1. Adieyi Yave kasakula divangama omu lumbu yeto?

YAVE wasakula mu kuma kia lumbu yeto vo: “Wantu kumi muna ndinga zawonso za zula besimbinina, elo, besimbinina mvuatu a Nyuda, oku vo: ‘Kwenda tukwenda yeno, kadi tuwidi vo Nzambi una yeno.’” (Zak. 8:23) Muna sono kiaki, o “Nyuda” osunzulanga wantu ana Nzambi kekusanga muna mwand’avelela. Wantu awaya beyikilwanga mpe vo “Isaele a Nzambi.” (Ngal. 6:16) O “wantu kumi” besunzulanga awana bena ye vuvu kia zingila ova ntoto yakwele mvu. Bazeye wo vo Yave osambulanga e buka kia Akristu akuswa. Bebadikilanga dio se lau diampwena mu sambila Nzambi kumosi ye buka kiaki.

2. Aweyi o “wantu kumi” ‘bekwendelanga’ kumosi ye akuswa?

² Kana una vo ke dilendakana ko mu zaya e nkumbu za Akristu awonso akuswa bena ova ntoto, * awana bena ye vuvu kia zingila ova ntoto balenda “kwenda” ye akuswa. Aweyi tuzayidi wo? Bibila kivovanga vo “wantu kumi” “besimbinina mvuatu a Nyuda, oku vo: ‘Kwenda tukwenda yeno, kadi tuwidi vo Nzambi una yeno.’” E sono kiaki Nyuda mosi kiyikanga. Kansi, o mvovo “yeno” wantu ayingi uyikanga. Ediadi disongele vo o Nyuda kesunzulanga kaka muntu mosi ko, kansi buka kiawonso kia Akristu akuswa. Awana bena vo  ke akuswa ko besadilanga Yave kumosi ye akuswa. Ke bebadikilanga akuswa ko nze mfumu, kadi bazeye wo vo Yesu i mfumu au.—Mat. 23:10.

3. Nkia yuvu tubakila e mvutu mu longi diadi?

³ Wau vo Akristu akuswa bakinu ova ntoto vana vena o nkangu a Nzambi, akaka balenda kukiyuvula: (1) Aweyi akuswa bafwete kuyibadikilanga? (2) Aweyi tufwete badikilanga awana bedianga e mbolo yo nua e vinyu muna Luyindulu? (3) Nga tufwete tokana wau vo lutangu lwa awana bedianga e mbolo yo nua e vinyu mu wokela kaka lwina? E longi diadi divana e mvutu za yuvu yayi.

4. Nkia lulukisu lwasonama muna 1 Korinto 11:27-29 bafwete sungamenanga Akristu akuswa? Ekuma?

⁴ Akristu akuswa bafwete sungamenanga lulukisu luna muna 1 Korinto 11:27-29. (Tanga.) Aweyi Nkristu akuswa kalenda dila e mbolo yo nua e vinyu muna Luyindulu ‘lembi kala wafwana’? Ediadi dilenda vangama avo odidi e mbolo yo nua e vinyu, kansi ke zingilanga ngwizani ko ye nsiku mia Yave. (Ayib. 6:4-6; 10:26-29) Akristu akuswa bazeye wo vo bafwete sikila ye kwikizi avo bazolele tambula ‘o nsendo babokelelwa kwa Nzambi muna Kristu Yesu.’—Fili. 3:13-16.

5. Aweyi Akristu akuswa bafwete kuyibadikilanga?

 ⁵ Mwand’avelela a Yave usadisanga e selo yandi mu kala alembami, ke akwa lulendo ko. (Efe. 4:1-3; Kol. 3:10, 12) Muna kuma kiaki, Akristu akuswa ke bekuyibadikilanga ko vo basundidi akaka. Bazeye wo vo Yave ke vananga mwand’avelela kwa Akristu akuswa ko lutila una kevananga kwa selo yandi yankaka. Vana ntandu, ke beyindulanga ko vo yau betoma bakulanga malongi ma Bibila lutila akaka. Ke bafwete vovesa muntu ko vo yandi mpe okusilu muna mwanda ye kafwete yantika dia e mbolo yo nua e vinyu muna Luyindulu. Kansi, bafwete songanga lulembamu yo sungamena vo Yave kaka olenda sola muntu okwenda kuna zulu.

6. Landila e sono kia 1 Korinto 4:7, 8, aweyi Akristu akuswa bafwete kadilanga?

⁶ Kana una vo Akristu akuswa bebadikilanga dio se lau diampwena wau batambula e mboka ya kwenda kuna zulu, ke bevingilanga ko vo batundidikwa kwa akaka. (Fili. 2:2, 3) Bazeye wo mpe vo vava Yave kabakusa muna mwanda, kazayisa dio kwa muntu ankaka ko. Muna kuma kiaki, o Nkristu akuswa ke sivikanga ko vava muntu kekatikisanga vo wakuswa muna mwanda. Ozeye wo vo e Bibila kikutuvovesanga twalembi kwikila mu nzaki ndiona ovovanga vo kiyekwa kiampwena kavewa kwa Nzambi. (Lus. 2:2) Wau vo Nkristu akuswa ke vingilanga ko vo akaka bamvana zitu wasaka, ke kuyisananga ko kwa wantu ana kewanananga yau mu nkumbu antete vo yandi Nkristu akuswa. Kafwete kuyisana ko wau vo ku zulu kekwenda.—Tanga 1 Korinto 4:7, 8.

7. Nkia mambu ke bevanganga ko Akuswa? Ekuma?

⁷ Akristu akuswa ke beyindulanga ko vo bafwete kalanga kaka vamosi ye akwau akuswa nze vika sia vo buka kia tá somba. Ke bevavanga Akristu akaka ko akuswa muna mokena una bakusilwa yovo kutakana mu longoka Bibila. (Ngal. 1:15-17) Avo bavangidi wo, e nkutakani ke ikala ye ungudi ko. Ke besala mpe ntwadi ko yo mwand’avelela, owu usadisanga nkangu a Nzambi mu kala mu luvuvamu yo ungudi.—Roma 16:17, 18.

8. Ekuma tufwete vengela e fu kia tundidika awana bedianga e mbolo yo nua e vinyu muna Luyindulu? (Tala mpe e mvovo mina vana yand’a lukaya.)

⁸ Aweyi tufwete badikilanga mpangi zeto ana bakuswa muna mwanda? Ke diambote ko mu tundidika muntu, kana nkutu vo mpangi akuswa a Kristu. (Mat. 23:8-12) Vava  Diambu dia Nzambi divovelanga akuluntu, dikutukasakesanga vo ‘twatanginina lukwikilu lwau,’ kansi ke dikutuvovesanga ko vo twabadikila muntu nze mfumu eto. (Ayib. 13:7) Dialudi vo Diambu dia Nzambi divovanga vo mpangi zankaka ‘bafwete toma zitiswanga.’ Kansi i mu kuma kia sia vo ampangi awaya “betoma filanga e nkutakani” yo ‘funtuka muna vova yo longa,’ ke mu kuma kia sia ko vo Akristu akuswa bena. (1 Tim. 5:17) Avo tuvene zitu wasaka kwa Akristu akuswa, tulenda kubafusulwisa e nsoni. * Vana ntandu, tulenda kubafila mu kituka akwa lulendo. (Roma 12:3) Ke mosi ko mu yeto ozolele vanga diambu dilenda fila mpangi akuswa a Kristu mu vanga vilwa wau.—Luka 17:2.

9. Aweyi tulenda songela vo tuzitisanga Akristu akuswa?

⁹ Aweyi tulenda songela vo tuzitisanga awana bakuswa kwa Yave muna mwanda? Muna lembi kubayuvulanga una bakitukila Akristu akuswa. E diambu diadi dia muntu yandi kibeni. Ke tuna yo nswa ko wa zaya dio. (1 Tes. 4:11; 2 Tes. 3:11) Ke tufwete yindulanga ko vo akazi au ngatu mase yovo yitu yau Akristu akuswa mpe. E vuvu kena kiau o muntu ke vua ko ditukanga kwa yitu yandi. E vuvu kiaki kwa Yave kitukanga. (1 Tes. 2:12) Tufwete mpe venganga yuvula mambu malenda kendeleka akaka. Kasikil’owu, ke tufwete yuvulanga ko kwa nkento a mpangi akuswa una kemonanga wau keyindulanga e ntangwa kesinga zinga yakwele mvu ova ntoto kondwa kwa yakala diandi. Tuna ye ziku vo muna nz’ampa, Yave ‘olungisa e zolela ya awonso bena o moyo.’—Nku. 145:16.

10. Aweyi tulenda kuyitanina avo tuvengele e fu kia ‘sivika wantu’?

¹⁰ Avo tuvengele e fu kia tundidika Akristu akuswa, yeto kibeni mpe tukuyitanina. Mu nkia mpila? Diambu dia Nzambi divovanga vo dilenda kala vo Akristu akaka akuswa ke besikila ye kwikizi ko. (Mat. 25:10-12; 2 Pet. 2:20, 21) Avo tuvengele e fu kia ‘sivika wantu,’ ke tukituka alandi a wantu ko, kiakala Akristu akuswa, ampangi ana batomene zayakana yovo ana besadilanga Yave se mvu miayingi. (Yuda 16, mvovo vana yand’a lukaya.) Kadi, avo bakitukidi minkondwa kwikizi yovo bayambwidi e nkutakani, ke tuvidisa lukwikilu lweto ko ngatu yambula sadila Yave.

11. Nkia diambu dimonekanga muna lutangu lw’awana bedianga e mbolo yo nua e vinyu muna Luyindulu?

¹¹ Mu mvu miayingi, lutangu lw’awana badianga e mbolo yo nua e vinyu muna Luyindulu kuluka lwakulukanga. Kansi owau, lutangu lwalu mu wokela kaka lwina konso mvu. Nga tufwete tokana mu kuma kia diambu diadi? Ve. Yambula twazaya e kuma.

12. Ekuma ke tufwete tokanenanga ko mu kuma kia lutangu lw’awana bedianga e mbolo yo nua e vinyu muna Luyindulu?

¹² “Yave ozeye awana bavuilu kwa yandi.” (2 Tim. 2:19) Nswaswani yo Yave, ampangi ana betanganga o wantu bedianga e mbolo yo nua e vinyu muna Luyindulu ke bezayanga ko kana nani kikilu i kuswa. Muna kuma kiaki, muna lutangu lwalu mukalanga mpe y’awana bekuyibadikilanga vo akuswa, kinga ke akuswa kwau ko. Kasikil’owu, akaka muna awana badianga e mbolo  yo nua e vinyu, owau ke bevanganga wo diaka ko. Akaka nanga kimbevo kia ntu beyelanga yovo ngindu zabendomoka bekalanga zau zikubafilanga mu kwikila vo ku zulu bekwenda mu yala kumosi yo Kristu. Ozevo, ke tulendi zaya ko lutangu lwasikididi lwa Akristu akuswa ana bakinu ova ntoto.

13. Adieyi Bibila kivovanga mu kuma kia lutangu lwa Akristu akuswa bekala ova ntoto vava mpasi zayingi ziyantika?

¹³ Vekala ye Akristu akuswa mu fulu yayingi ova ntoto vava Yesu kekwiza kubanata kuna zulu. (Mat. 24:31) Bibila kisonganga mpe vo muna lumbu yambaninu, vekala ye lutangu lwakete lwa Akristu akuswa ova ntoto. (Lus. 12:17) Kansi, ke kivovanga ko kana vo akwa bekala ova ntoto vava e mpasi zayingi ziyantika.

14. Nze una usonganga e sono kia Roma 9:11, 16, adieyi tufwete zaya mu kuma kia awana bekuswanga muna mwanda?

¹⁴ Yave ozayanga e ntangwa kazolele sola akuswa. (Roma 8:28-30) Yave wayantika sola akuswa vava Yesu kafuluka. Nanga muna tandu kiantete, Akristu awonso akieleka akuswa bakala. Mu mvu miayingi, ndonga mun’awana bayibadikilanga vo Akristu ke balandanga kikilu Kristu ko. Kana una vo i wau, muna mvu miami Yave wakusa awana bakala vo Akristu akieleka. Bakala nze mbongo ambote ina Yesu kayika vo imena kumosi ye mbongo ambi. (Mat. 13:24-30) Mu lumbu yayi yambaninu, Yave wakinu sola wantu mu lungisa lutangu lwa 144.000. *  Muna kuma kiaki, avo lumbu yakete kaka vitila mbaninu yiza, Nzambi obakidi nzengo za sola akaka muna lungisa lutangu lwa akuswa, ke tukatikisa ngangu zandi ko. (Tanga Roma 9:11, 16.) * Tufwete keba muna lembi vanga nze una bavanga asadi ana Yesu kayika muna kingana kiandi. Bayidima mu kuma kia mfutu una mfumu a mpatu a vinyu kavana kw’awana basala ola mosi kaka.—Mat. 20:8-15.

15. Nga Akristu awonso akuswa bena muna buka kia “ntaudi akwikizi yo lulungalalu” oyikwanga muna Matai 24:45-47? Sasila.

¹⁵ Ke awonso ko bena ye vuvu kia kwenda kuna zulu i bena muna buka kia “ntaudi akwikizi yo lulungalalu.” (Tanga Matai 24:45-47.) Nze muna tandu kiantete, o unu muna dikila yo longa ndonga, Yave yo Yesu wantu akete kaka besadilanga. Akete kaka muna Akristu akuswa muna tandu kiantete basadilwa mu soneka e Sono ya Kingerekia ya Kikristu. Omu lumbu yeto, akete kaka muna Akristu akuswa bena ye kiyekwa kia vana nkangu a Nzambi “madia muna ntangwa ifwene.”

16. Adieyi olongokele mu longi diadi?

¹⁶ Adieyi tulongokele mu longi diadi? Yave wabak’e nzengo za vana moyo a mvu ya mvu ova ntoto kwa ayingi muna selo yandi. Akete kaka bekwenda ku zulu mu yala kumosi yo Yesu. Yave ovana nsendo kwa selo yandi yawonso, kiakala “Nyuda” yovo “wantu kumi.” Ovavanga vo balemvokela e nsiku miau mimosi yo sikila ye kwikizi. Yau awonso bafwete kala alembami yo kunsadila kumosi kuna ungudi. Yau awonso bafwete sianga ngolo za tatidila luvuvamu muna nkutakani. Wau vo e mbaninu ifinamene, yambula yeto awonso twakwamanana sadila Yave yo landa Kristu nze “kambi dimosi.”—Yoa. 10:16.