1. Wapi mambu Yehova zonza’a ke na salama na ntangu ya beto?

YEHOVA zonzila’a mambu yina ke na talana’a bubu yayi: “Bantu kumi ya bandinga nyonso ya ntoto ke simba, ya tsyeleka, ba ke simba ngolo lele ya Jwif mosi mpe ba ke zonza: ‘Beto ke zola kukwenda na beno, samu beto me kuwa ti Nzambi ke na beno.’” (Zak. 8:23) “Jwif” na verse yayi ke kidimbu ya ba yina Yehova me sola na mpeve ya santu. Ba ke bokila bawu mpe “Izraele ya Nzambi.” (Gal. 6:16) “Bantu kumi” ke kidimbu ya ba yina ke na kivuvu ya kuzwa luzingu ya ntangu nyonso awa na ntoto. Ba me zaba ti Yehova me sola kivumka ya bakristo yina ke kwenda na zulu mpe ba ke na kilengi ya kusadila Yehova kitwandi na bawu.

2. Wapi faso“bantu kumi” “ke kwenda na” ba yina Yehova sola’a?

² Ata bubu yayi beto lenda zaba ve bankumbu ya ba yina nyonso Yehova sola’a, * ba yina ke na kivuvu ya kuzinga awa na ntoto lenda “kwenda na” bawu. Na wapi faso? Biblia ke zonza ti, “bantu kumi (10)” ke “simba ngolo lele ya Jwif mosi, mpe ke zonza: ‘Beto ke zola kukwenda na beno, samu beto me kuwa ti Nzambi ke na beno.’”  Verse ya Biblia yayi ke na zonzila Jwif mosi. Kasi ba-mot “beno” ke na lakisa’a bantu mingi. Ya zola zonza ti Jwif yango ke ve muntu mosi, kasi kimvuka ya ba yina ke kwenda zinga na zulu. Bakristo yina ke zinga awa na ntoto,  ke sadila’a Yehova kintwadi na bawu. Kasi, ba ke tala ve ba yina Yehova sola’a neti bamfumu ya bawu, samu ba zaba ti, ni Yesu ke mfumu ya bawu.—Mat. 23:10.

3. Na wapi byuvu beto ke kuzwa bamvutu na article yayi?

³ Samu ndambu ya bakristo yina ke kwenda zinga na zulu ke ntete awa na ntoto, ba ya nkaka lenda yufula: 1) Wapi makanisi zola vanda na bakristo yina ke kwenda na zulu? 2) Wapi faso beto zola bakila ba yina ke baka’a dimpa mpe vinu? 3) Beto zola vanda na boma samu nombre ya ba yina ke baka’a dimpa mpe vinu ke na kuma’a mingi? Artikle yayi ke pesa bamvutu na byuvu yayi.

4. Wapi dikebi yina ke na 1 Bakorinto 11:27-29 bakristo yina Yehova me sola zola kanisa mbote-mbote, mpe samu na yinki?

⁴ Ba yina ke kwenda zinga na zulu, zola kanisa mbote-mbote na dikebi yina ke na 1 Bakorinto 11:27-29. (Tanga, nwt-MK) Wapi faso ba yina Yehova sola’a lenda baka dimpa mpe vinu na “faso ya yimbi” na Memoriale? Ya lenda salama si ba baka dimpa mpe vinu ntangu ba ke na ndyatulu ya yimbi. (Ebr. 6:4-6; 10:26-29) Bakristo yina Yehova me sola zaba ti, ba zola vanda ya kukangama na Yehova si ba zola kuzwa “difuta ya  kukwenda na zulu faso Nzambi me pesa yawu na nzila ya Yesu Kristo.”—Flp. 3:13-16.

5. Ba yina ke kwenda zinga na zulu zola vanda na wapi makanisi?

⁵ Mpeve ya santu ke sadisa’a bisadi ya Yehova na kuvanda ya kukuluka (humble), kasi na lulendo ve. (Ef. 4:1-3; Kol. 3:10, 12) Na yina, ba zaba ti, ba ke zwa’a ve mpeve ya santu kulutila bisadi ya nkaka ya Yehova. Ba ke kanisa mpe ve ti, ba lutila bampangi ya nkaka na kuzaba Biblia. Ba lenda zonza ata fioti ve na muntu: ‘Yehova me sola munu, mpe mu ke banda kubaka dimpa mpe vinu na Memoriale’. Kasi, ba zola ndima na kukuluka nyonso ti, kaka ni Yehova muntu ke bokila’a bantu na kukwenda zinga na zulu.

6. Na kutadila 1 Bakorinto 4:7, 8, wapi yina zola vanda ndyatulu ya ba yina Yehova me sola?

⁶ Ata ba zaba ti ya ke bweso ya nene yina Yehova me pesa bawu, kasi ba ke vingila’a ve ti bampangi ya nkaka tala bawu neti bamfumu. (Flp. 2:2, 3) Ba zaba mpe ti ntangu Yehova sola’a bawu, yandi zabisa ve yawu na bantu ya nkaka. Na yina, muntu yina Yehova me sola, zola pamuka ve si ba ya nkaka ke na manginaka yandi. Yandi zaba ti, Biblia ke zonza na beto na kundima ve na mbangu muntu nyonso yina ke zonza’a ti, Nzambi me pesa yandi kisalu ya mfunu. (Luz. 2:2) Yandi zola vanda ve na matalana, ntangu yandi ke kutana na bampangi ya nkaka. Yandi zola’a zonza ve ti yandi ke mukristo yina ke kwenda na zulu. Mpe yandi zola sosa ve kutalana muntu ya mfunu samu Yehova me sola yandi.—Tanga 1 Bakorinto 4:7, 8.

7. Yinki ba yina Yehova sola’a ke manga’a kusala, mpe samu na yinki?

⁷ Bakristo yina Yehova me sola, ke kanisa’a ve ti, ba zola lutisa ntangu ya bawu kaka na bakristo ya nkaka yina Yehova sola’a, neti ba ke bantu ya muziki. Ba ke sosa’a ve bakristo ya nkaka yina ke kwenda mpe na zulu, samu ba zonzila kivuvu ya bawu, to samu ba longoka Biblia bawu na bawu. (Gal. 1:15-17) Kimvuka lenda vanda ve na bumosi si ba yina Yehova sola’a ke sala’a mambu ya faso yayi. Faso ya kusala yina, ke kwelana ve na mpeve ya santu, yina ke sadisa kimvuka ya Yehova na kuvanda na kizunu mpe bumosi.—Rom. 16:17, 18.

8. Samu na yinki beto zola sala keba na faso ya beto ya kubakila ba yina ke baka dimpa mpe vinu na memoriale? (Tanga mpe note ya yisi ya paje.)

⁸ Wapi faso beto zola bakila bampangi ya kento na ya bakala yina ke kwenda na zulu? Ya  ke yimbi na kukumisa muntu na faso ya kulutila, ata yandi ke mukristo yina Yehova sola’a mpe mpangi ya Yesu. (Mat. 23:8-12) Ntangu Biblia ke zonzila bakuluntu ya kimvuka, ya ke zonza’a na beto na “kulanda kifwani ya kiminu ya bawu,” kasi ya ke nimina’a beto na kutala ata muntu neti mfumu ya beto (Ebr. 13:7) Ya tsyeleka Biblia ke zonza’a ti, bakuluntu me “lunga na kuzwa buzitu ya kulutila.” Kasi, ya ke samu ba ke “ntwadisa na faso ya mbote” mpe ke “sala ngolo na kuzonza mpe na kulonga,” ya ke ve samu ba ke bakristo yina ke kwenda na zulu. (1 Tim. 5:17) Si beto pesa bampangi yina Yehova sola’a nkembo mpe si beto tula bawu meso na faso ya kulutila, ya lenda pesa bawu nsoni. * To, beto lenda nata bawu na kukuma na lulendo. (Rom. 12:3) Ata muntu na kati ya beto ke zola kusala kima yina lenda nata bampangi ya Yesu, na kusala mambu ya yimbi!—Luke 17:2.

9. Wapi faso beto lenda lakisa buzitu na ba yina Yehova me sola?

⁹ Wapi faso beto lenda lakisa buzitu na ba yina Yehova me sola? Beto zola yufula ve bawu, wapi faso Yehova sola bawu. Ya ke ve mambu ya beto, ya me bonga ve na beto na kuzaba yawu. (1 Tes 4:11; 2 Tes. 3:11) Mpe, beto zola kanisa ve ti babakala to bakento, bibuti to bantu ya nkaka ya dikanda ya bawu mpe, ke kwenda na zulu. Ata muntu ke butama’a na kivuvu ya kukwenda zinga na zulu. Ni Yehova muntu ke pesaka yawu. (1 Tes. 2:12) Beto zola bika mpe kuyufula bawu byuvu yina lenda nyongisa bawu. Na kifwani, beto zola yufula ve bakento ya bawu wapi faso ba ke kanisa’a, yina ba me zaba ti, na Paradis, babakala ya bawu ke vanda ve na bawu. Beto lenda ndima na ntima nyonso ti, na Paradis, Yehova ke “lungisa basantu ya [bantu] nyonso.”—Nku 145:16.

10. Wapi faso beto lenda bumba kimpeve ya beto si beto manga “kupesa nkembo na bantu”?

¹⁰ Beto ke bumba kimpeve ya beto si beto pesa ve bampangi yina Yehova sola’a lukumu ya kulutila. Samu na yinki? Biblia ke longa’a beto ti, bakristo ya nkaka yina Yehova me sola, lenda vanda dyaka ve ya kukangama na yandi. (Mat. 25:10-12; 2 Pi. 2:20, 21) Kasi si beto bika “kupesa nkembo na bantu,” beto ke kuma ata fioti ve bilandi ya bantu. Ata ya vanda ba yina ke kwenda na zulu, bakristo yina ke ya kuzabana mingi to yina ke sadila’a Yehova bamvula mingi. (Yude 16) Na yina, si bakristo yango ke dyaka ve ya kukangama na Yehova, to ba me basika na kimvuka, ya lenda nata ve beto na kusadila dyaka ve Yehova.

11. Yinki ke na kumina na nombre ya ba yina ke baka’a dimpa mpe vinu na Memoriale?

¹¹ Na bamvula yina me luta, nombre ya ba yina ke baka’a dimpa mpe vinu na Memoriale kuma fioti. Kasi na bamvula yayi, nombre ya bawu ke na kuma kaka mingi. Ya zola’a pesa beto boma? Ve. Beto tala samu na yinki.

12. Samu na yinki nombre ya ba yina ke baka’a dimpa mpe vinu zola talisa ve beto boma?

¹² “Yehova zaba bantu ya yandi.” (2 Tim. 2:19) Bampangi yina ke konteke ba yina ke baka’a dimpa mpe vinu kilumbu ya Memoriale, ke zaba’a ve nani ya tsyeleka Yehova me sola. Na kati ya nombre yina, ya ke na ba yina ke kanisa’a ti Yehova me sola bawu, kasi ba ke vunamaka. Na kifwani, bampangi ya nkaka yina vanda baka’a dimpa mpe vinu na ntama, ke baka’a dyaka ve yawu. Ba ya nkaka lenda vanda na maladi ya yintu to mambu ya  nkaka yina lenda nata bawu na kukanisa ti, ba ke kwenda yala na Yesu na zulu. Na yina, beto zaba ve mbote-mbote nombre ya bakristo yina Yehova me sola, yina ke ntete na ntoto.

13. Biblia ke zonza kwandi nombre ya bakristo yina Yehova sola’a yina ke vanda na ntoto ntangu bampasi ya nene ke banda?

¹³ Bakristo yina Yehova sola’a, ke vanda na bayinsi mingi na ntoto ntangu Yesu ke kwiza baka bawu. (Mat. 24:31) Biblia ke zonza’a ti na bantangu ya nsuka, nombre ya fioti ya ba yina Yehova sola’a, ke vanda ntete na zulu ya ntoto. (Luz. 12:17) Kasi ya ke zonzila’a ve nombre yina ba ke vanda ntangu bampasi ya nene ke banda (grande tribulation).

14. Faso ke na lakisa’a Baroma 9:11, 16, yinki beto ke na nsatu ya kuzaba na faso Yehova ke sola bakristo yina ke kwenda na zulu?

¹⁴ Yehova zaba na wapi ntangu yandi ke sola’a bakristo yina ke kwenda na zulu. (Rom. 8:28-30) Yehova banda kusola ba yina ke kwenda zinga na zulu na manima ya kuvumbuka ya Yesu na lufwa. Beto lenda zonza ti, bakristo nyonso ya siekle ya ntete, vanda na kivuvu ya kukwenda na zulu. Na manima ya siekle ya ntete, mingi ya ba yina vanda zonza ti ba ke bakristo, vanda ve bilandi ya Yesu ya tsyeleka. Na kati ya bamvula yina, bakristo ya tsyeleka vanda kaka ndambu. Ni bawu Yehova sola’a na kukwenda zinga na zulu. Ba vanda neti mbuma ya mbote yina Yesu zonza ti, ya ke kula na kati ya matiti ya yimbi. (Mat. 13:24-30) Na bilumbu yayi ya mansukina, Yehova ke na kontinye na kusola ba yina ke vanda na kati ya ba 144 000. * Na yina, si Nzambi ke na tala mbote na kusola ba ya nkaka tii bubu yayi,  ya tsyeleka beto zola tula ntima na ndwenga ya yandi. (Tanga Baroma 9:11, 16.) * Beto zola sala keba na kutadila ve bamambu faso bisadi yina Yesu zonzila’a na kifwani ya yandi. Ba vanda ve na kilengi samu ti mfumu futa bawu bongo mosi na ba yina sala nkaka ntangu fioti.—Mat. 20:8-15.

15. Ya ke ni bakristo nyonso yina ke kwenda na zulu ke “muumbu ya kukwikama mpe ya mayela” yina ke zonzila’a Matayi 24:45-47? Zonzila yawu.

¹⁵ Ya ke ve ba yina nyonso ke na kivuvu ya kuzinga na zulu ke “muumbu ya kukwikama mpe ya mayela.” (Tanga Matayi 24:45-47.) Faso na siekle ya ntete, bubu yayi mpe, Yehova na Yesu ke na sadila ndambu ya bakristo yina ke kwenda na zulu samu na kudikisa to kulonga bantu mingi. Na siekle ya ntete, kaka bakristo ndambu yina vanda na kivuvu ya kuzinga na zulu sonika’a kitini ya Biblia ya Grek. Bubu yayi, kaka na ndambu ya bakristo yina ke kwenda zinga na zulu, Yesu pesa’a kisalu ya “kupesa madya na ntangu yina me lunga.”

16. Yinki nge me longoka na artikle yayi?

¹⁶ Yinki beto me longoka na artikle yayi? Yehova zola kupesa luzingu ya ntangu nyonso awa na ntoto na bantu mingi. Kasi yandi me sola kaka bakristo ndambu samu na kuyala na Yesu na zulu. Yehova ke pesa bambote na bisadi ya yandi nyonso—ya vanda “Jwif” to “bantu kumi”—mpe kima yina yandi ke lomba’a na beto nyonso, ni kusadila misiku ya yandi, mpe kuvanda ya kukangama na yandi. Beto nyonso me lunga kuvanda ya kukuluka. Beto nyonso me lunga kusadila yandi kintwandi mpe na bumosi. Beto nyonso me lunga kusala bangolo samu kizunu vanda na kati ya kimvuka. Samu nsuka ya yinza me kuma pene-pene, beto lemba ve na kusadila Yehova mpe na kulanda Yesu mutindu “kivumka mosi ya bameme.”—Yoa. 10:16.