MUTWI WAKWIIYA 5
Tutooya Andimwe
“Tulisuni kuya andimwe, mukwiinga twanyumfwa ayi Lesa ali andimwe.”—SEKA. 8:23, NWT.
LWIIMBO 26 Mwakacitila Ndime
NSHESHI TWIIYE *
Ba mbelele shimwi (“bantu likumi”) balicite coolwe cakusebensela Yehova pomwi abananikitwe (“mu Juda”) (Amubone mapalagilafu 1-2)
1. Ino nciinshi Yehova ncakaamba ayi cilaakucitika munshiku shino?
YEHOVA wakaamba bushinshimi bwa shitoocitika munshiku shino ayi: “Bantu bali likumi kuswa mumishobo yoonse ya mushishi balaakucata, ee, balaakucatisha mungaanjo wamu Juda, akwaamba ayi: ‘Tulisuni kuya andimwe, mukwiinga twanyumfwa ayi Lesa ali andimwe.’” (Seka. 8:23 NWT) “Mu Juda” atokwiimikaninaako abo boonse Lesa mbwaakananika amushimu usalashi. Cimwi ciindi beetwa ayi “Isilaeli wakwe Lesa.” (Gala. 6:16) “Bantu likumi” baleemikaninaako baabo boonse bacite bulindilishi bwakuba abuumi butamaani pacishi capanshi. Balicishi kwaamba ayi Yehova wakasala bamakwesu aba bananikitwe, aboobo balabona ayi ncoolwe cinene abuumbi kusebensela pomwi ambabo.
2. Ino “bantu likumi” “balaya” buyani abananikitwe?
2 Nabi kwaamba ayi inga tacikonsheki kushiba meena abananikitwe boonse bali pacishi capanshi, * abo bacite bulindilishi bwakukala pacishi capanshi inga “baya” abaabo bananikitwe. Munshila nshi? Baibo ilaamba ayi “bantu likumi . . . balaakucatisha mungaanjo wamu Juda, akwaamba ayi: ‘Tulisuni kuya andimwe, mukwiinga twanyumfwa ayi Lesa ali andimwe.’” Nabi kwaamba ayi vesi yaamba ayi wamu Juda, liswi lyakwaamba ayi “andimwe” alimwi amaswi akwaamba ayi “ali andimwe,” alatondesha ayi teshi muntu womwibo. Aboobo mu Juda tatokwiimikaninako muntu womwi, sombi aleemikaninako Beneklistu boonse bananikitwe. Abo batacite bulindilishi bwakuya kwiculu abalo balasebensela Yehova pomwi abananikitwe. Nacibi boobo, tababoni ayi bananikitwe mbobamatanjilili babo mukwiinga balicishi kwaamba ayi Yesu Ngomutanjilili wabo.—Mate. 23:10.
3. Ino njimiipusho nshi njeshi tubandike mumutwi uyu?
3 Mukwiinga Beneklistu bananikitwe bamwi bacili pacishi capanshi, mpashi bamwi inga beepusha ayi: (1) Ino bananikitwe balyeelete kunoolibona buyani? (2) Ino abo banwako waini na kulyako shinkwa pa Ciibalusho, tulyeelete kunoobabona buyani? (3) Sa tulyeelete kulisukama na namba yabaabo balyaako itooya panembo? Tutobandika shikumbulo kumiipusho iyi mumutwi uyu.
INO BANANIKITWE BALYEELETE KUNOOLIBONA BUYANI?
4. Ino ngamaswi nshi akucenjesha ngotucana pa 1 Bene Kolinto 11:27-29 bananikitwe ngobeelete kubikila maano, alimwi ino nceebonshi?
4 Beneklistu bananikitwe balyeelete kubikila maano abuumbi ku maswi akucenjesha ngotucana pa 1 Bene Kolinto 11:27-29. (Amubelenge.) Ino Mwineklistu unanikitwe inga walya buyani shinkwa akunwa waini “munshila iteelete” pa Ciibalusho? Inga wacita boobo na katakonkeli njiisho shakwe Yehova shiluleme. (Ebul. 6:4-6; 10:26-29) Bananikitwe balicishi kwaamba ayi balyeelete kutolelela kushomeka kwaamba ayi bakatambule “cilambu ca bwiite bwa kwiculu bwakaswa kuli Lesa kwiinda muli Klistu Yesu.”—Fili. 3:13-16.
5. Ino Beneklistu bananikitwe balyeelete kunolinyumfwa buyani?
5 Mushimu usalashi wakwe Yehova ulacafwa basebenshi bakwe kuba bantu baliceesha kuteshi balisumpula. (Efe. 4:1-3; Kolo. 3:10, 12) Aboobo bananikitwe tabaliboni ayi balindite Beneklistu bamwi. Balishi kwaamba ayi Yehova taana kubapa mushimu usalashi uunji kwiinda basebenshi bakwe bamwi. Tabalinyumfwi ayi balo mbobanyumfwishisha cancine camu Baibo kwiinda bamwi. Alimwi tabacite nkusu shakulwiita bamwi ayi amwebo mwakananikwa aboobo mulyeelete kutalika kunwa waini akulyako shinkwa pa Ciibalusho. Sombi balaliceesha mukwiinga balishi kwaamba ayi Yehova mwiine ngoosala baabo beshi bakaye kwiculu.
6. Kweelana a 1 Bene Kolinto 4:7, 8, ino Beneklistu bananikitwe balyeelete kuleya nshi?
6 Nabi kwaamba ayi bananikitwe balishi ayi kuya kwiculu ncoolwe cinene abuumbi, tabalangili ayi banoolemekwa abamwi. (Fili. 2:2, 3) Alimwi balicishi kwaamba ayi Yehova ndyaakabasala taakwe koolobesha kubantu boonse. Aboobo bananikitwe tabakankamaniiwo na bamwi baalilwa kubashoma ayi bakananikwa. Balishi kwaamba ayi Baibo ilatulwiita ayi tatweelete kufwambaana kushoma na muntu watulwiita ayi wakatambula mukuli ulibetele kuswa kuli Lesa. (Ciyu. 2:2) Mukwiinga unanikitwe taasuni bantu kunoomubona anga ulayandika kwiinda bamwi, taalwiiti baabo mbwaakumanya ciindi cakutaanguna ayi wakananikwa. Alimwi taalilumbaishi ceebo cakwaamba ayi wakananikwa.—Amubelenge 1 Bene Kolinto 4:7, 8.
7. Ino nshiinshi bananikitwe nshobeelete kuleya, alimwi ino nceebonshi?
7 Beneklistu bananikitwe tabeelete kulinyumfwa ayi balyeelete kunoocanikabo abaabo bakananikwa, anga balicite kabunga kabananikitwebo beenka beenka. Tabayi bulangoola bananikitwe babyaabo kwaamba ayi banoobandika mbuli Lesa mbwaakabasala, na kupanga kakoto kakunookwiiya Baibo. (Gala. 1:15-17) Kucita boobo inga kwapa kwaamba ayi mutabi lucatano mulibungano. Alimwi nkokwaamba ayi tabatoosebensela pomwi amushimu usalashi, uyo upa kwaamba ayi bantu banooba muluumuno alucatano.—Loma. 16:17, 18.
INO BANANIKITWE TULYEELETE KUNOOBABONA BUYANI?
Tatweelete kunoobona bananikitwe na uli woonse utanjilila bweenka mbuli bantu mbobabona bantu bapukite (Amubone palagilafu 8) *
8. Ino nceebonshi tulyeelete kucenjela ambotubona bamakwesu abenankashi balyako shinkwa akunwako waini pa Ciibalusho? (Amubone maswi amweela.)
8 Ino bamakwesu abenankashi bananikitwe tulyeelete kunoobabona buyani? Tatweelete kunoobabona anga balindite bamwi, nabi kwaamba ayi mbamakwabo Klistu bakananikwa. (Mate. 23:8-12) Na Baibo yaamba pabamanene, ilatuyuminisha ayi tulyeelete “kukonkela lushomo lwabo,” sombi taina kwaamba ayi tulyeelete kunokonkela muntu mbuli mutanjilili wesu. (Ebul. 13:7) Ncakwiila kwaamba ayi Baibo ilaamba ayi bamwi “baleela kupekwa bulemu abuumbi.” Nacibi boobo, teshi ceebo cakwaamba ayi mbananikitwe, sombi nceebo cakwaamba ayi ‘balatanjilila kabotu alimwi akusebensa cankusu mukwaamba akwiisha.’ (1 Timo. 5:17) Kulumbaisha bunene bananikitwe inga kwabapa kunonyumfwa nsoni. * Alimwi ciinditeewo kubica ncakwaamba ayi inga twalengesha ayi batalike kulisumpula. (Loma. 12:3) Ano taakuwo uli woonse weenga wasuna kwaamba ayi alengeshe womwi wa bamakwabo Klistu bananikitwe kuba bantu balisumpula!—Luka 17:2.
9. Ino inga twatondesha buyani ayi tulalemeka bananikitwe?
9 Ino inga twatondesha buyani ayi tulalemeka bananikitwe bakwe Yehova? Tatweelete kubeepusha mbocakalinga kwaamba ayi bananikwe. Mukwiinga aya ngamakani atakumi muntu umwi uli woonse sombibo mwiine eenka. (1 Tesa. 4:11; 2 Tesa. 3:11) Alimwi tatweelete kunoyeeya ayi mpashi bakaabo na beebaabo, bashali, na mukwashi woonse abalo balinanikitwe. Taakuwo muntu weenga wapyana bulindilishi bwa kuya kwiculu. Bulapekwa kuswa kuli Yehova. (1 Tesa. 2:12) Tulyeelete kuleya kwiipusha miipusho yeenga yakalasha bamwi. Kucakubonenaako, tatweelete kwiipusha nankashi weebetwe kumukwesu unanikitwe ayi ino cilanyumfwika buyani kulangila kuba abuumi butamaani pacishi capanshi kwakubula beebaanu? Mukwiinga tulishomete cakutatoonsha kwaamba ayi mucishi cipya, Yehova ‘ulaakushisanina kabotu shoonse nshaakalenga.’—Kulu. 145:16.
10. Ino kuleya kubona bamwi ayi balindite bamwi inga kwatushitilisha buyani?
10 Kuleya kubona Beneklistu bananikitwe ayi balindite bamwi, kulatushitilisha sobeene. Munshila nshi? Baibo ilaamba ayi bananikitwe bamwi inga baalilwa kutolelela kushomeka. (Mate. 25:10-12; 2 Pita 2:20, 21) Aboobo na twaleya kubona bamwi ayi balayandika kwiinda bamwi, teshi tukanoobakonkelela, kwiilikaawo a Beneklistu bashibikitwe abuumbi na abo basebensela Yehova kwa myaaka iinji. (Judi 16) Lyalo na cacitika ayi baalilwa kutolelela kushomeka nabi na baswa mulibungano, teshi tukaboolele mwisule na kucileka kusebensela Yehova.
SA TULYEELETE KULISUKAMA NA NAMBA YABAABO BALYAAKO ITOOYA PANEMBO?
11. Ino nshiinshi shacitika ku namba yabaabo beshikulyako shinkwa akunwako waini pa Ciibalusho?
11 Kwa myaaka iinji, namba yabaabo balyako shinkwa akunwako waini pa Ciibalusho yakalinga kuya buceyelaako. Ano kutalikabo mumyaaka yaconoono, namba iyi yatolelela kuya panembo mwaaka amwaaka. Ano sa tulyeelete kulisukama asheeshi? Sobwe. Atubandike ncotuteelete kulisukamina.
12. Ino nceebonshi ncotuteelete kulisukamina a namba ya baabo beshikulyako shinkwa na kunwako waini pa Ciibalusho?
12 ‘Yehova ulibeshi baakwe.’ (2 Timo. 2:19) Mubupusano a Yehova, bamakwesu beshikubelenga baabo balyako shinkwa akunwako waini pa Ciibalusho, inga tabashibiwo na ncakwiila muntu wakananikwa. Aboobo panamba iyi pali abaabo beshikubona anga bakananikwa sombi tabananikitwe. Kucakubonenaako, bamwi bakalinga kulyako kale kale bakacileka mukuya kwaciindi. Bamwi balaba amapensho mumiyeeyo ayo abapa kunoobona anga balaakunolela pomwi a Klistu kwiculu. Aboobo namba iine ya bananikitwe bali pacishi capanshi taishibikitwe kabotu.
13. Sa Baibo ilaamba namba ya bananikitwe beshibakanooli pacishi mapensho anene aakutalika?
13 Kulaakuba bananikitwe mumisena iinji pacishi capanshi Yesu ndyeshi akese mukubabwesa akubatola kwiculu. (Mate. 24:31) Baibo ilaamba ayi munshiku shakweelaako kulaakuba bananikitwe baniini pacishi capanshi. (Ciyu. 12:17) Sombi tayaambiwo na mbongaye beshibakanooli pacishi capanshi mapensho anene aakutalika.
Ino nshiinshi nshotweelete kucita na umwi walyako shinkwa na kunwako waini pa Ciibalusho? (Amubone palagilafu 14)
14. Kweelana a Bene Loma 9:11, 16, ino nshiinshi nshetutokwiiya pamakani akusala bananikitwe?
14 Yehova ngooshi ciindi cakusala bananikitwe. (Loma. 8:28-30) Yehova wakatalika kusala bananikitwe pesule lyakubushikwa kwakwe Yesu. Citoboneka kwaamba ayi muciindi ca batumwi, Beneklistu bancine boonse bakalinga bananikitwe. Pesule lya myaaka iinji kuswa ciindi Yehova ndyaakatalika kusala bananikitwe, bantu baanji bakalinga kuliita ayi mBeneklistu tabakalinga kukonkela Klistu. Nacibi boobo, kwakalinga bamwi bakalinga kushomeka abo Yehova mbwaakananika. Bakalinga anga ngu witi Yesu ngwakaamba ayi ulaakumena pomwi a nsaku. (Mate. 13:24-30) Nabibo munshiku shino shakweelaako, Yehova watolelela kusala baabo beshi bakabe lubasu lwaba 144,000. * Aboobo na Lesa wasala bamwi ndyekwacaalabo paniini kwaamba ayi mamanino ashike, inga tatutoonshi busongo bwakwe. (Amubelenge Bene Loma 9:11, 16.) * Tulyeelete kucenjela kwaamba ayi tutabi anga mbasebenshi balya Yesu mbwaakaambawo mucikoshanyo cimwi. Bakatongooka ceebo cakwaamba ayi uyo wakabanjisha ncito wakabapa malipilo eelene angakapa baabo bakacaalila kunjila ncito.—Mate. 20:8-15.
15. Sa bananikitwe boonse bali mulikoto lya “musebenshi ushomeka alimwi ucite maano,” wakaambwa pa Mateyo 24:45-47? Amusansulule.
15 Teshi bananikitwe boonse babete mulikoto lya “musebenshi ushomeka alimwi ucite maano.” (Amubelenge Mateyo 24:45-47.) Bweenka mbuli muciindi ca batumwi, amunshiku shino Yehova aYesu batosebensesha bamakwesu baniinibo kubamba shakulya shakumushimu na kwiisha bantu baanji. Muciindi ca batumwi Beneklistu bananikitwe baniinibo mbobakalemba Malembo a Bwineklistu amuci Giliki. Amunshiku shino, mBeneklistu bananikitwe baniinibo bakapekwa mukuli wa kubambila bantu bakwe Lesa “shakulya sha paciindi ceelete.”
16. Ino mweeya nshi mumutwi uyu?
16 Ino tweeya nshi mumutwi uyu? Yehova alaakupa basebenshi bakwe baanji buumi butamaani pano peenka pacishi capanshi, alimwi wakasala bamwi baniini kwaamba ayi bakanoolela a Yesu kwiculu. Yehova alapa shilambu kubasebenshi bakwe boonse—abo beemikaninaako “mu Juda” alimwi abaabo beemikaninaako “bantu likumi”—alimwi alisuni kwaamba ayi boonse banookonkela milawo yomwi akutolelela kushomeka. Boonse balyeelete kuba bantu baliceesha. Balyeelete kusebensela pomwi mulucatano. Alimwi soonse tulyeelete kusebensa cankusu kwaamba ayi tunoonyumfwana abamakwesu abenankashi. Ndyetuli pafwiifwi amamanino, atutolelele kusebensela Yehova akukonkela Klistu mbuli “litanga lyomwi.”—Joni 10:16.
^ par. 5 Mwaaka uno Ciibalusho ca lufu lwakwe Klistu cilaakubako pa Cibili pa 7 April. Ino tulyeelete kubabona buyani abo beshi bakanweko waini akulyako shinkwa pa Ciibalusho? Sa tulyeelete kulisukama na namba yabaabo balyaako itooya panembo? Tutobandika shikumbulo kumiipusho iyi mumutwi uyu, ucite makani akaswa mu Njashi Yamulindilishi ya January 2016.
^ par. 2 Kweelana a Kulumbaisha 87:5, 6, mpashi kunembo Lesa alaakuyubulula meena abaabo beshibakanoolela kwiculu pomwi a Yesu.—Loma. 8:19.
^ par. 8 Amubone kabokosi kalembetwe ayi “Lusuno ‘Talupi Kubula Bulemu’” kuswa mu Njashi Yamulindilishi yamu Cibemba ya January 2016.
^ par. 14 Nabi kwaamba ayi Milimo 2:33 ilatondesha ayi Yesu ngootila mushimu usalashi pa bananikitwe, Yehova ngoobasala.
^ par. 14 Kwaamba ayi mushibe shiinji, amubone Njashi Yamulindilishi, yamu Cibemba ya May 1, 2007 palubasu lwa “Miipusho Kuswa Kubeshikubelenga.”
LWIIMBO 34 Kweenda Mubululami
^ par. 56 BUSANSULUSHI BWACIKOPE: Amuyeeye kwaamba ayi shikwiimikaninaako ma ofesi esu anene amukaakwe bali kukubungana kunene, lyalo bashingulukwa abaabo basuni kubakopa. Uku nkutatondesha bulemu!
