MUTWE WA KUFUNDA 5
Tusakuya Nenu
“Tubena kukeba kuya nenu, mambo twaumvwa’mba Lesa uji ne anweba.”—ZEKA. 8:23.
LWIMBO 26 Mwangubijile Amiwa
BIJI MU UNO MUTWE *
Mikooko ikwabo (“bantu jikumi”) bapopwela Yehoba pamo na bashingwa (“Muyudea”) (Monai mafuka 1-2)
1. Ñanyi bintu Yehoba byo aambile’mba bikamweka mu kimye kyetu?
YEHOBA waambijile jimo pa ano moba etu amba: “Bantu jikumi bafuma mu milaka yonse ya bisaka bya bantu bakakwata, ee kine, bakakwachisha ku munkukumba wa Muyudea ne kwamba’mba: ‘Tubena kukeba kuya nenu, mambo twaumvwa’mba Lesa uji ne anweba.’” (Zeka. 8:23) “Muyudea” wimenako boba Lesa bo ashinga mupashi wazhila. Kabiji batelwa ne kuba’mba “bena Isalela ba Lesa.” (Nga. 6:16) “Bantu jikumi” bemenako boba baji na luketekelo lwa kwikala myaka ne myaka pano pa ntanda. Bayuka’mba Yehoba wapesha jino jibumba ja bashingwa ne kuba’mba ke kintu kya munema kumupopwela pamo na bano bashingwa.
2. “Bantu jikumi” ‘baya’ byepi na bashingwa?
2 Nangwa kya kuba kechi kyakonsheka kuyuka mazhina a bashingwa bonse bajipo lelo jino ne, * bino aba baji na luketekelo lwa kwikala pano pa ntanda bakonsha ‘kuya’ na bashingwa. Bakonsha kuya nabo byepi? Baibolo waamba’mba “bantu jikumi” “bakakwachisha ku munkukumba wa Muyudea ne kwamba’mba: ‘Tubena kukeba kuya nenu, mambo twaumvwa’mba Lesa uji ne anweba.’” Kyepelo kya mu Baibolo kyatongolatu Muyudea umo. Bino byambo kya kuba’mba “nenu” ne “anweba” bimenako bantu bavula. Kino kibena kulumbulula’mba Muyudea kechi muntu umotu ne, bino wimenako jibumba jonse ja bashingwa. Aba babula kushingwa bengijila Yehoba pamo na bashingwa. Pano bino, kechi bamona bashingwa amba bantangi babo ne, bayuka’mba Yesu ye Ntangi wetu.—Mat. 23:10.
3. Ñanyi mepuzho o tusakukumbula mu uno mutwe?
3 Na mambo a kuba’mba bena Kilishitu bashingwa bamo bakiji pano pa ntanda pamo na bantu ba Lesa bakwabo, bamo bakonsha kushikisha’mba: (1) Bashingwa bafwainwa kwimonanga byepi? (2) Twafwainwa kumonanga byepi boba bajako shinkwa ne kutomako binyu pa Kivuluko? (3) Nanchi twafwainwa kwakamwa inge kya kuba bantu kujako shinkwa ne kutomako binyu pa Kivuluko babena kuvujilakotu nyi? Tusakukumbula ano mepuzho mu uno mutwe.
BASHINGWA BAFWAINWA KWIMONANGA BYEPI?
4. Ñanyi lujimuno luji pa 1 Kolinda 11:27-29 bashingwa lo bafwainwa kulangulukapo bingi, kabiji mambo ka?
4 Bashingwa bafwainwa kulangulukapo bingi pa lujimuno luji pa 1 Kolinda 11:27-29. (Tangai.) Mushingwa wakonsha kujako byepi shinkwa ne kutomako binyu pa Kivuluko “saka abula kufwainwa”? Wakonsha kuba bino inge wajako ne kutoma saka abula kukookela mizhilo ya Yehoba. (Hebe. 6:4-6; 10:26-29) Bashingwa bayuka kuba’mba bafwainwa kutwajijila kwikala ba kishinka inge bakeba kutambula “kilambu kya lwito lwa mwiulu lufuma kwi Lesa kupichila mwi Kilishitu Yesu.”—Fili. 3:13-16.
5. Bena Kilishitu bashingwa bafwainwa kwimonanga byepi?
5 Mupashi wazhila wa Yehoba ukwasha bakalume banji kwipelula, kechi kwitota ne. (Efi. 4:1-3; Kolo. 3:10, 12) Onkao mambo, bashingwa kechi bafwainwa kulanguluka’mba banema kukila bakwabo ne. Bayuka’mba Yehoba kechi upa bashingwa mupashi wazhila wavula kukila ye apa bakalume banji bakwabo ne. Kechi balanguluka’mba bo bayukisha bukine bwa mu Baibolo kukila bantu bonse ne. Kabiji kechi bafwainwa kwambila mukwabo amba naye washingwa ne kumwambila’mba atendeke kujako shinkwa ne kutomako binyu pa Kivuluko ne. Pakuba, bafwainwa kwipelula ne kuyuka’mba Yehoba ye yenkatu wita bantu kuya mwiulu.
6. Kwesakana na byaamba 1 Kolinda 4:7, 8, bena Kilishitu bashingwa bafwainwa kwikala na byubilo bya mutundu ka?
6 Nangwa kya kuba bashingwa bayuka’mba kwibeta kuya mwiulu ke munema mukatampe, kechi baketekela bakwabo kwibanemeka kukila bantu bakwabo ne. (Fili. 2:2, 3) Kabiji bayuka’mba kimye Yehoba kyo ebashingile, kechi wabuujileko muntu mukwabo ne. Onkao mambo, mushingwa kechi wafwainwa kukumya inge bamo bakankalwa kuswa ponkapotu amba washingwa ne. Uvuluka’mba Baibolo witubuula’mba kechi twafwainwa kupelawizha kuswa inge muntu keambe’mba Lesa wamupa mwingilo wanema ne. (Lum. 2:2) Na mambo a kuba’mba mwina Kilishitu washingwa kechi uketekela bakwabo kukizhamo kumunemeka ne, kechi wafwainwa kubuulanga bonse bo ataana amba washingwa ne. Kabiji kechi wafwainwa kwitotanga ne.—Tangai 1 Kolinda 4:7, 8.
7. Ñanyi bintu bena Kilishitu bashingwa byo bafwainwa kubula kubanga, kabiji mambo ka?
7 Bena Kilishitu bashingwa kechi balanguluka’mba bafwainwa kupwanañanangatu na bakwabo bashingwa, uba nobe balenga kabungwe ne. Kechi bafwainwa kuya na kukeba bashingwa bakwabo pa kuba’mba besambenga nabo pa kushingwa kwabo, nangwa kukonkana pamo mu mabumba na kufunda Baibolo mulwabo ne. (Nga. 1:15-17) Inge bashingwa ke bobe bino, kipwilo kechi kyakonsha kukwatankana ne. Bakonsha kupusenamo na mupashi wazhila, ukwasha bantu ba Lesa kwikala mu mutende ne kukwatankana.—Loma 16:17, 18.
TWAFWAINWA KUMONANGA BYEPI BASHINGWA?
Kechi twafwainwa kumonanga bashingwa nangwatu bantu bakwabo betutangijila nobe bantu baya nkuwa mu bya makayo ne (Monai jifuka 8) *
8. Mambo ka o twafwainwa kujimukila na byo tumona boba bajako shinkwa ne kutomako binyu pa Kivuluko? (Monai ne tubyambo twa munshi.)
8 Twafwainwa kumonanga byepi balongo ne banyenga bashingwa? Kyatama kukizhamo kukumbwa muntu, nangwatu kya kuba ke mulongo wa kwa Kilishitu washingwa. (Mat. 23:8-12) Baibolo byo aamba pa bakulumpe, witutundaika ‘kulondela lwitabilo lwabo,’ bino kechi witubuulapo’mba twafwainwa kulenga muntu kwikala ntangi wetu ne. (Hebe. 13:7) Ibyo kuba’mba Baibolo waamba’mba bamo twafwainwa kwibapa “mushingi mukatampe.” Bino twafwainwa kuba bino na mambo a kuba’mba “batangijila bulongo” kabiji “bengila na ngovu mu kwamba ne mu kufunjisha,” kechi na mambo a kuba’mba bashingwa ne. (1 Timo. 5:17) Inge twakizhamo kutakaika bashingwa ne kwibanemeka, twakonsha kwibalengela kubula kukasuluka. * Ne kyakilamo kutama, twakonsha kwibalengela kutendeka kwitota. (Loma 12:3) Kafwako nangwa umo pe atweba ukeba kuba kintu kyakonsha kulengela mulongo wa kwa Kilishitu washingwa kulenga mambo akatampe a uno mutundu ne.—Luka 17:2.
9. Twakonsha kumwesha byepi amba twanemeka bena Kilishitu bashingwa?
9 Twakonsha kumwesha byepi amba twanemeka boba Yehoba bo ashinga? Kechi twafwainwa kwibepuzha byo bashingilwe ne. Muntu mwine washingwa ye wafwainwa kuyuka, kabiji atweba kechi tujipo na luusa lwa kukeba kuyuka byo kyajinga ne. (1 Tesa. 4:11; 2 Tesa. 3:11) Kabiji kechi twafwainwa kulangulukanga’mba benakwabo, bansemi babo, nangwa bakwabo ba mu kisemi nabo bashingwa ne. Muntu kechi wikala mushingwa na mambo a kuba mu kisemi muji bashingwa ne. Lesa ye usala. (1 Tesa. 2:12) Twafwainwa kuchinuzhuka kwipuzha mepuzho akonsha kuzhingijisha bakwetu. Kechi twafwainwa kwipuzhanga mukazhi wa mulongo washingwa byo alangulukapo pa kwikala pano pa ntanda myaka ne myaka kwa kubula mwatawanji ne. Mambo twaketekela’mba mu ntanda ipya, Yehoba ‘ukapa bilengwa byumi bintu byonse byo bikeba.’—Sala. 145:16.
10. Twizhikijila byepi inge twachinuzhuka “kukumbwa byubilo bya bantu”?
10 Inge ke tubule kumona bashingwa nobe banema kukila bakwabo, tukezhikijila ne atweba bene. Mu ñanyi jishinda? Baibolo witubuula’mba mu kipwilo mwakonsha kwikala bashingwa bamo bakonsha kuleka kwikala ba kishinka. (Mat. 25:10-12; 2 Pe. 2:20, 21) Bino inge twachinuzhuka “kukumbwa byubilo bya bantu,” kechi tukalondelanga bakwetu ne, nangwatu boba bashingwa nangwa bayukanyikwa bingi nangwa boba baingijila Yehoba pa myaka yavula ne. (Yuda 16, tubyambo twa munshi.) Inge bakankalwa kutwajijila kwikala ba kishinka nangwa bafuma mu kipwilo, kechi tukaleka kwitabila mwi Yehoba nangwa kuleka kumwingijila ne.
NANCHI TWAFWAINWA KWAKAMWA PA KUVULA KWA BANTU BAJAKO SHINKWA NE KUTOMA BINYU BYA PA KIVULUKO NYI?
11. Ki ka kyamweka ku nambala ya bantu bajako bipashañano bya pa Kivuluko?
11 Pa myaka yavula, bantu bajangako shinkwa ne kutomako binyu pa Kivuluko bayilenga na kukepelako. Bino mu myaka ya katataka, bantu babena kuja shinkwa ne kutoma binyu bya pa Kivuluko babena kuvujilakotu pa mwaka pa mwaka. Nanchi twafwainwa kwakamwa pa kino nyi? Ine. Twayai twisambe pa bishinka byo twafwainwa kuvulukanga.
12. Mambo ka o twafwainwa kubujila kwakamwa pa kuvula kwa bantu bajako bipashañano bya pa Kivuluko?
12 “Yehoba wayuka banji.” (2 Timo. 2:19) Kupusanako ne Yehoba, balongo babala bantu bajako shinkwa ne kutomako binyu pa Kivuluko kechi bayuka bashingwa ba kine ne. Onkao mambo, babajila kumo ne boba balanguluka’mba bashingwa bino saka babula kushingwa. Bamo bajangako shinkwa ne kutomako binyu bekilekele mu kuya kwa kimye. Kabiji bakwabo nabo bekala na makatazho a kuvulañanako mu bongo ne kuketekela’mba bakalamanga ne Kilishitu mwiulu. Kyamwekeshatu patoka’mba kechi twayuka bashingwa banga bashalapo pano pa ntanda ne.
13. Nanchi Baibolo watongola nambala ya bashingwa bakekala pano pa ntanda kimye kikatendeka malwa akatampe nyi?
13 Mu mapunzha avula pano pa ntanda mukekala bashingwa kimye Yesu kyo akeya na kwibasenda mwiulu. (Mat. 24:31) Baibolo waamba’mba mu moba a kupelako, pano pa ntanda pakekala bashingwa bacheche. (Lum. 12:17) Bino kechi waamba nambala ya bashingwa bakekalapo kimye kikatendeka malwa akatampe ne.
Twafwainwa kuba byepi inge kya kuba muntu umo wajako ku bipashañano bya pa Kivuluko? (Monai jifuka 14)
14. Kwesakana na byaamba Loma 9:11, 16, ñanyi bintu byo twafwainwa kuyuka pa kusalwa kwa bashingwa?
14 Yehoba ye ufuukula kimye kya kusala bashingwa. (Loma 8:28-30) Yehoba watendekele kusala bashingwa kimye kyasangwilwe Yesu. Kyamweka mu myaka kitota kitanshi, bena Kilishitu ba kine bonse bajinga bashingwa. Pa myaka yavula yapichilepo kufuma kyokya kimye, bavula betelanga’mba bena Kilishitu kechi balondelanga Kilishitu mu bukishinka ne. Nangwa byonkabyo, mu yonka ino myaka, Yehoba washingilepo bantu bacheche bajinga bena Kilishitu ba kine. Bajinga nobe wichi Yesu yo aambile’mba ikakomenanga pamo na bincha. (Mat. 13:24-30) Mu ano moba a kupelako, Yehoba watwajijila kusala bantu ba kwikala mu ba 144,000. * Onkao mambo, inge Lesa wafuukula kusalapo bamo saka kwashalatu pacheche mpelo kufika, kechi twafwainwa kuzhinauka kyo afuukulapo ne. (Tangai Loma 9:11, 16.) * Twafwainwa kujimuka pa kuba’mba tubule kuba byonka byaubile ba mingilo baambilepo Yesu mu bishimpi byanji. Bejizhenye kwi nkambo yabo pa bakwabo batendekele kwingila mu jiola japeleleko.—Mat. 20:8-15.
15. Nanchi bashingwa bonse baji mu “kalume wa kishinka kabiji wa maana” watongolwa pa Mateo 24:45-47 nyi? Lumbululai.
15 Kechi bonse baji na luketekelo lwa kuya mwiulu baji mu “kalume wa kishinka kabiji wa maana” ne. (Tangai Mateo 24:45-47.) Byonka byo baubilenga mu myaka kitota kitanshi, Yehoba ne Yesu babena kwingijisha bantu bacheche kujiisha, nangwa’mba kufunjisha bavula. Mu myaka kitota kitanshi, kwajingatu bena Kilishitu bashingwa bacheche bo baingijishe kunemba Binembelo bya Bwina Kilishitu bya Kingiliki. Ne lelo jino, bena Kilishitu bashingwa bachechetu baji na mwingilo wa kupa bantu ba Lesa “kajo pa kimye kyafwainwa.”
16. Ñanyi bintu byo mwafunda mu uno mutwe?
16 Ñanyi bintu byo twafunda mu uno mutwe? Yehoba wafuukulapo kupana bumi bwa myaka ne myaka ku bantu bavula bakekala pano pa ntanda ne bumi bwa mwiulu ku boba bakalamanga ne Yesu. Yehoba ufweta bakalume banji bonse, ko kuba’mba, “Muyudea” ne “bantu jikumi,” kabiji ukeba’mba bonse bakookelenga mizhilo imotu ne kwikala ba kishinka. Bonsetu bafwainwa kwikala bepelula. Bonse bafwainwa kumwingijila pamo ne kukwatankana. Kabiji bonse bafwainwa kwibikako kulama mutende mu kipwilo. Byo tubena kunangijila ku mpelo, twayai atweba bonse tutwajijile kwingijila Yehoba ne kulondela Kilishitu byo tuji “jitanga jimo.”—Yoa. 10:16.
^ jifu. 5 Uno mwaka, Kivuluko kya lufu lwa kwa Kilishitu kikekalako pa Kibiji, pa 7 April. Twafwainwa kumonanga byepi boba bajako shinkwa ne kutomako binyu pa Kivuluko? Nanchi twafwainwa kwakamwa inge kya kuba bantu babena kujako babena kuvujilakotu nyi? Tusakutaana mikumbu ya ano mepuzho mu uno mutwe waimena pa mutwe wajinga mu Kyamba kya Usopa kya January 2016.
^ jifu. 2 Kwesakana na byaamba Salamo 87:5, 6, kulutwe kampe Lesa ukasolola mazhina a bonse bakalamanga pamo ne Yesu mwiulu.—Loma 8:19.
^ jifu. 8 Monai kakitenguluzha ka kuba’mba “Butemwe ‘Kechi Buba bya Bumvu Ne’” mu Kyamba kya Usopa kya January 2016.
^ jifu. 14 Nangwa kya kuba Byubilo 2:33 bimwesha kuba’mba mupashi wazhila witululwa kupichila mwi Yesu, bino kishinka ke kya kuba’mba Yehoba ye usala bashingwa.
^ jifu. 14 Pa kuba’mba muyukilepo byavula, monai “Mepuzho Afuma ku Batanga” mu Kyamba kya Usopa kya Kizungu kya May 1, 2007.
LWIMBO 34 Endainga mu Bukishinka
^ jifu. 56 KULUMBULULA KIPIKICHALA: Fwanyikizhai kuba’mba mulongo ubena kwimenako ofweshi mukatampe wa ntanda yonse ne mwinakwanji bebabunga ku bantu babena kwibakopa bipikichala. Kyakonsha kwikala kya bumvu bingi.
