زور الاپات باستالعاندا جەردە قانشا مايلانعان ٴماسىحشى بولاتىنى جازىلعان با؟
13 يسا مايلانعانداردى كوككە الىپ كەتۋ ٷشىن كەلگەندە، ولار دۇنيەنىڭ ٴتورت بۇرىشىندا بولادى (مات. 24:31). كيەلى كىتاپتا سوڭعى كۇندەرى جەر بەتىندە مايلانعان ماسىحشىلەردىڭ سانى از بولاتىنى جازىلعان (ايان 12:17). الايدا وندا زور الاپات باستالعاندا جەردە قانشا مايلانعان ٴماسىحشى بولاتىنى جازىلماعان.
ەسكە الۋ كەشىندە بىرەۋ رامىزدەردەن ٴدام تاتسا، بۇعان قالاي قاراۋىمىز كەرەك؟ (14-ابزاستى قاراڭىز)
14. ريمدىكتەرگە 9:11، 16 دان كورىنەتىندەي، مايلانعانداردىڭ تاڭدالۋىنا قاتىستى نەنى ٴتۇسىنۋىمىز كەرەك؟
14 مايلانعانداردى قاشان تاڭدايتىنىن ەحوبا ٶزى شەشەدى (ريم. 8:28—30). ەحوبا مايلانعانداردى يسا قايتا تىرىلگەننەن كەيىن تاڭداي باستادى. ٴبىرىنشى عاسىرداعى ماسىحشىلەردىڭ ٴبارى مايلانعان بولعان كورىنەدى. ال كەيىنگى عاسىرلاردا وزدەرىن ٴماسىحشىمىز دەپ اتاعانداردىڭ باسىم بولىگى شىن مانىندە ٴماسىحتىڭ سوڭىنان ەرمەگەن. ايتسە دە سول ۋاقىت ارالىعىندا ەحوبا ازداعان شىنايى ماسىحشىلەردى مايلادى. ولار يسا ايتقان ٵرامشوپ اراسىندا وسكەن بيداي سياقتى بولدى (مات. 13:24—30). ال سوڭعى كۇندەرى ەحوبا 144000 عا جاتاتىنداردى تاڭداۋدى جالعاستىرا بەردى *. سوندىقتان ەگەر ەحوبا كەيبىرەۋلەردى سوڭعى كۇندەردىڭ اياعىنا تامان تاڭداسا، ونىڭ دانالىعىنا شەك كەلتىرمەۋىمىز كەرەك * (ريمدىكتەرگە 9:11، 16 وقىڭىز). ٴبىز يسا ايتقان مىسالداعى جۇمىسشىلارعا ۇقساپ كەتۋدەن ساق بولۋىمىز قاجەت. ولار جۇزىمدىك يەسىنىڭ سوڭعى ساعاتتا جۇمىس ىستەگەندەرگە قالاي قاراعانىنا نارازىلىق بىلدىرگەن (مات. 20:8—15).
15. بارلىق مايلانعان ماسىحشىلەر ماتاي 24:45—47 تارماقتاردا ايتىلعان «ادال دا اقىلدى قۇلعا» جاتا ما؟ ٴتۇسىندىرىڭىز.
15 كوكتە ٶمىر سۇرۋگە ۇمىتتەنەتىندەردىڭ ٴبارى «ادال دا اقىلدى قۇلعا» جاتپايدى (ماتاي 24:45—47 وقىڭىز). ەحوبا مەن يسا ٴبىرىنشى عاسىرداعىداي، بۇگىندە دە از باۋىرلاستار ارقىلى كوپتى تاماقتاندىرادى، ياعني ٴتالىم بەرەدى. مىسالى، ٴبىرىنشى عاسىردا ماسىحشىلەردىڭ گرەك جازبالارىن تەك كەي مايلانعان ماسىحشىلەر عانا جازعان. بۇگىندە دە قۇداي حالقىنا «اس-سۋىن ۋاقتىلى بەرىپ تۇرۋ» جاۋاپكەرشىلىگى بىرنەشە مايلانعان ماسىحشىگە عانا جۇكتەلگەن.
16. بۇل ماقالادان نە ٴبىلدىڭىز؟
16 بۇل ماقالادان نە بىلدىك؟ ەحوبا قىزمەتشىلەرىنىڭ باسىم بولىگىنە جەر بەتىندەگى ماڭگى ٶمىردى، ال يسامەن بىرگە بيلىك ەتەتىن ساناۋلى ادامعا كوكتەگى ٶمىردى سيلاۋدى شەشتى. ەحوبا بارلىق قىزمەتشىلەرىن — «ٴياھۋديدى» دە، «ون ادامدى» دا — جارىلقايدى، ٵرى ولاردان ٴبىر زاڭعا باعىنۋدى جانە ادال بولۋدى تالاپ ەتەدى. ٴبارى كىشىپەيىل بولىپ قالۋلارى ٴتيىس. ٴبارى قوسىلىپ، ەحوباعا بىرلىكتە قىزمەت ەتۋلەرى كەرەك. ٴبارى دە قاۋىمنىڭ تىنىشتىعىن ساقتاۋ ٷشىن كۇش سالا بەرۋلەرى قاجەت. زاماننىڭ سوڭى تاياعان سايىن، ٴبارىمىز «ٴبىر وتار» رەتىندە ەحوباعا قىزمەت ەتىپ، ٴماسىحتىڭ سوڭىنان ەرە بەرەيىك (جوح. 10:16).
^ 5-ابزاس وسى جىلى ٴماسىحتىڭ ٶلىمىن ەسكە الۋ كەشى 7-ٴساۋىر، سەيسەنبى كۇنى بولادى. بۇل كەشتە رامىزدەردەن ٴدام تاتاتىندارعا قالاي قاراۋىمىز كەرەك؟ ٴدام تاتاتىنداردىڭ سانى كوبەيىپ جاتقانىن ۋايىمداۋىمىز كەرەك پە؟ بۇل سۇراقتاردىڭ جاۋابىن وسى ماقالادان بىلەمىز. ال بۇل ماقالا 2016-جىلى قاڭتار ايىندا جارىق كورگەن «كۇزەت مۇناراسىنداعى» (حانزۇشا) ماقالاعا نەگىزدەلگەن.
^ 2-ابزاس ٴزابۇر 87:5، 6 عا ساي، بولاشاقتا قۇداي كوكتە يسامەن بىرگە بيلىك ەتىپ جاتقانداردىڭ بارلىعىنىڭ ەسىمدەرىن اشۋى مۇمكىن (ريم. 8:19).
^ 8-ابزاس 2016-جىلدىڭ قاڭتارىنداعى «كۇزەت مۇناراسىنىڭ» (حانزۇشا) 26-بەتىندەگى «سۇيىسپەنشىلىك «ادەپسىز ەمەس» دەگەن قورشاۋدى قاراڭىز.
^ 14-ابزاس ەلشىلەردىڭ ىستەرى 2:33 تە كيەلى رۋحتىڭ يسا ارقىلى توگىلگەنى ايتىلسا دا، ادامدى كوككە شاقىراتىن — ەحوبانىڭ ٶزى.
^ 14-ابزاس كوبىرەك ٴبىلۋ ٷشىن 2007-جىلعى 1-مامىرداعى «كۇزەت مۇناراسىنىڭ» (حانزۇشا) «وقىرمان ساۋالدارىن» قاراڭىز.
34-ٵن مىنسىزدىك جولىمەن ٴجۇرۋ
^ 56-ابزاس سۋرەت سيپاتتاماسى: كونگرەستە ٴبىر توپ ادام باس باسقارمانىڭ وكىلى مەن ايەلىن قورشاپ الىپ، سۋرەتكە ٴتۇسىرىپ جاتقانىن ەلەستەتىپ كورىڭىزشى. بۇل نەتكەن ادەپسىزدىك بولار ەدى!
