1. Йаһоԝа дәрһәԛа рʹожед мә чь пешда готийә?

ЙАҺОԜА дәрһәԛа ԝәʹде мә пешда готийә: «Ԝан рʹожада дәһ мәрьв жь һʹәму зьманед мьләта, ԝе хԝә рʹишийе кʹьнще Щьһукива бьгьрьн, у бежьн: ‹Әм дьхԝазьн тʹәви ԝә бен, чьмки мә бьһистийә Хԝәде тʹәви ԝә йә›» (Зәкәр. 8:23, ДТʹ). «Щьһу» бь симболик әԝ ьн, кʹижан кӧ алийе Хԝәдеда бь рʹӧһʹе пироз һатьнә бьжартьне. Әԝана ӧса жи «Исраела Хԝәде» тенә навкьрьне (Галт. 6:16). Ле «дәһ мәрьв» бь симболик әԝ ьн, һевийа кʹижана жийина һʹәта-һʹәтайе сәр әʹрде йә. Әԝана заньн, ԝәки Йаһоԝа әв кʹома бьжартийа кʹәрәм дькә, у әԝана һʹәсаб дькьн, ԝәки бона ԝан ԛәдьр ә кӧ тʹәви бьжартийа Хԝәде бьһʹәбиньн.

2. «Дәһ мәрьв» чь щурʹәйи «тʹәви» бьжартийа дьчьн?

² Рʹаст ә найе стандьне, ԝәки бьзаньбьн наве һәр бьжартийа, кӧ иро сәр әʹрде нә, * ле әԝед кӧ һивийа жийина сәр әʹрде нә, йәкә дькарьн бь симболик тʹәви  бьжартийа һәрʹьн. Чаԝа? Кʹьтеба Пироз дьбежә, ԝәки «дәһ мәрьв» ԝе «хԝә рʹишийе кʹьнще Щьһукива бьгьрьн, у бежьн: ‹Әм дьхԝазьн тʹәви ԝә бен, чьмки мә бьһистийә Хԝәде тʹәви ԝә йә›». Ве рʹезеда те готьне дәрһәԛа Щьһуки. Ле «дәһ» мәрьв дьбежьн «ԝә», демәк гәләканида. Әԝ те һʹәсабе, ԝәки Щьһу тʹәне мәрьвәк нинә, ле әԝ  тʹәмамийа кʹома бьжартийа йә. Әԝед кӧ кʹьфшкьри ниньн, тʹәви йед бьжарти Йаһоԝарʹа хьзмәт дькьн. Ле әԝана тʹӧ щар ԝана ча рʹебәред хԝә һʹәсаб накьн, чьмки әԝана фәʹм дькьн, ԝәки Рʹебәре ԝан тʹәне Иса йә (Мәт. 23:10).

3. Кʹижан пьрса әме ве готареда шеԝьр кьн?

³ Иро нава щьмәʹта Хԝәдеда йед бьжарти һәнә, ләма һьнәк дьбәкә дьфькьрьн: 1) Йед бьжарти гәрәке һьндава хԝәда ча бьн? 2) Әм гәрәке ча бьн һьндава бьжартийада? 3) Чьрʹа әм гәрәке әʹщьз нәбьн, һәрге һәжмара ԝан, йед кӧ симбола дьхԝьн у вәдьхԝьн, зедә дьбә? Әԝ готар ԝе щаба ԝан пьрса бьдә.

4. Кʹижан гьлийед фәрз 1 Корьнтʹи 11:27-29-да ньвисар ьн, кӧ йед бьжарти гәрәке рʹьнд гӧһ бьдьн, у чьрʹа?

⁴ Йед бьжарти гәрәке рʹьнд гӧһ бьдьнә гьлийед жь 1 Корьнтʹи 11:27-29 (Бьхунә.) Чаԝа йе бьжарти дькарә «нәлайиԛи» симболед Биранине бьхԝә у вәхԝә? Әԝ йәк ԝе нәлайиԛи бә, һәрге әԝ пе ԛанун у принсипед Йаһоԝа нажи (Ибрн. 6:4-6; 10:26-29). Йед бьжарти фәʹм дькьн, кӧ һәрге әԝана дьхԝазьн «ләщхәлата жорчуйине, аԝа готи газийа Хԝәдейә бь сайа Мәсиһ Иса» бьстиньн,  гәрәке Хԝәдерʹа һʹәта хьлазийе амьн бьминьн (Фили. 3:13-16).

5. Мәсиһийед бьжарти гәрәке ча бьн һьндава хԝәда?

⁵ Йаһоԝа пе рʹӧһʹе хԝәйи пироз али хьзмәткʹаред хԝә дькә, ԝәки мьлук бьн, нә кӧ ԛӧрʹә бьн (Әфәс. 4:1-3; Колс. 3:10, 12). Ләма йед кʹьфшкьри тʹӧ щар нафькьрьн, ԝәки әԝана жь Мәсиһийед майин баштьр ьн. Әԝана заньн, кӧ бьжартьна ԝан надә кʹьфш, ԝәки Йаһоԝа әʹсә рʹӧһʹе хԝәйи пироз һе зедә дьдә ԝана, нә кӧ хьзмәткʹаред майин. Әԝана һʹәсаб накьн, ԝәки әԝана Кʹьтеба Пироз жь хушк-бьра четьр заньн. У әԝана тʹӧ щар ԝе кәсәки һелан нәкьн у нәбежьн, ԝәки әԝ жи бьжарти йә у гәрәке дәстпекә симбола бьхԝә у вәхԝә. Дәԝсе, әԝана бь мьлукти тиньн сәр хԝә, ԝәки тʹәне Йаһоԝа сафи дькә кӧ кʹе һәрʹә әʹзмана.

6. Ль гора 1 Корьнтʹи 4:7, 8, рʹабун-рʹуньштьна Мәсиһийед бьжарти гәрәке ча бә?

⁶ Рʹаст ә йед бьжарти заньн, ԝәки әԝ ԛәдьрәки мәзьн ә бона ԝан, кӧ ԝе һәрʹьн сәр әʹзмана, ле әԝана һивийе ниньн, ԝәки ԝана бьльнд кьн у башԛә кьн (Фили. 2:2, 3). Әԝана ӧса жи заньн, кӧ чахе Йаһоԝа әԝана кʹьфш кьрьн, Әԝи тʹӧ кәсирʹа дәрһәԛа ве йәке әʹлам нәкьр. Ләма йе кʹьфшкьри әʹщебмайи наминә, кӧ һьнәк дәрберʹа баԝәр накьн, ԝәки әԝ һатийә бьжартьне. Әԝ фәʹм дькә, ԝәки Кʹьтеба Пирозда те готьне, кӧ һәрге кәсәк дьбежә, ԝәки Хԝәде жерʹа щабдарийа мәхсус дайә, әм гәрәке дәрберʹа ԝи баԝәр нәкьн (Әʹйан. 2:2). Йе бьжарти чахе тʹәви мәрьва дьбә нас, ԝанрʹа набежә, ԝәки әԝ Мәсиһийе бьжарти йә, сәва дина мәрьва нәкʹьшинә сәр хԝә. У әԝ ӧса жи бәр тʹӧ кәси бона ве йәке, ԝе хԝә ԛӧрʹә нәкә у пʹайе хԝә нәдә. (Бьхунә 1 Корьнтʹи 4:7, 8.)

7. Йед бьжарти ԝе чь нәкьн, у чьрʹа?

⁷ Мәсиһийед бьжарти ԝе нәфькьрьн, ԝәки әԝана гәрәке тʹәне тʹәви йед бьжарти ԝәʹдә дәрбаз кьн, мина кʹомәкә башԛә. Әԝана бьжартийед майин нагәрʹьн бона ве йәке, кӧ тʹәви ԝан дәрһәԛа бьжартьна хԝә хәбәр дьн у шеԝьр кьн, у ӧса жи әԝана башԛә тʹоп набьн, сәва тʹәвайи Кʹьтеба Пироз леколин бькьн (Галт. 1:15-17). Һәрге бьжарти ԝан тьшта бькьн, йәктийа щьвате ԝе ӧнда бә, чьмки һәрге әԝана ӧса бькьн, әԝ те һʹәсабе кӧ әԝана мьԛабьли рʹӧһʹе пироз дәртен. Чьрʹа? Чьмки әԝ рʹӧһʹе пироз али щьмәʹта Хԝәде дькә, ԝәки әʹдьлайеда у йәктийеда бьн (Рʹом. 16:17, 18).

8. Чьда һун гәрәке фәсал бьн һьндава йед бьжартида? (Бьньһерʹьн спартьн.)

⁸ Әм гәрәке һьндава хушк-бьред бьжартида ча бьн? Ԝе нәрʹаст бә ԝәки әм кәсәки гәләк бьльнд кьн, һәрге жи әԝ бьжарти йә (Мәт. 23:8-12). Кʹьтеба Пироз дәрһәԛа рʹуспийа мә һелан дькә, ԝәки «чʹәʹв бьдьнә баԝәрийа ԝан», ле әԝ набеже, ԝәки мәрьв бькьн рʹебәре хԝә (Ибрн. 13:7). Кʹьтеба Пироз дьбежә, ԝәки һьнәк «дӧбарә һежайи ԛәдьр» ьн, чьмки әԝана «сәрԝерийе рʹьнд дькьн» у «хәбәрдан у һинкьрьнеда дьхәбьтьн», ле нә жь бо ве йәке кӧ әԝана бьжарти нә (1 Тимтʹ. 5:17). Һәрге әм йед бьжарти гәләк һӧрмәт кьн у бьльнд кьн, әм дькарьн ԝана әʹщьз кьн. * Йан һе хьраб әԝ ә, кӧ әм дькарьн бьбьнә мәʹни, кӧ әԝана ԛӧрʹә бьн (Рʹом. 12:3). Тʹӧ кәс жь мә нахԝазә, ԝәки тьштәки ӧса бькә, чь кӧ ԝе ԝанрʹа бьбә мәʹни әве шашийа мәзьн бькьн (Луԛа 17:2).

9. Әм ча дькарьн һьндава Мәсиһийед кʹьфшкьри ԛәдьр бьдьнә кʹьфше?

⁹ Ле әм ча дькарьн һьндава бьжартийед Йаһоԝада ԛәдьр нишан кьн? Әм ԝана напьрсьн кӧ әԝана ча бунә кʹьфшкьри. Әԝ пьрса шәхси йә, у изьна мә тʹӧнә йә, ԝәки дәрһәԛа ве йәке бьзаньбьн (1 Тʹеслн. 4:11; 2 Тʹеслн. 3:11). Әм ӧса жи гәрәке нәфькьрьн, ԝәки мер йан жи жьнед ԝан, де-бав йан жи мәрьвед ԝани незик жи бьжарти нә. Чьрʹа? Чьмки һевийа әʹзмани тʹӧ щар жь малбәте ча мьлкʹ дәрбази кәсәки набә, ле Хԝәде әве һевийе дьдә ԝан (1 Тʹеслн. 2:12). Әм гәрәке ӧса жи пьрсед ӧса нәдьнә ԝан, кʹижан кӧ дькарьн дьле ԝан бешиньн. Мәсәлә, әм гәрәке жьнед ԝан бьред кʹьфшкьри нәпьрсьн, кӧ әԝана бей меред хԝә ԝе ча бьжин сәр әʹрде. Әм дӧдьли ниньн, ԝәки дьнйа тʹәзәда Йаһоԝа ԝе «һʹәму бинбәри гора дьле ԝан тʹер» кә (Зәб. 145:16).

10. Әме хԝә жь кʹижан тʹәльке хԝәй кьн, һәрге тʹӧ кәси бьльнд нәкьн?

¹⁰ Һәрге әм йед кʹьфшкьри бьльнд нәкьн, әме хԝә жь тʹәльке хԝәй кьн. Жь кижан тʹәльке? Кʹьтеба Пироз дьбежә, ԝәки дьбәкә жи һьнә йед бьжарти ԝе амьн нәминьн (Мәт. 25:10-12; 2 Пәт. 2:20, 21). Ле һәрге әм тʹӧ кәси бьльнд нәкьн, һәла һе жи һәрге әԝана бьжарти нә, йан жи бьред навдар ьн у йед кӧ гәләк сала Йаһоԝарʹа хьзмәт дькьн, әме ԝана ча рʹебәред хԝә һʹәсаб нәкьн (Щьһуд. 16). У һьнге, һәрге әԝана нәамьн бьн йан жи щьвате бьһельн, әме баԝәрийа хԝә һьндава Йаһоԝа ӧнда нәкьн, у хьзмәтийа хԝә нәдьнә сәкьнандьне.

11. Һәжмара ԝан, йед кӧ ԝәʹде Биранине симбола дьхԝьн у вәдьхԝьн, ча дьбә?

¹¹ Гәләк сала һәжмара ԝан, йед кӧ ԝәʹде Биранине симбол дьхԝарьн у вәдьхԝарьн кем дьбу. Ле ԝан салед пашԝәхтийе, һәжмара ԝан һе зедә дьбә. Гәло лазьм ә әм бона ве йәке бәрхԝә кʹәвьн? На. Ԝәрә әм чәнд мәʹнийа шеԝьр кьн.

12. Чьрʹа әм гәрәке бәрхԝә нәкʹәвьн, кӧ һәжмара бьжартийа зедә дьбә?

¹² «Хӧдан йед пʹара хԝә нас дькә» (2 Тимтʹ. 2:19). Әԝ бьред кӧ ԝәʹде Биранине һʹәсаб дькьн кӧ кʹе жь симбола дьхԝә у вәдьхԝә, ньзаньн жь ԝана кʹе бь рʹасти бьжарти йә, тʹәне Йаһоԝа занә. Демәк, нава ԝанда һәнә йед ӧса,  кӧ дьфькьрьн ԝәки бьжарти нә, ле бь рʹасти бьжарти ниньн. Мәсәлә, һьнәка кӧ ԝәʹдәки симбол дьхԝарьн у вәдьхԝарьн, паше ида данә сәкьнандьне. Һʹьнәк жи жь бо нәхԝәшийа емосийали дьфькьрьн, кӧ әԝана ԝе тʹәви Иса сәр әʹзмана сәрԝертийе бькьн. Әшкәрә йә, ԝәки әм ньзаньн кӧ бь рʹасти чьԛас бьжарти сәр әʹрде һәнә.

13. Кʹьтеба Пироз чь дьбежә дәрһәԛа һәжмара бьжартийа ԝәʹде тәнгасийа мәзьн?

¹³ Бьжарти ԝе сәр әʹрде ль щурʹә-щурʹә щийа бьн, чахе Иса ԝана тʹоп кә у бьвә әʹзмана (Мәт. 24:31). Кʹьтеба Пироз дьдә кʹьфше, ԝәки рʹожед ахьрийеда, һьнә бьжарти ԝе сәр әʹрде бьн (Әʹйан. 12:17). Ле Кʹьтеба Пирозда найе готьне, ԝәки әԝана ԝәʹде тәнгасийа мәзьн сәр әʹрде ԝе чьԛас бьминьн.

14. Ль гора Рʹомайи 9:11, 16, дәрһәԛа кʹьфшкьрьна бьжартийа әм чь педьһʹәсьн?

¹⁴ Йаһоԝа хԝәха сафи дькә, кӧ кʹәнге мәрьва бь рʹӧһʹе пироз кʹьфш кә (Рʹом. 8:28-30). Йаһоԝа паши сахкьрьна Иса дәстпекьр ԝана бьжберә. Те кʹьфше ԝәки ԛьрʹна йәкеда һʹәму Мәсиһи бьжарти бун. Паше ида чахе ԛьрʹнә дәрбаз дьбун, һʹәчʹи зәʹф кӧ дьготьн, ԝәки әԝана Мәсиһи нә, бь рʹасти пәй Мәсиһ нәдьчун. Ле һәла һе ԝан салада жи Йаһоԝа һьнәк кʹьфш кьрьн, йед кӧ Мәсиһийед рʹаст бун. Әԝана мина гәньм нава зиԝанда мәзьн дьбун (Мәт. 13:24-30). Ԝәʹде рʹожед ахьрийеда, Йаһоԝа бәрдәԝам дькә ԝан мәрьва бьжберә, йед кӧ ԝе бькʹәвьнә нава 144 000. * Ләма һәрге Хԝәде сафи  дькә, ԝәки бәр шемика хьлазийа дьнйайе һьнәка кʹьфш кә, әм гәрәке сафикьрьна ԝи нәкьнә бьн шьке. (Бьхунә Рʹомайи 9:11, 16.) * Әм гәрәке фәсал бьн, ԝәки нәбьнә мина ԝан пʹала, дәрһәԛа кʹижана Иса мәтʹәлокеда гьли кьр. Ԝана дькьрә кӧтә-кӧт, кӧ чьрʹа аха һьндава ԝанда, йед кӧ хьлазийа рʹожеда хәбьтин, мәрʹдани да кʹьфше (Мәт. 20:8-15).

15. Гәло һʹәму Мәсиһийед бьжарти дькʹәвьнә нава «хӧламе амьн у сәрԝахт», дәрһәԛа кʹижани Мәтта 24:45-47-да те готьне? Шьровәкьн.

¹⁵ Нә һʹәму бьжарти пʹара «хӧламе амьн у сәрԝахт» ьн. (Бьхунә Мәтта 24:45-47.) Чаԝа ԛьрʹна йәкеда ӧса жи иро, Йаһоԝа у Иса бь сайа һьнә бьра гәләкарʹа хԝарьне дьдьн, демәк һин дькьн. Ԛьрʹна йәкеда тʹәне чәнд Мәсиһийед бьжарти Ньвисаред Йунани ньвисин. Иро жи тʹәне һьнә Мәсиһийед бьжарти щабдар ьн сәва «ԝәхтда» хԝарьна рʹӧһʹани бьдьнә щьмәʹта Хԝәде.

16. Жь ве готаре һун чь пеһʹәсийан?

¹⁶ Ве готареда әм чь пеһʹәсийан? Йаһоԝа сафи кьрийә кӧ һʹәчʹи зәʹф мәрьварʹа жийина һʹәта-һʹәтайе сәр әʹрде бьдә, ле һьнәкарʹа жийина сәр әʹзмана, йед кӧ ԝе тʹәви Иса сәрԝертийе бькьн. Йаһоԝа һʹәму хьзмәткʹаред хԝә хәлат дькә, ча «Щьһу» ӧса жи «дәһ мәрьв», у әԝ жь ԝана дәʹԝа дькә, кӧ гӧрʹа ԛанунед ԝи бькьн у жерʹа амьн бьминьн. Ӧса жи әԝ дьхԝазә кӧ әԝана гьшк шкәсти у мьлук бьн. Әԝана гьшк гәрәке тʹәвайи йәктийеда хьзмәт кьн. У гьшк гәрәке һәр тьшти бькьн, сәва әʹдьлайа щьвате хԝәй кьн. Әм незики хьлазийа ве дьнйайе дьбьн, ләма жи ԝәрә әм бәрдәԝам кьн Йаһоԝарʹа хьзмәт кьн, у ча «кәрик» пәй Иса һәрʹьн (Йуһʹн. 10:16).